O Partido Popular vén de criticar o “constante maltrato” do Goberno de España coa necesaria mellora e modernización das infraestruturas estatais da cidade de Pontevedra nunha comparecencia realizada esta mañá pola senadora Pepa Pardo e o deputado nacional Pedro Puy, que estiveron acompañados polo voceiro municipal do PP na capital provincial, Rafa Domínguez. Así mesmo, os representantes populares tamén expresaron a súa disconformidade coa recurtada proposta de transferencia da AP-9 –aprobada polas forzas de esquerdas no Congreso–, xa que advertiron de que non garante, entre outros problemas, o financiamento para estas obras no nó de Bombeiros ou no acceso norte da autoestrada.
Pepa Pardo concretou que os “incumprimentos” do Executivo de Pedro Sánchez con Pontevedra son unha “triste constante” que cercenan o axeitado desenvolvemento da cidade e exemplificou esta “política de agravios e castigo” co estado do nó de Bombeiros, que se atopa totalmente paralizado desde hai máis de vinte meses tras detectarse, en novembro de 2024, uns problemas no subsolo que obrigaron a modificar o proxecto.
“As infraestruturas estatais en Pontevedra están bloqueadas, como sucede co paseo de Marín ou a solución aos anegamentos da autovía co concello veciño, pero o do nó de Bombeiros é o caso máis flagrante, xa que o Executivo socialista non foi quen de sacalo adiante en máis de oito anos e, polo momento, seguimos sen noticias, sen datas, sen orzamento e sen previsións de futuro”, manifestou a senadora pontevedresa, que lamentou tamén que o Goberno de Pedro Sánchez non dea respostas ás moitas preguntas e iniciativas relativas a esta obra presentadas polo PP tanto no Senado como no Congreso.
Ademais, Pardo tamén quixo deixar claro que este “maltrato” coa cidade conta coa “evidente complicidade” do alcalde Lores e do BNG, xa que lembrou que sosteñen “contra vento e marea” a Pedro Sánchez na Moncloa, e criticou as prioridades do ministro Óscar Puente, “que se tivera a mesma dilixencia e celeridade coas obras de Pontevedra que a que ten para desenfundar insultos e numantinas defensas da corrupción do PSOE en Twitter xa tería feitas todas estas actuacións”.
Transferencia envelenada
Pola súa banda, o deputado nacional Pedro Puy engadiu que, ademais destes atrancos e retrasos coas obras estatais en Pontevedra e noutras localidades da provincia, outro dos problemas que está a xerar o Goberno de España no noso territorio céntrase na proposta de transferencia da AP-9 a Galicia, xa aprobada como lei no Congreso polas forzas de esquerda e que vén moi recurtada con respecto ás aspiracións da Comunidade Autónoma e ao aprobado por unanimidade no Parlamento de Galicia.
Así, o congresista pontevedrés indicou que o contido de traspaso acordado por PSOE, BNG e Sumar “ten moitas cousas sen aclarar, especialmente no que se refire ao financiamento de obras vencelladas á autoestrada, como é o caso do nó de Bombeiros ou o acceso norte de Pontevedra, pero tamén noutros puntos da provincia como Redondela”, xa que indicou que na citada normativa non se concreta a asunción dos fondos necesarios por parte do Estado e iso pode provocar, como xa está a suceder, que as necesarias melloras nestas infraestruturas queden paralizadas.
“Os partidos de esquerda pretenden endosarlle un agasallo envelenado á Xunta e, en consecuencia a todos os galegos, xa que con esta transferencia recurtada só queren dinamitar o orzamento galego, facendo que asumamos desde Galicia o que lle corresponde ao Estado”, advertiu Puy, que tamén censurou que o Executivo central siga sen responder á razoable solicitude da Xunta para convocar a Comisión Bilateral orientada a negociar as condicións de transferencia da autoestrada.
