Categoría: Parlamento de Galicia

O deputado do Grupo Popular Argimiro Marnotes criticou hoxe no Parlamento galego a postura totalmente contraria ao que están a demandar os funcionarios da Administración local con habilitación nacional, que rexeitan o traspaso de competencias relacionadas coas súas materias profesionais ás comunidades autónomas.

Argimiro Marnotes considerou “preocupante que o Goberno de Pedro Sánchez prime as cuestións partidistas e siga no seu empeño de ceder, á carta e ás costas das restantes comunidades autónomas, as competencias sobre os funcionarios habilitados nacionais primeiro ao País Vasco e agora a Cataluña”. “Ademais, resulta sorprendente que o fagan en contra dos colectivos profesionais que xa manifestaron a súa oposición a esta nova posible cesión a Cataluña, advertindo tamén da súa inconstitucionalidade”, apuntou.

“O Goberno de España paga prevendas aos seus socios independentistas, sabedores do inconstitucional que resulta e do fraccionamento de igualdade de oportunidades para uns funcionarios que son prioritarios, esenciais e insubstituíbles na Administración local”, manifestou.

COBERTURA DAS PRAZAS VACANTES

O deputado popular incidiu que “a Xunta traballa para axudar aos concellos galegos a cubrir os seus postos de traballo reservados a funcionarios con habilitación nacional” e mostra disto son as medidas postas en marcha desde o ano 2017 para evitar que os concellos se queden sen este persoal. En concreto, Marnotes lembrou a creación dunha bolsa de interinos para a cobertura destes postos de funcionarios, a través da que se fixeron máis de 390 chamamentos e logrando cubrir uns 180 postos reservados con interinos pertencentes ás bolsas autonómicas galegas.

“É imprescindible que se garanta a cobertura de todas as prazas vacantes de funcionarios con habilitación nacional existentes en Galicia mediante a incorporación das mesmas nas ofertas de emprego público, correspondendo a competencia ao Goberno do Estado”, sinalou Argimiro Marnotes, quen lamentou que “o número de prazas ofertadas por parte do Goberno central resulta sempre totalmente insuficiente, quedando sen cubrir cerca do 25 por cento das prazas convocadas”.

En concreto, asegurou que “a oferta adicional de 1.000 prazas aprobada polo Goberno central resulta claramente insuficiente para cubrir todas as vacantes que, segundo datos do Ministerio competente, ascenden a 4.020 en todo o territorio nacional”. Neste sentido, criticou que “nesta oferta adicional a Galicia só lle corresponde 31 prazas, baixo un reparto totalmente arbitrario e partidista, que non chegará para cubrir todas as necesidades dos concellos galegos”.

“Non se entende que non se proceda por parte do Goberno central a dar resposta a esta importante necesidade, sobre todo si se ten en conta que as retribucións das prazas vacantes de secretaría, intervención e tesourería son satisfeitas polas propias entidades locais e atópanse consignadas nos seus orzamentos, ao tratarse de postos de existencia preceptiva”, rematou.

O Grupo Popular solicitará no Pleno da vindeira semana que o Goberno central traspase a Galicia as competencias executivas en materia das autorizacións iniciais de traballo das persoas migrantes para poder habilitar un proceso que reduza os prazos para optar a esta documentación. Así mesmo, pedirá ao Goberno de España a adopción de diversas medidas para que o treito internacional do río Miño siga sendo un motor de desenvolvemento sostible, unha referencia de equilibrio ambiental e un exemplo de cooperación internacional entre Galicia e Portugal.

Ao remate da Xunta de Portavoces, o portavoz popular, Alberto Pazos, informou que a sesión plenaria dará comezo coa segunda votación para a elección de María Concepción Pombo Romero como nova directora xeral da Corporación de Servizos Audiovisuais de Galicia, unha vez que non anterior Pleno nos saíu adiante a súa candidatura ao non contar cos votos dos dous terzos dos deputados. Nesta ocasión será necesario o voto dunha maioría de tres quintos dos deputados e, de non conseguilo, a elección da nova directora xeral volverá ao Pleno seguinte, onde só será necesario a maioría absoluta para a súa elección definitiva.

O Pleno continuará coa comparecencia da conselleira do Medio Rural, a petición propia e para dar conta das oportunidades e vantaxes que ofrece o rural galego, onde a Xunta está a facer un esforzo importante para garantir o relevo xeracional e conseguir un mellor futuro da actividade agrogandeira.

