O presidente do PPdeG, Alfonso Rueda, asegurou que é necesario “concentrar o voto” nas Eleccións Xerais do 29 de novembro no Partido Popular, porque será o que posibilite a Alberto Núñez Feijóo ter as “mans libres” para “reconstruír” todo aquelo que destruíu o sanchismo durante os últimos oito anos. Neste sentido, apelou a “empuxar o cambio” desde Galicia, dándoo todo durante estas semanas, para levar o candidato popular á Presidencia do Goberno.
O líder do PPdeG interveu nun mitin celebrado en Padrón, que inaugurou o presidente local do PP de Padrón e voceiro do grupo municipal, Ángel Rodríguez, e no que tamén participaron o presidente provincial do PP da Coruña, Diego Calvo, e a número dous ao Congreso pola provincia da Coruña, Fabiola García. O acto tamén contou coa presenza da secretaria xeral do PPdeG, Paula Prado.
No peche do mitin, Rueda lembrou que o cambio na Moncloa, para o que vén pedindo que Galicia sexa un actor decisivo, o seu “motor”, está máis preto que nunca, e só queda “un pasiño” cando restan menos de dúas semanas para acudir ás urnas. Despois da inxección de enerxía e moral que supuxo o mitin encabezado por Feijóo o pasado sábado en Santiago, ante máis de 8.000 persoas, o presidente dos populares galegos celebrou que nese acto quedou demostrado que o partido está “en forma”, mobilizado, con ganas e con ilusión.
Pero, o mesmo tempo, lembrou que “non sobra un voto”, porque non hai “nada gañado”. Puxo como exemplo o caso da provincia da Coruña, onde o PP aspira a mellorar o resultado de 2023 e lograr un quinto deputado, que pretende arrebatarlle o BNG. De aí que a “máquina” do partido, dixo, teña que funcionar “a tope”, mostrando a alternativa que encarna Feijóo e lembrando que os votos que non se traducen en escano son votos perdidos, e que “ó único voto do cambio” é o da papeleta do Partido Popular.
Rueda incidiu en que só o proxecto de Feijóo representa unha verdadeira alternativa ao sanchismo, porque non hai outro coa “súa experiencia, a súa xestión e o seu compromiso”. E porque “só Feijóo conseguirá que España funcione como Galicia”, devolverá as institucións aos cidadáns e barrerá coa corrupción.
DIEGO CALVO: “ESTAMOS CANSOS DE QUE SE RÍAN DE NÓS”
Diego Calvo asegurou que cada día que pasa é un día menos para poñer fin ao Goberno de Pedro Sánchez, marcado pola corrupción, os escándalos e unha forma de gobernar que está a esgotar a paciencia dos cidadáns. “Estamos cansos de que se rían de nós, de que pensen que todo vale e de que os españois teñamos que soportar cada día un novo escándalo”, sinalou.
O presidente provincial apelou á mobilización e ao traballo de todos os militantes e simpatizantes do Partido Popular ata o último minuto da campaña. “Non podemos confiarnos nin baixar os brazos. Hai que pelexar, saír á rúa, falar coa xente e pedir o voto ata o último día. Cada voto conta e cada esforzo é necesario para conseguir o cambio que España necesita”, afirmou, co obxectivo de acadar cinco escanos na provincia da Coruña.
Calvo destacou que España necesita a Alberto Núñez Feijóo, un presidente preparado, con experiencia e solvencia, que todos coñecemos e que xa demostrou en Galicia que outra forma de gobernar é posible. Fronte ao desgaste, a inestabilidade e os escándalos do sanchismo, o PP representa a alternativa de seriedade, confianza e boa xestión que España precisa para abrir unha nova etapa.
FABIOLA GARCÍA: “O CAMBIO TEN UN NOME: ALBERTO NÚÑEZ FEIJÓO”
Pola súa banda, Fabiola García reivindicou a importancia de defender os dereitos das mulleres con feitos e non só con palabras. Neste sentido, asegurou que o PSOE non está en condicións de dar leccións de feminismo a ninguén despois dos numerosos casos e escándalos que rodean o seu partido. “O feminismo non pode ser unha pancarta electoral nin unha ferramenta de propaganda; ten que traducirse en respecto, igualdade e protección real das mulleres”, sinalou.
A candidata tamén puxo o foco na necesidade de respectar e protexer os nosos maiores, aos que considera unha prioridade absoluta. “Non se pode xogar cos maiores, nin utilizar as súas necesidades como arma política. Merecen respecto, atención e garantías, non promesas incumpridas nin experimentos”, destacou. Fronte á falta de respostas do Goberno socialista, reivindicou o compromiso do Partido Popular cunha política centrada nas persoas, especialmente nas máis vulnerables. Por iso fixo un chamamento á mobilización e á participación nas urnas, subliñando que “o cambio necesario ten un nome: Alberto Núñez Feijóo”.