O Grupo Popular asegura que “o noso modelo lingüístico non é a imposición, senón que os que xa coñecen o galego o utilicen con máis frecuencia e se sintan orgullosos da nosa lingua”

O portavoz de Lingua do Grupo Popular, José Luís Ferro, asegurou hoxe no Pleno do Parlamento galego que “o noso modelo lingüístico non é a imposición senón conseguir que a maioría dos galegos que xa coñecen a nosa lingua un paso máis e comecen a utilizala con máis frecuencia e a sentirse orgullosos dela”. “Neste proxecto cabemos e caben todos, chámense como se chamen, naceran onde naceran e falen a lingua que falen, porque temos as portas abertas coa única condición de que respecten aos que se chamen de forma distinta, pensen distinto ou se sintan distintos, pero que estean dispostos a colaborar neste proxecto de igualdade e liberdade”, apuntou.

José Luís Ferro manifestou que “a nosa lingua non é, nin debe ser, algo que entre no debate partidista, senón un ben común que nos une e singulariza que todos debemos defender usando con absoluto coñecemento e normalidade, sen excluír para nada o manexo conveniente doutras linguas”.

TEMPOS PASADOS

Na súa intervención, lembrou que “durante séculos o galego foi violentado no máis íntimo do pobo, transmitindo o sentimento absurdo de que a nosa fala era cousa de xentes de segunda”, pero subliñou que “eses tempos xa pasaron e déronse nun contexto histórico que non se pode xulgar cos ollos da actualidade, porque se así se fixera sería cometer un erro tan grande como querer circunscribir a grandes figuras de Galicia, como Castelao, Curros ou Rosalía, nunha determinada ideoloxía actual”.

O portavoz popular recordou que a Xunta “impulsou un escenario de diálogo constituíndo grupos sectoriais para renovar o Plan Xeral de Normalización Lingüística de 2004, composto por máis de 100 profesionais comprometidos coa nosa fala e poñendo un prazo de 15 meses para rematar os traballos, ao tempo que xa se anunciou unha senda de crecemento orzamentario para seguir impulsando políticas en beneficio da nosa lingua”.

“Mentres vostedes viven nun nacionalismo desintegrador e excluínte, nós estamos nun galeguismo dual, ou de dobre nacionalidade, integrador e incluínte”, manifestou Ferro dirixíndose aos deputados do BNG, para continuar asegurando que “a nosa bancada é galeguista porque nos identificamos coa comunidade na que nacemos, identificámonos coas nosas tradicións, patrimonio cultural e, sobre todo, coa nosa lingua, orgullosos de ser galegos pero sen excluír a ninguén”.

O PPdeG salienta que o modelo de coxestión do marisqueo entre Xunta e o sector é avalado e posto como modelo pola Comisión Europea

O portavoz do Mar do Grupo Popular, Miguel Figaldo, salientou hoxe no Pleno do Parlamento galego que o modelo de coxestión do marisqueo entre Xunta e o sector “está sendo avalado e posto como modelo pola propia Comisión Europea”. Neste sentido, lembrou que “o mariscador quere vivir do seu traballo e non das axudas, polo que a prioridade é recuperar a produtividade dos bancos marisqueiros, que é o que está a facer o Goberno galego”.

Miguel Fidalgo afirmou que o marisqueo “é un sector estratéxico pola súa relevancia socioeconómica e medioambiental, ao contar con máis de 3.600 permisos de explotación, case 2.500 embarcacións na modalidade de marisqueo a flote e 700 permisos con algunha modalidade de recursos específicos”. Ademais, destacou que “é unha actividade na que participan máis de 70 entidades asociativas que, no último exercicio, alcanzou unha produción superior ás 5.100 toneladas, cun valor de 62,6 millóns de euros”.

SITUACIÓN COMPLEXA

Na súa intervención, o portavoz popular recoñeceu que o sector marisqueiro galego “está a vivir unha situación complexa”, pero avogou por “fuxir da demagoxia á que acostuman os grupos da oposición, porque a Xunta está a afrontar as dificultades conxuntamente co sector”.

