Categoría: Parlamento de Galicia

O Grupo Popular levará ao Pleno da vindeira semana unha proposición non de lei a través da que se propón que o Parlamento de Galicia reprobe a campaña sexista levada a cabo polo sindicato nacionalista CIG que desvaloriza o traballo da conselleira de Política Social, quen, á súa vez, comparecerá na sesión plenaria para dar conta das políticas en materia de igualdade que está a desenvolver a Xunta. A orde do día tamén inclúe a comparecencia do conselleiro de Facenda, para informar da reunión do Consello de Política Fiscal e Financeira; o debate para a aprobación da Lei de servizos dos medios públicos de comunicación audiovisual de Galicia; e outra proposición non de lei do Grupo Popular para que o Goberno central declare o Xacobeo 2027 como acontecemento de excepcional interese.

Ao remate da Xunta de Portavoces, o portavoz popular, Alberto Pazos, sinalou que o Pleno da vindeira semana estará marcado pola celebración este sábado, 8 de marzo, do Día Internacional da Muller. Así, a comparecencia, a petición propia, da consellería de Política Social dará conta das políticas que en materia de igualdade está a desenvolver a Xunta, “un ámbito no que é patente o compromiso firme do Goberno galego por impulsar a igualdade de oportunidades entre mulleres e homes con medidas transversais nas que participan todos os departamentos do Goberno galego”.

Así mesmo, o Grupo Popular demandará que o Parlamento galego reprobe a campaña sexista levada a cabo pola CIG, que claramente desvaloriza o traballo dunha muller que ostenta un cargo público, neste caso o da conselleira de Política Social, e que “a día de hoxe segue sen ser condenada nin rexeitada tanto pola portavoz do BNG como por calquera das autoproclamadas defensoras nacionalistas a ultranza do feminismo”.

“Estamos diante dunha demostración máis de que para o nacionalismo galego o feminismo é unha cuestión sectaria, xa que só é reprobable cando son elas mesmas as afectadas, pero gardan un repugnante silencio cando a vítima é unha muller que non segue a súa doutrina política”, criticou o portavoz popular.

Alberto Pazos pediu aos deputados e deputadas do BNG que “recapaciten a súa decisión e teñan a ben condenar este ataque machista á conselleira de Política Social”, para o que disporán “dunha nova oportunidade no Pleno apoiando esta iniciativa do Grupo Popular, que solicita a condena de calquera manifestación que vulnere o principio de igualdade de trato entre mulleres e homes ou se denigre a dignidade das mulleres, solicitando expresamente á señora Pontón e aos deputados do BNG que amosen o seu rexeitamento ao contido sexista e machista destes carteis do sindicato nacionalista CIG”.

CONDONACIÓN DA DÉBEDA

O Pleno inclúe a comparecencia, a petición propia, do conselleiro de Facenda e Administración Pública para dar conta do tratado no Consello de Política Fiscal e Financeira celebrado a pasada semana, no que todas as comunidades autónomas gobernadas polo Partido Popular rexeitaron a imposición dunha condonación da débeda, así como outras medidas decididas unilateralmente polo Goberno central prexudiciais para as facendas autonómicas.

“Galicia rexeita de forma tallante esta quita da débeda das comunidades autónomas acordada polo Goberno de España e os seus socios independentistas cataláns, porque supón un ataque directo ás comunidades que, como Galicia, foron responsables no control do seu déficit e a súa débeda nos tempos de crise económica e premia a aquelas que despilfarraron os cartos pagando intentos de golpes de Estado, como o que levaron a cabo os independentistas en Cataluña, ou creando embaixadas por medio mundo para vender o que non tiñan nin chegaron a ser”.

Dentro do apartado de iniciativas lexislativas, a sesión plenaria inclúe o debate para a súa aprobación do proxecto de Lei de servizos dos medios públicos de comunicación audiovisual de Galicia, unha nova lei que adapta a normativa galega á lexislación española e europea e dota a estes medios dun marco normativo co que poidan dar resposta aos retos de futuro nun mercado tan competitivo como é o audiovisual.

