Santiago, 1 de marzo de 2018.- A viceportavoz do Grupo Popular, Paula Prado, manifestou hoxe no Parlamento que a dotación de novos ciclos formativos no instituto de Melide “debe responder a criterios obxectivos, técnicos e froito do consenso, non a criterios localistas e menos partidistas”.
Paula Prado lembrou “o compromiso da Consellería de Educación para ampliar as instalacións no IES de Melide na súa aposta pola familia profesional da carpintería e o moble, co obxectivo de que sexa un referente na comarca”. Así mesmo, estudarase a posibilidade de poñer en marcha a FP-Dual neste ciclo formativo, “o que permitirá que os alumnos reciban formación teórica e práctica remunerada en empresas, coa posibilidade de fomentar a súa posterior contratación”.
TRIPLICAR A OFERTA
Respecto da posibilidade de poñer en marcha un ciclo formativo no IES de Melide de sistemas microinformáticos e redes, a viceportavoz popular explicou que estes cursos xa existen nos IES de Curtis e de Monterroso, con prazas vacantes nos dous casos.
Deste xeito, considerou “máis coherente estudar a posibilidade de mudar a oferta de ciclos formativos se a demanda así o require, pero non poñendo en marcha ciclos formativos xa existentes na contorna e con prazas vacantes, senón afondando nas necesidades reais e apostando pola familia profesional que xa conta con estudos no IES de Melide”.
“Para a actualización da oferta de formación profesional analízanse as diferentes variables socioeconómicas, a inserción laboral, os recursos dispoñibles e as demandas dos centros educativos, e no caso do IES de Melide nunca solicitou á Consellería de Educación a posta en marcha e impartición do ciclo de sistemas microinformáticos e redes”, anotou.