Dentro do apartado das proposicións non de lei, o Grupo Popular centrará a súa primeira iniciativa na solicitude á Xunta para que inicie os trámites para reclamar ao Goberno de España o traspaso das competencias executivas en materia das autorizacións iniciais de traballo das persoas migrantes, co fin de axilizar todo o procedemento e acadar o seu correcto asentamento na Comunidade galega e a súa plena disposición para incorporarse ao mercado de traballo.

DOCUMENTO PIONEIRO

“O Goberno galego é consciente da falta de man de obra que existe neste momento para satisfacer a demanda de traballadores das empresas e para iso rubricou un documento pioneiro con varios países hispanoamericanos para favorecer a atracción de traballadores e traballadoras, dunha maneira ordenada e atendendo ás necesidades das empresas”, lembrou o portavoz popular.

Alberto Pazos explicou que “este é o primeiro paso pero fai falta pechar un proceso tutelado desde o inicio e onde participen tanto as administracións de orixe como a de destino do traballador, así como as empresas galegas con necesidade de incorporar talento e que poidan realizar ofertas de contratación nos países de orixe dos traballadores migrantes”.

A segunda das proposicións non de lei do Grupo Popular incorporadas á orde do día da sesión plenaria ten como obxectivo que o Goberno de España leve adiante unha serie de actuacións, de xeito coordinado co Goberno de Portugal, para que o treito internacional do río Miño siga sendo un motor de desenvolvemento sostible, referencia de equilibrio ambiental e exemplo de cooperación entre países.

“O Goberno galego leva anos demostrando o seu compromiso coa protección e posta en valor do río Miño, impulsando actuacións en materia de saneamento, conservación ambiental, promoción turística e apoio ao deporte náutico”, salientou o portavoz popular, quen apuntou que “quedan cuestións por facer que, pola natureza transfronteiriza deste río esixen unha actuación máis coordinada entre as administracións e organismos con competencias nesa materia”.

REUNIÓN COS CONCELLOS AFECTADOS

En concreto, Alberto Pazos falou de cuestións como a análise dos efectos das oscilacións de caudal sobre a fauna piscícola, a proliferación de especies exóticas invasoras, a sedimentación do leito fluvial pola prohibición da dragaxe, as dificultades de navegación ou a necesidade dunha actualización normativa para a navegación e transporte fluvial de pasaxeiros.

Deste xeito, a proposta do Grupo Popular demanda, en primeiro lugar, que o Goberno de España asuma as súas competencias nesta materia e atenda a solicitude dunha reunión feita polos alcaldes de todos os concellos afectados para abordar estas problemáticas existentes no tramo internacional do río Miño.

Ademais, a iniciativa solicita ao Goberno central que analice o cumprimento do caudal ecolóxico mínimo e o impacto das oscilacións bruscas de caudal sobre a fauna piscícola; que aborde, en colaboración coas autoridades portuguesas, a prevención e control das especies exóticas e invasoras para preservar a biodiversidade autóctona; que promova a recuperación da dragraxe controlada e medioambientalmente sostible do treito internacional do río Miño, para garantir a navegabilidade e a seguridade; que facilite o cumprimento das obrigas en materia de xestión da biomasa; e que actualice o regulamento de navegación do río Miño, para adecualo á realidade actual das actividades recreativas e deportivas, así como a diversidade de embarcacións.

ESTUDOS MEDICINA, VIVENDA E COLECTIVO LGTBI

Por último, dentro do apartado de preguntas ao Goberno galego, o Grupo Popular interesarase pola súa valoración respecto da decisión unilateral do reitorado da Universidade de A Coruña de rachar co acordo acadado en 2015 entre as tres universidades públicas e a Xunta para o fortalecemento da formación médica en Galicia, “un anuncio sorprendente cando xa se estaba traballando conxuntamente entre universidades e Xunta na ampliación da docencia clínica ao quinto curso, prevista para o curso 2026-2027”, recordou Alberto Pazos.

A segunda pregunta ten como obxectivo coñecer a opinión do Goberno galego respecto da política de vivenda que está a desenvolver o Goberno de España; e a terceira cuestión busca coñecer os avances acadados a prol dos dereitos das persoas LGTBI, un ámbito no que Galicia foi unha das comunidades autónomas pioneiras na adopción de medidas para a protección deste colectivo, aprobando unha lexislación específica que busca garantir o seu benestar e promover a igualdade real entre as persoas, sexa cal sexa a súa orientación sexual.

