Categoría: Parlamento de Galicia

O Parlamento de Galicia aprobou hoxe a proposición non de lei do Grupo Popular, que non contou co apoio de BNG nin de PSdeG, a través da que se solicita ao Goberno central que impulse unha nova Lei do Patrimonio Cultural para modernizar e refundir a lexislación vixente en materia de patrimonio, en colaboración coa Comunidade galega, os concellos e as demais institucións públicas e privadas do sector.

O deputado popular José Luís Ferro lembrou que “o Goberno de Pedro Sánchez  presentou en 2021 un anteproxecto da nova Lei de patrimonio cultural, da que o Goberno galego se posicionou en contra por varios motivos: invadía as competencias das comunidades autónomas, trataba de recuperar para o Estado funcións que non é capaz de facer no día a dia, e impoñía ríxidos trámites burocráticos que dificultan a xestión do patrimonio e empeoran a atención á cidadanía”.

Porén, criticou que “este Goberno de España non foi capaz de sacar adiante esta norma, que incluía medidas que restaba eficacia e eficiencia á xestión dos poderes públicos en materia de patrimonio cultural, e que claramente invadía competencias autonómicas retrotraéndose a un proceso centralizador xa superado pola madurez das competencias das autonomías”.

RESPOSTAS E SEGURIDADE

“Galicia e as entidades que teñen incidencia sobre o patrimonio precisan respostas e seguridade, porque non podemos estar pendentes dos cambios de opinión de última hora dun Goberno de España que amosa, día si e día tamén, pouca capacidade de acción para as cousas importantes e moita celeridade cando se trata de manterse no poder a costa do que sexa”, afirmou.

Ferro demandou que o Goberno de Pedro Sánchez “reinicie as tarefas que deixou a medias e que se leve a cabo un debate con todos os actores públicos e privados que protexen e promoven o coñecemento do patrimonio cultural”, porque indicou que “a redacción do anteproxecto resulta hoxe moi xenérica e débese adaptar ao moito que se evolucionou e se innovou, incluíndo asuntos que hai 40 anos non existían”.

“A creación dunha nova Lei estatal de patrimonio cultural outorgaría a Galicia seguridade no exercicio das súas competencias”, indicou o deputado popular, quen anotou que “necesitamos unha lei sinxela e unificadora, que non adultere a cultura, pois a protección e promoción da nosa cultura debe ser o prioritario”.

O deputado do Grupo Popular Roberto Rodríguez afirmou hoxe no Parlamento de Galicia que a Xunta completará nas vindeiras semanas o informe de avaliación do estado dos murais de Urbano Lugrís na rúa Olmos e que determinará o custo que suporía a súa retirada e traslado a outro espazo na cidade de A Coruña que reúna as condicións adecuadas para a súa conservación. Porén, criticou “o desleixo do Goberno socialista de A Coruña, apoiado polo BNG, que non foi quen de facer unha aposta, nin económica nin política, por un proxecto cultural para a cidade ou pola protección da obra de Urbano Lugrís”.

Roberto Rodríguez lembrou que a Xunta, exercendo o seu dereito de tanteo, adquiriu por 36.000 euros os murais de Urbano Lugrís existentes en dúas casas unidas na rúa Olmos de A Coruña, unha vez que incoou o procedemento para declarar ben de interese cultural, na categoría de monumento, estas obras. “Fronte á actitude da alcaldesa, que deixou claro que o Concello non compraría os murais, o Goberno galego actuou con rapidez para salvagardar unhas obras tan importantes e sumalas ao patrimonio público de Galicia”, apuntou.

HIPOCRISÍA DO BNG

“O Goberno municipal de A Coruña, que o BNG apoia incondicionalmente, non fixo absolutamente nada nin para protexer os murais de Urbano Lugrís nin para que estas obras quedaran na cidade”, incidiu o deputado popular. Neste sentido, criticou que, logo de que a alcaldesa anunciara en abril de 2023 que se ía solicitar a tramitación da declaración destes murais como BIC, “tardaron once meses e só remitiron a solicitude ao día seguinte que a Xunta anunciou o seu interese por estas obras”.

