Categoría: PP de Galicia

A secretaria xeral do PPdeG, Paula Prado, defende que para acadar a igualdade “plena e real” na sociedade en xeral e nos ámbitos de decisión política en particular é necesario que “as mulleres se sintan representadas non só por mulleres polo simple feito de selo, senón por aquelas que defendan os seus intereses e coloquen na axenda política a defensa dos seus dereitos”.

Así o manifestou onte na conferencia inaugural do Encontro Internacional Equigov organizado pola Universidade do Estado de Santa Catarina e a Assambleia Legislativa estatal e que se celebra estes días en Florianópolis. Unha conferencia na que, baixo o título de A participación das mulleres na política española, a número dous dos populares galegos explicou como en España e en Galicia se ten incrementado a presenza de mulleres nos ámbitos de decisión política de xeito paralelo e como, paralelamente, a necesidade de maior participación e representación feminina se foi situando na axenda pública do noso país.

“A miña experiencia vital levoume a observar unha realidade que non era acorde co desenvolvemento normativo e lexislativo do noso país, onde a igualdade formal ou legal non coincidía coa igualdade real”, apuntou como punto de partida do seu afondamento nas dificultades e obstáculos que se atopan as mulleres no acceso a postos de responsabilidade e no ámbito da toma de decisións. “Os problemas cos que se atopan as mulleres polo mero feito de ser mulleres”, resumiu.

Facendo un repaso á lexislación española e ao contexto social feminino ao longo da ditadura e posteriormente no período constitucional, Prado concluíu que “unha boa normativa en materia de igualdade é aquela que ten correspondencia coa situación social da muller en cada momento e responde ás necesidades das mulleres nos diferentes ámbitos do Dereito” e incidiu no fundamental que resulta á asunción do recollido destas normas na conducta real da sociedade.

Destacou que os datos relativos ao liderado e á participación política das mulleres en España están por riba da media da maioría dos países do mundo, xa que as mulleres constitúen o 42% das cámaras parlamentarias, o 64% do Consello de Ministros e o 39% dos órganos deliberativos locais. Así mesmo, a porcentaxe de mulleres con cargos executivos nos partidos políticos foi ascendendo ata situarse actualmente no 45,7%.

No caso específico de Galicia, con datos relativos a 2023, cómpre destacar que o Parlamento galego é o que conta con maior porcentaxe de mulleres de todas as cámaras autonómicas de España, cun 56% fronte á media nacional do 47%. Ademais, nunha análise da evolución rexistrada entre 1983 e 2023, en Galicia pasou de haber 6 alcaldesas a 69 e de 408 mulleres a cargo dunha concellería en 1995 (11,3%) a un total de 1.426 concelleiras en 2023 (42,1%).

“As mulleres non han de participar en política polo mero feito de ser mulleres, senón que han de ter a oportunidade de formar parte de candidaturas en procesos electorais pola súa valía e porque defendan desde os seus postos os dereitos das mulleres”, subliñou ao tempo que se congratulaba de que no noso país cada vez haxa máis mulleres en postos que tradicionalmente ocupaban homes.

Neste sentido, considera fundamental “ir máis alá de asignar ás mulleres as áreas que tradicionalmente se asocian ao sexo feminino” e permitirlles mostrar a súa valía á fronte de departamentos como, por exemplo, os de Medio Ambiente, Infraestruturas, Vivenda, Economía ou Industria.

“A igualdade non é patrimonio de ninguén, non é de esquerdas nin de dereitas. É un reto que todos debemos asumir como responsabilidade propia e, desde o noso ámbito de actuación individual, colaborar para que sexa unha realidade”, concluíu invitando á sociedade brasileira a seguir o exemplo de España para facer do seu país “a punta de lanza dos países americanos en materia de igualdade”

GOBERNOS ABERTOS E TRANSPARENCIA

Dado que un dos obxectivos principais deste encontro era tamén debater sobre a equidade nos servizos públicos a través de gobernos e parlamentos abertos, a secretaria xeral do PPdeG puxo en valor que “actualmente Galicia atópase entre as tres comunidades autónomas máis transparentes de España”.

Recordou así que o Goberno galego, no seu obxectivo de promover a máxima transparencia da xestión pública, foi actuando con medidas innovadoras e pioneiras neste eido que posteriormente adquirirían rango legal. É o caso da Lei 1/2016, de 18 de xaneiro, de transparencia e bo goberno, que “inclúe máis de 50 elementos de transparencia a maiores sobre o marco normativo estatal como son a publicación do tempo medio de pago de facturas, a situación financeira das contas públicas, a relación de BICs ou a composición das mesas de contratación”.

