Categoría: Parlamento de Galicia

A viceportavoz Cristina Sanz avanzou hoxe en rolda de prensa que o Grupo Popular ven de presentar unha iniciativa parlamentaria instando ao Goberno central a constituír, coa máxima celeridade, a Comisión Mixta de Transferencias para facer efectivo o traspaso dos medios materiais e persoais necesarios para que a Administración autonómica poida xestionar a nosa costa e para pedir que a oposición galega se posicione “sobre se quere unirse e loitar polas nosas competencias ou prefiren continuar na procesión dos caladiños ante o desprezo que o Estado está a amosar con Galicia”.

A deputada popular instou aos nacionalistas galegos a “unirse a nós na defensa dos nosos obxectivos de país en vez de ocupar o seu tempo avalando eleccións moi dubidosas noutras latitudes” en clara referencia ao documento subscrito polo BNG no que lexitima o proceso electoral, “que cada día se amosa máis próximo á fraude que a un verdadeiro proceso democrático”, que proclamou a Nicolás Maduro presidente electo de Venezuela.

“Deixan o noso país e as nosas reivindicacións de lado non para contribuír a buscar solucións á grave crise que está a vivir Venezuela, senón para avalar as represións e violacións dos dereitos humanos que se están a producir no país, nun claro posicionamento radical a favor dun proceso ditatorial que está contribuíndo a afundir cada día máis ao país irmá” indicou Cristina Sanz.

Así mesmo, a viceportavoz popular instou aos socialistas galegos a “loitar contra os constantes ataques do Goberno de Pedro Sánchez a Galicia e ao noso autogoberno” presionando para que se convoque canto antes a Comisión Mixta de Transferencias “ e que se tramite a xestión destas competencias, que ben poderían tratarse nunha xuntanza do presidente Alfonso Rueda co presidente do Goberno nunha reunión pola que seguimos agardando sen data e que está a supoñer un desprezo a todos os galegos”.

Os populares galegos consideran que, despois de 4 meses desde que o Tribunal Constitucional avalara por unanimidade a nosa lei do litoral, “afectada por un recurso sectario e incomprensible do Goberno central, é hora de que deixen de ser o Goberno máis sectario e máis prexudicial para os intereses de Galicia, coa conivencia dos grupos da oposición en Galicia, e comecen a mover ficha para que a nosa costa sexa xestionada desde Galicia”.

“É urxente evitar as ameazas que está sufrindo a nosa costa, coas preto de 4.000 edificacións en 82 concellos, que no pode ser xestionada desde un despacho en Madrid e moito menos ser obxecto de intereses electorais en detrimento do interese xeral dos galegos e galegas” indicou Cristina Sanz.

A viceportavoz popular sinalou que o obxectivo principal é garantir que Galicia teña a capacidade de tomar decisións e actuar de maneira efectiva na xestión da nosa costa, coas competencias recoñecidas para outorgar, prorrogar, modificar ou extinguir concesións para o uso e ocupación do dominio público marítimo-terrestre.

“Temos o dereito e agora é imprescindible que exerzamos as nosas competencias e completar un proceso de transferencia, iniciado hai máis de 40 anos, para consolidar o autogoberno pleno sobre a nosa costa” indicou Cristina Sanz e insistiu na necesidade de “celeridade ao Goberno central para evitar as ameazas que está a sufrir na costa, nas vivendas , nas empresas da cadea mar-industria, nos postos de traballo, nas depuradoras ou nos centos de edificacións de todo tipo”.

SEIS MESES DA GALICIA QUE FUNCIONA

A viceportavoz popular tamén fixo referencia na súa rolda de prensa á “Galicia que fai seis meses dixo con claridade que optaba maioritariamente pola moderación, a estabilidade e o sentidiño do proxecto que encarna o PPdeG co presidente Alfonso Rueda á cabeza”.

Un proxecto que continúa consolidando a senda do crecemento e abordando novos retos, tendo sempre como obxectivo en mente a mellora da calidade de vida dos galegos e as galegas, indicou Cristina Sanz e engadiu que “nese interese traballamos desde o primeiro momento desde o Grupo Popular, asumindo no noso proxecto a credibilidade e o compromiso como sinais de identidade”.

Compromiso no cumprimento da palabra dada, indicou Cristina Sanz, como puidemos valorar nos 100 primeiros días do Goberno de Alfonso Rueda, co cumprimento do 100% das medidas anunciadas para que Galicia continúe a ser referente en diferentes ámbitos.

Cristina Sanz sinalou medidas de relevancia como a gratuidade da matrícula universitaria, o impulso da nova vivenda pública e máis prazas para maiores e persoas con discapacidade nos 100 primeiros días do novo Goberno na Xunta.

Así como as referidas a solo industrial gratuíto os primeiros 8 anos, a redución da tributación das herdanzas entre parentes ou a ampliación da fecundación in vitro e da conxelación de óvulos.

Medidas sempre co obxectivo de acadar unha Galicia próspera e que non exclúa a ninguén na loita conxunta cara ao noso benestar como pobo, indicou a viceportavoz popular.

O portavoz do Grupo Popular, Alberto Pazos, defendeu hoxe no transcurso da Deputación Permanente do Parlamento que “en plena crise económica, a Xunta foi quen de priorizar a saúde dos galegos e construír en Vigo un dos mellores hospitais de Europa, cun mínimo impacto nas contas públicas”.

