Categoría: Parlamento de Galicia

O Parlamento de Galicia aprobou hoxe por unanimidade unha proposición non de lei do Grupo Popular a través da que se demanda ao Goberno de España actuacións que garantan a permanencia da factoría de Alcoa na Mariña lucense, entre as que figuran a presenza dos ministros de Industria e de Transición Ecolóxica na reunión da Mesa de Seguimento do pacto de viabilidade convocada para o vindeiro día 9 de decembro ou a autorización dos parques eólicos de competencia estatal que prevén subministrar a esta factoría. Así mesmo, a iniciativa aprobada inclúe, a pesar de que o PSdeG non o apoio este punto, que o Goberno central active a intervención pública temporal e instrumental de Alcoa no caso de que todas as accións previstas non teñan un resultado positivo.

A través desta proposición non de lei, defendida pola deputada popular Elena Candia, o Parlamento de Galicia traslada o apoio aos traballadores e traballadoras que, directa ou indirectamente, vénse afectados pola situación de incerteza da fábrica de alúmina e aluminio de Alcoa na Mariña lucense e amosa a súa solidariedade polas familias afectadas.

AXUDAS PÚBLICAS

Así mesmo, demándase ao Goberno central, unha vez convocada a mesa de seguimento do pacto de viabilidade para o día 9 de decembro, a participación na mesma dos titulares dos Ministerios de Industria e Turismo e para a Transición Ecolóxica e o Reto Demográfico e do Presidente da Xunta, que xa anunciou a súa vontade de asistir se o facían os citados ministros.

Tamén se esixe o aumento da dotación orzamentaria das axudas de compensación de custes de emisións indirectas de CO2 ata o máximo legalmente permitido pola normativa europea, así como autorizar, sen máis dilación, os parques eólicos de competencia estatal vencellados a contratos a longo prazo para a produción de enerxía a prezos competitivos que prevén subministrar á factoría mariñá.

Outro dos puntos da iniciativa parlamentaria aprobados por unanimidade fai referencia á necesidade de articular unha liña de axudas públicas e apoios extraordinarios que garantan o investimento para a modernización da planta, no mesmo sentido que as que recibiron outras empresas tamén declaradas estratéxicas polo Estado, así como modificar o Estatuto do Consumidor Electrointensivo para crear a figura das empresas hiper-electrointesivas e deseñar mecanismos de apoio específicos ou reforzados que atendan ás necesidades especiais desta figura.

A proposición non de lei pide, ademais, articular unha interrumpibilidade que aproveite a capacidade destas industrias para funcionar como colchón nos picos de consumo de enerxía e estudar todas as accións legais e institucionais que garantan os compromisos adquiridos por parte das distintas administración e de Alcoa, en particular, aqueles previstos no acordo de viabilidade ou, alternativamente, os que se puideran pactar entre empresa e traballadores no marco do proceso de negociación.

O PSdeG ROMPEU A UNANIMIDADE TOTAL

O apoio unánime de todos os grupos parlamentarios co que contaron todos estes puntos rachouse nunha última demanda que non foi apoiada polos deputados do PSdeG. En concreto, o PPdeG e o BNG demandaron, no caso de que todas as accións anteriores sexan insuficientes, activar a intervención pública temporal e instrumental de Alcoa, para garantir a continuidade da actividade e o mantemento de todos os postos de traballo en San Cibrao, incluíndo o das auxiliares.

 

A portavoz de Asuntos Sociais do Grupo Popular, Raquel Arias, acusou hoxe ao PSdeG de pretender traer a Galicia a inxerencia no Poder Xudicial ao máis puro estilo Sanchista, ao pedir que o Parlamento galego lle dea ordes ao presidente do Tribunal Superior de Xustiza de Galicia e aos xuíces sobre como se deben aplicar as leis vixentes.