Ademais, Roberto Rodríguez asegurou que “os murais quedarán en A Coruña pola aposta seria e decidida da Xunta, porque se fora polo interese e a dilixencia dos responsables municipais xa estarían hoxe nunha galería privada de Vigo, a pesar de que no seu programa electoral se comprometeron literalmente a recuperar os murais da rúa Olmos e crear en Fornos o Espazo Urbano Lugrís”. Agora, afirmou que o informe de avaliación sobre os murais “será unha boa base para sentar a conversar e tender pontes entre administracións para buscar a mellor solución”.

Para rematar, o deputado popular criticou a “hipocrisía do BNG ao traer hoxe ao Parlamento galego a súa preocupación polos murais de Lugrís en A Coruña, pedindo a outros o que non son quen de esixirlle que cumpra a alcaldesa, pese a facela e mantela no seu posto”.

O Parlamento de Galicia aprobou hoxe, sen o apoio dos deputados de BNG e PSdeG, a proposición non de lei do Grupo Popular a través da que se solicita ao Goberno de España que realice, de maneira urxente e inmediata, as actuacións necesarias para asegurar a subministración eléctrica a todos os proxectos industriais estratéxicos previstos na Comunidade galega, e garantir a evacuación de enerxía derivada do aumento da xeración renovable no sistema eléctrico. Así mesmo, pídese que colabore estreitamente coas comunidades autónomas e dea resposta ás súas necesidades no deseño da nova planificación eléctrica con horizonte 2030, co obxectivo de garantir o desenvolvemento enerxético e industrial de Galicia.

O portavoz popular de Industria, Rubén Lorenzo, manifestou que “a planificación eléctrica deberíase de configurar como un instrumento normativo que establece os desenvolvementos necesarios da rede de transporte de electricidade para que a subministración en España siga sendo segura, de alta calidade e cada vez máis renovable”. Deste xeito, afirmou que “débese facer unha planificación dimensionada e preparar a rede de transporte para que, ademais de atender a demanda actual, sexa capaz de dar resposta a novos consumos e facilite a transición ecolóxica”.

APAGÓN ELÉCTRICO E INFORMATIVO

Lorenzo cualificou de “surrealista e incomprensible que no 2025 esteamos falando de que se dea unha situación de cero enerxético en España” como a que aconteceu onte, na que “moito máis grave que o apagón eléctrico sufrido durante moitas horas, foi o apagón informativo ao que nos someteu o Goberno central”. Neste sentido, puxo en valor “o civismo dos españois, porque gracias a el non estamos falando de situacións preocupantes no país”.

“Pedro Sánchez non pode falar de rede eléctrica como se fose unha empresa privada máis, porque todos sabemos que Redeia é un organismo público”, manifestou o portavoz popular, quen cuestionou “onde está a presidenta de Rede Eléctrica Española, unha señora que era ministra co señor Zapatero e que está desaparecida para a cidadanía e para as empresas”.

O Grupo Popular demandará no Pleno ordinario que se celebra a vindeira semana o apoio do Parlamento galego á rebaixa do nivel de protección do lobo e que o Goberno central apoie ás comunidades autónomas no desenvolvemento das accións oportunas e necesarias para a xestión desta especie e a defensa dos intereses dos gandeiros. Asemade, pedirá que a tramitación do proxecto da mina de Doade en Ourense, seleccionada como un dos sete proxectos en España para o procesado e reciclado de materias primas estratéxicas na Unión Europea, se leve a cabo consonte á normativa actual e sen ningún menoscabo ambiental, de tal xeito que so poida ser aprobado se cumpre toda a lexislación vixente, especialmente a medioambiental.

Ao remate da Xunta de Portavoces, o portavoz popular, Alberto Pazos, lamentou “os dous apagóns que sufrimos onte todos os españois: o eléctrico e o informativo por parte do Goberno central”. Neste sentido, agradeceu o traballo desenvolvido polos profesionais de todas as administracións públicas, de xeito especial o realizado pola Xunta de Galicia, “que traballaron nunha situación complicada para mitigar os efectos que podía ter na cidadanía a falta de enerxía eléctrica”.

“Nos congratula que a gran maioría dos galegos poida gozar neste momento do normal subministro eléctrico” afirmou Pazos, quen demandou explicacións sobre o acontecido ao Goberno central “porque é un problema que afectou ao conxunto do Estado”. “Non sei que debe pasar en España para que se declare unha emerxencia nacional”, indicou.

