Categoría: PP de Galicia

O Grupo do Partido Popular de Galicia na Federación Galega de Municipios e Provincias (Fegamp), a través do seu portavoz e vicepresidente primeiro, Ángel Moldes, trasladará na próxima reunión da Comisión Executiva da entidade a proposta de elaborar un protocolo de protección para as traballadoras do Servizo de Axuda no Fogar (SAF).

Esta iniciativa ten como finalidade establecer criterios comúns e estratexias de actuación ante situacións que poidan xurdir no exercicio da súa actividade laboral, garantindo así unhas condicións de traballo dignas e seguras para un colectivo esencial.

Tendo en conta que o SAF é un dos servizos máis demandados no ámbito da atención á dependencia en Galicia e que se presta en toda a comunidade a través dos concellos, Moldes defenderá a necesidade de impulsar un documento que funcione como guía e modelo para todos os municipios galegos.

“O noso obxectivo é dobre: asegurar unha atención de calidade ás persoas en situación de dependencia e, ao mesmo tempo, protexer e mellorar as condicións das traballadoras que desenvolven unha labor fundamental na nosa sociedade”, subliñou Moldes.

A secretaria xeral do Partido Popular de Galicia, Paula Prado, deixou hoxe en evidencia a incapacidade de Pedro Sánchez á hora de conseguir sacar adiante os Presupostos Xerais do Estado contrapoñéndoa coa eficacia e a xestión de gobernos do PP que, tanto na Xunta como en moitos concellos, si son quen de aprobar e executar ano a ano as súas contas.

“Viveiro aprobou a semana pasada os seus Orzamentos, sen ningún voto en contra, e Galicia xa ten en marcha os Orzamentos de 2026, que se todo vai ben entrarán en vigor por décimo sétimo ano consecutivo en tempo e forma”, explicou incidindo en que “algo que debería ser o normal estase convertendo en excepcional nun bo número de administracións encabezadas por PSOE e BNG”.

Paula Prado fixo estas declaracións esta mañá durante a visita que realizou a Viveiro xunto á presidenta provincial do PP de Lugo, Elena Candia, a deputada nacional Cristina Abades, o senador José Manuel Balseiro, deputados autonómicos e concelleiros populares, que foron recibidos pola alcaldesa Mariña Gueimunde. Sobre esta última precisamente destacou que é unha das 30 alcaldesas que fan do PPdeG o partido con máis mulleres rexedoras de Galicia.

“Nos cinco meses que vai cumprir sendo alcaldesa xa se converteu nunha referente da Mariña lucense”, engadiu ao tempo que enxalzaba a Gueimunde como “unha muller valente, con ganas de cambiar as cousas, que defende aos seus veciños e que é un gran exemplo para todas as mulleres que traballan en política”.

Para a número dous dos populares galegos, tanto a rexedora viveirense como o resto de alcaldes e alcaldesas que “tinguen de azul máis da metade dos concellos de Galicia” son a constatación de que “fronte aos pactos de perdedores de PSOE e BNG, a gran maioría dos concellos con estabilidade e xestión, sen sobresaltos nin liortas, son os liderados polo PPdeG”.

ELENA CANDIA: “NON TODOS SOMOS IGUAIS”

A presidenta provincial do PP de Lugo quixo afondar tamén nesta idea, asegurando pola súa banda que o proxecto dos populares márcase como obxectivo “liderar as institucións para traballar por todos coa templanza e a serenidade que precisan os grandes cambios co compromiso e coas ganas que representan alcaldes e alcaldesas como Mariña Gueimunde”.

Elena Candia amosouse convencida de que “a forza, a responsabilidade e o acerto constituirán a liña de traballo” da alcaldesa de Viveiro e, á súa vez, reflexan que “non todos somos iguais”. Algo que os veciños deste concello, ao igual que os do resto de concellos da provincia, saben ben da man do PSOE e do BNG.

“Hoxe reivindicamos a política de compromiso e de feitos do PPdeG fronte aos pactos en despachos e as promesas incumpridas do PSOE e fronte a un BNG centrado en todo menos en traballar para todos”, concluíu.

O CAMIÑO DO QUE VIVEIRO “NUNCA DEBEU PERDERSE”

A alcaldesa aproveitou a visita para facer un chamamento á unidade e ao traballo colectivo para “volver ao camiño do que Viveiro nunca debeu perderse” e “deixar de lado o partidismo e pensar en que neste concello hai veciños e veciñas que precisan de apoio e de investimentos”.

