Categoría: PP de Galicia

O presidente do PPdeG, Alfonso Rueda, subliñou hoxe en Lugo que o Goberno galego ten un plan para a cidade, tal e como plasman os Orzamentos autonómicos que se aprobarán mañá martes no Parlamento de Galicia.

 

Durante o pincho de Nadal do PP da cidade de Lugo, Rueda sinalou ante os presentes que o partido é un exemplo do ADN popular, é dicir, da política real e útil para os veciños, similar á que se visualiza nas contas da Xunta.

 

Nesta urbe céntranse importantes investimentos como 12,1 millóns de euros para vivenda, 4 millóns para remodelar a residencia das Gándaras, 6,2 millóns para a Intermodal ou 1,3 millóns para a reforma integral do centro de saúde da Milagrosa. Destaca a clara aposta polos servizos sociais, con investimentos para proxectos que buscan mellorar a vida dos veciños e veciñas.

 

Ademais, cómpre lembrar que a provincia de Lugo é, das catro, a que conta cun maior investimento por habitante, o que evidencia que o Goberno galego si ten un plan tanto para a provincia como para a súa capital.

 

Ao contrario, lamentou o líder dos populares galegos, os que non teñen plan son os que calan ante a falta de chegada da alta velocidade ferroviaria ou os que levan anos atrasando a autovía a Santiago (A-54), porque só buscan manterse no poder. Así, referiuse a un Goberno central rendido aos brazos do independentismo e que está disposto a todo e a costa de todos.

 

Por último, Rueda celebrou que os lucenses teñen a sorte de contar cun Partido Popular —gañador das eleccións municipais hai un ano e medio— construtivo, comprometido e esixente, baixo o liderado de Elena Candia. Un referente dos mellores valores do partido: traballo, compromiso e eficiencia.

 

ELENA CANDIA: “2024: UN ANO INTENSO PERO DE MOITA ILUSIÓN”

 

Pola súa banda, a voceira do Grupo Popular de Lugo e presidenta do PP provincial, Elena Candia, agradeceu o apoio e a implicación de todos os afiliados e simpatizantes, ao tempo que expresou a súa gratitude ao presidente Alfonso Rueda polo cumprimento dos compromisos adquiridos coa veciñanza de Lugo. “Estamos aquí para traballar, para mellorar a vida da xente, para resolver problemas e materializar o noso modelo de cidade”, afirmou.

 

A popular fixo tamén fincapé os investimentos da Xunta en Lugo en materia de vivenda, así como o destinado á ampliación do polígono das Gándaras, un parque empresarial que se consolidará como un motor de creación de emprego e xeración de oportunidades para as empresas e os lucenses.

 

“Este 2024 foi un ano de gran intensidade, pero tamén de moita ilusión, porque estamos facendo realidade, paso a paso, proxectos que mellorarán Lugo”, subliñou.

 

Así mesmo, Elena Candia puxo en valor que o Grupo Municipal do PP non se limita a fiscalizar, senón que tamén exerce un papel activo como un “goberno paralelo”, traballando para achegar solucións concretas e conseguir investimentos clave para a cidade. “Seguiremos traballando con ilusión e determinación para que Lugo continúe avanzando”, concluíu.

 

Durante a súa intervención tamén se referiu ao apoio da Xunta para transformar o barrio de San Antonio coa construción do Centro Integral de Saúde, así como a posta en marcha da nova residencia de maiores con 120 prazas. Ademais, salientou o compromiso de facer o novo centro de saúde do Sagrado Corazón, co compromiso do Goberno galego para estudar a implantación doutros servizos demandados pola cidadanía no antigo colexio do barrio.

 

Salientou tamén os avances na atención ás persoas, mencionando o investimento para a reforma das residencias das Gándaras e da Milagrosa, a posta en marcha dun centro de día para persoas con trastorno do espectro autista ou a reforma do Centro de Saúde da Milagrosa.

 

Na área de mobilidade, a voceira popular destacou a construción da estación Intermodal e a creación dun novo aparcadoiro no barrio de Abella de 150 prazas;  a restauración do patrimonio local —arranxo humidades da Catedral, restauración do Tellado da Igrexa do Carme—, a reforma do estadio Anxo Carro, ou a mellora dos lagos de Teixeiro.

