Categoría: Parlamento de Galicia

O portavoz de Industria do Grupo Popular, Rubén Lorenzo, criticou hoxe “a incongruencia de BNG e PSdeG ao demandar hoxe no Pleno suspender a convocatoria das axudas do Fondo de Transición Xusta cando na sesión plenaria de hai 15 días pedían que se axilizase a concesión destas mesmas axudas”.

Rubén Lorenzo lamentou que “Galicia sofre as consecuencias de decisións precipitadas do Goberno de Pedro Sánchez no marco dunha transición inxusta que agora emendan”. En concreto, lembrou que España recibirá a través do Fondo de Transición Xusta 868 millóns de euros que recalará nos territorios de seis comunidades autónomas españolas, entre elas Galicia, afectados polo peche de minas de carbón e centrais térmicas de carbón.

CRITERIOS MARCADOS POR MADRID E EUROPA

“O programa do Fondo de Transición Xusta de España 2021-2027, deseñado polo Goberno de España e aprobado pola Comisión Europea, chega tarde, porque este retraso impediu que as axudas xa se puidesen activar ao longo do ano 2022; e chega mal, porque beneficia unicamente a concellos da provincia de A Coruña e exclúe os tres concellos da provincia de Lugo afectados polo peche de minas e centrais térmicas do carbón”, explicou o portavoz popular.

Deste xeito, apuntou que “as axudas artelladas pola Xunta, a través dos convenios de transición xusta, non poden facer outra cousa que non fose seguir os criterios marcados polo Goberno central e Europa, o que non supón que estes concellos se vexan favorecidos por outras axudas, a través do Inega ou do Igape, para paliar os efectos do peche das centrais térmicas”.

O Pleno do Parlamento de Galicia acordou hoxe, a través dunha proposición non lei do Grupo Popular, coa abstención do PSdeG e a ausencia de voto do BNG, reprobar a campaña sexista levada a cabo polo sindicato CIG contra a conselleira de Política Social, que claramente desvaloriza o traballo dun cargo político; así como calquera manifestación que vulnere o principio de igualdade. Ademais, exprésase a vontade de que o Bloque Nacionalista Galego, a través da súa voceira, a señora Ana Pontón, rexeite o contido sexista destes carteis.

A portavoz popular de Igualdade, Raquel Arias, considerou “imprescindible a reflexión conxunta e a condena dun dos ataques machistas e sexistas máis graves dos últimos tempos sobre unha muller con responsabilidades públicas, que xa foi reprobado por todos os sectores da sociedade galega agás o BNG e a súa lideresa, Ana Pontón”.

COVARDÍA QUE NORMALIZA TRATO VEXATORIO

“Ao non condenar esta viñeta, Ana Pontón demostra o covarde que é e normaliza o trato vexatorio cara unha muller que exerce responsabilidades públicas”, indicou Raquel Arias, quen apuntou que “tampouco se loita a prol do feminismo cando unha muller se queda sen argumentos no debate político e usa a súa condición de muller para no ser atacada, algo que usa a señora Pontón unha e outra vez neste Parlamento”.

Así mesmo, manifestou que a viñeta da CIG e a negativa do BNG a condenar expresamente a viñeta “vai en detrimento dos principios de igualdade e equidade, ademais de representar un descrédito profesional ao desvalorizar o traballo dunha persoa simplemente polo seu xénero”. “Desde o Grupo Popular consideramos que este tipo de actos non axudan en absoluto ao recoñecemento do valor da experiencia profesional das mulleres e ao traballo que se desenvolve pola igualdade das mulleres e dos homes”, dixo.

Coa decisión do BNG de negarse a votar esta iniciativa parlamentaria, Raquel Arias subliñou que “o nacionalismo galego, con Ana Pontón á fronte, queda absolutamente deslexitimado para falar de igualdade e feminismo, porque cada vez que teñen que elixir entre nacionalismo e igualdade, elixen nacionalismo; e cada vez que teñen que elixir entre a CIG e o feminismo, elixen a CIG”.

“Unha Ana Pontón que se presenta como unha feminista absolutamente combativa pero que, cando a vítima do machismo é unha muller que non pensa como ela, mira para outro lado, lanzando a mensaxe letal de que algunhas mulleres merecen menos protección que outras”, criticou a portavoz popular.