DESGRAVACIÓNS FISCAIS PARA O XACOBEO 2027

Volvendo ás iniciativas incorporadas polo Grupo Popular á orde do día do Pleno, Alberto Pazos apuntou que “imos solicitar ao Goberno de España a declaración do Xacobeo 2027 como acontecemento de excepcional interese, de xeito que as empresas que desexen implicarse e participar na promoción deste evento poidan beneficiarse dos correspondentes beneficios fiscais”.

Neste sentido, lembrou que as desgravacións fiscais ás que puideron acollerse as empresas que patrocinaron o Xacobeo 2021-22 supuxeron unha aportación total de 28 millóns de euros, o que da mostra “da importancia da declaración como acontecemento de excepcional interese para o Xacobeo 2027 e da urxencia deste recoñecemento, a menos de dous anos de que se volva abrir a Porta Santa na Catedral de Santiago e cando as empresas necesitan coñecer con antelación suficiente as opcións de investimento e beneficios fiscais dos que van dispoñer”.

Por último, dentro do apartado de preguntas ao Goberno galego, o Grupo Popular cuestionará sobre as medidas que ten previsto levar a cabo para mellorar a seguridade do persoal sanitario e dos usuarios do Servizo Galego de Saúde; a deficiente xestión do tratamento de residuos de Nostián, logo dos sucesivos incumprimentos por parte do Concello de A Coruña aos requirimentos realizados pola Xunta para mellorar esta planta de tratamento; e as accións que está a desenvolver o Goberno galego para elaborar o plan de usos do Teatro-Cine Fraga de Vigo.

Os deputados do Grupo Popular Nicole Grueira, Enrique Barreiro e José Manuel Mato visitaron en Castroverde a granxa do mozo Jesús López para coñecer de primeira man os resultados das axudas da Xunta para a incorporación de novos agricultores e gandeiros á actividade do rural galego.

Durante a visita, na que os deputados populares estiveron acompañados dos concelleiros do Partido Popular Pablo Figueiras e Óscar Pérez, puideron comprobar as consecuencias positivas nesta granxa do compromiso do Goberno galego coa mocidade, coa actividade agrogandeira e coa aposta decidida polo rural.

Desde o ano 2009, máis de 5.000 mozos e mozas galegas se incorporaron ao rural gracias ás axudas da Xunta dirixidas a facilitar o relevo xeracional no sector primario, moi en particular as subvencións para a incorporación dos mozos, os plans de mellora e tamén a posta en marcha do banco de explotacións.

O Parlamento de Galicia aprobou hoxe a proposición non de lei do Grupo Popular a través da que se solicita que o Instituto Galego de Medicina Legal de Galicia (Imelga) asine convenios de colaboración coas escolas e facultades galegas que corresponda para poder recibir alumnos en prácticas.

A deputada popular Katy Varela lembrou que o Instituto de Medicina Legal é un órgano da Administración de Xustiza de Galicia que ten por misión prestarlle asistencia técnica aos tribunais, fiscalías e xulgados en materia de medicina forense. A importancia do seu traballo tradúcese nas máis de 25.000 probas periciais que realizou ao longo de 2023, constatando un incremento constante de peticións.

Katy Varela manifestou que os convenios do Imelga coas universidades ou centros de formación profesional “están contemplados no seu propio regulamento e permiten dar visibilidade ao traballo que estes profesionais realizan ao servizo da xustiza e que profesionais que van iniciar a súa andadura profesional coñezan outro ámbito no que desenvolver a súa carreira profesional”.

EMPATÍA E SINERXIAS

Así mesmo, estes convenios tamén serven para “promocionar o propio instituto, que, en ocasións, ten dificultades para renovar a planta de traballadores ou cubrir determinadas prazas, especialmente de médicos forenses”. “En definitiva, posibilitan establecer redes profesionais, empatía e sinerxias para o desenvolvemento de futuros proxectos”, asegurou.