“Somos a única rexión que ten un sistema real de cogobernanza a través dos 92 plans de xestión elaborados polo propio sector, que se aproban cada tres anos e se ocupan tanto da explotación dos recursos como da organización dos traballos non extractivos, como son as labores de conservación das condicións das poboacións explotadas”, indicou.

Ademais, Miguel Fidalgo lembrou que a Xunta xa publicou, desde outubro de 2023 ata a actualidade, 13 ordes de axudas relacionadas directamente co marisqueo no marco do Plan de Competitividade e Sostibilidade, que superan os 50 millóns de euros, ás que hai que engadir outras actuacións destinadas á mellora do marisqueo e dirixidas a axudas tanto a confrarías como á xestión da biodiversidade ou actividades marisqueiras.

O Grupo Popular reitera a súa aposta polo modelo da Unidade de Policía Adscrita a Galicia e agarda que frutifiquen as conversas para cubrir as vacantes

A viceportavoz do Grupo Popular, Paula Prado, reiterou hoxe no Pleno do Parlamento galego que no PPdeG “apostamos polo modelo da unidade de Policía Adscrita” e agardou que “as conversas que se están mantendo ao máis alto nivel frutifiquen nun acordo favorable para Galicia e se cubran as vacantes existentes na actualidade”. “Para nós, o autogoberno non é botar ás forzas e corpos de seguridade do Estado”, manifestou a viceportavoz popular, quen anotou que “se asumir as competencias de tráfico e seguridade viaria supón renunciar á presenza da Policía Nacional e da Garda Civil en Galicia preferimos non ter esas competencias”.

Paula Prado subliñou que o PPdeG “sempre amosou unha actitude sensata pero comprometida no que se refire a reforzar o noso autogoberno, pero sempre desde a lealdade e o respecto ás forzas e corpos de seguridade do Estado”.

“Nós sempre estivemos de acordo con que Galicia asumira o desempeño das competencias de tráfico e, máis concretamente, as actuacións referidas á planificación, ordenación, xestión e vixilancia do tráfico, así como as denuncias sobre infraccións nesta materia”, lembrou a viceportavoz popular, pero amosou o seu rexeitamento á proposición de Lei do BNG debatida hoxe no Pleno porque “non quere as competencias para mellorar a seguridade dos galegos e galegas, senón avanzar cara o obxectivo que sempre tiveron: botar á Policía Nacional e á Garda Civil fóra de Galicia”.

NUNCA CEDEREMOS A CHANTAXES

Neste sentido, asegurou que, “mentres goberne o Partido Popular, a Policía Nacional e a Garda Civil seguirán en Galicia prestando os seus servizos, e nunca cederemos ás chantaxes do independentismo nin nunca empregaremos ás forzas e corpos de seguridade do Estado como moeda de cambio para obter beneficios políticos ou simplemente para seguir no poder”.

A viceportavoz popular explicou que o BNG “xa puxo sobre a mesa hai unhas semanas a través dun documento da UPG cales son as súas verdadeiras intencións: lanzar iniciativas encamiñadas á independencia de Galicia, entre elas a creación dunha Policía galega”. “Esta proposta leva anos no ADN dos nacionalistas galegos e nas pasadas eleccións autonómicas a plasmaron no seu programa electoral, que tentaron afastar o máximo posible da vista dos galegos: aparte de propoñer a expulsión do castelán das aulas, detallaban paso a paso o seu plan para expulsar tamén á Policía Nacional e á Garda Civil de Galicia, como fixeron os seus camaradas de Bildu en Navarra”, concretou.

Para rematar, Paula Prado afirmou que o BNG “son irrelevantes, porque o seu apoio incondicional a Pedro Sánchez é a cambio de nada” e cuestionou “onde quedou aquelo de asegurar a Galicia o mesmo estatus que a Cataluña ou o País Vasco”, citando en contrato os 156 axentes que se necesitan para completar a Unidade de Policía Adscrita a Galicia ou os cinco xulgados de violencia de xénero comprometidos.