Para rematar, Raquel Arias considerou necesario “deixar moi claro que a igualdade e o feminismo é un principio ético universal, e que este Parlamento non tolera nin tolerará o uso político interesado da igualdade nin o silencio ante agresións políticas e persoais a ningunha muller, sexa cal sexa o seu partido político”.

A portavoz de Emprego do Grupo Popular, Noelia Pérez, destacou no Pleno do Parlamento galego o “firme compromiso do Goberno galego para seguir impulsando medidas que rompan barreiras en materia de igualdade laboral e garantan que o talento e o esforzo sexa o único que determine o futuro laboral das mulleres galegas”. En concreto, salientou que nunca houbo tantas mulleres traballando en Galicia, o paro feminino é dous puntos máis baixo que a media estatal e a fenda salarial está na menor cifra da serie histórica.

Noelia Pérez referiuse ás medidas adoptadas polo Goberno galego para combater a desigualdade laboral e fomentar a incorporación das mulleres en sectores masculinizados, así como os máis de 72 millóns de euros que este ano se destinarán ao apoio a autónomas e emprendedoras.

MEDIDAS DO GOBERNO CENTRAL

Neste sentido, demandou ao Goberno central que “adopte as medidas que lle estamos pedindo desde Galicia para abordar de verdade as desigualdades laborais e sociais que aínda persisten”. En concreto, solicitou que “o Goberno de Pedro Sánchez flexibilice os fondos finalistas de emprego para que a Xunta poida adaptalos á realidade e ás necesidades das mulleres de Galicia ou que transfira a Galicia a recadación do IRPF das cotizacións das traballadoras autónomas en concepto de formación profesional”.

“Non podemos aceptar que queiran vir a darnos leccións sobre igualdade laboral os mesmos que teñen afogados ás pequenas e medianas empresas e autónomos e autónomas, porque desde que o Partido Socialista chegou a Madrid, co apoio gratuíto do BNG, os custos laborais disparáronse un 40 por cento, acadando os 54.000 millóns de euros”, manifestou a portavoz popular. Así, apuntou que “esta situación supón máis custes sociais, que se traducen en menos empregabilidade para as mulleres e unha rebaixa dos salarios”.

Por outra banda, Noelia Pérez criticou o “feminismo intermitente” do BNG, “para o que existen mulleres de primeira e de segunda, pedindo respecto para unhas e non para as outras”. “Iso non é feminismo, é sectarismo, e están a xerar división baixo o paraugas de igualdade”, incidiu.

“A inmensa maioría das mulleres de Galicia estamos fartas de que o BNG nos use para o seu discurso mentres temos que soportar os seus machismos, os seus desprezos e o seu paternalismo”, afirmou a portavoz popular.

O Pleno do Parlamento de Galicia reiterou hoxe ao Goberno de España, a través dunha proposición non de lei do Grupo Popular que foi aprobada por unanimidade, a solicitude para que declare o Xacobeo 2027 como acontecemento de excepcional interese ao abeiro do previsto Lei 49/2002 de réxime fiscal de entidades sen ánimo de lucro, e de incentivos ao mecenado, e con efectos xa desde o presente ano 2025.

O portavoz popular de Turismo, Borja Verea, lamentou que, “a pesar de que existe un consenso total en que o Xacobeo 2027 sexa declarado evento de excepcional interese público, aínda non o é a día de hoxe”. Neste sentido, apuntou que “a causa principal é a falta de orzamentos estatais”, ante o que demandou “vontade política para poñer en marcha esta declaración a través doutra lei ou incluso dunha lei independente aos orzamentos”. “O que fai falta é vontade política por parte do Partido Socialista e do Goberno de Pedro Sánchez”, dixo.

Borja Verea explicou que esta declaración “permite poñer en marcha os incentivos fiscais de apoio ao Xacobeo 2027 e, polo tanto, abre a porta á colaboración público-privada”, que no anterior Xacobeo 2021-22 permitiu poñer a disposición de todos os galegos 28 millóns de euros procedentes de 40 empresas colaboradoras.

TEMPO DO URXENTÍSIMO

“Estamos no tempo do urxentísimo para que se declare o Xacobeo 2027 como evento de excepcional interese público, porque de non facelo terá consecuencias negativas para Galicia e para os galegos”, sinalou o deputado popular, quen anotou que, “se a insistente unanimidade do Parlamento de Galicia non é suficiente para activar ao Goberno de España, só quedaría a triste conclusión de que estamos ante un boicot doloso co único obxectivo de facer dano a Galicia por intereses partidistas”.