Respecto da orde do día da sesión plenaria, o portavoz popular informou que terá lugar a comparecencia de dous conselleiros: o de Cultura, Lingua de Xuventude, para dar conta dos proxectos a curto e medio prazo que afronta este departamento; e o do Mar, para informar sobre a comercialización dos produtos pesqueiros ante as negociacións do acordo de libre comercio da Unión Europea con Tailandia.

APOIO Á REBAIXA DA PROTECCIÓN DO LOBO

Dentro do apartado de proposicións non de lei, o Grupo Popular pretende que o Parlamento de Galicia manifeste o seu apoio á rebaixa do nivel de protección do lobo, restablecendo o equilibrio entre a necesaria preservación desta especie e as actividades gandeiras desenvolvidas no rural; ao tempo que se pide ao Goberno central que apoie ás comunidades autónomas no desenvolvemento das accións oportunas e necesarias para a xestión do lobo e a defensa dos intereses dos gandeiros.

Alberto Pazos lembrou que o Congreso acordou rebaixar a protección desta especie ao norte do río Douro, “o que supón unha corrección á errada decisión do Goberno de España de incluír en 2021 o lobo no listado de especies silvestres en réxime de protección especial, adoptada de xeito unilateral, sen consultar coas comunidades autónomas afectadas, e sen ningún tipo de aval científico”.

“Esta decisión do Goberno de Pedro Sánchez privou ás comunidades autónomas de adoptar medidas de control sobre o lobo, o que dificultou a súa convivencia co sector gandeiro e derivou en perdas considerables aos propietarios polos ataques aos seus animais”, lembrou. Unha mostra desta preocupante situación foi que os avisos por danos provocados polo lobo se incrementaron cerca dun 77 por cento, ao tempo que as reses afectadas por ataques desta especie aumentaron nun 57 por cento, cunha media de dez animais atacados cada día.

IMPULSO Á ACTIVIDADE INDUSTRIAL

A segunda das proposicións non de lei que defenderá o Grupo Popular ten que ver co impulso da actividade industrial en Galicia, en concreto a raíz da selección por parte da Comisión Europea da explotación da mina de litio de Doade en Ourense como un dos sete proxectos estratéxicos en España. “Esta decisión permitirá a esta explotación mineira dispor dun mellor financiamento europeo e nacional, así como contar cunha maior axilidade á hora de obter permisos para reducir a dependencia da Unión Europea de materiais estratéxicos procedentes doutras áreas do mundo”, explicou o portavoz popular.

Deste xeito, desde o Grupo Popular pedirase que se recoñeza a importancia das materias primas fundamentais e das materias primas estratéxicas para reforzar a autonomía estratéxica e reducir a dependencia exterior. Para iso, solicitarase no Pleno que a tramitación do proxecto da mina de Doade se leve adiante co máximo respecto á normativa actual, incluídas as esixencias do Regulamento Europeo de materias críticas, e, por suposto, sen ningún menoscabo medioambiental, e que non exista un posicionamento a favor ou en contra do proxecto da mina de Doade en tanto non haxa un pronunciamento dos técnicos competentes na materia.

Por último, dentro do apartado de preguntas ao Goberno galego, o Grupo Popular interesarase pola sociedade Vivenda Pública de Galicia e de que xeito está a contribuír na promoción de vivenda pública, con destino á venda ou alugueiro, desde a súa creación en novembro de 2024. Asemade, solicítase unha valoración sobre o proceso de gobernanza realizado polo Goberno de Pedro Sánchez na planificación e execución dos recursos recollidos no Plan de Recuperación, Transformación e Resiliencia de España e pedirase información sobre os datos definitivos das listas de espera sanitarias correspondentes ao pasado ano 2024.

Os deputados do Grupo Popular Noelia Pérez e Argimiro Marnotes visitaron hoxe, en compañía da alcaldesa de San Cibrao das Viñas, Marta Nóvoa, as obras de construción do novo Centro de Excelencia en Ciberseguridade de Galicia que a Xunta está a realizar na parcela 3E da Tecnópole e demandaron que o Goberno de España localice neste espazo o futuro Centro Nacional de Ciberseguridade, tendo en conta a existencia na Comunidade galega dun sólido ecosistema empresarial e de formación e investigación nesta materia.

