Categoría: Parlamento de Galicia

O Parlamento de Galicia aprobou hoxe a proposición non de lei do Grupo Popular, que non contou co apoio do PSdeG, a través da que se demanda ao Goberno central a creación de novos xulgados de violencia sobre a muller nas cidades de A Coruña e Vigo, como órganos adicionais e específicos, sen que iso supoña a transformación nin eliminación de xulgados de instrución. Así mesmo, pídese que planifique a planta xudicial de Galicia de forma rigorosa, transparente e dialogada coa Xunta, atendendo a informes técnicos, datos de carga de traballo e criterios de equilibrio territorial.

A deputada popular Katy Varela lembrou que “a Xunta leva tempo reivindicando ao Goberno central a creación de novas unidades xudiciais e máis prazas de xuíces e maxistrados”. Ante esta demanda, o Goberno de Pedro Sánchez decidiu este ano ampliar as prazas en Galicia pero, das catro novas prazas de xuíces de violencia sobre a muller aprobadas para Galicia, só dúas, as de Santiago e Ourense, son de nova creación.

IMPACTO NEGATIVO NA CALIDADE DO SERVIZO

“Lamentamos a decisión do Goberno central de que en A Coruña e en Vigo se creen estas unidades xudiciais a costa de suprimir outros tantos xulgados de instrución, unha decisión que causa preocupación nos axentes xudiciais porque terá un impacto negativo na calidade do servizo que se presta aos cidadáns”, sinalou.

Katy Varela explicou que “a supresión destes órganos instrutores suporá unha sobrecarga inmediata e directa para os restantes xulgados de instrución, afectando negativamente á tramitación de dilixencias previas, medidas cautelares e causas complexas que requiren especial atención”. Ademais, tanto Vigo como de A Coruña presentan características demográficas, sociais e xurisdicionais  que as fan especialmente sensibles á perda de recursos: ambas son cabeceiras de partido xudicial e sedes de órganos especializados e provinciais, atendendo tamén á poboación doutros municipios da contorna.

Por último, a deputada popular subliñou que “a Xunta xa anunciou que procederá ao reforzo do persoal destes catro novos xulgados de violencia contra a muller, co obxectivo de paliar o aumento da carga de traballo derivada das novas funcións, e tamén das fiscalías”.

O Parlamento de Galicia aprobou hoxe a proposición non de lei do Grupo Popular, que non contou co apoio de BNG e PSdeG, a través da que se reitera ao Goberno de España a urxente necesidade de completar o cadro de persoal da Unidade de Policía Adscrita de Galicia (UPA) para que poida seguir prestando as súas funcións en termos de seguridade e eficiencia, en ámbitos como na protección das vítimas de violencia de xénero ou na prevención e investigación dos incendios forestais. En concreto, a viceportavoz popular, Paula Prado, lembrou que este corpo “perdeu unha media de nove axentes cada ano desde que goberna Pedro Sánchez, a pesar de que o ministro Marlaska adquiriu o compromiso de reforzalo cun mínimo de 50 axentes”.

Paula Prado lamentou que a Unidade de Policía Adscrita a Galicia “seguiu batendo récords á baixa no número de axentes e tocou fondo este ano: actualmente afronta o día a día cunha plantilla aínda máis mermada e reducida a 341 axentes, tres menos que o pasado ano e a cifra máis baixa desde que comezou a operar en 1991”.

RECORTE DO 28% DESDE O GOBERNO DE MARIANO RAJOY

“A UPA vive unha situación dramática, porque se continúa sen reforzos vaise ver irremediablemente obrigada a deixar de prestar algúns dos seus servizos”, lamentou a viceportavoz popular. En concreto, referiuse á protección da vítimas de violencia de xénero, xa que hoxe so hei un axente por cada sete vítimas incluídas no sistema Viogen; ou á prevención e investigación dos incendios forestais.

Neste sentido, explicou que “estamos a falar dun recorte de plantilla de máis dun 28 % desde que en 2013 o Goberno de Mariano Rajoy realizara a última cobertura de prazas, que permitiu acadar a cifra récord de 474 axentes”, e lamentou que “a chegada de Pedro Sánchez á Moncloa agudizou aínda máis o recorte, xa que nestes últimos anos perdemos un total de 63 axentes”.