Os eurodeputados do PPdeG salientan a relevancia que tiveron o desenvolvemento industrial e a pesca na visita de Rueda a Bruxelas

Os eurodeputados do Partido Popular de Galicia, Francisco Millán Mon e Adrián Vázquez, valoran moi positivamente a visita que fixo esta semana a Bruxelas o presidente galego, Alfonso Rueda, e salientan a relevancia que tiveron o desenvolvemento industrial e a pesca na súa axenda.

“Celebro moito que o desenvolvemento industrial e a pesca, tan importantes para a economía galega, ocupasen un lugar central na visita do presidente”, subliña Millán Mon, en referencia ás reunións coa vicepresidenta da Comisión Europea Teresa Ribera e co comisario de Pesca, Costas Kadis, tendo en conta que a industria “é importantísima” para Galicia e, doutra banda, a Comunidade “ostenta con orgullo o título de ser a primeira rexión pesqueira de Europa”.

Nunha valoración remitida aos medios sobre a viaxe de Alfonso Rueda, os eurodeputados galegos felicítano, en primeiro lugar, polo seu nomeamento como vicepresidente do Comité Europeo das Rexións e como coordinador da delegación española nese Comité. “Foi moi relevante a súa intervención no Comité das Rexións defendendo o papel das Comunidades Autónomas no deseño e a xestión dos fondos europeos”, di Millán Mon.

Na mesma liña, Adrián Vázquez destaca que “Rueda e a Xunta desembarcaron con moitísima forza en Bruxelas”, xa non só polos devanditos nomeamentos, senón porque, xunto aos conselleiros, “puido sacar peito do bo traballo que se fai en Galicia”.

“A min paréceme que non favorece aos intereses galegos un modelo de centralización similar ao dos Fondos Next Generation, que está a ter tantos problemas de eficiencia, de absorción e mesmo diría de distribución”, explica Francisco Millán Mon sobre as cuestións que tratou o presidente.

Nese sentido, o eurodeputado pontevedrés sinala que o futuro dos fondos europeos, como dixo o presidente galego, “pasa por incrementar a participación das comunidades autónomas e as entidades locais”.

“Fixo moi ben en pedir que eses fondos de cohesión e esa descentralización que é tan importante para países como España non só se manteña, senón que se incremente nos próximos anos”, apunta Vázquez.

En canto ás enerxías renovables, o eurodeputado lalinense insta a “seguir buscando esa sustentabilidade que tanto pediu a Unión Europea nos últimos anos e a deixar que o traballo técnico fundamente futuros proxectos industriais”.

O TRABALLO DE “DESMENTIR BULOS”

Por último, Adrián Vázquez lamenta que o PPdeG teña que “desmentir, constantemente, bulos que sobre todo infunde o BNG co único afán de danar os intereses de Galicia en Europa”. “É unha pena que teñamos que facer ese traballo en Bruxelas de desmentir as mentiras constantes que o único que fan é danar os nosos intereses como comunidade punteira”, agrega.

Sobre o PSdeG, para rematar, Vázquez advirte que “nin está nin se lle espera” e “a verdade, nin sequera se sabe o que fixeron estes días ademais de criticar”.

Rueda traslada a Luisa Sánchez o seu apoio para esta “enorme responsabilidade” nun Vigo no que “quedan moitísimas cousas por facer”