“En vez de pretender darlle ordes aos xuíces, os socialistas deberían de preocuparse de cumprir os mandatos que se dan a si mesmos”, indicou Raquel Arias, quen se referiu a incumprimentos como a posta en marcha de maneira urxente dunha Lei de trata, que o Pacto de Estado contra a violencia de xénero leve dous anos caducado ou que, co apoio do BNG, “sexan os responsables da lei máis lesiva da historia para as mulleres: a lei do so si e si, que provocou que máis de 1.450 violadores e agresores sexuais visen reducidas as súas condenas e 126 saíran antes do cárcere”.

LEIS PIONEIRAS CONTRA A VIOLENCIA DE XÉNERO

Raquel Arias salientou que os orzamentos da Xunta para 2025 dedican o triplo de cartos que o Goberno bipartito de PSdeG e BNG para as políticas de igualdade e a loita contra a violencia de xénero. En concreto, destacou que “Galicia será a primeira comunidade autónoma en contar cunha lei contra a violencia dixital, do mesmo xeito que xa fomos os primeiros en considerar esta violencia ou a vicaria como violencia de xénero; ao tempo que blindamos as axudas periódicas ás vítimas; e puxemos en marcha o pago único para as vítimas de violencia sexual”.

“Como novidade máis salientable, para o vindeiro ano poremos en marcha os cinco centros públicos de crise 24 horas; unha nova casa de acollida, neste caso para as vítimas que teñen adicións; ou o reforzamento dos centros de información á muller, cun incremento orzamentario do 30 por cento”, apuntou.

Respecto do BNG, Arias lembrou a campaña dos nacionalistas con motivo da recente celebración do Día Internacional da eliminación da violencia contra a muller e criticou que “non se loita contra este tipo de violencia con este tipo de campañas, que banalizan esta lacra que ataca os dereitos humanos e acaba coas vidas das mulleres”. “Unha campaña irresponsable, unha campaña baseada en mentiras e unha campaña absolutamente hipócrita”, indicou.

Para rematar, a portavoz popular trasladou ás mulleres que están pasando por unha situación de violencia de xénero que “non están soas, porque teñen detrás a un goberno concienciado, unha sociedade que di non e recursos a onde dirixirse cando se sintan atacadas”.

 

O portavoz de Lingua do Grupo Popular, José Luís Ferrol, avogou hoxe no Pleno do Parlamento galego por “rachar as liñas vermellas” ao falar do galego, que “non debe ser algo que entre no debate partidista, senón un ben común que nos une e singulariza, que todos debemos defender usándoo con absoluto coñecemento e normalidade, sen excluír para nada o manexo conveniente do castelán e doutras linguas”.

“Cambiemos o paso, non politicemos a nosa lingua nin a utilicemos con fins políticos”, demandou José Luís Ferro, quen asegurou que o Goberno galego “está disposto a falar de educación e do decreto do plurilingüismo, pero os grupos da oposición saben perfectamente que non temos un problema de competencias lingüísticas, senón un problema de uso social do galego”.

Neste sentido, lembrou que a Xunta impulsa o emprego do galego mediante distintas iniciativas, como a formación, programas, aplicacións ou tradutores, pero correspóndelle á cidadanía e aos profesionais decidir o idioma no que se comunican coa Administración e se queren optar exclusivamente pola utilización dun deles”. “O problema é que moitos galegos relativizan a importancia do galego, e aí é onde debemos incidir para que pouco a pouco, e sen imposicións, se vaian animando a usar o galego sen medo e sen vergoña”, apuntou.

FALTA DE COHERENCIA DE BNG E PSdeG

Por outra banda, José Luís Ferro defendeu que a lingua galega poida ser utilizada no Parlamento Europeo, sen que esta medida minore os recursos necesarios para a súa normalización. Así mesmo, pediu ao Goberno de España que complete a súa parte na dotación ata chegar aos 15 millóns de euros solicitados por Galicia no marco do PERTE Nova Economía da Lingua.