A secretaria xeral do PPdeG, Paula Prado, considera que as políticas de igualdade que funcionan en Galicia constitúen “unha referencia” e un exemplo a seguir para outras rexións.

Así o manifestou hoxe durante a reunión que mantivo co presidente da Assambleia Legislativa do Estado de Santa Catarina, Mauro de Nadal, e varios deputados desta Cámara cos que tivo a oportunidade de compartir experiencias, debater sobre intereses comúns e poñer en valor a importancia da igualdade na política.

Neste sentido, a número dous dos populares galegos incidiu en que a igualdade debe estar na base de todas as políticas públicas na medida en que estas inciden directamente no día a día das persoas.

A secretaria xeral do Partido Popular de Galicia, Paula Prado, pon en valor o traballo da comunidade galega en Brasil á hora de manter vivas as tradicións culturais e gastronómicas da nosa Comunidade e preservar os lazos de unión entre Galicia e a diáspora.

A número dous dos populares galegos participou esta fin de semana no cocido galego organizado polo Centro Español de Santos, ao que asistiron máis de 300 persoas e entre as que se atopaban varias xeracións de galegos residentes neste municipio ubicado no litoral do estado de São Paulo.

Este centro comunitario, cuxas orixes se remontan ao século XIX e que agrupa a varias entidades, ten entre as súas liñas de traballo o fomento da galeguidade co obxectivo de manter os lazos socio-culturais co pobo galego a través de eventos culturais, educativos, deportivos e gastronómicos.

Paula Prado, que estivo acompañada pola responsable do PP no estado de São Paulo, Amanda Barrio, aproveitou a súa presenza para agradecerlle aos directivos da asociación e a aos seus socios que permitan que os fillos e netos dos galegos que no seu día emigraron a Brasil poidan hoxe seguir formándose e participando en actividades conxuntas, como este cocido, mantendo viva así a cultura galega.

O Partido Popular de Galicia denuncia que o Goberno central se escuda en mentiras na súa negativa a transferir a AP-9 e na súa falta de compromiso coa mellora das infraestruturas estatais na Comunidade: “É posible atopar unha solución, pero para iso necesítase vontade política”.

Así o considera o eurodeputado galego Adrián Vázquez, para o que a transferencia da autopista que vertebra Galicia e o avance na consecución da súa gratuidade constitúen “un asunto vital” e por iso afea ao Executivo estatal a súa actitude ao respecto “escusándose en argumentos que non son verdade”.

“Noutros países europeos con autopistas en situación similar á da AP-9 no que se refire ao rescate ou á supresión das peaxes, si foron quen de atopar solucións”, explica poñendo o exemplo de Italia, Hungría, Francia ou Portugal.

O político lalinense fai extensiva esta “falta de vontade política” tamén á negativa do Goberno de Sánchez a “compartir a documentación que entregou á Comisión Europea e que, segundo eles, impide o rescate da autopista”. De aí que insista na súa demanda de “coñecer exactamente que é o que está facendo o Goberno”.

A RELACIÓN ENTRE GALICIA E O AVE SEGUE DANDO PASOS ATRÁS

Na mesma liña, a secretaria xeral do PPdeG, Paula Prado, amósase convencida de que a AP-9 non sería tan necesaria e ademais se podería diversificar o transporte na nosa Comunidade “se o Goberno central se puxese as pilas co caos ferroviario”. Por iso lamenta que, en vez de dar pasos cara adiante, “a relación entre Galicia e o AVE segue dando pasos cara a atrás”.

Recordando o “premio inmerecido” que recibiu o ministro Óscar Puente o pasado domingo en Lugo e o seu continuos “brindes ao sol”, a número dous dos populares galegos sitúa na mesma liña de incumprimentos o ocorrido esta semana con Pedro Sánchez “pasando de Galicia e da conexión de Alta Velocidade con Portugal e, polo tanto, perpetrando o seu enésimo golpe a un proxecto fundamental”.

“É lamentable que mostre máis interese polas infraestruturas galegas o Goberno portugués que o Goberno do noso propio país”, conclúe ao tempo que sinala que “os compromisos demóstranse con números e os números delatan o nulo interese do Goberno central con esta infraestrutura”.

