Categoría: Parlamento de Galicia

O Pleno do Parlamento de Galicia aprobou hoxe a proposición non de lei do Grupo Popular a través da que se insta á Xunta a que, en colaboración con concellos e deputacións, desenvolva o Plan de Pistas Abertas a fin de poñer a disposición de clubs e familias as instalacións deportivas escolares e así contribuír a fomentar a práctica de exercicio físico, así como a un aproveitamento máis eficiente dos recursos e instalacións das administracións públicas.

O portavoz de Deportes do Grupo Popular, Pablo Prieto, sinalou que “o Partido Popular sempre tivo claro os beneficios que o deporte ten na sociedade e por iso sempre apostou desde a Xunta por favorecer a práctica deportiva desde as idades máis temperás ata as máis avanzadas”.

UN PASO MÁIS

En concreto, citou iniciativas postas en marcha pola Xunta, como o Bono Deporte, o Bono Actívate ou o Plan Xogade, ao tempo que se mantén a mellora das dotacións de equipamentos e a creación e mellora de infraestruturas deportivas. “Ademais, un ano máis, se publicarán as subvencións, por un importe de case 6 millóns de euros, para crear e mellorar infraestruturas deportivas de titularidade municipal e dotalas de equipamento”, engadiu Pablo Prieto.

“Agora queremos dar un paso máis creando as condicións para que a poboación galega goce dunha vida máis activa desde a infancia ata a vellez, ao tempo que se fai un aproveitamento efectivo de todo ese gran potencial que representan as infraestruturas e instalacións deportivas dos nosos centros educativos”, sinalou.

Deste xeito, subliñou que “un dos compromisos do PPdeG asumidos nas pasadas eleccións autonómicas foi o Plan de Pistas Abertas, co que se pretende poñer a disposición de clubs e familias as instalacións deportivas escolares”.

“Para iso, pedimos á Xunta que lidere este programa para o que é imprescindible a colaboración doutras administracións, nomeadamente os concellos”, dixo o portavoz popular. Así, explicou que a disposición da Xunta debe ser ceder o uso das instalacións deportivas dos centros educativos da súa competencia e encargarse da súa conservación e mantemento ante o incremento de uso das instalacións que este plan implica, polo que pediu “un esforzo para negociar coa Fegamp un convenio marco no que se establezan as condicións a cumprir polas partes e para que desde a propia federación de municipios se inste aos concellos a sumarse a este acordo que redundará en beneficio de toda a cidadanía”.

PROMOCIÓN DO DEPORTE FEMININO

Por outra banda, o Pleno do Parlamento galego tamén aprobou por unanimidade unha proposición non de lei relacionada coa promoción do deporte feminino logo dunha transacción entre o Grupo Popular e o Grupo Socialista. En concreto, pídese que a Xunta dea cumprimento aos artigos 71 e 72 da Lei 7/2023, para a igualdade efectiva de mulleres e homes de Galicia, ao tempo que atribúa regulamentariamente ao Observatorio da Imaxe da Muller a obriga de potenciar a imaxe da muller e o deporte e a participación das mulleres en actividades físico deportivas.

Ademais, pídese que o ente público de Corporación Radio e Televisión de Galicia, dentro da Comisión de Igualdade, impulse unha maior visibilidade das competicións e o deporte feminino na programación e nos informativos; reforce a formación de todos os profesionais da corporación en materia de igualdade co obxecto de incluír unha perspectiva de xénero nas informacións; e promova a adscrición interna do persoal con formación ou experiencia acreditada no campo do deporte feminino aos servizos de deportes, respectando a selección normativa laboral vixente.

O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España, unha vez constituída a Axencia Española de Supervisión da Intelixencia Artificial (AESIA) na súa sede de A Coruña, que conte coa participación de Galicia e do resto de comunidades autónomas nos seus órganos de goberno. Así mesmo, pídese á Xunta que proceda a reformular a Estratexia Galega de Intelixencia Artificial 2030, previsto para o ano 2025, e os programas sectoriais e proxectos de IA en Galicia, de forma que nos permita aproveitar a oportunidade da localización da AESIA en A Coruña para consolidar un ecosistema que facilite a implantación de empresas tecnolóxicas e retención e atracción de talento na Comunidade galega.

