Categoría: Parlamento de Galicia

O portavoz de Lingua do Grupo Popular, José Luís Ferro, cualificou como “seria, realista e eficaz” a política lingüística do Goberno galego e do PPdeG. “Mentres o BNG pretende levantar muros, nós traballamos na unidade, unidade das dúas linguas oficiais, que son patrimonio de todos os galegos”, concretou.

José Luís Ferro lembrou que o decreto 79/2010 “naceu para garantir un equilibrio real no uso do galego e do castelán no ensino, cumprindo coa Lei de normalización lingüística e co Estatuto de Autonomía”, porque “a verdadeira normalización non pode nacer da improvisación, senón do respecto, da convivencia e do consenso”. Así, lamentou que os nacionalistas galegos rexeitaran participar nas comisións de traballo para renova o Plan xeral de normalización, “uns traballos que avanzan co compromiso do Goberno galego de ter unha proposta de documento canto antes”.

DECRETO EN PLENA VIXENCIA

“Este decreto que o BNG pide derrogar foi avalado polos tribunais, está en plena vixencia e é a mellor ferramenta para garantir o equilibrio e o respecto á legalidade”, manifestou o portavoz popular, quen apuntou que “onde os nacionalistas falan de fracaso os datos din outra cousa: a maioría dos galegos e galegas son competentes nas dúas linguas oficiais; o galego mantén unha forte presenza no ensino, na cultura e nos medios públicos; e cada vez máis xente nova accede a contidos en galego, tamén no ámbito dixital e nas redes sociais”.

Deste xeito, asegurou que “o verdadeiro reto non é cambiar leis ou decretos cada vez que o BNG presenta unha moción, senón consolidar ese uso real do galego en todos os espazos sociais, desde o respecto e a liberdade individual”.

José Luís Ferro afirmou que “imos seguir traballando no camiño que nos define: garantindo que o alumnado acabe os seus estudos sendo plenamente competente en galego e castelán; apostando polo plurilingüismo como ferramenta de futuro; impulsando programas que leven o galego á ciencia, á tecnoloxía, ao audiovisual e á creación dixital; e facendo do galego unha lingua útil, viva e querida polas novas xeracións”.

A portavoz de Política Social do Grupo Popular, Raquel Arias, afirmou hoxe no Pleno do Parlamento galego que a Xunta está negociando un novo incremento da súa aportación aos concellos para o servizo de axuda no fogar, pero insistiu en que “o Goberno de Pedro Sánchez pague os máis de 2.500 millóns de euros que debe a Galicia pola prestación dos servizos da dependencia, que poderían destinarse a máis horas de axuda a domicilio, construción ou dotación das residencias dos maiores e centros de día, ou a teleasistencia”.

Raquel Arias asegurou que “nacionalistas e socialistas galegos son culpables de que todos os dependentes e as persoas con discapacidade en Galicia non teñan os servizos e prestacións que por lei lles corresponde, xa que o Goberno central estalle a negar á Comunidade galega o 50 por cento que lle corresponde pola prestación da dependencia”. “Díganlles a eses maiores galegos que Pedro Sánchez lle vai pagar ao Goberno vasco a metade dos custos da lei da dependencia, mentres a Galicia só lle abona o 35 por cento, e baixando ano tras ano”, pediu aos deputados de BNG e PSdeG.

Así mesmo, a portavoz popular criticou o recente recurso de inconstitucionalidade presentado polo Goberno central contra o plan de choque da valoración da dependencia e a discapacidade posto en marcha pola Xunta este ano, “unha decisión que vai prexudicar a 9.000 persoas con discapacidade galegas co aplauso dos socialistas galegos e o apoio implícito do BNG”.

Na súa intervención, Arias destacou que Galicia é a segunda comunidade na que máis se reduciu a lista de agarda da dependencia no último semestre, exactamente un 38 por cento respecto ao mesmo período de 2024; e, “segundo o puxo de manifesto o propio Goberno central, Galicia é a segunda comunidade na que máis subiu o número de beneficiarios, chegando aos 88.000 dependentes atendidos e unha ratio de atención dos xa valorados do 98 por cento”.