O presidente do PPdeG, Alfonso Rueda, trasladou a Luisa Sánchez o seu apoio e o do Partido Popular de Galicia para a “enorme responsabilidade” que asume desde hoxe nunha cidade, Vigo, na que “quedan moitísimas cousas por facer”.
“Grazas, Luisa, por ser valente e ser quen de aglutinar a tanta xente. Hoxe empeza unha nova etapa e estaremos todos contigo para que asumas con éxito esta enorme responsabilidade”, remarcou ante os asistentes ao XIV Congreso Local do PP de Vigo no que Luisa Sánchez foi proclamada nova presidenta cun apoio do 96,8 %.
Rueda salientou o “paso á fronte” da nova líder, que ten claro que “aquí non hai nada imposible”, e recomendoulle “ter sentidiño, realismo e ir paso a paso”, marcándose “metas alcanzables”, “avanzando e nunca retrocedendo, sen deixarse distraer”. Ademais, instou ao novo equipo a “non desperdiciar” esta principio do que “ten que saír moitísima ilusión”.
Así mesmo, animou a Luisa a “aproveitar” a toda a xente que forma parte do PP de Vigo, a tantos militantes “de sempre” que estiveron “ás duras e ás maduras”, sempre pensando na “unión para conseguir cousas”. “Anímote a escoitar a cada persoa, cada unha coas súas lexítimas opinións e o seu xeito de entender esta cidade, pero todas co mesmo obxectivo e convencemento de mellorala”, engadiu.
Nese sentido, o líder dos populares galegos salientou a Historia do PP na primeira cidade de Galicia e agradeceu o traballo de todos os presidentes e presidentas locais que tivo ata agora o partido na cidade.
“AQUÍ NON SE PODEN PERDER MÁIS OPORTUNIDADES”
Por outra banda, Rueda alertou de que “o mundo vai moi rápido e en Vigo non se poden perder máis oportunidades”, polo que “quen non estea —dixo— por tender pontes e non illarse vai pagar as consecuencias”. “Vigo ten que ser unha cidade puxante e o ruído non vale de nada”, apuntou.
Neste sentido, apelou ao “espírito de cooperación” e a “seguir facendo moitas cousas” pola urbe olívica, pero sempre “con administracións que sexan responsables”, porque “a confrontación por sistema non é boa para conseguir as cousas, ao contrario”. “Non creo que haxa que buscar sempre inimigos exteriores que sempre teñen a culpa de todo. Aquí non hai ninguén dedicado a amolar, todos queremos que na primeira cidade de Galicia todo sexa posible”, agregou.
O presidente do PPdeG lembrou que en Vigo tamén hai moito dese “Estilo Galicia” e “Galicia Calidade” que o Goberno galego quere implantar nas catro provincias, con proxectos que a xente “entenda, aprecie e considere como seus, como avances conseguidos entre todos en boa harmonía”.
Entre os moitos compromisos xa cumpridos ou en marcha nesta urbe, puxo como exemplo a Cidade da Xustiza, un “orgullo” e un “emblema”; o polígono de Navia, onde se van concentrar a maior parte das vivendas públicas que se van construír esta lexislatura en Galicia; o IES de Navia, que “por fin podemos facer”; o Centro de Asociacionismo, que “ten que existir igual que noutros sitios”; e o Complexo Hospitalario Álvaro Cunqueiro, que é “un orgullo que provoca o orgullo de todos, empezando polos que traballan aí”.
LUIS LÓPEZ: “A PROVINCIA NECESITA UN PP DE VIGO FORTE E EXEMPLAR”
Pola súa banda, o presidente do PP de Pontevedra, Luis López, destacou a capacidade de traballo da nova presidenta do PP de Vigo, así como o talento e a proximidade que amosa día tras día. “Luisa sabía que dar o paso era arriscado, e aceptou; que era mellor quedar como estaba, e comprometeuse; que esta tarefa era difícil, e respondeu; como demostra tamén que é a mellor aliada de Vigo na Deputación”, destacou o presidente provincial.
Luis López amosou o seu apoio incondicional á nova presidenta local e indicou que todo o PP provincial se poñerá á súa disposición porque Vigo é fundamental para a provincia e para Galicia.  “A provincia necesita un Vigo líder. A provincia necesita un PP de Vigo forte, sólido e exemplar. Hoxe marcho de aquí tranquilo e esperanzado porque sei que con Luisa mañá mesmo empeza unha ‘Reconquista’”, indicou o dirixente popular.
O presidente provincial destacou que hoxe é un gran día de celebración para todos os populares. “Hoxe sae de aquí un partido máis unido, máis cohesionado e máis estruturado do que entrou, sae un proxecto definido, un proxecto 100% vigués e cun liderado que vén para quedarse, porque aquí se abre un novo ciclo que non se pon teito nin político nin electoral”, precisou Luis López.
Finalmente, o presidente provincial agradeceu o enorme labor levado a cabo pola presidenta da xestora, Ana Ortiz, e polo seu equipo, que hai un ano decidiron dar un paso á fronte e poñerse nesta etapa de transición ao fronte do partido, que chegou a este Congreso con ganas, fresco e renovado.
No Congreso, entre outros moitos representantes do Partido Popular, estiveron a secretaria xeral do PPdeG, Paula Prado; o presidente do Parlamento, Miguel Santalices; o voceiro do Grupo Parlamentario Popular, Alberto Pazos; o eurodeputado Adrián Vázquez; deputados autonómicos e nacionais e senadoras; a secretaria xeral provincial Luisa Piñeiro; ou os presidentes do PP na Coruña, Miguel Lorenzo, e en Pontevedra, Rafa Domínguez.
Así mesmo, os membros do Goberno galego Román Rodríguez, María Jesús Lorenzana, María Martínez Allegue, Antonio Gómez Caamaño e José López Campos; ou o responsable do Porto de Vigo, Carlos Botana.