O viceportavoz do Grupo Popular, Julio García Comesaña, lamentou o atraso co que o Goberno de Pedro Sánchez está a proceder para a implantación da AESIA en A Coruña, xa que o decreto que aprobaba o estatuto desta axencia publicado o pasado mes de setembro se establecía que a constitución do seu Consello Reitor tería lugar no prazo de tres meses. “Curiosamente, a semana pasada, coincidindo co anuncio de debate desta proposición non de lei, o ministro para a Transformación Dixital visitou A Coruña para anunciar as funcións, o logo e o inicio da confección da plantilla de persoal da AESIA, un anuncio realizado sen ningún tipo de representación da Xunta, a pesar de que leva meses reiterando o seu ofrecemento de colaboración e amosando a súa posición a favor de que as diferentes comunidades participen de forma activa ou directa na xestión da axencia”, sinalou.

García Comesaña lembrou que a Xunta, a través da Amtega, xa expresara no mes de marzo de 2023 a súa firme convicción de que as comunidades autónomas formaran parte dos órganos de goberno da futura AESIA. “Consideraba, e segue a considerar, que a participación das comunidades autónomas é crucial, dadas as súas competencias en áreas fundamentais como a saúde, educación, emprego ou política social, entre outras”, dixo.

A maiores, o conselleiro de Facenda do Goberno galego tamén defendeu o pasado 14 de xuño na Conferencia Sectorial sobre transformación dixital que as comunidades autónomas teñan unha participación directa e activa na cogobernanza da Axencia Estatal de Supervisión da Intelixencia Artificial de A Coruña, do mesmo xeito que acontece na Axencia Estatal da Administración Tributaria, a Axencia Española do Medicamento, a Axencia Española de Seguridade Alimentaria e Nutrición ou na Axencia Española de Protección de Datos, entre outras. Nesta mesma reunión, a maior parte dos representantes autonómicos trasladaron ao ministro o seu malestar polo feito de que as comunidades autónomas non foran consultadas para a elaboración da nova Estratexia de Intelixencia Artificial do Estado.

O viceportavoz popular salientou o compromiso da Xunta coa regulación responsable da intelixencia artificial e mostra disto é a elaboración dunha lexislación propia sobre o uso da intelixencia artificial no sector público autonómico, co obxectivo de garantir un uso ético e seguro da IA en todas as esferas da administración autonómica.

O portavoz do Grupo Popular, Alberto Pazos, afirmou hoxe no Pleno do Parlamento galego que “compartimos co BNG a necesidade de finalizar os traballos da comisión parlamentaria de estudo para abordar a proposta de Galicia ante a reforma do sistema de financiamento das comunidades autónomas, co fin de alcanzar un posicionamento coherente coas achegas realizadas polos expertos que alí compareceron”.

“Para traballar nun ditame que responda ás necesidades reais de Galicia e coherente cos traballos técnicos realizados polos expertos designados polas comunidades autónomas, conten do Partido Popular de Galicia; pero para iniciar unha sucesión de reunións bilaterais que so retrasarían alcanzar o consenso que estamos reivindicando, non conten con nós”, indicou Pazos.

NIN CONCERTO PARA GALICIA, NIN TARIFA ELÉCTRICA GALEGA

Neste sentido, lembrou que “ninguén dos que participaron nesta Comisión de Estudo respaldou a reivindicación nacionalista dun concerto económico galego, que sería ruinoso para Galicia, ao igual que ninguén apoia a súa fantasmagórica tarifa eléctrica galega”.

Alberto Pazos sinalou que “Galicia precisa dun novo modelo de financiamento que atenda de forma axeitada as peculiaridades na Comunidade galega e o sobrecusto que supoñen envellecemento e dispersión á hora de prestar servizos básicos”. Así, lembrou que “este infrafinanciamento de Galicia vén causado por un sistema inxusto e ineficiente, que ten a súa orixe nunha negociación bilateral entre o Goberno de Zapatero e o seu socio de goberno en Cataluña: ERC”.

“Aquel acordo non contou co apoio do PP nin coa aquiescencia da Xunta, ata o punto que fomos ameazados, xunto con outras comunidades autónomas rebeldes, con seguir recibindo o previsto no anterior sistema, comparativamente, aínda máis lesivo”, recordou.