Deste xeito, Prado concretou que “temos un corpo policial con 3 de cada 10 postos vacantes e ao 68 % da súa capacidade total; con dificultades organizativas pola falta de mandos; con cada vez máis axentes preto de pasar á segunda actividade; e que só coa súa vocación de servizo público e a duras penas é quen de facer máis con menos”.

O Parlamento de Galicia aprobou hoxe por unanimidade a proposición non de lei do Grupo Popular a través da que se rexeita calquera proposta que implique unha redución substancial dos fondos europeos destinados ao sector pesqueiro no próximo Marco Financeiro Plurianual 2028-2034. Neste sentido, demándase unha posición común entre os Estados membros da Unión Europea con maior peso pesqueiro para rexeitar a devandita redución e propoñer un financiamento adecuado que garanta os obxectivos da Política Pesqueira Común, a sustentabilidade do medio mariño e o mantemento da competitividade e resiliencia do tecido socioeconómico do litoral europeo.

O portavoz popular do Mar, Miguel Fidalgo, lamentou “as noticias fondamente preocupantes coñecidas recentemente sobre a intención de propoñer un recorte do 67 por cento dos fondos europeos destinados ao sector pesqueiro no próximo marco orzamentario, unha redución que comprometería gravemente a viabilidade da adaptación de moitas explotacións pesqueiras e das comunidades que dependen directa ou indirectamente desta actividade, ao tempo que suporía un retroceso na capacidade de adecuación e consecución dos obxectivos comúns en materia de sustentabilidade, competitividade e seguridade alimentaria”.

“Para Galicia resulta irrenunciable contar cun fondo específico e cunha dotación suficiente para que o sector poida afrontar os desafíos que ten por diante e garantir así a sostenibilidade do sector marítimo-pesqueiro”, sinalou o portavoz popular, quen asegurou que “non imos permitir ser moeda de cambio para aplicar outras políticas, quedando o sector da pesca discriminado e prexudicado”.

Miguel Fidalgo afirmou que esta proposta orzamentaria “non é definitiva, xa que se abre un proceso longo de negociación que permitirá presionar para poder reverter ou suavizar os recortes”, porque coa proposta avanzada “Galicia será a comunidade máis prexudicada, como comunidade altamente dependente da actividade pesqueira”.

O Parlamento de Galicia aprobou hoxe por unanimidade a proposición non de lei do Grupo Popular a través da que se esixe ao Goberno de España que tome medidas para impedir que o consumo do peixe siga en caída histórica, adoptando iniciativas de tipo económico como a rebaixa do IVE ou outras medidas análogas que permitan incentivar a compra destes produtos. Así mesmo, pídese a realización de campañas de fomento do consumo entre a xente moza, escolares e familias en xeral para contribuír a frear esta tendencia na redución do consumo tan prexudicial para o sector.

O deputado popular Raúl Santamaría lembrou que un estudo do Ministerio de Agricultura, Pesca e Alimentación puxo de manifesto un descenso do consumo de produtos da pesca do 2,68 por cento durante o pasado ano. No caso de Galicia, o consumo per cápita baixou ata os 22,9 quilogramos ao ano, un mínimo histórico dos últimos 25 anos.

CREACIÓN DE 5.500 EMPREGOS

“Diante desta situación, o Goberno de España non fixo nada, negándose reiteradamente a rebaixar o IVE do peixe, malia a multitude de acordos por unanimidade aprobados neste Parlamento galego”, lamentou o deputado popular, quen subliñou que estudos da Universidade de Santiago demostraron que reducir o IVE do peixe ao 5 por cento suporía un incremento de 28,5 millóns de euros no valor engadido bruto e máis de 5.500 empregos.

Pola contra, Raúl Santamaría salientou as medidas postas en marcha pola Xunta para incentivar o consumo de peixe, como a máis recente Bono Peixe. “Esta iniciativa, a través da que o Goberno galego puxo a disposición das familias galegas 2,5 millóns de euros a través dun sistema de descontos progresivos, tivo unha acollida extraordinaria e demostrou que cando se baixan as barreiras económicas, as familias responden aumentando o consumo de peixe”, indicou.

O Grupo Popular demandará ao Goberno central no Pleno do Parlamento galego da vindeira semana que abandone a súa política de imposición sobre o reparto de menores non acompañados e aporte o financiamento necesario para a súa atención; ao tempo que pide un plan estratéxico para os aeroportos galegos, co obxectivo de asegurar a súa operatividade, viabilidade económica e oferta adecuada logo do anuncio feito por Ryanair de xeito importante as súas operacións en Galicia.

