O PPdeG pon en valor o cooperativismo galego, un “ecosistema sólido” con máis de 2.000 entidades activas

O PPdeG puxo en valor o cooperativismo galego, un “ecosistema sólido”, que conta con máis de 2.000 entidades activas, mobiliza arredor de 3.500M€ ao ano e xera emprego a máis de 78.000 persoas, entre socios e traballadores.

Durante unha reunión con representantes da Unión Cooperativas EspazoCoop, en Santiago de Compostela, os deputados do Grupo Parlamentario Popular, Noelia Pérez e Argimiro Marnotes, incidiron no cooperativismo como unha “parte esencial da economía galega”, por ser “unha auténtica panca de transformación”, apuntou Noelia Pérez. Algo que se aprecia, dixeron, con especial claridade no rural no galego, onde moitas cooperativas sosteñen actividade agraria, servizos de proximidade, comercialización e emprego local. “Significa xerar oportunidades, fixar poboación e aproveitar recursos locais, creando valor engadido”, sinalou Noelia Pérez.

Nesta liña, o Parlamento de Galicia vén de aprobar, esta semana, a iniciativa do Grupo Popular, relativa a “impulsar, reforzar e consolidar” a economía social e o cooperativismo como piares estratéxicos do modelo económico galego. A proposición non de lei, que saíu adiante por unanimidade, avoga por promover desde a Xunta de Galicia medidas específicas de apoio á innovación, dixitalización e sustentabilidade das entidades da economía social, favorecendo a súa adaptación aos novos modelos produtivos de negocio.

UNHA NORMATIVA PARTICIPADA
“O ámbito da economía social e do cooperativismo é o punto de partida da actividade emprendedora da nosa comunidade”, resaltou Argimiro. Así, subliñou o apoio do Goberno galego ás políticas vinculadas coa economía social e ao cooperativismo, ás que este ano destina preto de 45M€. E puxo como exemplo programas como o Bono Consolida ou o ES-Transforma.

Asemade, fixeron referencia, tamén, ao proceso de tramitación do anteproxecto da nova Lei de cooperativas de Galicia, que chega, dixeron, logo dun “amplo proceso participativo” co sector, co fin de seguir apostando por este eido como motor de progreso, cohesión social e desenvolvemento sustentable.

Neste punto, salientaron a importancia de avanzar cara unha maior axilidade administrativa e unha mellor regulación interna, así como tamén en máis seguridade xurídica. E abordaron o auxe de novas tipoloxías, especialmente relevantes en Galicia, como as vinculadas aos coidados, á enerxía ou á vivenda.

O PPdeG pon en valor as axudas da Xunta para a compra de vivenda no centro histórico de Lugo, que poden ascender ata un máximo de 12.800€

Os deputados do Grupo Parlamentario Popular, Cristina Sanz e José Manuel Mato, destacaron, hoxe, o compromiso do Goberno galego coa revitalización dos conxuntos históricos.

Durante unha visita ao centro histórico de Lugo, aproveitaron para poñer en valor as axudas da Xunta para a adquisición de vivenda nestas contornas, cuxo investimento total ascende aos 500.000€. Salientaron que as achegas ascenden, con carácter xeral, ata os 10.800€; pero que, nos supostos de que os compradores sexan menores de 36 anos, esta contía aumenta ata os 12.800€; e nos que o ámbito estea declarado como Área Rexurbe, ata os 15.000€.

E explicaron que poden solicitar estas axudas as persoas con ingresos iguais ou inferiores a 6,5 veces o Iprem; e que teñan adquirido a súa vivenda entre o 15 de outubro de 2025 e o 15 de outubro de 2026.

O prazo para presentar as solicitudes estará aberto ata o 15 de outubro.

11 CENTROS HISTÓRICOS DA PROVINCIA
Ademais de Lugo, na provincia hai outros 10 centros históricos –Castro de Rei, Chantada, Lourenzá, Meira, Mondoñedo, Monforte de Lemos, Pedrafita do Cebreiro, Quiroga, Ribadeo e Viveiro- que optan a estas axudas. No caso de Mondoñedo, Monforte de Lemos e Ribadeo, declarados como Área Rexurbe, as axudas poden ascender ata un máximo de 15.000€.

Asemade, José Manuel Mato subliñou a boa acollida que esta liña de axudas tivo o pasado ano, ao resultar beneficiaras 21 persoas –15 en Viveiro, 5 en Lugo e 1 en Ribadeo-.

