Categoría: Parlamento de Galicia

Os deputados do Grupo Popular Argimiro Marnotes e José Luís Ferro visitaron no Carballiño a empresa GRI Towers Galicia para comprobar de primeira man as consecuencias que a paralización do sector eólico está a ter nas industrias que se dedican a este sector, que se traduce tanto nun descenso da produción, a busca de mercado de traballo fóra de Galicia e a redución do emprego directo e indirecto.

Argimiro Marnotes e José Luís Ferro lamentaron o bloqueo que vive o sector eólico na Comunidade galega, motivado tanto polos recorrentes recursos e accións xudiciais emprendidas polo Tribunal Superior de Xustiza de Galicia contra proxectos autorizados polo Goberno galego, como pola recente decisión do Goberno de Pedro Sánchez de presentar un recurso de inconstitucionalidade contra a medida da Xunta para a repotenciación de parques eólicos.

MENOS DUN 6% DE PRODUCIÓN EN GALICIA

No caso concreto da empresa GRI Towers Galicia, os seus responsables trasladaron aos deputados populares a complexa situación que están a vivir, afectados por unha inseguridade xurídica evidente que desincentiva o investimento en Galicia: menos dun 6 por cento da súa produción se instalou en Galicia nos últimos dous anos.

“Ademais, o bloqueo que sufre o eólico galego non só está a devaluar a conta de resultados das empresas relacionadas con este sector, senón que tamén está a repercutir directamente no emprego que xeran”, indicaron os deputados populares, logo de coñecer que esta empresa do Carballiño viuse obrigada a reducir o seu persoal en case un 30 por cento.

Marnotes e Ferro manifestaron que “a parálise do sector eólico que padecemos en Galicia é inédita no resto de España e Europa, xa que o Tribunal Superior de Xustiza de Galicia é o único tribunal que bloquea por sistema os eólicos autorizados pola Xunta, insistindo nos seus recursos a pesar de que o Tribunal  Supremo e o Tribunal de Xustiza da Unión Europea avaliaron bo facer do Goberno galego, validando as avaliacións ambientais dos parques eólicos que se realizan en Galicia”.

A esta parálise xudicial sumouse o recente recurso de inconstitucionalidade presentado polo Goberno central contra a modernización dos parques eólicos impulsada pola Xunta a través da repotenciación, “unha decisión incomprensible tendo en conta que esta mesma semana o propio Goberno de Pedro Sánchez anunciou a posta en marcha dun proxecto para dinamizar a repotenciación de parques eólicos a nivel nacional, copiando exactamente o que está a boicotear en Galicia”, criticaron.

Os deputados do Grupo Popular Paula Mouzo e Roberto Rodríguez salientaron hoxe o compromiso do Goberno galego coa mellora da atención sanitaria que reciben os veciños do distrito sanitario de Cee, que se incrementará coa dotación o vindeiro ano dun novo mamógrafo no Hospital Virxe da Xunqueira, para o que a Xunta destinará 326.000 euros que xa figuran nos orzamentos de 2026.

Acompañados de concelleiros de distintos municipios desta comarca, Paula Mouzo e Roberto Rodríguez lembraron que o Hospital de Cee xa fora o primeiro dos centros comarcais da rede sanitaria pública galega en contar, desde o mes de xuño de 2010, cun servizo permanente de mamografía dixital para a detección precoz do cancro de mama. “A dotación dun novo mamógrafo suporá un paso máis na mellora da atención sanitaria que reciben as mulleres deste distrito sanitario”, indicaron.

SEGUIMENTO ONCOLÓXICO

A dotación deste novo mamógrafo para o Hospital Virxe da Xunqueira é un paso máis na mellora das prestacións sanitarias que reciben os veciños do distrito sanitario de Cee, e súmame ao programa asistencial en oncoloxía que a Xunta porá en marcha co obxectivo de que máis da metade dos pacientes con cancro dos concellos de Camariñas, Corcubión, Dumbría, Fisterra, Muxía, Vimianzo e Zas non teñan que desprazarse ata A Coruña a recibir os seus tratamentos.