O portavoz popular criticou que, “15 anos despois, os mesmos actores tentan convencernos das bondades dunha negociación bilateral con Cataluña cos mesmos argumentos maniqueos que nos condenaron á inxusta situación actual”. Pero, subliñou que “hoxe en España non se está a negociar un novo modelo de financiamento, senón un pacto de investidura que leve ao señor Illa á Presidencia da Generalitat, aínda que sexa a costa dos demais territorios do Estado”.

O portavoz de Industria do Grupo Popular, Rubén Lorenzo, afirmou hoxe no Pleno do Parlamento galego que a proposición de Lei do BNG para a creación dunha empresa pública de enerxía renovable en Galicia “é unha chapuza porque na súa maior parte é unha norma en branco, baleira de contido e con simples remisións á normativa de aplicación”.

“No BNG son especialistas en discursos simplistas, facendo ver á cidadanía que todo se arranxa co soberanismo independentista e o autogoberno, indo a contracorrente nun mundo que cada vez máis debe ser pensado dun xeito global”, sinalou Rubén Lorenzo.

En concreto, cuestionou aos nacionalistas “como pretenden poder optar a participar ou desenvolver proxectos enerxéticos propoñendo que o capital social da empresa pública sexa de 50.000 euros”. Neste sentido, lembrou que a participación da Xunta na sociedade mercantil Recursos de Galicia, que ten 15 millóns de euros de capital social, é do 30 por cento actualmente, e ten unha capacidade de financiar proxectos mediante pancas financeiras cun importante investimento.

APROVEITAMENTO DOS RECURSOS NATURAIS

En canto ao obxecto e finalidade da suposta empresa pública de enerxía, Rubén Lorenzo indicou que “son obxectivos aliñados co que promove a futura Lei de promoción dos beneficios sociais e económicos dos proxectos que utilizan os recursos naturais de Galicia”, polo que considerou “contraditorio criticar este proxecto de lei e inmediatamente despois defender unha empresa que persegue o mesmo fin”.

“Non imos pechar a porta da participación nos proxectos de aproveitamento dos recursos naturais aos grandes empresarios de Galicia, nin ás pemes, nin aos pequenos investidores, nin aos mariñeiros, nin ás comunidades de montes, nin ás agrupacións veciñais, entre outros moitos “, sinalou.

O portavoz do Grupo Popular, Alberto Pazos, asegurou hoxe no Pleno do Parlamento galego que o proxecto de Lei de promoción dos beneficios sociais e económicos dos proxectos que utilizan os recursos naturais de Galicia, que continuará a súa tramitación parlamentaria logo de superar as emendas á totalidade presentadas por BNG e PSdeG, “plantexa un novo e mellor modelo de participación social nos beneficios que pode xerar un aproveitamento sostible, racional e ordenado dos recursos naturais do país”.

Alberto Pazos apuntou que este novo texto lexislativo “contempla beneficios relacionados coa cohesión social e territorial, coa mellora da calidade de vida da poboación, coa neutralidade climática, co mantemento e a creación de emprego, co desenvolvemento da economía local, coa redución do prezo da enerxía para consumidores e industrias locais, ou coa recuperación de zonas afectadas por incendios forestais, entre outros”.

“O texto senta as bases dun novo mercado voluntario de créditos de carbono, pioneiro en España, que permite a monetización das boas prácticas medioambientais e que democratiza estes beneficios para que alcancen a comunidades de montes ou aos nosos agricultores e gandeiros”, sinalou.

Na súa intervención, Pazos agradeceu “o traballo e a xenerosidade das máis de 70 organizacións de todo tipo que participaron, dunha ou doutra maneira, na elaboración desta normativa, que a enriqueceron coa incorporación de 67 alegacións ou permitindo a clarificación de conceptos ou interpretacións”. Entre as entidades que participaron na elaboración deste proxecto lexislativo, citou as tres universidades galegas, a Fegamp, os sindicatos, distintas asociacións de ámbito forestal ou os seis colexios galegos de enxeñeiros.

Respecto do Consello Económico e Social, o portavoz popular subliñou que “emitiu un informe positivo aprobado por 30 votos a favor e 5 abstencións, un documento que superou o prazo previsto para a súa emisión pero que a Xunta esperou na súa vontade de transparencia na tramitación deste proxecto lexislativo”.

