O PPdeG afea ao Goberno central a súa actitude coa Garda Civil: “Pedro Sánchez está máis preocupado por protexerse a si mesmo que por protexer a quen nos protexe”

O Partido Popular de Galicia denuncia un “plan encuberto” por parte do Goberno central para “desmantelar” á Garda Civil e aféalle a súa actitude cara os efectivos deste Corpo: “Pedro Sánchez está máis preocupado por protexerse a si mesmo que por protexer a quen nos protexe”

Faino logo de que a secretaria xeral Paula Prado mantivese unha reunión con Diego Madrazo e Olaya Salardón, secretario xeral en Galicia e secretaria nacional de relacións institucionais da Asociación Unificada de Gardas Civís (AUGC), para recoller as súas demandas e compartir a súa preocupación ante “os recortes que o Goberno de Sánchez está a aplicar na seguridade dos galegos e galegas”.

“Recortes como que cada día falten máis de 1.000 gardas civís en Galicia porque nin se cobren as vacantes nin se amplían as plantillas, como que se pechen cada vez máis cuarteis e postos auxiliares nos concellos rurais ou como que se reduzan os horarios de atención presencial e se substitúa aos axentes por aplicacións móbiles ou mesmo avatares”, explica a número dous dos populares galegos.

Ante esta situación, asegura, o Partido Popular de Galicia ten claro que “é necesario protexer a quen nos protexe e iso pasa tanto por dotar de máis medios materiais e persoais á Garda Civil como por mellorar as súas condicións laborais”.

Sobre a mesa están cuestións como a protección da saúde mental dos axentes ou a adaptación “á europea” do modelo que rexe á Benemérita para garantir o exercicio efectivo dos dereitos fundamentais dos seus integrantes, así como que se deixe de aplicar o Código Penal Militar en actuacións que se produzan fóra do ámbito laboral.

EN DEFENSA DA INDEPENDENCIA DA UCO

Paula Prado tamén denuncia “as difamacións, as presións e o cuestionamento” aos que o Goberno central somete a organismos independentes como a Unidade Central Operativa (UCO) cando “precisamente traballa por protexer á nosa democracia fronte á inmoralidade da corrupción”.

Un “apoio decidido” a esta unidade que o responsable de AUGC en Galicia, Diego Madrazo, agradece especialmente nun momento no que a UCO non conta co apoio nin da Secretaría de Estado de Seguridade nin do Ministerio do Interior.

O PPdeG critica a “hipocrisía” e o “cinismo” do BNG sobre os eólicos: “Pasan do apoio máximo ao bloqueo máximo segundo sopre o vento”

O Partido Popular de Galicia critica que o BNG se poña “a un ou outro lado segundo sopre o vento” no que se refire aos eólicos e cataloga de “hipócrita” e “cínico” o seu “falso ecoloxismo” logo de descubrir que “membros do BNG do ‘non’ aos eólicos hai uns anos eran os do ‘si’ aos eólicos”.

A secretaria xeral dos populares galegos, Paula Prado, en declaracións aos medios esta mañá en Pol, referiuse ás “preocupantes” informacións publicadas esta semana sobre o “paso de empresarios a activistas” de diversas persoas vinculadas ao BNG e que, na súa opinión, confirman que “o independentismo galego pasa do apoio máximo ao bloqueo máximo segundo crea que lle vai tirar máis rédito electoral e deixando ao lado calquera coherencia ou interese cidadán”.

“Creo que, como mínimo, estas informacións requiren explicacións por parte de Ana Pontón e da dirección do BNG”, concluíu explicando que os dirixentes deste partido “xa estaban naquela época” e apelando ao “dano” que estes “falsos ecoloxismos” fan a Galicia como potencia en enerxías renovables.