Referiuse así tanto á Deputación de Lugo como ao Goberno central, que, en contraposición á aposta do Goberno de Alfonso Rueda, acumulan anos de desleixo con este concello. “Necesitamos que, ao igual que temos o apoio do PPdeG e do PP de Lugo, poidamos contar co respaldo de todas as administracións para que Viveiro volva ter o que lle corresponde e merece”, concluíu neste sentido.

O Partido Popular de Galicia conmemora hoxe o Día de Galicia tras un curso político no que se despregou por completo o ‘Estilo Rueda’ de facer política na nosa Comunidade, e faino a través dun vídeo no que subliña que “a Galicia do si” é tamén a da gran maioría dos galegos e galegas.

Cun toque de humor, empregando diversos termos coa sílaba “si”, os populares galegos reivindican a Galicia en positivo como “a Galicia do futuro”, fronte a aqueles que din ‘non’ e que se opoñen calquera cousa por sistema, e explican así a idea que intentan transmitir a través desta pequena peza audiovisual: “Nós miramos cara a adiante, con orgullo, forza e identidade”.

No vídeo participa como principal protagonista o presidente Alfonso Rueda, que na contorna da Fervenza do Toxa, onde tivo lugar a conmemoración do Día de Galicia do PPdeG o pasado martes, deixa claro ante a secretaria xeral, Paula Prado, que esa fermosa paisaxe se atopa en “Si-lleda”.

Trátase, ademais, dun lugar moi especial para o líder dos populares galegos, pois moi preto de alí no mesmo concello, na Bandeira, están as súas raíces. Aproveitando un xogo de palabras, colle un estandarte galego de mans de Luis López, presidente provincial de Pontevedra, que se achegou ata a zona en bicicleta e, de paso, tamén fixo fincapé así na importancia da actividade física.

Esta é a parte final do vídeo, que dá comezo coa conversa entre dous turistas estranxeiros e o presidente provincial de Ourense, Luis Menor, que lles aclara que están ante o maxestoso río “Si-l”, nunha escena gravada no miradoiro de Moura, no municipio de Nogueira de Ramuín, na Ribeira Sacra, que segue no camiño a ser declarada Patrimonio Mundial da Unesco.

A escena serve, ademais, para deixar claro que “Galicia di ‘si’ tamén a “abrir os brazos a todo o mundo que nos queira visitar”.

O QUEIXO SAN SIMÓN E O ‘VINTESINCO’

Pola súa banda, a presidenta provincial de Lugo, Elena Candia, responde orgullosa que o produto típico de Vilalba e un dos máis coñecidos de Galicia é o queixo “San Si-món”. Faino, ademais, no interior da queixería Don Crisanto, que vén de ser galardoada hai uns días co premio ao mellor queixo de España, o que pon tamén en valor a variedade e calidade da nosa gastronomía en toda a Comunidade.

Por último, no porto de Malpica de Bergantiños, o presidente provincial da Coruña, Diego Calvo, e a deputada autonómica e percebeira Paula Mouzo Mas teñen unha curiosa conversación, na que esta non se daba conta de que é 25 de xullo, día festivo. “É verdade! Que é… vinteSinco”, dille a camariñana, con esa característica fonética tan habitual na fala da Costa da Morte dunha lingua galega que tamén é protagonista neste Día de Galicia e coa que o PPdeG está comprometido.

Así, Rueda remata recalcando que “somos a Galicia da gran maioría dos galegos e galegas; a Galicia do futuro; a Galicia do si” e, en definitiva, a Galicia do PPdeG, desexándolle un feliz día a todos os galegos e galegas.

A sede do Partido Popular de Gipuzkoa recibiu recentemente a visita da responsable de Medio Ambiente e Cambio Climático do Goberno galego e membro do Comité Executivo do PP de Galicia, Ángeles Vázquez, nun encontro que serviu para estreitar lazos entre territorios con identidades propias pero unidos por un “proxecto político común”.

A presidenta do Partido Popular de Gipuzkoa, Muriel Larrea, recibiu á responsable galega nun ambiente de proximidade e cordialidade, reivindicando a riqueza dunha España plural na que cada terra achega a súa cultura, o seu idioma e a súa maneira de entender a vida, pero onde todos comparten un mesmo compromiso: o de traballar polo ben común desde os valores do PP.

