Categoría: Parlamento de Galicia

A portavoz de Sanidade do Grupo Popular, Encarna Amigo, asegurou hoxe no Parlamento de Galicia que as tres prazas de pediatría de Lalín están cubertas neste momento e contan cun cupo que non supera os 830 nenos por pediatra, moi por baixo dos 1.100 que recomenda o Marco Estratéxico para a atención primaria do Ministerio de Sanidade. Así mesmo, considerou “unha medida inxustificada e populista, propia do catecismo do BNG e insostible para calquera xestor sanitario responsable engadir un cuarto pediatra ao Centro Integral de Saúde de Lalín cando non se supera o límite de nenos establecidos para cada profesional”.

Encarna Amigo pediu aos nacionalistas galegos que “deixen a demagoxia e o alarmismo, e non xoguen coa sanidade pública galega, porque a situación da atención pediátrica en Lalín está controlada, organizada e perfectamente dimensionada conforme ás necesidades reais da poboación infantil da comarca”.

CONTRATACIÓN DE TODO O PERSOAL DISPOÑIBLE

En concreto, afirmou que as tres prazas de pediatría do CIS de Lalín están cubertas: unha pola súa titular e as dúas restantes por residentes de pediatría, que están a prestar o servizo ata o 19 de xullo. “A partir desa data unha nova pediatra cubrirá a praza por renuncia e a outra será atendida polos pediatras da zona”, asegurou.

Ademais, e referíndose ao Marco Estratéxico para a atención primaria do Ministerio de Sanidade, no que se recolle unha ratio máxima recomendada de 1.100 nenos por pediatra, Encarna Amigo subliñou que “en Lalín ningún dos tres cupos existentes supera os 830 nenos: 828 o primeiro, 808 o segundo e 602 o terceiro”. Deste xeito, criticou ao BNG porque “non se pode pedir máis prazas sen unha necesidade asistencial real, nin xerar alarma onde hai eficacia”.

“Deixen de demonizar aos médicos de atención primaria e de estender a sospeita de que os nenos están mal atendidos por un médico de familia”, demandou a portavoz popular, quen lamentou que “BNG e PSdeG finxen non saber que a escaseza de pediatras é un problema de toda España, non exclusivo da Comunidade galega”.

Diante desta situación, Encarna Amigo lembrou que a Xunta “contrata a todo o profesional dispoñible” e salientou que “Galicia leva sete anos consecutivos cubrindo o 100 por cento das prazas acreditadas en pediatría e medicina familiar, ao tempo que as listas de contratación están a cero”.

“Hoxe hai máis pediatras en atención primaria que en 2008 cando gobernaban socialistas e nacionalistas, a pesar de que hai 30.000 nenos menos agora que entón”, destacou.

O Grupo Popular demandará ao Goberno de España no Pleno do Parlamento de Galicia da vindeira semana dúas cuestións de marcado carácter social: a primeira, que dote de fondos a Lei ELA, para que sexa realmente efectiva e cumpra cos obxectivos para os que foi aprobada hai sete meses; e, a segunda, que manteña o financiamento íntegro e estable do Plan Corresponsables, de forma que se garanta a continuidade dos programas iniciados en 2021.

Ao remate da Xunta de Portavoces, o portavoz popular, Alberto Pazos, informou que a sesión plenaria dará comezo coa primeira votación para a elección de María Concepción Pombo Romero como nova directora xeral da Corporación de Servizos Audiovisuais de Galicia, que sairá designada se conta co respaldo de 2/3 dos deputados. De non ser así, a elección volverá incorporarse á orde do día do seguinte Pleno, onde será necesaria unha maioría de 3/5 e, se non se acada esa maioría, a escolla da nova directora xeral volverá ao Pleno seguinte, onde só será necesario a maioría absoluta.

POLÍTICAS SOCIAIS

A orde do día da sesión plenaria da vindeira semana inclúe a comparecencia, a petición propia, do conselleiro de Presidencia, Xustiza e Deporte para informar sobre a situación do transporte en Galicia, “nun momento no que son patentes os problemas existentes no transporte ferroviario en Galicia, con problemas para a compra de billetes ou a redución de servizos, prazas e paradas nas viaxes, tanto no interior de Galicia como cara Madrid”, sinalou Alberto Pazos.

