Santiago, 28 de setembro de 2021.- A portavoz de Sanidade do Grupo Popular, Encarna Amigo, defendeu hoxe no Pleno que a Xunta continúe avanzando no cumprimento do fixado no documento Por unha atención primaria vertebradora e desenvolvendo os compromisos aprobados no ditame da Comisión de Reactivación nas cuestións relacionadas coa atención primaria, a saúde mental e o persoal.
“Deixemos traballar aos profesionais, que ninguén máis que eles desexan que estas medidas sigan avanzando para lograr esa atención primaria do século XXI: forte, empoderada e capaz de poñer solucións a todos os problemas que vén arrastrando desde hai décadas”, manifestou.
No debate de sendas proposicións non de lei do BNG e do PSdeG sobre a atención primaria en Galicia, Encarna Amigo lamentou que “continúen co mesmo monotema de sempre, e nós defendendo sempre a realidade, a verdade e o esforzo que día a día se fai desde o Servizo Galego de Saúde para que os galegos sigan gozando da mellor sanidade, cos mellores profesionais, e as mellores infraestruturas e equipamentos nos centros sanitarios”.
“Todos estamos de acordo en que a reforma da atención primaria é necesaria”, recoñeceu a portavoz popular, quen destacou que “o Sergas xa comezou en 2018 a traballar na súa reestruturación”. “É necesaria esta reforma porque había décadas que o modelo non mudara e, a maiores, as características da poboación de Galicia tamén sufriron cambios: cada vez contamos cunha poboación máis envellecida, o que aumenta as patoloxías crónicas, ao tempo que temos que afrontar a dispersión e o despoboamento de determinadas zonas”, engadiu.
CUMPRIMENTO DAS MEDIDAS
Amigo sinalou que o documento Por unha atención primaria vertebradora, ao que se incorporaron moitas das medidas aprobadas no ditame da Comisión de Reactivación; e o Plan de atención primaria 2019-2021 “fixaron o traballo e a estratexia para poder aplicar as medidas precisas”. “Agora, despois de case dous anos e recoñecendo que a atención primaria post-covid xa non será a mesma de antes, podemos salientar que todas e cada unha das medidas previstas e prometidas estanse cumprindo e implantando tal e como se anunciaron”, manifestou.
Así, concretou que se crearon 162 novas prazas de primaria nos orzamentos desde ano 2021, se ofertaron 83 prazas de médico de familia na OPE para 2020 e outras 60 prazas na OPE para 2021. “Estamos todos de acordo na necesidade de incorporar máis profesionais, pero é necesario e imprescindible que o Goberno central atenda a petición deste Parlamento e faga efectiva a convocatoria extraordinaria de prazas MIR”, sinalou.