O Parlamento de Galicia aprobou hoxe a proposición non de lei do Grupo Popular, que non contou co voto favorable de BNG nin de PSdeG, a través da que se solicita ao Goberno de España que facilite a adecuación de potencia e cambios de motor dos buques de pesca, asegurando que a distribución se realice con criterios de equidade e necesidade e establecendo liñas de financiamento e axudas específicas. Así mesmo, pídese a modificación do Real Decreto 1044/2022, de ordenación da frota pesqueira, co obxectivo de flexibilizar o aproveitamento da potencia proveniente de paralizacións definitivas de embarcacións de pesca, de forma que se permita utilizar a mesma entre buques do mesmo caladoiro, especialmente no caso do Caladoiro Nacional, augas NEAFC e palangre de superficie en augas internacionais.

O portavoz popular do Mar, Miguel Fidalgo, considerou que “facilitar a renovación dos motores da frota pesqueira é unha medida imprescindible para asegurar o futuro dun sector clave para Galicia”. “Esta renovación é unha necesidade urxente tanto para garantir a competitividade, a sustentabilidade e a rendibilidade do sector, como para avanzar nos compromisos de descarbonización do sector pesqueiro”, indicou.

PREZOS DESORBITADOS

Porén, lamentou que “a realidade actual é que boa parte da frota pesqueira galega continúa operando con motores vellos e obsoletos, que consumen máis, que contaminan máis e que presentan máis riscos para a seguridade dos tripulantes”. Miguel Fidalgo afirmou que “esta situación afecta negativamente á rendibilidade do sector e dificulta o avance cara a unha pesca máis sostible e respectuosa co medio ambiente”.

Así mesmo, o portavoz popular que “o elevado custo que supón adquirir novos motores, xunto coa obriga de mercar potencia adicional a prezos desorbitados, converte a modernización nun proceso inasumible para moitos armadores”. A este feito engádese a falta de claridade e transparencia, que “está favorecendo prácticas especulativas que encarecen, aínda máis, o acceso á potencia dispoñible”.

Miguel Fidalgo explicou que o Real Decreto 1044/2022 establece un marco para a ordenación e xestión da flota pesqueira española co obxecto de mellorar a sustentabilidade, optimizar a capacidade pesqueira dispoñible e garantir a viabilidade do sector”. “Con todo, tres anos despois da súa publicación, o Goberno de Pedro Sánchez aínda non desenvolveu nin aplicou medidas concretas que permitan a renovación dos motores”, lamentou.

“Sería conveniente desbloquear a aplicación deste Real Decreto, facilitar a flexibilidade no aproveitamento da potencia proveniente de paralizacións definitivas de embarcacións de pesca e facilitar a optimización da capacidade pesqueira en España”, demandou o portavoz popular, quen considerou “imprescindible un novo modelo de xestión de capacidade pesqueira e da ordenación da flota co fin de alcanzar un equilibrio entre as posibilidades de pesca e a capacidade da flota dispoñible, atendendo, deste modo, a factores e obxectivos medioambientais e socioeconómicos”.

O Parlamento de Galicia aprobou hoxe a proposición non de lei do Grupo Popular, sen o apoio dos deputados do Grupo Socialista, a través da que se esixe ao Goberno de España que cumpra coas compensacións económicas correspondentes ao parón da actividade extractiva dos mariscadores da ría do Burgo ata que os bivalvos acaden a talla comercial unha vez finalizado a dragaxe da ría do Burgo, tal e como establece o estudo ambiental aprobado en 2017.

O deputado popular Jesús María Fernández Rosende lembrou que “a propia execución da dragaxe da ría do Burgo supón a indispoñibilidade dos terreos para calquera actividade incompatible coas obras, entre elas o marisqueo, o que obriga ao Goberno central, como administración promotora desta obra, a habilitar as imprescindibles compensacións aos profesionais obrigados aos cese de actividade”.

FONDOS SUFICIENTES

“Porén, lamentablemente, o Goberno de Pedro Sánchez non atendeu esta obriga nin as reiteradas demandas realizadas tanto desde a Xunta como os propios mariscadores para recibir estas indemnizacións, que debería cubrir todo o tempo que se deixou de traballar a consecuencia da dragaxe, incluído o período que transcorre desde que se finalizaron as obras ata que os bivalvos sementados, que serán obxecto de futura explotación marisqueira, acaden a talla comercial”, lamentou.

