O presidente do Partido Popular de Galicia, Alfonso Rueda, animou hoxe ao alcalde de Meaño, Carlos Viéitez, e a todo o seu equipo a seguir poñendo aos veciños “por riba de todo” e así consolidar “con paso firme” o avance experimentado por este concello ao longo dos últimos tempos.
Este mediodía o líder dos populares galegos sumouse á celebración do Magosto do PP local xunto ao presidente provincial do PP de Pontevedra, Luis López, e quixo aproveitar para poñer en valor o traballo feito pola agrupación local. “Mentres haxa alcaldes como Carlos Viéitez e equipos de goberno como o que leva o Concello de Meaño, o Goberno galego estará á altura e disposto a colaborar”, subliñou.
Rueda comprometeuse así a seguir apoiando os moitos proxectos que quedan por facer neste concello do Salnés e animou ao partido local e comarcal a seguir facendo “o mellor que sabe facer” o Partido Popular: “Pouco ruído, moita xestión e aínda máis compromiso coa xente”.