“Galicia e Euskadi teñen linguas propias, costumes diferentes e paisaxes moi distintas, pero con este encontro demostramos que cando compartes principios, visión de país e ganas de mellorar a vida das persoas, todo iso suma”, sinalou Muriel Larrea tras o encontro.

A visita valeu para subliñar o valor da política con raíces, pegada ao terreo, que respecta a diversidade e defende unha España de cidadáns libres e iguais. Ambas dirixentes coincidiron na importancia de manter vivos os lazos entre territorios que, desde a súa singularidade, constrúen xuntos un proxecto nacional forte e cohesionado.

“Somos un partido que se constrúe desde abaixo, desde cada recuncho de España, con respecto ás nosas raíces e orgullo de formar parte dunha mesma casa común”, afirmou a presidenta do PP de Gipuzkoa.

Pola súa banda, Ángeles Vázquez aproveitou para trasladar a Muriel Larrea información sobre os últimos avances en materia de costas, tendo en conta que o Goberno de España traspasou este mes a Galicia as competencias en materia de ordenación e xestión do litoral, e o País Vasco recibiunas tamén este mesmo ano, en abril.

A secretaria xeral do Partido Popular de Galicia, Paula Prado, participou hoxe nun acto organizado por Novas Xeracións en Ourense, centrado nas dificultades que a mocidade atopa á hora de obter o carné de conducir en Galicia, no que puxo en valor o traballo do Goberno galego para solucionar este problema.

Durante a súa intervención, Prado destacou “as políticas activas da Xunta de Galicia para mellorar a mobilidade e a inserción laboral da xuventude”, como as axudas económicas para obter o carné, que xa beneficiaron a 4.000 persoas novas.

“A realidade é que o carné de conducir segue a ser unha ferramenta esencial para a independencia e o acceso ao emprego”, afirmou Prado. Porén, denunciou que “o amplo número de prazas vacantes de examinadores na Dirección Xeral de Tráfico está a xerar un colapso sen precedentes: segundo as últimas informacións, hai arredor de 3.000 persoas en lista de espera na nosa Comunidade e un prazo de ata cinco meses para poder examinarse”.

Neste sentido, lembrou que é o Goberno de Sánchez o que ten as competencias de Tráfico e esixiulle que adopte todas aquelas medidas que permitan, de maneira urxente, a cobertura de prazas de examinadores de tráfico vacantes en Galicia. “Non se pode seguir permitindo que o Goberno central mire para outro lado mentres os galegos ven paralizados os seus proxectos de vida e traballo”, insistiu Prado.

De feito, o propio director xeral de Tráfico, Pere Navarro, recoñeceu onte publicamente que “non hai suficientes examinadores para asumir todas as solicitudes de persoas que queren sacarse o carné”.

“A consecuencia disto”, indicou Prado, “é que moitos mozos e mozas perden oportunidades de traballo ou de acceder a oposicións por non dispoñer do permiso nun prazo razoable”.

O CIFP PORTOVELLO DE OURENSE, PIONEIRO NA FORMACIÓN

Con todo, Paula Prado quixo destacar unha boa nova que amosa a capacidade de Galicia, e neste caso a provincia de Ourense, para ofrecer solucións: “Hai pouco saíu do CIFP Portovello de Ourense a primeira promoción de profesores de autoescola formados nun ciclo superior de Formación Profesional. Son 14 alumnos que simbolizan o compromiso de Galicia coa formación útil e de calidade”.

“Galicia, unha vez máis, vai un paso por diante na solución dun problema que afecta a toda España, cun modelo que marca o camiño a seguir”, asegurou, e apuntou que a Deputación de Ourense prestou un apoio importante a esta iniciativa de FP ao financiar as prácticas e os materiais.

Pola súa banda, a presidenta de Novas Xeracións de Galicia, Nicole Grueira, puxo en valor a “aposta decidida” do Goberno galego pola FP dual e, en particular, por un ciclo pioneiro que só existe en Galicia e que se imparte na provincia de Ourense. “Un ciclo que permite formar a mozos e mozas que queiran ser profesores de autoescola, garantindo así o relevo xeracional nun sector clave”, engadiu.

Segundo Grueira, esta iniciativa “amosa que a Xunta e o PPdeG están ao carón da xuventude, investindo en formación e no futuro de Galicia. E se se inviste en quen vai formar os futuros condutores, estase a construír unha sociedade máis sostible, máis segura e máis responsable”.