“Son achegas –dixo Cristina Sanz- que, ademais de ir dirixidas a mitigar a crise da vivenda, fomentan o asentamento de poboación nos cascos históricos, ao tempo, que impulsan a recuperación do patrimonio construído”.

FACILIDADES DE ACCESO PARA A MOCIDADE
Por outra banda, fixeron fincapé no apoio económico que lle brinda a Xunta aos menores de 36 anos para a adquisición da primeira vivenda. E é que, tal e como apuntaron, o programa de avais pode sufragar ata o 20% do custe.

Segundo indicaron, o prezo máximo de adquisición na cidade de Lugo será de 260.000€. O prazo para solicitar estas axudas estará aberto ata o 30 de outubro.

O PPdeG insta ao Goberno a que cumpra o acordo do Parlamento e exonere das cotas á Seguridade Social ás mariscadoras

O PPdeG urxiu ao Goberno central a que cumpra co acordo acadado, esta mesma semana, no Parlamento de Galicia, relativo a exonerar das cotas á Seguridade Social ás profesionais do marisqueo.

Os deputados do Grupo Parlamentario Popular, Nazareth Cendán e Jesús Fernández, reclamaron que, de xeito inmediato, o Executivo de Pedro Sánchez asuma as súas obrigas e rache a situación de inxustiza na que se atopan estas traballadoras, respecto a outros sectores que contan con mecanismos de protección antes causas de parálise de actividade.

Os populares consideran que o Goberno central, “aínda que chega tarde”, está a tempo de emendar o desleixo amosado cara as profesionais do mar, ao non ter mobilizado nin un só euro, a diferenza da Xunta, dixeron, que destina 23M€ a un plan de recuperación do sector.

OBRAS NO PORTO DE MIÑO
Durante unha xuntanza coa Confraría de pescadores de Miño, e acompañados pola portavoz do PPdeG local, Fátima Blanco, abordaron o inicio, previsto para este mes de maio, das obras de dragaxe que se levarán a cabo no porto de Miño.

Uns traballos, salientaron, de grande importancia para a actividade da zona, xa que, ao recuperar os calados, mellorarán a operatividade da dársena. Actuarase nunha superficie de 8.000 metros cadrados e o volume estimado de dragado é de 15.000 metros cúbicos.

Explicaron que os traballos de dragado tamén se estenderán aos portos de Barallobre e Pontedeume. O investimento total nos tres portos ascende a 1,3M€.

Paula Prado reivindica as xornadas de “formación” e de “diálogo” en política fronte aos partidos que optan polo “conflito” e o “ruído”

A secretaria xeral do PPdeG, Paula Prado, reivindicou hoxe as xornadas de “formación, diálogo, debate e aprendizaxe” en política, fronte aos partidos que “optan polo conflito e o ruído”. Así o sinalou durante a inauguración do I Torneo de Debate da Fundación Alfredo Brañas, na que tamén participou o presidente da Fundación e deputado nacional, Juan Bayón. Agradeceu á Fundación o seu traballo por manter viva a figura de Alfredo Brañas e sinalou este tipo de encontros como “fundamentais para traballar por Galicia” e facelo da man da xuventude.

Neste sentido, Prado puxo en valor á mocidade e o seu “compromiso con Galicia, a súa xente e o seu futuro”. “O PPdeG pon a xente moza no centro, porque somos o partido do ‘si’ e o que máis se parece a maioría de galegos e galegas e a súa xuventude”, engadiu ante a forma de facer política do PSOE e BNG: “Eles prefiren promover o odio, radicalizar e levar o ‘non’ e o desgoberno por bandeira”.

A número dous dos populares galegos tamén enxalzou o papel das Novas Xeracións, a organización máis importante de Galicia, composta por “mozos e mozas capaces de gobernar o seu futuro”, sen deixar que ninguén lles diga como teñen que pensar e actuar, “con liberdade e reivindicándoa todos os días”. Prado animou aos participantes a seguir coa mesma forza traballando pola Galicia Calidade, “o futuro e, como fixo Alfredo Brañas, para que a nosa terra e a nosa voz sexa escoitada no resto de España”, fronte a un centralismo que busca diluíla e un independentismo que pretende encerrala.

