O PPdeG vén de acusar ao Concello de Caldas de Reis de bloquear a construción do novo centro de saúde, que ademais funcionará como Punto de Atención Continuada (PAC) para toda a comarca, por non facilitar os terreos case quince meses despois da sinatura do convenio entre o conselleira de Sanidade, Antonio Gómez Caamaño, e o alcalde Jacobo Pérez.
Os deputados autonómicos Manuel Santos e Raúl Santamaría, acompañados polo voceiro municipal, Fernando Pérez, e os concelleiros do PP en Caldas, desprazáronse ata a futura parcela sanitaria, situada na contorna de Santa María do casco urbano, para denunciar esta situación, posto que os nulos avances realizados polo Concello na posta a disposición do predio, de 4.192 metros cadrados, teñen paralizado este investimento sanitario de vital importancia para a vila e a bisbarra.
Neste senso, lembraron que o convenio asinouse o 4 de marzo de 2025 e, nestes case quince meses, o Concello limitouse a encargar a redación do proxecto de urbanización, do que nada se sabe desde o pasado mes de setembro, e tamén informou a finais do pasado ano de que a expropiación de dúas pequenas fincas estaba tramitada, pero sen dar detalles do seu remate.
“DEIXADEZ DO GOBERNO LOCAL”
“Non pode ser que a forte aposta e o decidido compromiso da Xunta de dotar a Caldas dun centro de saúde de primeiro nivel, que cuadriplicará a súa superficie ata os 2.800 metros cadrados grazas a un investimento de 7,2 millóns de euros, estea paralizado hai máis dun ano e sen visos de que o tema se vaia solucionar a curto prazo pola deixadez do goberno local”, criticaron Santos e Santamaría, que instaron ao executivo a actuar de inmediato para que a súa “evidente falta de xestión” non retrase aínda máis o Plan de Infraestruturas Sanitarias de Galicia.
Ademais, os parlamentarios lamentaron que a paralización deste investimento, por responsabilidade exclusiva do Concello, está a prexudicar directamente á atención sanitaria dos caldenses, posto que o novo centro de saúde contará con 12 consultas de adultos, 5 de pediatría e 3 de PAC e ademais incorporará novas prestacións, como unha dependencia farmacéutica, Traballo Social e atención bucodental.
Santos e Santamaría lembraron que a Xunta ten o compromiso de comezar a redacción do proxecto tan pronto como reciba os terreos “para adaptar o inmoble con exactitude ás características finais da parcela”, pero concretaron que o excesivo retraso por parte do Concello “ten atada á consellería de pés e mans nunha situación lamentable que, ademais de aos caldenses, afecta a todo o Plan de Infraestruturas Sanitarias”.
ADIANTADOS POR OUTROS CONCELLOS
Pola súa banda, o voceiro municipal e ex deputado, Fernando Pérez, destacou que a paralización do novo centro de saúde por parte do Concello “é a tónica habitual que estamos a sufrir os caldenses por parte dun goberno que non fai nin o mínimo que lle corresponde aínda que lle poñan enriba da mesa un servizo sanitario de primeira con 7 millóns de euros” e augurou que este retraso vaise seguir prolongando, polo que será case imposible que as obras comecen neste mandato.
Así mesmo, lembrou que o Concello de Caldas estaba na Fase 1 do Plan de Infraestruturas Sanitarias por diante de Meis ou Barro, que se atopaban na Fase 2 “pero que xa teñen as obras en camiño” porque puxeron os terreos “e nos adiantaron dun xeito incomprensible co agravante de que nin sequera temos unha data, unha referenza ou unha previsión”.
Finalmente, Pérez acusou ao alcalde de ser o único responsable e de faltar gravemente a súa palabra o día que asinou o convenio con Sanidade: “Dixo que o Concello sería áxil para facilitar que a Xunta construíse o centro de saúde no menor tempo posible e incluso amagou con poñerse con esixencias reclamando que se lle desde prioridade a Caldas, pero lamentablemente todo eran palabras baleiras e que non priorizou a Caldas foi o propio Jacobo Pérez”.