Fernández Rosende indicou que “esta situación resulta máis indignante se temos en conta que o Goberno de Pedro Sánchez dispón de fondos suficientes para facer efectiva estas compensacións gracias ao remanente de 16 millóns de euros que sobraron do orzamento previsto para a realización da dragaxe, xa que a obra foi orzamentada en 48 millóns de euros pero ao final o custo reduciuse a 32 millóns”.

“Non existen razóns legais nin tampouco económicas para que o Goberno central desatenda a súa responsabilidade unha vez rematadas as obras de dragaxe, e ten a obriga de manter un plan de axudas que compensen aos mariscadores e mariscadoras da ría do Burgo en A Coruña ata que se recupere a normalidade e retomen a súa actividade habitual”, apuntou.

ABRIRLLE OS OLLOS AO GOBERNO CENTRAL

O debate desta proposición non de lei celebrado na Comisión 8ª do Parlamento galego foi presenciado en directo por unha representación dos mariscadores afectados, quen en boca do seu portavoz, Manuel Baldomir, agradeceu esta iniciativa do Grupo Popular para “abrirlle os ollos ao Goberno de España con respecto á mala finalización das obras de dragaxe da ría do Burgo e ás compensacións que por dereito nos corresponden”.

“Lamentamos a actitude do Partido Socialista utilizando datos irreais da situación e rexeitando acudir ás mesas de negociación que a Confraría mantén abertas, así como cando afirman que so foi o Goberno do Estado quen investiu en sanear a ría do Burgo, porque un dos requisitos era ter un vertido cero na ría do Burgo e iso conseguiuno a Xunta a través obras para a separación de augas fecais e pluviais, a construción de estacións de bombeo ou o investimento na EDAR de Bens para mellorar o tratamento das augas”, apuntou.

Os deputados do Grupo Popular María Deza e Raúl Santamaría destacaron hoxe que a Xunta xa ten en proceso de construción 385 novas vivendas na comarca do Salnés, dentro do seu obxectivo na presente lexislatura de duplicar o número de vivendas públicas ata chegar ata as 8.000 en toda Galicia e desenvolver solo para 25.000 novas vivendas, 20.000 delas protexidas e 5.000 libres.

María Deza e Raúl Santamaría, en compañía do deputado nacional Juan Bayón e a voceira do Partido Popular, Ana Granja, visitaron a parcela sita no barrio de Marxión de Vilagarcía onde a Xunta, a través da Sociedade de Vivenda Pública de Galicia, construirá 10 vivendas publicas, unha vez que a mesma sexa cedida polo Concello.

OUTRAS ACTUACIÓNS

Así mesmo, os deputados populares lembraron que o Goberno galego licitou o pasado 4 de abril, por un orzamento de 568.911 euros, o servizo de redacción do proxecto de interese autonómico e o proxecto de expropiación e de parcelamento para a obtención de 6,2 hectáreas entre a avenida das Carolinas e as rúas Coca e Arealonga de Viilagarcía de Arousa, onde se prevé a construción doutras 350 vivendas.

Ademais, a estes dous ámbitos súmase a parcela que o Concello de Sanxenxo cederá en Mourelos, na parroquia de Noalla, para a construción de 25 vivendas.

“Estamos a falar de 385 novas vivendas na comarca do Salnés, dentro do obxectivo do Goberno galego de duplicar nesta lexislatura o número de vivendas públicas e desenvolver solo para 25.000 novas vivendas en toda Galicia”, salientou María Deza.

Pola contra, os deputados populares criticaron a falta de compromiso do Goberno central en materia de vivenda, logo de que anunciara a súa intención de impulsar un Acordo Estatal de Vivenda para os anos 2026 a 2030 na Conferencia de Presidentes celebrada a pasada semana, pero finalmente non levou adiante ningunha proposta nesta materia.

ANUNCIO PROPAGANDÍSTICO

“Todo quedou nun anuncio propagandístico máis do Goberno de Pedro Sánchez, porque, tal e como xa explicou o Presidente Rueda, non se puxo enriba da mesa proposta formal algunha nin existiu diálogo institucional efectivo sobre vivenda antes, durante ou despois na citada Conferencia de Presidentes”, criticou Raúl Santamaría.