Para rematar, a portavoz popular puxo en valor o protocolo para reforzar a seguridade e a saúde laboral das traballadoras do servizo de axuda no fogar, aprobado onte polo Goberno galego, “un documento elaborado polo Instituto de Seguridade e Saúde Laboral de Galicia a petición da mesa de traballo impulsada pola Fegamp”.

Este protocolo ten en conta o perfil feminizado da actividade e a realidade específica do traballo nos pequenos concellos do rural, actuando sobre tres eixes clave: identificar e xestionar os riscos nos domicilios, optimizar a organización no traballo e reforzar a formación das profesionais.

A portavoz de Sanidade do Grupo Popular, Encarna Amigo, asegurou hoxe que coa nova Lei de protección da saúde das persoas menores e prevención das condutas aditivas, que hoxe superou o debate de totalidade e continuará a súa tramitación parlamentaria, “Galicia da un paso adiante para situarse á vangarda das políticas de saúde pública, con medidas baseadas na evidencia científica e na experiencia acumulada dos profesionais e as entidades sociais”.

Encarna Amigo lembrou que “a metade dos adolescentes de 14 a 18 anos consumiron bebidas enerxéticas no último mes, e un número crecente mestúraas con alcohol; ao tempo que o consumo de vapeadores e cigarros electrónicos medra a un ritmo alarmante”. “Diante desta situación, non podemos mirar para outro lado e temos a obriga, legal e moral, de protexer ás xeracións máis novas fronte a riscos que poden comprometer o seu desenvolvemento físico, emocional e social”, indicou.

“Esta lei nace, precisamente, para previr antes de curar, para educar antes de sancionar e para acompañar antes de estigmatizar”, manifestou a portavoz popular, quen fixou tres principios básicos desta norma: a prevención e promoción da saúde; a protección dos dereitos da infancia e da adolescencia; e a corresponsabilidade social, “porque esta loita non é só das administracións, senón tamén das familias, dos centros educativos, dos concellos e da sociedade no seu conxunto”.

MEDIDAS CONCRETAS

Entre as medidas incorporadas nesta nova lei, Encarna Amigo destacou a prohibición e venda de vapeadores e bebidas enerxéticas a menores; a regulación da publicidade e promoción destes produtos; a prevención das adicións dixitais, incluíndo actuacións sobre o uso abusivo das redes sociais, dos videoxogos e das novas tecnoloxías; o reforzo da educación para a saúde nos centros escolares e no ámbito familiar; a detección temperá e atención integral ás condutas de risco desde o sistema sanitario público; ou a coordinación institucional entre as administracións públicas, o tecido asociativo e as entidades sociais cunha traxectoria recoñecida na prevención das adicións.

“Estamos a falar dunha lei moderna, integral e pioneira, coa que Galicia será unha das primeiras comunidades en contar cun marco normativo que aborda conxuntamente o consumo de substancias e as adicións sen substancia, incluíndo o uso das tecnoloxías dixitais”, sinalou a portavoz popular, quen anotou que “non estamos a falar de limitar dereitos, senón de garantir o dereito fundamental á saúde dos menores, que sempre debe prevalecer sobre intereses comerciais ou de consumo”.

O portavoz de Medio Ambiente, Gonzalo Trenor, asegurou hoxe no Pleno do Parlamento galego que a futura Lei do Clima de Galicia, que hoxe pasou o seu trámite de debate de totalidade, “suporá un avance moi importante para acadar que a Comunidade galega sexa unha rexión neutra en emisións, mellorando os rexistros que xa presenta na actualidade e que a sitúan como líder en redución de emisións netas de CO2 desde 1990”.

Gonzalo Trenor salientou que “Galicia está a reducir as emisións netas de CO2 a un ritmo cinco veces superior ao conxunto de España, superando xa o obxectivo do 55 por cento establecido pola Unión Europea para 2030”. “Con esta norma, Galicia será a primeira comunidade autónoma en establecer por lei o adianto en dez anos do obxectivo de neutralidade climática, fixado pola Unión Europea en 2050”, concretou.

En concreto, o portavoz popular manifestou que a nova lei “nace para contribuír a mitigar as causas do cambio climático, limitando as emisións de gases de efecto invernadoiro a través do impulso das enerxías renovables ou a eficiencia enerxética”.