O presidente do PPdeG, Alfonso Rueda, salientou hoxe que no ano 2024 o Partido Popular de Galicia “recibiu a confianza” dos galegos e galegas e “cumpriu”, e sinalou que desexa que 2025 sexa “un gran ano” tanto para a formación como para Galicia.

 

“Que o ano 2025 sexa un gran ano para o PPdeG, que é tanto como dicir, e para iso traballamos, un gran ano para Galicia e para todos os galegos”, dixo para pechar a súa intervención Rueda ante o Comité Executivo do PPdeG, reunido hoxe por última vez este ano en Santiago de Compostela.

 

O líder dos populares galegos aproveitou a xuntanza para facer repaso dun 2024 “moi intenso”, lembrando que nestas mesmas datas, pero doce meses atrás, tivo lugar a convocatoria das eleccións autonómicas, “para pedirlle aos galegos unha confianza que finalmente deron”.

 

Neste sentido, agradeceu o traballo de toda a familia do PPdeG, principalmente durante a precampaña e a campaña, e fixo un recoñecemento ao Goberno galego, tanto o anterior ao “éxito” do 18 de febreiro como o posterior, que está “traballando intensamente desde entón”.

 

“Tratábase de cumprir desde o primeiro momento, con compromisos para os 100 primeiros días que foron posibles grazas a que tivemos as cousas claras desde o minuto cero”, destacou o presidente.

 

Así, lembrou que se puxo en marcha a matrícula universitaria gratuíta, unha medida pioneira en España; púxose á disposición dos emprendedores solo industrial gratuíto; impulsáronse 1.000 novas prazas de residencia; e deu inicio o obxectivo de duplicar o parque público de vivenda, entre outras medidas: “Dito e feito”.

 

“Vemos que a xente nos segue dando a súa confianza. Séguennos pedindo que xestionemos e nos ocupemos daquilo que dixemos que iamos facer, e facémolo, sen perder o tempo en discusións nin en liortas, nin en mirarnos o embigo”, abundou.

 

De cara aos vindeiros meses, Alfonso Rueda avogou por continuar facendo máis investimento en sanidade, en educación ou en servizos sociais; perseverando nos obxectivos en materia de vivenda; ou apoiando cada vez máis aos concellos. “Debemos seguir confiando en que Galicia sexa unha terra de oportunidades e non engurrarse fronte a ningunha presión. Se as cousas pódense facer e cumpren, non hai que deixar que as aproveiten outros”, engadiu.

 

En definitiva, resumiu, o PPdeG é “un partido que sustenta unha acción de goberno” grazas a unha “unidade rochosa que os galegos perciben”, e por ese motivo pediu “continuar gobernando con sentidiño e rigor a todos os niveis”.

 

“GALICIA VAI SEGUIR RECLAMANDO O QUE LLE CORRESPONDE”

 

Despois de acudir o pasado venres á Conferencia de Presidentes, Rueda demandou aos seus “seguir reclamando colaboración real ao resto dos gobernos”, empezando polo Executivo central e Pedro Sánchez, co que ata o de agora iso non foi posible.

 

Segundo asegurou, a xuntanza de líderes autonómicos “non valeu absolutamente para nada”: “Só para disfrazar de multilateral o que segue a ser bilateral e para intentar ter a colaboración de todos para seguir favorecendo aos de sempre”. “Pero para iso, que non conte con Galicia”, deixou claro.

 

“En 2025 imos seguir reclamando ao Goberno central o que nos corresponde: infraestruturas fundamentais; políticas eficaces de vivenda; medidas en materia sanitaria; políticas de inmigración ordenadas e coordinadas; e a transferencia de competencias, como a de xestión do litoral. E seguiremos sendo firmes pedindo un financiamento xusto, sen parches nin negociacións parciais”, concluíu.

O PPdeG reivindicouse hoxe como o partido con máis alcaldesas de Galicia (28 en total) asegurando que, grazas a rexedoras como Nava Castro, a muller é protagonista das políticas do Partido Popular e seguirá séndoo ao longo do próximo ano 2025.

