Categoría: PP de Galicia

O PPdeG conmemora o Día da Muller Rural poñendo en valor a contribución inmensa das mulleres galegas ao desenvolvemento económico da nosa terra e apostando por unha Galicia na que o rural siga vivo, na que a remuda xeracional sexa unha realidade e na que a muller siga sendo protagonista.

Así o manifestou esta mañá a secretaria xeral do partido, Paula Prado, durante a visita que realizou ás instalacións da empresa Maruxas de Nata en San Sadurniño acompañada polo coordinador de Medio Rural do PPdeG, Avelino Souto, os responsables de Igualdade e de Medio Rural no Grupo Parlamentario Popular, Raquel Arias e Miguel Ángel Viso, e a voceira local do partido, Belén Trigo.

Para a número dous dos populares galegos esta empresa –cuxos produtos contan co selo de calidade de Artesanía Alimentaria e na que traballan seis mulleres e ata unha decena de períodos de alta produción – é un exemplo do labor das mulleres e especialmente do emprendemento das mulleres no rural.

“Hai que dar as grazas a todas esas mulleres que fixeron tanto polo rural galego e poñer en valor que cada vez hai máis mulleres facendo Galicia no rural”, explicou ao tempo que reivindicaba a importancia do Día da Muller Rural para o PPdeG, “o partido das mulleres e o partido do rural”.

Prado recordou que o PPdeG é o partido con máis mulleres alcaldesas –un total de 28, máis que o PSOE e o BNG– e que a gran maioría delas lideran pequenos concellos. De feito, case todas elas teñen unha confianza abrumadora dos seus veciños, cunha porcentaxe de voto media superior ao 60%.

A isto hai que engadir que o Goberno galego leva 15 anos impulsando numerosas medidas de Igualdade, como a Lei de Igualdade de Galicia aprobada hai un ano, co obxectivo de “destacar a contribución inmensa das mulleres ao desenvolvemento económico de Galicia”. Unha contribución que, tal e como concluíu a secretaria xeral do PPdeG, “merece ser celebrada e recoñecida”.

O Partido Popular de Galicia denuncia o plan que está poñendo en marcha o Goberno central para desmantelar os cuarteis da Garda Civil no rural –mediante a redución de horarios de atención presencial ou directamente o seu peche– e reclama solucións ante o déficit de efectivos que sofre a nosa Comunidade: “Cada día faltan 1.000 axentes en Galicia”.

A secretaria xeral do partido, Paula Prado, e a secretaria nacional de Interior do Partido Popular e deputada por Ourense, Ana Vázquez, mantiveron unha xuntanza coas principais asociacións da Garda Civil na que abordaron os principais problemas que afectan a este corpo de cara a colaborar na busca de solucións.

“As noticias que nos chegan son inquietantes na medida en que constatamos que o Goberno de Sánchez está descoidando á Garda Civil e, polo tanto, tamén a seguridade dos galegos e galegas”, apunta con preocupación a número dous dos populares galegos ao respecto de cuestións como o peche de cuarteis ou a redución dos horarios de atención presencial.

Explica neste sentido que as intencións do Ministerio do Interior pasan por “desmantelar a Garda Civil nos pequenos municipios e zonas rurais”, xa que está previsto pechar os postos auxiliares de a lo menos sete concellos: A Pobra do Caramiñal, Touro, As Somozas, Cariño, o Incio, Sober e Baltar.

Ao que habería que engadir o feito de que cada vez son menos os cuarteis abertos con atención presencial as 24 horas de día e cuxos horarios se viron reducidos a un horario de 9:00 a 14:30 horas. Algo que, na súa opinión, é tan “inconcibible e intolerable” como a idea de “substituír os axentes reais por axentes virtuais”.

Esta situación vese agravada ademais pola falta de cobertura dos postos previstos no catálogo e das baixas médicas. O cal deriva en que, segundo os cálculos dos populares, “cada día faltan 1.000 axentes da Garda Civil en Galicia”.

“Esperamos que Sánchez e os seus rectifiquen, polo ben da Garda Civil e da seguridade de todos os galegos e galegas”, conclúen no PPdeG recordando que os seus deputados no Congreso rexistraron unha proposición non de lei para instar ao Goberno a manter os cuarteis e postos existentes da Garda Civil en Galicia, garantir a atención presencial á cidadanía e cubrir o total de prazas previstas por catálogo.

