Santiago, 5 de novembro de 2021.- O Parlamento galego aprobou hoxe por unanimidade a proposición non de lei, transaccionada entre o Grupo Popular e o BNG, a través da que demanda que a Xunta centre os seus esforzos negociadores con tódalas institucións precisas para que sexa recoñecida como admisible a totalidade da superficie que realmente teña actividade gandeira, mellorando o coeficiente de admisibilidade de pastos (CAP) no caso das zonas arbustivas e baixo arboredo, de modo que Galicia non siga a ser prexudicada pola falta de recoñecemento das súas singularidades a efectos da PAC.
A portavoz popular de Medio Rural, Elena Candia, manifestou que “o realmente importante é facilitar superficie dispoñible para as explotacións gandeiras que o precisen co fin de permitir a súa extensificación”. “Esta é unha das vías principais para asegurar a sostibilidade económica a longo prazo da gandería galega en base a pastos propios e con menos alimentos para o gando mercados fóra da explotación”, apuntou.
Deste xeito, Candia considerou “razoable que as superficies de pastos permanentes que non producen pasto non cobren axudas agrarias para este fin, porque se fosen admisibles constituiría un agravio para os gandeiros de superficies que producen pastos e que, polo tanto, teñen unha verdadeira actividade gandeira”. “As axudas deben corresponder ás superficies que permiten vivir da gandería”, concretou.