 

Enxalzando tamén a outras alcaldesas do sur da provincia de Pontevedra como a de Mos, a de Oia ou a de Salvaterra do Miño, a secretaria xeral do partido, Paula Prado, tivo palabras ademais para grandes figuras masculinas como o presidente provincial do PP de Pontevedra, Luis López, que foi quen de transformar a Deputación nun lugar onde xa non hai sectarismos; e o presidente do PPdeG, Alfonso Rueda, que coñece e coida cada recuncho da provincia.

 

A número dous dos populares galegos, rememorando as palabras de Nava Castro durante a campaña das eleccións municipais, cando dixo que quería “resetear” Ponteareas, felicitouna por logralo en tan só ano e medio como alcaldesa e por ter ademais contribuído aos grandes éxitos electorais deste ano.

 

En febreiro, os veciños de Ponteareas apoiaron ao presidente Rueda con máis dun 41% de voto e, en xuño, este concello deulle ao PP máis de 3.000 votos nas eleccións europeas. Uns resultados cos que, subliñou Paula Prado, o concello pode estar tranquilo de seguir contando nos Orzamentos da Xunta.

 

NAVA CASTRO: “CELEBREMOS O ESFORZO E OS LOGROS ACADADOS”

 

Pola súa banda, a alcaldesa Nava Castro quixo agradecer aos presentes a súa asistencia a un acto co que “non só celebramos estas datas tan entrañables, senón tamén o esforzo e os logros que acadamos grazas á vosa dedicación e apoio”.

 

“Estes encontros lémbrannos a importancia de compartir momentos máis alá do día a día político. O Nadal é un tempo de unidade, de reforzar lazos e de renovar as enerxías para seguir traballando con ilusión e compromiso polo noso concello”, asegurou animando aos asistentes a “seguir fortalecendo este proxecto común que nos motiva e nos une”.

O PPdeG quixo hoxe recoñecer a Enrique Sotelo como o mellor alcalde da historia de Cangas e poñer en valor o seu traballo e esforzo, así como o seu exemplo de compromiso político durante os 3 mandatos que liderou.

 

Na comida de Nadal organizada hoxe polo partido en Cangas, a secretaria xeral do partido, Paula Prado amosouse convencida de que ao partido local tamén lle irá moi ben nesta nova fase. Non en balde, engadiu, o Partido Popular conta sempre con equipos fortes, unidos e compostos polos mellores.

 

A número dous dos populares galgos lamentou que, a pesar de que os cangueses saiban ben o que é ter un bo alcalde como foi Enrique Sotelo, hoxe teñan que padecer o que xa é unha tónica habitual dos gobernos conformados por pactos de perdedores: ser máis coñecidos polos seus escándalos que pola súa acción de goberno.

 

Unha situación protagonizada por quen se dedica a discutir en vez de a gobernar e que bloquean en vez de actuar. Tal e como acontece, engadiu, nun Goberno central cuxo día a día está marcado polos escándalos, a degradación institucional, as negociacións entre bambalinas e a imposibilidade de aprobar uns orzamentos.

 

Prado mostrouse moi critica con que o socialismo galego e o nacionalismo calen ante isto e ante os agravios de Pedro Sánchez a Galicia. Por sorte, engadiu, os galegos e galegas xa dixeron en febreiro que non compartían todo isto e volveron confiar no único partido centrado en defender os intereses de Galicia por riba de todo: o PPdeG, liderado por Alfonso Rueda.

 

Así mesmo, dixo estar segura de que o presidente nacional do PP, Alberto Núñez Feijóo, visitará pronto este concello como presidente do Goberno de España: “Os que estamos hoxe aquí sabémolo, tamén o di unha enquisa publicada hoxe, e para el tamén van moitos ánimos”.

 

Concluíu lamentando que, mentres o PP celebra estes días avance de Galicia, exemplificado en concellos coma Cangas, haxa algúns, liderados polo BNG, que queren volver ao pasado: “Quero reivindicar que sen industria e sen emprego, sempre respectando o noso medio ambiente, o futuro de Galicia non será próspero”.