O EXEMPLO DO QUE OCORRE ONDE NON GOBERNA O PP

A número dous dos populares galegos fixo estas declaracións durante a visita que realizou a Pol xunto á portavoz local do partido e presidenta de Novas Xeracións de Galicia, Nicole Grueira, para reivindicar que este concello “precisa máis rigor na xestión e moito máis sentidiño no destino de fondos públicos”.

Neste sentido apuntou que Pol é “un grande exemplo do que ocorre onde non goberna o Partido Popular” e que o seu alcalde “está impregnado do peor da marca PSOE”, xa que “deixa de lado os problemas máis urxentes do concello para centrarse só nos seus”.

“Estamos no concello coa débeda per cápita máis alta de toda a provincia de Lugo (en total, máis de 3,5 millóns de euros) e unha das máis altas de Galicia”, denunciou ao tempo que afeaba ao rexedor socialista estar “máis centrado no fútbol que nos récords negativos da súa xestión”.

En contraposición a todo isto, a secretaria xeral do PPdeG apuntou a Nicole Grueira como alternativa e amosouse convencida de que, se a líder local do partido fose alcaldesa, “traballaría para todos os seus veciños e veciñas sen sectarismos e sen deixarse influír pola cor política”.

Nicole Grueira, pola súa banda, quixo agradecer a presenza de Paula Prado no seu concello para coñecer de primeira man os problemas que sofren os veciños ante a “pasividade” dun alcalde “centrado só nos seus problemas”.

“Só se ocupa dos seus caprichos e esquécese do que realmente importa”, afirmou a voceira popular trasladando demandas veciñais como son a necesidade de arranxar as pistas ou dotar duns servizos “en condicións” ao alumnado do centro de educación infantil e primaria da localidade.

O PPdeG chega á primeira metade de mandato municipal “gobernando na metade dos concellos de Galicia e subindo en apoio nas cidades”

O PPdeG conmemora a chegada ao ecuador dos mandatos municipais coa ambición de “conseguir dentro de dous anos máis gobernos fortes, estables e en maioría” e reivindicando que, a día de hoxe, xa goberna na metade dos concellos de Galicia e segue subindo o seu apoio nas cidades.

O Comité de Cidades do partido reuniuse estes días co obxectivo de “compartir os proxectos das diferentes urbes e facer sinerxias” e analizar os resultados das últimas enquisas que apuntan a que, neste momento, o apoio ao proxecto do PP é xa maior ao de 2023 nas cidades galegas e, ao mesmo tempo, mantense como o partido líder en 5 das 7 urbes.

“Non nos conformamos e queremos consolidar as nosas maiorías. Porque esa será a única forma de que os pactos de perdedores do PSOE e do BNG non sigan traendo espectáculos e inestabilidade”, asegura a secretaria xeral Paula Prado en referencia ao que ocorre en Santiago, Lugo ou A Coruña, á vez que pon de exemplo o “proxecto de éxito” do PP en Ferrol.

Por iso, cun apoio á alza nas cidades galegas, desde o partido seguen traballando para “construír unha alternativa” alá onde non gobernan e conseguir en dous anos un maior número de “gobernos fortes, estables e en maioría”.

REY VARELA: “NON QUEREMOS PERDER O TREN DO FUTURO”

O coordinador do Comité de Cidades e alcalde de Ferrol, José Manuel Rey Varela, tamén fixo referencia ás enquisas electorais e explicou que “a baixa doutros partidos é o resultado da falta de estabilidade e de proxecto dos seus gobernos municipais e dos desacordos permanentes cos seus socios”. Unha situación que, na súa opinión, supón un “lastre” que está “paralizando” esas cidades.

Todo o contrario acontece en Ferrol, onde esas mesmas enquisas mostran que os veciños e veciñas “están moi satisfeitos e valoran positivamente a estabilidade” que lles ofrece o goberno que encabeza Rey Varela. De feito, de celebrarse hoxe as eleccións municipais, o PP vería incrementada a súa confianza nesta cidade.