O portavoz popular lembrou que “é competencia do Consello Europeo, onde están representados os 27 estados membros, fixar por unanimidade o réxime lingüístico das institucións comunitarias”. Na actualidade, e logo da solicitude feita polo Goberno de España en 2004, está institucionalizado o uso das linguas cooficiais españolas nas sesións plenarias do Comité Europeo de Rexións e nas reunións ministeriais do Consello de Europa. “Porén, non é o caso do Parlamento Europeo, posto que foi a única institución comunitaria que non formalizou un acordo con España para permitir a intervención oral nas linguas cooficiais españolas”, dixo.

Ferro criticou a “falta de coherencia” de BNG e PSdeG ao defender ao Goberno de Pedro Sánchez respecto á súa Goberno de España de 13 millóns de euros para o desenvolvemento do Proxecto NOS da lingua galega, e, por outra parte, “non lles doen os 40 millóns de euros anuais que custaría que un puñado de eurodeputados poidan falar o galego nas súas intervencións no Parlamento Europeo”.

 

O portavoz do Medio Rural do Grupo Popular, Miguel Ángel Viso, considerou hoxe no Pleno do Parlamento galego “precipitado” prolongar a moratoria para novas plantacións de eucalipto ata 2030 “sen considerar os resultados do Inventario Forestal Continuo nin avaliar as repercusións reais no sector”. Así mesmo, salientou que a Xunta destinará o vindeiro ano máis de 15 millóns de euros para silvicultura adaptativa e produtiva en coníferas e frondosas, “o que reflicte a prioridade do Goberno galego de eliminar progresivamente o eucalipto en áreas non axeitadas e cumprir cos obxectivos do Plan Forestal de Galicia 2021-2040”.

“As decisións sobre o eucalipto no monte galego deben tomarse con seriedade, serenidade e baseándose na realidade”, incidiu o portavoz popular, quen afirmou que “nós cremos nun monte que estea ordenado, que xere riqueza e postos de traballo e que sexa eficiente cara á neutralidade carbónica a alcanzar no ano 2040”.

FONTE DE INGRESOS

Miguel Viso indicou que “falamos do eucalipto como unha fonte de ingresos moi importante para o rural galego e a nosa obriga é garantir un equilibrio entre economía e ecoloxía”. Deste xeito, asegurou que “seguiremos garantindo que o monte galego xere riqueza sen comprometer o medio ambiente nin a biodiversidade”.

Na súa intervención, concretou que Galicia conta na actualidade cunha superficie de 1,5 millóns de hectáreas arboradas, das que 413.000 son de eucalipto, 429.000 son de coníferas e 635.000 son de frondosas. “Nos últimos catro anos incrementamos en 10.400 hectáreas as masas de frondosas e coníferas, destinando máis de 32 millóns de euros en axudas, como resultado das medidas para reducir gradualmente o eucalipto en zonas sensibles como espazos protexidos, augas, patrimonio cultural e áreas costeiras”, apuntou.

O portavoz popular manifestou que “a Xunta xa está levando a cabo un plan sólido e efectivo de reconversión forestal, no que destacan actuacións como a prohibición de novas plantacións en montes públicos; priorizar a conversión de terreos con eucaliptos cara a especies autóctonas de maior valor ecolóxico e produtivo; a planificación en xestión pública e privada, asegurando unha ordenación forestal equilibrada; e a integración no Plan Forestal de Galicia 2021-240, incrementando coníferas e frondosas autóctonas, mellorando a xestión das plantacións existentes e diversificando os usos do monte”.

 

A deputada do Grupo Popular Nicole Grueira salientou hoxe a “responsabilidade e eficacia” coa que a Xunta está a abordar o control do xabaril en Galicia e indicou que as axudas para paliar os danos desta especie incrementaranse o vindeiro ano un 45 por cento, alcanzando os tres millóns de euros.