Deste xeito, este novo programa permitirá a realización de consultas de seguimento aos pacientes que non estean recibindo tratamento activo e para os que o seu profesional de referencia deseñou un cronograma de probas complementarias, así como a administración e seguimento de tratamentos de baixa complexidade.

A viceportavoz do Grupo Popular, Cristina Sanz, e o deputado José Manuel Mato salientaron hoxe en Lugo “o salto cualitativo na atención aos maiores de Lugo que suporá a realización das obras de remodelación da residencia As Gándaras, nas que a Xunta investirá preto de 8 millóns de euros”.

Nunha visita á propia residencia para coñecer a súa situación actual, Cristina Sanz e José Manuel Mato explicaron que as obras permitirán implantar neste centro lucense o novo modelo residencial de maiores da Xunta, que ten como piares fundamentais a atención personalizada, a mellora dos equipamentos, o uso das novas tecnoloxías e a formación continua dos profesionais. “O obxectivo é que os nosos maiores se sintan nestas residencias como nos seus propios fogares, poñendo á súa disposición os mellores medios e sistemas para ter unha atención de máxima calidade”, apuntaron.

En concreto, as obras na residencia As Gándaras, que foron adxudicadas por 7.931.000 euros cun prazo de execución de 16 meses, abranguen a mellora da accesibilidade da entrada ao centro; a reorganización das habitacións das plantas, desde a cuarta ata a oitava; a reordenación da parte central do núcleo da primeira planta; a creación dunha terraza transitable na planta primeira; a mellora do illamento exterior; e a renovación xeral da estética, que pasará a ser predominantemente blanca.

O portavoz do Grupo Popular, Alberto Pazos lamentou hoxe e amosou a súa preocupación porque “tanto as decisións adoptadas polo Goberno de Pedro Sánchez como o bloqueo provocado polas decisións do Tribunal Superior de Xustiza de Galicia estean a paralizar o desenvolvemento dun sector eólico galego, que debería ser a punta de lanza para que os galegos gozáramos dun prezo da luz máis barato, ao tempo que empresas como Alcoa dispoñan de enerxía suficiente para levar adiante os seus proxectos, xerando emprego e riqueza para as zonas nas que se asentan e en toda Galicia”.

Alberto Pazos criticou que o Goberno central, “logo de presentar un recurso de inconstitucionalidade contra a decisión da Xunta de impulsar a repotenciación dos parques eólicos existentes en Galicia, ven agora e anuncia o pasado martes unha folla de ruta nacional para a dinamización das repotenciacións de parques eólicos en toda España, unha nova tomadura de pelo e unha fraude para todos os galegos, a non ser que veña acompañada da inmediata retirada do recurso de inconstitucionalidade presentado contra a normativa galega”.

“Galicia volveu demostrar, unha vez máis, que vai moito por diante do actual Goberno de España na adopción de medidas para o impulso do noso sector industrial e da nosa economía, pero lamentablemente estas iniciativas pioneiras se atopan a maioría das veces cos atrancos que o Goberno de Pedro Sánchez, espoleado polos socialistas galegos e os seus aliados do BNG, pon a todo o que supoña proxectos de futuro e de beneficio para todos os galegos”, sinalou o portavoz popular, quen citou casos concretos como a negativa á transferencia da AP-9 a Galicia ou deixar a toda a provincia de Lugo sen conexión eléctrica co único obxectivo de que o proxecto de Altri non sexa unha realidade..

COHERENCIA E SENTIDO COMÚN

Deste xeito, o portavoz popular demandou ao Goberno de Pedro Sánchez “un pouco de coherencia e de sentido común para rectificar e retirar de inmediato o recurso que presentou contra a repotenciación dos parques eólicos en Galicia impulsada pola Xunta, unha medida que permitirá reducir o impacto dos aeroxeradores nos montes galegos ata nun 80 por cento e incrementar, ao mesmo tempo, a xeración de enerxía eólica de orixe renovable, xa que os novos aeroxeradores son máis eficientes que os que están funcionando na actualidade”.