Diante desta situación, os deputados populares anunciaron a presentación no Parlamento de Galicia dunha iniciativa para esixir ao Goberno de España unha proposta formal e detallada para iniciar a negociación real dun Acordo Estatal de Vivenda 2026–2030, acompañado de cronogramas, financiamento, e garantías de execución que atendan as peticións, propostas e necesidades manifestadas polas comunidades autónomas.

Así mesmo, pedirase a convocatoria da Conferencia Sectorial de Vivenda, que leva desde o mes de outubro sen reunirse, como foro de cooperación multilateral no que facer efectiva a participación das comunidades autónomas na definición do interese xeral, o apoio á unidade de acción e o respecto ao autogoberno e a diversidade.

Os deputados do Grupo Popular Ángel Rodríguez e Carmen Pomar visitaron hoxe a base da unidade operativa da brigada de bombeiros forestais de Ames e destacaron que a Xunta investirá entre os anos 2025 e 2026 preto de 1,8 millóns de euros na formación e adestramento do persoal dos servizos de prevención de incendios forestais, o que supón un incremento do 19 por cento respecto do bienio anterior.

A Xunta vén de investir case 75.000 euros na mellora desta nova base, unhas obras que consistiron esencialmente no acondicionamento de vestiarios, duchas, zonas de descanso, almacéns para material e instrumental de traballos, ademais dos recintos para gardar os vehículos, co obxectivo de favorecer a conciliación entre o descanso e o traballo dos bombeiros e os axentes forestais.

Os deputados trasladaron aos profesionais do servizo de prevención de incendios forestais o esforzo que a Xunta vén realizando para a formación e adestramento deste persoal, que terán á súa disposición máis de 3.500 cursos e accións formativas ao longo de 2025 e 2026, tal e como se recolle no plan de formación integrado dentro do Pladiga.

O Plan de formación e adestramento para o persoal do Servizo de prevención e defensa contra incendios (SPIF) estruturase en seis programas. Entre as accións que se acometerán destacan os cursos monográficos sobre cuestiones relacionadas coa prevención e extinción de incendios forestais, así como a posibilidade de desenvolver un itinerario formativo profesional, que suporá a preparación diversificada e por grupos de categorías profesionais desde unha cualificación inicial ata a especialización do persoal.

Para rematar, os deputados populares trasladaron o agradecemento de toda a sociedade galega polo labor que estas brigadas forestais desenvolven no día a día na defensa dos montes galegos, tendo presente que o vindeiro 1 de xullo comezará a época de perigo de alto risco de incendios forestais.

Os deputados do Grupo Popular Miguel Viso e Víctor Baladrón salientaron hoxe a importancia do bono turístico que a Xunta lanzará o vindeiro mes de xullo para a desestacionalización do turismo na Comunidade galega, sobre todo nunha provincia como a de Ourense, que destaca pola chegada de visitantes sobre todo fora da tempada estival.

Nunha visita á casa de turismo rural A Gandarela de Cenlle, en compañía da alcaldesa, Rebeca Sotelo, os deputados populares destacaron o papel do turismo como motor de desenvolvemento, de fixación de poboación e de xeración de oportunidades no rural. Deste xeito, subliñaron “a necesidade de seguir apoiando este sector que amosa, cada día, a mellor cara de Galicia: hospitalidade, patrimonio, paisaxe e identidade”.

Miguel Viso e Víctor Baladrón referíronse, en concreto, á nova convocatoria do bono turístico que a Xunta lanzará o vindeiro mes de xullo, a través do que se prevé mobilizar arredor de 2,5 millóns de euros neste sector ao longo do vindeiro outono a través do cofinanciamento de estadías e actividades. Os interesados poderán descargarse os bonos a través da web www.bonoturismo.gal, que terán un importe de 150 euros, dos que a Xunta financiará 60 euros.

IMPULSO AO TURISMO INTERIOR

Durante a visita, Miguel Viso destacou que “apostar polo turismo é apoiar directamente a quen mantén abertas as portas, crea emprego e ofrece experiencias que nos conectan co noso propio territorio”. Pola súa banda, Víctor Baladrón salientou que “non se trata só de cifras, senón de garantir que negocios que levan anos resistindo teñan agora un impulso real para continuar”.

