8 de marzo de 2023. Como cada 8 de marzo, o Partido Popular de Galicia súmase á celebración do Día Internacional da Muller, unha xornada para reivindicar os logros en materia de igualdade en todas as esferas da sociedade.

O 8 de marzo é un día para felicitarnos polos avances conseguidos e para agradecer os esforzos e sacrificios para logralos, pero tamén para ser conscientes do camiño aínda por percorrer en aras da igualdade de dereitos e oportunidades entre homes e mulleres na nosa sociedade.

Desde as máis soadas manifestacións —como as de 1857 e 1908 para reclamar os dereitos laborais das mulleres— aos movementos sufraxistas para conseguir o voto —que en España capitaneou Clara Campoamor para lograr o voto feminino en 1931 pese ao rexeitamento da esquerda de entón—, os avances por lograr a igualdade de dereitos e de oportunidades das mulleres ofreceron éxitos notables, pero tamén retrocesos alarmantes nestes máis de cen anos.

Sen dúbida, a chegada da democracia a España trouxo o período de maiores avances en materia de igualdade da nosa historia, pero lamentablemente este último ano temos pouco que celebrar. Tras máis de 40 anos de pasos adiante, a entrada en vigor da denominada Lei do só si é si, impulsada e aprobada polo Goberno de PSOE e Podemos e apoiada polo BNG, supuxo o maior atraso nos dereitos e a protección das mulleres en décadas.

Para facer balance, hai que mirar máis aos feitos que ás palabras; máis á realidade que á propaganda. Por iso, o impacto desas políticas debe avaliarse mediante indicadores obxectivos e medibles que permitan cuantificar as desigualdades e discriminacións para erradicalas. E a realidade é que máis de 700 delincuentes sexuais —máis de medio cento en Galicia— viron rebaixadas as súas penas e máis de 70 foron postos en liberdade.

Debemos denunciar que, como consecuencia das decisións tomadas por este Goberno, a igualdade entre mulleres e homes deu un enorme paso atrás. Por iso, desde o Partido Popular de Galicia, este 8 de marzo queremos poñer de manifesto:

• Esiximos ao Goberno de España, e a Pedro Sánchez como máximo responsable, que pida perdón ás mulleres e á sociedade española polas consecuencias negativas da aprobación da súa Lei do só si é si; unha lesiva norma que supuxo o maior retroceso da democracia na protección e seguridade das vítimas de agresións sexuais, e que revitimizou ás mulleres ás que dicía querer defender. É unha pésima lei pola que ninguén asumiu aínda responsabilidade algunha.

• Esiximos ao Goberno de España e ao presidente Pedro Sánchez que explique á sociedade española e galega como vai protexer a esas mulleres, nenas e nenos, que están en perigo porque os seus agresores viron reducida a súa condena ou foron excarcerados en aplicación da súa mala lei, elaborada con tanta soberbia como impericia. Queremos saber que medidas van establecer para devolverlles, a elas e á sociedade no seu conxunto, a confianza no sistema, hoxe irremediablemente danada.

• Reclamamos ao Goberno de España e ao presidente Pedro Sánchez que explique ás mulleres, ás nenas e ao conxunto da sociedade española por que, tras o fracaso da súa Lei do só si é si, non freou a aínda máis lesiva Lei trans, elaborada tamén desde a insolvencia intelectual e incompetencia xurídica dun ensoberbecido equipo do Ministerio de Igualdade, coa anuencia de todo o Consello de Ministros.

• Manifestamos a nosa máis profunda preocupación polas consecuencias negativas que a Lei trans terá para as mulleres en todos os ámbitos da súa vida: invisibilízaas, prívaas dos seus espazos de protección, perverte a loita feminista e pon en perigo os logros obtidos en todos estes anos en materia de igualdade.

• Do mesmo xeito que coa Lei do só si é si, o Goberno e os seus socios aprobaron esta Lei trans sen a necesaria interlocución cos profesionais e axentes expertos na materia, desprezando a experiencia doutros países da nosa contorna, sen diálogo nin procura de consenso cos grupos parlamentarios e dando as costas ao Movemento Feminista que denuncia as súas perigosas consecuencias, especialmente negativas e irreversibles na infancia e a adolescencia.

• Pedimos tamén ao Goberno de España e á ministra de Igualdade que explique por que non se está cumprindo o financiamento recollido no Pacto de Estado destinada a reforzar os ministerios de Xustiza, Educación, Sanidade e Interior en materia de violencia de xénero. O Pacto de Estado é unha ferramenta eficaz e consensuada para combater a violencia de xénero, polo que debe ser cumprido na súa totalidade.

• Esiximos ao Goberno de España e á ministra de Emprego que explique por que a brecha laboral segue incrementándose: a peche do ano 2022 a taxa de paro das mulleres en España é 3,3 puntos porcentuais superior á dos homes.

• E lembramos que corresponde aos poderes públicos preservar, protexer e defender os dereitos conseguidos polas mulleres durante os últimos máis de cen anos, que son logros da sociedade española no seu conxunto.

Como fixemos sempre, no Partido Popular de Galicia traballamos pola igualdade real entre mulleres e homes. Queremos construír e consolidar unha sociedade na que se produzan avances na conciliación e a corresponsabilidade, que acurte a brecha social e salarial aínda existente, e que impulse de maneira eficaz o protagonismo imprescindible da muller en todas as esferas da vida na nosa sociedade.

Convén non esquecer que a primeira presidenta do Congreso, a primeira presidenta do Senado e a primeira Defensora do Pobo foron mulleres do Partido Popular e hoxe no Parlamento de Galicia somos 21 deputadas —o 50% do grupo parlamentario— e 5 conselleiras de 11 membros no Consello da Xunta. Non aceptaremos leccións en materia de igualdade e de feminismo daqueles que impulsaron, aprobaron e defenderon unha lei que beneficiou a centos de delincuentes sexuais.

Rexeitamos o sectarismo e os descualificativos de trazo groso a todos os que ousamos discrepar de decisións políticas que, en realidade e tal como mostran os datos, encamíñanse cara á silenciosa eliminación dos dereitos polos que as mulleres e toda a sociedade viñeron loitando desde hai máis dun século.

Desde o Partido Popular de Galicia defendemos continuar co diálogo e o acordo que tanto axudaron a avanzar na igualdade de dereitos e oportunidades da muller e que na nosa Comunidade quedou plasmada coa aprobación por unanimidade de normas como a Lei 12/2016 para a inclusión como forma de violencia a trata de mulleres e nenas con fins de explotación sexual ou a Lei 15/2021 que incorpora a violencia dixital. Defendemos a liberdade das mulleres para decidir a vida que queren vivir, sen que ninguén se erixa nin no seu portavoz nin no seu intérprete; e menos que ninguén un Goberno de España que as utiliza ignorando as súas advertencias.