A presidente de Novas Xeracións, acompañada do deputado autonómico José Luis Ferro e do responsable da organización xuvenil na provincia, Nacho Campo, tamén anunciou que o PPdeG rexistrou no Parlamento galego unha iniciativa.

Mentres, a responsable local do PP en Ourense, Ana Méndez, subliñou a importancia estratéxica que ten a provincia no ámbito da formación viaria: “Xogou un papel clave para que esta iniciativa fose unha realidade, grazas tamén ao impulso e á aposta da Asociación de Autoescolas de Ourense”.

Méndez destacou que “Ourense será a única provincia de Galicia —e unha das poucas en todo o Estado— onde durante o mes de agosto non haberá listas de agarda para os exames de conducir. Todos os alumnos que queiran examinarse poderán facelo sen atrasos nin limitacións”.

“ESPAÑA PRECISA QUE FEIJÓO COLLA O VOLANTE”

Finalmente, en clave nacional, a secretaria xeral do PP de Galicia lembrou que hoxe se cumpren dous anos desde que o Partido Popular, con Alberto Núñez Feijóo á fronte, gañou as eleccións xerais de 2023. “Por desgraza, continuamos cun Goberno de España liderado por Pedro Sánchez, que segue instalado na mentira, sometido ás chantaxes constantes dos seus socios independentistas e incapaz de gobernar para o conxunto dos españois”, asegurou.

Prado denunciou que estes dous anos foron “unha sucesión de cesións políticas, privilexios territoriais e escándalos de corrupción que deixan a España paralizada e sen rumbo”. E agregou: “Sánchez só pensa en aguantar un minuto máis na Moncloa, aínda que iso supoña vender a unidade e a igualdade dos cidadáns”.

Neste momento da lexislatura, a dirixente popular apelou á necesidade dun cambio de rumbo urxente: “España non pode seguir así. Hai que cambiar de condutor, e ese condutor non pode ser outro que Alberto Núñez Feijóo”.

O presidente do PPdeG, Alfonso Rueda, reivindicou hoxe “a Galicia do si”, representada polo Partido Popular, como unha terra de futuro que di “si” ao talento, ás oportunidades e á calidade e que aposta pola ilusión, o crecemento, a convivencia e a liberdade.

Rueda encabezou o acto ‘A Galicia do si’, co que o partido conmemorou esta tarde o Día de Galicia na Fervenza do Toxa e no que participaron tamén a secretaria xeral, Paula Prado, o presidente provincial do PP de Pontevedra, Luis López, deputados, senadores e outros representantes do partido, entre eles o portavoz do PP local, Ignacio Maril. Todos eles fixeron unha pequena andaina ata o miradoiro da fervenza, onde tivo lugar a foto de familia e soou o himno de Galicia.

A celebración tivo lugar en Silleda, un concello que precisamente leva no seu nome o “Si” como símbolo perfecto da Galicia que o PPdeG construír. De feito, dixo o presidente, a Galicia que defenden os populares galegos é a do traballo ben feito, o compromiso real co rural, o apoio aos emprendedores, a aposta decidida pola sanidade e a educación, e a da igualdade de oportunidades.

Rueda contrapuxo este modelo de portas abertas co da Galicia do “non” sistemático, do bloqueo permanente e da crítica sen proposta. E a inmensa maioría dos galegos, sinalou, cando toca escoller entre quen só sabe poñer paus nas rodas e quen traballa cada día para impulsar a nosa terra, prefire avanzar.

Deste xeito, o presidente do PPdeG subliñou que esa “Galicia do si” ten futuro porque conta cun proxecto claro, cun liderado estable, e cunha forza como o Partido Popular sempre a carón da xente, sempre escoitando e actuando con responsabilidade. É unha Galicia que se recoñece a si mesma con orgullo, que non se conforma nin se resigna, e que busca chegar o máis lonxe posible.

Por último, concluíu afirmando que o PPdeG seguirá sendo o motor deste camiño con humildade, con sentidiño e, sobre todo, con orgullo de ser galegos.

“A FERVENZA É UN PUNTO DE ENCONTRO, COMO O PARTIDO POPULAR”

Pola súa banda, o presidente do PP de Pontevedra, Luis López, agradeceu á dirección autonómica do partido seleccionar a provincia de Pontevedra para felicitar aquilo que nos une: Galicia, no seu día grande. Ademais, nun dos moitos tesouros que conta a provincia, nunha das postais máis fermosas e icónicas da nosa terra, que é a Fervenza do Toxa, precisou o presidente pontevedrés.

