O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España que reforce as campañas de promoción do consumo de peixe, marisco e conservas cun plan estatal de alcance plurianual, dotado de financiamento suficiente, que combine accións de comunicación, educación alimentaria en colexios e comedores, e apoio ao comercio retallista de proximidade.
Así mesmo, pídese que impulse a redución do IVE aplicable ao peixe e marisco, en liña con outros produtos básicos da dieta, para facilitar o seu acceso a todas as familias, ao tempo que apoie de forma específica ás peixarías tradicionais, como puntos de venda esenciais para o mantemento do consumo e para a cohesión de barrios e pobos.
O deputado popular Manuel Santos puxo en valor “a importancia de seguir impulsando o consumo de peixe, de defender ao sector pesqueiro galego e de promover hábitos de alimentación saudable entre a cidadanía, especialmente entre as novas xeracións”. “Non falamos só de apoiar un produto, senón de defender un sector estratéxico para Galicia e de apostar polo futuro da nosa economía azul, porque fomentar o consumo de peixe é tamén fomentar Galicia: é apoiar o emprego, o desenvolvemento sostible e a calidade alimentaria”, apuntou.
TENDENCIA DESCENDENTE NO CONSUMO
Manuel Santos lembrou que “o consumo de peixe no conxunto de España mantén unha tendencia descendente nos últimos anos, situándose moi por baixo das recomendacións nutricionais”, unha situación que “de seguir pode derivar no peche de arredor de 5.000 peixerías tradicionais”.
Por este motivo, demandou a posta en marcha dun plan estatal de promoción do consumo de produtos do mar en coordinación coas comunidades autónomas costeiras, especialmente Galicia, dado que concentra máis do 40 por cento do volume pesqueiro español.
Ademais, o deputado popular manifestou que “o peixe e o marisco tributan ao 10 por cento de IVE, mentres que produtos como o pan, o leite ou as froitas teñen un tipo reducido do 4 por cento, ao tempo que outros alimentos frescos foron temporalmente bonificados co 0 por cento durante a crise inflacionaria”, ante o que reclamou que o Goberno central “impulse unha rebaixa estrutural do IVE ao 4 por cento para o peixe e o marisco en tanto se manteña a caída do consumo”.
Por último, Santos demandou que “o Goberno central debe promover campañas que inclúan as conservas e produtos elaborados, no só o peixe fresco, e protexer a este sector da entrada de produtos procedentes de países con estándares de produción moi por debaixo dos esixidos pola normativa comunitaria”.