Para rematar, Verea manifestou que o próximo Ano Santo Xacobeo 2027 “representa unha oportunidade única para reforzar o posicionamento internacional de Galicia como destino cultural de referencia a nivel mundial, e isto terá un impacto directo sobre os sectores estratéxicos da economía galega e, tamén, sobre iniciativas de sostibilidade e preservación do patrimonio, porque o Camiño de Santiago e o Ano Santo son os produtos culturais máis sostibles, máis socializadores e máis ecolóxicos que existen, e que temos a sorte histórica que sexan 100 por cento galegos”.

A viceportavoz do Grupo Popular, Paula Prado, afirmou hoxe no Pleno do Parlamento galego que a proposta do BNG de crear unha Valedoría da Igualdade “só serviría para xerar duplicidades e solapamentos innecesarios con outros organismos xa existentes”, como o Valedor do Pobo, o Consello Galego das Mulleres ou a Dirección Xeral de Promoción da Igualdade.

Paula Prado criticou que o BNG “recicle e descafeine as súas propostas coas que supostamente pretenden cumprir a estratexia feminista que lles mandan dos coroneis da UPG”. Así, explicou que “esta vetusta iniciativa nacionalista, que xa vén dos tempos de Anxo Quintana, pasou de ser unha proposición de lei de 24 folios en 2023 a converterse nunha proposición non de lei de apenas catro páxinas, de tantas boas intencións como imprecisións e termos excesivamente amplos”.

ESFARELAMENTO E ANEMIA DO FEMINISMO NACIONALISTA

“As funcións desta Valedoría entrarían en colisión coas funcións doutros departamentos xa existentes, como o Consello Galego das Mulleres, as direccións xerais de Promoción da Igualdade e de Relacións Laborais da Xunta, ou a inspección de Traballo do Goberno central”, explicou Paula Prado.

Así mesmo, indicou que “non é necesario crear un órgano deste tipo cando en Galicia xa contamos cunha institución como é a Valedora do Pobo, que precisamente ten entre as súas competencias a de velar pola igualdade de trato e de oportunidades entre homes e mulleres, así como pola erradicación da discriminación por razón de sexo”.

“O único que se atopa en situación de esfarelamento e anemia é o falso feminismo da esquerda”, asegurou a viceportavoz popular, quen criticou ás deputadas do BNG por “gardar silencio ante o machismo que rezuma o seu sindicato ao perpetuar os estereotipos sexistas coas súas viñetas de humor de taberna”. Ademais, lamentou que este silencio dos nacionalistas “tamén lles privou de condenar o ataque desta fin de semana á conselleira de Medio Ambiente e á súa familia”, polo que dixo que “aínda están a tempo para condenar este escrache na porta da súa casa, porque en política non vale todo”.

O deputado do Grupo Popular Argimiro Marnotes criticou hoxe no Pleno do Parlamento galego que o BNG “fale de reto demográfico mentres boicotean o desenvolvemento industrial e enerxético de Galicia”. “Se queremos que a xente quede en Galicia e que outros veñan, mellorando demograficamente esta terra, non basta con mellorar cada ano a aportación aos concellos desde a Xunta, porque tamén compre facilitar que novas empresas se implanten e que as empresas existentes sigan investindo e creando emprego”, anotou.

Argimiro Marnotes manifestou que “falar de mecanismos de reto demográfico negándose si ou si á implantación de novas industrias xeradoras de emprego é dicir claramente que ao BNG lle importa absolutamente nada o reto demografico”. Neste sentido, acusou aos nacionalistas galegos de “pretender impoñer o bloqueo ideolóxico que impide o progreso e pon en perigo o emprego e o incremento da poboación”.

IGUALDADE DE TRATO

O deputado popular salientou que “todos os concellos de menos de 15.000 habitantes xa son considerados como municipios en situación prioritaria para a Xunta, de aí que no reparto de fondos sexan os primeiros beneficiarios”. Neste sentido, explicou que “o carácter xeral de reparto garante a igualdade de trato entre os concellos de Galicia e o cumprimento da normativa de subvencións, sendo o sistema xeneralizado o de concorrencia competitiva”.