ENFOQUE ERRADO

Sobre as emendas á totalidade presentadas por BNG e PSdeG, Alberto Pazos manifestou que parten dun “enfoque errado, no que o partidismo prima sobre o interese do país e o curtoplacismo prevalece sobre a visión de futuro que debería guiar calquera actividade lexislativa”. “Estas emendas son unha mixtura de arcaicos tópicos e de burdas manipulacións, e nalgún caso dun preocupante descoñecemento da lexislación vixente e, incluso, dos principios básicos de calquera democracia”, apuntou.

O portavoz popular afirmou que “xa perdemos a conta dos proxectos lexislativos que mereceron os calificativos de espoliador e depredador” por parte do BNG, “pero o problema da súa crítica permanente é que ninguén sabe cal é esa suposta alternativa que levan pregoando décadas”. “Están en contra da enerxía nuclear, das centrais hidroeléctricas, das térmicas, das de ciclo combinado, das instalacións fotovoltaicas, da eólica mariña e, por suposto, de todas e cada unha das estruturas eólicas do noso pais, agás das que se instalaron durante o seu goberno; e tamén están pola eliminación dos combustible fósiles, pero o certo é que traballan para eliminar calquera alternativa que lles poida facer competencia”, explicou.

Para rematar, Alberto Pazos asegurou que esta nova lei “non reduce nin unha soa esixencia para a instalación de calquera industria en Galicia” e engadiu que “ningún proxecto se instalará en Galicia se non cumpre as condicións medioambientais, e ningún proxecto será aprobado sen un informe socioeconómico favorable”. “Ningún deses informes prevalece sobre o outro e, polo tanto, establécese unha dobre esixencia e, consecuentemente, unha dobre garantía”, concretou.

O portavoz do Grupo Popular, Alberto Pazos, anunciou hoxe a creación, a proposta dos catro grupos parlamentarios existentes no Parlamento galego, dunha Comisión non permanente especial de estudo sobre a posible modificación da letra do himno de Galicia. “Debemos estar dispostos a estudar calquera nova evidencia científica que sirva de apoio e de axuda nesta cuestión; a realizar unha análise pausada e reflexiva sobre a posible modificación e o que isto conlevaría; e, sobre todo, que exista un amplo consenso social, xa que estamos a falar dun símbolo que é patrimonio de todos os galegos e que nos representa por todo o mundo”, manifestou.

Alberto Pazos considerou “importante” que a constitución desta Comisión estea avaliada por todos os grupos parlamentarios, “xa que estamos a falar da modificación dun dos nosos símbolos representativos de Galicia”. Neste sentido, incidiu que “estamos abertos a estudar a posibilidade de modificar a letra do noso himno, pero sempre que sexa desde a unanimidade deste Parlamento galego, sen enfrontamentos, e contando, por suposto, coas aportacións de documentación e comparecencias de todas aquelas institucións e expertos que sexan de interese e teñan algo que dicir sobre esta cuestión”.

O portavoz popular explicou que, a partir do rexistro desta solicitude de creación da Comisión de estudo sobre a posible modificación da letra do himno de Galicia, abrirase un prazo para a propia constitución da Comisión, que Alberto Pazos afirmou que será no menor espazo de tempo posible e incluso antes de que remate o actual período de sesións. A continuación, procederase á aprobación das súas normas de funcionamento e do correspondente plan de traballo.

O portavoz do Grupo Popular, Alberto Pazos, reclamou hoxe ao Goberno central a realización dun estudo, serio e minucioso, sobre o custo que suporía o rescate e a gratuidade da AP-9, co fin de valorar a posibilidade de asumir desde a administración a xestión desta autoestrada, do mesmo xeito que o Goberno de Pedro Sánchez ten feito coas radiais de Madrid”.

Alberto Pazos afirmou que “foi unha honra representar ao Grupo Popular e ao Parlamento de Galicia o pasado martes no Congreso no Debate para a toma en consideración da proposición de lei para a transferencia da AP-9 a Galicia”. Unha iniciativa parlamentaria que saíu adiante co voto favorable de todos os deputados da Cámara Baixa, a excepción dos representantes de VOX, “unha magnífica noticia para os galegos e para Galicia, e que agardamos axude a axilizar a tramitación desta iniciativa e que, máis pronto que tarde, a AP-9 poida ser xestionada desde Galicia”.