O Partido Popular de Galicia puxo hoxe a Sanxenxo como exemplo da “estabilidade” que aportan aos veciños e veciñas os seus gobernos e, ao mesmo tempo, da “importancia” dos proxectos a longo prazo como o liderado durante 15 anos, en dos etapas, por Telmo Martín.

 

Durante a cea de Nadal organizada polo PP de Sanxenxo, con máis de 300 asistentes, a secretaria xeral do partido, Paula Prado, quixo agradecer tamén a achega desde concello aos dous grandes éxitos deste ano do PP en Galicia: en febreiro, nas eleccións autonómicas, cun apoio ao de case un 55% de voto; e en xuño, nas eleccións europeas, cunha porcentaxe similar.

 

Grazas a iso, destacan desde o PPdeG, os veciños e veciñas de Sanxenxo están representados por unha magnífica deputada no Parlamento galego, María Deza. A ela, a Telmo Martín e a todo o seu equipo desexan os populares galegos un 2025 no que Sanxenxo siga destacando e no que todo o partido siga poñendo os seus ollos para tomar como referente.

 

Mentres, o responsable de Educación do Goberno galego, Román Rodríguez, gabou o traballo do PP de Sanxenxo, “un proxecto de equipo liderado por Telmo Martín con visión de futuro, que é quen de entender as necesidades da veciñanza e encamiñar proxectos de progreso e benestar”.

 

“Sanxenxo demostra que o modelo do PPdeG funciona e é o mellor para o futuro deste concello, un referente na comarca do Salnés e no municipalismo galego pola súa capacidade aglutinadora e de mellorar a vida dos cidadáns”, salientou.

 

“PARA MANTER O APOIO SÓ HAI UNHA FÓRMULA: TRABALLAR”

 

Pola súa banda, o alcalde e presidente local do PP, Telmo Martín, agradeceu a asistencia dos afiliados e veciños e desexoulles “saúde e un gran ano 2025”, xa que “o demais, a capacidade de traballo e de emprender de Sanxenxo, está sobradamente demostrada”.

 

Así mesmo, lembrou que o Partido Popular gañou hai un ano e medio as eleccións municipais cunha ampla maioría do 56%. “Se queremos seguir mantendo ese apoio dos veciños só hai unha fórmula: humildade, traballo e máis traballo. Non o esquezades nunca”, subliñou.

 

Por último, quixo recoñecer o esforzo e a dedicación dos concelleiros do goberno, posto que “só eles e as súas familias saben o sacrificio que fan”. “Mentres sigamos xuntos e a nosa prioridade sexa o interese xeral, nada será imposible para Sanxenxo”, concluíu o alcalde.

O presidente do PPdeG, Alfonso Rueda, asegurou hoxe que Ángel Moldes está demostrando en Poio os mellores valores dos gobernos do Partido Popular ao traballar cada día para facer unha política real e útil para os seus veciños desde o traballo, o compromiso e a eficiencia.

 

Segundo asegurou hoxe o líder dos populares galegos na cea de Nadal organizada pola agrupación local poiense, Ángel Moldes demostrou neste tempo ter un plan para Poio e, grazas a iso, o concello deixou atrás as trifulcas e conta hoxe cun goberno estable e con moitísimo impulso. E iso, recalcou, a pesar da difícil herdanza que lles tocou xestionar.

 

Rueda explicou acto seguido que tamén o Goberno galego ten un plan tanto para Poio como para todos os concellos de Galicia. Un plan que pasa por seguir investindo o próximo ano en mellorar as conexións e o saneamento, así como poñer a disposición dos veciños e veciñas máis e mellores servizos.

 

No caso concreto deste concello, están sobre a mesa proxectos de futuro como a humanización da PO-308, a construción da senda peonil, a mellora das paradas de autobús ou a posta en marcha do centro de atención temperá.

 

Se isto é posible, explicou o presidente do PPdeG, é porque, ao igual que Ángel Moldes e o seu equipo, o Goberno galego leva meses traballando sen perder nin un minuto, cumprindo os obxectivos marcados e volvendo a ser quen de aprobar uns orzamentos en tempo e forma.