Nicole Grueira manifestou que “os efectos do xabaril son unha cuestión de gran impacto tanto para o medio rural, como para a seguridade das persoas e tamén para os espazos urbanos e periurbanos”. “Estamos ante un reto complexo, sobre o que a Xunta está a actuar con rigor, con planificación e cun compromiso firme, tomando medidas concretas e eficaces para paliar os danos ocasionados e controlar esta especie”, indicou.

En concreto, a deputada destacou o esforzo económico que realiza a Xunta para paliar os danos desta especie, a través de axudas específicas, que o vindeiro ano se incrementarán case un 40 por cento; e con actuacións en materia de prevención, que contarán cun incremento do 20 por cento para o 2025.

EMERXENCIA CINEXÉTICA

Ademais, referiuse á declaración de emerxencia cinexética, unha ferramenta prevista no regulamento de caza que permite abordar con maior rapidez as zonas máis afectadas, axilizando a aplicación de medidas específicas para reducir as poboacións de xabaríns.

“Esta declaración entrou en vigor o pasado 11 de outubro por cuarta vez, logo das de 2019, 2021 e 2023, co obxectivo de reducir a presión do xabaril nos cultivos, afastalos dos núcleos urbanos e mellorar a seguridade viaria”, indicou. Este ano, a declaración esténdese a 40 comarcas, 260 concellos e preto do 85 por cento da superficie de Galicia.

Para rematar, Nicole Grueira sinalou que a Xunta, a través de convenios de colaboración cos concellos, está a implementar gaiolas trampa para o control do xabaril en zonas urbanas e periurbanas. “Estas medidas están a dar resultados positivos, logo de que no período 2023-24 se rexistraran 58 capturas nos concellos participantes”, concretou.

 

O Parlamento de Galicia aprobou hoxe a proposición non de lei do Grupo Popular, que non contou co voto favorable do BNG, a través da que se demanda ao Ministerio para a Transición Ecolóxica e Reto Demográfico que rectifique a súa decisión de incluír ao lobo no Listado de especies silvestres en réxime de protección especial (LESPRE) e do Catálogo Español de Especies Ameazadas. “Esta decisión, adoptada en 2021, foi un golpe directo á racionalidade e á xustiza territorial, porque non obedeceu a criterios científicos nin tivo en conta o estado de conservación favorable desta especie ao norte do río Douro, como o acreditan os censos oficiais”, manifestou o portavoz popular do Medio Rural, Miguel Ángel Viso.

Na súa intervención, Miguel Ángel Viso afirmou que “o incremento dos ataques do lobo ás explotacións gandeiras é alarmante: o lobo xa non ataca aos animais en zonas de pastos de montaña, porque xa está nos núcleos urbanos das vilas”. Neste sentido, dixo que a poboación de lobo en Galicia “é estable, con 93 manadas rexistradas no 91 por cento do noso territorio”.

ACTITUDE ERRÁTICA E INXUSTA DO GOBERNO CENTRAL

“Mentres Galicia fai os deberes, o Goberno central mostra unha actitude errática e inxusta”, sinalou o portavoz popular, quen lembrou que “a Xunta destinou entre 2016 e 2023 case 8,4 millóns de euros a previr e paliar os danos provocados polo lobo, mentres o Goberno central non transferiu un só euro á Comunidade galega en 2022 e 2023”. Ademais, indicou que “eses oito millóns de euros da Xunta están xudicializados porque o Goberno de Pedro Sánchez decidiu penalizar a Galicia por non apoiar unha estratexia nacional allea ás nosas necesidades e á nosa realidade”.

Viso lembrou que “as autoridades europeas xa recoñeceron que o nivel de protección do lobo debe adaptarse á realidade de cada país e deste xeito a proposta de rebaixar o estatus de protección da especie segue adiante en Europa, a pesar do voto en contra do representante español”. “Mentres outros avanzan cara a solucións equilibradas, o Goberno central persiste nunha política que so xera descontento e desamparo”, lamentou.