Ao remate da Xunta de Portavoces, o portavoz popular, Alberto Pazos, informou que o Pleno da vindeira semana inclúe o debate de toma en consideración da proposición de lei de modificación da actual Lei do Deporte, “unha norma que data do ano 2012 e que precisa ser actualizada para atender as necesidades da sociedade actual”.

A través desta reforma lexislativa se establece a posibilidade de que a Administración galega poida comparecer como acusación popular nos procedementos que se sigan por delitos e actos de violencia perpetrados no ámbito deportivo; se clarifica o réxime de prescricións das infraccións e sancións, para o que se propón unha remisión ao réxime xeral establecido no artigo 30 da Lei de réxime xurídico do sector público; e se fixa expresamente a práctica a seguir na concorrencia de procedementos penais e administrativos nun caso de actuación pública na represión da violencia e de condutas contrarias á boa orde deportiva.

Ademais, esta modificación da Lei do deporte impulsa o bo goberno nas organizacións e federacións deportivas, que deberán respectar estritamente os principios de democracia interna, transparencia, integridade, solidariedade, igualdade de xénero, apertura, rendición de contas e responsabilidade social. “Consideramos esencial que as federacións deportivas eleven o nivel de esixencia das súas normas de bo goberno, con principios que garantan a xestión irreprochable dos seus recursos financeiros, os controis para previr os conflitos de interese ou a duración limitada dos seus cargos electos”, explicou Alberto Pazos.

O Pleno continuará coa comparecencia do conselleiro de Educación, Ciencia, Universidades e Formación Profesional para informar do desenvolvemento do inicio do curso escolar, “que se caracteriza, principalmente, polo incremento do número de profesores a pesar do descenso do número de alumnos co obxectivo de que Galicia siga como unha das comunidades autónomas españolas cunha das ratio máis baixas tanto de alumnos por profesor como de alumnos por aula”, dixo o portavoz popular.

REPARTO DE MENORES E IMPULSO AEROPORTOS

Dentro do apartado de proposicións non de lei, o Grupo Popular demandará ao Goberno central que abandone o reparto autoritario establecido de máis de 4.000 menores non acompañados polas distintas comunidades autónomas españolas, excepto Cataluña e o País Vasco, e dos que 317 virán para Galicia. Alberto Pazos sinalou que “a inminente chegada destes menores a Galicia obrigou á Xunta a buscar solucións de urxencia para ofrecerlles as mellores condicións de acollida e atencións, poñendo en marcha centros específicos como o habilitado en Monforte, no que se adecuará o inmoble dunha entidade social, actualmente sen uso, para acoller a 80 menores”.

Diante desta situación, a proposición non de lei do Grupo Popular solicita ao Goberno central que abandone este “reparto inxusto e arbitrario de menores non acompañados, que so beneficia aos seus socios parlamentarios cataláns e vascos, ao tempo que lle pedimos que este envío veña acompañado do financiamento necesario para atender como se merecen a estes menores, de xeito que non recaia nas comunidades autónomas todo o gasto que suporá a prestación de atencións educativas, sanitarias e sociais que precisan e que van recibir todos estes menores”.

A segunda das proposicións non de lei que defenderá o Grupo Popular no Pleno está relacionada coa situación que están a vivir os aeroportos galegos, sobre todo os de Santiago e Vigo, logo da decisión adoptada pola aeroliña Ryanair de reducir dun xeito importante as súas operacións en Galicia. Deste xeito, solicítase ao Goberno de España que convoque con urxencia o Comité de Coordinación Aeroportuaria, para analizar a repercusión da decisión de Ryanair de reducir a súa actividade en Galicia e buscar solucións ao prexuízo que esta situación causará aos galegos; e que elabore un plan estratéxico dos aeroportos galegos, co obxectivo de asegurar a súa operatividade, a súa viabilidade económica e unha oferta de servizos axeitada ás necesidades de mobilidade dos usuarios.

“Por último, e non menos importante porque consideramos que é a principal causa da marcha de Ryanair dos nosos aeroportos, pedimos ao Goberno de Pedro Sánchez que revise as taxas aeroportuarias aplicadas por Aena, co fin de favorecer a competitividade dos aeroportos galegos”, apuntou Alberto Pazos.