Refírese así ao feito de que a renuncia de Sánchez a aprobar uns Presupostos Xerais para 2025 implica tamén unha renuncia á conexión de AVE con Portugal, xa que se prorroga a “pírrica” partida de 30.000 euros asignada á Saída Sur de Vigo.

Por todo isto, desde o PPdeG afirman que seguirán loitando desde todas as institucións pola conexión Vigo-Porto por Alta Velocidade, xa que consideran que se trata dunha “infraestrutura clave para Galicia e para a vertebración de Europa”.

Novas Xeracións de Galicia salienta o seu obxectivo de “ser útiles para a mocidade” resolvendo as demandas da xente nova, trasladándoas ás diferentes administracións e materializándoas en medidas reais e efectivas como as que promove día a día o Goberno de Alfonso Rueda.

Esta mañá a organización político-xuvenil do PPdeG, coa súa presidenta Nicole Grueira á fronte, organizou un reparto informativo na zona universitaria de Santiago de Compostela para dar a coñecer medidas promovidas polo Executivo galego como as matrículas universitarias gratuítas, a conxelación das taxas de máster, o Bono Deporte para todos os mozos federados de ata 16 anos, as axudas para a obtención do carné de conducir ou programas como Xuventude Mentoring ou o Carné Xove.

Este reparto foi o primeiro dunha campaña que Novas Xeracións levará a cabo de xeito periódico durante os próximos meses en todos os campus universitarios de Galicia, e tamén noutras zonas, co obxectivo de “continuar a pé de rúa e ao carón da xente moza”.

Nesta ocasión quixeron destacar especialmente as novidades que recollen os Orzamentos galegos para 2025, especialmente no eido da vivenda. Así, co obxectivo de facilitar o acceso á vivenda da mocidade, reservaráselle ata o 25% das vivendas en venta e o 40% das de aluguer que promova o Goberno galego no seu obxectivo de duplicar o parque público residencial na presente lexislatura.

A isto súmase o novo Bono Emancípate, coa que se pretende facilitar que a xuventude galega poida emanciparse e independizarse a través dunha axuda para cubrir os primeiros gastos que xera a posta en marcha dun fogar propio, como o mobiliario ou a mudanza.

O presidente do PPdeG, Alfonso Rueda, reivindicou hoxe os investimentos do Goberno galego na provincia da Coruña en cuestións como as residencias, os centros educativos, o equipamento sanitario ou a construción de vivenda pública ao abeiro dos Orzamentos autonómicos con maior gasto social.

Ante os membros da Xunta Directiva Provincial do PP da Coruña celebrada esta tarde e na que tamén participaron o presidente do partido na provincia, Diego Calvo, e a secretaria xeral do PPdeG, Paula Prado, o líder dos populares galegos explicou que os contas para o próximo ano reservan para esta provincia case 5.000 millóns de euros e máis de 660 millóns no caso da súa capital.

Unhas cantidades que se destinarán a cuestións tan importantes como as obras do novo CHUAC (37,6 millóns de euros) ou ao remate da terminal de autobuses, cun investimento de 16,5 millóns de euros. Ao que habería que engadir outros investimentos en residencias, centros educativos ou innovación.

O presidente Rueda destacou especialmente o investimento en vivenda, como os 1,5 millóns de euros para adquirir solo e os case 14 millóns para construír vivenda pública para alugueiro en Xuxán. De feito, tal e como remarcou, fronte aos que promoven leis que só suben os prezos do alugueiro, a Xunta é a administración que máis inviste en vivenda pública na cidade.

Sobre esta cuestión engadiu que o Executivo que preside ten precisamente como obxectivo prioritario duplicar o parque de vivenda pública de aquí a 2028 e que, para cumprir este obxectivo, o próximo ano triplicarase o orzamento destinado a solo residencial e construción de nova vivenda ata os 126 millóns de euros. Ao que habería que engadir ademais a aprobación de novas bonificacións fiscais para dinamizar o mercado.

Se isto é posible, explicou, é grazas a que, mentres o Goberno central non é quen de aprobar as súas contas, o Goberno galego volveu facelo en tempo e forma e sen recorrer a endebedamento. Por iso quixo poñer en valor o “Estilo Galicia” baseado na estabilidade, o rigor e a xestión.

O presidente encabezou hoxe o cuarto e último encontro provincial dunha rolda que tivo o obxectivo de escoitar e planificar o futuro da formación, e no que trasladou que o contacto cos galegos e galegas se trata dunha avaliación continua.