O Grupo Popular apoia solicitar ao Goberno central unha regulación das comunidades enerxéticas de base cidadá, especialmente as radicadas no rural

O Grupo Popular apoiou hoxe a aprobación no Parlamento de Galicia dunha proposición non de lei a través da que se solicita ao Goberno central unha regulación das comunidades enerxéticas de base cidadá, especialmente as radicadas no ámbito rural, que recoñeza ás comunidades de montes veciñais en man común, sempre que o soliciten expresamente, como comunidades enerxéticas de pleno dereito segundo o disposto nos artigos 12 bis e seguintes da Lei 24/2013.

O portavoz popular de Industria, Rubén Lorenzo, lembrou que o Goberno de España “ten pendente desde hai case dous anos aprobar un proxecto de Real Decreto polo que se desenvolvan as figuras das comunidades de enerxías renovables e as comunidades cidadáns de enerxía”.

“Resulta fundamental dotar dun marco lexislativo claro ás comunidades enerxéticas e para iso é importante a aprobación desa norma que leva case dous anos no caixón do Goberno socialista, tendo en conta as aportacións que se fagan desde as comunidades autónomas”, indicou.

DEMOCRATIZACIÓN DA ENERXÍA

Rubén Lorenzo asegurou que as comunidades enerxéticas “son xa un mecanismo de democratización da enerxía e unha boa vía para fomentar a descarbonización da nosa economía” e por este motivo o PPdeG incluíu no seu programa electoral co que se presentou ás pasadas eleccións autonómicas o impulso destas figuras, que permiten acadar un aforro enerxético á cidadanía, que, ademais, amosan cada vez máis interese por este tipo de iniciativas comunitarias.

No debate desta iniciativa parlamentaria, o portavoz popular propuxo que as comunidades de montes veciñais en man común “non se consideren de xeito automático como comunidades enerxéticas, senón que teñan que solicitalo expresamente, de tal xeito que contan cuns estatutos onde quede claro os fins enerxéticos das mesmas”.

