Categoría: Parlamento de Galicia

Os deputados do Grupo Popular Cristina Campero, Miguel Ángel Viso, José Luís Ferro e Víctor Baladrón, xunto aos concelleiros do PP Manuel Rodriguez e Lorena Pérez, mantiveron esta mañá un encontro con gandeiros de Montederramo para coñecer as súas necesidades logo da vaga de lumes que sufriu esta zona durante o verán, trasladar e prestar apoio para solicitar as axudas dispostas pola Xunta para avanzar na reparación dos danos, poñendo en valor a creación de pasteiros para a recuperación das zonas queimadas.

Cristina Campero, Miguel Ángel Viso, José Luís Ferro e Víctor Baladrón visitaron diversas explotacións gandeiras deste concello ourensán co obxectivo de coñecer de primeira man os danos ocasionados polos recentes incendios forestais e trasladar aos profesionais do sector o respaldo das institucións.

En concreto, destacaron o esforzo e axilidade da Xunta á hora de activar con rapidez medidas de apoio ao rural. Mostra disto é que a Consellería do Medio Rural xa atendeu a máis de 750 persoas afectadas polos lumes e tramitou ata o momento preto de 150 axudas directas que se beneficiaron das oito liñas de apoio destinadas a agricultores, gandeiros e titulares de montes, que cobren ata o 100 por cento do investimento necesario para recuperar infraestruturas, maquinaria, alimentación do gando ou producións perdidas.

PASTOS DE CALIDADE

Os deputados subliñaron tamén a importancia das accións complementarias, como o impulso aos pasteiros, nos que a Xunta investirá 4 millóns de euros este ano. Trátase dunha ferramenta clave para mellorar a dispoñibilidade de pastos de calidade para o gando, favorecer a recuperación de zonas queimadas e, ao mesmo tempo, contribuír á prevención de futuros incendios ao crear áreas de descontinuidade vexetal.

Segundo explicou Cristina Campero, “é fundamental que os nosos gandeiros saiban que non están sos, que hai un compromiso real e efectivo para que as axudas cheguen canto antes e para dotar ao rural das infraestruturas que precisa para seguir producindo con garantías”. Pola súa banda, Miguel Ángel Viso destacou que “os pasteiros son unha aposta estratéxica, porque melloran a base alimentaria do gando e ao mesmo tempo actúan como cortalumes naturais”.

Finalmente, Marco José Carballal puxo en valor “a capacidade de resposta da Xunta, que está a actuar con axilidade e con medidas realistas, pensadas desde o territorio e para o territorio”.

Os deputados do Grupo Popular Gonzalo Trenor, Rubén Lorenzo e Carmen Pomar visitaron as instalacións de Sogama en Cerceda e salientaron que a nova planta de clasificación de residuos téxtiles que se construirá será “unha oportunidade para lograr un sector máis sostible e circular”, polo que animaron aos cidadáns a incorporar nos seus hábitos diarios a correcta separación dos restos de roupa.

Acompañados do presidente de Sogama, Javier Domínguez, os deputados populares fixeron un percorrido polas instalacións do complexo, facendo unha parada específica no emprazamento no que se levantará a futura planta de clasificación de residuos téxtiles, que suporá un investimento de 22,4 millóns de euros e ocupará unha superficie de 8.000 metros cadrados, dispoñendo dunha capacidade inicial para 3.000 toneladas anuais, ampliable a 24.000.

EMPREGO VERDE E PARA COLECTIVOS CON LIMITACIÓNS

Neste momento, Sogama está levando a cabo o movemento de terras para a construción desta nova planta, co obxectivo de que estea operativa a mediados do ano 2026, xerando, nunha primeira fase, entre 16 e 30 postos de traballo, que se destinarán, con carácter preferente, a persoas con discapacidade ou en risco de exclusión social. En concreto, o proxecto configúrase como unha oportunidade para o emprego verde e a inserción de colectivos con limitacións á hora de acceder a un traballo.

