Categoría: Parlamento de Galicia

A portavoz de Igualdade do Grupo Popular, Raquel Arias, considerou hoxe “intolerable que a señora Pontón escolla a súa submisión ao sindicato que goberna o BNG antes que reprobar a repugnante campaña machista da CIG contra a conselleira de Política Social”. “Ese é o feminismo sectario que practica o nacionalismo galego, totalmente mudo e indiferente cando se ataca a alguén que non comulga co seu ideario político”, indicou.

“A señora Pontón e todas as nacionalistas galegas deberían ter moi presente que o feminismo e a igualdade non entenden de cores políticas”, sinalou a portavoz popular, quen asegurou que “o Partido Popular non quere dar leccións de feminismo e a igualdade a ninguén, porque estamos convencidos que son obxectivos que debe afrontar e conseguir a sociedade no seu conxunto”.

AGOCHADA DETRÁS DA CIG

Raquel Arias lamentou que “a señora Pontón considere paternalistas e machistas as réplicas do Presidente Rueda ás súas intervencións no Pleno, cando o que queda patente en cada sesión é que o Presidente da Xunta refuta con datos e argumentos sensatos toda a demagoxia e a terxiversación coa que a portavoz nacionalista adorna as súas actuacións”.

“Coincidimos coa señora Pontón en que ás mulleres en política hai que criticarnos do mesmo xeito que aos homes, algo que parece que a ela tan mal lle senta cando a crítica ven desde os escanos do Grupo Popular, pero non chegamos a comprender que aparte a súa loita feminista e defensora das mulleres para agocharse detrás dunha noxenta campaña de quen realmente manda no BNG: a UPG e a CIG”, apuntou Raquel Arias.

O Parlamento de Galicia aprobou hoxe a proposición non de lei do Grupo Popular, que non contou co apoio dos deputados do PSdeG, a través da que se demanda ao Ministerio de Agricultura, Pesca e Alimentación medidas dirixidas a mellorar o sector apícola ante a insostible situación pola que está a atravesar pola competencia desleal existente e a alta mortalidade das abellas.

O portavoz popular do Medio Rural, Miguel Viso, subliñou que o sector apícola “desempeña un papel crucial na nosa sociedade, porque non só garante a produción de mel e outros produtos derivados, senón que é fundamental para a biodiversidade e a seguridade alimentaria”.

Porén, lamentou que nos dous últimos anos a produción de mel en España caeu ata as 27.000 toneladas, o que supón un descenso do 21 por cento con respecto ao ano 2021. Entre os motivos causantes desta situación, Miguel Viso referiuse ás crecentes importacións de mel, cun crecemento do 19 por cento no último ano, e a conseguinte baixada do prezo do produto; e a alta mortalidade das abellas, provocada por enfermidades como a varroa, o impacto das alteracións climáticas ou a proliferación de especies invasoras, como a vespa velutina.

COMPROMISO DA XUNTA

“Galicia non é allea a esta crise”, sinalou o deputado popular, polo que considerou necesario reforzar os controis nas importacións de mel, asegurando que compren cos mesmos estándares de calidade e seguridade que se esixen aos produtores galegos; garantir unha rastrexabilidade efectiva en todo o proceso de comercialización, impedindo a venta de mel importada como se fose produción nacional; o cumprimento estrito da Lei da cadea alimentaria, para evitar abusos na formación de prezos e garantir que os apicultores reciban un prezo xusto polo seu traballo; e a promoción institucional dos produtos apícolas galegos, a través de campañas específicas.

Miguel Viso salientou que “a Xunta xa demostrou o seu compromiso coa apicultura, habilitando 1,4 millóns de euros en axudas este ano para modernizar o sector, combater enfermidades e loitar contra especies invasoras”, pero manifestou que “esta crise require unha resposta a nivel estatal, polo que é necesario que o Ministerio de Agricultura adopte medidas urxentes que garantan o futuro da apicultura”.