Noelia Pérez e Argimiro Marnotes lembraron que o futuro Centro que se está a levantar no polígono industrial de San Cibrao acollerá os sistemas de monitorización e xestión da ciberseguridade en Galicia, en coordinación co Centro Criptolóxico Nacional e co Institito Nacional de Ciberseguridade.

REFERENTE NACIONAL E INTERNACIONAL

“Queremos que Ourense se converta non só na capital galega da ciberseguridade, concentrando aquí os recursos a disposición da Xunta, dos concellos, das deputacións, das universidades, dos centros tecnolóxicos e de innovación, e do sector privado que presta estes servizos, senón que o Goberno central recoñeza o bo traballo que se leva a cabo e se decida tamén por Ourense como a sede do futuro Centro Nacional de Ciberseguridade”, sinalaron.

Os deputados populares lembraron que esta demanda é unha das resolucións aprobadas onte no Debate sobre Política Xeral celebrado esta semana no Parlamento de Galicia, unha proposta que saíu adiante co voto favorable de todos os grupos parlamentarios.

“A localización do futuro Centro Estatal de Ciberseguridade en Ourense situaría á nosa provincia como un referente neste ámbito non só a nivel nacional, senón tamén internacional, contribuíndo a un desenvolvemento máis equilibrado do país, á cohesión territorial e á redución da brecha dixital entre as rexións”, afirmaron.

As deputadas do Grupo Popular Felisa Rodríguez e María Deza, acompañadas da alcaldesa de Ponteareas, Nava Castro, salientaron hoxe a importancia das axudas da Xunta de Galicia para a modernización e rehabilitación das prazas de abastos galegas. Neste sentido, puxeron de exemplo a transformación que se levará a cabo na nave de Aceros del Tea en Ponteareas, un espazo no que se investirán cerca de 800.000 euros para convertelo na nova praza de abastos desta localidade pontevedresa.

Felisa Rodríguez e María Deza visitaron esta mañá a praza de abastos de Ponteareas para comprobar a situación na que desenvolven neste momento o seu traballo os praceiros e realizan as súas compras os consumidores. “As condicións cambiarán totalmente unha vez rematen as obras de rehabilitación e modernización da nave de Aceros del Tea, un espazo máis accesible e eficiente que albergará o novo mercado municipal e ofrecerá novas opcións gastronómicas e de restauración, ao tempo que porá en valor os produtos frescos e impulsará o comercio de proximidade”, manifestaron, para apuntar que “o obxectivo é conseguir que sexa declarado como Mercado de Excelencia”.

PEIXE E MARISCO MÁIS ASEQUIBLE

A Xunta de Galicia pon a disposición dos concellos unha liña de axudas destinadas a reforzar os mercados e prazas de abastos como motor económico local, fomentando o comercio de proximidade e dinamizando a actividade social e comercial dos municipios. Esta liña de axudas forma parte do Plan Estratéxico do Comercio de Galicia 2025-2030, en cuxa elaboración participaron máis de 300 representantes e expertos do sector do comercio galego.

As deputadas populares aproveitaron a súa visita á praza de abastos de Ponteareas para informar a praceiros e clientes da próxima implantación en Galicia do Bono Peixe, anunciado polo Presidente Rueda no Debate sobre Política Xeral celebrado esta semana no Parlamento galego.

Este bono consiste nunha axuda de 50 euros por persoa para estimular o consumo de peixe e marisco fresco por parte dos galegos. “En total, a Xunta investirá 2,5 millóns de euros para facer máis asequible e ao alcance de todos os petos estes produtos, mentres o Goberno central non adopta a redución do IVE que todo o sector lle está a pedir”, concretaron.

Os deputados do Grupo Popular Gonzalo Trenor, Magdalena Pérez e Miguel Fidalgo lamentaron hoxe a incompetencia do Concello de Pobra do Caramiñal e da Demarcación de Costas do Estado por dar unha solución adecuada aos vertidos por hidrocarburos que se están a producir na zona da Ribeiriña, que obrigaron ao peche de varios bancos marisqueiros.

Nunha visita á zona acompañados do portavoz local do PPdeG, Manuel Durán, os deputados populares consideraron “incomprensible como o Concello de Pobra permitiu facer esta obra nas vellas instalacións de La Onza de Oro sen unha descontaminación do solo e que provoca agora estas consecuencias”.

