Categoría: Parlamento de Galicia

O Parlamento de Galicia aprobou hoxe a proposición non de lei do Grupo Popular, que non contou co voto favorable do PSdeG, a través da que se solicita ao Goberno de España que recupere a vía formativa das microcredenciais como unha posibilidade do arraigo para a formación dos estranxeiros en España. A portavoz popular de Emprego, Noelia Pérez, considerou “paradóxico que, a pesar da evidente oportunidade deste programa para paliar a escaseza de man de obra e facilitar a integración das persoas migrantes que chegan con ganas de traballar, o Goberno de Pedro Sánchez decida de forma unilateral facer desaparecer esta figura”.

Noelia Pérez lembrou que o Goberno de España aprobou no ano 2022 a figura do arraigo para a formación, abrindo un abano de posibilidades e recoñecendo a potencialidade das microformacións e microcredenciais como ferramenta de integración. “Este modelo amosouse especialmente útil en sectores onde a demanda de man de obra é elevada e onde as empresas precisan traballadores que posúan unha capacidade concreta e actualizada, ofrecendo a posibilidade de que persoas en situación irregular regularicen a súa situación mediante un compromiso efectivo de formación”, indicou.

FUNCIONABA E DABA RESULTADOS

Porén, a portavoz popular lamentou que o Goberno de Pedro Sánchez, a través do Real Decreto 1155/2024 que actualiza o Regulamento sobre dereitos e liberdades dos estranxeiros en España, eliminou expresamente a opción das microcredenciais para o arraigo formativo, “sen consultar nin escoitar ás comunidades autónomas, que son as que realmente teñen as competencias en políticas activas de emprego”.

“Reclamamos algo que estaba funcionando e dando resultados positivos en Galicia, polo que consideramos que o Goberno de España ten que reconsiderar recuperar a vía formativa das microcredenciais e atender outras alegacións presentadas pola Xunta”, sinalou Noelia Pérez.

En concreto, a portavoz popular demandou incorporar no articulado do regulamento unha mención explícita as microcredenciais e recoñecelas como certificacións de competencias específicas e de curta duración, permitindo acreditar a formación necesaria para a integración no mercado laboral. Así mesmo, solicita eliminar ou modificar expresións que condicionen a formación unicamente a modalidades tradicionais; incorporar criterios que recoñezan a proporcionalidade na duración e na cantidade de horas, adaptándose á realidade dos contratos fixos discontinuos e ás condicións laborais de colectivos vulnerables; e incluír a opción de matriculación e desenvolvemento de microformacións en modalidades semipresenciais ou presenciais, garantindo un mínimo do 50 por cento de actividades presenciais, de acordo coas necesidades da formación.

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta ao desenvolvemento de accións que permitan a inclusión do videoxogo no sistema cultural galego. “É o mellor momento para que o Goberno galego desenvolva as accións pertinentes para a plena inclusión deste sector no sistema cultural galego, promovendo a difusión e o impulso que merece, porque a través do videoxogo tamén se pode expresar a forma de ser dunha cultura e dun pobo”, manifestou a portavoz popular de Cultura, Carmen Pomar.

Na súa intervención, Pomar sinalou que “os videoxogos están considerados como cultura, son reflexo da sociedade e non podemos entender a cultura do século XXI sen eles, algúns inspirados en fitos ou movementos culturais para as súas narrativas e outros teñen como obxecto transmitir a cultura e dar a coñecela a través das súas historias”.

“A industria dos videoxogos vén de se converter nunha das industrias culturais líderes e con perspectiva de crecemento por enriba doutras, cunha boa calidade de deseños e de contidos que poden converterse en experiencias totais desde o punto de vista de consumo, pero tamén da creación artística”, sinalou a portavoz popular.

ACCIÓNS REALIZADAS

Carmen Pomar lembrou que a Xunta xa asinou en 2022 un convenio de colaboración coa Asociación Galega do Videoxogo, mediante o que esta entidade se encargou da xestión do polo de aceleración deste sector, que o Goberno galego puxo en marcha cunha dotación de 360.000 euros ao abeiro do hub audiovisual da industria cultural.

Ademais, o Goberno galego aprobou hai poucos meses unha liña de axudas para o sector dos videoxogos, dotada con 150.000 euros e que busca promover a xeración de contidos galegos e en galego, así como a profesionalización, a creación de emprego e a incorporación de mulleres aos equipos que traballan neste ámbito.

Para rematar, a portavoz popular referiuse á recente integración do Museo do Videoxogo de Cangas no Sistema Galego de centros museísticos, motivada polo feito de ser a primeira instalación relacionada co mundo do videoxogo de Galicia e das poucas existentes en España.