Gonzalo Trenor animou a concellos e cidadáns a mellorar a separación dos produtos téxtiles do resto dos refugallos a través do seu depósito no contedor axeitado para propiciar o seu posterior reciclado e, con isto, o aforro de custos, tanto ambientais como económicos. “Reciclar non só trae consigo un aforro de materias primas e enerxía, constituíndo unha importante ferramenta na loita contra o cambio climático, senón que tamén supón un alivio económico para os propios concellos, toda vez que reduce a entrega de residuos a Sogama a través do contedor xenérico, minorando as toneladas a tratar nas súas instalacións e, polo tanto, o custo da factura, á vez que os municipios reciben ingresos por parte das entidades recicladoras, posibilitando desta forma unha taxa municipal máis xusta e equilibrada”, explicou.

Así mesmo, os deputados incidiron en que a moda rápida de usar e tirar está a engrosar de forma alarmante as cifras de residuos téxtiles producidos que, na súa maioría, acaban en vertedoiro, a peor das opcións polo seu alto poder contaminante. Por este motivo, recomendaron adquirir pezas de calidade e duradeiras, procedendo á doazón das mesmas cando se atopen en boas condicións para que se poida alongar a súa vida útil, e á súa reciclaxe cando non poidan ser reutilizadas. No caso daquelas que non sexan susceptibles de ser reutilizadas nin recicladas, Sogama as someterá a recuperación enerxética, evitando con isto a súa vertedura.

Os deputados do Grupo Popular Julio García Comesaña e Manuel Santos, acompañados da portavoz local do PP, Elena Estévez, salientaron hoxe o impulso do atractivo turístico e cultural que para Bueu supuxo a ampliación e mellora do Museo Massó, no que a Xunta de Galicia realizou un investimento de 1,4 millóns de euros.

García Comesaña e Santos subliñaron que esta intervención converteu ao Museo Massó “nun referente de primeiro nivel do patrimonio mariñeiro de Galicia”, ao incorporar as naves da antiga conserveira e dúas plantas da fábrica de salgadura Piñeiro, duplicando así a superficie expositiva.

Ademais, puxeron en valor a creación da Sala Lugrís, que permitirá exhibir fondos de gran relevancia, como a serie de seis pinturas de gran formato realizadas para o comedor das traballadoras da conserveira e que ocupan preto de 300 metros lineais.

PATRIMONIO CULTURAL E MARIÑEIRO

Os deputados populares salientan tamén a mellora das condicións xerais do centro museístico en materia enerxética e medioambiental, así como na seguridade, climatización e accesibilidade, o que reforza o compromiso do Goberno galego coa conservación e difusión do patrimonio cultural e mariñeiro.

“Con esta actuación a Xunta non só preserva a memoria mariñeira de Galicia, senón que tamén fortalece a oferta cultural e turística de Bueu e de toda a comarca”, destacou a portavoz popular, Elena Estévez Freire.

 

 

As deputadas do Grupo Popular Katy Varela e Encarna Amigo destacaron hoxe o traballo que a Xunta de Galicia vén desenvolvendo pola igualdade e a loita contra a violencia contra a muller, un labor que se expande aos festivais musicais, como o Caudal Fest que se está a celebrar en Lugo e onde os mozos e mozos teñen á súa disposición un Espazo de Igualdade e un Punto Lila e Arco Iris.

Nunha visita ao recinto do Caudal Fest, as deputadas comprobaron o funcionamento destes espazos de sensibilización e de atención e asesoramento continuado ante calquera tipo de violencia de xénero o LGBTIfóbica instalados pola Consellería de Política Social, coa colaboración de Turismo de Galicia, neste festival musical.

Estes puntos están compostos por dúas zonas diferentes, pero integradas. Unha primeira, de igualdade, pensada para a aprendizaxe e a sensibilización; e unha segunda, o Punto Lila e Arco Iris, para a atención continuada durante todo o festival a posibles vítimas de agresións sexuais ou calquera tipo de violencia machista ou LGBTIfóbica, que conta, ademais, cun espazo privado para poder facer un acompañamento, de ser necesario, con total confidencialidade.