Alberto Pazos lamentou que o sector eólico galego “vive un momento complicado polas incansables trabas que o Tribunal Superior de Xustiza de Galicia está a poñer ao desenvolvemento de novos proxectos nesta comunidade autónoma, que están a conseguir que Galicia deixe de ser unha comunidade punteira no sector eólico, para verse superada polo avance que se rexistra noutras comunidades españolas, como Castela e León, Aragón, Castela-A Mancha ou, incluso, Andalucía”.

En concreto, indicou que, fronte a un mínimo incremento de pouco máis do 2 por cento na potencia instalada en Galicia desde o ano 2021 (ano no que o TSXG comezou a súa ofensiva contra o eólico galego), comunidades como Aragón incrementaron a potencia instalada no seu territorio neste tempo nun 33 por cento; Castela-A Mancha, un 22 por cento; ou Castela e León, nun 16,3 por cento. “Sen perder de vista os case 800 megavatios que se instalaron en Andalucía nos últimos catro anos, cos que case iguala a potencia instalada en Galicia neste momento, cando hai uns anos a diferenza con respecto a Galicia era moi considerable”, apuntou.

“Cando parecía que os fallos do Tribunal Supremo e do Tribunal de Xustiza da Unión Europea dando a razón á tramitación dos parques eólicos levada a cabo pola Xunta abrían un halo de luz para botar abaixo catro anos de paralización do sector eólico galego a consecuencia dos recursos presentados polo TSXG, a pasada semana volveunos sorprender cunha nova volta de rosca, facendo público un novo pronunciamento no que volve insistir, por terceira vez, en que a tramitación ambiental realizada pola Xunta dun parque eólico é inválida, porque cada instalación debe tramitarse coas súas propias liñas de evacuación”, manifestou Alberto Pazos.

Neste sentido, criticou que “son ganas de enredar e de facer perder un tempo precioso a un sector practicamente paralizado polas decisións xudiciais, porque os autos dos altos tribunais españois e europeo xa validaron as tramitacións ambientais realizadas pola Xunta e incluso o propio Tribunal Supremo recoñeceu que a tramitación separada do parque eólico e da liña de evacuación está prevista na Lei eólica galega, cumprida ao dedillo polo Goberno galego xa que é a mellor forma de respectar o noso medio ambiente”.

O portavoz popular asegurou que “sempre respectamos e respectaremos as decisións xudiciais que se adopten en calquera ámbito, pero o sector eólico galego está a sufrir unha situación única non só a nivel español, senón a nivel europeo, porque o Tribunal Superior de Xustiza de Galicia é o único tribunal que está a bloquear por sistema os parques eólicos tramitados pola administración”.

PLAN DE TRABALLO DA COMISIÓN DE IGUALDADE

Por outra banda, Alberto Pazos informou que a Comisión non permanente de estudo para a igualdade e os dereitos das mulleres aprobou esta mañá o seu plan de traballo, que inclúe a solicitude de 38 informes e 72 comparecencias de representantes tanto da propia administración como de diferentes organizacións, entidades, empresas e universidades.

“É un plan de traballo moi ambicioso que, sen dúbida, levará a propostas importantes de cara ao avance na igualdade real, especialmente nos sectores masculinizados e das persoas que sofren discriminación múltiple, así como no que atinxe á prevención e atención ás vítimas de violencia de xénero”, dixo.

Pazos considerou “sorprendente a negativa inicial do BNG ao apoiar este plan de traballo, coa escusa de que consideraban necesario que cada grupo parlamentario incorporara un cupo de comparecentes en función do número de deputados co único obxectivo de xustificar o seu voto en contra”. “Finalmente, esta estratexia viuse abaixo cando desde o Grupo Popular aceptamos incorporar todas as comparecencias que solicitaban desde o BNG, deixando sen argumentos, unha vez máis, aos nacionalistas galegos, que se viron obrigados a apoiar finalmente o plan de traballo para non quedarse totalmente illados”, destacou.

