15 de novembro de 2022. Os orzamentos da Xunta de Galicia para 2023 darán a vindeira semana un novo paso na súa tramitación parlamentaria co debate das emendas á totalidade nun Pleno específico que se celebrará o luns. Posteriormente, o Grupo Popular defenderá no Pleno ordinario, con motivo da celebración do Día Internacional da eliminación da violencia contra a muller o 25 de novembro, unha proposición non de lei na que insta a todas as administracións a colaborar na prevención, atención ás vítimas e erradicación total da violencia de xénero. Así mesmo, pedirá ao Goberno central a realización de accións para manter viva a memoria das vítimas do terrorismo de ETA, en especial entre a mocidade.