Luis López destacou que nestes meses de tempada alta turística, a esta fervenza acoden persoas e visitantes de todos os lugares de Galicia, de España e do mundo. “É un punto de encontro, como a política que practica o Partido Popular en Galicia”, precisou o dirixente popular.

“Ser o partido que máis se parece a Galicia ten moito máis de realidade que de lema. Os galegos, somos moderados, estamos unidos, valoramos o sentidiño e cremos nas maiorías. Traballamos nunha Galicia na que caben todos, forte e orgullosa”, indicou o presidente provincial.

Luis López rematou facendo fincapé en que, na medida en que dependa do PP de Pontevedra, as vésperas do 25 de Xullo son datas moi acaídas para renovar o noso compromiso con esa política que fai unha Galicia para todos, e unha Galicia mellor, tanto dende a Deputación de Pontevedra, como dende as agrupacións da comarca do Deza e das 61 da provincia, e como non, de todas e cada unha das 26 alcaldías que ostenta o Partido Popular na provincia.

Por último, o portavoz do PP local e anfitrión, Ignacio Maril, agradeceu igualmente que o PPdeG escollera a Fervenza do Toxa e sinalou que seguirá traballando para que Silleda sexa ‘popular’ a partir das eleccións municipais de 2027.

O Partido Popular de Galicia incidirá nos próximos meses no Parlamento galego no seu rexeitamento ao “cuponazo independentista” porque “non se pode tolerar que se deteriore o que é de todos” e porque “non pode haber españois de primeira e españois de segunda”.

Así o anunciou esta mañá a secretaria xeral do partido, Paula Prado, nunha rolda de prensa que ofreceu no propio Pazo do Hórreo e na que invitou ao PSOE e ao BNG a apoiar esta iniciativa parlamentaria “polo ben de Galicia” e, polo tanto, desistir no seu apoio a Pedro Sánchez e ao independentismo.

“O cuponazo independentista é o enésimo agasallo de Sánchez ao separatismo e o enésimo agravio de Sánchez a Galicia”, asegurou ao tempo que recordaba a entrevista radiofónica na que a vicepresidenta do Goberno e ministra de Hacienda, María Jesús Montero, “acusou ao presidente Rueda de inventar bulos cando este avanzou que se lle ía condonar a débeda a Cataluña e que isto suporía darlle a uns o que se lle nega a outros”.

Na súa opinión, “o tempo puxo a cada un no seu lugar” e así se constatou esta semana co acordo entre o Goberno de España e o independentismo catalán. Un acordo que Prado cualificou de “auténtico disparate” preguntándose “cales serán as próximas liñas vermellas que se superarán só para que Pedro Sánchez poida seguir un pouquiño máis no seu cargo”.

“O independentismo catalán non se vai saciar, pero Sánchez prefire seguir tendo unha prórroga tras outra e seguir alongando a súa agonía”, engadiu subliñando que este acordo “significa romper unha vez máis coa igualdade entre territorios” e que “non ten nada que ver coa convivencia, senón coa conveniencia”.

Por iso lamentou o apoio tanto dun PSdeG que “segue submiso ao presidente máis dañino da historia para os intereses de Galicia” como dun BNG que “só pensa nos seus socios independentistas e en manter no poder a Sánchez sen importarlle sequera ser cómplice da súa corrupción”.

A número dous dos populares galegos concluíu invitando a ambas formacións a explicar “por que non se poñen dunha vez a favor de Galicia e non a favor de Sánchez e do independentismo, por que prefiren poñer en risco os servizos públicos e que Galicia teña que pagar millóns de euros máis cada ano e por que queren desaparecer o sistema de financiamento autonómico”.

MEDALLA DE OURO Á PRINCESA LEONOR

Paula Prado tamén fixo mención na súa intervención á concesión da Medalla de Ouro de Galicia á Princesa Leonor apuntando que foi “un recoñecemento merecido e co que a gran maioría dos galegos e galegas se identifican”, tal e como “quedou patente co cariño que recibiu a Princesa nos últimos días e tamén co agradecemento que xurdiu das súas palabras durante o acto”.

“Desde o Partido Popular salientamos os valores que representa a Coroa de España, máis necesarias que nunca”, remarcou afeando a actitude amosada ao respecto por PSOE e BNG. “Quedaron retratados co seu desprezo a unha institución e ao máximo recoñecemento de Galicia”, afeoulles antes de recomendarlles que elixan “se queren seguir guiándose polo radicalismo ou se prefiren seguir camiñando en dirección contraria aos galegos e galegas”.