Deste xeito, incidiu en que o informe do Consello de Contas sobre o Hospital Alvaro Cunqueiro de Vigo sinala que a fórmula de licitación alternativa suporía a renuncia da Administración autonómica á execución do gasto corrente ou doutros investimentos.

“A elección da fórmula actual permitiunos impulsar unha modernización sen precedentes na rede sanitaria galega que, en só os catro anos da construción do Hospital, sumaron un total de 145,2M€ distribuídos en obras e equipamentos nos principais hospitais galegos e en actuacións relevantes en 17 centros de saúde”.

Para Alberto Pazos resulta “escandaloso o exercicio de hipocrisía política” practicado polo BNG e PSdeG nas últimas semanas, “os mesmos que durante a bonanza económica foron incapaces de poñer un só ladrillo do Hospital e agora critican a colaboración público-privada, que eles mesmos xa contemplaban, segundo tiñan anunciado publicamente, e ademais é unha fórmula que eles empregan de forma recorrente cando gobernan”.

O portavoz popular lamentou a “utilización espuria” do BNG do Regulamento do Parlamento, empregando a Deputación Permanente “como ferramenta de propaganda coa que xerar alarma social en beneficio propio e prexuízo do conxunto da sociedade”. Unha clara mostra de “ese interese exclusivamente mediático é que ao comezar a actividade ordinaria na Cámara o que era urxentísimo deixa de ter interese e se non se acepta unha comparecencia non volven a solicitala, como adoitaron facer noutras ocasións”.

O portavoz popular puxo na súa intervención a comparativa coa adquisición dunha vivenda, “todo o mundo sabe que é máis barato pagala con medios propios que acudir ao financiamento pero este acelera o proceso de compra e a prioridade de ter un teito sen esperar a dispoñer dos cartos”.

“ E nós, coma os galegos, temos claras as prioridades: Vigo hoxe dispón dun Hospital público de última xeración, que salvou centos de vidas durante a pandemia, perfectamente dimensionado e cunha gran elasticidade, para atender a demanda de camas en función das necesidades reais de cada momento” indicou Alberto Pazos.

O portavoz popular dirixiuse aos grupos da oposición indicando que “xa sabemos que non podemos contar con vostedes para continuar mellorando o noso sistema público sanitario pero, polo menos, non estorben e, sobre todo, non mintan nin manipulen”.

E, dirixíndose aos representantes do BNG indicou que “teñen vostedes a mesma credibilidade nestas acusacións como cando afirman sentirse orgullosos do sistema electoral do señor Maduro, pero afortunadamente os galegos coñecen cal é a súa fórmula de xestión e non xestión e de democracia e non democracia”.

O viceportavoz do Grupo Popular Julio García Comesaña anunciou hoxe en rolda de prensa unha iniciativa parlamentaria encamiñada a que o Goberno central “priorice, dunha vez por todas o Corredor Atlántico de mercadorías ferroviarias porque o noroeste peninsular non merece ser menos que ninguén”.

“Fartos do desprezo a unha rede que consideramos prioritaria para a UE e todo o noroeste, insistimos na necesidade de incluíla entre os proxectos que optan a financiamento europeo, como un dos tramos imprescindibles na rede ferroviaria transfronteiriza” indicou Julio Garcia.

O viceportavoz popular sinalou que, nese sentido, a iniciativa popular solicita que se incorpore no plan director o investimento de 8.000M€ adicionais co obxecto de avanzar nas actuacións e compromisos que Galicia, Asturias e Castela e León teñen identificadas como prioritarias no desenvolvemento desta infraestrutura estratéxica.

“Parece que ao Goberno de España só lle interesa as comunidades que lle son precisas para comprar socios cos que se poida manterse na Moncloa e abandona o noroeste peninsular ao contrario que está a ocorrer co Corredor Mediterráneo, que ten recibido 165M€ nos dous últimos anos” indicou Julio García.

Para o parlamentario popular “Galicia non pode permitir estes agravios, lamentamos esa fuxida do Goberno central e seguiremos sendo firmes defensores dunha política xusta para a nosa comunidade”, sinalando así mesmo que na iniciativa presentada no Parlamento tamén demandarán o impulso dun plan extraordinario de investimentos para a modernización do ferrocarril de mercadorías “que equilibre e compense o escaso desenvolvemento que sufrimos nesta materia”.

“Porque xa está ben de tomarlle o pelo aos galegos, de priorizar uns territorios en detrimento doutros, de fomentar a desigualdade en todos os ámbitos, de xerar problemas en vez de solucionalos e de ningunear a unha comunidades e favorecer a outras tan só por intereses electorais e partidistas” indicou Julio García.

GALICIA PIONEIRA NA REGULACIÓN DA INTELIXENCIA ARTIFICIAL

O viceportavoz popular tamén resaltou na rolda de prensa que o Parlamento está xa a traballar no desenvolvemento da lei galega que regula a intelixencia artificial (IA). Nese sentido, sinalou que Galicia será a primeira comunidade autónoma en ter unha lei que garantirá o bo uso desta tecnoloxía na Administración e que protexerá os dereitos da cidadanía.