Pola súa banda, Rebeca Sotelo puxo o foco na importancia deste tipo de programas para os concellos pequenos. “O turismo achega vida, actividade e esperanza a moitas zonas do interior, e iniciativas como esta do bono turístico axuda a que máis persoas descubran todo o que temos para ofrecer e contribúen a que os negocios locais poidan mirar ao futuro con máis seguridade”, apuntou.

Os deputados do Grupo Popular Nicole Grueira e Enrique Barreiro avanzaron hoxe que a partir de mediados do vindeiro mes de xullo poderanse solicitar as axudas para a incorporación de agricultores mozos entre 18 e 40 anos ou a modernización ou mellora de explotacións agrarias. “Son un claro incentivo e mostra da aposta da Xunta pola incorporación de mozos ao rural, un rural vivo e que día tras día conta con máis xente nova á fronte das explotacións”, manifestaron.

Nunha visita ás obras que se están a facer na granxa Adriago, S.L. no concello lucense de Friol, que se levan adiante gracias a estas axudas da Xunta para facilitar a implantación de mozos ao sector agrogandeiro galego, os deputados populares lembraron que o pasado ano a Xunta distribuíu case 46 millóns de euros entre 832 proxectos, dos que 370 eran plans de mellora para grandes e pequenas explotacións, 320 solicitudes de incorporación de mozos e 133 expedientes de novos agricultores de entre 41 e 55 anos.

DÚAS LIÑAS DE AXUDA

De cara ao presente ano 2025, Nicole Grueira e Enrique Barreiro avanzaron que a Xunta repartirá 30,5 millóns de euros para apoiar ás persoas agricultoras mozas. En concreto, explicaron que haberá dúas liñas de axuda: unha primeira, dotada con 16 millóns de euros, destinada ao establecemento de agricultores mozos; e a segunda, con 14,5 millóns de euros, para a realización de investimentos en modernización ou mellora de explotacións agrarias.

A estas dúas liñas, sumaranse 5,5 millóns de euros cos que a Xunta financiará os plans de mellora non aprobados aos mozos que resultaron beneficiarios da convocatoria de 2024, co obxectivo de facilitar o inicio da súa actividade produtiva e favorecer que poidan completar o seu investimento na explotación.

Entre os requisitos para acceder ás axudas para a incorporación de mozos á actividade agrogandeira, os interesados deberán presentar un plan empresarial, permanecer na actividade agraria cinco anos desde o pago do final da axuda e participar no programa de titorización que presta a Consellería do Medio Rural a persoas agricultoras mozas.

O Grupo Popular impulsará no Parlamento de Galicia unha proposición de lei a través da que se reforma a Lei do deporte de Galicia para implementar tres medidas importantes: que a Administración poida exercer a acción popular nos procedementos que se sigan por delitos e actos de violencia perpetrados no ámbito deportivo; para clarificar o réxime de prescricións das infraccións e das sancións no ámbito deportivo; e para afondar no bo goberno no deporte nas organizacións e federacións galegas.

O portavoz popular Alberto Pazos informou do rexistro esta mañá desta proposición de lei a través da que se introducen “importantes cambios na Lei do deporte que aprobamos hai máis de 13 anos e que nos van permitir adaptala á realidade da sociedade actual, porque non podemos consentir e debemos poñer fin aos actos de violencia deportiva que cada vez están a manchar máis a boa práctica do deporte en Galicia”.

FOMENTAR VALORES

“O deporte e as competicións deportivas deben fomentar os valores deportivos, a socialización dos participantes e un intercambio de experiencias positivas, e todo iso velando pola seguridade e a protección de deportistas e espectadores, para que a práctica deportiva sexa libre de violencia en calquera das súas formas, tanto física como verbal”, indicou.

Porén, lamentou que “estamos comprobando como a violencia no deporte comeza a ser algo habitual, polo que consideramos urxente que se adopten as medidas oportunas para poñer fin a estas prácticas violentas que afectan tanto a deportistas, como árbitros e xuíces, e incluso o público asistente aos acontecementos deportivos”.

Alberto Pazos explicou que a través desta proposición de lei “abrimos a posibilidade para que a Xunta poida exercer a acción popular nos procedementos penais por violencia no deporte”. “Queremos facer realidade un deporte libre de calquera forma de violencia, porque é a mellor representación do respecto, a tolerancia, a inclusión e a participación cívica, polo que cada acto violento que se produce contravén estes valores e a propia esencia deportiva”, manifestou.