“Galicia conseguiu frear as previsións de perda de poboación e gañar poboación ata superar os 2,71 millóns de habitantes, acadando unha esperanza de vida no máximo histórico de 83,62 anos”, indicou Marnotes. Así, salientou que “a Xunta é consciente de que para seguir mellorando as cifras demográficas é fundamental ofrecer facilidades ás familias, intensificando medidas como a gratuidade das escolas infantís e universidade, a tarxeta Benvida, a posta en marcha de máis de 100 casas-niño e máis de 140 casas do maior, o Bono Concilia e os beneficios para as familias numerosas e monoparentais”.

O deputado do Grupo Popular Gonzalo Trenor criticou hoxe que “ningún dos tres voceiros do BNG que interviñeron esta mañá no Pleno do Parlamento galego amosara a súa condena expresa ao ataque sufrido esta fin de semana pola conselleira de Medio Ambiente e pola súa familia a través de persoas próximas ao nacionalismo galego”. Sobre o expediente do proxecto de Altri en Palas de Rei, Trenor insistiu que “a autorización é un asunto técnico que dependerá dos expertos e do persoal funcionario da Xunta”, polo que demandou “deixalos traballar con tranquilidade e evitar calquera tipo de presión política sobre eles”.

“En política non vale todo”, dixo o deputado popular, quen rexeitou expresamente “o acoso ás familias, as coaccións, os insultos, a manipulación ou a difusión de bulos que se están a facer en relación co proxecto de Altri”. Neste sentido, amosou a “rotunda condena ao ataque que sufriu a conselleira de Medio Ambiente e a súa familia esta fin de semana no seu domicilio por persoas que foron nas listas do BNG e que teñen un completo álbum de fotos coa señora Pontón”. Porén, lamentou que “ningún dos tres do politburó do BNG que falaron esta mañá no Pleno tiveron a máis mínima palabra de apoio coa conselleira”.

RESPONSABILIDADE

Gonzalo Trenor afirmou que no BNG “son profesionais da manipulación, do engano e da difusión de bulos, inventando argumentos pseudocientíficos para poñer á xente en contra do proxecto de Altri, porque necesitan alterar a realidade para que o seu discurso chegue á cidadanía”.

“Non é propio dunha democracia as presións que están a facer a través do seu sindicato machista para dobregar a independencia dos expertos e funcionarios que traballan neste expediente”, sinalou o deputado popular, quen demandou “responsabilidade para trasladar á sociedade que os técnicos da Administración informan baixo premisas técnicas e non atendendo a presións de partidos políticos”.

O Pleno do Parlamento galego aprobou hoxe a nova Lei de servizos dos medios públicos de comunicación audiovisual de Galicia para a sociedade dixital, que “garante o futuro dos medios públicos para que sigan servindo á cidadanía dun xeito efectivo nun panorama dixital en constante e imparable transformación”, manifestou a deputada popular, Carmen Pomar. Así mesmo, asegurou que os medios públicos galegos “seguirán a ser independentes, cun modelo de xestión baseado na boa gobernanza, na administración rigorosa, na estabilidade e non na interinidade”.

Carmen Pomar manifestou que a nova lei “garante uns medios públicos que incorporan as necesidades das audiencias, capaces de ofrecer contidos de calidade que os conectan coa sociedade galega e o fan con rigor, pluralidade, obxectividade e profesionalidade”. “Estamos garantindo uns medios públicos na vangarda tecnolóxica, coa transformación dixital como piar que, ademais, son un motor da nosa industria audiovisual”, apuntou.

ADAPTADA AO MARCO NORMATIVO ESPAÑOL E EUROPEO

Ademais, afirmou que “sobre todo garántese a promoción, difusión e o impulso da lingua galega, e o coñecemento da identidade cultural e lingüística de Galicia”. Así, subliñou que “mantense sempre con firmeza e esixencia a principal razón de ser dos medios públicos autonómicos, que radicaba na súa creación e segue a facelo, na promoción, difusión e impulso da lingua galega para dar a coñecer a identidade cultural e lingüística de Galicia”. “Así foi ata o de agora e así continuará a suceder no futuro porque esta lei así o recolle explicitamente, con claridade e sen ningún tipo de dúbida”, puntualizou.

“Unha lei necesaria para actualizar o noso marco normativo á lexislación española e á europea”, indicou a deputada popular, quen sinalou que, “na liña das directrices europeas, a nova lei contempla a creación dun Consello Asesor de participación social e profesional, onde haberá representantes dos traballadores dos medios públicos”. En concreto, asegurou que “a nova lei prevé os mecanismos necesarios para garantir a independencia, a rendición de contas, a transparencia e a responsabilidade”.