Os deputados ourensáns do Grupo Popular demandarán no Parlamento de Galicia que as confederacións hidrográficas do Miño-Sil e do Douro adopten medidas urxentes de protección dos ríos e as traídas de augas nas zonas afectadas polos incendios forestais deste verán en Ourense, ante a chegada das choivas e a creación de escorrentías con cinza e restos vexetais.

Nunha xuntanza que celebraron no Parlamento galego, Miguel Ángel Viso, Miguel Santalices, José Luís Ferro, Víctor Baladrón, Juan Casares, Noelia Pérez, Cristina Campero e Argimiro Marnotes amosaron a súa preocupación pola escasa resposta das confederacións hidrográficas dependentes do Goberno central para prever as escorrentías coa instalación de barreiras anticontaminación, a limpeza de marxes e canles, ou a restauración vexetal das beiras.

TRABALLO PREVENTIVO DA XUNTA

“A Xunta, consciente dos danos que os restos dos incendios forestais poden provocar nos ríos e nas traídas de auga, xa leva tempo mobilizando recursos e traballando nas zonas afectadas polos lumes dentro do seu ámbito de competencia, que é a demarcación hidrográfica de Galicia-Costa, unha situación que contrasta coa falta de axilidade amosada polas confederacións hidrográficas dependentes do Goberno central e que son as responsables de actuar na provincia de Ourense”, manifestaron.

Deste xeito, os deputados populares urxiron ás demarcacións hidrográficas do Miño-Sil e do Douro para que procedan á limpeza e retirada de materiais das marxes e canles dos ríos, á restauración vexetal das beiras; á realización de accións de control da erosión do solo; á implantación de medidas ante choivas torrenciais; e á supervisión directa das infraestruturas hidráulicas que poidan verse comprometidas polos arrastres.

Ademais, esixen que estas demarcacións hidrográficas reforcen os sistemas de control e vixilancia da calidade da auga, tal e como está a facer a Xunta, ampliando a rede de puntos de seguimento en ríos e regados afectados polos lumes e garantindo a publicación pública e transparente dos datos recollidos en tempo real.

A portavoz de Xuventude do Grupo Popular, Nicole Grueira, salientou hoxe no Pleno do Parlamento galego que a Xunta destinará o vindeiro ano máis de 700 millóns de euros ao impulso do rural, duplicando os recursos para acompañar novos proxectos, modernizar explotacións e consolidar un rural competitivo. “Ter orzamentos é fundamental para xestionar, apoiar, acompañar á xente nova e, simplemente, estar”, indicou.

Nicole Grueira destacou que máis de 5.000 mozos e mozas galegos incorporáronse desde 2009 á actividade agrogandeira gracias ao apoio da Xunta, dos que 320 o fixeron só no ano 2024, beneficiándose de 370 plans de mellora.

“De cara ao vindeiro ano, os orzamentos da Xunta volverán apostar con 24 millóns de euros pola remuda xeneracional, blindando as axudas á modernización das explotacións con axudas para novos agricultores e para cedentes de explotacións”, indicou.

Así mesmo, o presuposto da Xunta reforza todos os apoios ao emprendemento rural, como o programa de titorización de mozos; ao tempo que se destinan máis de 16 millóns de euros para reestruturación parcelaria, 4 millóns máis que en 2025. “Por primeira vez, o Goberno galego disporá de 5 millóns de euros para promover servizos básicos en asentamentos rurais para mellorar a vida das persoas que aposten por asentarse nas nosas aldeas”, afirmou Nicole Grueira.