En segundo lugar, a iniciativa lexislativa modifica a Lei do deporte existente para clarificar o réxime de prescrición das infraccións e as sancións. Así, fixa tres anos para as infraccións ou sancións por faltas moi graves; dous anos para as infraccións ou sancións por faltas graves; e seis meses para as infraccións leves e un ano para as sancións por faltas leves.

En último lugar, a través desta proposición de lei elévase o nivel de esixencia das súas normas de bo goberno para as organizacións e federacións deportivas, “a través tanto do respecto da súa democracia interna, a transparencia, a integridade, a solidariedade, a igualdade de xénero, a apertura, a rendición de contas ou a responsabilidade social; como tamén dunha xestión irreprochable dos seus recursos financeiros, con controis para previr os conflitos de intereses ou a duración limitada ata un máximo de tres anos dos seus cargos electos”, apuntou Alberto Pazos.

“Con este fin, propoñemos que as federacións deportivas aproben un Código de Bo Goberno no que se establezan todas estas prácticas de boa gobernanza e integridade, as regras en materia de transparencia, o código de conduta para os seus órganos de goberno ou as normas relativas á xestión e control de todas as transaccións económicas que efectúe a entidade deportiva”, concretou.

INCREMENTO DA PRESENZA DO LOBO

Por outra banda, o portavoz popular referiuse ao auto do Tribunal Superior de Xustiza de Galicia que suspende cautelarmente ata o vindeiro 31 de xullo a posibilidade para que en Galicia se adopten medidas de control do lobo cando haxa danos acreditados en explotacións gandeiras, unha decisión que cualificou de “totalmente sorprendente, porque en Galicia só se tiñan autorizado dúas solicitudes e aínda non se tiña abatido ningún animal, algo que si ten acontecido noutras comunidades como Asturias ou Cantabria; e porque é contraria ao criterio empregado polos mesmos tribunais en comunidades como Cantabria ou Castela e León”.

“Os principais prexudicados deste auto xudicial son os gandeiros galegos, que ven como o lobo vai continuar campando ás súas anchas por toda Galicia atacando aos seus rebaños e provocándolles considerables perdas económicas” sinalou Alberto Pazos, quen avogou porque a Xunta “defenda, ante quen sexa necesario, o mantemento da biodiversidade e as accións de control sobre esta especie tendo en conta o estado favorable das súas poboacións”.

Neste sentido, lembrou que o numero de manadas na Comunidade galega incrementouse das 84 existentes en 2014 ás 93 contabilizadas na actualidade, estando presente en máis do 90 por cento do noso territorio, unha situación que veu aparellada a un aumento dun 77 por cento dos ataques do lobo e que o número de reses afectadas subira tamén un 55 por cento.

As portavoces de Política Social e de Xuventude do Grupo Popular, Raquel Arias e Nicole Grueira, respectivamente, salientaron hoxe a provincia de Lugo conta na actualidade con case 3.500 prazas gratuítas para a atención dos nenos de entre 0 e 3 anos.

Nunha visita ao punto de atención á infancia de Guntín, en compañía do alcalde Ángel Pérez, as deputadas popular subliñaron “a aposta do actual Goberno galego pola escolarización de nenos e mozos galegos, poñendo en marcha medidas pioneiras para posibilitar a gratuidade dos estudos desde o momento de nacer ata que rematan a carreira universitaria”.

En concreto, no que atinxe ao coidado dos menores entre 0 e 3 anos, a Xunta está a investir na provincia de Lugo arredor de 12 millóns de euros, “unha partida que sae do peto de todos os galegos porque, a día de hoxe e a pesar das promesas feitas por Pedro Sánchez, o Goberno central non aporta un só euro para esta iniciativa”, lamentou Raquel Arias.

Froito destas medidas impulsadas pola Xunta, Galicia é a comunidade autónoma coa maior taxa de escolarización entre os nenos de 0 a 3 anos co 60,6 por cento, unha porcentaxe que supera amplamente o obxectivo da Unión Europea de chegar cando menos ao 45 por cento en 2030.

Raquel Arias e Nicole Grueira destacaron, ademais, que a Xunta outorgou o Bono Concilia Familia a 1.315 familias da provincia de Lugo nas que traballan os dous proxenitores. Con este bono, o Goberno galego da unha axuda de ata 200 euros por neno para poder acceder a un recurso de conciliación durante os períodos non lectivos.