“Seremos tamén unha das primeiras rexións de Europa en desenvolver esta tecnoloxía, como unha folla de ruta para orientar, ao servizo da cidadanía para a súa aplicación por parte da sociedade e do tecido produtivo, cunha normativa acorde co Regulamento europeo que entrou en vigor o pasado día 1 de agosto” indicou Julio García.

Esta lei fixará os principios éticos reitores do deseño, adquisición, implementación e uso de sistemas de IA e recoñece a cidadanía, con carácter vinculante, unha serie de dereitos e establece un marco legal uniforme en liña cos valores e a normativa establecida polas institucións europeas.

Así mesmo, indicou, esta lei aumentará a capacidade para atraer e reter talento e persoal cualificado a Galicia e implementa sistemas de formación e capacitación en materia de IA na nosa Comunidade.

Julio García sinalou que o anteproxecto de lei da IA en Galicia recibiu 12 alegacións e foi compartido con entidades do ámbito europeo, estatal e autonómico, así como coas tres universidades galegas. Tamén foi presentada na Comisión de expertos para o asesoramento no uso ético da IA en Galicia, no Consello técnico asesor en IA e Espazo de Datos do Sistema Público de Saúde de Galicia, na Confederación de Empresarios de Galicia e aos grupos parlamentarios no Parlamento de Galicia.

Lembrou tamén Julio García que Galicia ten un especial protagonismo neste ámbito, xa que A Coruña será sede da AESIA (Axencia Española de Supervisión da Intelixencia Artificial) porque o Goberno da Xunta formalizou a súa candidatura, un proxecto de país no que a Xunta contou co apio, unión e compromiso do tecido empresarial galego.

PARTICIPACIÓN GALEGA NOS XOGOS OLÍMPICOS

O viceportavoz popular tamén aproveitou a rolda de prensa para felicitar aos deportistas que participaron nos Xogos Olímpicos de París, que veñen de rematar esta fin de semana, e nomeadamente aos galegos polo seu esforzo, entrega e compromiso que sen dúbida tiveron para chegar a participar nestes Xogos.

“Mandamos un agarimoso saúdo aos 5 medallistas e os 11 diplomas olímpicos galegos e ao resto da delegación galega polo seu esforzo ao longo deste tempo e nos congratulamos dos grandes deportistas de alto nivel que existen na nosa Comunidade” sinalou Julio García.

O portavoz do Grupo Popular, Alberto Pazos, afirmou hoxe no Pleno do Parlamento galego que a aprobación do teito de gasto da Comunidade galega para 2025 é “unha nova mostra da estabilidade institucional da que goza Galicia; da estabilidade financeira, que permite un desenvolvemento económico e social sen precedentes na nosa historia; e de coherencia política, porque é o primeiro paso para aprobar o orzamento que permitirá desenvolver os compromisos que adquirimos coas galegas e galegos nas últimas eleccións autonómicas”.

Alberto Pazos lembrou que o teito de gasto para 2025 ascende a 13.954 millóns de euros, a cifra máis alta da historia da Comunidade galega. “Somos a única comunidade autónoma capaz de cumprir coa obriga institucional de aprobar o límite de gasto non financeiro consecutivamente durante os últimos 15 anos, porque Galicia fixo da normalidade algo excepcional a pesar de facelo sempre sen o apoio de nacionalistas e socialistas”, incidiu.

“Fronte a esta realidade que vivimos en Galicia, temos un Goberno de España que renunciou a presentar orzamentos en 2024, que non cumpre coa súa obriga de proporcionar un marco económico ás comunidades autónomas e que acaba de ver como os seus supostos socios tomban a súa proposta de teito de gasto, poñendo en risco a aprobación dos orzamentos para 2025”, sinalou.

O portavoz popular subliñou que “a planificación sensata e a estabilidade financeira permitiu que Galicia deixara atrás a pantasma do atraso secular, para converterse nun referente de progreso colectivo”. En concreto, destacou que Galicia é a segunda comunidade autónoma con maior crecemento económico desde 2009 e a que máis medrou desde a pandemia; a que mellor reparte ese crecemento económico, mantendo a taxa de pobreza por debaixo da media nacional; e a que menos incrementou a súa débeda.

SOCIEDADE GALEGA MÁIS RICA

“Hoxe a sociedade galega é máis rica no seu conxunto, acadando a maior converxencia coa renda nacional da nosa historia e co obxectivo de alcanzar a media nacional en 2030”, puntualizou.

Para rematar, Alberto Pazos lembrou que a aprobación do teito de gasto “é o primeiro paso para aprobar o orzamento que permitirá desenvolver os compromisos que adquirimos coas galegas e galegos nas últimas eleccións autonómicas”. “Isto é algo dificilmente comprensible para a oposición, pero o Goberno de Rueda aspira a cumprir coa palabra dada, sen inexplicables cambios de opinión”, asegurou.

Porén, engadiu que “unha cousa é que non esperemos coherencia política da oposición e outra moi distinta é que pasemos por alto a demostración de hipocrisía política que están a facer os últimos días”. En concreto, Pazos dixo que “o peor de todo é escoitalos reclamar máis gasto público mentres calan ante o maior atropelo da democracia contra a solidariedade entre os territorios e a igualdade dos cidadáns españois que supón o pacto asinado entre o PSOE e Esquerra Republicana de Cataluña”.