Ambos espazos están a ser atendidos por un equipo multidisciplinar de profesionais especializados, entre os que se inclúen psicólogos, sexólogos, traballadores sociais, educadoras sociais ou axentes de igualdade con formación específica en igualdade de xénero, trata e prevención da violencia de xénero e LGBTIfobia.

Katy Varela e Encarna Amigo puxeron en valor a posta a disposición de todos os asistentes a este festival, nos que, en colaboración coa Consellería de Sanidade e os centros Quérote +, servirán tamén de espazos de información e prevención das infeccións de transmisión sexual.

O portavoz do Grupo Popular, Alberto Pazos, urxiu hoxe ao Goberno central a que “informe, adecuada e puntualmente, sobre o envío dos menores non acompañados a Galicia e poña enriba da mesa o financiamento necesario para facilitarlles todos os coidados que precisan e merecen”. Neste sentido, demandou a BNG e PSdeG que “colaboren desde as institucións que gobernan para a prestación das mellores atencións a estes menores”.

Alberto Pazos reiterou que “Galicia foi, é e será unha terra de acollida, pero non estamos dispostos a aceptar que se nos impoña desde o Goberno central esta distribución dos menores non acompañados, sen contar tan sequera coa opinión e as dispoñibilidades existentes en cada comunidade autónoma”.

TALANTE DITATORIAL DO GOBERNO DE PEDRO SÁNCHEZ

Deste xeito, pediu ao Goberno central que “abandone o seu talante ditatorial coas comunidades autónomas e cese neste reparto inxusto e arbitrario de menores non acompañados”, para o que considerou “fundamental que se abra unha vía de diálogo interinstitucional que permita un reparto equitativo destes menores”.

O portavoz popular pediu “que se informe, adecuada e puntualmente, ás comunidades sobre o envío destes menores, porque a súa chegada a Galicia xa provocou que a Xunta tivera que improvisar e modificar a súa política de acollemento de menores baseada na integración e convivencia en pequenos fogares”. Ao mesmo tempo, demandou que “poña enriba da mesa o financiamento necesario para facilitarlles as atencións educativas, sanitarias e sociais que precisan e merecen”.

“Non pode ser que Pedro Sánchez utilice ás comunidades autónomas ao seu antollo e as desprece un día si e outro tamén, polo que pedimos tanto a BNG como a PSdeG que, por unha vez, se poñan de lado dos galegos e apoien ao Grupo Popular na súa demanda”, sinalou Alberto Pazos.

Neste sentido, demandou aos grupos da oposición que “deixen de buscar réditos políticos a todo o que fan e colaboren desde as institucións que gobernan para a prestación das mellores atencións a estes menores”, pero avanzou que “non esperamos nada de socialistas e nacionalistas galegos e o Goberno de Alfonso Rueda terá que seguir traballando e buscando as solucións máis adecuadas para responder ao autoritarismo e falta de diálogo co que actúa habitualmente o Goberno de Pedro Sánchez”.

PLANS DE TRABALLO DAS COMISIÓNS

Respecto da actividade no Parlamento galego, Alberto Pazos lembrou a aprobación no día de onte, sen voto en contra algún, do plan de traballo da Comisión de estudo para a posible modificación da letra do himno de Galicia, que inclúe informes e comparecencias do Consello da Cultura, a Real Academia Galega e do Instituto de Estudos Galegos Padre Sarmiento, así como a comparecencia do profesor Manuel Ferreiro.

“Desde o Grupo Popular imos traballar porque a conclusión final desta comisión se elabore sen presa pero sen pausa, sen prolongar o debate máis do estritamente necesario e co obxectivo de chegar a unha conclusión que conte co maior respaldo posible”, indicou o portavoz popular.