O Parlamento de Galicia demanda ao Goberno central un novo programa Moves para a compra de vehículos eléctricos e coches híbridos enchufables

O Parlamento de Galicia aprobou hoxe a proposición non de lei do Grupo Popular a través da que se solicita ao Goberno de España a elaboración dun novo programa Moves de xestión unificada para a compra de vehículos eléctricos e coches híbridos enchufables, que incorpore o desconto directo en factura. Neste sentido, tendo en conta o momento crítico no que se atopa o sector nun proceso de transición progresivo, apoiaranse con este programa outras tecnoloxías, incluídos os motores de combustión, en función do nivel de emisións de gases. A iniciativa inclúe, ademais, a simplificación dos trámites administrativos para impulsar o despregamento das infraestruturas de recarga e a creación dun Plan Moves Recarga para facilitar o seu desenvolvemento nas zonas que non contan coa cobertura necesaria.

O deputado popular Miguel Fidalgo lamentou que o Goberno central derrogou o Plan Moves III logo de “verse incapaz de prorrogar este programa debido a unha tramitación apresurada e improvisada”, co agravante de que o atraso na prórroga deste plan “xerou case 1.600 expedientes fora do programa, falta de uniformidade na xestión entre comunidades autónomas e incerteza por non saber como manexar estas solicitudes”.

MÁIS QUE URXENTE

“Hoxe a necesidade de impulsar un novo programa Moves IV é máis que urxente”, indicou o deputado popular, quen lembrou que esta iniciativa “foi unha promesa feita por Pedro Sánchez hai un ano”. Neste sentido, considerou “imprescindible que este novo programa se deseñe de forma que responda verdadeiramente ás necesidades da sociedade, cunhas bases afastadas da burocracia excesiva do Moves III, como veñen demandando as comunidades autónomas e todos os axentes implicados”.

Miguel Fidalgo urxiu “deseñar un programa Moves IV que elimine as complexidades actuais e permita aos beneficiarios acceder ás axudas de maneira áxil e sinxela, xestionado de maneira centralizada”.

Ademais, recollendo as propostas que xa lle fixeron os conselleiros de Enerxía das comunidades autónomas á ministra, este novo plan debería incorporar descontos directos nas facturas dos beneficiarios ao adquirir vehículos eléctricos ou instalar puntos de recorga, así como unha redución do IVE, seguindo o exemplo doutros países europeos como Noruega, Países Baixos ou Alemaña.

O deputado popular rematou a súa intervención salientando o programa Renova, posto en marcha pola Xunta este ano e que conta con máis de 600 solicitudes, que xa esgotaron máis da metade do crédito dispoñible en apenas dúas semanas. “Con este programa, que xa leva dúas edicións, Galicia é das primeiras comunidades autónomas en aprobar un plan de apoio específico para incentivar a compra de vehículos eficientes entre particulares e empresas, cun orzamento de 3,1 millóns de euros e axudas máximas de 4.600 euros segundo o nivel de emisións”, concretou.

O Grupo Popular solicita ao Goberno central que exima do pago do IRPF a quen perciba o salario mínimo interprofesional

O Grupo Popular vén de rexistrar unha proposición non de lei a través da que demanda ao Goberno de España que exima do pago do imposto sobre a renda das persoas físicas (IRPF) a quen perciba o salario mínimo interprofesional. Neste sentido, o portavoz Alberto Pazos pediu que a suba do salario mínimo “non se converta nun negocio redondo para o Goberno de Pedro Sánchez que, primeiro, ponlle o carameliño doce na boca dos traballadores con menor remuneración para despois darlle o bocado amargo de que unha parte desa subida salarial vaia directamente ás arcas da Administración estatal”.

Alberto Pazos cualificou de “paragóxico que o Goberno central aprobara unha suba de 700 euros anuais do salario mínimo interprofesional sen ter en conta que con este incremento dos ingresos os seus perceptores estarán obrigados a presentar a corresponde declaración do imposto sobre a renda”. Así, explicou que o traballador deberá pagar o incremento correspondente ás cotizacións sociais (45 euros) e facer fronte ao imposto sobre a renda das persoas físicas (outros 301 euros), “o que supón que, aos 700 euros que verá incrementado o seu salario, deberá restarlle os 346 euros que deberá ingresar nas arcas da Administración estatal, que en total ingresará a non desdeñable cantidade de 1.400 millóns de euros”.