“A resposta da esquerda galega ao maior ataque contra a suficiencia financeira de Galicia é o silencio do señor Besteiro ou a ruína do concerto económico para Galicia da señora Pontón”, rematou.

O portavoz do Grupo Popular, Alberto Pazos, cualificou hoxe de “sensato e acorde coa situación actual e as previsións económicas de Galicia” o teito de gasto que mañá será sometido a debate no Pleno do Parlamento galego para a súa aprobación.

Ao remate da Xunta de Portavoces, Alberto Pazos comezou a súa comparecencia ante os medios de comunicación enviando “unha mensaxe de cariño, de apoio e de solidariedade a todo o pobo venezolano, especialmente á comunidade venezolana en Galicia, que nestas horas difíciles está loitando por recuperar a democracia que lle queren substraer no seu país”. “E desde aquí quero dicirlles que non están sos, que estamos con eles e que os imos acompañar nese proceso de loitar pola súa liberdade e pola súa democracia, e que contan co respaldo absoluto do Partido Popular de Galicia”, indicou.

ESGOTA A CAPACIDADE DE GASTO

Respecto da convocatoria do Pleno extraordinario no Parlamento de Galicia para a aprobación do teito de gasto da Xunta para 2025, que terá lugar mañá, a partir das 13 horas, Alberto Pazos lembrou que ascende a 13.954 millóns de euros, a cifra máis alta da historia da Comunidade galega. “Un teito de gasto sensato e acorde coa situación actual e as previsións económicas de Galicia para o vindeiro ano, e que esgota ao máximo a capacidade de gasto segundo a taxa de referencia autorizada polo Goberno central e que se calculou coas novas regras fiscais fixadas pola Unión Europea”, dixo.

“Con estes datos na man, estamos expectantes por coñecer a posición dos grupos da oposición e os seus argumentos para rexeitar este teito de gasto, que permitirá á Comunidade galega contar o vindeiro ano co maior investimento para optimizar a prestación dos servizos públicos, axudar ás familias e ás empresas, impulsar as políticas de vivenda e favorecer o crecemento económico e a creación de emprego”, afirmou.

O portavoz popular subliñou que “Galicia volverá a cumprir escrupulosamente o recollido na Lei galega de disciplina orzamentaria, aprobando o seu teito de gasto en tempo e forma, do mesmo xeito que o Goberno galego traballará nas vindeiras semanas para elaborar os orzamentos da Xunta de 2025 e que sexan aprobados para a súa execución a partir do vindeiro 1 de xaneiro”.

Na súa intervención, Alberto Pazos referiuse ao feito de que a aprobación do teito de gasto en Galicia coincidirá “cunha nova falcatruada perpetrada polos socialistas españois, capitaneados por Pedro Sánchez, para perpetuarse no poder e, agora ademais, conseguir o apoio dos independentistas republicanos cataláns para facer a Salvador Illa presidente de Cataluña”.

CARTOS PÚBLICOS PARA CUMPRIR OS DESEXOS DE SÁNCHEZ

“Estamos a falar do acordo acadado onte entre o PSOE e Esquerra Republicana de Cataluña, un paso máis na ruptura de España que busca o independentismo catalán, que se están a aproveitar da debilidade do Goberno de Pedro Sánchez para conseguir todo o que desexan”, sinalou, para concretar que “primeiro foi a amnistía, agora teñen na súa man a independencia fiscal, rompendo o sistema de financiamento autonómico e dando pe a que existan españois de primeira e de segunda; e o paso definitivo será conseguir o referendo independentista, algo que a gran maioría de españois tememos moi probable no caso de que Pedro Sánchez continúe no Goberno de España e siga necesitando dos votos dos independentistas para manterse na Moncloa”.

Diante desta situación, Alberto Pazos incidiu que “desde Galicia imos seguir loitando, en colaboración coa gran maiorías das comunidades autónomas españolas, para que o Goberno de Pedro Sánchez deixe de utilizar os cartos de todos para cumprir os seus desexos, reclamando unha negociación multilareal do noso sistema de financiamento autonómico que atenda as necesidades específicas de todas as comunidades autónomas, baixo os principios de igualdade, equidade e solidariedade”.

“De pouco servirá que en Galicia sigamos cumprindo as leis e aprobando os orzamentos, un ano tras outro en tempo en forma, se despois o Goberno de Pedro Sánchez rompe unilateralmente o statu quo existente prexudicando as comunidades cumpridoras e beneficiando a aquelas cuxos votos lle son necesarios para seguir na Moncloa”, rematou.

 

O portavoz do Grupo Popular, Alberto Pazos, lamentou hoxe que a “intolerable e chulesca” carta remitida polo ministro de Transportes ao Presidente da Xunta sobre a construción do AVE entre Galicia e Portugal, “unha mostra máis da falta de cordialidade e lealdade do Goberno de España coa Comunidade galega e os galegos”.

“O que fai falta é que o Goberno de España cumpra os seus compromisos destinando fondos europeos para poder compatibilizar os avances a ambos lados da fronteira”, manifestou Pazos, quen demandou que “este afán epistolar do ministro debería ser compatible coa atención persoal”, xa que, despois de máis de 100 días desde a súa toma de posesión, o Presidente Alfonso Rueda aínda segue á espera de ser recibido por Pedro Sánchez para trasladarlle as demandas e compromisos pendentes do Goberno central con Galicia.