Así mesmo, informou que esta mesma mañá se aprobou o plan de traballo da Comisión para o seguimento das políticas relativas á discapacidade e elaboración de novas propostas a prol da integración das persoas con discapacidade, que basicamente está dirixido a elaborar as conclusións finais baseándose na recompilación da extensa documentación achegada nas pasadas lexislaturas, a incorporación das cuestións relacionadas coa discapacidade que xurdiron na Comisión especial de estudo sobre a reactivación económica, social e cultural de Galicia pola crise da Covid-19; así como as transcricións das comparecencias que tiveron lugar durante a pasada lexislatura no seo desta Comisión de dependencia, entre as que figura a da propia conselleira de Política Social.

Outra das comisións non permanentes que se retomarán a vindeira semana é a de Igualdade e para os dereitos das mulleres, co obxectivo de seguir afondando no estudo e na busca de medidas para avanzar nunha sociedade máis igualitaria e na que poidamos felicitarnos porque conseguimos acabar coa violencia contra a muller. Para iso, o portavoz popular avanzou que “imos solicitar a presenza neste Parlamento galego de expertos e responsables políticos, así como o envío dunha ampla documentación que nos sirvan de base para unha proposta de medidas que axuden no obxectivo de que a sociedade galega sexa cada día máis xusta e igualitaria e poñamos en marcha accións que nos permitan deixar atrás esa lacra social que é a violencia machista”.

INCREMENTO DAS CONDENAS POR DELITOS SEXUAIS

Por último, Alberto Pazos considerou un “escándalo” o fallo nas pulseiras telemáticas que levan os maltratadores, denunciada pola propia Fiscalía Xeral do Estado na súa memoria de 2025. “Non pode ser que un país como España deixe ás mulleres vítimas de violencia de xénero totalmente desprotexidas dos seus agresores por unha chapuza do Goberno de Pedro Sánchez ao cambiar de sistema”, dixo.

O portavoz popular sinalou que “esta polémica coincide xustamente coa publicación do novo informe do Instituto Nacional de Estatística, no que se pon de manifesto o incremento dun 37,3 por cento das condenas por delitos sexuais o pasado ano, o que confirma que coas decisións e as accións deste Goberno de España non imos polo bo camiño: beneficiando aos condenados por este tipo de delitos a través da Lei do si é si, e agora deixando aos maltratadores total liberdade durante máis de 8 meses a consecuencia da nefasta xestión no cambio do operador das pulseras de seguimento”.

O Parlamento de Galicia aprobou hoxe por unanimidade a proposición non de lei do Grupo Popular a través da que se reitera a esixencia ao Goberno de España para que cumpra co establecido na Lei de Dependencia e asuma o financiamento do 50% do custo dos servizos e prestacións, garantindo un reparto equitativo dos recursos entre o Goberno de España e as comunidades autónomas; e que abone de maneira inmediata a débeda acumulada con Galicia, que supera os 2.500 millóns de euros, permitindo así fortalecer o sistema de atención á dependencia na nosa Comunidade.

Así mesmo, pídese que o Goberno central incremente os fondos destinados ás comunidades autónomas para a atención á dependencia, asegurando que todas as persoas con dereito a prestacións poidan acceder a elas sen demoras inxustificadas; e estableza un plan de financiamento estable e plurianual, que permita ás comunidades autónomas planificar e mellorar os servizos de dependencia con previsibilidade e seguridade orzamentaria.

INTERIORIZAR A GRAVIDADE

A portavoz popular de Asuntos Sociais, Raquel Arias, afirmou que con esta nova proposta “queremos que interioricen a gravidade que ten para as persoas dependentes a débeda de 2.500 millóns de euros do Goberno central con Galicia, demandando aos socialistas galegos que esixan a Pedro Sánchez que trate igual a Galicia que ao País Vasco e ao BNG que lle retire o seu apoio se esa equidade non se da”.

“Porque esta actitude do Goberno central con Galicia está a prexudicar a calidade de vida dos maiores e dependentes galegos, causa un gran prexuízo económico e pon aos concellos ao borde da quebra”, apuntou.

