Os deputados do Grupo Popular Cristina Campero e Miguel Ángel Viso salientaron hoxe que a Xunta destinará o vindeiro ano dous millóns de euros na mellora da base de medios aéreos de Antela, no concello de Sandiás, unha infraestrutura considerada estratéxica na loita contra os incendios forestais e na prevención dos lumes que afectan á provincia de Ourense.
Durante a visita a Antela, Cristina Campero e Miguel Ángel Viso destacaron que a Xunta destinará o vindeiro ano máis de 9 millóns de euros á mellora e creación de novas bases aéreas e infraestruturas de extinción. En concreto, a base de Antela pasará a dispoñer de novas instalacións e mellores capacidades operativas para avións e helicópteros de carga en terra.
INVESTIR EN SEGURIDADE
“Esta é unha mostra máis do compromiso real da Xunta coa provincia de Ourense e coa protección do noso medio natural”, indicou Cristina Campero, que anotou que “previr é a mellor forma de combater o lume, e investir en infraestruturas como esta é investir na seguridade e no futuro das nosas comarcas”.
Pola súa banda, Miguel Ángel Viso manifestou que a mellora da base de Antela “supón reforzar un punto neurálxico do dispositivo galego de loita contra os incendios, cun impacto directo na capacidade de resposta e coordinación en toda a provincia”.
O aeródromo de Antela é unha das bases máis relevantes no dispositivo galego de defensa contra incendios, pola súa situación no corazón da Limia e pola cobertura que ofrece a amplas zonas do sur e leste de Ourense. A súa modernización permitirá optimizar a capacidade de operacións dos medios aéreos, reducindo tempos de resposta e incrementando a eficacia das intervencións.