O rexedor ferrolán tamén quixo aproveitar esta reunión para poñer sobre a mesa os “agravios” de Pedro Sánchez coas cidades galegas e referiuse concretamente aos problemas ferroviarios que están a provocar “os atrasos permanentes, as poucas frecuencias e o feito de que Ferrol e Lugo sigan sen conexión de Alta Velocidade”.

“Non queremos perder o tren do futuro e por iso demandamos unha maior atención do Goberno de Pedro Sánchez ás nosas cidades”, concluíu facendo un chamamento á unión a todos os representantes do partido nesta reclamación.

Rueda comprométese a seguir gobernando Galicia “con sentidiño” fronte aos “espectáculos” do PSOE e o “’non’ a todo” do BNG

O presidente do PPdeG, Alfonso Rueda, comprometeuse hoxe a seguir gobernando Galicia como queren os galegos e as galegas, “con sentidiño”, fronte aos “espectáculos de corrupción e todo o que se está vendo” do PSOE e fronte ao “non a todo” do BNG, aos que “nada lles gusta e sempre están enfurruñados”.

Así o manifestou este mediodía ante os máis de 1.000 asistentes á XVIII Xuntanza Popular no Monte Castrove do PP de Poio, na que tamén participaron a secretaria xeral do PPdeG, Paula Prado, o presidente provincial do PP de Pontevedra, Luis López, e o alcalde, Ángel Moldes.

“Imos cumprir a nosa palabra e que así vos sigades sentindo orgullosos”, dirixiuse Rueda aos presentes, salientando que “por algo será” que haxa tanta xente nesta romaría “nun día no que podían estar en calquera outro sitio”: “É unha marabilla”.

Así, o líder dos populares galegos subliñou que “é fundamental” que neste momento haxa tanto apoio ao PP ou, o que é o mesmo, “a unhas ideas e unha unidade”.

Puxo de exemplo dese bo facer ao líder local, Ángel Moldes, un alcalde do que está “moi orgulloso”, con “moitas ideas” e que “vai seguir dando moitas alegrías”. “Aquí temos unha oportunidade para demostrar que sabemos facer moi ben as cousas”, dixo xusto cando se cumpre o ecuador do mandato municipal.

Moldes, engadiu, logrou en 2023 “acabar con tantos anos nos que parecía que se facía, pero en realidade non se facía nada”.

“Os que gobernaron en Poio tanto tempo son os dignos representantes de dicir ‘non’ a todo: ‘non’ a que veñan turistas, que parece que lles molestan; ‘non’ a que veñan industrias, pero despois se queixan de que a xente se teña que ir traballar fóra; ou ‘non’ a dicirlle ao PSOE en Madrid que hai que poñer as pilas”, afondou, incidindo en que co actual Goberno central “non funcionan os trens, non veñen os cartos e non se teñen en conta aos galegos e galegas”.

Por último, despois de visita de onte do presidente nacional do PP, Alberto Núñez Feijóo, Rueda pediu á provincia de Pontevedra e a toda Galicia que o apoien “para que canto antes haxa un cambio en España”.

LUIS LÓPEZ: “PSOE E BNG ÚNENSE SÓ PARA QUE NON GOBERNE O PP”

Pola súa banda, o líder provincial, Luis López, puxo en valor as “políticas grandes, amplas, maioritarias, próximas á xente e de portas abertas” do Partido Popular en todos os concellos de Pontevedra e contrapúxoas ao “resentimento, crispación, parálise e bloqueo” que supón a acción conxunta de PSOE e BNG, “exclusivamente unidos, non a favor da xente, senón só para que non goberne o PP nunha cativeza de miras que está a ser erradicada da provincia”.

Ademais, Luis López destacou o “estilo Poio” imposto polo alcalde na vida municipal desde a súa chegada ao goberno local hai dous anos: “O prato estrela desta comida, que reúne máis de 1.000 persoas, é a política útil de Moldes e o seu equipazo, a que lle importa aos veciños, a do sentidiño, a de escoitar aos cidadáns, a que oxalá fora unha realidade en todos os concellos socialistas e nacionalistas… En definitiva, en Poio hai alcalde e hai proxecto para rato”.