Carmen Pomar destacou a “aposta polo diálogo e o consenso” que guiou a tramitación desta nova lei, que recibiu na súa fase de anteproxecto 111 alegacións, das que arredor dunha cuarta parte foron incorporadas total ou parcialmente. Neste sentido, dixo que “a Lei de medios é froito dun proceso transparente e participativo, que multiplica a pluralidade da futura Corporación de Servizos Audiovisuais de Galicia, a través, por exemplo, do Consello Asesor de Participación Social e Profesional, cunha maioría dos seus integrantes elixidos por este Parlamento galego para dar cabida a practicamente todos os sectores relacionados e tamén a unha representación dos profesionais da Corporación”.

O Grupo Popular vén de rexistrar no Parlamento de Galicia unha proposición non de lei a través da que se solicita ao Goberno de España que flexibilice a condicionalidade da PAC de xeito que os produtores agrogandeiros afectados polo temporal Kirk do pasado mes de outubro e polas condicións climatolóxicas adversas do último trimestre do pasado ano non sexan penalizados por non cumprir os criterios que marca a normativa e poidan recibir con normalidade estas axudas fundamentais para a continuidade das súas explotacións.

Os deputados populares Nicole Grueira e Enrique Barreiro visitaron esta mañá a explotación gandeira Cabo de Vila en Castro de Rei, acompañados do alcalde deste concello, Francisco Javier Balado, para coñecer a situación na que se atopan as explotacións afectadas polos efectos do temporal Kirk e as persistentes e intensas precipitacións que se recolleron na Comunidade galega nos últimos meses do pasado ano.

IMPOSIBILIDADE DE CUMPRIR COA ROTACIÓN

“Estas adversas condicións climatolóxicas provocaron serios danos nas explotacións gandeiras galegas, especialmente en comarcas como a Terra Cha, onde extensas parcelas quedaron totalmente arrasadas, perdéndose colleitas enteiras que aínda estaban na terra”, manifestaron os deputados populares.

Ademais, as anegacións prolongadas das terras impediron que os produtores puidesen realizar os traballos necesarios para a preparación do solo e a nova sementeira nos prazos establecidos, “provocando non só perdas económicas directas, senón tamén un atraso significativo no ciclo produtivo das explotacións afectadas”, apuntaron.

Aínda que coa última modificación da BCAM 7, os produtores poden optar por diversificar, e non rotar, para salvar este contratempo, cremos que o Goberno central debe permitir a excepcionalidade de cumprimento coa BCAM 7 en casos de forza maior, cando as condicións adversas do clima non permitan o libre desenvolvemento dos traballos de sementeira.

Diante desta situación, os agricultores e gandeiros atopáronse coa imposibilidade de cumprir coa rotación de cultivos establecida na normativa da PAC, un criterio fundamental para a percepción destas axudas.

“Por este motivo, solicitamos que o Goberno central flexibilice as condicións para acceder ás axudas da PAC nestes casos concretos, ofrecendo saídas específicas aos agricultores e gandeiros que lles permitan paliar os efectos desta crise motivada polo temporal Kirk e as intensas choivas de finais do pasado ano, protexendo así o tecido produtivo e garantindo a viabilidade da actividade agrícola e gandeira en Galicia”, manifestaron.

O portavoz do Grupo Popular, Alberto Pazos, demandou hoxe ao Goberno de España “a mesma dilixencia que amosa con Cataluña ou o País Vasco cando Galicia lle solicite o traspaso das competencias en meteoroloxía ou cando insistamos na cesión do ingreso mínimo vital, sen esquecer as transferencias pendentes tanto da AP-9 como dos medios humanos e materiais para exercer as competencias sobre o litoral galego”. Así mesmo, Pazos informou da constitución no Parlamento galego, a solicitude dos catro grupos parlamentarios, das comisións non permanentes de igualdade e de discapacidade.

Alberto Pazos afirmou que a delegación de competencias en materia de inmigración ao Goberno de Cataluña “ataca directamente os principios recollidos na Constitución Española e a unidade de España, comprometendo a seguridade nacional”, e considerou inexplicable esta decisión do Goberno de Pedro Sánchez cando “non hai moito consideraba indelegable esta competencia porque está recollida no artigo 149 da Constitución Española”.