Dentro do apartado de proposicións non de lei, o Grupo Popular demandará ao Goberno de España o financiamento necesario para o implantación da Lei ELA, “porque unha norma como esta sen fondos económicos non é máis que unha simple declaración de intencións que en nada mellora a situación das persoas que padecen esta doenza e dos seus familiares”.

Neste sentido, o portavoz popular contrapuxo o compromiso do Goberno galego cos enfermos de ELA, ao que destina cada ano máis de tres millóns de euros en axudas para facer fronte á compra de produtos básicos para o coidado; produtos sanitarios, como muletas ou cadeiras de rodas; ou para adaptar os seus fogares ás súas necesidades. “Galicia foi pioneira a nivel de toda España en 2018 en poñer a disposición dos enfermos de ELA un procedemento para axilizar a súa atención, tanto a nivel sanitario, para axilizar o seu diagnóstico, como a nivel social, implementando unha vía preferente para a valoración da situación das persoas con ELA e que poidan acceder a un servizo no menor tempo posible; ao que se sumou desde o ano 2023 unha liña de axudas directas, por máis de 3 millóns de euros anuais, para os enfermos e as súas familias”, explicou.

A segunda das proposicións non de lei do Grupo Popular tamén está relacionada co ámbito social e a través dela pídese ao Goberno de España que manteña o financiamento íntegro e estable do 100 por cento do Plan Corresponsables, de forma que se garanta a continuidade de programas como os dirixidos á conciliación familiar nos períodos de vacacións, á creación de bolsas de coidado profesional para familias con menores; ao fomento do emprego de calidade no sector dos coidados; e á formación en corresponsabilidade, especialmente dirixida a homes.

RECORTE DO 25%

Alberto Pazos lembrou que este plan contaba cun investimento anual por parte do Goberno central de máis de 191 millóns de euros desde o ano 2021, “pero os problemas xa que vislumbraron o pasado ano cando a convocatoria, que habitualmente era bianual, so cubría o ano 2024”. “O verdadeiramente preocupante chegou este ano cando o Goberno de Pedro Sánchez comunicou que recortaba un 25 por cento o orzamento previsto, poñendo ademais como condicionante que as comunidades autónomas, para recibir os cartos que lles corresponderían, deben cofinanciar a parte que o Goberno central deixa de aportar para o Plan Corresponsables”.

“Estamos diante dunha irresponsabilidade máis do Goberno de Pedro Sánchez e un novo recorte ás prestacións sociais dun Goberno sen orzamentos e que improvisa día tras día, ao que se suma o feito de que se comunica cando o exercicio orzamentario das comunidades autónomas está executado en máis dun 50 por cento e coas partidas orzamentarias xa comprometidas na súa meirande parte, polo que as deixa sen marxe de manobra para que poidan sufragar a parte que lles tocaría para atender as necesidades das familias en materia de conciliación”, indicou o portavoz popular.

RELACIÓNS XUSTIZA CON ECOLOXISTAS

Por último, dentro do apartado de preguntas ao Goberno galego, o Grupo Popular interesarase pola celebración da Conferencia de Presidentes prevista para o vindeiro 6 de xuño e os asuntos abordados na mesma; e polos recentes pronunciamentos xudiciais do Tribunal Supremo respecto dos proxectos eólicos previstos na Comunidade galega.

Neste punto, Alberto Pazos puxo de manifesto a “incongruencia existente entre as sentenzas do Tribunal Supremo avalando a correcta tramitación de parques eólicos por parte da Xunta e o goteo insistente de paralizacións de proxectos desde o Tribunal Superior de Xustiza de Galicia, máis en concreto desde unha sala moi específica do TSXG”. “Partindo da base do respecto a todas as decisións xudiciais, resulta do máis sospeitoso as estreitas relacións que estamos a coñecer polos medios de comunicación entre xuíces do Tribunal Superior de Xustiza de Galicia, que están a protagonizar a gran maioría destas paralizacións de proxectos eólicos, coas asociacións ecoloxistas que se manifestan en contra destas iniciativas”, sinalou o portavoz popular, quen lamentou que “estamos diante de actuacións xudiciais que están a paralizar de xeito preocupante o desenvolvemento dun sector industrial primordial para Galicia, á diferenza do que acontece noutras comunidades autónomas ou, incluso, cos proxectos impulsados polo Goberno central”.