O Partido Popular de Galicia contrapón o modelo de coidados “desde o berce ata o bastón” impulsado con éxito polo Goberno galego desde hai anos fronte ao “modelo privatizador” que levan a cabo o PSOE e o BNG nas deputacións provinciais e nos concellos onde gobernan.

Esta mañá a secretaria xeral dos populares galegos, Paula Prado, a presidenta provincial do PP de Lugo, Elena Candia, e o portavoz na Deputación provincial, Antonio Ameijide, mantiveron un encontro con representantes do partido na comarca dos Ancares e con membros da Plataforma Pro Residencia de Becerreá precisamente para abordar esa diferencia de xestión no caso deste centro.

“Estamos aquí para reclamar a apertura desta residencia pero nunhas condicións dignas e en igualdade co resto de residencias da provincia de Lugo”, manifestou Prado en respaldo ás reclamacións do portavoz local, José Fernández Carrete; quen demandou que o centro poida, despois de 4 anos, “prestar o servizo fundamental que demandan e necesitan os veciños de Becerreá e dos Ancares”.

En contraposición a esta situación, a número dous do PPdeG reivindicou o modelo de coidados do Goberno galego: “Un modelo de éxito contrastado que, como Galicia, funciona, e está pensado para acompañar, coidar e mellorar a vida dos galegos e galegas desde o berce ata o bastón”.

“O que non funciona é o modelo ‘Fai o que digo e non o que fago’ que promoven o PSOE e o BNG”, asegurou incidindo nas incoherencias entre o que defenden e o que practican ambas formacións. “Din defender o público e aos traballadores, pero privatizan todas aquelas residencias que poñen en marcha e acumulan denuncias por incumprimentos do convenio salarial por parte do seu persoal”, explicou.

Unha situación que fixo extensiva tamén a outros ámbitos: “Din defender a limpeza nas institucións, pero sosteñen e apoian ao Goberno máis corrupto da historia de España. E din defender os intereses dos galegos, pero consenten que outras comunidades vaian ter máis a costa de que Galicia teña menos cun ‘cupo’ feito á medida do independentismo catalán e a cambio de prolongar un pouco máis a agonía de Pedro Sánchez na Moncloa”.

OS ÉXITOS DO MODELO DE COIDADOS DE GALICIA

Paula Prado reivindicou que o modelo de coidados do Goberno galego, aparte de ser reforzado cada día, ten “un éxito contrastado”. Algo que evidencian os últimos datos coñecidos e que sinalan que Galicia é a comunidade que máis reduciu a súa lista de espera en dependencia no último ano e, en paralelo, tamén a que máis aumentou o número de persoas dependentes atendidas.

Galicia é tamén unha comunidade referente na atención diúrna –a través dos Centros de Día para maiores repartidos por todo o territorio– e líder nacional en acollemento familiar a menores. Grazas, sen dúbida, ao pulo que o Goberno de Alfonso Rueda está dando neste ámbito con medidas como o reforzo do investimento no SAF, a posta en marcha de novas prestacións como o Bono Coidado no Fogar ou o novo plan de residencias que contempla a construción de 24 novos centros e a habilitación de 1.800 novas prazas residenciais.

ELENA CANDIA: “PRIORIZAN OS SILLÓNS ÁS NECESIDADES DA XENTE”

A presidenta provincial do PP de Lugo, Elena Candia, criticou que PSOE e BNG “pensan máis nos seus sillóns que no que realmente necesitan os lucenses” e, como consecuencia disto, que un investimento “tan necesario” como o da residencia de Becerreá “acumule anos de inacción”.

“A presión veciñal é o que está obrigando ao presidente da Deputación a mover ficha, pero nin rectificando acerta, porque o modelo que propón para esta residencia non só é absolutamente distinto ao do resto de centros provinciais, senón que tamén é absolutamente lesivo para a economía das familias”, asegurou incidindo no alto que se contempla para este servizo.

Candia puxo en valor que os votos do PP no último Pleno provincial permitiron frear a aprobación das bases nas que se sustentaba na práctica a privatización da residencia de Becerreá e incidiu no acontecido nesa sesión: “O PSOE non contou con 3 dos seus deputados por unha nova liorta interna e o BNG decidiu votar a favor da privatización aínda sabendo que cos seus votos non sairía adiante a proposta”.