DILIXENCIA DA XUNTA PARA ACTUAR DE INMEDIATO

“A suposta rexeneración da zona converteuse nun pesadelo, xa que ao eliminar parte do recheo sen descontaminar está a provocar agora que as filtracións cheguen directamente ao mar”, criticaron.

Ademais, Gonzalo Trenor, Magdalena Pérez e Miguel Fidalgo amosaron a súa preocupación pola situación de “abandono total das instalacións da antiga fábrica de HADASA, sen que ata o momento os responsables municipais teñan dado resposta ao requirimento feito pola Xunta para coñecer as medidas que ten previsto levar adiante para mitigar os riscos medioambientais e protexer a salubridade pública dos veciños”.

Os deputados populares destacaron “a dilixencia coa que actuou, desde o momento no que se notificaron os vertidos, a Xunta de Galicia, activando o plan de continxencias por contaminación mariña accidental e desprazando á zona da Ribeiriña a efectivos do Servizo de Gardacostas de Galicia para abordar o problema e que causara os menores danos posibles”.

“O único que busca o cuatripartito de esquerdas que malgoberna A Pobra do Caramiñal é ocultar o abandono no que teñen sumida esta privilexiada zona da costa deste concello, intentando tapar a súa lamentable xestión con acusacións sen sentido á Xunta, cando a verdade é que a Administración galega é a única que non ten competencia algunha para solucionar este problema e o único que fixo foi poñer en marcha medidas para evitar males maiores”, manifestaron.

Os deputados do Grupo Popular Raquel Arias e José Manuel Mato destacaron hoxe en Paradela que máis de 320 autónomos da provincia de Lugo xa se beneficiaron este ano das axudas da Xunta á promoción do emprego.

Nunha visita á Lavandería Lavar e Lecer aberta no polígono industrial de Paradela, Raquel Arias e José Manuel Mato indicaron que este establecemento ten solicitado este ano as axudas da Xunta para a promoción do emprego autónomo, co obxectivo de mellorar a atención ao seus clientes, principalmente establecementos turísticos da comarca de Sarria. Estas subvencións da Administración galega xa beneficiaron durante 2024 a sete autónomos deste concello lucense, que se repartiron case 35.000 euros.

A nivel provincial, e tamén durante o pasado ano, estas axudas da Xunta chegaron a 1.949 autónomos, entre os que se repartiron máis de cinco millóns de euros. Polo que respecta ao presente 2025, xa se concederon máis de 300 axudas, por un importe total superior aos seis millóns de euros.

FACER FRONTE AOS PRIMEIROS GASTOS

Os deputados populares lembran que estas axudas están dirixidas a aquelas persoas desempregadas que inicien a súa actividade empresarial ou profesional como traballadoras autónomas por conta propia, co obxectivo de facer fronte aos gastos xerados no comezo da súa actividade laboral.

En concreto, os interesados poden optar por dos tipos de axuda: unha primeira, para o inicio da actividade económica e o mantemento do emprego como persoa traballadora autónoma e unha segunda opción equivalente a 12 meses da cota reducida á Seguridade Social por continxencias comúns e profesionais.

As solicitantes deben atoparse en alta no imposto de actividades económicas e ter iniciada a actividade con anterioridade á data de solicitude de subvención, ter domicilio fiscal en Galicia e desenvolver a actividade empresarial ou profesional na Comunidade galega.

O Pleno do Parlamento de Galicia pecho hoxe o Debate sobre Política Xeral coa aprobación de 53 resolucións, das que sete saíron adiante por unanimidade.

A viceportavoz popular, Paula Prado, asegurou na súa intervención nesta última xornada que “todo se reduciu a dous modelos: a Galicia que goberna con sentidiño, con esixencia, con rigor, con estabilidade e con identidade propia que o noso grupo parlamentario e o Goberno que apoia ofrecemos aos galegos; e a Galicia que bloquea con ruído, con división, con confrontación e con visións cortoplacistas que os partidos da oposición pretenden impoñernos”.