UN ATAQUE DIRECTO CONTRA O MEDIO RURAL

Ana Vázquez sostén que “a seguridade é un dereito” e que, polo tanto, “os galegos e o resto de españois teñen que ver garantido o seu dereito a sentirse seguros e poder camiñar libres pola rúa”. De aí que inste ao Goberno de Sánchez a preservar e manter “unha seguridade igual para todos”.

“É o momento de incrementar o número de axentes, non de pechar cuarteis”, afirma explicando que a Garda Civil presta un servizo fundamental á hora de ofrecer a tranquilidade e a seguridade necesarias para poder vivir no rural.

A responsable de Interior do Partido Popular considera neste sentido que os plans do ministro Marlaska supoñen un “ataque directo contra o medio rural” e pregúntase “como vai protexer Internet aos nosos maiores” ou “como van presentar unha denuncia por Internet aquelas persoas que non teñen acceso a este servizo”.

Baixo o seu punto de vista, o que se pretende reducindo a actividade e a presenza da Garda Civil é que haxa menos denuncias e así maquillar as cifras de criminalidade que non deixan de subir desde a chegada de Pedro Sánchez á Moncloa.

O presidente do Partido Popular de Galicia, Alfonso Rueda, amósase convencido de que, se cada vez que son chamados ás urnas, os lucenses apostan maioritariamente pola súa formación é porque o Partido Popular sempre cumpre con Lugo.

As últimas enquisas publicadas apuntan que, se se repetisen as eleccións autonómicas e xerais, o Partido Popular non só volvería gañar por maioría en Lugo, senón que volvería obter un porcentaxe de apoio superior ao 50%. O cal demostra, na súa opinión, que os galegos e os lucenses seguen confiando no único partido que devolve a confianza obtida co cumprimento da palabra dada e o traballo diario.

Rueda pon en valor o traballo que está a realizar en Lugo o partido liderado por Elena Candia, coa que hoxe asistiu ás festas de San Froilán. Acompañados tamén pola secretaria xeral do PPdeG e case un cento de representantes do Partido Popular na cidade e na provincia, fixeron un percorrido polo recinto feiral e desfrutaron ao carón dos lucenses desta xornada festiva chea de tradición.

O PPdeG, logo da comparecencia do presidente Alfonso Rueda esta semana no Parlamento, considera que quedou claro que esta lexislatura estará protagonizada polo “Estilo Galicia” baseado na estabilidade e o rigor na xestión, así como no cumprimento da palabra dada: “O Goberno galego demostrouno durante os primeiros 100 días, co cumprimento do 100% das medidas, e demostrarao durante os máis de 1.400 días de lexislatura”.

“A comparecencia estivo protagonizada polas sete letras de Galicia e por un bo número de medidas para o futuro da nosa terra”, afirmou hoxe en rolda de prensa a secretaria xeral do partido, Paula Prado, destacando que o Goberno galego triplicará o orzamento destinado a vivenda, deseñará unha Estratexia para mellorar a inserción laboral da mocidade, porá en marcha un novo Plan de recursos humanos sanitarios, unificará a tramitación da dependencia e discapacidade e aprobará o Plan galego da investigación.

A isto habería que unir o anuncio realizado onte polo presidente Rueda de que a Xunta reservará para a mocidade o 25% das novas vivendas públicas destinadas á venda e o 40% das promocións destinadas ao alugueiro. Ademais de crear un bono para axudar á xuventude a afrontar os gastos derivados da emancipación.

“Todas estas medidas se levan a cabo grazas a que Galicia cumpre e proba diso é que a próxima semana a Xunta aprobará os Orzamentos de 2025. Co cal xa serán 16 anos consecutivos coas contas aprobadas e sen sobresaltos, sen estridencias e sen liortas”, remarcou insistindo en que “esta Galicia que funciona é un exemplo para o resto de España e un espello no que o Goberno central debería mirarse”.

A número dous dos populares galegos criticou que en España se teña normalizado “funcionar cos Presupostos Xerais prorrogados” e que “dar privilexios a algunhas comunidades sexa a forma de perpetuarse no poder”. Nesta liña afeou o feito de que “o candidato do partido político que goberna poda lanzar unha promesa e uns meses despois matizala facéndolle crear á cidadanía que cumpriu”.