“A PALABRA QUE TRANSFORMA”

A Fundación Alfredo Brañas, que leva o nome do escritor e político galego, nace para reivindicar os valores do diálogo e a reflexión. Así, 12 equipos de toda Galicia reuníronse, baixo o lema “A palabra que transforma”, en Santiago de Compostela para abordar a cuestión da transmisión de ideas políticas na educación pública.

O presidente da Fundación e deputado nacional, Juan Bayón, agradeceu a participación de todos os equipos e, parafraseando a Manuel Fraga, lembrou que “as sociedades necesitan profetas e indubidablemente Brañas foi un deles, con visión longa e actitude heroica, entre as incomprensións duns e doutros”.

A través deste torneo, a Fundación continúa o seu labor de recuperar e proxectar a figura de Alfredo Brañas como “referente intelectual do pensamento galego, apostando polo diálogo e a cultura do debate como ferramentas fundamentais para a cidadanía”, remarcou Bayón.

UNHA CITA QUE SE PROLONGARÁ ATA A TARDE

Tras a inauguración do I Torneo de Debate, a xornada matinal transcorreu coa celebración dos debates entre os participantes. Xa pola tarde celebrase a semifinal e a final do debate para dar conta do equipo gañador do evento.

A clausura da cita correrá a cargo da presidenta de NNXX de Galicia, Nicole Grueira, e do responsable de Educación, Ciencia, Universidades e FP do Goberno galego, Román Rodríguez. Ao longo do día, os equipos foron avaliados polo grupo de xuíces, conformado por técnicos e por políticos. Entre estes últimos atopábase o portavoz do Grupo Parlamentario Popular, Alberto Pazos, e outros deputados autonómicos e nacionais como Roberto Rodríguez, Rosa Quintana e Tristana Moraleja.

Paula Prado sinala como «antidemocrática» a actitude de PSOE e BNG ante a moción de Lugo

A secretaria xeral do PPdeG, Paula Prado, sinala como “antidemocrática” a actitude tomada polo PSOE e BNG ante a moción de “impulso” do PP de Lugo. “Continúan na escalada de insultos, de odio e manipulación dun proceso democrático”, denuncia tras o acontecido onte na cidade: “Cruzaron unha liña vermella ao tratar de facer todo o posible por boicotear o pleno municipal”, remarcou sobre o cambio de hora, a convocatoria da manifestación e “poñéndose do lado de quen insulta e agride a representantes municipais democraticamente elixidos”.

Así o afirmou na súa visita a XXXV Festa da Filloa de Muimenta, xunto ao alcalde de Cospeito, Armando Castosa, e os responsables de Cultura e de Facenda do Goberno galego, José López e Miguel Corgos, respectivamente, así como por outros representantes políticos. Na cita, a número dous do PPdeG volveu condenar a “escalada de odio” e lamentou que PSOE e BNG se centren en “frear un proceso absolutamente legal, sen ser capaces de defender a súa xestión no goberno bipartito”. Cando o Partido Popular trata de traballar pola cidadanía e Lugo, socialistas e nacionalistas “só teñen interese en frear a moción, un proceso que validaron cando se tratou de que Pedro Sánchez chegase a Moncloa”.

Prado remarcou o apoio do PPdeG a Elena Candia e a todos os compañeiros e compañeiras de Lugo, que contan cun “proxecto para Lugo, pensado en resolver os problemas dos veciños”. “Elena Candia será alcaldesa e reactivara a cidade, porque merece un goberno mellor e saír da inacción”, engadiu.

FESTA DE INTERESE TURÍSTICO DE GALICIA

Paula Prado tamén puxo en valor as políticas de promoción turística e gastronómica de gobernos populares como o de Cospeito, na celebración desta cita gastronómica consolidada no calendario festivo da provincia de Lugo e declarada de Interese Turístico de Galicia.

Alí comprobou de primeira man a vontade e o esforzo da veciñanza implicada na festa. “Esta celebración é mostra do poder da xente do rural e o PPdeG sempre vai estar ao seu carón, apoiándoos e impulsando políticas útiles”, sinalou.

A numero dous dos populares galegos aproveitou para felicitar ao rexedor pola acollida deste evento senlleiro, así como por xerar “estabilidade” e “boa xestión” nun concello no que leva gobernando dende 1991. Así, puxo en valor iniciativas xa consolidadas como esta Festa da Filloa de Muimenta ou a Mostra Exposición de Muimenta (Moexmu), celebrada hai apenas unhas semanas e na que se reafirmou o sector gandeiro como motor do rural galego.