POIO, NO MELLOR MOMENTO: “OFRECEMOS TRABALLO E RESULTADOS”

Mentres, Ángel Moldes asegurou que chegan ao ecuador do mandato situando a Poio no seu “mellor momento”, algo que “non é casualidade”: “É o resultado dun traballo serio, dunha xestión comprometida e dun goberno unido, cun proxecto único, claro e centrado, por riba de todo, nas necesidades reais da veciñanza”.

A clave, asegurou, é traballar con eficacia e eficiencia, cumprir cos compromisos adquiridos e estar preto da xente. “Este é o camiño que seguirá marcando a acción deste goberno ata final de mandato: seguir mellorando a vida da xente, con rigor, planificación e compromiso. Porque este é o tempo de Poio. E estamos preparados para seguir facendo historia”, abundou.

Por iso, “fronte a quen prefire xerar confusión, lanzar bulos ou recorrer ao insulto”, vai seguir traballando “con paso firme e decidido”: “Fronte aos bulos, feitos. Fronte aos insultos, feitos. Fronte á resignación e o enfado, feitos. Fronte ao ruído, nós ofrecemos traballo e resultados”.

Rueda asegura que Galicia será “fundamental” na vitoria de Feijóo nas próximas eleccións porque os galegos valoran “a política seria e con sentidiño”

O presidente do PPdeG, Alfonso Rueda, amósase convencido de que, chegado o momento, Galicia será “fundamental” na próxima vitoria electoral de Alberto Núñez Feijóo porque o presidente nacional do PP “sabe que gobernar consiste en resolver e ter palabra e non en crear problemas e mentir” e porque os galegos “saben o que vale a política seria e con sentidiño”.

Así o manifestou esta mañá ante os máis de 4.000 asistentes á tradicional Romaría Popular do Pino, aos que animou a seguir apoiando como ata o de agora a “unha persoa que os galegos coñecemos, valoramos e sabemos todo o que pode facer” para que “canto antes” chegue á Moncloa e poida atender as demandas de Galicia.

“É o momento dicir a todos os españois que aquí houbo un gran presidente de Galicia e moi pronto haberá un gran presidente de España”, manifestou Rueda facendo referencia ao Congreso Nacional no que, tal e como adiantou, o PPdeG “aportará, construirá e traballará con forza para levar a Feijóo á presidencia”.

O líder dos populares galegos reiterou que así o farán porque “non queremos unha España dividida, a escuras e desigual” e porque “é o momento de deixar claro fronte aos do ‘non’ que Galicia nin admitirá nunca ser máis que ninguén nin consentirá que a fagan de menos”.

Referiuse así aos que “desde a Moncloa din ‘non’ á transferencia da AP-9, ao reparto dos fondos europeos, á mellora dos servizos ferroviarios, á execución das obras pendentes e ao financiamento dos servizos públicos”. E, do mesmo xeito, ao BNG “do ‘non’ a todo” e ao PSOE que “di sempre ‘si’ a todo o que sexa malo para Galicia”.

Facendo unha contraposición entre as propostas da oposición e a realidade da nosa Comunidade, o presidente Rueda reiterou que o PPdeG “seguirá dicindo ‘si’ a Galicia fronte aos do ‘non’ ao turismo, á liberdade lingüística e a todos aqueles investimentos e industrias que necesitamos para que a xente nova poida traballar aquí”.

“Non queremos unha Galicia pequena, pechada, enfurruñada e na que só sexa válida unha única forma de pensar. O que queremos é unha Galicia grande, aberta, sorrinte e plural que siga traballando con orgullo e confianza no futuro”, concluíu.