GALICIA CUMPRE, O GOBERNO CENTRAL ENGANA

Referiuse así a que o 5 de febreiro de 2024, durante o debate electoral organizado pola Televisión de Galicia, José Ramón Gómez Besteiro asumira o “compromiso irrenunciable” de facer gratuítas as peaxes da AP-9 e a AP-53. É máis, o candidato socialista –logo de que meses antes o PSOE e o BNG asinaran a gratuidade da peaxe no papel mollado que foi o pacto de investidura– chegou a afirmar que as peaxes se ían acabar.

“Agora, varios meses despois, o Goberno central inténtanos colar como un gran triunfo unha pequena rebaixa que xa veremos como e cando se materializa. Porque xa sabemos que, ademais, a celebración do Aninovo adoita vir acompañada dunha subida”, engadiu recordando ademais que no Congreso o prazo de emendas á Proposición de Lei sobre a AP-9 xa leva media ducia de prórrogas esta lexislatura “despois de que na pasada se prorrogara ata 15 veces”.

Paula Prado considera que con estas prorrogas o PSOE e o BNG están “obviando a unanimidade do Parlamento de Galicia” e “boicoteando o mandato dos galegos e das galegas”. De aí a súa promesa de que o PPdeG “vai seguir traballando e non vai consentir que o Goberno central e os grupos que o apoian sigan bloqueando a transferencia e gratuidade da AP-9”.

Os populares agardan que o próximo mércores, na comparecencia de Óscar Puente que forzaron os seus deputados nacionais, o ministro cumpra e se comprometa cunha autoestrada gratuíta: “Temos que poñer a AP-9, e por suposto tamén a AP-53, no lugar preferente que demandan todos os galegos e galegas”.

“Estamos ante as autoestradas máis caras de España e, por iso, Galicia seguirá traballando para que a transferencia e a gratuidade sexan unha realidade”, sentenciou a secretaria xeral do PPdeG como remate da súa intervención.

A portavoz de Educación do Grupo Popular, Cecilia Vázquez, afirmou hoxe no Parlamento de Galicia que a Xunta e o Concello están a avanzar para dotar ao IES Ferrol Vello dun novo pavillón, para o que será preciso a adquisición dunha parcela para a súa localización.

Cecilia Vázquez lembrou que a Consellería de Educación “é plenamente consciente da situación na que se atopa o IES de Ferrol e por iso asinou no seu momento un convenio co Concello para levar adiante a construción dun novo pavillón”.

Respecto da dotación de profesorado neste instituto, a portavoz popular explicou que na actualidade dispón dun cadro de persoal de 20 persoas (18 profesores máis outros dous especialistas en pedagoxía terapéutica, “polo que cumpre coa dotación de profesorado necesario e mesmo se reforza, tendo en conta o tipo de centro do que se trata”.

Con este nivel de profesorado, a portavoz popular subliñou que o rateo global do centro é de 8 alumnos por profesor.

Novas Xeracións de Galicia reivindica ante Europa o modelo de educación gratuíta implantado na nosa Comunidade polo Goberno de Alfonso Rueda e que consideran un “exemplo a seguir” para outras rexións á hora de facer fronte ao reto demográfico e garantir a igualdade de oportunidades.

“Medidas como a gratuidade educativa desde a etapa infantil ata a universidade que se aplicou en Galicia son unha referencia para todas as rexións europeas en termos de conciliación familiar e loita contra o reto demográfico”, asegurou hoxe o vicesecretario de Organización Territorial e Institucional da organización xuvenil do PPdeG e tamén concelleiro do partido na cidade da Coruña, Carlos San Claudio.

En calidade de membro da rede Young Elected Politicians (YEP), o político coruñés participou nas xornadas organizadas polo Partido Popular Europeo no Comité das Rexións co título Local Dialogue on Empowering Regional Talents: Fostering Local Skills, Resources, and Cultural Identity for Sustainable Development.

Estas xornadas enmárcanse na Semana Europea das Rexións, na que tamén están a participar o coordinador de Emprego do PPdeG, Pablo Fernández López, e o alcalde do concello ourensán de San Xoán de Río, Xosé Miguel Pérez Blecua.

O alcalde de Poio, Ángel Moldes, relevará ao rexedor do Incio, Héctor Corujo, como principal representante do Partido Popular de Galicia na Federación Galega de Municipios e Provincias (Fegamp).