“O BNG priorizou o seu pacto de sillóns fronte aos intereses dos veciños de Becerreá e demostrou que, pese ao que reclama publicamente, cando lle interesa está a favor das privatizacións”, remarcou recordando que só no concello de Lugo “hai máis de 30 servizos que están privatizados e en moitos casos ata sen contrato”.

A líder provincial do PP prometeu que o seu partido será “inflexible e contundente” á hora de demandar a apertura desta residencia e evitar a privatización que supoñen uns prezos “que a maioría das familias desta comarca non poderían pagar”. Por iso reclamou ao Goberno da Deputación que “rectifique a súa postura, respecte á xente, cumpra o que di e abandone a hipocrisía para que os veciños de Becerreá teñan por fin a residencia que merecen”.

ANTONIO AMEIJIDE: “SEGUIREMOS DEFENDENDO A IGUALDADE FRONTE ÁS DIFERENZAS QUE PRETENDE IMPOÑER O GOBERNO PROVINCIAL”

Pola súa banda, o portavoz do PP na Deputación de Lugo, Antonio Ameijide, tamén condenou a “incoherencia” do BNG ao “defender un modelo público de residencias de maiores pero votar a favor da privatización do servizo” no centro de atención a maiores de Becerreá logo do seu apoio á memoria sobre a actividade económica e o seu réxime xurídico, que recolle a súa xestión privada con canon cero.

Ameijide lembrou que o Goberno provincial de PSOE e BNG “leva 4 anos con esta infraestrutura pechada por capricho político de José Tomé”. O que supón “impedir o acceso a este servizo a preto de 140 familias –o centro de atención a maiores dispón de 96 prazas de atención residencial e 40 de atención diúrna– e impedir a creación de ducias de postos de traballo”. Nese sentido, lamentou que o Executivo provincial “non ten ningún tipo de intención nin data prevista para a posta en marcha da residencia que demandan os veciños de Becerreá e a comarca”.

“Fronte ao modelo de lucenses de primeira e lucenses de segunda que pretende impoñer o Goberno provincial presidido por José Tomé, desde o PP seguiremos defendendo a igualdade entre todos os concellos da provincia de Lugo”, subliñou ao tempo que reivindicaba “a construción de todas as residencias comprometidas e que nos concellos gobernados polo PP se atopan paralizadas por PSOE e BNG”.

O popular avanzou tamén que a súa formación esixirá “ata o final” que todos os centros da rede provincial presten os servizos para o que foron creados (residencias e centros de día) e co mesmo prezo en toda a provincia: “Non imos permitir que a atención na residencia de Becerreá a unha persoa dependente en Becerreá coste un 60% máis que noutro municipio da provincia como, por exemplo, en Pedrafita do Cebreiro ou Navia de Suarna, a menos de 20 km”. Referíase así ao feito de que, segundo a proposta de socialistas e nacionalistas, a tarifa na residencia de Becerreá ascendería ata os 2.200 €/mes fronte aos 1.390 € establecidos para o resto de centros da rede provincial.

O Partido Popular xa presentou alegacións que foron rexeitadas polo Goberno provincial, que no último Pleno non foi capaz de aprobar de forma definitiva a memoria da actividade económica e réxime xurídico debido á ausencia de tres deputados socialistas. O cal, na opinión de Ameijide, supón “unha evidencia máis da crise interna do PSOE en Lugo”.

O PPdeG quixo hoxe poñer en valor o traballo diario dos seus alcaldes e alcaldesas en toda Galicia enxalzándoos como os garantes dunha política “de proximidade, seriedade e xestión” e destacando que “sempre poñen os intereses dos veciños por enriba dos intereses partidistas”.

Fíxoo a través da súa secretaria xeral, Paula Prado, que esta mañá participou na segunda edición da Carreira e Andaina Popular Concello da Pastoriza xunto á presidenta de Novas Xeracións de Galicia e deputada autonómica, Nicole Grueira, e o portavoz do PP na Deputación de Lugo, Antonio Ameijide. Un evento que serviu de homenaxe ao recentemente falecido exalcalde do municipio, Pepe Yáñez, polo que se gardou un minuto de silencio.

Quen durante máis de dúas décadas liderou a Alcaldía da Pastoriza é precisamente, en palabras da número dous dos populares galegos, un dos “referentes” do municipalismo do PPdeG e por iso o seu legado guiará ao partido no proceso de renovación dos equipos de cara as vindeiras elección municipais de 2027.