“Mentres aquí temos máis de 700 millóns de euros sobre a mesa, PSOE e BNG non son capaces de aprobar unha soa cifra para garantir o relevo xeracional no rural”, sinalou a portavoz popular, quen criticou que “si son capaces de poñerse de acordo e votar conxuntamente para illar a máis de 130.000 galegos que viven no rural, eliminándolles 22 paradas de autobús en concellos rurais; para condicionar o futuro industrial de toda a provincia de Lugo, soamente por negarlle a conexión a unha empresa concreta; e para castigar aos autónomos, que manteñen vivo o noso rural”.

A portavoz de Educación do Grupo Popular, Cecilia Vázquez, demandou hoxe no Pleno do Parlamento de Galicia que a Xunta solicite, en diálogo coas tres universidades galegas, o aumento do número de prazas públicas no mestrado universitario en profesorado, ao tempo que reforza a colaboración coa UNED para incrementar a oferta de prazas a distancia do máster de profesorado que actualmente oferta esta institución en Galicia.

Cecilia Vázquez explicou que o Mestrado en Profesorado é unha titulación habilitante e requisito indispensable para acceder ao corpo docente de secundaria, FP, bacharelato e escolas oficiais de idiomas, “polo que garantir unha oferta suficiente e de calidade é un obxectivo esencial da política educativa galega”.

“Estamos diante dun desaxuste común en toda España, o que está provocanto tanto o incremento das matrículas en universidades privadas como a escaseza de perfís profesionais moi específicos, mentres noutras áreas hai exceso de titulados”, sinalou a portavoz popular.

MESES TRABALLANDO

Na actualidade, Galicia conta con máis de 800 prazas no mestrado de profesorado “e desde o Goberno galego xa levan meses traballando, tanto coas universidades galegas como coa UNED, para incrementar a oferta e mellorar a formación do futuro profesorado”.

Porén, Cecilia Vázquez tamén considerou necesario que o Goberno central axuste a oferta das facultades á demanda real do sistema, tanto agora como nos próximos anos; e mellore a formación e as competencias do profesorado, revistando tamén os temarios de oposicións que levan anos desactualizados e desconectados da realidade dos centros educativos.

O Parlamento de Galicia aprobou hoxe a proposición non de lei do Grupo Popular a través da que se demanda ao Goberno de España que reforme a Lei 7/2022 e derrogue a obriga de establecer unha taxa que repercuta o 100 por cento do custo da xestión dos residuos urbanos nos cidadáns, creando un sistema flexible de financiamento deste servizo que permita aos concellos cubrilo con cargo aos seus orzamentos ou mediante modelos mixtos, ao tempo que poidan xeneralizar bonificacións sociais para familias vulnerables, pensionistas ou autónomos con baixos ingresos. Deste xeito, pídese a creación dun Plan Nacional de Infraestruturas para a Economía circular, cofinanciado con fondos europeos, que permita mellorar os sistemas locais de recollida e tratamento de residuos sen trasladar todo o custo ao cidadán.

A deputada popular Loli Hermelo afirmou que o obxectivo desta iniciativa “é defender a Galicia e aos galegos ante decisións que, tomadas lonxe, teñen consecuencias directas nas novas vilas, nas nosas parroquias e na economía das familias galegas”. “Unha proposta para modificar esta lei estatal inxusta, antisocial e centralista, que impón a obriga de repercutir o 100 por cento do custo da xestión dos residuos urbanos directamente nos cidadáns”, anotou.

“Obrigan a cada concello a crear un sistema de recadación específico e confiscatorio cos custes engadidos, e todo ilo que o paguen os galegos”, criticou a deputada popular, quen salientou que esta lei “é especialmente nociva para os concellos rurais, que soportan unha recollida do lixo máis cara debido á dispersión da súa poboación”.

Loli Hermelo lamentou que “España adoptou esta medida de xeito voluntario porque así o decidiu Pedro Sánchez, negando aos concellos a posibilidade de cofinanciar o servizo de recollida do lixo nin establecer bonificacións para os colectivos vulnerables”.