Polo que respecta ás preguntas ao Goberno galego, o Grupo Popular interesarase pola a información que o Goberno central trasladou á Xunta en relación cos preto de 60 proxectos que presentou no mes de maio ao Plan Social polo Clima, que suporían un investimento próximo aos 2.000 millóns de euros; a situación na que se atopa a construción do novo centro de saúde para o barrio do Sagrado Corazón de Lugo; e a súa valoración ante o caos ferroviario ocasionado pola vaga de lumes que sufrimos en Galicia este verán, que afectou a máis de 30.000 viaxeiros, abandonados á súa sorte nas estacións pola interrupción do servizo, a falta de información e sen que se lles proporcionase unha alternativa que lles permitise realizar os seus desprazamentos previstos”.

Os deputados populares María Deza e Raúl Santamaría animaron hoxe aos concellos galegos a sumarse ao programa de oferta de solo residencial das entidades locais posto en marcha pola Xunta de Galicia, a través do que se pon a disposición de promotores e cooperativas espazos de titularidade municipal a través dun concurso para a súa adxudicación co obxectivo de destinalo á construción de vivenda protexida.

María Deza e Raúl Santamaría visitaron o concello de Porriño, un dos municipios galegos que amosaron o seu interese por participar neste programa de vivenda da Xunta, onde mantiveron un encontro co seu alcalde, Alejandro Lorenzo, e varios concelleiros desta corporación, quen lle trasladaron a súa vontade de poñer en marcha medidas que faciliten o acceso á vivenda dos seus veciños.

VIABILIDADE PARA A CONSTRUCIÓN

“O Goberno galego pretende facilitar marcos de colaboración estable e con recursos para que os concellos, en función das súas necesidades e capacidades, podan participar activamente nas políticas de vivenda”, manifestou a deputada popular, quen concretou que nesta liña enmárcase este programa de oferta de solo residencial das entidades locais para a construción de vivenda protexida.

En concreto, a través do Instituto Galego da Vivenda e Solo (IGVS), a Xunta asumirá os traballos de elaborar os pregos de bases que rexerán a adxudicación das parcelas e tramitar os correspondentes procedementos; publicar os anuncios da licitación na páxina web do IGVS; designar aos membros das Mesas de licitación, entre os que se pode incluír un representante da entidade local; efectuar a valoración técnica das ofertas presentadas polas persoas licitadoras; e elaborar as propostas de adxudicacións dos contratos. Pola súa parte, os concellos ditarán as correspondentes resolucións de adxudicación dos contratos.

María Deza apuntou que, como complemento a este programa, o IGVS ten articuladas axudas a promotores e cooperativas para a construción de vivenda protexida, “o que sen dubida axudará a conseguir a viabilidade da construción de vivendas nestes solo públicos ofertados polos concellos, como pode ser o exemplo de Porriño”.

Os deputados do Grupo Popular Elena Candia, Cristina Sanz e José Manuel Mato visitaron esta mañá as obras de mellora do estadio Anxo Carro que a Xunta de Galicia está a realizar, que avanzan segundo o previsto co obxectivo de que estean rematadas para o comezo da vindeira tempada 2026-2027.

As obras, que suporán un investimento próximo aos 3,6 millóns de euros, dotarán ao estadio de novas gradarías na súa totalidade para adaptalas á realidade urbana e ás necesidades actuais do Club Deportivo Lugo e da súa afección. Ao remate das obras, o estadio incrementará o seu aforo nun 20 por cento, pasando dunha capacidade de 5.400 espectadores actual e preto de 6.500 espectadores.

Ademais da construción dunha nova grada no fondo sur con capacidade para máis de 1.300 espectadores, a reforma tamén inclúe actuacións nas outras tres gradas existentes na actualidade co obxectivo de mellorar a accesibilidade, funcionalidade e seguridade.

Os deputados do Grupo Popular Argimiro Marnotes e Noelia Pérez urxiron hoxe ao Goberno central e á Confederación Hidrográfica do Miño-Sil a realización dos traballos necesarios para evitar que as cinzas dos incendios cheguen aos ríos. “Unha vez apagados os lumes, é fundamental crear as barreiras anticontaminantes necesarias, como xa vén facendo a Xunta desde o mes de agosto nas zonas da súa competencia, como é o caso da conca hidrográfica Galicia-Costa”, manifestaron.