“Galicia precisa decisións baseadas na realidade e non en ideoloxías ou en intereses alleos, porque a xestión do lobo debe garantir a súa conservación pero tamén o futuro dos nosos gandeiros e a viabilidade do noso medio rural”, apuntou o portavoz popular, quen defendeu que “Galicia poida xestionar os seus recursos de forma eficiente, que se devolvan os fondos que nos corresponden e que se rectifique unha decisión que prexudica á nosa terra”.

 

O Parlamento de Galicia aprobou hoxe a proposición non de lei do Grupo Popular, que non foi apoiada polo BNG, a través da que se solicita ao Goberno de España, en particular ao Ministerio de Agricultura, Pesca e Alimentación, que materialice canto antes a flexibilización dos requisitos de benestar animal relativos ao deseño das explotacións recollidos no Real-Decreto 1053/2022 e se acelere a tramitación e entrada en vigor da normativa que os modifica.

O deputado popular Enrique Barreiro asegurou que este Real-Decreto, polo que se establecen as normas básicas de ordenación das granxas bovinas, “non vai beneficiar á saúde dos animais, máis ben todo o contrario porque será un grave prexuízo para as ganderías, provocando o peche de moitas das que non poidan realizar as obras”.

EXPLOTACIÓNS VIVAS E RELEVO XERACIONAL

“Se queremos que estas explotacións sigan vivas e que haxa o relevo xeracional adecuado, temos que lexislar para que estes negocios sexan rendibles e non facerlles investir os seus beneficios en obras que para nada contribúen á calidade dos produtos, uns produtos que son os mellores do mercado español”, sinalou.

Enrique Barreiro explicou que este Real-Decreto “ven esixir de modo retroactivo modificacións na estrutura das explotacións sen valorar en ningún caso o confort dos animais, senón que ven homoxeneizar a estrutura das mesmas sen coñecer de modo algún as características propias de cada comunidade autónoma”.

No caso concreto de Galicia, lembrou que “un gran número de explotacións son pequenas ou medianas e moitas delas non teñen posibilidade algunha de facer estes cambios porque ou non dispoñen dos recursos necesarios ou non teñen o espazo físico necesario para facer os patios ou lugares exteriores”.

Ademais, apuntou que en Galicia “temos unha elevada humidade e épocas de moito frío, o que non é para nada beneficioso para os animais que están en semiextensivo ou non extensivo, xa que o único que lles vai aportar é estrés polo cambio ambiental, o que deriva nunha menor produción e diversos problemas de saúde, o que provoca un peor estado de benestar animal”.

 

O Parlamento de Galicia aprobou hoxe a proposición non de lei do Grupo Popular, que non contou co apoio do BNG, a través da que se demanda a posta en marcha de novas accións de emprendemento como un xeito de afrontar o reto demográfico e fixar poboación no territorio, ademais de dirixirse ao Goberno central para reclamarlle os fondos necesarios relativos ao financiamento do custo do Centro de orientación ao emprendemento de Galicia, comprometidos nunha reunión sectorial celebrada con todas as comunidades autónomas.

A portavoz popular de Emprego, Noelia Pérez, afirmou que “unha das mellores formas para facer fronte aos retos de crear emprego de calidade en Galicia, asegurando a competitividade e a viabilidade do tecido deportivo e comercial, é seguir traballando a prol do colectivo autónomo, que representa o 19 por cento do noso tecido produtivo, tres puntos por enriba da media nacional”.

Noelia Pérez manifestou que “o impulso ao emprendemento en Galicia é un xeito de fixar poboación no rural, polo que o obxectivo desta iniciativa parlamentaria é que a Xunta siga impulsando accións para favorecer o emprendemento e reclamar ao Goberno de España que cumpra co seu compromiso de financiar o Centro de Orientación ao Emprendemento”.