Alberto Pazos comezou a súa comparecencia ante os medios trasladando, en nome de todo o Grupo Popular, o pesar polo pasamento dos mariñeiros do Argos Georgia. A continuación, fixo un balance da actividade parlamentaria neste primeiro período de sesións da XII lexislatura, destacando que o Parlamento galego “viviu neste tempo unha actividade frenética con 85 reunións dos distintos órganos parlamentarios”. En total, superáronse as 206 horas de actividade parlamentaria entre plenos e comisións, o que supón unha media de 2 horas e 24 minutos cada día desta nova lexislatura.

Ao longo destes meses, o Goberno galego remitiu ao Parlamento galego dous novos textos lexislativos: o de promoción dos beneficios sociais e económicos dos proxectos que utilizan os recursos naturais de Galicia, e o de cultura inclusiva e accesible de Galicia

LIBERDADE E DISPOÑIBILIDADE

“Unha das cuestións nas que o Parlamento galego segue a ser referente a nivel de toda España é as grandes posibilidades coas que contan os grupos da oposición para facer tanto control ao Goberno galego como impulsar a súa acción política”, destacou o portavoz popular, quen concretou que das 139 iniciativas que se levaron a Pleno, tres de cada catro foron a iniciativa dos grupos da oposición. Ademais, 88 destas iniciativas foron de control ao Goberno galego e 51 de impulso da actividade gobernamental.

Alberto Pazos asegurou que “estes datos poñen de manifesto que o Grupo Popular mantén a súa plena disposición para que os grupos da oposición exerzan con total liberdade e dispoñibilidade o seu traballo no Parlamento galego, moi lonxe do mantra que acostuman a difundir de que aplicamos o rolo parlamentario e que os temos silenciados”.

Por outra banda, o portavoz popular referiuse á carta que o ministro de Transportes remitiu ao Presidente Rueda sobre a construción do AVE entre Galicia e Portugal, sobre a que dixo que “non ten sentido algún e é unha mostra máis da falta de cordialidade e lealdade do Goberno de España con Galicia e con todos os galegos que un ministro se dirixa deste xeito tan intolerable e chulesco ao Presidente galego”.

AXILIZAR A CONEXIÓN DE GALICIA E PORTUGAL POR AVE

“No que debería centrarse o ministro é en velar porque os tan cacarexados e esperados trens de alta velocidade a Galicia cheguen con puntualidade, xa que o problema que sufrimos cos agardados trens AVRIL estamos volvendo a padecelos agora coa entrada en funcionamento de AVLO”, dixo Pazos, quen recordou que “a falta de puntualidade é un problema habitual que sofren as persoas usuarias dos servizos ferroviarios en Galicia, con incidencias e retrasos na rede de media distancia practicamente a diario, aos que se suman agora os problemas nas conexións de alta velocidade”.

Alberto Pazos pediu ao ministro que “deixe a un lado a súa devoción por manifestar por escrito as súas ocorrencias e se centre en axilizar os trámites para que a conexión de Galicia con Portugal por alta velocidade sexa unha realidade canto antes, xa queco actual estado de tramitación as obras non estarán rematadas, como pouco, ata finais de 2034, incumprindo a promesa de que a conexión sería unha realidade en 2032”.

“Este afán epistolar do ministro de Transportes español debería ser compatible coa atención persoal que o Presidente do Goberno de España ten que ter cara a todos os presidentes autonómicos”, apuntou o portavoz popular. Neste sentido, lamentou que, “máis de 100 días despois da súa toma de posesión, o Presidente Alfonso Rueda segue á espera de ser recibido por Pedro Sánchez, unha reunión na que analizar todas as demandas e compromisos con Galicia pendentes desde o Goberno de España, entre as que figura, como non pode ser doutro xeito, esta conexión de AVE con Portugal, pero tamén outras cuestións relacionadas coa eliminación de peaxes e a transferencia da AP-9, a construción de novas autovías, o novo sistema de financiamento autonómico ou a prestación de servizos básicos, tanto sanitarios como a dependencia”.

O Grupo Popular vén de solicitar ao Consello de Contas que incorpore no seu plan de traballo para 2025 a realización dunha auditoría operativa aos concellos que non cumpriron coa obriga de render as súas contas, segundo se prevé no texto refundido da Lei reguladora das facendas locais (LRFC). “A día de hoxe, os concellos de Redondela, A Rúa e Verín non presentaron en prazo ante o Tribunal de Contas a súa Conta Xeral do ano 2022, o que supón que se descoñeza a súa situación económica-financeira correspondente a ese ano e non poda ser obxecto de fiscalización por esta entidade”, sinalou o portavoz popular, Alberto Pazos, nunhas declaracións realizadas en Redondela.

O artigo 223 da Lei reguladora das facendas locais recolle que a fiscalización externa das contas e da xestión económica das entidades locais, e de todos os organismos e sociedades delas dependentes, é función propia do Tribunal de Contas. Para iso, os concellos deben remitir a este organismo antes do 15 de outubro de cada ano a Conta Xeral sobre a súa situación económico-financeira e patrimonial, así como a execución e liquidación dos orzamentos, correspondente ao ano anterior.