O Parlamento de Galicia aprobou hoxe, co voto en contra do PSdeG, a proposición non de lei do Grupo Popular a través da que se demanda ao Goberno de España que flexibilice e adapte os contratos da Lei de medidas para mellorar o funcionamento da cadea alimentaria ás condicións peculiares do sector cárnico galego.

O deputado popular Juan Casares lembrou que a Lei de cadea alimentaria “foi un paso crucial cara unha cadea alimentaria máis xusta e transparente, xa que fortaleceu a posición dos operadores máis vulnerables e promoveu as relacións comerciais equitativas no sector”.

Porén, Casares manifestou que o Goberno central “pode na actualidade implementar certos cambios que flexibilicen os termos da contratación alimentaria co fin de adaptarse á realidade cotiá e ás condicións peculiares do sector cárnico galego”.

DEMANDAS CONCRETAS

En concreto, o deputado popular demandou incrementar o monto mínimo establecido para a obrigatoriedade de formalizar o contrato por escrito en todas as operacións comerciais, que agora se sitúa en 1.000 euros, algo que permitiría flexibilizar o mercado de becerros; e aumentar o período obrigatorio a cumprir para a gravación dos contratos no Rexistro dixital de contratos alimentarios, xa que moitos dos tratantes que operan neste sector teñen serias dificultades para adaptarse á novas tecnoloxías.

Juan Casares tamén propuxo reforza-la parte do Observatorio da cadea alimentaria que se dedica ao sector cárnico, dotándoo de índices de referencia de prezos e calidades aos que os axentes do sector se poidan acoller; así como incrementar os controis da Axencia de Información e Control Alimentarios (AICA), para desenvolver un control exhaustivo dos prezos pagados, os tempos de cobro e os abusos de calquera natureza nas relacións comerciais.

O deputado popular cualificou de “estratéxico para a economía rural” o sector cárnico galego, xa que achega o 34,5 por cento do valor da produción final agraria e conta con máis de 40.000 explotacións e preto de 200 industrias de transformación que empregan a máis de 4.500 traballadores a tempo completo.

“Ademais, a súa importancia social e económica supera o que reflicten estas cifras, xa que o sector cárnico contribúe tanto ao mantemento da poboación rural como da superficie agraria utilizada, aspectos fundamentais para a sostibilidade tanto social como medioambiental ou económica do campo galego”, rematou Juan Casares.

O Parlamento de Galicia aprobou hoxe por unanimidade a proposición non de lei do Grupo Popular a través da que se demanda ao Goberno de España que impulse todas as iniciativas políticas e executivas que sexan precisas para culminar o proceso de transferencia a Galicia da titularidade e competencias sobre a AP-9, de conformidade coa proposición non de Lei aprobada polo Parlamento galego e que se tramita ante o Congreso dos Deputados. Así mesmo, pídese que, con carácter inmediato e con independencia do proceso anterior, se implante a gratuidade das peaxes nas autoestradas AP-9 e AP-53, as máis caras de España, en cumprimento do compromiso adquirido polas formacións políticas que sustentan o Goberno de Pedro Sánchez nas últimas eleccións autonómicas.

O portavoz popular de Infraestruturas, Roberto Rodríguez, lembrou a proposición de lei aprobada por unanimidade do Parlamento galego a través da que se solicita a transferencia a Galicia da competencia sobre a xestión da AP-9, asumindo o Goberno central as repercusións económicas e financeiras dos convenos en vigor, das actuacións en infraestruturas xa comprometidas e as necesarias no futuro que non sexan responsabilidade da Xunta.

DESCONFIANZA

Porén, Roberto Rodríguez sinalou que “existe unha desconfianza sobre que esta transferencia sexa unha realidade a curto prazo baseada na falta de vontade expresada polo propio Goberno de Pedro Sánchez e na frivolidade coa que o Goberno de España ten abordado o custe deste compromiso”. En concreto, lamentou que xa se produciron 20 aprazamentos nesta lexislatura ao trámite de emendas na tramitación da proposición de lei de transferencia da AP-9 no Congreso, que se incrementan ata 35 aprazamentos desde que Pedro Sánchez está na Moncloa.