“Estamos a falar dunha forma de expresión artística e cultural e como unha ferramenta educativa, máis alá da súa dimensión lúdica”, subliñou Carmen Pomar, quen destacou que no Museo do Videoxogo “está representado todo o que supuxo, supón e suporá este sector para a cultura contemporánea”.

O Parlamento de Galicia aprobou hoxe a proposición non de lei do Grupo Popular, que non contou co apoio do BNG, a través da que se insta á Xunta a que, en colaboración coa Federación Galega de Municipios e Provincias (Fegamp), promova a aplicación do protocolo contra as violencias sexuais e LGTBI-fóbicas nos espazos de lecer nocturno de todos os concellos de Galicia nos que se empracen este tipo de establecementos, así como en eventos e espazos festivos. Así mesmo, e logo dunha transacción co Grupo socialista, pídese o desenvolvemento de accións de información, prevención e sensibilización en materia de violencia sexual e trata con fins de explotación sexual.

A portavoz popular de Política Social, Raquel Arias, explicou que esta iniciativa “enmárcase no contexto das políticas que está a levar a cabo a Xunta para a promoción da igualdade e a loita contra a violencia de xénero”. Neste sentido, lembrou que o Goberno galego aprobou o pasado 11 de xaneiro o protocolo de actuación contra as violencias sexuais e LGBTI-fóbicas nos espazos de lecer nocturno, “co obxectivo de tolerancia cero ante calquera tipo de violencia e busca previr, detectar e saber como actuar ante calquera caso que aconteza”.

OCIO NOCTURNO SEGURO E LIBRE DE VIOLENCIAS

“Queremos facer de Galicia un lugar seguro e contar con todas as ferramentas posibles para loitar contra a violencia”, indicou Raquel Arias, quen concretou que “búscase xerar un modelo de ocio nocturno seguro e libre de violencias”.

O protocolo promove que os establecementos desenvolvan iniciativas propias de prevención e sensibilización, comprometéndose a non contar con publicidade ou criterios de acceso ao local discriminatorios e sexistas. En canto á detección, bríndase aos profesionais pautas para recoñecer manifestacións violentas, ben relacionadas coa presenza de imaxes ofensivas no recinto ou coa linguaxe sexista ou de contacto físico ou intimidatorio.

En caso de ter que actuar, o protocolo ofrece pautas comúns para seguir por parte dos profesionais, que centran a atención na vítima ante unha situación potencialmente perigosa.

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta a reforzar os lazos de colaboración coa UNED para incrementar a oferta de prazas a distancia do máster de profesorado que, actualmente, oferta esta institución en Galicia, así como promover que as universidades públicas galegas incrementen a súa oferta neste ámbito formativo.

O viceportavoz popular, Julio García Comesaña, explicou que “a demanda de másteres a distancia experimentou nos últimos anos un crecemento significativo, converténdose nunha opción cada vez máis solicitada polo alumnado”. “Este aumento viu motivado polas vantaxes que este formato ofrece en termos de conciliación da vida laboral e familiar, así como polo avance da dixitalización, que permite un acceso máis amplo e descentralizado á formación superior”, apuntou.

“Precisamente por este incremento da demanda en modalidade en liña, a oferta de opcións a distancia por parte das universidades públicas non sempre é suficiente, o que obriga a moitas e moitos estudantes a adiar a súa formación ou buscar alternativas privadas”, sinalou García Comesaña.

FORMACIÓN HABILITANTE

En concreto, esta situación resulta especialmente paradigmática no caso do máster de profesorado, unha formación que é habilitante para os futuros profesores de educación secundaria e bacharelato, formación profesional e ensinanzas de idiomas, e un requisito imprescindible para o ingreso neste corpo profesional.

Na actualidade, Galicia conta con 825 prazas para o máster de profesorado entre as universidades públicas galegas e a UNED: 740 prazas repartidas entre as universidades de A Coruña, Santiago e Vigo; e 85 prazas na UNED.

“Diante desta situación, as universidades públicas e a UNED deben reforzar a oferta do máster de profesorado, especialmente na modalidade en liña, que é a máis demandada, xa que moitas persoas compatibilizan estes estudos con outras actividades”, demandou o viceportavoz popular, quen lembrou que o conselleiro de Educación xa iniciou contactos co reitor da UNED para trasladar unha proposta de aumento de prazas para Galicia.

