Os deputados do Grupo Parlamentario Popular, Raquel Arias e José Luis Novo, puxeron en valor que máis dun cento de establecementos da provincia de Lugo están adheridos ao Carné +65, posto en marcha pola Xunta e que ofrece descontos, vantaxes e beneficios exclusivos ás persoas maiores.
Os parlamentario, acompañados polo responsable de Política Social, Maiores e Migración do Concello de Lugo, Gustavo Díaz Rey, visitaron varios establecementos da capital que ofrecen estes descontos, e lembraron que se trata dunha tarxeta, semellante á que teñen as mozas e mozos de ata 30 anos, da que poden beneficiarse todas as persoas de 65 anos ou máis, empadroadas en Galicia, á hora de acceder a comercios, museos e teatros, así como viaxes e aloxamentos turísticos, ademais de produtos de audición e vista, actividades formativas e outros. Dos preto de 1.000 establecementos adheridos en toda Galicia, máis de 110 atópanse na provincia de Lugo.
Raquel Arias e José Luis Novo remarcaron que este carné é completamente gratuíto e non require de trámites nin de xestións. “É moi sinxelo. As persoas maiores recíbeno por correo nos seus fogares, sen necesidade de activalo. Para empregalo, por exemplo á hora de mercar unhas gafas, simplemente teñen que presentalo no momento de facer o pagamento, e o propio establecemento encárgase de aplicar o desconto de maneira directa”, indicaron.
Así mesmo, fixeron un chamamento para que todas e todos os lucenses que xa cumpriran os 65 anos se animen a presentar o Carné +65. “Cun pequeno xesto, como é sacar o carné do peto, poden optar a descontos do 10%, 20% e ata o 30%, que sumados no día a día, poden supoñer unha diferenza considerable ao final de mes. Que non deixen de facelo por descoñecemento ou por temor a non saber empregalo”, sinalaron.
OUTRAS INICIATIVAS EN PROL DAS PERSOAS MAIORES
O Carné +65 é unha das iniciativas desenvolvidas polo Goberno galego para contribuír a que as persoas maiores desfruten desta etapa das súas vidas. Outros programas que se reeditan este ano son Benestar en Balnearios, ao que poden optar persoas maiores de 60 anos e pensionistas maiores de 55, con estadías de 10 días e 9 noites en réxime de pensión completa, a escoller entre 15 balnearios de Galicia; e Xuntos polo Nadal, que fai posible que as persoas maiores que estean soas poidan pasar estas datas acompañadas doutras persoas na mesma situación, de xeito gratuíto.