A SITUACIÓN EMPEARA DÍA A DÍA

Raquel Arias lamentou que “a situación empeora día tras día porque Pedro Sánchez, en vez de incrementar a súa aportación para a prestación dos servizos de dependencia, reduciuna nos últimos anos, pasando dunha achega do 40 por cento en 2023 a menos do 35 por cento ao ano seguinte”. “Iso si, comprometéndose co País Vasco a aboarlle o 50 por cento sen escusas, e co aplauso tanto do BNG como do PSdeG”, indicou.

Ademais, criticou que, “a medida que o Goberno central recorta as aportacións, vai modificando a Lei de dependencia para dar máis prestacións e máis servizos aos dependentes, pero en absoluto acompañadas do orzamento correspondente para levalos a cabo”. “Esta situación está a levar á quebra aos concellos, afecta ás políticas xerais da Xunta e, o que é peor, crea unha gran frustración entre os dependentes que ven sobre o papel uns servizos aos que non teñen acceso por falta de financiamento”.

O Parlamento de Galicia aprobou hoxe a proposición non de lei do Grupo Popular, co voto en contra do PSdeG, a través da que se solicita ao Goberno central o mantemento da cidade de Vigo, xunto con Santiago de Compostela, como sede para a realización dos exames de formación sanitaria especializada (MIR) na Comunidade galega. “É unha demanda que nace do sentido común, da evidencia técnica e do recoñecemento á realidade sanitaria e universitaria galega”, indicou a deputada popular Patricia García.

“Eliminar Vigo como sede dos exames MIR non ten sentido e non só é un erro político, senón que é unha decisión incomprensible, sen criterios técnicos coñecidos e tomada sen diálogo coas comunidades autónomas”, manifestou a deputada popular, quen saudou que a ministra de Sanidade se comprometera co conselleiro de Sanidade a revisar esta decisión e estudar a recuperación da sede en Vigo.

PROPOSTA POSITIVA, LEAL E CENTRADA EN VIGO

Patricia García defendeu “unha proposta positiva, leal institucionalmente e centrada no que de verdade importa: a cidade de Vigo, os aspirantes e o sistema sanitario galego”. Porén, lamentou que, “mentres desde o PPdeG propoñemos sumar, os socialistas galegos optan por dividir e buscar un titular contra a Xunta”.

A deputada popular lamentou que os deputados socialistas “non se sumaran á maioría que aprobou esta iniciativa no Parlamento galego, a través da que enviarmos unha mensaxe clara ao Ministerio de Sanidade: que Galicia está unida na defensa de Vigo como sede dos exames MIR”.

A portavoz de Sanidade do Grupo Popular, Encarna Amigo, incidiu hoxe no Parlamento de Galicia que a Xunta impulsará as xestións necesarias para a construción dun novo centro de saúde en Fisterra no momento que desde o Concello se poña á súa disposición os terreos necesarios. “Confiamos que o novo alcalde teña unha actitude máis conciliadora que o anterior grupo de goberno e facilite que os veciños poidan gozar do novo centro de saúde”, manifestou.

“Sen parcela non hai centro de saúde posible”, asegurou Encarna Amigo, quen apuntou que “cando ese terreo se poña a disposición da Xunta haberá un novo centro de saúde, que triplicará o espazo do actual, pasando de 345 a máis de 1.000 metros cadrados, con cinco consultas para adultos, unha de pediatría e unha sala de xuntas para o persoal”.

RETICENCIAS MUNICIPAIS

A deputada popular lamentou que, “a pesar da vontade amosada pola Xunta para construír o novo centro de saúde en Fisterra moderno, accesible, amplo, dotado con equipamento renovado e preparado para albergar novos servizos sanitarios, o Concello non foi quen de poñer a disposición do Sergas unha parcela axeitada”.

Así, lembrou “as reticencias municipais a emprazar o centro de saúde novo nun entorno diferente ao do actual, en pleno núcleo urbano”. Neste sentido, recordou que o Concello pediu estudar a opción de reformar o centro actual, proposta que os técnicos do Sergas concluíron que iso non era viable nin técnica nin economicamente.

