Santiago, 9 de novembro de 2021.- O deputado do Grupo Popular Diego Calvo afeou esta mañá no Pleno do Parlamento a conduta do BNG en todo o que respecta ao proxecto de lei de mellora do ciclo integral da auga.
“Andan agora a dicir que vostedes son os do si, mentindo claramente unha vez máis, pois veñen a criticar unha lei que aínda non está presentada e que, sen dúbida, é positiva para todos os concellos de Galicia”, asegurou Calvo, que engadiu que “só quen pensa nunha Galicia cativiña é quen de rexeitar as melloras propostas nesta nova norma”.
Neste senso, e ante a intención dos nacionalistas de paralizar este proxecto lexislativo, lembrou os problemas que teñen a maioría dos concellos para asumir as súas competencias en depuración, abastecemento e saneamento, como sucede en Tomiño, Ribadeo, Rianxo ou Pontevedra, cidade esta última gobernada polo BNG e a única de Galicia onde o concello non xestiona a súa depuradora. “A Xunta inviste na estación depuradora de Pontevedra 30 millóns de euros e vostedes veñen aquí a dicir que non é necesaria esta nova lei de xestión da auga?”, preguntouse Diego Calvo.
Durante a súa intervención, rexeitou un por un todos os argumentos da oposición á nova lei. “É mentira que se vaia impoñer nada aos concellos, pois a súa adhesión é voluntaria; é mentira que se incremente a factura da auga, porque o que se fai é unificar tributos; é mentira que Augas vaia deixar de apoiar aos concellos que decidan manter a xestión como agora, pois o seu traballo será como ata gora; e é mentira que a Xunta trate de evadirse das súas competencias pois, insistimos, todo o relacionado coa xestión da auga é competencia municipal”.
OS INFORMES DA FEGAMP
No relativo ao prezo da factura da auga, Calvo criticou ao BNG por presentar ante o Parlamento unha iniciativa baseada nunha mentira, pois os cálculos que denunciaron hai unhas semanas foron realizados sobre unha base errónea, cuestión que xa recoñeceron publicamente os técnicos da Fegamp e que, aínda así, foron expostos polos nacionalistas no pleno.
“O que tería que facer o BNG é pedir desculpas e retirar esta moción, porque xa está ben de tratar de enganar aos galegos”, apuntou o deputado popular, que recomendou aos nacionalistas preocuparse polo “verdadeiramente importante” como é o incremento que está a supoñer na xestión da auga a subida do prezo da luz.
Finalmente, Diego Calvo eloxiou o traballo realizado pola Consellería de Infraestruturas e Mobilidade, a través de Augas de Galicia, para coñecer de xeito pormenorizado o estado actual das infraestruturas hidráulicas e tratar de melloralas cara a unha xestión máis óptima. “É un traballo minucioso, feito con rigor e moi valente, porque estamos falando de novo dunha competencia municipal na que a Xunta inviste millóns de euros cada ano”, rematou o deputado, que fixo referencia tamén aos 1.100 millóns de euros que se levan investidos no saneamento integral das rías e ríos de Galicia nos últimos 10 anos.