ESPECIALMENTE ALARMANTE O CASO DE REDONDELA

Alberto Pazos concretou que neste momento existen tres concellos en Galicia que non presentaron en prazo a súa Conta Xeral correspondente a 2022: A Rúa, Verín e Redondela” e sobre este último municipio manifestou que “esta ausencia de transparencia nas súas contas é particularmente alarmante logo de que recentemente coñecéramos que este concello foi incluído, por primeira vez na súa historia, nun listado do Ministerio de Facenda polo impago aos seus provedores”.

En concreto, a débeda do Concello de Redondela cos seus provedores, segundo denunciou o Grupo Municipal do Partido Popular, segundo a información recollida nas actas da Comisión Delegada do Goberno de España para Asuntos Económicos supera os 3,3 millóns de euros desde finais do pasado ano 2022. “A principal consecuencia desta débeda é que o Goberno central vai tomar cartas directamente no asunto e comezar a ordenar o pago aos provedores”, apuntou o portavoz popular.

Para o abono destas débedas cos provedores, o Goberno central utilizará o diñeiro que lle correspondería ao Concello de Redondela do Fondo de Financiamento das Entidades Locais e, no caso de ser necesario, das partidas mensuais que o Concello ingresa con cargo á súa participación nos ingresos do Estado.

“Estamos diante dunha situación moi preocupante que vai afectar directamente aos servizos que presta o Concello de Redondela aos seus veciños, xa que esta situación acarrea a imposibilidade dos concellos de recibir subvencións procedentes doutras administracións que, no caso concreto de Redondela, xa supuxo a perda dun dos obradoiros de emprego solicitados”, sinalou Alberto Pazos.

Diante desta situación, e para que todos os concellos de Galicia sigan o exemplo de transparencia da Xunta á hora de render contas da execución do seu orzamento, o Grupo Popular solicitou ao Consello de Contas que realice unha auditoría operativa dos concellos galegos que non cumpran coa obriga de render as cúas contas en tempo e forma ante o Tribunal de Cuentas.

Pazos incidiu que “os veciños deben coñecer como están as contas dos seus respectivos concellos e como se xestionan os cartos que ingresas cos seus impostos municipais e con todas as aportacións que as entidades locais reciben doutras administracións”.

LIBERACIÓN DE PEAXES NA AP-9

Por outra banda, o portavoz do Grupo Popular referiuse ás ultimas afirmacións publicadas sobre a AP-9 e a eliminación das súas peaxes, porque “os galegos, e os redondeláns en particular, xa estamos cansos de innumerables promesas que o Goberno de Pedro Sánchez nos ten feito nestes anos sobre as peaxes e a transferencia desta autoestrada a Galicia”.

Alberto Pazos lembrou que, no caso de Redondela “seguimos á espera de que o Goberno de Pedro Sánchez leve adiante o compromiso, xa asumido polo Goberno de Mariano Rajoy, de liberar a peaxe entre Redondela e Vigo”. “Van xa seis anos desde que no verán de 2018 se nos prometera aos redondeláns que non iamos ter que pagar para viaxar pola AP-9 ata Vigo, pero as peaxes non pararon de subir neste tempo”, lembrou.

“A última mofa viu, como non podía ser doutro modo, do ministro de Transportes, Óscar Puente, quen alardeou levantar as peaxes da AP-7 en Alacante coa escusa de que “é pública”, facendo oídos xordos aos berros dos galegos e usuarios da AP-9 que levamos moitos anos pedindo a supresión das peaxes nesta autoestrada”, criticou o portavoz popular, quen avanzou que “desde o Partido Popular de Galicia seguiremos insistindo na demanda para que se supriman as peaxes na AP-9 e se transfira a Galicia, defendendo os intereses de todos os sectores económicos galegos e dos usuarios desta autoestrada”.

Ao mesmo tempo, engadiu que “esixiremos ao Partido Socialista que cumpra os seus compromisos anunciados durante a pasada campaña electoral para as eleccións galegas e elimine as peaxes da AP-9, algo que a bo seguro agradeceremos tanto os redondeláns como os galegos en xeral”.

O portavoz do Grupo Popular, Alberto Pazos, trasladou hoxe, logo da viaxe dunha delegación do Parlamento de Galicia ao campo de refuxiados saharauis de Tinduf en Alxeria, a preocupación existente entre a poboación saharaui polo “incomprensible bandazo que o Goberno de Pedro Sánchez deu as relacións de España con Sahara Occidental, que se senten traizoados e abandonados polo cambio da política exterior española ante as presións realizadas por Marrocos”.

Ademais, defendeu “o sentidiño e a plena disposición de Galicia a acoller menores migrantes non acompañados” e criticou a falta de rigor do Goberno central ao non asumir a ausencia dunha política migratoria.

Alberto Pazos salientou que Galicia, con 288 nenos que participan este ano no programa Vacacións en paz organizado pola Asociación Solidariedade Galega co Pobo Saharaui, é a segunda comunidade que maior número de nenos acollerá, só superada por Andalucía. Neste sentido, insistiu que “somos unha terra solidaria e mostra disto é a colaboración que desde hai moitos anos vén prestando a Xunta, na que xa leva investidos case 2,5 millóns de euros, para que todos estes nenos gocen dunhas merecidas vacacións nas que disfrutar de actividades de lecer e tempo libre, se lles facilita a asistencia médica que precisen e se familiarizan coa cultura e as linguas galega e castelá, coa que conviviron durante o período colonial español”.