Diante desta situación, o Grupo Popular solicita que o Goberno de España exima do pago do imposto sobre a renda das persoas físicas a quen perciba o salario mínimo interprofesional, “de xeito que todos os traballadores beneficiados por esta suba ingresen integramente nos seus petos a totalidade do aprobado polo Goberno de España e non se converta esta decisión nun negocio redondo para a Administración estatal”, manifestou.

PARA SENTIRSE MOI ORGULLOSOS

Nunha comparecencia ante os medios centradas en políticas sociais, Alberto Pazos referiuse á recente enquisa de condicións de vida publicada polo Instituto Nacional de Estatística para salientar que “son uns datos, tendo sempre moi presente que todo o que se faga para combater a pobreza e mellorar o nivel de vida dos galegos será pouco, para sentirse moi orgullosos do traballo que veñen facendo os Gobernos do Partido Popular, en especial unha Consellería de Política Social disposta en todo momento a axudar a quen máis o necesita e conseguir que cada día sexan menos os galegos que chegan con dificultade a fin de mes, situando a Galicia como a comunidade con menores índices de desigualdade e un referente no eido da inclusión social”.

Segundo se recolle neste informe, Galicia foi a comunidade autónoma española na que máis baixou a taxa de risco de pobreza e exclusión social (o coñecido como taxa AROPE) ao pasar dun 25,5 por cento en 2023 ao 18,8 por cento en 2024, 6,,7 puntos de descenso nun só ano, fronte a unha baixada de só 0,7 puntos a nivel de toda España. Os datos desta enquisa tamén poñen de manifesto que Galicia avanza no descenso progresivo da poboación galega con carencia material e social severa, xa que rebaixou case á metade a taxa do 8,2 por cento que tiña en 2023, quedando o pasado ano no 4,8 por cento, unha cifra que tamén é practicamente a metade da que
se rexistra a nivel estatal.

“Outro dato que merece terse en conta desta enquisa do INE é a relativa á renda media por fogar, onde Galicia rexistrou o pasado ano un incremento do 11,5 por cento, ata situarse en 34.892 euros por fogar e achegarse aos case 37.000 euros da media nacional”, apuntou Alberto Pazos.

No apartado de persoas que non poden permitirse manter a vivenda cunha temperatura adecuada, Galicia pasou de estar cinco puntos por enriba da media estatal en 2009 a situarse o pasado ano por baixo da media estatal: 16,6 por cento en Galicia fronte ao 17,6 por cento de media nacional. No caso dos fogares que recoñecen chegar con moita dificultade a fin de mes, Galicia, logo dun descenso de tres puntos entre 2023 e 2024, pasou de estar por enriba da media estatal a situarse máis de dous puntos por baixo (8,7 en España e 6,6 por cento na Comunidade galega).

BASTA XA DE FEMINISMO SECTARIO

Por último, o portavoz popular lamentou que “seguimos á espera de que tanto a lideresa do BNG, a señora Pontón, como todas as feministas nacionalistas que con tanto orgullo ondean a bandeira en favor da igualdade amosen o seu rotundo rexeitamento e repulsa a noxenta e machista campaña impulsada pola CIG contra a conselleira de Política Social”.

Pazos criticou que esta campaña “non fai máis que atentar contra a dignidade dunha muller traballadora, que, como todos e todas, terá os seus acertos e os seus erros, pero á que non lle podemos negar ninguén un respecto absoluto, fuxindo de estereotipos repugnantes como o que utiliza a CIG neste panfleto, que é o máximo expoñente do machismo que domina ao BNG e a todas as súas organizacións satélites”.

“Basta xa deste feminismo sectario que agocha o nacionalismo galego, que tanto se queixa de supostos ataques machistas, cando en realidade se lle está confrontando con argumentos e feitos contrastados a súa demagoxia política, pero que non é quen de condenar un ataque persoal como o sufrido esta semana pola conselleira de Política Social ou por calquera muller que non comulgue coa súa doutrina política”, rematou.