Nunha visita á parroquia de Requeixo no concello de Manzaneda, acompañados do portavoz do PP local, Pedro Yáñez, Argimiro Marnotes e Noelia Pérez lamentaron “o retraso co que a Confederación Hidrográfica do Miño-Sil se puxo a traballar para evitar estas escorrentías, facendo oídos xordos á proposta realizada pola Xunta de Galicia a finales do mes de agosto para manter unha reunión de coordinación destes traballos preventivos”.

NON PERDER MÁIS TEMPO

“Non se pode perder máis tempo porque entramos en época de choivas e os arrastres das cinzas poden provocar moitos prexuízos nos nosos ríos e captacións de auga, polo que urxe que o Goberno central e a Confederación Hidrográfica asuman as súas responsabilidades e leve a cabo os traballos necesarios no dominio público hidráulico da súa competencia, incluíndo as zonas de servidume que linda coa canle e na de policía que abrangue 100 metros a ambas marxes do río”, concretaron.

Ademais, apuntaron que, “se os traballos de prevención de arrastre das cinzas aos ríos é importante, non o é menos o ausencia total de colaboración do Goberno central para facer fronte á recuperación da superficie afectada polos incendios do verán”.

“Seguimos á espera de que o Goberno de Pedro Sánchez cumpra o seu compromiso e envíe a Galicia tanto os medios humanos como a maquinaria que desde o Goberno galego se lle solicitou hai 19 días, material que sería de gran valor para reparar as pistas afectadas, o repaso dos perímetros dos incendios ou a limpeza das cunetas para contrarrestar os posibles efectos por arrastre das choivas”, indicaron.

Os deputados do Grupo Popular Roberto Rodríguez e Paula Mouzo visitaron as parroquias de Corme-Aldea e Cospindo no concello de Ponteceso e salientaron que os traballos realizados pola Xunta evitaron que estas primeiras chuvias despois dos incendios forestais arrastraran cinza e outros produtos aos ríos da zona.

Acompañados de veciños e do propio alcalde de Ponteceso, José Manuel Mato, Roberto Rodríguez comprobaron a eficacia tanto dos cordóns vexetais e as barreiras de madeira, procedentes da contorna afectada polos incendios, instaladas na zona para reducir a velocidade da auga, fixar os arrastres e, ao mesmo tempo, favorecer a pronta implantación de especies vexetais.

SEN APOIO DO GOBERNO CENTRAL

Ademais, apuntaron que, “se os traballos de prevención de arrastre das cinzas aos ríos é importante, non o é menos o ausencia total de colaboración do Goberno central para facer fronte á recuperación da superficie afectada polos incendios do verán”.

“Seguimos á espera de que o Goberno de Pedro Sánchez cumpra o seu compromiso e envíe a Galicia tanto os medios humanos como a maquinaria que desde o Goberno galego se lle solicitou hai 19 días, material que sería de gran valor para reparar as pistas afectadas, o repaso dos perímetros dos incendios ou a limpeza das cunetas para contrarrestar os posibles efectos por arrastre das choivas”, indicaron.

O portavoz do Grupo Popular, Alberto Pazos, esixiu hoxe ao Goberno central que atenda as demandas feitas polo Goberno galego para abordar os danos causados polos incendios forestais deste verán “cumprindo o que se comprometeu: a creación dunha liña de axudas para os afectados polos incendios e o envío a Galicia de persoal do Exército e maquinaria para axudar na restauración das infraestruturas afectadas polo lume e evitar os efectos por arrastre que as choivas poidan ocasionar”.

Alberto Pazos referiuse á comparecencia do Presidente da Xunta no Pleno desta semana na que deu conta do que o Goberno galego fixo, está a facer e fará ante a vaga de lumes que Galicia sufriu este verán, “unha situación nunca antes vivida na nosa Comunidade á que o dispositivo de extinción tivo que facer fronte, arriscando en moitas ocasións as súas vidas ao facer fronte a lumes de sexta xeración, moi difíciles de apagar e ante os que primou a protección das vidas humanas e, en todo o que se puido, as vivendas e as propiedades dos galegos”.