A terceira das preguntas do Grupo Popular ao Goberno galego ten como obxectivo coñecer a actividade desenvolvida pola Oficina Económica de Galicia, logo de cumprirse un ano desde a súa posta en marcha.

O Grupo Popular esixirá ao Goberno central no Parlamento de Galicia que cumpra o recollido na Lei ELA e concrete o financiamento para as persoas que padecen esta enfermidade. Neste sentido, salientou que a Xunta convocará este 2025, por terceiro ano consecutivo, as axudas para enfermos de ELA e as súas familias, aos que destinará 3 millóns de euros para sufragar as súas necesidades.

A portavoz popular de Política Social, Raquel Arias, e a tamén deputada Katy Varela mantiveron un encontro con representantes do Grupo Compostela, responsables da organización e acompañamento para que os enfermos de ELA realicen o Camiño de Santiago, unha iniciativa que este ano levarán adiante entre os días 3 e 10 de setembro.

Neste encontro avanzouse, ademais, que Monforte de Lemos será escenario o vindeiro 22 de xuño da primeira marcha solidaria pola ELA-Memorial Germán Vázquez, organizado pola asociación Agaela Galicia, para a que as deputadas populares amosaron o seu apoio e colaboración.

SETE MESES Á ESPERA DAS AXUDAS

As deputadas popular avanzaron aos representantes do Grupo Compostela que o Grupo Popular presentará no Parlamento de Galicia unha iniciativa para esixir ao Goberno de Pedro Sánchez que cumpra urxentemente coa Lei ELA, aprobada hai sete meses no Congreso pero que a día de hoxe segue sen financiamento para frustración de enfermos e familiares.

“En contraposición, a Xunta volverá a poñer a disposición dos afectados pola ELA axudas por un importe de 3 millóns de euros, nunha mostra do compromiso do Goberno galego con estes enfermos e as necesidades que teñen, tanto no ámbito da adquisición de produtos de apoio, aparatos de aire acondicionado, adaptación do domicilio ou da contorna, a compra dun vehículo adaptado ou atención fisioterapéutica, de rehabilitación ou psicolóxica”, manifestaron.

Galicia foi a primeira comunidade autónoma en convocar axudas directas e automáticas para os enfermos de ELA e as súas familias, achegando arredor de 12.000 euros a unha media de 200 beneficiarios cada ano de xeito inmediato e sen realizar complicados trámites burocráticos.

Así mesmo, a Xunta reforzou nestes anos a atención clínica e a valoración da dependencia, poñendo en marcha unha vía preferente para as solicitudes de dependencia das persoas con ELA.

A portavoz de Educación do Grupo Popular, Cecilia Vázquez, destacou hoxe, tras unha xuntanza coa ANPA O Carregal do IES Francisco Aguiar de Betanzos, que a Xunta de Galicia segue avanzando na súa aposta pola igualdade de oportunidades no sistema educativo, incorporando esta semana dúas novas medidas: unha desgravación fiscal de ata 105 euros para libros de texto e material escolar, e a posibilidade de formalizar a matrícula educativa mediante o teléfono móbil.

Segundo explicou Vázquez, estas iniciativas complétanse co esforzo da Xunta por garantir a gratuidade educativa desde a escola infantil ata a universidade, ademais das axudas xa vixentes para a adquisición de material didáctico.

 DESGRAVACIÓN DO 15% PARA MÁIS FAMILIAS

A nova desgravación permitirá ás familias con rendas per cápita entre 10.000 e 30.000 euros deducir ata un 15 % do gasto en libros e material escolar, cun máximo de 105 euros. A medida, dirixida a alumnado de educación primaria e secundaria obrigatoria, estenderá o apoio económico a fogares que ata o de agora non tiñan acceso ás axudas existentes.

A portavoz popular fixo fincapé na importancia de que as familias conserven as facturas das compras realizadas entre o 1 de xullo e o 31 de decembro de 2025, para poder incluílas na declaración da renda do ano seguinte.

MATRÍCULA MÁIS ÁXIL E DIXITAL

Por outra parte, Cecilia Vázquez puxo en valor a nova funcionalidade da plataforma AdmisionAlumnado, que permitirá formalizar a matrícula escolar directamente desde o móbil, mediante certificado dixital ou Chave 365. A medida simplificará o proceso tanto para as familias como para os centros educativos, reducindo a carga administrativa.