O Grupo Popular pide que o Goberno central actualice canto antes as entregas a conta

A viceportavoz do Grupo Popular, Cristina Sanz, demandou hoxe no Parlamento galego ao Goberno central que “aprobe canto antes a actualización das entregas a conta”. “Aprobación inmediata, si; pero sen chantaxe e sen ser moeda de troco para outros fins que en nada benefician a Galicia”, engadiu.

Cristina Sanz lembrou que “a actual situación de incerteza respecto ao importe que van a recibir as comunidades autónomas en concepto de entregas a conta este 2025 deriva exclusivamente da incapacidade do Goberno de Pedro Sánchez para aprobar uns orzamentos en prazo por segundo ano consecutivo”.

“O Goberno de España ten que actuar, porque a demora na actualización das entregas a conta provoca que as comunidades autónomas teñan que recorrer, para evitar tensións de tesourería, a pólizas de crédito”, indicou a viceportavoz popular. En concreto, dixo que a demora da actualización das entregas a conta o pasado ano supuxo para Galicia un custo de 10 millóns de euros en concepto de maiores xuros, e a estimación para este ano 2025 sitúase en máis de 15 millóns de euros.

REFORMA DO SISTEMA DE FINANCIAMENTO

Así mesmo, Cristina Sanz considerou “imprescindible que se acade canto antes unha reforma do sistema de financiamento autonómico, insuficiente e caducado desde o ano 2014” e reiterou que “a nosa prioridade é conseguir que sexa un sistema de financiamento suficiente en recursos e cun reparto equitativo dos mesmos”. “Galicia leva anos defendendo que o sistema de financiamento debe basearse nun modelo que cubra o custo real dos servizos públicos, sendo a dispersión e o avellentamento as variables que máis impacto teñen no custe dos mesmos”, apuntou.

Respecto da débeda, a viceportavoz popular afirmou que “o acordo asinado entre o PSOE e ERC supón mutualizar a débeda de Cataluña entre todas as restantes comunidades autónomas”. Así, explicou que “a débeda non desaparece ata que se paga, polo que a quita autonómica pasa a engrosar a débeda do Tesouro de España e, polo tanto, a alícuota de débeda de todos os españois medra con esta operación”.

“Os españois máis prexudicados serán os dos territorios menos endebedados, como Galicia, que en termos netos pasan a deber máis”, sinalou Cristina Sanz, quen concretou que, no caso de aplicarse, cada galego debería un 20 por cento menos de débeda autonómica, pero a súa alícuota de débeda española subiría en 1.366 euros. “Ceder ante os cataláns carga a cada galego cunha débeda adicional de 470 euros”, concluíu.

 

Deputados do Grupo Popular reúnense con responsables do Consello Galego de Veterinaria

Os deputados do Grupo Popular Jesús María Fernández Rosende, Miguel Viso, Juan Casares e Enrique Barreiro mantiveron un encontro co presidente e o secretario do Consello Galego de Veterinaria, Ricardo Vecilla e Luís Núñez, respectivamente, no que abordaron todos os problemas que neste momento afectan ao exercicio da profesión veterinaria e que, en consecuencia, poden afectar á saúde dos animais.

“Hai que evitar o maltrato animal tanto por acción como por omisión”, sinalou o deputado popular Fernández Rosende, porque afirmou que “maltrato é non poder proporcionar aos animais os tratamentos veterinarios adecuados debido ao encarecemento dos mesmos, logo da entrada en vigor da nova normativa europea e nacional”.

A modo de exemplo, na reunión abordouse o problema que presentan algúns principios activos de determinados medicamentos que, polo feito de ser específicos para veterinaria, se venden a un prezo moito máis elevado que os destinados a humanos.

Tanto os deputados populares como os representantes do Consello Galego de Veterinaria acordaron continuar con este tipo de reunións nas que continuar afondando nos aspectos problemáticos para este sector.