O Parlamento de Galicia aprobou hoxe a proposición non de lei do Grupo Popular, que non contou co apoio dos deputados do BNG nin do PSdeG, a través da que se solicita ao Goberno central a recuperación do 100 por cento da bonificación polas baixas de maternidade, limitada polo Goberno socialista en 2023 a só 366 euros. “Esta nova regulación supuxo un retroceso nas conquistas sociais e, de forma indirecta, prexudica e discrimina á muller traballadora”, manifestou a portavoz popular de Política Social Raquel Arias.

Na súa intervención, Raquel Arias lembrou que as bonificacións ás empresas das cotizacións sociais para as baixas por maternidade, paternidade ou adopción eran do 100 por cento co obxectivo de deixar de estigmatizar as baixas por maternidade das mulleres traballadoras, pero unha decisión do Goberno de Pedro Sánchez en 2023 limitou estas bonificacións a 366 euros ao mes.

A modo de exemplo, explicou que a base media de cotización para unha muller de entre 30 e 34 anos é de 1974 euros, dos que 700 euros corresponden á cotización, de xeito que esa bonificación de 366 euros soamente cubriría arredor dun 52 por cento do desembolso da empresa.

NOVOS REQUISITOS

A portavoz popular anotou que o Goberno central incorporou en 2023 novos requisitos para acceder a esta bonificación, xa que a persoa que se contrate para a substitución deberá estar inscrita no paro, ter menos de 30 anos, non ter relación de carácter especial nin ser familiar ata segundo grao de cosanguinidade nin conxugue do empresario, nin ter tido un contrato indefinido nos últimos tres meses, salvo en caso de despido colectivo ou improcedente.

“Con esta modificación ás empresas sáelles máis caro as substitucións por maternidade”, indicou Raquel Arias, quen apuntou que os requisitos limitativos para a persoa contratada “tamén supoñen unha dificultade engadida para atopar no mercado un perfil idóneo nos supostos de substitución de traballadoras ou traballadores con certa experiencia e cualificación”.

Para rematar, Arias considerou “unha boa oportunidade, nas vésperas da celebración o vindeiro 8 de marzo do Día Internacional da Muller, a aprobación desta iniciativa no Pleno do Parlamento, facendo un chamamento ao Goberno de España para que modifique esta norma e demostre con feitos que si lle preocupa a igualdade real da muller”.

O Pleno do Parlamento de Galicia acordou hoxe, a través dunha proposición non de lei do Grupo Popular, dirixirse ao Congreso dos Deputados, en particular á Mesa e a súa Presidenta, co fin de que desbloquee a tramitación da proposición de lei orgánica de transferencia da titularidade e competencias da AP-9 á Comunidade galega, en concreto, acordando, de xeito inmediato, a finalización do prazo para a presentación de emendas para permitir que este texto lexislativo avance cara ao debate de aprobación definitiva. Así mesmo, demándase ao Ministerio de Transportes que avalíe a oportunidade do rescate da autoestrada AP-9, xa que sería máis económico que o mantemento das bonificacións das peaxes ata o fin da concesión.

O portavoz popular de Infraestruturas, Roberto Rodríguez, lembrou que o Parlamento de Galicia aprobou por unanimidade en decembro de 2023 por cuarta vez unha proposición de lei solicitando a transferencia a Galicia da competencia sobre a xestión da AP-9. “A partir dese momento foi medrando a desconfianza sobre a posibilidade de que esta lexítima demanda fora unha realidade a curto prazo, desconfianza que cesou cando no pasado mes de outubro Pedro Sánchez dixo non a transferencia, non á gratuidade e non ao rescate da AP-9, en definitiva, unha vez máis non a Galicia”, indicou.

AS PEAXES MÁIS ALTAS E AS QUE MÁIS SUBEN

“Desde onte van xa 21 prórrogas aprobadas pola Mesa do Congreso ao trámite de emendas á proposición de lei orgánica de transferencia da AP-9, que xunto aos 15 aprazamentos da lexislatura pasada suman 36 labazadas ao acordo unánime aprobado neste Parlamento galego”, explicou o portavoz popular, quen lamentou que “non é que a Galicia se lle estea a negar a transferencia, e que se lle está a negar mesmo o debate”.

Roberto Rodríguez afirmou que a AP-9 ten as peaxes máis altas da súa historia e subliñou que “desde que goberna Pedro Sánchez esta autoestrada é na que máis subiron as peaxes de España, cun incremento acumulado que supera o 28 por cento”.

Ademais, apuntou que o Goberno de Pedro Sánchez ten feitos gratuítos 4 de cada 10 quilómetros de peaxe, o que supón 1.000 quilómetros menos de pago en toda España, “pero ningún na Comunidade galega”.