A Comisión especial de estudo sobre a posible modificación da letra do himno de Galicia aprobou o seu plan de traballo, sen ningún voto en contra, que, ademais de incorporar toda a documentación reunida pola ponencia constituída xa na X lexislatura, inclúe a elaboración de informes e comparecencias da Real Academia Galega, o Consello da Cultura Galega e o Instituto de Estudos Galegos Padre Sarmiento, ademais da presenza do catedrático Manuel Ferreiro Fernández.

O deputado popular José Luís Ferro manifestou que “o plan de traballo ten un valor engadido moi importante porque da protagonismo á cultura e á ciencia galega, non á improvisación nin á polémica, respectando o legado de Pondal pero abrindo tamén unha xanela para pensar no futuro”.

“Non se pode afirmar que é urxente tomar unha decisión definitiva e formular unha proposta cun horizonte temporal de, como mínimo, un ano vista; nin se pode afirmar que buscamos o consenso e propoñer organizacións de parte, cando xa hai antecedentes de consultas ás principais institucións académicas de Galicia; nin se pode afirmar que a modificación dun símbolo de Galicia require unanimidade política e consenso social e pretender impoñela cun articulado pechado; nin podemos afirmar que o himno como símbolo de Galicia ten un enorme valor simbólico e abordar o debate da súa posible modificación só desde un punto de vista do seu rigor filolóxico”, indicou José Luís Ferro respecto das propostas realizadas polos demais grupos parlamentarios.

Deste xeito, cualificou o plan de traballo aprobado como “serio, obxectivo e que solicita os informes pertinentes das institucións que son de todos, non de ningunha cor política”. “Orientar os traballos desta comisión cara unha conclusión predeterminada sería un grave erro, porque o que debemos permitir é un debate aberto e obxectivo sobre se é conveniente ou non modificar o noso himno”, indicou.

A viceportavoz do Grupo Popular, Cristina Sanz, pediu hoxe ao Goberno central que cese coa conxelación das achegas do Fondo de Compensación Interterritorial (FCI) que Galicia recibe do Estado, de tal xeito que os recursos adicionais que reciba poidan ser destinados ao financiamento de obras ou actuacións que favorezan o reequilibrio e o desenvolvemento de todos os territorios, dea cumprimento ao compromiso asumido por Pedro Sánchez de incrementar as achegas e retome a contía equivalente á realizada en 2009.

Tomando como referencia o informe do Consello de Contas, Cristina Sanz lembrou que a dotación do FCI nos orzamentos do Estado para o ano 2023 era de 432 millóns de euros, o que representa unha caída do 67,68 por cento desde o ano 2008 e un importe conxelado desde 2014.

Ademais, a participación de Galicia nese fondo experimentou unha caída do 81,02 por cento desde 2008, sendo a comunidade máis afectada e recibindo en 2023 a porcentaxe máis baixa de todos os exercicios analizados (8,92 por cento). En concreto, o Estado pasou de destinar a Galicia a través deste fondo 197 millóns de euros en 2009 a 38,6 millóns na actualidade.

NOVO DESEÑO

Diante desta situación, e recollendo o manifestado polo Consello de Contas, a viceportavoz popular demandou “un novo deseño do fondo de compensación interterritorial que garanta o financiamento suficiente dos investimentos produtivos das comunidades autónomas e reduza os desequilibrios territoriais, velando polo establecemento dun equilibrio económico adecuado e xusto, e unha mellor aplicación do principio de solidariedade”.

Cristina Sanz criticou que “a promesa de Pedro Sánchez de duplicar os recursos dos fondos de cohesión territorial segue pendente de concretarse”, pero, a pesar de que eses recursos non experimentaron variacións desde o ano 2014, o gasto licitado pola Comunidade galega pasou de 580 millóns de euros naquel ano a 1.404 millóns no 2023. “A pesar da conxelación dos fondos estatais, Galicia case triplicou o seu gasto en investimentos, tendo que financialos con cargo aos seus propios recursos”, salientou.