Categoría: Parlamento de Galicia

O portavoz de Medio Ambiente do Grupo Popular, Gonzalo Trenor, animou hoxe aos concellos galego a incrementar a reciclaxe para beneficiarse da rebaixa do canon que pagan a SOGAMA polo tratamento dos residuos. Así mesmo, pediu ao Goberno central que elimine o novo imposto estatal sobre vertido e incineración, “que penaliza aos modelos de xestión de residuos eficaces como SOGAMA que buscan reducir os residuos que se envían so vertedoiro”.

Gonzalo Trenor lembrou a proposta realizada pola Xunta aos responsables da Federación Galega de Municipios e Provinciais (Fegamp) a través da que se establecería un canon reducido de 95 euros por tonelada, que podería baixar incluso aos 83 euros por tonelada, se os concellos compren un destes requisitos: reducir as entregas de lixo a SOGAMA nun mínimo do 1 por cento respecto do ano anterior ou incrementar nun 3 por cento a aportación á reciclaxe do contedor amarelo ou marrón.

REBAIXA DO 60 POR CENTO NA SUBA DO CANON

“Cumprindo algunha destas dúas cuestións, os concellos poderán acollerse á proposta da Xunta de sufragar o 60 por cento da suba do canon, mantendo durante o próximo exercicio a achega de 12 euros por tonelada a través do Fondo de Cooperación Local adicional”, indicou.

O portavoz popular lembrou que a actualización do canon de SOGAMA “é responsabilidade única do Goberno central polas súas equivocadas actuacións, que supuxeron un sobrecusto no último ano e medio de 39 euros por tonelada na xestión dos residuos, suba que asumiu SOGAMA sen trasladala aos concellos”.

En concreto, Trenor citou “as decisións baseadas en políticas fiscais penalizadoras” postas en marcha polo Goberno de Pedro Sánchez: o imposto estatal sobre vertido e incineración, a orde ministerial que elimina a retribución que Galicia recibía pola planta termoeléctrica de Cerceda; e o imposto estatal de produción de enerxía.

“O modelo de SOGAMA está plenamente avalado pola Unión Europea e prima a aplicación dos tres erres: redución, reutilización e reciclaxe”, asegurou Gonzalo Trenor, quen anotou que “canto menos lixo envíen os concellos a SOGAMA e máis recuperen a través da reciclaxe, menos cantidade de residuos se valorizarán enerxeticamente e menos pagarán a esta empresa pública pola súa xestión”.

Para rematar, salientou que 295 dos 313 concellos galegos apostan por SOGAMA fronte a outros modelos como o de Nostián ou Serra do Barbanza, “que apostan polo modelo húmido-seco, unha opción a extinguir xa que é contraria ás directrices europeas e resultan notablemente máis custosas para os concellos adheridos”.

O portavoz do Grupo Popular, Alberto Pazos, asegurou hoxe que “imos facilitar e axilizar con todo o que estea na nosa man” a celebración da Comisión de Investigación sobre a contratación publica da Administración autonómica “para botar abaixo todas e cada unha das trolas e bulos que desde o BNG e o PSdeG están intentando trasladar á sociedade galega sobre a construción do Hospital Público Álvaro Cunqueiro e as contratacións realizadas pola Xunta de Galicia”.

A Comisión de Investigación sobre a contratación pública da Administración autonómica celebrou esta mañá a súa primeira reunión na que se procedeu á elección da súa Mesa, que estará presidida pola deputada do Grupo Popular Elena Candia; coa tamén deputada popular Carmen Pomar como vicepresidenta; e o deputado do BNG Luis Bará como secretario.

INTERESE, ÁNIMO DE TRABALLO E DISPOÑIBILIDADE

Alberto Pazos afirmou que desde o Grupo Popular “afrontamos esta Comisión de Investigación con interese, ánimo de traballo e plena dispoñibilidade, porque estamos convencidos de que, tanto a documentación que se aporte a esta comisión como a testemuña dos comparecentes que pasarán pola mesma, permitirán poñer de manifesto a excelente xestión que a Xunta está a facer dos recursos públicos de todos os galegos”.

“O que resulta sorprendente é a actitude contraditoria do BNG, que, por unha banda, leva días esixindo acelerar os prazos relacionados con esta Comisión, pero hoxe mesmo solicitou ampliar eses mesmos prazos argumentando que necesitan tempo para realizar unhas emendas ás normas de funcionamento”, indicou o portavoz popular.