“Non é que a Galicia se lle estea a negar a transferencia mentres se rescatan outras peaxes, como recentemente a AP-7 en Alacante, porque é máis: a Galicia estáselle negando mesmo o debate, o que supón unha falta de respecto a un acordo unánime do Parlamento galego que merece unha resposta igualmente unánime”, indicou.

Roberto Rodríguez demandou “un trato xusto e equitativo” ao Goberno de Pedro Sánchez, que tamén está a negar a información que lle foi remitida á Comisión Europea trala apertura dun expediente para analizar a situación da moratoria na concesión a Audasa, así como os termos do estudo realizado polo Goberno de España sobre o custo económico do rescate da concesión da AP-9 e que levaron a concluír que esa medida non é viable.

UN ANO Á ESPERA PARA SER RECIBIDOS

Por último, o portavoz popular criticou que o ministro de Transportes non atendera “ata en oito ocasións no último ano a solicitude para que recibira á conselleira de Infraestruturas, un encontro no que se lle trasladaría a solicitude para que se avalíe a oportunidade do rescate da autoestrada AP-9, toda vez que coa aprobación das últimas bonificacións, cuxo custo anual supera os 81 millóns de euros, se abre un novo escenario que invita ao Goberno central a reconsiderar o rescate desta autoestrada”.

“Hai tempo que a Xunta está a instar ao Goberno central a revisar os acordos con Audasa e adoptar medidas ante as evidencias dun excesivo enriquecemento da concesionaria, que segue incrementando os beneficios mentres sube as tarifas cada ano e a AP-9 e a AP-53 continúan entre as autoestradas máis caras de España”, sinalou Roberto Rodríguez.

A deputada do Grupo Popular Nicole Grueira salientou hoxe que a Xunta está a investir 43 millóns de euros nun plan para modernizar as oficinas rurais e ofrecer un servizo máis eficiente á cidadanía. Así mesmo, afirmou que o Goberno galego traballa nun novo decreto que regulará o rexistro do persoal funcionario público habilitado, que permitirá prestar asistencia ás persoas que necesiten axuda para usar os medios electrónicos.

Nicole Grueira destacou que a Xunta “está investindo máis ca nunca nas oficinas agrarias galegas para mellorar os servizos que prestan, adaptalas ás novas necesidades e facilitar a tramitación de todos procesos que xestionan”. Na actualidade, a rede de oficinas rurais conta con 69 oficinas, organizadas en 15 áreas comarcais, nas que traballan máis de 450 profesionais entre veterinarios, técnicos agrarios e administrativos.

OFICINAS DE REXISTRO AUXILIARES

“As oficinas rurais seguen funcionando como oficinas de rexistro auxiliares e de atención á cidadanía, onde calquera persoa pode acudir a facer xestións de forma presencial”, indicou a deputada popular, quen lembrou que a Consellería do Medio Rural habilitou ordenadores públicos na maioría das oficinas, de xeito que calquera persoa pode facer trámites por vía electrónica, contando sempre coa asistencia do persoal funcionario.

Na súa intervención, Nicole Grueira insistiu na necesidade de que o Goberno central exerza as súas competencias en materia de competitividade para garantir o acceso a internet no rural galego. “Non só é a única autoridade con competencia en todo o relativo a conexións a internet, senón que ademais conta con fondos para exercelas”, manifestou referíndose ao Programa UNICO que pon a disposición do Ministerio un financiamento de máis de 4.300 millóns de euros para universalizar as infraestruturas dixitais e a cohesión territorial.