 

UN PARTIDO UNIDO E COMPROMETIDO

 

O presidente provincial do Partido Popular de Pontevedra, Luis López, destacou que a cea de Nadal de Poio é sempre un gran acto de apoio ao seu alcalde Ángel Moldes, xa que acoden practicamente todos os seus afiliados. Algo que amosa, na súa opinión, o cariño e o apoio que lle ofrecen sempre a Moldes.

 

“Penso que estas xuntanzas son sempre moi boas. Serven para que compartamos uns intres nestas datas festivas e sobre todo para amosar a unidade e compromiso do noso partido, algo fundamental sempre, porque unidos traballaremos moito mellor e acadaremos os nosos obxectivos”, indicou.

 

ÁNGEL MOLDES: “SI HABÍA OUTRO XEITO DE FACER AS COUSAS”

 

Pola súa banda, o presidente local e alcalde de Poio, Ángel Moldes, puxo en valor todo o conseguido durante o último ano no Goberno: “Estamos demostrando que si había outro xeito de facer as cousas: con ilusión, con responsabilidade, con compromiso, escoitando e traballando para todos e cada un dos veciños do noso concello”. Por iso, asegurou que “hoxe Poio é un concello diferente, con maior estabilidade, con máis dinamismo e con máis oportunidades”.

 

Durante a súa intervención enumerou todos os logros conseguidos ata o de agora: “Ademais de xestionar unha herdanza económica nefasta, tamén estamos facendo realidade o noso programa de Goberno, dando resposta a demandas e investimentos históricos”.

 

Referiuse, por exemplo, á baixada de impostos, a humanización da PO-308 na Barca, os investimentos para mellorar o saneamento, a compra da Gardería de Campelo, os eventos lúdicos e culturais que fan de Poio un referente na comarca, a ampliación das prazas de aparcamento gratuítas, a urbanización do polígono de Fragamoreira, a estrada de Campelo, a senda entre Chancelas e Combarro ou o Centro de Atención Temperá.

 

Nesta liña, recoñeceu que “non hai receitas máxicas” e que o segredo é “traballar arreo, escoitar e ter claro que o único importante son as prioridades e necesidades de cada unha das persoas que vivides en Poio”. Así, agradeceu tamén o “respaldo dun partido e duns afiliados cos que sempre se pode contar e que, ademais, son os máis esixentes”. Algo que considera moi positivo porque “obríganos a dar sempre o mellor de nós”.

O Partido Popular de Galicia alerta de que a incapacidade do Goberno de Sánchez para conseguir aprobar os Presupostos Xerais do Estado implica o risco  de que a declaración do Xacobeo 2027 como Acontecemento de Excepcional Interese Público non se faga realidade a tempo para lograr os obxectivos que se pretenden conseguir.

 

Neste sentido a secretaria xeral Paula Prado anunciou hoxe que a próxima semana os populares solicitarán, tanto no Parlamento galego como nas Cortes Xerais, que o Goberno central habilite, cos procedementos que sexan necesarios, que as empresas que desexen patrocinar actividades turísticas ao abeiro do Xacobeo 2027 o poidan facer xa a partir do 1 de xaneiro de 2025.

 

Un anuncio que a número dous dos populares galegos realizou antes de encabezar, xunto ao presidente provincial do PP de Pontevedra, Luis López, a reunión da Comisión de Turismo do PPdeG que esta mañá se celebrou en Cambados e na que se abordaron, entre outros asuntos, as consecuencias que suporá para o sector turístico galego o plan do Goberno central de implantar un rexistro de viaxeiros.

 

“É incomprensible que nun país no que o turismo é fundamental para a nosa economía o Goberno central insista en castigar e menosprezar ao sector turístico e en cargar sobre os seus profesionais a desproporcionada responsabilidade de xestionar datos tan completos e sensibles”, explicou ao tempo que cualificaba esta medida de “amago de Gran Hermano cutre co que Sánchez demostra novamente o escaso respecto que lle merecen os datos de particulares”.