MEDIDAS ANUNCIADAS

Sobre esta comparecencia, o portavoz popular lembrou as medidas anunciadas polo Presidente Rueda, desde o completo paquete de axudas postas a disposición dos afectados ata os traballos que a Xunta xa está a realizar para evitar o arrastre das cinzas que quedaron nos montes coa chegada das chuvias. Neste sentido, salientou as novas accións de prevención dos lumes que se porán en marcha, entre as que figuran a mellora da limpeza das franxas secundarias ou a posta en marcha dun plan director da industria forestal, para optimizar o aproveitamento dos nosos bosques.

Tamén se procederá á mellora dos traballos de extinción coa solicitude para a creación dunha base permanente da Unidade Militar de Emerxencias no concello ourensán de Toén, que estaría acompañada neste mesmo concello ourensán por unha nova Brigada de Reforzo en Incendios Forestais, ademais de reforzar os medios aéreos de extinción.

“O Goberno galego é consciente de que todo o que se faga para evitar que Galicia volva sufrir unha nova vaga de lumes é pouco, polo que é necesario que todas as administracións traballen da man para conseguir que tanto o número de incendios forestais como as súas consecuencias se reduzan ao mínimo”, indicou o portavoz popular.

NULO INTERESE DO GOBERNO CENTRAL

Deste xeito, e á marxe de agradecer os medios físicos e materiais que desprazou a Galicia para loitar contra os incendios forestais deste verán, cualificou de “incomprensible o nulo interese e atención que o Goberno de Pedro Sánchez está a ter coas solicitudes de actuación e de colaboración que se lle fan desde o Goberno galego”. “É indignante que, a día de hoxe, o Goberno central aínda non dera resposta á solicitude feita polo Goberno galego para que colaborara nos traballos que se están a facer para corrarrestar os posibles efectos dos arrastres por choivas ou a recuperación de infraestruturas necesarias para a poboación”, concretou.

“Pasaron xa 18 días desde que o conselleiro de Presidencia se dirixira á ministra de Defensa pedíndolle a colaboración do exército para a realización destes traballos, pero seguimos á espera dunha resposta a esta demanda, a pesar de que a ministra amosara no seu momento a súa plena disposición a colaborar”. lamentou.

Alberto Pazos criticou que o Goberno central faga “oídos xordos á solicitude de colaboración con efectivos do exército e maquinaria para repoñer as infraestruturas afectadas polos incendios e para evitar os danos que as choivas poidan ocasionar nos nosos ríos e captacións de auga co arrastre da cinza deixada polo lume, sen esquecernos de que tampouco sabemos nada das axudas anunciadas polo Presidente Sánchez para os afectados polos incendios, e que serían un bo complemento ás que a Xunta xa puxo á súa disposición”.

TRENS DE CERCANÍAS E SANCIÓNS POR INTERRUPCIÓN DO SERVIZO

Por outra banda, o portavoz popular referiuse a dúas cuestións relacionadas co ministro de Transportes, Óscar Puente. A primeira delas é o anuncio do estudo para crear un servizo de cercanías ferroviarias en Galicia, “algo que saudamos pero que, visto anteriores experiencias vividas con anuncios feitos por este ministro, fáisenos difícil de crer que este proxecto sexa unha realidade”. “Antes de poñer en marcha novos proxectos ferroviarios, sería interesante que se repuxeran todos os servizos de AVE que eliminou en Galicia con motivo da pandemia e vele pola mellora deste servizo, que día tras día acumula retrasos e incidencias para sufrimento dos usuarios”, indicou.

En segundo lugar, Alberto Pazos cuestionou se o ministro “falará en serio cando anuncia que vai denunciar a Galicia pola interrupción do servizo ferroviario a consecuencia dos incendios forestais?”, porque “que multa ou sanción máis grave teremos que poñer ao Ministerio despois de que un tren causara un incendio forestal en Ourense?, sen esquecer que non foi quen de dar unha solución aos viaxeiros ante a interrupción do servizo ferroviario, deixándoos tirados nas estacións sen facilitarlles información”.

“Céntrese no que lle piden todos os galegos: un mellor servizo ferroviario para conectarnos con Madrid, con máis frecuencias e menos incidencias; e, como non, aproveite a ocasión que lle brinda a Comisión Europea e proceda ao rescate e liberación de peaxes na AP-9, acompañado, por suposto, da súa cesión á Comunidade galega”.