O Parlamento de Galicia aprobou hoxe, co voto en contra dos deputados do PSdeG, unha proposición non de lei a través da que se demanda ao Goberno de España a contratación urxente do persoal necesario para cubrir as necesidades dos centros de atención dos mariñeiros existentes en Galicia de competencia do Instituto Social da Mariña (ISM), dotándoos ao mesmo tempo dos medios materiais e tecnolóxicos necesarios para axilizar os recoñecementos médicos. Así mesmo, mentres non se realizan estas melloras, solicítase establecer un plan de continxencia que permita atender inmediatamente as necesidades dos mariñeiros e impulsar convenios de colaboración con outras institucións sanitarias para garantir a súa cobertura médica.

A deputada popular Dolores Hermelo afirmou que “a falta de persoal no Instituto Social da Mariña está a crear un problema importante para os traballadores do mar, xa que a expedición dos recoñecementos médicos, sen os cales non poden embarcar, está a rexistrar importantes atrasos, poñendo en risco a saúde dos traballadores do mar e o funcionamento das frotas”.

ENVELLECEMENTO DO PERSOAL

Dolores Hermelo explicou que “o envellecemento do persoal que traballa neste sector, tendo en conta que ata os 50 anos as revisións sanitarias son bianuais pero a partir desa idade é anual, pon de manifesto a necesidade de máis facultativos, que tamén son os encargados de revisar os botiquíns das embarcacións e impartir os cursos de formación sanitaria”.

“Na actualidade xa temos direccións do Instituto Social da Mariña sen facultativo e sen enfermería, mentres outras resisten baixo mínimos, o que deriva en que os traballadores do mar están sen garantías sanitarias, tanto preventivas como de revisións e control”, indicou.

Diante desta situación, a deputada popular alertou que os mariñeiros “recorren a médicos ou farmacéuticos de pago para a revisión dos botiquíns ou para conseguir formación profesional”, o que se traduce tamén en que “os barcos non atopan mariñeiros e cando os teñen non hai médicos para tramitar os certificados médicos e poder enrolarse”.

O Parlamento de Galicia aprobou hoxe a proposición non de lei do Grupo Popular, co voto en contra dos deputados socialistas, a través da que se demanda ao Goberno de España que defenda ante a Comisión Europea a exclusión total do atún do Acordo de Libre Comercio con Tailandia e, por tanto, do proceso de liberalización arancelaria, así como o establecemento de normas sólidas e equitativas que garantan a igualdade de condicións entre Tailandia e a Unión Europea que evite a competencia desleal en todos os produtos pesqueiros.

O portavoz popular do Mar, Miguel Fidalgo, explicou que a Unión Europea e Tailandia están ultimando as negociacións para a sinatura dun acordo de libre comercio, que podería pecharse a mediados do presente ano 2025. O obxectivo deste acordo é impulsar o comercio e o investimento, así como a eliminación de obstáculos ao comercio dixital e ao comercio de enerxía e materias primas, apoiando así as transicións dixital e ecolóxica.

POUCA TRANSPARENCIA

“O avanzado estado das negociacións comerciais e a pouca transparencia en canto a información preocupan á industria transformadora de conservas de peixe e marisco en Galicia”, sinalou o portavoz popular. Tailandia, cunha produción superior a 550.000 toneladas segundo os datos da FAO, é o principal produtos e exportador mundial de conservas de atún, tendo unha boa cota do mercado da Unión Europea.

Porén, a ausencia de frota propia, cunhas capturas de atún enteiro tailandesas inferiores a 4.000 toneladas anuais, fai pensar que Tailandia teña que realizar unha importación masiva de peixes onde existen serias dúbidas do cumprimento en materia de pesca ilegal ou sanitaria, e tamén en materia de dereito ao traballo. Esta situación conlevaría que estean a utilizar materias primas que non serían aptas na Unión Europea e implicando unha rotura da igualdade de condicións coas empresas europeas.