DIEGO CALVO: “GALICIA É A PROBA DE QUE SE PODE GOBERNAR BEN”

Pola súa banda, o presidente provincial do PP da Coruña, Diego Calvo, quixo poñer de manifesto que “mentres en Madrid se suceden os escándalos e as cesións a quen desexa romper en España, Galicia é a proba de que se pode gobernar ben e de que é posible unha xestión seria e responsable”.

Agradeceu así ao presidente Alfonso Rueda que día a día traballe por “construír un futuro de unidade e de progreso para a nosa terra e demostrar que a política de estabilidade, seriedade, xestión e compromiso real coa cidadanía sempre funciona”.

Unha forma de entender a política que, tal e como explicou, é a “esencia” do Partido Popular e que fai tamén de Alberto Núñez Feijóo “o líder que España necesita” para construír “un futuro con unidade, con integridade e coa firme determinación de limpar a política española da corrupción e devolvela ao servizo dos cidadáns”.

Diego Calvo quixo poñer en valor tamén o traballo do partido na provincia da Coruña “estando a pé de rúa e coñecendo de primeira man o que necesita cada veciño” e amosouse especialmente orgulloso dos seus alcaldes e alcaldesas na medida en que “demostran con feitos o que significa gobernar con sensatez, responsabilidade e proximidade”.

Paula Prado e Luis Menor poñen en valor os congresos locais como o de Bande como instrumento para “activar e preparar” ao PP de cara ás eleccións municipais de 2027

Sandra Quintas (Bande, 1982) foi proclamada esta tarde presidenta da agrupación do Partido Popular de Bande no congreso celebrado no salón de actos da Casa do Concello, convocatoria que contou coa presenza da secretaria xeral do PPdeG, Paula Prado, e do presidente provincial do PP, Luis Menor. Nas súas intervencións, ambos coincidiron en poñer en valor os congresos locais que están a celebrar os populares ourensáns como un instrumento eficaz para “activar e preparar” ao PP de cara ás eleccións municipais de 2027, xusto cando se cumpre o ecuador do actual mandato.

Nese sentido, Paula Prado destacou que os populares estean “nun ano de moitos conclaves”, porque “para que un partido funcione ben e poida ofrecer credibilidade, ten que estar organizado”. De feito, lembrou, tamén se celebrará en breve un Congreso Nacional co mesmo obxectivo: “En Bande ou en Madrid sairá un PP plenamente preparado para os retos do futuro, con moita ilusión, ganas e valentía”.

En canto á nova presidenta local, a número dous dos populares galegos subliñou que Sandra é unha das 30 rexedoras do PPdeG, a formación galega que máis ten, 13 delas provincia de Ourense. “Representa o mellor do noso partido: leva máis de 5 anos sendo alcaldesa e é un exemplo de muller atrevida, que protexe aos seus veciños e que tamén exerce da mellor forma como secretaria xeral do PPdeOU”.

“O noso obxectivo aquí en Bande está claro e temos por diante dous anos para, entre todos, volver a conseguilo. Estou segura de que temos ao mellor equipo e á mellor capitana posible. É importantísimo seguir tendo gobernos fortes e estables para non ter que dedicar o tempo a nada máis que resolver os problemas da xente”, concluíu Paula Prado.

LUIS MENOR PIDE ESTAR LISTOS PARA DICIRLLE Á CIDADANÍA: “HAI ALTERNATIVA”

Luis Menor, pola súa parte, felicitou a Sandra Quintas pola capacidade de traballo que ten demostrada, xa que ademais do ámbito da xestión municipal, como alcaldesa de Bande, tamén desenvolve un labor político fundamental no PP de Ourense. Quintas, dixo, pertence a esa nova xeración de mulleres do Partido Popular que, á marxe de cotas, “representa a capacidade de traballo, a preparación e visión política, por iso está hoxe á fronte da secretaría xeral do PP ourensán”.