“Hai que ter presente tamén que a universidade aporta ao Imelga o soporte investigador e de coñecemento a través do seu depósito bibliográfico, e permite abordar proxectos transversais que melloran a calidade pericial e impulsan o coñecemento social das ciencias forenses”, rematou.

Finalmente, á proposición non de lei do Grupo Popular engadiuse unha emenda do Grupo Socialista a través da que se solicita que se continúe impulsando a formación especializada en materia de violencia de xénero aos equipos psicosociais especializados do Imelga que asisten aos xulgados, así como a capacidade para a identificación das violencias sexuais.

A Comisión 1ª do Parlamento de Galicia aprobou hoxe o ditame do proxecto de Lei de servizos dos medios públicos de comunicación audiovisual de Galicia, co que este texto lexislativo queda pendente da súa aprobación definitiva en sesión plenaria. A deputada popular Carmen Pomar considerou “imprescindible aprobar unha nova lei galega que regule os medios de comunicación de titularidade pública para adaptala á lexislación española e europea, pero, sobre todo, para dotar a estes medios dun marco normativo co que poidan dar resposta aos retos de futuro nun mercado tan competitivo como é o audiovisual”.

“Só dotando aos medios públicos do marco e das ferramentas necesarias, coa transformación e a innovación como piares, se poderá garantir o seu futuro e asegurar a súa viabilidade para que poda seguir cumprindo cando menos outros 40 anos ao servizo da cidadanía galega”, manifestou Carmen Pomar.

Na súa intervención, a deputada popular salientou que este novo texto lexislativo “blinda e reforza como misión fundamental dos medios públicos de titularidade autonómica promover e difundir a lingua galega e dar a coñecer a identidade lingüística de Galicia”. Ademais, subliñou “o impulso que esta nova lei dará á produción propia, garantindo a participación dos grupos sociais, políticos e sindicais representativos, e articulando o protagonismo dos medios públicos no proceso imparable de alfabetización mediática, en colaboración co sistema educativo”.

Carmen Pomar amosou o seu pesar “pola utilización por parte de BNG e PSdeG desta lei como arma arroxadiza política para danar ao Partido Popular”, porque “non queren unha CRTVG independente, senón ao seu servizo, como fixeron cando tiveron responsabilidades durante o Goberno bipartito”.

“A Galicia actual conta cun sector audiovisual sólido, forte e recoñecido internacionalmente, un sector que esta lei axudará a fornecer e consolidar na medida que os medios públicos participarán, xunto coas administracións e o sector, nos diferentes programas orientados a impulsar a produción cinematográfica e audiovisual, a ficción e os documentais”, rematou a deputada popular.

O Grupo Popular rexistrou dúas iniciativas no Parlamento de Galicia a través da que se reproba a campaña machista levada a cabo polo sindicato CIG, que claramente desvaloriza o traballo dun cargo político pola súa condición de muller, e se expresa o total rexeitamento a calquera tipo de mensaxe ou acción que supoña unha discriminación ou violencia polo feito de ser mulleres. “Confiamos que as deputadas nacionalistas fagan valer a súa influencia no BNG e estas dúas iniciativas conten co seu apoio unánime no momento en que sexa debatidas neste Parlamento”, sinalou o portavoz popular, Alberto Pazos.

Na súa comparecencia ante os medios de comunicación, Pazos criticou o “silencio covarde” da voceira do BNG tanto para dar resposta á pregunta sobre a existencia de persoas do seu entorno que se teñan beneficiado de contratos menores asinados con institucións gobernadas polo BNG como para amosar o seu rexeitamento á repugnante campaña machista levada a cabo pola CIG contra a conselleira de Política Social.

LAMENTABLE SUBMISIÓN

“Os nacionalistas son moi amigos de pedir transparencia aos demais, pero son especialistas en pasar un tupido veo cando son eles os que deben dar unha resposta sobre calquera cuestión que os poña en evidencia fronte ao que denuncian dos demais”, sinalou o portavoz popular, quen tamén considerou “lamentable a submisión da señora Pontón e de todo o BNG ao que lle marcan os coroneis da UPG e da CIG”.