FELICITACIÓN E AGRADECEMENTO

Neste punto, deu as gracias e felicitou polo traballo que vén desenvolvendo, ano tras ano, a Asociación Solidariedade Galega co Pobo Saharaui, capitaneada pola recentemente galardoada coa Medalla Castelao Maite Isla, e a todas esas familias que dan testemuña da xenerosidade do pobo galego.

“Foi unha viaxe moi ilusionante e satisfactoria, pola alegría e esperanza coa que os nenos e nenas acoden a disfrutar da súa estadía en Galicia e noutras comunidades autónomas españolas, e polos vínculos de cariño que se van forxando a través da relación de convivencia entre as familias e os menores, pero tamén foi unha estancia en Tinduf na que puidemos comprobar, con preocupación, a actual situación do campamento de refuxiados, trasladada directamente tanto polo primeiro ministro de Rasd, Bucharaya Hamudi Beyun; como polo Presidente da República Árabe Saharaui Democrática, Brahim Gali nas entrevistas que mantiveron coa Delegación galega e nomeadamente coa representación deste Parlamento”, dixo Alberto Pazos.

Segundo explicou, esta situación deriva “do incomprensible bandazo que o Goberno de Pedro Sánchez deu as relacións de España co Sahara Occidental, abandonando a postura tradicional mantida ao longo do tempo polos distintos Gobernos de España, que sempre defenderon a aplicación da legalidade internacional, e a defensa das resolucións da ONU que establecen a necesidade da celebración dun Referendum para que o pobo Saharaui poida decidir libre e democraticamente o seu proio futuro”.

SENTIMENTO DE TRAIZÓN

“Existe un fondo sentimento de traizón cara ao Goberno de España entre a poboación saharaui, que se sente abandonada polo cambio na política exterior do Goberno español ante as presións realizadas desde Marrocos”, sinalou o portavoz popular.

En calquera caso, Pazos asegurou que “desde Galicia seguiremos trasladando a nosa solidariedade á inmensa maioría do pobo galego coa causa saharaui, e o noso compromiso de seguir traballando ata que se cumpran os compromisos establecidos nas resolucións da ONU, que permitirían a este pobo decidir o seu futuro a través dun referendo con plenas garantías”.

Ademais, respecto da política do Goberno español cara ao Sáhara Occidental, engadiu que “manteremos a nosa posición de levar adiante unha política baseada no equilibrio das relacións con dous socios como son Marrocos e Arxelia, ao tempo que avogamos por manter unha neutralidade activa no posicionamento respecto ao Sáhara Occidental, mantendo o noso apoio as decisións adoptadas polas Nacións Unidas”.

Alberto Pazos tamén se referiu á problemática existente coa acollida polas comunidades autónomas de menores migrantes non acompañados chegados a Canarias e Ceuta. Neste sentido, destacou que “fronte ao sentidiño de Galicia e a súa plena disposición a acoller os nenos e adolescentes que lle corresponde, atopámonos cun Goberno central mentireiro e desleal, co único obxectivo de botar as culpas ás comunidades autónomas gobernadas polo Partido Popular pero sen poñer enriba da mesa unha verdadeira política migratoria que dea solución a este grave problema”.

CATALUÑA, A ÚNICA QUE NON APOIOU O REPARTO

“O Goberno de Pedro Sánchez vive permanentemente na inacción e na improvisación, e neste caso concreto dos menores migrantes non acompañados volveuno a demostrar”, lamentou o portavoz popular, quen apuntou que volveu a mentir cando acusou ás comunidades autónomas de non ter acollido aos menores migrantes comprometidos en 2023. “Galicia aínda está á espera de recibir aos 28 menores que o Goberno central se comprometera a enviar o pasado ano, que non chegaron simplemente por dificultades a nivel burocrático e administrativo, como recoñeceu o propio Presidente de Canarias na reunión do mércores”, explicou.

Ademais, criticou que “a desvergoña do Goberno de Pedro Sánchez chegou ata o punto de acusar ás comunidades gobernadas polo Partido Popular de non aceptar os acordos da Conferencia Sectorial celebrada o mércores, cando todas elas votaron a favor do reparto acordado na reunión, a excepción de Cataluña, precisamente a comunidade autónoma gobernada polos seus socios independentistas e que manteñen a Pedro Sánchez na Moncloa”.

Por último, insistiu que “Galicia vai seguir amosando a súa solidariedade e tenderá as súas mans para acoller a outros 26 novos menores migrantes non acompañados procedentes de Canarias e Ceuta, actuando coa lealdade e a responsabilidade que nos caracteriza”, pero avisou que “non estamos dispostos a aguantar as insensateces do Goberno de Pedro Sánchez e a súa falta de rigor, porque o primeiro que ten que asumir é a súa falta total de política migratoria, que non é consecuencia das comunidades autónomas”.