Por este motivo, solicitou aos nacionalistas galegos “un pouco de coherencia, para non pedir ao mesmo tempo recortar e ampliar prazos; e un mínimo de rigor, porque o Grupo Popular non vai presentar unha proposta de normas de funcionamento, xa que realmente corresponde aos servizos do Parlamento e, polo tanto non existen emendas, senón suxestións por parte de todos os grupos parlamentarios que o consideren oportuno”.

“O BNG debería deixar a un lado o seu autoritarismo e asumir que estamos nun Parlamento democrático, que se rexe polas normas previamente establecidas e de acordo coas maiorías xurdidas nas urnas”, dixo Alberto Pazos, quen criticou que as declaracións da portavoz do BNG “deixan claro que xa teñen escrito o guión desta Comisión de Investigación e pretenden impoñer as normas de funcionamento, o Plan de Traballo e, desgraciadamente, tamén as conclusións da mesma”.

AGARDAR AO FINAL DOS TRABALLOS PARA AS CONCLUSIÓNS

Pola contra, asegurou que o Grupo Popular “prefire agardar aos informes dos servizos da Cámara para establecer as normas de funcionamento e ás propostas de Plan de Traballo para facer unha valoración da súa pertinencia e, desde logo, esperaremos ao final dos traballos para poder escribir unhas conclusións”. “Esa é a diferenza entre unha Comisión de Investigación para coñecer a verdade e unha caza de bruxas para impoñer os bulos que os partidos da oposición levan espallando durante anos sen máis proba que os seus prexuizos”, incidiu.

Alberto Pazos insistiu que o Grupo Popular “vai facilitar e axilizar con todo o que estea na nosa man a celebración desta Comisión de Investigación, co obxectivo de que os galegos coñezan a realidade que está detrás do modelo de financiamento e funcionamento do Hospital Público Álvaro Cunqueiro e das contratacións realizadas pola Xunta de Galicia”.

“Porque non pararemos de manifestar o noso orgullo pola posta en marcha en Vigo dun dos mellores hospitais de Europa, nun momento de fonda crise económica e que permitiu afrontar a pandemia nas mellores condicións de atención sanitaria aos veciños de toda a área viguesa; e rexeitamos calquera manobra da oposición nacionalista e socialista para poñer en dúbida a boa xestión dos gobernos do PPdeG na Xunta, co único obxectivo de tapar os escándalos que afogan pouco a pouco ao actual Goberno de España e, por enriba de todo, ao Presidente Pedro Sánchez e o seu entorno familiar”, rematou.

O Parlamento de Galicia aprobou hoxe, sen o apoio dos deputados do PSdeG, unha proposición non de lei do Grupo Popular a través da que se solicita ao Goberno de España, en particular ao Ministerio de Agricultura, Pesca e Alimentación, que, cumprindo co establecido no Regulamento europeo 2023/372, vele para que en todos os portos que actúan en España como puntos de saída de gando cara terceiros países, e especialmente no caso do porto de Alxeciras, por ser o máis usado polos operadores galegos, existan postos de control autorizados para as distintas categorías de animais.

O portavoz popular do Medio Rural, Miguel Viso, manifestou que, “co fin de garantir que os animais transportados desde outros estados ou ben en viaxes largos por estrada desde o seu lugar de saída ata os portos marítimos podan descargarse con seguridade e ser alimentados e abrevados e poder descansar, a normativa europea establece que debe dispoñerse ao menos dun posto de control nos puntos de saída dos portos marítimos ou a unha distancia de dúas horas por estrada desde o punto de saída”.

IMPLEMENTACIÓN URXENTE

“Necesitamos que estas infraestruturas se implementen de maneira urxente, non só para evitar sancións, senón tamén para garantir que os nosos operadores gandeiros poidan seguir competindo en igualdade de condicións cos seus homólogos europeos”, sinalou Miguel Viso.

En concreto, apuntou que “falamos de benestar animal, xa que o regulamento europeo non é so unha norma legal, senón un reflexo desta demanda social de prácticas éticas e responsables no manexo do animal”. “A creación destes postos de control reducirá o estrés e o sufrimento durante o transporte, o que mellora a calidade do produto final”, dixo.

Así mesmo, Viso indicou que “outro aspecto clave é a saúde pública, porque contar con postos de control axeitados permitirá inspeccionar regularmente o estado dos animais, detectando posibles problemas sanitarios antes de que se convertan en ameazas”.