Así, considerou “indignante que unha muller, que di considerarse feminista e que tanto denuncia as actitudes machistas, sexa incapaz de dicir a máis mínima palabra de condena ou repudio a esta noxenta campaña contra unha muller traballadora e que merece todo o respecto, aínda que non sexa da ideoloxía que defende a señora Pontón”.

Alberto Pazos avanzou que “non nos cansaremos de seguir pedindo á señora Pontón, e a todas as que se din feministas nacionalistas, que condenen este tipo de accións machistas do seu sindicato de cabeceira, como xa teñen feito outras destacadas representantes doutras formacións políticas ás que quero trasladar o noso agradecemento”, polo que anunciou o rexistro no Parlamento galego de dúas proposicións non de lei reprobando esta actitude machista e expresando o rexeitamento a calquera mensaxe ou acción que supoña unha discriminación ou violencia polo feito de ser muller.

A DÉBEDA NON SE ELIMINA, CAMBIA DE MANS

O portavoz popular referiuse tamén ao intento do Goberno de Pedro Sánchez, co apoio incondicional do BNG, de impoñer ás comunidades autónomas unha condonación da súa débeda, “co único obxectivo de cumprir as esixencias dos seus socios independentistas cataláns que, unha vez vexan rebaixada a súa débeda na cantidade que estimaron conveniente, darán un paso máis nas súas esixencias para manter a Pedro Sánchez na Moncloa e pedirán a aprobación do seu concerto económico”.

Pazos reiterou que “a débeda non se elimina dun plumazo, senón que unicamente cambia de mans, pasando das comunidades autónomas á caixa xeral do Estado, co que pasamos a pagala todos os españois”. En concreto, con este acordo a débeda total de Galicia se incrementa en 600 millóns de euros, unha cifra que resulta de reducir os máis de 4.000 millóns de euros da débeda galega que asumiría o Estado pero á que se debe engadir a parte proporcional que tocaría asumir á Comunidade galega dos máis de 83.000 millóns de euros que subiría a débeda do Estado.

“Todo isto co respaldo e aprobación tanto do BNG como dos socialistas galegos, máis preocupados por satisfacer os desexos de Pedro Sanchez que de velar polos intereses de Galicia e de todos os galegos”, manifestou o portavoz popular, quen os acusou de “mentir flagrantemente aos galegos, porque a suposta condonación da débeda non implica máis recursos para os galegos e, como moito, suporá un pequeno alivio no pago dos xuros desa débeda que se deben afrontar cada mes”.

Alberto Pazos afirmou que “o realmente é necesario é unha reforma do sistema de financiamento autonómico e local, que teña en conta o custo real da prestación dos servizos públicos en cada comunidade autónoma”. “E, no caso de Galicia, teña moi presente a dispersión e o envellecemento da súa poboación”, concretou.

O Parlamento de Galicia aprobou hoxe a proposición non de lei do Grupo Popular, que non contou co voto favorable do PSdeG, a través da que se solicita ao Goberno de España que recupere a vía formativa das microcredenciais como unha posibilidade do arraigo para a formación dos estranxeiros en España. A portavoz popular de Emprego, Noelia Pérez, considerou “paradóxico que, a pesar da evidente oportunidade deste programa para paliar a escaseza de man de obra e facilitar a integración das persoas migrantes que chegan con ganas de traballar, o Goberno de Pedro Sánchez decida de forma unilateral facer desaparecer esta figura”.

Noelia Pérez lembrou que o Goberno de España aprobou no ano 2022 a figura do arraigo para a formación, abrindo un abano de posibilidades e recoñecendo a potencialidade das microformacións e microcredenciais como ferramenta de integración. “Este modelo amosouse especialmente útil en sectores onde a demanda de man de obra é elevada e onde as empresas precisan traballadores que posúan unha capacidade concreta e actualizada, ofrecendo a posibilidade de que persoas en situación irregular regularicen a súa situación mediante un compromiso efectivo de formación”, indicou.