O deputado do Grupo Popular Roberto Rodríguez asegurou hoxe no Pleno do Parlamento galego que SOGAMA manterá de media o mesmo canon do ano 2023, fixado en 66 euros por tonelada, aos concellos adscritos a esta empresa pública, de xeito que lles repercutirá unha contía moito menor que o custo real que ten o servizo, que rolda os 120 euros.

Roberto Rodríguez explicou que a empresa pública SOGAMA asumiu no último ano e medio un sobrecusto de 39 euros por tonelada pola xestión dos residuos urbanos que recibe procedentes de 295 concellos galegos provocado por decisións unilaterais adoptadas polo Goberno de Pedro Sánchez: a aplicación, desde o mes de xaneiro de 2023, do imposto estatal sobre vertido e incineración, que supuxo 9 millóns de euros de sobrecusto; a orde ministerial, de xullo de 2023, que elimina a retribución que Galicia recibía pola planta termoeléctrica de Cerceda, pese a que tiña dereito a percibila ata 2026 e que tivo un sobrecusto para as arcas galegas de 9,8 millóns de euros; e o imposto estatal de produción de enerxía, que conlevou unha suba dun 7 por cento.

SEN ALEGACIÓNS DOS CONCELLOS

“Nin a Fegamp nin a FEMP alegaron no seu momento contra esta suba provocada polas decisións do Goberno central, pero agora esixen o mantemento das bonificacións e anuncian alegacións á decisión de SOGAMA”, indicou o deputado popular, quen lamentou que “alegarán excluíndo deliberadamente do debate aos 150 concellos gobernados polo Partido Popular, máis que BNG e PSdeG xuntos pese aos seus pactos de perdedores”.

O resultado destas decisións aleatorias do Goberno de Pedro Sánchez foi un encarecemento do custo do servizo que presta SOGAMA en 21,9 millóns de euros no ano 2023, “a pesar de que a tendencia a nivel europeo está a ser a de aprobar unha moratoria á aplicación do imposto sobre incineración porque está a producir efectos contrarios aos pretendidos, xerando maior cantidade de refugallo e obstaculizando a produción de electricidade barata, autóctona, fiable e neutra”, apuntou.

Diante desta situación, Roberto Rodríguez salientou que a Xunta “fará un esforzo supletorio para causar o menor impacto posible das medidas do Goberno de Pedro Sánchez no peto dos galegos: realizará unha aportación extra de 12 euros por tonelada a través do fondo de cooperación local”. Deste xeito, subliñou que, aínda coa actualización proposta por SOGAMA, o canon medio para 2024 seguirá sendo o máis barato de España.

“SOGAMA viuse penalizada polo Goberno socialista fronte a plantas menos eficientes nas que, sobre o papel, se valoriza todo o material recibido, como Nostián ou Serra do Barbanza, que apostan polo modelo húmido-seco, en extinción xa que é contrario ás directrices europeas e que, ademais, resulta notablemente máis custoso para os concellos”, rematou.

A portavoz de Asuntos Sociais do Grupo Popular, Raquel Arias, reclamou hoxe no Pleno do Parlamento galego ao Goberno central “que abone á Comunidade galega os 2.500 millóns de euros que lle debe pola cofinanciación da prestación dos servizos de dependencia, xa que só está a pagar o 30 por cento cando por lei está obrigado a aportar o 50 por cento”, unha solicitude que foi rexeitada por BNG e PSdeG.

Raquel Arias asegurou que “cos cartos que o Goberno de Pedro Sánchez debe a Galicia en materia de dependencia poderíanse construír 138 residencias como a que se vai abrir en Lugo, duplicar o número de prazas de residencia que hai en Galicia ou pagar máis de 100 millóns de horas de axuda no fogar”.

“Pero, a pesar desta falta de orzamento por parte do Goberno central, o esforzo que está a facer o Goberno galego permitiu situarnos como unha das comunidades co mellor sistema de atención á dependencia, con mellor cobertura en centros de día para persoas maiores de 70 anos ou liderar o acollemento familiar de menores”, subliñou.

MELLORA DOS TEMPOS DE ATENCIÓN

A portavoz popular lembrou que “a Xunta é consciente das necesidades de seguir mellorando os tempos de atención á dependencia” e citou expresamente o compromiso de seguir acurtando os tempos de espera “coa recente aprobación dun decreto para axilizar os procedementos, reforzar os equipos de valoración e facer a valoración da dependencia e de recurso asignado no mesmo acto”

Respecto do servizo de axuda no fogar, Raquel Arias salientou, partindo da base de que se trata dun servizo de competencia municipal a raíz da Lei aprobada polo Goberno bipartito de PSOE e BNG, que a aportación da Xunta aos concellos incrementouse nun 24 por cento nos últimos anos, pasando de 9,7 a 12 euros por hora. “E aínda así somos conscientes de que non é suficiente, polo que o Goberno de Alfonso Rueda xa iniciou unha nova rolda de negociación coa Fegamp para revisar este importe”, apuntou.

“A Xunta fai as valoracións dos usuarios e asigna os recursos segundo o que establece a Lei estatal, pero o responsable de facer efectiva a prestación é o Concello”, explicou a portavoz popular. Ademais, indicou que o pago da prestación repártese entre os usuarios, os concellos, a Xunta e o Estado, “pero dáse a paradoxa de que o Goberno galego está a aportar o 70 por cento fronte ao 30 por cento do Goberno central”.