Miguel Fidalgo manifestou que “un acordo de libre comercio entre a UE e Tailandia que supoña unha apertura do mercado comunitario aos produtos do atún sería un golpe letal para a industria galega e española de peixe e marisco”, polo que “resulta fundamental que a Comisión Europea esixa a exclusión total do atún deste proceso de liberalización arancelaria e o establecemento de normas sólidas e equitativas que garantan a igualdade de condicións entre Tailandia e a Unión Europea que evite a competencia desleal”.

O Grupo Popular proporá no Pleno da vindeira semana a aprobación polo Parlamento de Galicia dunha resolución a través da que se pide á Mesa e á Presidenta do Congreso que desbloquee a tramitación da proposición de Lei orgánica de transferencia da titularidade e competencias da AP-9, acordando de xeito inmediato a finalización do prazo para a presentación de emendas para que este texto lexislativo avance cara a súa aprobación definitiva. Así mesmo, pedirase ao Goberno central que recupere o 100 por cento da bonificación polas baixas de maternidade ou paternidade, logo de que as substituíra por unha bonificación fixa de 366 euros sobre a cotización do empregado en situación de baixa.

Ao remate da Xunta de Portavoces, o portavoz popular, Alberto Pazos, comezou a súa comparecencia ante os medios celebrando que “hoxe fai un ano das eleccións autonómicas nas que os galegos volveron confiar maioritariamente no Partido Popular de Galicia e Alfonso Rueda conseguiu a súa primeira maioría absoluta para seguir gobernando con todo o sentidiño Galicia”. “Foron 12 meses nos que Alfonso Rueda xa deu mostras do seu xeito de gobernar e de ter cumprido ou en proceso de realización os máis de 800 compromisos recollidos no programa electoral co que se presentou ás eleccións”, anotou.

“Nos imos seguir gobernando centrados no que realmente preocupa e necesitan todos os galegos, deixando para BNG e PSdeG a demagoxia e as difamacións coa que xa nos teñen acostumados, sen iniciativas que aporten algo novidoso ao que xa está facendo a Xunta ou viables coas que poder complementar a acción do Goberno de Rueda, pero con continuas faltas de respecto a conselleiros e funcionarios públicos”, manifestou.

En concreto, Alberto Pazos referiuse á “indignante e sexista caricatura da conselleira de Política Social realizada polo sindicato satélite do BNG que coñecemos onte, e que aínda estamos á espera de que as tan cacarexadas feministas galegas rexeiten e pidan a retirada desa campaña, así como unha rectificación pública desta falta de respecto a unha conselleira, que por enriba de todo é unha muller traballadora e respectable”.

Respecto da orde do día da sesión plenaria que terá lugar a vindeira semana, o Grupo Popular defenderá unha proposición non de lei a través da que se pide á Mesa e á Presidencia do Congreso o desbloqueo da tramitación da proposición de Lei orgánica de transferencia da titularidade da AP-9, de xeito que se poña fin ao prazo de presentación de emendas para que este texto lexislativo avance cara ao seu debate de aprobación definitivo.

“Ademais, incluímos nesta ocasión que o Ministerio de Transportes e Mobilidade Sostible avalíe a oportunidade do rescate da AP-9, tendo en conta que, coas novas bonificacións das peaxes anunciadas polo Goberno central, o custo da indemnización polo rescate e o custo das bonificacións ata o final da concesión supoñen uns importes moi semellantes”, apuntou.

20 PRÓRROGAS

Alberto Pazos criticou que “levamos 20 prórrogas no Congreso, contando xa a que se aprobou esta mesma mañá, ao prazo de presentación de emendas á proposición de lei para a transferencia da titularidade da AP-9, prórrogas que chegan ata as 35 se contabilizamos as habilitadas pola Mesa do Congreso desde a chegada de Pedro Sánchez á Moncloa, o que pon de manifesto o nulo interese do Partido Socialista en tramitar esta transferencia a Galicia, manexando ao seu antollo á Presidenta da Mesa do Congreso”.