A modo de balance do traballo feito ao longo deste primeiro ano de lexislatura, Paula Prado salientou que “podemos dicir que Galicia goberna, cunha sanidade pública gratuíta, universal e referente en Europa; co sistema educativo máis igualitario de España; con medidas para facer fronte ao reto do acceso á vivenda; con políticas que non deixan a ninguén atrás e coidan de todos os galegos; e consolidando os nosos sectores produtivos nos postos de liderado nacional en termos de produción e exportación”.

MÁIS FALAR COS GALEGOS

Neste sentido, pediu aos grupos da oposición “menos consultar o arquivo histórico do NO-DO e máis falar cos galegos, coas familias dos estudantes que se aforraron cartos coa matrícula universitaria; coas persoas que coidan aos dependentes; cos máis de 5.600 mozos e mozas que se beneficiaron das axudas de acceso á vivenda ou con todos aqueles galegos que viven en vivendas públicas ou reciben o bono alugueiro; ou as persoas enfermas de cancro ás que os cribados do Sergas lles permitiron un diagnóstico precoz da enfermidade, ou que saben que Galicia vai ser a primeira comunidade en contar cun centro público de protonterapia”.

Paula Prado criticou que a oposición “perdera hoxe unha oportunidade de rectificar o seu negacionismo industrial ao votar en contra das resolucións do Grupo Popular para que favorecer políticas dirixidas ao impulso industrial, sempre que cumpran a normativa ambiental vixente, ou que se transfira ás comunidades autónomas a xestión directa dos fondos europeos de recuperación, en particular os relacionados co ámbito industrial”.

“En definitiva, ao longo destes tres días falamos do futuro de Galicia e da Galicia do futuro: de esa terra que hoxe construímos co fin de legarlla ás vindeiras xeracións”, manifestou a viceportavoz popular, quen incidiu que desde o PPdeG “sempre diremos si a esa Galicia en grande da que falaba o Presidente Rueda: con realismo, con optimismo, con confianza e sen medo a demostrar que xuntos temos máis camiños para facelos ben”.

39 DO GRUPO POPULAR, 5 DO GRUPO MIXTO E 9 TRANSACCIONADAS

O Debate sobre Política Xeral pechouse esta mañá coa aprobación de 53 resolucións: 39 das presentadas polo Grupo Popular, 5 do Grupo Mixto, 2 transaccionadas entre o Grupo Popular e o Grupo Socialista (sobre a posta en marcha dun novo Plan de saúde mental e a redefinición do programa de educación E-Dixgal) e 7 transaccionadas entre o Grupo Popular e o Grupo Mixto (sobre a cesión de vías autonómicas aos concellos; un plan de recuperación de centros históricos e barrios degradados; o establecemento de diálogo da Xunta coas administracións locais e co tecido social para definir investimentos prioritarios; a elaboración dun informe anual sobre a execución dos orzamentos da Xunta por provincias; a mellora de espazos públicos en contornos urbanos degradados; o impulso dos vínculos coa lusofonía a través do recoñecemento do traballo de Isaac Alonso Estraviz; e o impulso de axudas para os agricultores e gandeiros afectados pola declaración de zonas vulnerables e o mantemento dos compromisos na mellora do regadío da Limia).

Ademais, das 53 resolucións aprobadas, sete saíron adiante co apoio unánime dos deputados do Parlamento galego: 5 presentadas polo Grupo Popular (Declaración do Xacobeo 2027 como evento de excepcional interese público, a localización en Ouresne do futuro Centro Nacional de Ciberseguridade, a cesión dos inmobles baleiros propiedade da SAREB, a ampliación do calendario vacinal dos grupos de poboación máis vulnerables e a implantación do Bono Peixe para promover a compra e consumo de peixe e marisco fresco); unha do Grupo Mixto (sobre o reforzo das medidas de seguridade viaria nas contornas escolares) e unha máis logo da transacción entre o Grupo Popular e o Grupo Mixto (sobre o impulso das axudas destinadas a agricultores e gandeiros afectados pola posible declaración de zonas vulnerables e o mantemento dos compromisos na mellora do regadío da Limia).

Autogoberno e economía, benestar das persoas, sectores produtivos e infraestruturas de comunicación son os catro apartados nos que se dividen as 40 propostas de resolución que esta mañá rexistrou o Grupo Popular ao Debate sobre Política Xeral que se está a celebrar no Parlamento de Galicia. A viceportavoz popular, Paula Prado, valorou a xornada celebrada onte, na que, “por unha parte tivemos a Galicia do si, liderada polo Presidente Alfonso Rueda e con propostas pioneiras, que pensa en grande e que ten o benestar dos galegos como principal obxectivo; e, pola outra, a Galicia do non a todo e que celebra que lle vaia mal á nosa terra porque pensan que así lles irá mellor a eles”.