Para Luis Menor, o traballo que se está a facer para normalizar a vida política nas agrupacións locais é un xeito de “armar o partido” cara as próximas eleccións municipais de 2027, xusto cando se cumpre o ecuador do mandato local. Con todo, advertiu, hai que estar “alerta” porque que en calquera momento pode haber unha convocatoria “sorpresa” de eleccións xerais por parte de Pedro Sánchez: “Temos que estar preparados para dicirlle á cidadanía que hai alternativa”.

SANDRA QUINTAS DESTACA O “BO MOMENTO” DO PP DE BANDE

Ademais de destacar a recuperación da normalidade orgánica do PP local —cunha xestora desde outubro de 2022—, Sandra Quintas incidiu no “bo momento” polo que atravesa o partido en Bande, “mantendo a forza e solidez que lle procura o apoio maioritario da veciñanza en cada convocatoria electoral”, engadindo que ampliar as bases do PP “resulta fundamental para eses resultados”.

En referencia ao seu equipo de traballo no partido, Quintas sinalou que contará con todas as persoas que ata agora demostraron o seu compromiso coas siglas populares, tanto o grupo municipal “por ser o que más esforzo realiza, pero sen esquecer ás moitas persoas que colaboran sempre co partido”.

Paula Prado demanda ao Goberno central que dote cos medios e recursos “necesarios” ás Forzas e Corpos de Seguridade do Estado: “Temos que protexer aos que nos protexen”

O PPdeG denuncia “os recortes na seguridade dos galegos que aplica Pedro Sánchez co apoio do BNG” e por iso demanda ao Goberno central que dote ás Forzas e Corpos de Seguridade do Estado cos medios e recursos que “necesitan para sentirse protexidos e poder desempeñar o seu labor con dignidade”.

Esta mañá Paula Prado defendeu no Parlamento de Galicia unha proposición non de lei –aprobada sen o voto a favor nin do PSOE nin do BNG– na que se reclama ao Executivo estatal, entre outras cuestións, que garanta que Galicia conte cos efectivos da Garda Civil e da Policía Nacional que lle corresponden por catálogo, que recoñeza o traballo destes Corpos como profesión de risco, que equipare os seus salarios aos do resto de policías autonómicas e que lles facilite os medios e recursos que necesitan para cumprir coas súas obrigas constitucionais.

A secretaria xeral do PPdeG fíxose eco na súa intervención das case 17.000 agresións a gardas civís e policías nacionais rexistradas no 2024 –“a cifra máis alta desde que o Ministerio do Interior recompila estes datos”, apuntou– para argumentar a necesidade de que se lle recoñeza o risco da súa profesión e se garantan tanto a súa protección como a súa integridade física.

“O desinterese de Pedro Sánchez por investir nos nosos axentes chega ao punto de que non só lles nega algo tan básico como chalecos antibalas ou fundas antirroubo para as súas armas, senón que ademais segue gardando nun caixón o acordo de equiparación salarial ao que chegara o Goberno de Rajoy en 2018”, denunciou ao tempo que criticaba a política de “recortes” que aplica o PSOE co apoio do BNG na seguridade dos galegos e galegas.

Falou así de recortes como os que supón, por exemplo, que en Galicia falten cada día máis de 1.100 efectivos dos que corresponderían por catálogo; que se vaian pechar os postos auxiliares dos concellos das Somozas, Cariño, Touro, A Pobra, Sober e Baltar; ou que “nos poucos cuarteis que permanecen abertos só se atenda presencialmente tres días á semana e de 9:00 a 14:00 horas”.

Ao remate do debate, Paula Prado e o deputado autonómico Jesús Fernández Rosende reuníronse con representantes de sindicatos policiais e asociacións profesionais de gardas civís para trasladarlle o apoio ás súas reivindicacións.

As mesmas reivindicacións que recollía a iniciativa que se debateu hoxe e que foi o resultado de encontros mantidos anteriormente. “Nós non tocamos os temas de oído nin redactamos iniciativas desde a ideoloxía, senón que nos reunimos coa xente, escoitamos as súas necesidades e recollemos o seu sentir”, explicou Prado.