As familias só terán que acceder á plataforma, premer na icona de matrícula e revisar ou modificar os datos precargados antes de completar o trámite en liña, incluídas as materias optativas.

“Con estas novas medidas, a Xunta continúa fortalecendo un modelo educativo máis equitativo, moderno e adaptado ás necesidades das familias galegas”, concluíu Vázquez.

Os deputados do Grupo Popular Julio García Comesaña, Felisa Rodríguez e Manuel Santos esixiron hoxe aos responsables municipais do Concello de Mondariz-Balneario que “se poñan a traballar e procedan urxentemente a incoar o procedemento para a declaración da fonte de Troncoso como ben de interese cultural, xa que é o camiño máis rápido e seguro para poder acceder ás axudas con cargo ao programa 2% cultural destinados á restauración desta emblemática obra do arquitecto Antonio Palacios”.

Acompañados da portavoz do PP en Mondariz, Marisa Domínguez, Julio García, Felisa Rodríguez e Manuel Santos explicaron que “un dos requisitos principais para poder optar a estas axudas estatais é que esta fonte estea declarada como ben de interese cultural ou, cando menos, teña iniciado o expediente para a súa declaración”.

INICIATIVA NO PARLAMENTO DE GALICIA

“Por este motivo, é fundamental e urxente que desde o Concello de Mondariz-Balneario se poñan a traballar para iniciar a tramitación desta declaración, para o que contarán coa total disposición da Xunta tanto no proceso de tramitación da solicitude como na elaboración da documentación necesaria para a incoación do expediente”, sinalaron.

Os deputados populares lembraron que “o pasado 23 de maio xa rexistramos no Parlamento de Galicia unha iniciativa parlamentaria a través da que pedimos ao Concello de Mondariz-Balneario que leve a cabo os trámites necesarios para solicitar formalmente a incoación do expediente da Fonte de Troncoso como BIC, o que suporía un paso determinante para garantir a conservación e posta en valor desta obra representativa do arquitecto Antonio Palacios”.

Julio García, Felisa Rodríguez e Manuel Santos garantiron que o Concello tamén “contará colaboración e apoio da Xunta na posterior solicitude de axudas ao Goberno central con cargo ao programa 2% cultural, co obxectivo de recuperar un ben patrimonial símbolo da tradición termal e do patrimonio histórico deste municipio”.

Os deputados do Grupo Popular Miguel Ángel Viso, Cristina Campero e Víctor Baladrón defenderán no Parlamento de Galicia unha proposición non de lei a través da que se esixe ao Goberno de España e a Renfe que manteñan os servizos e horarios actuais na estación ferroviaria de A Gudiña-Porta de Galicia, solicitando que calquera cambio futuro no servizo se realice atendendo os criterios de equilibrio territorial e garantindo as frecuencias que permitan a mobilidade funcional dos usuarios do interior de Galicia.

Os deputados populares, que mantiveron un encontro con portavoz do PP en A Gudiña, José María Lago, e representantes municipais deste e doutros concellos da comarca, criticaron que a reorganización da oferta ferroviaria no corredor de Alta Velocidade Galicia-Madrid, prevista polo Ministerio de Transportes para a súa entrada en vigor o vindeiro 9 de xuño, “supón un claro prexuízo para os usuarios da estación de A Gudiña-Porta de Galicia, xa que se van reducir considerablemente o número de servizos dispoñibles”.

TRES SERVIZOS MENOS CADA DÍA

En concreto, lembraron que no traxecto A Gudiña–Madrid suprimirase o tren matinal das 8:28 e das 9:14 horas, que permitía chegar á capital antes das 10:34 horas, “co que resultará imposible chegar a Madrid antes das 14:08 horas, facendo imposible realizar xestións ou trámites durante a xornada de mañá”. Así mesmo, no traxecto Madrid-A Gudiña tamén se suprimirá o último servizo das 19:17 horas, quedando como último do día o das 18:06 horas.