 

Prado pediu abertamente ao PSdeG que “deixe de branquear todo o que fai Sánchez aínda que sexa a costa de prexudicar os intereses dos galegos” e ao BNG que “deixe de lado a súa turismofobia e, por unha vez, apoie á Galicia aberta e na que todos os visitantes recibidos”. En contraposición, engadiu, o PPdeG seguirá apostando, como sempre, por un turismo con sentidiño e que achegue riqueza a Galicia.

 

Unha aposta que se verá reflectida nos Orzamentos de 2025 que se aprobarán a próxima semana. Unhas contas nas que o Goberno presidido por Alfonso Rueda destina 146 millóns de euros á área de Turismo, incrementando esta partida en 1,3 millóns respecto a este ano.

 

De a aí o rexeitamento dos populares cara esta medida e a iniciativa que veñen de rexistrar no Parlamento para instar ao Goberno central a que, previa consulta e consenso co sector, modifique o Real Decreto 933/2021 –do que deriva esta medida– e flexibilice as súas esixencias para evitar que se dificulte a xestión do procedemento de rexistro dos viaxeiros en establecementos de hospedaxe e para garantir que se respecte a normativa vixente sobre protección de datos e o principio de transparencia.

 

Explican os populares que estas esixencias afectan a todas as tipoloxías de aloxamentos de hospedaxe, desde as vivendas de uso turístico ata os albergues, ademais das empresas de aluguer de vehículos. Todas elas se verán obrigadas a recoller medio centenar de datos persoais dos seus clientes e introducilos nunha plataforma informática.

 

Isto supón unha sobrecarga de traballo para os profesionais do sector, ao requirir tempo extra no procedemento habitual de entrada e rexistro dos viaxeiros (check in) e pola necesidade de implantar medidas de seguridade na recollida e custodia de datos que non son estritamente de carácter turístico.

 

A PROBLEMÁTICA DA REGULACIÓN DAS VIVENDAS DE USO TURÍSTICO

 

Outro dos asuntos abordados na reunión da Comisión de Turismo foi a regulación das vivendas de uso turístico. Un asunto sobre o que lamentaron a inacción do Goberno central sobre esta cuestión sobre a que tamén ten competencias.

 

Indican que desde o Executivo estatal non se concretou se esta nova modalidade de aloxamento se constitúe como actividade económico. Ao que habería que engadir o recente anuncio de que se está a traballar nun Real Decreto de alugueiros de corta duración que incluiría, entre outras cuestións, un rexistro único para as VUT.

 

Polo momento é só un borrador, pero desde o PPdeG lamentan que nin foi consensuado nin se tivo en conta antes da súa aprobación a realidade de comunidades autónomas que, como Galicia, xa teñen o seu propio rexistro.  E por isto último reclaman ao Goberno que non xere nin duplicidades, nin inseguridade xurídica, nin invada competencias.

 

LUIS LÓPEZ: “TRÁTASE DUNHA TEMERIDADE ECONÓMICA QUE ATACA A UNHA INDUSTRIA CLAVE EN GALICIA E NA PROVINCIA”

 

O  presidente provincial do PP de Pontevedra, Luis López, explicou pola súa banda que a esixencia de máis de 40 datos aos viaxeiros que contraten servizos turísticos “non é so obrigar aos hoteleiros a exercer de policías, ademais dunha vulneración flagrante do dereito á intimidade dos turistas, senón que é directamente unha temeridade económica que atenta contra unha industria clave en España, en Galicia e na provincia de Pontevedra”.

 

Unhas declaracións que ilustrou cos datos dun sector turístico que en Galicia xera máis de 12,4 millóns de pernoctas e que só na provincia de Pontevedra xera máis de 3.000 millóns de euros en ingresos. De aí que se mostrase contrario a unha medida que “ameaza o traballo de décadas na construción dun destino forte como o galego ou o das Rías Baixas”.

 

Algo ao que tamén apuntou a presidenta do PP de Cambados, Sabel Fole, que reivindicou esta vila como “un referente no turismo grazas aos bos resultados que obtivemos tanto este verán como ao longo do que vai de ano nun sector fundamental como é o turismo”.