“Temos que facer fronte a un PSOE totalmente asolado pola corrupción e apoiado nos independentistas, cada vez máis radicalizados”, asegurou Paula Prado en referencia ás críticas do BNG á concesión da Medalla de Galicia á Princesa Leonor. “Nós seguiremos sendo o partido referente e garante da verdadeira Galicia real”, concluíu.

O PPdeG conmemorou o 28º aniversario do asasinato de Miguel Ángel Blanco a mans da banda terrorista ETA recordando a súa loita “por manter unha España máis democrática, unida, plural e libre” e facendo un chamamento á sociedade para que non se esquezan “xamais” nin o seu legado nin o seu “exemplo moral e de coraxe democrático”.

Así o puxo de manifesto esta mañá a secretaria xeral do partido, Paula Prado, na homenaxe que os populares galegos fixeron ao político vasco “con profundas raíces galegas” no cemiterio de Faramontaos (A Merca), onde repousan os seus restos. Un acto no que tamén participaron o presidente provincial do PP de Ourense, Luis Menor, o alcalde Manuel Garrido, o exalcalde Manuel Velo e Miguel Ángel López, primo político do homenaxeado, entre outros.

“Non entendemos como hai partidos galegos, como o BNG, aliados con herdeiros de ETA e mesmo asesorados por eles”, asegurou ao tempo que reiteraba o seu rexeitamento a “todos e cada un dos acordos políticos con partidos que manteñen a indignidade, non condenan os asasinatos da banda terrorista e pretenden lexitimar a súa existencia”.

Nesta liña subliñou que o Partido Popular ten “a conciencia tranquila” porque está “onde ten que estar”. Algo que volveu deixar claro hai uns días o presidente nacional do partido, Alberto Núñez Feijóo, ao afirmar que os únicos “cordóns sanitarios” que terá o seu Goberno serán con Bildu e que “nin vai sentarse con ningún representante dese partido nin lles vai abrir o Palacio da Moncloa”.

“Tampouco deberían facelo o PSOE e o BNG”, engadiu Paula Prado argumentando que “non hai nada que falar ata que non pidan perdón a todas as vítimas de ETA e non axuden a esclarecer todos os crimes que custaron a vida a tantas persoas”.

Trátase dunha cuestión que se lle debe, apuntou, a todas as vítimas e en especial a todos os compañeiros de partido que, como Miguel Ángel Blanco, se xogaron a vida pola liberdade. Todos eles merecen, na súa opinión, ser “reparados das humillacións e do esquecemento aos que algúns pretenden condenalas”.

“O prezo que pagaron Miguel Ángel Blanco e todas as vítimas de ETA por defender unha España libre e unida é o mellor recordatorio do valor que ten non renunciar a esta idea e seguir defendéndoa”, concluíu.

LUIS MENOR: «BENEFICIAR A BILDU É MOI DISTINTO A XESTIONAR”

Pola súa banda, o líder do PP de Ourense, Luis Menor, comprometeuse como presidente provincial a “dignificar” o espazo onde se atopa Miguel Ángel Blanco e que “ninguén se esqueza desta traxedia”, citando A Merca como «o símbolo máis representativo da democracia e de todas as liberdades» desde hai 28 anos.

Menor destacou que o concelleiro de Ermua «morreu pola barbarie daqueles que só sabían falar coas pistolas e non coa palabra» e esixiu «dignidade» a aqueles que «pactan cos herdeiros de ETA sen que, en ningún momento, ninguén neste país escoitara pronunciar a palabra perdón».

«Estamos fartos de ver como partidos como Bildu son beneficiados por Pedro Sánchez para seguir ocupando a Moncloa, algo que é moi distinto a xestionar», dixo Menor, e tanto el como Paula Prado tiveron un recordo para Aurelio Garrido, tío materno de Miguel Ángel Blanco, falecido hai apenas un mes. «Desde o PP, temos disposición para darnos sempre cita aquí, para manter vivo o recordo de Miguel Ángel e o que significa na nosa provincia e na nosa Democracia a súa figura», engadiu Menor.

Por último, o alcalde da Merca, Manuel Garrido, lembrouno como un “veciño significado” que “só quería ser libre”, e tamén se comprometeu a seguir homenaxeándoo cada ano: “Meréceo, lembralo é o mínimo que lle podemos dar”.