COMPETITIVIDADE DO SECTOR GANDEIRO

“E, por último, está a competitividade do sector gandeiro, xa que cumprir coas normativas europeas é clave para poder seguir exportando a mercados internacionais”, sinalou o portavoz popular. Deste xeito, afirmou que, “se non contamos coas infraestruturas necesarias nos portos, arriscámonos a perder competitividade, a que os nosos produtos sexan axeitados ou que os operadores busquen alternativas noutros países”.

Miguel Viso fixo referencia á situación que existe no porto de Alxeciras, o porto máis empregado polos operadores galegos par as exportacións de gando cara a terceiros países, que non conta coas infraestruturas necesarias para cumprir co Regulamento europeo. “Pero esta situación tamén se pode trasladar a outros portos, como Tarragona ou Cartaxena, que presentan carencias graves nas infraestruturas necesarias para o control do gando”, rematou.

O deputado do Grupo Popular Pablo Prieto demandou hoxe no Parlamento de Galicia que o Goberno central cumpra co recollido na Lei do Deporte Español e presente nas Cortes Xerais unha nova Lei que regule o exercicio das profesións do deporte, establecendo os dereitos e obrigas dos profesionais e os requisitos para o desenvolvemento das diferentes actividades. Así mesmo, determinará a reserva de actividades da profesión titulada e colexiada dos licenciados en educación física e en ciencias da actividade física e do deporte.

“Entendemos que Galicia debe esperar á aprobación desa normativa estatal que dote de seguridade xurídica aos axentes deportivos antes de redactar unha lexislación autonómica, toda vez que esa norma do Estado establecerá o réxime básico e xeral de aplicación para o conxunto do territorio nacional e se evitarán posibles contradicións e outras problemáticas que afecten aos profesionais”, explicou o deputado popular.

Pablo Prieto recordou que a aprobación desta Lei de profesións do deporte “é unha das tres reformas ás que se comprometeu o Goberno de Pedro Sánchez para a recepción dos 300 millóns de euros procedentes do Plan de recuperación, transformación e resiliencia no ámbito deportivo, xunto coa Lei do deporte e a Estratexia nacional do fomento do deporte contra o sedentarismo e a inactividade física”.

De xeito paralelo, afirmou que a Xunta, no ámbito das súas competencias e da man dos axentes afectados, “debe continuar traballando para que a práctica do deporte en Galicia se realice nas máis óptimas condicións de seguridade para os deportistas, o que inclúe outros aspectos como o aseguramento obrigatorio establecido na Lei do deporte de Galicia”.

O Parlamento galego aprobou hoxe, sen o apoio do BNG, a proposición non de lei do Grupo Popular a través da que se solicita que a Xunta continúe apoiando aos concellos coa dotación de medios e axudas económicas para a prestación dos servizos de Protección Civil, dada a importante labor que prestan á cidadanía.

O deputado popular Ángel Rodríguez salientou que as Agrupacións de Voluntarios de Protección Civil “son especialmente importantes, tanto nas tarefas de prevención como nas intervencións directas en situacións de emerxencia”. Así, destacou o “incremento de servizos que se está a dar para estas agrupacións, tanto en colaboración en emerxencias como en eventos programados, ben sexan deportivos, concertos, desfiles ou calquera outro acto que supoña aglomeración de persoas”.

“A importancia desa labor desenvolvida polas agrupacións de voluntarios de protección civil fixo medrar a súa presenza en Galicia ata a cifra histórica dos 235 colectivos en 2023”, destacou o deputado popular, quen apuntou que ao longo do pasado ano realizaron 48.179 operativos, cunha media diaria de 132 intervencións. Estas actuacións centráronse na súa meirande parte en accidentes de tráfico, case o 35 por cento; ademais de incidentes relacionados con animais, incendios, rescates e operativos sanitarios e de seguridade.

DEDICACIÓN

Ángel Rodríguez apuntou que “o 25 por cento das actuacións realizadas polas agrupacións de voluntarios de protección civil tiveron lugar en fins de semana e datas específicas, o que demostra a dedicación destes colectivos nos momentos de maior necesidade”.