DIEGO CALVO INSISTE NA IMPORTANCIA DE MANTER O PARTIDO ACTIVO

Pola súa banda, Diego Calvo avalou “o bo facer do goberno da Xunta que, un ano máis presenta as contas en tempo e forma”, fronte a un Goberno central máis preocupado de asuntos que pouco teñen que ver cos problemas dos cidadáns.

O presidente provincial insistiu na idea de “manter activo o partido, de traballar preto dos veciños” e animou a alcaldes e portavoces a trasladar á xente todos os proxectos, axudas e investimentos que o Goberno autonómico pon a disposición dos galegos e galegas.

“Galicia é exemplo unha vez máis de boa xestión e de estabilidade. Un exemplo cada vez máis inusual en España da importancia de facer as cousas ben”, concluíu.

O Partido Popular de Galicia esixe a Ana Pontón que rectifique a súa “frívola” postura respecto ao bullying e pida perdón ás familias e á mocidade galega que lamentablemente sofren esta “dramática realidade”.

Logo de que a portavoz do BNG empregase esta mañá no Parlamento de Galicia o termo “bullying” para referirse a circunstancias que nada teñen que ver co acoso, os populares galegos inciden en que “hai comparacións que sobran” e esíxenlle respecto ás familias e para os nenos e nenas.

Lamentablemente, Ana Pontón preferiu seguir na súa liña en vez de rectificar e por iso desde o PPdeG piden unha desculpa e reiteran que ante o acoso, en Galicia non caben nin a frivolidade nin a tolerancia.

O presidente do PPdeG, Alfonso Rueda, subliñou hoxe o “Estilo Galicia” que permite que a nosa Comunidade poida aprobar os seus Orzamentos en tempo e forma. Unhas contas para o ano 2025 que, sinalou, serán ademais as máis elevadas da nosa historia e por segundo ano consecutivo terán endebedamento cero.

Ante os asistentes á Xunta Directiva Provincial do PP de Lugo celebrada esta tarde e na que tamén participaron a vicesecretaria nacional de Organización do PP, Carmen Fúnez, a secretaria xeral do PPdeG, Paula Prado, e a presidenta provincial do partido na provincia, Elena Candia, Rueda especificou que as contas galegas reservan para a provincia de Lugo o maior investimento por habitante (5.840 euros).

No caso da súa capital, contemplan partidas tan importantes como os 12,1 millóns de euros destinados a vivenda, os 6,2 millóns para a Intermodal, os 4 millóns para remodelar a residencia das Gándaras ou os 1,3 millóns para a reforma integral do centro de saúde da Milagrosa, entre outros.

Investimentos que son posibles, engadiu, grazas á estabilidade, o rigor e a xestión que caracterizan ao PPdeG e que fan do partido a opción maioritaria para os galegos e especialmente para os lucenses. De feito, recordou a este respecto que Lugo foi a provincia con maior porcentaxe de voto nas pasadas eleccións autonómicas.

Por outra banda, o líder dos populares galegos reclamou menos desprezos e máis xestión ao Goberno central ante as continuas incidencias nos servizos ferroviarios de Galicia e ante a situación na que se atopan as infraestruturas estatais, especialmente nesta provincia.

Nese sentido, afeoulle ao ministro Óscar Puente que dedique máis tempo a tuitear e a acudir a homenaxes non merecidas mentres non deixan de amontoarse na súa mesa débedas pendentes con Galicia e con Lugo.

O presidente citou cuestións como a chegada da Alta Velocidade, a recuperación total do viaduto do Castro ou a culminación da autovía a Santiago de Compostela, e demandou nesta liña máis responsabilidade e máis rigor por parte do Executivo.

ELENA CANDIA: “O COMPROMISO DO GOBERNO GALEGO CON LUGO DEMÓSTRASE NOS ORZAMENTOS E NO TRABALLO EN EQUIPO”

A presidenta do PP na provincia de Lugo, Elena Candia, subliñou pola súa banda que “o compromiso do Goberno galego con Lugo se demostra nos orzamentos, coa cercanía e proximidade dos seus responsables e co traballo en equipo”.

Incidiu en que “a Xunta ten moi presente á provincia”, á vista de que “Lugo segue sendo a provincia galega con maior investimento per cápita” e que, ademais, se incrementaron nun 11% as partidas dirixidas a garantir e mellorar os servizos e se cuadriplicou a aposta pola ampliación do parque de vivenda pública.