A segunda das proposicións non de lei que o Grupo Popular defenderá no Pleno da vindeira semana ten que ver coa recuperación do 100 por cento da bonificación polas baixas de maternidade, logo de que o Goberno de Pedro Sánchez fixera desaparecer esta bonificación, sendo substituída por unha fixa de 366 euros sobre a cotización do empregado en situación de baixa.

“Estas medidas representan un risco para a estabilidade laboral das persoas que substitúen a traballadores durante situacións vinculadas ao nacemento e coidado de menores, así como no exercicio da atención aos menores lactantes ou os riscos asociados ao embarazo e lactancia natural, polo que consideramos que a bonificación na contratación nestes casos é esencial para avanzar na materialización dos dereitos das mulleres e promover unha participación máis equitativa dos homes nas responsabilidades do coidado”, afirmou Alberto Pazos.

A sesión plenaria inclúe a comparecencia do conselleiro de Educación, Ciencia, Universidades e Formación Profesional para informar das liñas de actuación en materia de I+D+i da Xunta de Galicia.

Dentro do apartado de preguntas ao Goberno galego, o Grupo Popular interesarase pola actualización das entregas a conta a Galicia, logo do cambio de criterio discrecional do Goberno central para tentar forzar a aprobación das medidas esixidas polos seu socios de goberno, “unha decisión arbitraria que no caso de Galicia suporá unha redución das entregas a conta de 700 millóns de euros respecto das que se comunicaron a comezos de ano”.

A segunda das preguntas ten que ver coa sanidade e a atención nos hospitais comarcais e, en concreto, o resultado das medidas postas en marcha pola Xunta para incentivar a cobertura de prazas nestes hospitais comarcais. E, por último, o Grupo Popular tamén se interesará pola evolución e a finalidade das axudas extraordinarias ao retorno que ofrece a Secretaría Xeral de Emigración, dirixidas especialmente a facer fronte aos gastos derivados do seu regreso a Galicia.

SOLICITUDE INFORMACIÓN INTERRUPCIÓN DO PLENO

Por outra banda, Alberto Pazos informou de que na Xunta de Portavoces “solicitamos
información sobre a interrupción premeditada, planificada e coordinada que sufrimos do pasado Pleno”. Neste sentido, considerou “intolerable que grupos políticos amparen actuacións claramente antidemocráticas como é a interrupción deliberada dunha sesión plenaria do máximo órgano de representación e debate de Galicia”.

“Consideramos necesario garantir que calquera grupo se exprese con total liberdade e cando é o quenda do Goberno galego o poida facer nas mesmas condicións”, manifestou o portavoz popular, quen lamentou que “parece que hai quen aplaude que esas condicións non sexan as mesmas e consideran que o Goberno de Galicia e a representación do PPdeG non temos dereito a expresarnos con mesma liberdade como a que o fan outros grupos políticos”.

O portavoz do Grupo Popular, Alberto Pazos, advertiu hoxe que a reforma da Lei de dependencia, aprobada o pasado martes polo Goberno central, “derivará inevitablemente nun incremento considerable e preocupante da débeda de máis de 2.500 millóns de euros que na actualidade xa ten con Galicia” pola atención aos dependentes, polo que demandou que o Goberno de Pedro Sánchez “adapte a súa aportación aos novos servizos que esta modificación obriga a prestar tanto a comunidades autónomas como a concellos”.

Alberto Pazos lembrou que na sesión plenaria celebrada esta semana aprobouse unha proposición non de lei do Grupo Popular, que non contou co apoio dos deputados socialistas, a través da que se reitera ao Goberno central a solicitude para que cumpra o recollido na Lei de dependencia e abone a Galicia os máis de 2.500 millóns de euros que lle debe por non sufragar o 50 por cento do custo da atención aos dependentes que lle corresponde.