Para rematar, o deputado popular referiuse ás diferentes liñas de axuda que a Xunta ten a disposición das agrupacións de voluntarios de protección civil, que supuxeron un investimento de 20 millóns de euros nos últimos anos. En concreto, lembrou que o pasado 2 de agosto publicáronse as axudas para equipamentos de emerxencias aos concellos de menos de 50.000 habitantes, mancomunidades e agrupacións de municipios galegos que conten con agrupacións de voluntarios de protección civil, que conta cun orzamento superior aos 450.000 euros. Ademais, existe unha liña de axudas anual destinada ao mantemento da actividade destas agrupacións de voluntarios, que ascende a 340.000 euros e que este ano beneficiou a preto de 200 colectivos.

A estas axudas para o equipamento, Ángel Rodríguez sumou as actividades de formación realizadas a través da Academia Galega de Seguridade Pública. Así, ao longo do pasado ano celebráronse case un cento de accións formativas nas que participaron arredor de 2.000 voluntarios.

O Parlamento de Galicia aprobou hoxe a proposición non de lei do Grupo Popular a través da que se solicita ao Goberno central que active as medidas de flexibilidade, simplificación e exencións previstas no regulamento europeo de control da pesca, particularmente o relativo aos sistemas de vixilancia e control mediante cámaras de televisión de circuíto pechado, a xeolocalización e a declaración previa de desembarque.

O portavoz do Mar do Grupo Popular, Miguel Fidalgo, lembrou que “o Regulamento Europeo 1224/2009 establece o réxime comunitario de control para garantir o cumprimento da Política Pesqueira Común, unha normativa que se atopa nun proceso de revisión de gran calado co obxectivo de mellorar e actualizar o réxime de control para harmonizar os sistemas de inspección pesqueira dos estados membros”.

“A frota costeira artesanal de Galicia mantivo paradas e amarres consecutivos para manifestar a súa oposición ao acordo alcanzado no Parlamento europeo e en demanda dunha flexibilidade das condicións que finalmente deben plasmarse no texto do regulamento”, explicou o portavoz popular.

CONTACTOS ENTRE A XUNTA E O GOBERNO CENTRAL

Diante desta situación, a Xunta trasladou ao Goberno de España un total de 23 propostas, entre as que se atopa a exención de determinadas categorías de buques pesqueiros da obriga de completar e presentar unha notificación previa e unha declaración de transbordo; a exención para determinadas poboacións da obriga de estibar por separado as poboacións das especies que viven no fondo do mar suxeitas a plans plurianuais; as normas sobre procedementos de pesada e as normas especiais relativas ás pequenas especies peláxicas; as normas sobre os observadores encargados do control; ou as normas sobre inspeccións das autoridades competentes dos Estados membros e dos operadores.

Así mesmo, Miguel Fidalgo lembrou que a Xunta mantivo un encontro o pasado 25 de setembro con responsables do Ministerio de Pesca co obxectivo de abordar as novidades do novo regulamento de control de pesca. Neste encontro acordouse iniciar o proceso para articular medidas de flexibilización, simplificación e exención previstas no propio regulamento comunitario; valorouse a posibilidade de flexibilizar a xeolocalización para os buques de eslora inferior aos 9 metros; tratáronse aspectos relacionados co diario electrónico; e constituíronse dous grupos de traballo, un para a pesca profesional e outro para a pesca deportiva.

O Presidente da Xunta, Alfonso Rueda, comparecerá no Pleno da vindeira semana, a petición propia, para dar conta dos principais eixos e liñas de estratéxicas dos orzamentos da Xunta de Galicia para o vindeiro ano 2025, así como os proxectos de lexislatura nos que traballa o Goberno galego.

Na mesma sesión, o Grupo Popular demandará ao Goberno central que cumpra o compromiso de cofinanciar ao 50 por cento a atención á dependencia e abone á Xunta os máis de 2.500 millóns de euros que lle debe por este servizo; así como que intensifique a posta en marcha do tren de alta velocidade entre Galicia e a fronteira de Portugal.

Ao remate da Xunta de Portavoces, o portavoz popular, Alberto Pazos, salientou que Galicia “volverá a cumprir cos seus compromisos e os galegos volverán a ter, un ano máis, orzamentos da Xunta en tempo e forma”. “Namentres, a nivel estatal temos un Goberno que é o máis claro exemplo de dependencia e sometemento á chantaxe dos seus aliados independentistas, obrigado a negociar o seu teito de gasto cun fugado da Xustiza e, ao mesmo tempo, mirar de non molestar aos seus aliados de Esquerra Republicada ou de Bildu para que non se enfaden e lle retiren o seu apoio”, indicou.