FUNCIONABA E DABA RESULTADOS

Porén, a portavoz popular lamentou que o Goberno de Pedro Sánchez, a través do Real Decreto 1155/2024 que actualiza o Regulamento sobre dereitos e liberdades dos estranxeiros en España, eliminou expresamente a opción das microcredenciais para o arraigo formativo, “sen consultar nin escoitar ás comunidades autónomas, que son as que realmente teñen as competencias en políticas activas de emprego”.

“Reclamamos algo que estaba funcionando e dando resultados positivos en Galicia, polo que consideramos que o Goberno de España ten que reconsiderar recuperar a vía formativa das microcredenciais e atender outras alegacións presentadas pola Xunta”, sinalou Noelia Pérez.

En concreto, a portavoz popular demandou incorporar no articulado do regulamento unha mención explícita as microcredenciais e recoñecelas como certificacións de competencias específicas e de curta duración, permitindo acreditar a formación necesaria para a integración no mercado laboral. Así mesmo, solicita eliminar ou modificar expresións que condicionen a formación unicamente a modalidades tradicionais; incorporar criterios que recoñezan a proporcionalidade na duración e na cantidade de horas, adaptándose á realidade dos contratos fixos discontinuos e ás condicións laborais de colectivos vulnerables; e incluír a opción de matriculación e desenvolvemento de microformacións en modalidades semipresenciais ou presenciais, garantindo un mínimo do 50 por cento de actividades presenciais, de acordo coas necesidades da formación.

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta ao desenvolvemento de accións que permitan a inclusión do videoxogo no sistema cultural galego. “É o mellor momento para que o Goberno galego desenvolva as accións pertinentes para a plena inclusión deste sector no sistema cultural galego, promovendo a difusión e o impulso que merece, porque a través do videoxogo tamén se pode expresar a forma de ser dunha cultura e dun pobo”, manifestou a portavoz popular de Cultura, Carmen Pomar.

Na súa intervención, Pomar sinalou que “os videoxogos están considerados como cultura, son reflexo da sociedade e non podemos entender a cultura do século XXI sen eles, algúns inspirados en fitos ou movementos culturais para as súas narrativas e outros teñen como obxecto transmitir a cultura e dar a coñecela a través das súas historias”.

“A industria dos videoxogos vén de se converter nunha das industrias culturais líderes e con perspectiva de crecemento por enriba doutras, cunha boa calidade de deseños e de contidos que poden converterse en experiencias totais desde o punto de vista de consumo, pero tamén da creación artística”, sinalou a portavoz popular.

ACCIÓNS REALIZADAS

Carmen Pomar lembrou que a Xunta xa asinou en 2022 un convenio de colaboración coa Asociación Galega do Videoxogo, mediante o que esta entidade se encargou da xestión do polo de aceleración deste sector, que o Goberno galego puxo en marcha cunha dotación de 360.000 euros ao abeiro do hub audiovisual da industria cultural.

Ademais, o Goberno galego aprobou hai poucos meses unha liña de axudas para o sector dos videoxogos, dotada con 150.000 euros e que busca promover a xeración de contidos galegos e en galego, así como a profesionalización, a creación de emprego e a incorporación de mulleres aos equipos que traballan neste ámbito.

Para rematar, a portavoz popular referiuse á recente integración do Museo do Videoxogo de Cangas no Sistema Galego de centros museísticos, motivada polo feito de ser a primeira instalación relacionada co mundo do videoxogo de Galicia e das poucas existentes en España.

“Estamos a falar dunha forma de expresión artística e cultural e como unha ferramenta educativa, máis alá da súa dimensión lúdica”, subliñou Carmen Pomar, quen destacou que no Museo do Videoxogo “está representado todo o que supuxo, supón e suporá este sector para a cultura contemporánea”.