O Grupo Popular levará ao Pleno do Parlamento galego da vindeira semana unha proposición non de lei, coincidindo coa concesión do Premio Nóbel da Paz a María Corina Machado, a través da que se condena enerxicamente o réxime de Nicolás Maduro polo encarceramento de prisioneiros políticos, esixindo a liberación inmediata e incondicional de todos eles e das persoas detidas arbitrariamente en Venezuela.

Por outra banda, o Grupo Popular tamén demandará ao Goberno de España a posta en marcha de medidas urxentes para que non se volva repetir o caos que se desata cada vez que se suspende o servizo ferroviario, ao tempo que se solicita o desbloqueo urxente de proxectos prioritarios para Galicia en materia ferroviaria que se atopan retrasados.

A orde do día da sesión plenaria, aprobada esta mañá na Xunta de Portavoces, inclúe a comparecencia do conselleiro de Emprego para informar das accións que está a desenvolver este departamento do Goberno galego na procura de reter e sumar talento cara a cobertura de postos vacantes no eido laboral.

PARTICIPACIÓN DA OPOSICIÓN EN VENEZUELA

Dentro do apartado de proposicións non de lei, o Grupo Popular pedirá que o Parlamento galego condene enerxicamente o réxime de Nicolás Maduro en Venezuela polo encarceramento de centos de prisioneiros políticos que se atopan detidos en condicións que vulneran as regras mínimas de Nacións Unidas para o tratamento de reclusos. Neste sentido, esixe a liberación inmediata e incondicional de todos estes prisioneiros políticos e das persoas detidas arbitrariamente, así como o pleno restablecemento dos seus dereitos e liberdades, instando ao réxime de Nicolás Maduro a que poña fin á súa política de represión e aos seus ataques contra a sociedade civil e a oposición.

A iniciativa do Grupo Popular demanda, ademais, que a comunidade internacional apoie o retorno á democracia en Venezuela, na que debe permitirse a plena participación da líder da oposición ao réxime e recentemente recoñecida co Premio Nóbel da Paz, María Corina Machado.

A segunda proposición non de lei do Grupo Popular ten que ver coas habituais interrupcións do tráfico ferroviario que están a sufrir os usuarios destes servizo de transporte, acompañado dunha total falta de información e ausencia dunha alternativa para realizar os desprazamentos necesarios. Investimentos pendentes desde hai anos; supresións de servizos desde a pandemia; falta de ofertas de prazas; frecuencias insuficientes; incumprimentos de horarios; tempos de viaxe e supresión de servizos sen previo aviso; material obsoleto con continúas avarías; ou límites á compra anticipada son algúns das deficientes que padecen os usuarios do servizo ferroviario en Galicia e en toda España, resultado dunha xestión neglixente do Goberno de Pedro Sánchez.

Diante desta situación, o Grupo Popular demandará no Pleno que o Goberno central a posta en marcha das medidas urxentes necesarias para que non se volva a repetir o caos ferroviario que se desata cada vez que se suspende o servizo ferroviario, tanto no referente a medios a dispoñer, información ás persoas usuarias e comunicación e coordinación caos administracións afectadas. Así mesmo, pídese o desbloqueo urxente de todos os proxectos prioritarios en materia ferroviaria pendentes para Galicia e dos que non se teñen novas.

Polo que respecta ás preguntas ao Goberno galego, o Grupo Popular interesarase pola súa valoración respecto a que, un ano despois da aprobación da coñecida como Lei ELA, esta norma aínda non conte coa dotación orzamentaria necesaria para a súa materialización; sobre os resultados do programa de cribado de cancro de mama desde a súa posta en marcha hai xa máis de 30 anos; e sobre a proposta de nova PAC que prevé entrar en vigor a partir do ano 2027.

O deputada do Grupo Popular Paula Mouzo puxo en valor a importancia do coidado da natureza con motivo do inicio dunha campaña de concienciación ambiental sobre a retirada de refugallos do mar e do litoral protagonizada pola asociación Mar de Fábula e o Concello de Camariñas.

Neste sentido, Paula Mouzo asinou unha declaración institucional a través da que o PP de Camariñas asume a necesidade de traballar pola limpeza e protección da contorna do litoral e do espazo común no que se desenvolve a vida diaria, a fin de reforzar a autoestima colectiva e o respecto mutuo, e deixar un futuro sostible ás vindeiras xeracións.