O BNG, SUMISO A PEDRO SÁNCHEZ

Neste escenario, Pazos explicou que “o único que pinta neste xogo o BNG é entregarlle sumisamente o seu voto a Pedro Sánchez, para que siga desprezando a Galicia e negándolle os investimentos que son necesarios para levar adiante proxectos estratéxicos”.

Dentro do apartado de proposicións non de lei, o Grupo Popular demandará ao Goberno de España que cumpra co recollido no Real Decreto 675/2023, polo que se regulan as prestacións do sistema para a autonomía e atención á dependencia, cofinanciando o 50 por cento da prestación aos dependentes e saldando a débeda de máis de 2.500 millóns de euros que ten con Galicia pola falta de entrega dese cofinanciamento desde a aprobación da Lei de dependencia do ano 2006.

A modo de exemplo, o portavoz popular lembrou que o nivel mínimo que se paga por cada persoa atendida mensualmente debe financialo a Administración Xeral do Estado. “Porén, dos 100 euros que debera achegar para o grao I, só aporta 76 euros; e tan só 130 euros para o grao II cando debera aportar 150 euros, o que supón que, desde a entrada en vigor do citado Real Decreto, a débeda con Galicia polo impago das contías mínimas ascenda a 12,3 millóns de euros adicionais”. sinalou.

“Esta débeda sube cada mes na medida en que a Xunta de Galicia, cumprindo coas súas obrigas, incrementa mensualmente o número de persoas atendidas”, dixo Alberto Pazos, quen afirmou que “estamos fartos de que tanto BNG como PSdeG se presenten ante a cidadanía como os grandes defensores dos dereitos sociais, pero se poñan de parte do Goberno de Pedro Sánchez á hora de reclamar o que lle corresponde a Galicia, e que está a obrigar á Xunta a levar adiante un importante esforzo orzamentario que, en realidade, non lle correspondería”.

CONEXIÓN FERROVIARIA GALICIA-PORTUGAL

A segunda das proposicións non de lei que o Grupo Popular leva ao vindeiro Pleno ten que ver coa mellora das comunicacións ferroviarias e pídese ao Goberno central que intensifique o compromiso coa posta en marcha do tren de alta velocidade entre Galicia e a fronteira de Portugal, para o que é imprescindible e urxente un calendario coas actuacións e investimentos precisos para facelo realidade no prazo máis breve posible. En particular, Pazos referiuse á necesidade de adecuar unha reserva orzamentaria suficiente para acometer a Saída Sur de Vigo; e avanzar no tramo que vai entre Porriño e a fronteira portuguesa

“Estamos a falar dun proxecto longamente demandado non só pola Xunta de Galicia, senón tamén pola Comisión de Coordinación e Desenvolvemento Rexional do Norte de Portugal, ademais doutros actores do tecido social e económico galegos, como a Confederación de Empresarios; as deputacións provinciais de Lugo, Pontevedra e Ourense; a Fegamp; ou as agrupacións europeas de cooperación territorial Norte de Portugal, Río Miño e Chaves-Verín”, afirmou.

Alberto Pazos considerou “lamentable que desde o Goberno de Pedro Sánchez estase a facer oídos xordos a esta demanda, unha postura totalmente contraria á defendida polo Goberno portugués, que si está a avanzar na planificación desta conexión ferroviaria”

No que respecta ás preguntas ao Goberno galego, o Grupo Popular interesarase no Pleno sobre o desenvolvemento da proposta de gratuidade da matricula universitaria, coa que Galicia se situou como a primeira comunidade que permite cursar un grao de xeito gratuíto desde o primeiro ata o último curso; sobre o proceso para conseguir a declaración da Ribeira Sacra como Patrimonio Mundial; e sobre o programa de experiencias curtas de aprendizaxe ou microformacións impulsado pola Xunta, unha iniciativa estratéxica para incrementar as oportunidades de emprego das persoas traballadoras e ofrecer solucións efectivas e inmediatas para cubrir as vacantes existentes no mercado de traballo.

O Parlamento de Galicia aprobou esta tarde a proposición non de lei do Grupo Popular, que non foi apoiada polo PSdeG, a través da que se pide ao Goberno central que renuncie a calquera iniciativa dirixida a restrinxir o consumo de peixes e conservas, en particular a pretendida limitación destes alimentos nas racións dos comedores escolares, por ser contraria ás recomendacións científicas que aconsellan promover unha dieta saudable entre as persoas consumidoras, especialmente entre as xeracións máis novas.