Así, Moldes pasará a ser o voceiro do PPdeG e o vicepresidente primeiro —cargos que ocupaba Corujo— no órgano supramunicipal, e polo tanto o rexedor de Poio continuará formando parte tanto da Comisión Executiva como do Consello Federal, onde xa se integrou no inicio da presente lexislatura (2023-2027).

Héctor Corujo deixa a Fegamp —tamén a Comisión Executiva e o Consello Federal— “co fin de non acumular cargos e para poder atender o máximo posible todas as súas responsabilidades” despois de tomar posesión o pasado verán como deputado provincial en Lugo.

Pola súa parte, Ángel Moldes mantén o compromiso “incuestionable” do PPdeG, co presidente Alfonso Rueda á cabeza, cos 313 concellos de Galicia.

A portavoz de Asuntos Sociais do Grupo Popular, Raquel Arias, salientou hoxe no Pleno do Parlamento galego que “a retirada da tarxeta básica, creada de xeito extraordinario para axudar ás familias a afrontar as situacións extraordinarias provocadas pola pandemia da Covid-19, supliuse cun incremento nun 30 por cento do orzamento da Xunta dedicado á inclusión”.

Raquel Arias lembrou que esta medida “so foi aplicada por dúas comunidades autónomas españolas: Andalucía e Galicia, á que se destinaron máis de 20 millóns de euros para paliar as deficiencias das familias galegas nun momento no que non podían saír das súas casas para traballar”.

Na súa intervención, criticou que “o que non axuda aos máis vulnerables é que o Goberno de Pedro Sánchez acabe de subir o IVE dos produtos básicos, negándose a baixar o do peixe, as conservas e a carne; que negue a Galicia o 50 por cento que lle corresponde da atención aos dependentes; que manteña bloqueada a Lei de familias desde hai máis de tres anos; que ten as autoestradas máis caras de España e os peores servizos ferroviarios; e que boicotea a instalación de empresas e a creación de postos de traballo”.

Fronte a esta situación, a portavoz popular destacou que “o presuposto da área de inclusión social da Xunta medrou un 30 por cento nos dous últimos anos, ata situarse hoxe nos 153 millóns de euros, a contía máis elevada destinada ata agora a esta finalidade”.

“Con estes cartos, a Xunta está a destinar 46 millóns de euros á Risga, 5 millóns de euros ás axudas de inclusión social e sufraga con 8 millóns o complemento autonómico das pensións non contributivas”, concretou.

O Partido Popular de Galicia faise eco dos problemas da mocidade galega para acceder a unha vivenda e contrapón as medidas tomadas desde o Goberno de Alfonso Rueda para garantir este dereito fronte ás mentiras e promesas baleiras dos partidos de esquerdas.

Os populares galegos sosteñen que ante unha cuestión como é o do acceso á vivenda, especialmente para a xente nova, a única resposta válida é aportar e implantar solucións reais. Neste sentido apuntan que en nada axuda á mocidade que o BNG se dedique a “sementar unha visión negra de Galicia e mentir para ocultar os avances e as oportunidades que se están dando na nosa Comunidade” ou que o PSOE “só fale de vivenda en campaña electoral”.

A presidenta de Novas Xeracións de Galicia e deputada no Parlamento, Nicole Grueira, recorda que Pedro Sánchez “prometeu miles de vivendas que non aparecen por ningures e que, como os trens, nunca chegan” e denuncia que non axudan a solucionar o problema da vivenda nin a permisividade do Goberno central ante a okupación, nin as políticas de restricións e imposicións que só provocan un aumento dos prezos e, ademais, desincentivan o alugueiro.

Fronte á ocultación da realidade duns e as promesas incumpridas doutros, a política lucense reivindica que o Goberno galego actúa con feitos, con medidas concretas e efectivas e cun compromiso claro como é o do presidente Rueda de duplicar o parque público residencial de Galicia nesta lexislatura.

A maiores disto, destaca medidas como o Bono de alugueiro mozo e as axudas dirixidas aos menores de 35 anos para a compra en centros históricos ou para a adquisición de vivendas en concellos rurais, ademais do aval hipotecario para mercar un inmoble.

“En Galicia non se promete o que non se pode cumprir, senón que se traballa a diario para garantir que os galegos, especialmente os máis novos, teñan acceso a unha vivenda digna. O futuro constrúese cumprindo coa palabra dada, non con promesas baleiras”, conclúen desde o PPdeG.