MÁIS SERVIZOS SEN FINANCIAMENTO

“Cantas horas do servizo de axuda no fogar poderíamos financiar nos concellos con estes cartos?, cantas prazas de centros de día e novas casas do maior poderíamos poñer en marcha por toda a xeografía galega? ou canto poderíamos mellorar e axilizar a atención aos nosos dependentes se o Goberno central saldara a súa débeda de 2.500 millóns de euros con Galicia?”, cuestionouse Alberto Pazos.

O portavoz popular lamentou que “o Goberno de Pedro Sánchez, para tapar a súa incompetencia no cumprimento das súas obrigas en materia de dependencia, ponse de perfil e deu un paso máis o pasado martes aprobando unha reforma desta Lei de Dependencia, que obriga a comunidades autónomas e concellos a prestar máis servizos aos maiores e dependentes, pero sen poñer enriba da mesa o financiamento necesario para sufragar estes servizos nin ter feito consulta algunha previamente cos responsables autonómicos para a adopción destas novas medidas”.

“Saudamos a incorporación dalgunhas destas medidas ou os cambios introducidos na Lei de dependencia, máxime tendo en conta que a gran maioría foron propostos pola propia conselleira ao ministro o pasado mes de decembro e unha boa parte delas xa se están aplicando en Galicia desde tempo”, indicou o portavoz popular.

Porén, criticou que, “unha vez máis, o Goberno de Pedro Sánchez obrigue a comunidades e concellos a prestar novos servizos en materia de dependencia sen o correspondente respaldo financeiro, o que inevitablemente vai derivar nun incremento considerable e preocupante da débeda que na actualidade xa ten con Galicia de 2.500 millóns de euros”. Ademais, apuntou que esta ampliación de actividades do servizo de axuda no fogar fora do domicilio “se faga sen ter en conta a opinión dos concellos e se dispoñen do persoal suficiente para prestar estes servizos, cando xa é patente, a día de hoxe, a manifesta falta de persoal que teñen os concellos para atender o actual servizo de axuda no fogar”.

Alberto Pazos demandou aos socialistas galegos que “deixen de poñerse de perfil ante este grave problema financeiro que ten a Comunidade galega polo desprezo que amosa o Goberno de Pedro Sánchez para atender as necesidades dos maiores e dependentes e amosen a valentía e decisión que se lles está pedindo, non só desde o Goberno galego, senón desde os propios concellos de Galicia, que, da boca do presidente socialista da Fegamp, xa amosaron a súa preocupación pola falta de financiamento dos servizos que se presta aos dependentes”.

BOICOT AO GALEGO

Por outra banda, o portavoz popular cualificou de “penoso espectáculo o BNG está protagonizando coa súa moi particular defensa da nosa lingua”. Así, indicou que “primeiro foi a súa rotunda negativa a participar no proceso aberto pola Xunta de Galicia para renovar o Plan Xeral de normalización lingüística, do que os nacionalistas galegos se botaron fora voluntariamente polo simple feito de que non se ía facer o que eles queren facer”.

“E non lles chegou con illarse voluntariamente deste proceso de renovación e impulso da nosa lingua senón que intentaron boicotear a celebración desta primeira reunión, incitando a todos os asistentes a abandonar o encontro”, sinalou Pazos, quen apuntou que “felizmente os dous individuos que o BNG mobilizou para incendiar esta reunión quedáronse totalmente sos e foron os únicos que se marcharon da reunión, quedando os máis de cen convocados traballando con normalidade e poñendo o seu grao de area para garantir o futuro e a promoción do galego a través do consenso, o diálogo e a vontade de escoita”.

Alberto Pazos criticou que “a loita do BNG e das súas organizacións satélites por apropiarse de todo o que teña que ver coa nosa lingua tamén a tivemos que sufrir na sesión plenaria desta semana, cando un grupo de exaltados, convidados todos polo BNG e entre os que figuraba mesmamente a súa coordinadora de Organización e moitos concelleiros e liberados sindicais da CIG, intentaron rebentar o Pleno no momento en que o conselleiro de Cultura estaba respondendo a dúas interpelacións da oposición sobre a situación do galego”.