O Parlamento de Galicia aprobou hoxe a proposición non de lei do Grupo Popular, que non contou co apoio do BNG, a través da que se insta á Xunta a que, en colaboración coa Federación Galega de Municipios e Provincias (Fegamp), promova a aplicación do protocolo contra as violencias sexuais e LGTBI-fóbicas nos espazos de lecer nocturno de todos os concellos de Galicia nos que se empracen este tipo de establecementos, así como en eventos e espazos festivos. Así mesmo, e logo dunha transacción co Grupo socialista, pídese o desenvolvemento de accións de información, prevención e sensibilización en materia de violencia sexual e trata con fins de explotación sexual.

A portavoz popular de Política Social, Raquel Arias, explicou que esta iniciativa “enmárcase no contexto das políticas que está a levar a cabo a Xunta para a promoción da igualdade e a loita contra a violencia de xénero”. Neste sentido, lembrou que o Goberno galego aprobou o pasado 11 de xaneiro o protocolo de actuación contra as violencias sexuais e LGBTI-fóbicas nos espazos de lecer nocturno, “co obxectivo de tolerancia cero ante calquera tipo de violencia e busca previr, detectar e saber como actuar ante calquera caso que aconteza”.

OCIO NOCTURNO SEGURO E LIBRE DE VIOLENCIAS

“Queremos facer de Galicia un lugar seguro e contar con todas as ferramentas posibles para loitar contra a violencia”, indicou Raquel Arias, quen concretou que “búscase xerar un modelo de ocio nocturno seguro e libre de violencias”.

O protocolo promove que os establecementos desenvolvan iniciativas propias de prevención e sensibilización, comprometéndose a non contar con publicidade ou criterios de acceso ao local discriminatorios e sexistas. En canto á detección, bríndase aos profesionais pautas para recoñecer manifestacións violentas, ben relacionadas coa presenza de imaxes ofensivas no recinto ou coa linguaxe sexista ou de contacto físico ou intimidatorio.

En caso de ter que actuar, o protocolo ofrece pautas comúns para seguir por parte dos profesionais, que centran a atención na vítima ante unha situación potencialmente perigosa.

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta a reforzar os lazos de colaboración coa UNED para incrementar a oferta de prazas a distancia do máster de profesorado que, actualmente, oferta esta institución en Galicia, así como promover que as universidades públicas galegas incrementen a súa oferta neste ámbito formativo.

O viceportavoz popular, Julio García Comesaña, explicou que “a demanda de másteres a distancia experimentou nos últimos anos un crecemento significativo, converténdose nunha opción cada vez máis solicitada polo alumnado”. “Este aumento viu motivado polas vantaxes que este formato ofrece en termos de conciliación da vida laboral e familiar, así como polo avance da dixitalización, que permite un acceso máis amplo e descentralizado á formación superior”, apuntou.

“Precisamente por este incremento da demanda en modalidade en liña, a oferta de opcións a distancia por parte das universidades públicas non sempre é suficiente, o que obriga a moitas e moitos estudantes a adiar a súa formación ou buscar alternativas privadas”, sinalou García Comesaña.

FORMACIÓN HABILITANTE

En concreto, esta situación resulta especialmente paradigmática no caso do máster de profesorado, unha formación que é habilitante para os futuros profesores de educación secundaria e bacharelato, formación profesional e ensinanzas de idiomas, e un requisito imprescindible para o ingreso neste corpo profesional.

Na actualidade, Galicia conta con 825 prazas para o máster de profesorado entre as universidades públicas galegas e a UNED: 740 prazas repartidas entre as universidades de A Coruña, Santiago e Vigo; e 85 prazas na UNED.

“Diante desta situación, as universidades públicas e a UNED deben reforzar a oferta do máster de profesorado, especialmente na modalidade en liña, que é a máis demandada, xa que moitas persoas compatibilizan estes estudos con outras actividades”, demandou o viceportavoz popular, quen lembrou que o conselleiro de Educación xa iniciou contactos co reitor da UNED para trasladar unha proposta de aumento de prazas para Galicia.