Nesta primeira xornada, a deputada mantivo un encontro con membros de Mar de Fábula, aos que trasladou o seu apoio a este tipo de iniciativas consistentes en charlas informativas e reparto de trípticos para incentivar o coidado do medio mariño.

Neste sentido, Paula Mouzo valorou o traballo que desenvolve Mar de Fábula na loita contra a contaminación mariña, “partindo da base do compromiso que temos as persoas vinculadas co mar e tendo presente que esta responsabilidade debemos transmitila ás novas xeracións”.

Os deputados do Grupo Popular Argimiro Marnotes e Noelia Pérez mantiveron un encontro con representantes da Asociación de Veciños de Santa Uxía de Lobás no concello do Carballiño, entidade que figura entre o cento de entidades da provincia de Ourense que se beneficiaron este ano das axudas concedidas polo Goberno galego para estas organizacións. En total, Ourense foi, con máis de un millón de euros, a provincia galega na que a Xunta repartiu máis orzamento para apoiar o funcionamento e mellora das entidades de participación cidadá.

A través do Plan específico de acción comunitaria, o Goberno galego repartiu entre 99 asociacións da provincia de Ourense máis de un millón de euros para a realización de obras de mellora, acondicionamento e adquisición de equipamento para os seus locais sociais.

SATISFACCIÓN POLO APOIO E A AXILIDADE NA TRAMITACIÓN

Durante a visita á Asociación de Veciños de Santa Uxía de Lobás, Argimiro Marnotes e Noelia Pérez comprobaron o resultado das obras realizadas no se local social, que permitiron mellorar as instalacións e facilitar o uso deste espazo por parte de todos os veciños. Nese sentido, os representantes do colectivo amosaron a súa satisfacción tanto polo apoio recibido pola Xunta como pola axilidade do proceso de tramitación.

Os deputados populares destacaron que Ourense é un exemplo de participación e compromiso veciñal e subliñaron que detrás de cada proxecto hai persoas que dedican tempo, esforzo e ilusión por mellorar a súa contorna.

O portavoz de Infraestruturas do Grupo Popular, Roberto Rodríguez, criticou hoxe a “dobre moral” de BNG e PSdeG ao esixir investimentos da Xunta na cidade de A Coruña e esquecerse dos incumprimentos do Goberno central con proxectos importantes como a ampliación de Alfonso Molina ou da Pasaxe, o Vial 18 ou a Cuarta Rolda. Por este motivo, anunciou que levará ao Parlamento de Galicia unha iniciativa pedindo ao Goberno de Pedro Sánchez prazos concretos e investimentos para dar cumprimento aos compromisos pendentes coa cidade coruñesa.

Roberto Rodríguez salientou que “unha das mellores demostracións do compromiso do Goberno galego con A Coruña son as obras do novo CHUAC, sobre as que esta semana tivemos importantes novidades logo da reunión da Comisión de Seguimento, como a licitación por máis de 400 millóns de euros da segunda fase destas obras, que inclúen a construción do edificio hospitalario principal, no primeiro semestre do vindeiro ano”.

TRANSPARENCIA DO GOBERNO GALEGO

Ademais, lembrou que, no marco da primeira fase, xa está en funcionamento o aparcamento provisional e estase a traballar no remate antes do final de ano da escavación da torre polivalente, que suporá un investimento de 38 millóns de euros. Así mesmo, estase avanzando na demolición do hotel de pacientes, que se atopa ao 60 por cento de execución e que tamén está previsto o seu remate a finais de ano. O remate destes traballos permitirá avanzar na obra dos novos accesos ao complexo hospitalario.

“Esta transparencia que traslada a Xunta sobre as obras que leva a cabo en A Coruña contrasta cos atrasos nas actuacións comprometidas polo Goberno de Pedro Sánchez, unha situación que irá a peor ao verse obrigado a prorrogar os orzamentos para 2026 por terceiro ano consecutivo e sen perspectiva de que poida aprobar unhas contas estatais”, sinalou.

Roberto Rodríguez referiuse a actuacións pendentes que acumulan importantes retrasos, como a ampliación de Alfonso Molina, que incumprirá o prazo previsto para a súa finalización; a ampliación da Pasaxe, o Vial 18 ou a Cuarta Rolda. “Todas elas son obras sin proxecto nin orzamento para a súa execución, ás que se pode engadir outras como o plan director do aeroporto de Alvedro, a chegada da alta velocidade ferroviaria, a cesión de vivendas da SAREB ou a cesión gratuíta da antiga prisión provincial”, apuntou.