SITUACIÓN POLÍTICA E INSTITUCIONAL ALARMANTE

“España vive unha situación política e institucional alarmante porque esta cesión en materia de inmigración a Cataluña súmase ás xa consumadas da amnistía aos autores do intento de golpe de Estado independentista ou da imposición dunha condonación da débeda ás comunidades autónomas, un ataque directo á responsabilidade e ao cumprimento das obrigas de déficit e débeda que asumiron nos momentos de grave crise económica comunidades como Galicia e que premia a comunidades, como Cataluña, que destacaron polo seu despilfarro e gasto ineficaz en referendos ilegais ou na apertura sen sentido algún de embaixadas por medio mundo”, manifestou.

En concreto, asegurou que esta condonación da débeda ás comunidades autónomas é “un negocio ruinoso para Galicia, xa que somos a comunidade que recibe unha menor condonación da débeda por habitante axustado: 1.369 euros fronte a 1.892 euros de media para o conxunto das comunidades, e case 1.000 euros menos por habitante que vai recibir cada catalán, valenciano ou andaluz”.

REFORMA DO SISTEMA DE FINANCIAMENTO

“O que realmente interesa ás comunidades autónomas neste momento é unha reforma do sistema de financiamento autonómico, que recolla expresamente as peculiaridades de cada comunidade para financiar a prestación dos servizos públicos nas mesmas condicións en calquera punto da xeografía española”, subliñou.

Alberto Pazos criticou que “o Goberno de Pedro Sánchez é unha marioneta nas mans dos independentistas cataláns e vascos, e a mellor demostración disto son as constantes cesións a todo o que lle piden para poder manterse na Moncloa”. Así, referiuse ao acordo asinado onte para o traspaso ao País Vasco das competencias sobre os permisos de traballo para estranxeiros e sobre meteoroloxía, polo que demandou ao Goberno de España “que trate a Galicia do mesmo xeito que a Cataluña e o País Vasco e atenda as nosas demandas de novas transferencias”.

“Resulta lamentable a facilidade coa que o Goberno de Pedro Sánchez accede á cesión de competencias a Cataluña e o País Vasco e pouca disposición que amosa cando falamos de traspasar competencias para Galicia, porque non fai falta lembrar as 22 prórrogas que leva nesta lexislatura no Congreso a tramitación da proposición de lei para a transferencia da AP-9 á Comunidade galega ou as voltas que lle están dando para, logo de conseguir que o Tribunal Constitucional lle dera a razón a Galicia hai case un ano, facer efectiva a transferencia á nosa comunidade do persoal e os medios materiais necesarios para exercer as competencias sobre o noso litoral”, explicou.

NOVAS COMISIÓNS NON PERMANENTES

Por outra banda, o portavoz popular informou que os catro grupos parlamentarios deste Parlamento rexistraron a solicitude para a creación da Comisión especial non permanente para o seguimento das políticas relativas á discapacidade e elaboración de novas propostas a prol da integración das persoas con discapacidade; e da Comisión non permanente de estudo para a igualdade e para os dereitos das mulleres.

En concreto, Pazos apuntou que o obxectivo coa Comisión de discapacidade é rematar a elaboración do ditame que xa se comezou a elaborar na pasada lexislatura, mentres que no caso da Comisión de Igualdade “queremos abordar unha nova fase, unha vez completado o plan de traballo desenvolto durante a pasada lexislatura con retos a afrontar logo da pandemia da Covid-19, na que dar un paso máis e afondar na posta en marcha de medidas que avancen cara unha igualdade real e efectiva entre homes e mulleres, sobre todo no ámbito laboral, e na loita contra a violencia de xénero, onde Galicia xa se converteu nun referente a nivel estatal na atención ás vítimas”.

NACIONALISMO MACHISTA E SECTARIO

“Todo isto, nunha semana que remata coa celebración mañá do Día Internacional da Muller, unha xornada que, para o Grupo Popular, ven empanada pola negativa persistente do BNG, e da súa voceira especialmente, a condenar a noxenta campaña machista da CIG contra a conselleira de Política Social”, lamentou o portavoz popular.

Neste sentido, avanzou que “seguiremos insistindo unha e outra vez, e así o faremos no Pleno da vindeira semana a través dunha proposición non de lei, ata que as deputadas do BNG recapaciten e tomen conciencia da pésima imaxe que están trasladando a todas as galegas dun nacionalismo machista e sectario, e que amosa o seu sometemento ao que ditan desde os seus cuarteis os coroneis da CIG e da UPG”.