Concretamente, destacou “a aposta pola sanidade pública con investimentos en infraestruturas sanitarias –construción e mellora de centros de saúde, os proxectos de ampliación dos hospitais comarcais da Mariña e Monforte–, implicación na mellora de residencias de maiores e outros servizos públicos de ámbito social, apoio ao Campus Terra e investimentos para a modernización dos centros educativos”.

Tamén medra un 2,6% a partida dirixida a infraestruturas que dan soporte económico a proxectos iniciados, así como a garantir a seguridade nas estradas de competencia autonómica e “avanzar noutros cos que mantén o seu firme compromiso e que están pendentes de acordos e informes por parte doutras administracións”.

A presidenta provincial considerou acertado “incrementar a colaboración cos concellos” que, no caso da provincia de Lugo, chegará ao 11%. Ademais, contarán co apoio da Xunta para actuacións da súa competencia coma o tratamento de residuos ou o abastecemento e saneamento de auga.

Tamén lembrou achegas no ámbito do medio rural –como o plan de mellora de camiños co que a Xunta prevé dirixir á provincia 4,5 millóns de euros– e do mar– melloras en portos da Mariña– para “acometer actuacións en beneficio do sector agrogandeiro, forestal e do mar”.

PUENTE NON MERECE NINGÚN PREMIO

Candia tamén destacou que “os lucenses respaldaron a postura do PP da provincia” en relación á non asistencia a un acto no que se premiou ao ministro de Transportes e Mobilidade Sostible: “Cos seus abucheos a Óscar Puente deixaron claro que coinciden con nós en que non merece ningún premio”.

A popular cre que “para ser merecedor dun premio ten que haber un traballo detrás que o avale”, pero “en materia de infraestruturas viarias e ferroviarias, Lugo está illada, e agardamos que o Goberno do Estado rectifique”. Ademais, lembrou que “o ministro Puente foi reprobado polas distintas administracións: a Deputación de Lugo, o Parlamento de Galicia, o Congreso dos Deputados e o Senado de España”.

O Partido Popular de Galicia reclama ao Goberno de España unha compensación económica aos concellos galegos onde se ubican centros penitenciarios para axudalos a sufragar os subrecustos derivados da prestación de servizos básicos e a perda de recadación nas arcas municipais derivada da exención do IBI destes centros.

Faino a través dunha proposición non de lei que levará ao Congreso dos Deputados logo de que a secretaria xeral do PPdeG, Paula Prado, e a secretaria nacional de Interior do Partido Popular e deputada por Ourense, Ana Vázquez, mantiveran unha xuntanza cos alcaldes e representantes dos concellos de Curtis, A Lama, O Pereiro de Aguiar, Outeiro de Rei e Monterroso para coñecer a súa situación.

“Os concellos que albergamos un cárcere estamos obrigados por lei a asumir a prestación de servizos básicos como o abastecemento de auga potable, o mantemento da rede viaria, a recollida do lixo, o saneamento ou a atención desde as áreas de servizos sociais que nos demandan os centros, sen recibir ningún tipo de compensación económica polo sobrecusto económico que supón e a sobrecarga que xera nestes servizos”, explica o alcalde de Curtis.

A isto habería que engadir que estes edificios están exentos do pago do Imposto de Bens Inmobles (IBI) e, polo tanto, os concellos sofren “unha merma importante nos ingresos das arcas municipais” que deriva en dificultades para asumir o custo económico dos servizos públicos que prestan aos seus veciños.

Os alcaldes destes concellos reclaman polo tanto que, do mesmo xeito que a Xunta de Galicia creou un fondo adicional compensatorio que amortigua parte desa carga económica, o Goberno de España compense a perda de recadación derivada da exención do pago do IBI dos centros penitenciarios e teña en conta a poboación de reclusos dos centros no reparto dos Fondos de Cooperación Local.

De feito, subliñan que a poboación de cada municipio é un dos criterios que máis repercusión ten no reparto de ingresos do Estado e da Comunidade Autónoma e que, na maioría dos casos, a poboación reclusa non está empadroada no concello do centro penitenciario no que está cumprindo a súa pena.

En Galicia, segundo datos desta mesma semana, hai un total de 2.842 reclusos distribuídos entre os cárceres da Lama (1.015), Bonxe —Outeiro de Rei— (278), Monterroso (223), O Pereiro de Aguiar (276) e Teixeiro (1.050).

“Non queremos ningún trato de favor, senón o mesmo trato e o mesmo reparto que reciben outros concellos como os de Cataluña, onde os fondos estatais si se reparten nos concellos onde hai cárceres”, conclúe o rexedor de Curtis.