INCONGRUENCIA SOCIALISTA

Porén, amosou a súa “desconfianza en que esta transferencia sexa unha realidade a curto prazo, tendo presente as declaracións realizadas polo ministro de Transportes, cando asegurou que esta autoestrada é ‘unha clara candidata a ser de titularidade estatal porque ofrece unha conexión transfronteiriza’, unha afirmación rotundamente falsa xa que a AP-9 discorre integramente por territorio galego e remata antes da fronteira con Portugal; e cuantificou o rescate da AP-9 en 4.000 millóns de euros, unha cifra que hoxe mesmo incrementou ata os 6.000 millóns pero que descoñecemos de onde sae nin en función de que está cuantificada”.

O portavoz popular tamén considerou “indignante a incongruencia que están a amosar os socialistas galegos respecto da liberación das cuantiosas peaxes” que ten a AP-9. Neste sentido, lembrou o compromiso de liberar as peaxes desta autoestrada anunciado polo candidato socialista á Presidencia da Xunta nas pasadas eleccións autonómicas, asunto sobre o “que agora parece que non fala tan alto e contundente, senón máis ben coa boca pequena”.

Neste sentido, Pazos lamentou que o portavoz socialista eludira esta semana no Pleno solicitar ao Goberno central a gratuidade total da AP-9, ao tempo que criticou a abstención dos deputados socialistas á moción aprobada onte no Congreso que pide a supresión das peaxes. “Unha iniciativa parlamentaria co mesmo texto que se aprobou no Parlamento galego o pasado mes de maio co voto favorable dos deputados socialistas”, lembrou.

“Deixen de considerar parvos aos galegos falando de ‘proceso para abaratar as peaxes’, porque o que realmente nos importa a todos os usuarios da AP-9 é circular de balde pola mesma e deixar de pagar unhas peaxes desorbitadas e por enriba de calquera que se pagan nas autoestradas españolas”, rematou .

O Parlamento de Galicia aprobou hoxe a proposición non de lei do Grupo Popular a través da que se solicita á Sociedade de Xestión de Activos Procedentes da Reestruturación Bancaria (Sareb) a inclusión de Galicia no Programa Viena para a construción de vivenda en alugueiro, ao tempo que as vivendas propiedade desta sociedade en Galicia se destinen a usos sociais coa súa cesión gratuíta á Xunta de Galicia, que deberán integrar as vivendas cedidas no parque público de vivenda en alugueiro que xestiona o IGVS. Neste sentido, cederanse á Xunta as vivendas que se atopen en condicións adecuadas para o seu uso ou que precisen pequenas reparacións e non se atopen en ningún tipo de situación legal que impida o seu alugueiro unha vez cedidas.

A deputada popular María Deza lembrou que “o Goberno de Pedro Sánchez anunciou o mes de abril do pasado ano un plan para mobilizar 50.000 vivendas da Sareb para alugar a prezos accesibles, entre as que se contan as vivendas que supostamente se construirán dentro do Proxecto Viena”.

10 AUTONOMÍAS, PERO GALICIA FÓRA

O obxectivo do Proxecto Viena é construír en varias fases ata 15.000 vivendas en colaboración público-privada, que serían destinadas ó alugueiro accesible. Nunha primeira fase, executaríanse un total de 3.500 vivendas, cunha inversión privada de, aproximadamente, 400 millóns en 10 autonomías, entre as que non se atopa Galicia.

María Deza lamentou “o continuo baile de cifras respecto dos bens xa construídos que a SAREB dispón en Galicia, incapaz de poñer unha cifra certa ás vivendas que supostamente ía poñer á disposición de comunidades e concellos”. Así, lembrou que “inicialmente anunciara que había 479 vivendas en Galicia en condicións de uso, cifra que despois rebaixou a unhas 300 e, finalmente, a tan só 187”.

“Realmente, e segundo do datos publicados na súa propia web, a Sareb dispón de 1.936 vivendas en Galicia, pero aínda non sabemos cantas desas vivendas están en disposición de ser habitadas, a pesar das reiteradas peticións realizadas”, concretou.