“É intolerable que o Goberno de Pedro Sánchez, coa escusa de reducir os tempos da viaxe entre as grandes cidades, elimine servizos esenciais no interior de Galicia, limitando gravemente a mobilidade dos habitantes das comarcas de Monterrei, Viana ou Valdeorras”, sinalaron os deputados populares, quen tamén apuntaron que esta decisión “suporá un prexuízo considerable para os milleiros de peregrinos da Vía da Prata e do norte de Portugal que utilizaban esta estación como o seu principal punto de acceso á rede de alta velocidade”.

Ademais, subliñaron que esta reorganización dos servizos dificultará os desprazamentos de ida e volta no mesmo día, restando funcionalidade e utilidade a unha infraestrutura que mobilizou máis de 107.000 viaxeiros desde a súa apertura en decembro de 2021.

Os deputados do Grupo Popular Cristina Sanz e Enrique Barreiro salientaron hoxe, logo dunha xuntanza celebrada coa ANPA do Colexio Doutor López Suárez de Friol, que a Xunta “deu esta semana dous pasos máis na súa estratexia pola equidade e a xeración de igualdade de oportunidades no sistema educativo galego”. En concreto, referíronse á nova desgravación fiscal de ata 105 euros á que cada familia con fillos en idade escolar poderá acollerse pola compra de libros de texto e material escolar, así como a posibilidade de realizar a matrícula escolar para o vindeiro curso nos colexios e institutos a través do teléfono móbil.

Cristina Sanz e Enrique Barreiro explicaron que “o Goberno galego continúa cumprindo o seu obxectivo de apoiar ás familias con fillos en idade escolar, logo de implantar a gratuidade desde a escola infantil ata rematar os estudos universitarios ou as axudas que xa existían para a merca de libros de texto ou material escolar”.

ATA UN 15% DO GASTO REALIZADO

No caso da nova desgravación de ata 105 euros para a adquisición de libros de texto e material escolar, os deputados populares concretaron que “vai dirixida ás familias con rendas per cápita superiores aos 10.000 euros e ata os 30.000 euros, con fillos matriculados en educación primaria ou educación secundaria obrigatoria”. “Deste xeito, abrimos o abano de familias beneficiarias de axudas para manuais ou material, xa que ata agora só se recibían axudas as familias con rendas anuais per cápita inferiores aos 10.000 euros”.

A través destas novas axudas, cada familia poderá desgravarse ata un 15 por cento do gasto realizado en libros de texto e material escolar, “cantidade que se determinará en función do importe das facturas correspondentes ás compras realizadas para este fin entre o 1 de xullo e o 31 de decembro deste ano 2025, polo que é importante que cada familia conserve os xustificantes da compra para incorporar a súa contía na declaración da renda que se presentará o vindeiro ano”, indicaron.

BENEFICIO PARA FAMILIAS E CENTROS ESCOLARES

Por outra banda, sobre a posibilidade que o Goberno galego abre para realizar a matrícula nos colexios e institutos a través do teléfono móbil, os deputados populares sinalaron que esta medida “non só beneficia ás familias, senón tamén aos procesos administrativos dentro dos centros escolares, xa que permitirá reducir a súa carga de traballo e facilitar a xestión interna”.

Cristina Sanz e Enrique Barreiro aseguraron que “o proceso é moi sinxelo: as familias poderán realizar a matrícula dos seus fillos accedendo á plataforma AdmisionAlumnado, onde se autentificarán con certificado dixital ou Chave 365”. A partir de aquí, deberán premer na icona de matrícula, onde xa aparecerán precargados os datos persoais dos pais e dos alumnos e desde onde poderán facer as modificacións que consideren oportunas tanto de identificación como de optativas do curso, antes de realizar a matrícula en liña.

O Parlamento de Galicia aprobou hoxe a proposición non de lei do Grupo Popular, sen o apoio dos deputados do PSdeG, a través da que se solicita ao Goberno de España que, namentres non se chegue a un acordo cos colexios profesionais veterinarios, as asociacións protectoras animais e as administracións públicas autonómicas, se adopte unha moratoria na aplicación do Real Decreto 666/23 que regula a distribución, prescrición, dispensación e uso de medicamentos veterinarios.

O deputado popular Juan Casares cualificou de “paragóxico e contraditorio que o Goberno de Pedro Sánchez non fixera unha consulta co servizo veterinario antes de aprobar unha normativa que non só lles atinxe de xeito directo, senón que ten efectos perversos sobre a protección animal”. “Estamos ante unha situación que podemos cualificar tanto de maltrato animal, porque pon en risco a vida de mascotas, como de un menosprezo absoluto á profesión veterinaria, fundamental para a saúde tanto animal como humana”, apuntou.