Así mesmo, explicou que esta lei “está mal deseñada, porque non se fixo unha avaliación real do impacto económico nos municipios, nin tampouco se prevén fondos de compensación” e acusou a PSOE e BNG de apoiar “un ecoloxismo de hipocrisía, porque non se destina un só recurso na lei á educación ambiental nin á reciclaxe industrial”.

O Parlamento de Galicia acordou hoxe, a proposta do Grupo Popular, solicitar ao Grupo Socialista no Congreso que retire as emendas presentadas no Congreso á proposición de lei de transferencia á Comunidade galega da titularidade e competencias da AP-9 porque desvirtúan esta iniciativa lexislativa aprobada por unanimidade na Cámara galega. Así mesmo, pídese ao Goberno central que elabore e faga público un estudo que avalíe o custe do rescate desta autoestrada, da implantación da súa gratuidade e de aplicar as bonificacións vixentes ata o final da concesión.

O portavoz popular de Infraestruturas, Roberto Rodríguez, criticou “o boicot do Goberno de Pedro Sánchez e dos seus socios a Galicia á tramitación da transferencia a Galicia da titularidade e as competencias da autoestrada que nos vertebra social e economicamente, acordada por unanimidade neste Parlamento galego e tomada en consideración hai xa 500 días”.

INSULTO E TRAIZÓN A GALICIA

“Se os socialistas lle furtaron a Galicia o debate desta proposición de lei coas 60 prórrogas ao trámite de emendas no Congreso, agora o que se lle pretende furtar é a súa vontade lexítima e unanimemente expresada a través da primeira institución que representa o pobo galego: o seu Parlamento”, afirmou Roberto Rodríguez, quen criticou que “as emendas presentadas polo PSOE opoñéndose á transferencia da titularidade da AP-9 non son só un castigo, son tamén un insulto e unha traizón a Galicia dos socialistas”.

Respecto da postura adoptada polos socialistas galegos, sinalou que con estas emendas “quedaron espidos ante os galegos e só lles queda elixir entre quedarse coas mentiras de Sánchez do pasado ou abrazar as mentiras de Sánchez do futuro, pero en calquera caso Galicia xa ten acreditado que son uns mentireiros”. “Mentiron e menten sempre, en todo o momento, e así o certificou o propio ministro Puente a semana pasada cando asegurou que non vai haber transferencia da AP-9 a Galicia; non vai haber rescate, salvo que o diga un xuíz; e non vai haber gratuidade, senón peaxes menos gravosos”, lamentou. Pola contra, lembrou que “no resto do Estado rescate e gratuidade de 8 autoestradas e en Galicia só peaxes menos gravosos”.

Roberto Rodríguez concretou que a través desta iniciativa do Parlamento galego reclamamos “a transferencia a Galicia da titularidade e as competencias sobre o réxime xurídico da concesión, así como as funcións e os servizos ata o de agora exercidos pola Administración xeral do Estado nos termos acordados unanimemente nesta Cámara, e para iso é imprescindible que o Goberno de Pedro Sánchez retire as emendas presentadas á lei de transferencia”.

INDEMNIZACIÓN QUE MEDRA DÍA A DÍA

“E tamén instamos ao Goberno a que xustifique por que o rescate non é unha opción”, dixo o portavoz popular, quen apuntou que “o rescate si é unha opción e o baseamos no informe elaborado pola Xunta e remitido hai meses ao Goberno central no que se estimaba o custo medio do mesmo en 2.356 millóns de euros, cantidade equivalente ao gasto público destinado ás bonificacións ata a fin da concesión, unha cifra que segue medrando día tras día”.

Para rematar, Roberto Rodríguez manifestou que “o Goberno de Pedro Sánchez non pode desbotar sen máis a oportunidade de, tralo ditame da Unión Europea, rescatar a AP-9 sen sequera avaliala para prorrogar a situación actual, que tan só beneficia á concesionaria que ano tras ano aumenta os seus ingresos mentres os galegos pagamos máis ca nunca polos peaxes máis caros de España e de Europa”.