Na actualidade, a Comunidade galega conta con 15 polos de emprendemento onde se identifican as necesidades e oportunidades para emprender que presenta cada un dos territorios, onde se detectan as actividades económicas con potencial que xorden en cada territorio e onde se fomentan os proxectos que permitan desenvolver novos sectores innovadores da man dos traballadores dos polos que acompañan e asesoran ao galegos que teñan unha idea de negocio.

 

O Parlamento de Galicia aprobou hoxe a proposición non de lei do Grupo Popular, que non contou co voto favorable do BNG, a través da que se solicita ao Goberno de España que adopte cantas medidas sexan precisas para garantir a plena asistencia aos mutualistas, licitando de maneira urxente o concerto con MUFACE, e impedindo que esta situación, na que ten responsabilidade directa, impacte nos sistemas sanitarios públicos das distintas comunidades autónomas. Así mesmo, pídese que, en caso necesario, prorrogue o servizo actual, de acordo co articulo 29.4 da Lei de contratos do sector público, ata que non se produza a nova adxudicación.

A portavoz popular de Sanidade, Encarna Amigo, lembrou que “o pasado 5 de novembro quedou deserta a licitación do concerto para prestar asistencia sanitaria no ámbito de MUFACE a consecuencia dun infrafinanciamento do servizo, xunto cunhas coberturas máis esixentes das que presta o propio Sistema Nacional de Saúde nalgúns aspectos”.

DÚAS CORRENTES NO GOBERNO DE PEDRO SÁNCHEZ

“A desaparición de MUFACE tería un notable impacto na asistencia sanitaria pública, pois so en Galicia tería que absorber máis de 60.000 adscritos que se estiman na Comunidade galega, coa conseguinte necesidade de contratar decenas de médicos de familia”, indicou.

Ademais destes problemas na atención da sanidade pública, esta situación “produciría unha discontinuidade asistencial, pois os pacientes deixarían de estar atendidos polo seu médico de toda a vida; e unha desconexión da historia clínica, xa que o sistema IANUS de historia clínica da sanidade pública galega non conta cos datos da sanidade privada á que acoden os usuarios de MUFACE”, engadiu Encarna Amigo.

A portavoz popular criticou que, diante desta situación, no Goberno de Pedro Sánchez “apareceron dúas correntes: por un lado, Función Pública, que propón volver a licitar cun maior importe; e, por outra parte, o Ministerio de Sanidade, partidario de eliminar MUFACE e que a sanidade pública absorba a todos os seus adscritos”.

“É urxente que o Goberno de España adopte todas as medidas que sexan precisas para garantir a continuidade do sistema, completando canto antes a nova licitación do concerto e prevendo as medidas necesarias que garantan a atención sanitaria a estes mutualistas en caso de non conseguir ofertas”, rematou Encarna Amigo.

 

A portavoz de Sanidade do Grupo Popular, Encarna Amigo, salientou ho que o Plan galego de atención domiciliaria en atención primaria 2024-2025 potenciará a asistencia nas zonas rurais, con equipos especializados de enfermería para unha atención máis próxima e personalizada.

Encarna Amigo asegurou que o Goberno galego “busca continuar garantindo os principios de equidade, calidade e accesibilidade para facer fronte ás necesidades de todos os galegos”.

“A pesar de todas as incertezas producidas pola pandemia e o déficit manifesto de profesionais sanitarios da medicina e da enfermería, a cobertura de atención ao domicilio estase despregando en todo o territorio galego e seguirase despregando ao longo dos próximos anos”, afirmou a portavoz popular. Na actualidade, Galicia conta con 50 equipos de hospitalización a domicilio, que dan servizo a máis de 5.600 pacientes, unha cifra que se incrementou un 19 por cento respecto a 2018.

A portavoz popular manifestou que “estase a traballar en novas estratexias coa finalidade de que a cobertura sexa do 100 por cento, un obxectivo ao que non renunciamos sempre que existan profesionais suficientes para cubrir os equipos que estean autorizados e dotados orzamentariamente”.