O Parlamento de Galicia aprobou hoxe a proposición non de lei do Grupo Popular, co voto en contra do BNG, a través da que se reitera a máxima condena á invasión rusa de Ucraína e se amosa o máis firme apoio ao seu pobo, así como esixir o cesamento inmediato desta agresión bélica, a retirada de todos os medios militares rusos sobre o terreo e o restablecemento das fronteiras e da integridade territorial deste país europeo.

Mentres non se dean estas condicións, a iniciativa parlamentaria avoga por apoiar as actuacións dos aliados da Unión Europea e da OTAN, para poñer fin ao conflito e restituír a orde internacional baseada no dereito e en regras que foron vulneradas unilateralmente por Rusia, á vez que cómpre intensificar os esforzos diplomáticos encamiñados a lograr o fin da agresión rusa. Por último, ínstase á Xunta a manifestar a súa disposición de colaborar nunha resposta humanitaria coordinada co Goberno de España, a quen se lle pide que incremente os esforzos de apoio a Ucraína en todos os ámbitos no marco da Unión Europea e dos acordos establecidos polo Consello Europeo e a OTAN.

O portavoz popular, Alberto Pazos, manifestou que “a salvaxe vulneración do dereito internacional por parte de Rusia merecía unha resposta contundente por parte dos organismos internacionais, e nomeadamente por parte da Unión Europea”. “Nesta ocasión, Europa respondeu con toda claridade, posicionándose sen matices do lado do agredido e condenando coa máxima contundencia ao agresor”, indicou.

“O Partido Popular respaldou plenamente o compromiso adquirido por España no seu apoio a Ucraína, aínda que nos tivera gustado que ese acordo fose explicado, debatido e respaldado no Congreso”, sinalou Alberto Pazos, quen lamentou que o Goberno de Pedro Sánchez “parece ter renunciado a que a política internacional sexa unha materia de consenso para convertela nun instrumento de confrontación”.

O portavoz popular considerou que “os motivos para eludir ese control parlamentario resultan evidentes: a vergoñenta actitude dalgúns dos socios de goberno de Pedro Sánchez, claramente posicionados do lado de Putin, ben sexa por coincidencias ideolóxicas ou ben por intereses espurios que os levan a evitar calquera crítica ao oligarca ruso”.

Así, criticou “a negativa do nacionalismo radical, neste caso representado no BNG, a respaldar calquera condena á invasión e empeñado en respaldar ao máis granado dos sátrapas internacionais”.

O Parlamento de Galicia aprobou hoxe a proposición non de lei do Grupo Popular, co voto en contra de BNG e PSdeG, a través da que se insta á Xunta de Galicia a continuar impulsando un ecosistema de apoio ao emprendemento no que están implicados todos os axentes, entidades, redes e recursos dispoñibles para o inicio dunha nova actividade empresarial. Así mesmo, pídese que se impulsen os Polos de Emprendemento como canalizadores do relevo xeracional e como instrumento de asesoramento de emigrantes que queiran iniciarse por conta propia, ademais de poñer en funcionamento aqueles polos que se atopan inactivos.

A deputada popular Noelia Pérez manifestou que “Galicia está chea de talento e oportunidades que demandan un ecosistema de apoio que lles axude a impulsar e consolidar os seus proxectos con acompañamento e asesoramento continuo e cunha titorización con profesionais de primeiro nivel”.

“Ese é o obxectivo dos polos de emprendemento: un enfoque innovador, con persoal especializado, co obxectivo de promover actividades económicas ligadas aos territorios, identificación de proxectos empresariais diferenciados e colaboración con axentes doutras áreas territoriais”, concretou.

Noelia Pérez explicou que a rede de polos de emprendemento e apoio ao emprego está integrada na actualidade por 13 centros, que, en pouco máis de ano e medio de vida, xa prestaron asesoramento a cerca de 2.000 proxectos. “Esta intensa actividade é a que nos motiva para solicitar ao Goberno galego que siga impulsando un ecosistema de apoio ao emprendemento coa posta en marcha dos centros que a día de hoxe están inactivos e dándolle especial importancia dentro deles ao relevo xeracional”, sinalou.