Ademais, demándase que reconsidere a súa decisión de excluír aos peixes e mariscos da rebaixa do IVE que se aplica a outros alimentos básicos e promova accións e campañas específicas dirixidas a incentivar o consumo de produtos do mar en atención ás súas bondades nutricionais e para impulsar a actividade e ingresos do sector marítimo-pesqueiro, nun contexto de redución da demanda.

A deputada popular Dolores Hermelo lembrou que “a Organización Mundial da Saúde e varios organismos nacionais e internacionais recomendan o consumo de peixe, constatando con evidencias o gran beneficio sobre a saúde que ten, debido fundamentalmente ao seu contido en ácidos graxos e proteína magra”.

LIMITAR O CONSUMO DE PEIXE NOS COMEDORES ESCOLARES

Neste sentido, considerou que “non é de recibo que, nun ano no que todos os axentes do sector están a traballar para poder remontar os consumos de produtos da pesca, un ministro do Goberno de Pedro Sánchez estea a traballar nunha proposta normativa para limitar o consumo de peixe nos comedores escolares”. “Desde o sector, e desde entidades como pode ser Conxemar, nos avisan de que este tipo de iniciativas nas que se ataca ao consumo de produtos do mar o único que fan é danar ao sector”, apuntou.

Dolores Hermelo pediu ao Ministerio que “non sexa frívolo con este tema e se alinee cun sector que precisa ensalzar o seu valor, porque o peixe é un alimento que debe formar parte sempre de calquera dieta saudable”.

Así mesmo, a deputada popular lembrou que “desde hai ano vimos pedindo de xeito reiterado que se inclúa o peixe na excepción do IVE, porque para o Goberno de Pedro Sánchez os peixes e mariscos non son considerados un alimento esencial, polo que non se inclúen na rebaixa do IVE que si teñen as pastas e os aceites”.

“Ante a negativa do Goberno central a eliminar o IVE a peixes e mariscos, Galicia seguirá traballando no fomento do consumo de peixes e mariscos, en fresco ou en conserva a través de campañas dirixidas á promoción destes produtos, fomentando unha cultura alimenticia na que o criterio da orixe determina a calidade como factor decisivo á hora de realizar unha elección na compra”, rematou.

O portavoz do Grupo Popular, Alberto Pazos, amosou hoxe o “rotundo rexeitamento” á quita da débeda que está a barallar o Goberno de Pedro Sánchez para beneficiar ao independentismo catalán porque “sería ruinosa e tremendamente prexudicial para Galicia”. En concreto, dixo que con esta proposta a débeda de cada galego se incrementaría en 495 euros, ao tempo que non daría solución aos máis de 600 millóns de euros de déficit que cada ano ten que afrontar a Comunidade galega co actual sistema de financiamento a consecuencia dos custos que supón o envellecemento e a dispersión da poboación.

“Non á quita de débeda ás comunidades autónomas e si a un novo modelo de financiamento xusto, acordado multilateralmente e que permita pagar o custo dos servizos que Galicia necesita” sinalou Alberto Pazos, quen afirmou que “non imos permitir que Galicia sufra unha discriminación financeira despois de ser un exemplo á hora de afrontar a crise con medidas que permitiron conter a débeda ao tempo que prestar os mellores servizos a todos os galegos”.

O PEOR NEGOCIO DA HISTORIA

“Aceptar unha quita da débeda suporía o peor negocio da historia de Galicia, ao incrementar a débeda de cada galego en 495 euros”, sinalou o portavoz popular, quen explicou que, por unha parte, a débeda de Galicia se reduciría a pouco máis de 920 euros por habitante, pero, ao mesmo tempo, a débeda de cada galego, como participante da débeda de España, se incrementaría ata superar os 1.400 euros. “Pagamos entre todos o que dilapidaron uns poucos”, indicou.

Alberto Pazos criticou que o BNG utilizara no Pleno desta semana unha resolución aprobada por unanimidade no pasado Debate sobre o Estado da Autonomía para xustificar un suposto apoio do Grupo Popular a unha condonación da débeda. Neste sentido, explicou que o que realmente di esa resolución é que “no caso de condonación ás comunidades que se adherisen ao Fondo de Liquidez Autonómico, se compense equitativamente ás comunidades que non o fixeron”.