INCREMENTO DE CUSTOS E BUROCRACIA

A través desta nova normativa, “o veterinario sofre un incremento esaxerado de custos, ao tempo que se xeran efectos colaterais que poden derivar no sufrimento innecesario do animal e, incluso, resolverse coa súa morte por falta de acceso aos tratamentos axeitados”, dixo o deputado popular.

Ademais, indicou que o novo decreto “soterra aos veterinarios en burocracia, menospreza a súa experiencia e coñecemento, e limita perigosamente a capacidade de prescrición de antibióticos, podendo derivar na morte de mascotas”. “Ao mesmo tempo, amedrenta aos profesionais pola vía coercitiva, coa ameaza de multas elevadas ante calquera erro burocrático e pon en risco a viabilidade das clínicas”, engadiu.

Juan Casares asegurou que os veterinarios “sempre estiveron, están e estarán comprometidos co uso racional e sostible dos medicamentos, nomeadamente dos antibióticos, e son conscientes da problemática que xera a resistencia derivada do uso abusivo”. Neste sentido, lembrou que España, segundo a Organización Colexial Veterinaria, é o país europeo cunha maior redución do uso de antibióticos na sanidade animal entre os anos 2014 de 2022.

OUTRAS ACTUACIÓNS NECESARIAS

A proposición non de lei aprobada hoxe no Parlamento galego, ademais de pedir unha moratoria na aplicación do Real Decreto 666/23, tamén pide ao Goberno central homoxeneizar o sistema nacional de declaración de antibióticos que chegan ao poder dos titores de mascotas e gandeiros de animais de produción, así como derrogar de xeito inmediato o réxime sancionador relacionado coas notificacións de prescrición de antimicrobianos, previsto na Lei estatal de Sanidade Animal, substituíndo por un novo que respecte e garanta a proporcionalidade das sancións.

Así mesmo, pídese apoio aos veterinarios, a través da modificación do Real Decreto 1/2015, reforzando a figura da cesión de medicamentos con destino ós animais, necesarios para a atención urxente dos mesmos; simplificar os trámites de importación de medicamentos veterinarios, garantindo que as restricións normativas non dificulten o acceso a tratamentos esenciais para os animais; revisar a normativa para equiparar os prezos dos tratamentos de animais ós de uso humano, cando conteñan os mesmos principios activos; actualizar as fichas técnicas e prospectos dos medicamentos veterinarios para que reflictan os seus posibles usos e aplicacións; e promover a redución do 21 por cento do IVE aplicable aos servizos veterinarios, que penaliza tanto a saúde e benestar animal como a saúde pública.

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita á Xunta de Galicia o impulso da recuperación das razas autóctonas galegas ameazadas, a través do deseño dunha estratexia común dirixida ao establecemento dun plan de axudas para a recría de femias e machos en favor dos gandeiros e gandeiras titulares das razas bovinas, ovina e cabrúa ameazadas.

O portavoz popular do Medio Rural, Miguel Ángel Viso, salientou que “nos últimos 20 anos e gracias ao apoio continuo da xunta e o compromiso das asociacións de criadores, conseguiuse frear o declive e incluso facer medrar os censos dalgunhas razas nun 1.000 por cento, como foi o caso da raza cachena, que pasou de apenas 82 reprodutoras en 1991 a máis de 1.600 en 2007”.

FREO DA RECUPERACIÓN

“Porén, esta recuperación freouse e, se non actuamos agora, corremos o risco de perder séculos de adaptación natural, de diversidade xenética e de saber facer rural”, alertou o portavoz popular, quen apuntou que “é hora de dar un novo pulo, porque os gandeiros e gandeiras precisan ferramentas, axudas e seguridade para continuar co labor de conservar e multiplicar estas razas”.

Miguel Ángel Viso manifestou que “estas razas non só producen carne, leite e ovos, senón que axudan na limpeza de montes, prevén incendios, aproveitan os terreos máis agrestes e alimentan a nosa gastronomía e o noso turismo”. “Ao mesmo tempo, as nosas razas autóctonas son un exemplo de sustentabilidade nun momento no que Europa aposta pola conservación da biodiversidade e pola loita contra o cambio climático”.