Respecto do rescate da AP-9, o portavoz popular dixo que “a nova contía anual das bonificacións aprobadas polo Goberno central abre un novo escenario que invita a considerar seriamente o seu rescate”, xa que, “co incremento a 81 millóns de euros anuais das bonificacións das peaxes, o custo da indemnización por rescate, aplicando unha taxa de desconto, e o custo das bonificacións ata o final da concesión aseméllanse de maneira considerable”.

SEN RESPOSTAS AO GOBERNO GALEGO

Roberto Rodríguez asegurou que “ao Goberno galego gustaríalle ter a oportunidade de trasladarlle persoalmente ao Goberno de España a petición de que avalíe a oportunidade deste rescate da autoestrada AP-9, pero despois de oito solicitudes da conselleira de Infraestruturas para ser recibida polo ministro de Transportes o resultado foi cero respostas”.

“Esiximos un trato xusto e equitativo que o Goberno de Pedro Sánchez nos nega, así como rigor e transparencia porque descoñecemos tanto a información que lle foi remitida á Comisión Europea trala apertura dun expediente para analizar a situación da moratoria da concesión, como os termos do estudo realizado polo Goberno de España sobre o custo económico do rescate da concesión da AP-9”, manifestou o portavoz popular, quen apuntou que “o que si coñecemos son os pronunciamentos do Consello Consultivo de Galicia e da Comisión Galega de Competencia que alertan do carácter abusivo dos acordos entre o Estado e a concesionaria”.

A deputada do Grupo Popular María Deza considerou hoxe no Pleno “imprescindible mobilizar as vivendas baleiras para dar solución á oferta de vivendas en alugueiro”, polo que demandou que “todas as administracións remen, na esfera das súas competencias, a prol da mellora das condicións de desenvolvemento do solo, do aumento da oferta e da mobilización do parque existente”.

María Deza explicou que o Goberno galego “procura incrementar a oferta de vivenda existente non só coa creación de vivenda nova, con medidas que incentiven a xeración de solo finalista ou con incentivos que melloran as condicións de acceso á vivenda, senón tamén coa aposta pola rehabilitación do parque existente a través de programas como o Rexurbe”.

Na súa intervención, a deputada popular afirmou que os pequenos propietarios “non poñen as súas vivendas no mercado do alugueiro porque, en primeiro lugar, moitas requiren un importante investimento para acondicionalas e, tamén, porque teñen medo a non cobrar, ás okupacións, a que lles esnaquicen as súas propiedades ou a que os cambios continuos de prezos e duración de contratos os deixen en situación de indefensión”.

POLÍTICA ERRÁTICA DO GOBERNO CENTRAL

“Medos todos eles derivados da política errática levada a cabo polo Goberno de España nos últimos anos e que causa unha grande inseguridade xurídica a moitos propietarios de vivendas, que prefiren mantelas baleiras”, sinalou.

Neste sentido, María Deza destacou as actuacións postas en marcha pola Xunta para impulsar o incremento de vivendas baleiras en alugueiro, como o programa de vivendas vivas ou o programa de mobilización de vivendas para alugamento, así como medidas fiscais orientadas a estimular a posta de ben inmobles no mercado do alugueiro.

A portavoz de Sanidade do Grupo Popular, Encarna Amigo, amosou hoxe no Pleno a disposición da Xunta a aumentar os recursos humanos na área de saúde mental no sistema público de Galicia, ata acadar a finais de 2026 a media de profesionais de España, “sempre que existan profesionais dispoñibles para súa contratación”.

Encarna Amigo salientou que “Galicia está facendo un esforzo sostido por reforzar a atención á saúde mental, tanto no eido administrativo, coa creación dunha subdirección específica de Atención á Saúde Mental na Consellería de Sanidade, como no incremento de recursos e profesionais para a atención aos pacientes”.

En concreto, referiuse á creación de 244 novas prazas, das que xa están cubertas máis do 90 por cento, o que permite que a media diaria de profesionais da saúde mental en Galicia sexa hoxe de 557, case o dobre das que había en 2009. “Ademais, pasamos dos 7,4 psiquiatras por cada 100.000 habitantes no 2019 a 8,6 na actualidade”, apuntou.

Dentro do ámbito da formación, incrementáronse un 38,46 por cento as prazas para profesionais de psiquiatría, dobráronse as prazas para psicoloxía clínica e multiplicouse por 10 a oferta de prazas formativas para enfermería especialista en saúde mental.

“Fomos pioneiros co desenvolvemento dun Plan de Saúde Mental 2020-2024, que supuxo a creación de novas unidades de saúde mental, a unidade de hospitalización psiquiátrica infanto-xuvenil do Álvaro Cunqueiro, os hospitais de día infanto-xuvenís en todas as áreas sanitarias ou as novas unidades de psicoxeriatría e primeiros episodios psicóticos de A Coruña”, subliñou.