ACCIÓNS PLANIFICADAS E PREMEDITADAS

“Estamos a falar de dúas accións totalmente planificadas e premeditadas, que forman parte da liña de acción coordinada entre o BNG, a Mesa pola Normalización Lingüística e Queremos Galego para apropiarse de todo o que teña que ver coa nosa lingua e someter aos cidadáns para que acaten a súa ideoloxía, porque son incapaces de entender e respectar que o galego é propiedade de todos e que será entre todos como debemos chegar a un pacto social e político para o impulso do galego”, incidiu.

Pazos afirmou que “o que pon de manifesto esta situación é que no BNG e, por suposto, no propio Grupo Parlamentario, xa hai quen manda máis e da ordes por enriba da propia Ana Pontón, atendendo expresamente os desexos sobre o futuro da lingua galega expresados pola propia UPG, disposta a abordar a situación da lingua desde ‘o activismo social e cultural de maneira permanente’, coa convicción de que ‘a plena normalización da nosa lingua precisa dun Estado propio soberano’, defendendo que ‘o galego ten que ser a lingua vehicular no ensino e o idioma normal e xeral de uso na administración e servizos públicos e no conxunto da sociedade’, renunciando expresamente a calquera uso tolerante das dúas linguas oficiais de Galicia”.

A portavoz de Educación do Grupo Popular, Cecilia Vázquez, acusou hoxe no Pleno do Parlamento galego ao BNG de pretender que a Xunta incumpra a Constitución Española ao solicitar que non se autorice un grado universitario na Universidade Intercontinental da Empresa, “algo que sería totalmente arbitrario e limitaría a liberdade das persoas á iniciativa empresarial”. “O BNG odia a iniciativa privada e a liberdade de elección, porque so contemplan unha posibilidade: impoñer o pensamento único”, apuntou.

“Pola súa actitude sectaria, no BNG nunca lles gustou a Universidade Continental da Empresa, a pesar de que as universidades privadas son unha realidade en España e noutros países da nosa contorna, e que a súa posta en marcha supuxo ampliar o abano de opcións formativas para os universitarios galegos”, manifestou.

DUPLICIDADE DE TITULACIÓNS

Cecilia Vázquez asegurou que “é falso que a Lei 6/2013 do Sistema Universitario de Galicia impida a duplicidade de titulacións”, e explicou que “limitar que unha universidade privada imparta unhas ensinanzas, despois de superar os trámites preceptivos, é inconstitucional”. Neste sentido, lembrou unha sentenza recente que declarou inconstitucional unha parte da Lei universitaria de Aragón por impedir aos centros privados duplicar o plan de estudos do público.

“En Galicia podemos estar orgullosos de contar cun mapa de titulacións con máis de 130 graos públicos co obxectivo de que cada alumno galego poida cursar os estudos que queira en Galicia”, sinalou a portavoz popular.

Respecto da proposta do novo grao de dereito na Universidade Intercontinental da Empresa, Cecilia Vázquez explicou que “a Xunta non autorizou nada e se limitou a emitir un informe de pertinencia socioeconómica que se remitiu á Axencia para a Calidade do Sistema Universitario de Galicia (ACSUG), quen deberá emitir o informe final favorable ou desfavorable”.

Para rematar, Vázquez cuestionou aos grupos da oposición “como poden falar de privatización da universidade galega?, cando temos en marcha o Plan de financiamento universitario 2022-2026, dotado co maior apoio da historia por parte da Xunta: 538 millóns de euros; avanzamos no obxectivo de acadar o 1 por cento de investimento de recursos públicos nas universidades fixado polo Estado para antes do 2030; ou coa posta en marcha da matrícula universitaria gratuíta ou a conxelación das taxas universitarias desde hai 14 anos”.