O portavoz do Grupo Popular, Alberto Pazos, criticou hoxe que o Goberno de Pedro Sánchez insista en converter a Conferencia de Presidentes convocada para o vindeiro 6 de xuño “nun paripé, co único obxectivo de tapar o vendaval de casos de corrupción que día tras día están a afectar directamente ao Presidente Sánchez e ás altas esferas do Partido Socialista”. Neste sentido, considerou “imprescindible que o Goberno de España valore seriamente un cambio na organización das Conferencias de Presidentes, dando máis protagonismo ás comunidades autónomas e ás súas propostas, fomentando o debate entre todos os participantes, fuxindo do habitual monólogo de Pedro Sánchez que sofren os presidentes autonómicos en cada reunión e contando, cando menos, cunha mínima documentación sobre os asuntos a tratar, para poder preparar debidamente cada cuestión e poder facer as súas aportacións para chegar a acordos útiles para a poboación”.

Alberto Pazos amosou o apoio do Grupo Popular “á postura adoptada polo Goberno galego, e por todas as comunidades autónomas gobernadas polo Partido Popular, de rexeitar o intento do Goberno de Pedro Sánchez de centrar esta Conferencia de Presidentes nos temas de vivenda e formación profesional e universitaria que lle interesan ao Goberno central e convertela nun monólogo do Presidente Sánchez, quedando as comunidades autónomas como meros espectadores, sen posibilidade algunha de debater e facer aportacións sobre outras cuestións nas que tamén están interesadas”.

“De pouco vale que o Goberno central acepte incorporar algunhas das propostas que se puxeron enriba da mesa por parte das comunidades autónomas, se ao final se priva de calquera debate ou intercambio de opinións sobre as mesmas entre os presidentes autonómicos e do Goberno de España”, sinalou o portavoz popular.

ÉXITO EN FUNCIÓN DOS ACORDOS ACADADOS

Neste sentido, afirmou que “o Goberno de España debería ter presente que o éxito das Conferencias de Presidentes non se mide polo número de reunións que se celebran senón polos acordos e consensos aos que se chegan dentro delas, e o que está demostrando o Goberno de Pedro Sánchez é que está máis polo primeiro, é dicir, por sumar unha Conferencia tras outra, servíndose das comunidades autónomas para soltar o seu sermón político, que por pechar unha orde do día da Conferencia coas cuestións que realmente preocupan á gran maioría das comunidades autónomas”.

O portavoz popular explicou que “non só estamos a falar de abordar o novo sistema de financiamento autonómico, porque existen outras cuestións que preocupan as comunidades autónomas e que deberían figurar na orde do día das conferencias de presidentes como o incremento da okupación de vivendas; o financiamento da educación gratuíta de 0 a 3 anos, tal e como se comprometeu o Presidente Sánchez no seu momento; o déficit existente de infraestruturas críticas, no caso de Galicia as vías de comunicación coa Meseta ou o servizo de transporte ferroviario; a seguridade do modelo enerxético, máxime despois do apagón que vivimos hai un mes; o control de fronteiras e a inmigración por parte do Estado; ou o déficit de profesionais sanitarios, algo sobre o que xa vimos insistindo desde Galicia desde hai tempo pero que o Goberno de Pedro Sánchez non acaba de adoptar as medidas que se lle propoñen”.

FALSOS DEFENSORES DO ECOLOXISMO

Por outra banda, Alberto Pazos criticou a “demagoxia e incongruencia” do BNG respecto do sector eólico, porque “os que agora se presentan como máximos defensores do ecoloxismo, protagonizando moitas das demandas que se están a presentar contra proxectos eólicos que se queren implantar neste momento en Galicia, son os mesmos que se vían beneficiados polo concurso eólico do Goberno bipartito de nacionalistas e socialistas”.

“Basta xa de tanto postureo e tanta hipocrisía, porque non se pode estar a favor do eólico cando auguras que pode supoñer uns importantes beneficios persoais e despois ser o principal opositor ao impulso do sector eólico en Galicia, co único obxectivo de paralizar calquera proxecto que se intente poñer en marcha en Galicia, incluso cando falamos de repotenciar parques, reducindo o número de muíños que afean a nosa paisaxe pero incrementando a súa produción”, apuntou.