Así mesmo, cómpre lembrar que o presidente do PP nacional, Alberto Núñez Feijóo, anunciou o pasado venres no marco do Foro La Toja que presentará, ante “a incompetencia lexislativa do Goberno central”, o plan integral para o acceso á vivenda do Partido Popular, e reclamou mesa onde senten todas as administracións, expertos e afectados para solucionar o problema.

O portavoz do Grupo Popular, Alberto Pazos, pediu hoxe ao BNG que “deixen de facerlle o caldo gordo aos seus aliados independentistas cataláns e abandonen a súa idea nefasta de que Galicia conte cun cupo, porque se ten demostrado que sería enormemente prexudicial para a economía galega”. “Por unha vez, recoñezan que están fondamente equivocados e que as súas propostas non son máis que pasos atrás e prexuizos para Galicia e todos os galegos”.

Alberto Pazos referiuse ao informe que onte presentou o Foro Económico de Galicia sobre “O impacto económico para Galicia da extensión dos sistemas de concerto”, elaborado polos economistas Santiago Lago e Xoaquín Fernández Leiceaga.

CONCLUSIÓNS CONCLUÍNTES

“As conclusións deste informe son concluíntes respecto da proposta de cupo defendida polo BNG, porque, no caso de que o sistema de concerto se xeneralizase a toda España, Galicia perdería nese novo sistema 2.128 millóns de euros, se a cota se realiza en función do PIB; ou 2.647 millóns, se o cupo se calcula en función da poboación”, concretou.

Porén, o portavoz popular afirmou que “o máis preocupante, porque é o que está máis próximo de facerse realidade, vista a situación política e a debilidade do Goberno de Pedro Sánchez, chantaxeado e sometido aos intereses do independentismo catalán, é que de levarse a cabo o acordo entre os socialistas cataláns e Esquerra Republicana de Cataluña para facer Presidente da Generalitat a Salvador Illa Galicia vería reducido as transferencias que recibe nun 6,27 por cento, é dicir, 634 millóns de euros”.

Pazos tamén lamentou a submisión dos socialistas galegos a Pedro Sánchez e ao seu Goberno, “respaldando todas e cada unha das súas decisións que prexudican a Galicia, ben no ámbito económico, como pode ser o acordo acadado co independentismo catalán en materia de financiamento; ou no ámbito das infraestruturas de comunicación, cos exemplos no estado das autovías de conexión coa Meseta ou na nefasta xestión do AVE; ou na sanidade, rexeitando as propostas que se lle fan desde Galicia para incrementar o número de médicos e especialistas; e sen esquecernos dos máis de 2.500 millóns de euros que nos debe o Goberno central pola prestación da dependencia, unha cifra que se incrementa día a día ao negarse a aportar o 50 por cento que lle corresponde no cumprimento da Lei de dependencia”.

O portavoz popular asegurou que “imos seguir defendendo a reforma do sistema de financiamento autonómico, pero unha reforma que saia de xeito multilateral e consensuado con todas as comunidades autónomas; no seo do Consello de Política Fiscal e Financeira; evitando todo tipo de acordo bilaterais; e que achegue a Galicia máis recursos para contar con maior capacidade financeira, atendendo as maiores necesidades de financiamento da nosa comunidade derivadas da súa dispersión e envellecemento da poboación”.

NOXENTA CARTA AMEAZANTE

Por outra banda, Alberto Pazos trasladou “o apoio e solidariedade ás deputadas e senadoras do Partido Popular, en especial á nosa deputada ourensana Ana Vázquez, que no día de onte recibiron unha noxenta carta ameazante”. “Este tipo de accións, realizadas polo mellor exemplo de persoa cobarde, non van servir de freo á actividade exemplar que están levando a cabo as deputadas do Partido Popular, denunciando todas e cada unha dos desmáns que leva adiante o Goberno de Pedro Sánchez para manterse no poder e para contentar aos seus socios independentistas, tanto cataláns como vascos”, engadiu.

“Rexeitamos rotundamente este tipo de accións ameazantes, veñan de quen veñan e con independencia dos ou das destinatarios que sexan”, incidiu Pazos, quen lamentou que “estamos á espera de que as demais forzas políticas manifesten publicamente a súa solidariedade coas deputadas e senadoras do Grupo Popular, porque parece que só lles doe cando as afectadas están máis próximas ao seu ideario político que cando lles afecta a persoas relacionadas co PP”.