Diante desta situación, o portavoz popular de Infraestruturas criticou a “dobre moral” dos socialistas e nacionalistas coruñeses, “amosando plena condescendencia ante os incumprimentos e o abandono do Goberno de Pedro Sánchez á cidade de A Coruña, pero poñendo todo o seu empeño en criticar á Xunta, cando é a única administración que está a cumprir os seus compromisos con esta cidade”.

O portavoz do Grupo Popular, Alberto Pazos, amosou hoxe, ante o vicesecretario xeral de Facenda do Partido Popular, Juan Bravo, “a firme determinación de Galicia e do Goberno galego para rebelarnos contra esa inxustiza chamada quita da débeda, que non é outra cousa que pretender endosar aos galegos as obrigas económicas acumuladas por outras comunidades que non fixeron ben o seu traballo no pasado”.

No comezo dunha visita realizada á Cámara de Comercio de Santiago xunto a Juan Bravo, a secretaria xeral do PPdeG, Paula Prado, o deputado e portavoz do PP de Santiago, Borja Verea; e a presidenta da entidade, María Pais, Alberto Pazos puxo de manifesto “a gran diferenza existente entre un Goberno galego sólido e respaldado por unha maioría parlamentaria suficiente; e un Goberno central débil e sometido permanentemente á chantaxe dos seus socios parlamentarios”.

QUITA DA DÉBEDA PERVERSA

“Esta diferenza concrétase en cuestións importantes, como o feito de que o Goberno galego teña previsto aprobar a vindeira semana os orzamentos da Xunta para 2026, que posteriormente serán enviados ao Parlamento para a súa tramitación parlamentaria e conseguir que os galegos teñan unhas contas públicas acaídas á realidade do momento que estamos vivindo; fronte a un Goberno nacional que, por terceiro ano consecutivo, está fora dos prazos para intentar presentar un proxecto de orzamentos que sexa debatido nas Cortes”, indicou o portavoz popular, quen lembrou que “no que vai de lexislatura estatal o Goberno de Pedro Sánchez non foi capaz de cumprir a súa obriga de presentar un orzamento en prazo en ningún momento e o último que se aprobou foi no ano 2022”.

Alberto Pazos centrouse na intención do Goberno central de impoñer unha quita da débeda ás comunidades autónomas e afirmou que “é tan perversa que están intentando sustentala nunha serie de medidas que non teñen soporte: a máis grosa é dicir que imos dispoñer de máis de 4.000 millóns de euros para todo tipo de gastos en Galicia, unha flagrante mentira porque os galegos non poderíamos dispoñer deses cartos para incrementar o volume de gasto”. Neste sentido, incidiu que “o que Galicia precisa non é unha condonación inxusta da débeda, senón un novo sistema de financiamento, que é o que lle estamos reclamando desde hai anos ao Goberno de España”.

“Galicia non se vai dobregar e por iso o Goberno galego no seu último consello tomou a decisión de presentar un recurso contra esta quita da débeda”, indicou o portavoz popular, quen trasladou ao responsable nacional do PP que “os populares de Galicia non imos ceder ante este chantaxe, por moito que as forzas parlamentarias da oposición nos deixen sos”.

PEDRO SÁNCHEZ NON SE TOMA EN SERIO O PAÍS

Pola súa banda, o vicesecretario de Facenda do PP criticou que o Goberno de Sánchez carece de “vontade firme” de aprobar os orzamentos e tampouco “se toma en serio” a xestión do país. “España non funciona, se lle paran os trens, se apaga a luz e esas son algunhas das consecuencias de cando alguén non xestiona”, dixo.

Neste sentido, criticou ao Goberno central por non ter presentado aínda as contas deste ano, o que afecta a servizos básicos como a sanidade, a educación e as políticas de emprego. Neste sentido, afirmou que “non ten sentido que o Goberno actual teña tres presupostos e cinco prórrogas en sete anos”.

Juan Bravo avogou por un sistema de financiamento autonómico compartido coas comunidades tanto gobernadas polo PP como polos socialistas, adaptado á realidade socioeconómica actual e que contemple a reestruturación da débeda.