“O que temos moi claro é que rexeitamos totalmente a quita de débeda que o Goberno de Pedro Sánchez pon enriba da mesa para beneficiar ao independentismo catalán, porque sería ruinosa e tremendamente prexudicial para os intereses de Galicia”, incidiu Pazos. Ademais, anotou que, “se finalmente se leva adiante esta quita da débeda, Galicia debe ser compensada, como ben dicía a nosa proposta de resolución inicial que presentamos ao Debate sobre o Estado da Autonomía, e que serviu de base para a aprobación posterior por unanimidade da resolución que agora quere manipular a lideresa do BNG: que o novo modelo de financiamento autonómico ‘evite calquera privilexio unilateral, como pode ser a condonación de débeda, que non sexa froito do acordo entre todas as comunidades autónomas e que implique asignar menos recursos e competencias para Galicia que para outras comunidades autónomas’”.

FALTA DE RESPECTO AO ESTADO ESPAÑOL

Por outra parte, Alberto Pazos referiuse ao retiro que o Goberno galego celebrará esta fin de semana no concello lucense de Sober, onde teñen previsto avanzar nos proxectos a realizar e as prioridades de actuación nos vindeiros meses. “Mentres o Goberno galego se centra en traballar e deseñar actuacións a curto e medio prazo polo ben de Galicia e de todos os galegos, a lideresa do BNG non se lle ocorre mellor forma de exportar a súa imaxe que asistir en México á toma de posesión da súa Presidenta electa, respaldando a falta de respecto cara ao Estado español amosada polo Goberno mexicano coa inxustificada decisión de non aceptar a presenza do Rei Felipe VI a este acto e tentando abrir unha fenda innecesaria entre dous pobos irmáns”, indicou.

Neste sentido, manifestou que “pouco tardou o BNG en sacarse a máscara que se puxeron nas pasadas eleccións autonómicas, para pasar a amosar a súa verdadeira faciana e volver ao seu espazo natural: estar do lado de quen intenta bloquear e quebrar as institucións de España, faltando ao respecto a todos os españois unha e outra vez, como son os seus correlixionarios de BILDU e de Esquerra Republicana de Cataluña”.

“Desde o Grupo Popular non podemos permanecer calados, como si nada pasara, ante esta nova falcatruada do BNG, que se suma ao seu apoio confeso ao réxime de Maduro e a súa defensa dunhas eleccións en Venezuela que, segundo están a denunciar todas as institucións españolas e europeas, contradicindo o que opinan os dous representantes do BNG que asistiron como testemuñas a estes comicios, foron un auténtico fraude para manter ao réxime bolivariano no poder e expulsar ou perseguir a todo aquel que estea na súa contra”, rematou.

O Parlamento de Galicia aprobou esta mañá a proposición non de lei do Grupo Popular, sen o apoio dos deputados socialistas, a través da que se insta ao Goberno de España a protexer os intereses do sector porcino de Galicia de cara a minimizar os potenciais danos que poidan resultar da investigación antidumping iniciada pola República Popular China, aplicando para elo as medidas recollidas no Regulamento sobre a organización común de mercados agrícolas para minimizar o impacto nun sector estratéxico en Galicia.

O deputado popular Enrique Barreiro explicou que “España mantense, desde hai anos, como o primeiro exportador mundial de produtos de porcino a China, por diante de Estados Unidos e Brasil”. No caso concreto de Galicia, existen 2.500 explotacións con arredor de un millón de animais, nas que están empregadas máis de 4.000 persoas.

Recentemente, China anunciou o inicio dunha investigación antidumping sobre as exportacións de carne de porco da Unión Europea, que continúa a liña de investigación xa aberta a un produto como o brandy. “Estas actuacións foron desencadeadas polo anuncio, a mediados do mes de xuño, de que a Unión Europea imporía aranceis ás importacións de vehículos eléctricos de batería de China, á que se acusa de beneficiarse de subvencións inxustas”, indicou o deputado popular.

“Esta situación desencadeou decisións por ambas partes, onde os sectores agroalimentarios afectados, sen ter culpa da situación, vense abocados a unha crise ao pechárselle a porta das exportacións a China”, lamentou.

Enrique Barreiro engadiu que “a demanda chinesa de carne porcina supón unha parte moi importante da nosa produción a pesar de que se reduciu de forma considerable nos últimos dous anos a medida que o xigante asiático foi recuperando a produción perdida tras a entrada da peste porcina africana no seu territorio”.