Rueda destaca que o novo Plan de residencias públicas de Galicia beneficiará a concellos medianos e pequenos da provincia de Pontevedra

O presidente do PPdeG, Alfonso Rueda, destacou hoxe que o novo Plan de residencias públicas que porá en marcha o Goberno galego beneficiará á veciñanza de Pontevedra na medida en que inclúe proxectos para concellos medianos e pequenos da provincia.

Fíxoo ante os asistentes á Xunta Directiva Provincial do PP de Pontevedra celebrada esta tarde en Redondela e na que, acompañado polo presidente Luis López, a secretaria xeral Paula Prado, o portavoz parlamentario Alberto Pazos e o líder local do partido, Javier Bas, insistiu en que o partido conta cunha folla de ruta “clara e realista” para esta provincia “clave para Galicia”.

Unha folla de ruta que o propio presidente Rueda definiu hai unhas semanas no Debate sobre o Estado de Autonomía ao avanzar futuras medidas das que se beneficiarán todos os concellos pontevedreses. É o caso, por exemplo, das axudas para a rehabilitación de vivendas no rural ou as novas desgravacións fiscais pola compra de material escolar. Tamén, por suposto, ese novo Plan de residencias públicas de Galicia que será “o máis ambicioso da historia”.

Todo isto constitúe, na súa opinión, o reflexo de que para o PPdeG a política non consiste en buscar titulares nin en alimentar confrontacións estériles, senón que se basea en mellorar a vida da xente a través do traballo diario e desde a moderación, o diálogo, a responsabilidade, o compromiso e a eficacia.

O líder dos populares galegos reivindicou estes valores como elemento diferenciador tamén dun PP de Pontevedra que, tal e como se comprobou hoxe co gran número de asistentes á Xunta Directiva Provincial, está vivo, mobilizado, unido e preparado para seguir gobernando e liderando a provincia.

A ASPIRACIÓN CONSTANTE DUNHA XESTIÓN MELLOR

Pola súa banda, o presidente do PP provincial, Luis López, quixo dar oficialmente a saída ao traballo máis intenso de cara ás eleccións municipais e chamou ás 61 agrupacións locais a “potenciar ata o infinito o traballo que facemos habitualmente para escoitar, entender e atender aos veciños” co obxectivo de chegar nas mellores condicións a uns comicios que “serán decisivos para acadar máis alcaldías e outorgarlle a milleiros de pontevedreses unha xestión mellor da que padecen actualmente pola inestabilidade e a febleza dos bipartitos PSOE-BNG”.

“Fronte aos que falan e pecan dun triunfalismo que non se entende e que está moi afastado da súa propia realidade, no PP preferimos calar e dedicarnos a traballar e atender á xente, que é o que nos demandan os cidadáns tal e que se confirmou nas catro vitorias electorais consecutivas que tivemos na provincia nos últimos dous anos”, aseverou o tamén presidente da Deputación.

López concluíu decretando “o estado supremo de municipalismo, de política de rúa e de cercanía cos cidadáns e as asociacións” para que a provincia “siga funcionando e transformándose como nestes últimos tempos”.

José Manuel Rey Varela e Paula Prado serán os representantes de Galicia na Comisión Organizadora do Congreso Nacional do PP

O senador e alcalde de Ferrol, José Manuel Rey Varela, e a secretaria xeral do PPdeG, Paula Prado, serán os representantes de Galicia na Comisión Organizadora do Congreso Nacional do Partido Popular que se celebrará en Madrid no mes de xuño.

Así o anunciou esta mañá o presidente do partido, Alberto Núñez Feijóo, durante a reunión da Xunta Directiva Nacional á que tamén asistiu o líder dos populares galegos, Alfonso Rueda, e na que se aprobou a composición deste órgano.