Paula Prado asegurou que o PPdeG “estará sempre no camiño da prosperidade, do futuro e da estabilidade, con medidas como a nova estratexia para o sector aeroespacial, o bono para estimular o consumo de peixe ou a construción de 24 residencias con 1.800 prazas públicas”. “Pero, o mellor de todo é que a acción do Goberno galego non se reduce a este Debate sobre o Estado da Autonomía, senón que se estende os 365 do ano”, indicou.

“Un PPdeG liderado por Alfonso Rueda, que pensa nunha Galicia en grande, afastada da apocalipse, a demagoxia e as mentiras que queren trasladar á sociedade desde outras formacións políticas, que só buscan que a Galicia lle vaia mal, porque pensan que así lles irá mellor a eles”, manifestou.

ENLACE A: PROPOSTAS DE RESOLUCIÓN

ECONOMIA E AUTOGOBERNO

Respecto das 40 propostas de resolución rexistradas polo Grupo Popular, Paula Prado explicou que “se poden dividir en catro grandes grupos”. Un primeiro apartado está centrado na economía e no autogoberno de Galicia, onde se considera fundamental que o Goberno de España cumpra co seu deber constitucional e presente ante as Cortes Xerais un proxecto de Orzamentos Xerais do Estado, que dea estabilidade institucional e posibilidade de afrontar os novos desafíos que ten por diante España.

Relacionado con isto, o Grupo Popular insiste na necesidade de que se convoque urxentemente un Consello de Política Fiscal e Financeira para proceder á reforma do financiamento autonómico e que se transfira ás comunidades autónomas a xestión directa dos fondos europeos de recuperación, en particular os relacionados coa industria. Neste apartado, inclúese a solicitude ao Goberno galego para que siga avanzando en alivios fiscais para os cidadáns, incluíndo nos orzamentos de 2026 novas rebaixas fiscais.

Pasando máis concretamente ás iniciativas relacionadas co autogoberno, o Grupo Popular insiste na transferencia da AP-9 e o rescate da súa concesión; a xestión do ingreso mínimo vital; o traspaso dos servizos de meteoroloxía; e as competencias en materia de permisos de traballo vinculados a permisos de residencia. Relacionado con este último punto, solicítase o desenvolvemento da Estratexia Galicia-Retorna 2023-2026 para promover a chegada de persoas de alta cualificación académica e profesional, ao tempo que se pide ao Goberno de España que axilice o procedemento de homologación de títulos universitarios e a concesión de permisos de residencia e traballo dos cónxuxes e descendentes.

Unha vez se teñan traspasado os medios humanos e materiais relacionados coas competencias sobre o litoral, o Grupo Popular pide que se unifiquen as autorizacións e os permisos nun só procedemento e que se cree unha rede de sendas e unha guía para a integración dos establecementos hostaleiros do litoral.

E, como novidade, se demanda ao Goberno de España que o presidente da Confederación Hidrográfica do Miño-Sil sexa nomeado e separado a proposta da Xunta, do mesmo xeito que acontece na actualidade cos presidentes dos portos de titularidade estatal.

Neste apartado de autogoberno de Galicia, inclúese tamén a solicitude para que o Goberno de España localice en Galicia o futuro Centro Nacional de Ciberseguridade ou que rectifique a redución de efectivos da Unidade de Policía Adscrita, ao tempo que cubre a totalidade das prazas vacantes no Corpo Nacional de Policía e da Garda Civil. Para rematar con este primeiro apartado, avógase porque a Xunta avance no Pacto pola Lingua e a renovación do Plan Xeral de Normalización da lingua galega, se condene os totalitarismos nazi e comunista, en cumprimento da resolución do Parlamento europeo do 19 de setembro de 2019; e se aprobe unha nova Lei de Administración Local de Galicia.