O portavoz de Lingua do Grupo Popular, José Luís Ferro, asegurou hoxe no Pleno do Parlamento galego que “o noso modelo lingüístico non é a imposición senón conseguir que a maioría dos galegos que xa coñecen a nosa lingua un paso máis e comecen a utilizala con máis frecuencia e a sentirse orgullosos dela”. “Neste proxecto cabemos e caben todos, chámense como se chamen, naceran onde naceran e falen a lingua que falen, porque temos as portas abertas coa única condición de que respecten aos que se chamen de forma distinta, pensen distinto ou se sintan distintos, pero que estean dispostos a colaborar neste proxecto de igualdade e liberdade”, apuntou.

José Luís Ferro manifestou que “a nosa lingua non é, nin debe ser, algo que entre no debate partidista, senón un ben común que nos une e singulariza que todos debemos defender usando con absoluto coñecemento e normalidade, sen excluír para nada o manexo conveniente doutras linguas”.

TEMPOS PASADOS

Na súa intervención, lembrou que “durante séculos o galego foi violentado no máis íntimo do pobo, transmitindo o sentimento absurdo de que a nosa fala era cousa de xentes de segunda”, pero subliñou que “eses tempos xa pasaron e déronse nun contexto histórico que non se pode xulgar cos ollos da actualidade, porque se así se fixera sería cometer un erro tan grande como querer circunscribir a grandes figuras de Galicia, como Castelao, Curros ou Rosalía, nunha determinada ideoloxía actual”.

O portavoz popular recordou que a Xunta “impulsou un escenario de diálogo constituíndo grupos sectoriais para renovar o Plan Xeral de Normalización Lingüística de 2004, composto por máis de 100 profesionais comprometidos coa nosa fala e poñendo un prazo de 15 meses para rematar os traballos, ao tempo que xa se anunciou unha senda de crecemento orzamentario para seguir impulsando políticas en beneficio da nosa lingua”.

“Mentres vostedes viven nun nacionalismo desintegrador e excluínte, nós estamos nun galeguismo dual, ou de dobre nacionalidade, integrador e incluínte”, manifestou Ferro dirixíndose aos deputados do BNG, para continuar asegurando que “a nosa bancada é galeguista porque nos identificamos coa comunidade na que nacemos, identificámonos coas nosas tradicións, patrimonio cultural e, sobre todo, coa nosa lingua, orgullosos de ser galegos pero sen excluír a ninguén”.

O portavoz do Mar do Grupo Popular, Miguel Figaldo, salientou hoxe no Pleno do Parlamento galego que o modelo de coxestión do marisqueo entre Xunta e o sector “está sendo avalado e posto como modelo pola propia Comisión Europea”. Neste sentido, lembrou que “o mariscador quere vivir do seu traballo e non das axudas, polo que a prioridade é recuperar a produtividade dos bancos marisqueiros, que é o que está a facer o Goberno galego”.

Miguel Fidalgo afirmou que o marisqueo “é un sector estratéxico pola súa relevancia socioeconómica e medioambiental, ao contar con máis de 3.600 permisos de explotación, case 2.500 embarcacións na modalidade de marisqueo a flote e 700 permisos con algunha modalidade de recursos específicos”. Ademais, destacou que “é unha actividade na que participan máis de 70 entidades asociativas que, no último exercicio, alcanzou unha produción superior ás 5.100 toneladas, cun valor de 62,6 millóns de euros”.

SITUACIÓN COMPLEXA

Na súa intervención, o portavoz popular recoñeceu que o sector marisqueiro galego “está a vivir unha situación complexa”, pero avogou por “fuxir da demagoxia á que acostuman os grupos da oposición, porque a Xunta está a afrontar as dificultades conxuntamente co sector”.

“Somos a única rexión que ten un sistema real de cogobernanza a través dos 92 plans de xestión elaborados polo propio sector, que se aproban cada tres anos e se ocupan tanto da explotación dos recursos como da organización dos traballos non extractivos, como son as labores de conservación das condicións das poboacións explotadas”, indicou.

Ademais, Miguel Fidalgo lembrou que a Xunta xa publicou, desde outubro de 2023 ata a actualidade, 13 ordes de axudas relacionadas directamente co marisqueo no marco do Plan de Competitividade e Sostibilidade, que superan os 50 millóns de euros, ás que hai que engadir outras actuacións destinadas á mellora do marisqueo e dirixidas a axudas tanto a confrarías como á xestión da biodiversidade ou actividades marisqueiras.