Galicia convértese así, xunto coa Comunidade de Madrid, na comunidade autónoma con maior presencia nesta Comisión Organizadora na que José Manuel Rey Varela será o secretario  –o terceiro cargo con maior relevancia– e Paula Prado, pola súa banda, exercerá como vogal.

Na súa intervención, o presidente Feijóo quixo agradecer aos actuais membros da Xunta Directiva os logros electorais acadados neste tempo e entre os que destacou a consecución da primeira maioría absoluta de Alfonso Rueda nas eleccións autonómicas do pasado ano.

Sobre a designación do alcalde de Ferrol e senador, o líderes dos populares recoñeceu que coñece ben a traxectoria de Rey Varela e asegurou que “é unha das persoas que máis traballou veciño a veciño cada un dos seus éxitos e así o avalan as súas maiorías absolutas”.

O PPdeG reivindica Galicia como “o mellor lugar para nacer, crecer e formar unha familia”

O Partido Popular de Galicia reivindícase como “o partido das familias” e enxalza á nosa Comunidade como “o mellor lugar para nacer, crecer e formar unha familia” grazas ás medidas de apoio “pioneiras” e “únicas en España”  impulsadas por parte do Goberno de Alfonso Rueda.

Coincidindo co Día da Familia, diversos representantes do partido desprazáronse ata Friol para poñer en valor que “Galicia ofrece máis apoio ás familias que calquera outra comunidade autónoma de España”. O grupo estaba formado pola secretaria xeral Paula Prado, o vicesecretario de Familia e portavoz do Grupo Popular no Parlamento galego, Alberto Pazos, o vicesecretario de Concellos Rurais e alcalde, José Ángel Santos, o deputado autonómico e concelleiro, Enrique Barreiro, e outros representantes do partido na provincia de Lugo.

A número dous dos populares galegos manifestou o seu orgullo de que Galicia sexa pioneira e referente a nivel nacional e europeo nas medidas de apoio á familia, como foi coa aprobación da primeira Lei de impulso demográfico a nivel nacional ou ao ser a primeira e única Comunidade en ofrecer educación gratuíta desde os cero anos ata a universidade. Ao que habería engadir ademais que Galicia é ademais a comunidade autónoma con máis vantaxes fiscais para as familias.

“Galicia é o lugar perfecto para nacer e medrar en igualdade, para recibir unha educación de calidade gratuíta, para gozar dunha excelente sanidade pública, para formar unha familia e para que cada persoa, nova ou maior, teña a oportunidade de vivir feliz”, concluíu Paula Prado apuntando a que o Goberno galego tamén está ao carón dos maiores.

En contraposición, lamentou, o Goberno central “fai oídos xordos no que a cumprir cos seus compromisos se refire”, xa que “deixou atrás a gratuidade das escolas infantís ou as axudas a dependentes” e “xa hai tempo que Pedro Sánchez deixou atrás Galicia”.

O EXEMPLO DE FRIOL

A elección de Friol para conmemorar o Día das Familias non foi casual, xa que, nun momento no que nos preguntamos se é posible vivir no rural e do rural, Friol decidiu dar un paso adiante para darlle a volta aos datos e estao conseguindo.

A secretaria xeral do PPdeG destacou así que en 2024 naceron en Friol 29 novos veciños e veciñas e este ano xa van 11. Do mesmo xeito, o concello leva tres anos seguidos co padrón en aumento e mostra disto é que o actual Punto de Atención á Infancia (PAI) vaise converter nunha escola infantil onde poderán matricularse preto de 57 nenos, grazas a unha achega da Xunta de 190.000 euros.

Así o destacou tamén o propio alcalde, José Ángel Santos, poñendo en valor as medidas impulsadas desde o propio Goberno local para favorecer o asentamento de poboación no rural e especialmente de xente nova. “Por cada novo nacemento, o Concello ofrece unha axuda económica que vai acompañada a maiores dun lote de produtos de primeira necesidade”, explicou.