BENESTAR DOS GALEGOS

Un segundo apartado de propostas de resolución ten que ver co benestar dos galegos. Así, en primeiro lugar, e dentro do ámbito da sanidade, se pide a implementación de medidas para loitar contra a falta de profesionais sanitarios, en concreto: que se axilice o proceso de homologación de títulos dos profesionais sanitarios; que se eleve a idade máxima para o exercicio da profesión aos 72 anos; ou que se acelere a implantación da especialidade de urxencias, así como a aprobación dun Plan para a atención do paciente crónico, a promoción dunha alimentación sostible a través da implantación do Bono Peixe; a ampliación do calendario vacinal aos grupos de poboación máis vulnerables e o reforzo da atención á saúde mental, coa posta en marcha dun novo Plan de Saúde mental que inclúa a creación dunha rede de psicoloxía en atención primaria.

Neste segundo apartado de propostas dirixidas ao benestar dos galegos, tamén teñen cabida medidas para a xuventude, para facilitar o seu acceso á vivenda, a incorporación ao mercado laboral ou a mellora da súa formación; para os maiores, coa solicitude dun plan específico que incremente a rede de centros residenciais ou o incremento da achega aos concellos para a prestación do servizo de axuda no fogar; para as mulleres, coa posta en marcha de servizos de información, asesoramento e acompañamento ás mulleres en localidades de ámbito rural e nas universidades galegas; para a correcta atención aos menores non acompañados; para a axuda ás familias nos gastos educativos dos seus fillos; para a creación dunha rede de centros de innovación avanzada en formación profesional; e para o incremento do parque de vivendas, a través da cesión de inmobles baleiros propiedade da SAREB ou con axudas para a rehabilitación de vivendas baleiras.

SECTORES PRODUTIVOS

Un terceiro apartado de propostas de resolución teñen como obxectivo o apoio aos sectores produtivos galegos. Así, demándase continuar favorecendo políticas dirixidas ao impulso industrial en Galicia, sempre que cumpran a normativa ambiental vixente, dotándoos das infraestruturas eléctricas e das axudas necesarias para a súa viabilidade e implantación no territorio. No caso concreto de Alcoa, pídese seguir traballando para asegurar o futuro da factoría de San Cibrao, axilizando a autorización dos parques de enerxía renovable e desenvolvemento as medidas de apoio necesarias para as industrias electrointensivas.

Neste ámbito, considérase fundamental facilitar o abaratamento do solo empresarial; así como aumentar e diversificar a subministración de materias primas fundamentais e das materias primas estratéxicas para reducir a dependencia do exterior.

No que respecta ás enerxías renovables, o Grupo Popular considera necesario que Galicia manteña unha posición de liderado en España e, en concreto, solicítase que o hidroxenoduto A Coruña-Zamora non sufra retraso con respecto aos que tamén foron declarados como proxectos de interese común en 2024.

Tamén se pide apoio ao sector agrario, especialmente ao viño, afectado polos novos aranceis. No ámbito da pesca, demándase que Galicia participe no proceso de toma de decisións a nivel europeo.

Por último, reitérase a solicitude da declaración do Xacobeo como Evento de Excepcional Interese Público, ampliando a solicitude de axuda ao Goberno central para o “Lustro Xacobeo 2027-2032”, e tamén se avoga por un turismo sustentable e rexeitamos totalmente a turismofobia, convencidos de que toda actividade turística debe ser compatible coa vida cotiá dos cidadáns e co respecto á convivencia.

INFRAESTRUTURAS DE COMUNICACIÓN

O último dos apartados das propostas de resolución de resolución do Grupo Popular ten que ver coas infraestruturas de comunicación. En concreto, en materia de estradas, solicítase que se estenda a rede viaria de alta capacidade, se limite a contía das peaxes e que o Goberno central proceda á construción das autovías pendentes, as actuacións nas contornas urbanas ou a prolongación da A-52 en Vigo e Mos, así como o impulso das variantes esquecidas, como a de A Estrada ou Ponteareas.

En materia ferroviaria, se insiste na necesidade de mellora do servizo que se presta en Galicia e a súa conexión co exterior, solucionando as innumerables deficiencias e incidencias que padecen os usuarios, recuperando as frecuencias suprimidas con motivo da pandemia e impulsando infraestruturas pendentes e necesarias, como o AVE Vigo-Porto, as conexións de alta velocidade de Lugo e Ferrol ou o Plan director para a adecuación e mellora do Corredor Atlántico.