O PPdeG esixe ao Goberno central un programa completo e fiable de actuacións, investimentos e prazos para que o tramo español da conexión de AVE entre Vigo e Porto sexa unha realidade en 2030

O Partido Popular de Galicia esixe ao Goberno central que presente neste primeiro trimestre de ano unha programación completa de actuacións e investimentos e un cronograma fiable para o desenvolvemento do tramo español da conexión de AVE entre Vigo e Porto.

A través dunha pregunta dirixida ao Ministerio de Transportes que os deputados do partido veñen de rexistrar no Congreso, os populares galegos fanse eco así do “pesimismo” existente en torno á posibilidade de que o tramo español da liña de Alta Velocidade entre Galicia e Portugal, tal e como prometeu o departamento que dirixe Óscar Puente, sexa unha realidade no ano 2030.

O deputado e vicepresidente segundo da Comisión de Transportes e Mobilidade Sostible do Congreso, Celso Delgado, recorda neste sentido que en decembro do pasado ano o Goberno de España reiterou publicamente o seu compromiso de ter lista esta infraestrutura en 2030 e que hai tan só uns días, o pasado 16 de xaneiro, o Executivo volveu recoñecer en publico a importancia do seu impulso.

“A pesar dos compromisos gubernamentais de que esta conexión será unha realidade en 2030, o certo é que os trámites pendentes non o avalan”, sostén o parlamentario galego argumentando que aínda non concluíu a redacción do estudo informativo ferroviario da Saída Sur de Vigo, cuxo prazo de finalización rematou o pasado 23 de decembro “sen que un mes despois se coñeza a súa situación”.

Cómpre sinalar que, unha vez estea rematado ese estudo, deberá continuar a súa tramitación sendo sometido a información pública e a unha avaliación do seu impacto ambiental. A continuación, unha vez aprobado de forma definitiva, o proxecto construtivo terá que ser licitado, adxudicado e executado.

Tendo en conta todo isto, Celso Delgado conclúe que “o escenario máis optimista apunta a que a Saída Sur de Vigo non estará finalizada ata 2034”. Unha situación á que hai que engadir que, ademais, ten que executarse o tramo entre Porriño e a fronteira portuguesa e pecharse a negociación entre os dous países para a construción e financiación da nova ponte internacional.

De aí que, en aras de aclarar como espera o Ministerio de Transportes cumprir o anuncio oficial de ter listo o tramo español da liña de Alta Velocidade entre Vigo e Porto no ano 2030, os deputados do PPdeG no Congreso pregunten cal é a previsión de datas nas que se traballa tanto para a finalización do estudo informativo da Saída Sur de Vigo como para a licitación do proxecto construtivo e a execución e remate das obras.

Demandan do Ministerio tamén unha resposta sobre o horizonte temporal que se marca para que o tramo Vigo-O Porriño desta liña sexa unha realidade e sobre cando ten previsto o Goberno de España chegar a un acordo con Portugal para ubicar a nova ponte sobre o río Miño “tendo en conta que en xuño de 2024 se anunciou como inminente a licitación dos estudos pertinentes”.

Os concellos do PPdeG plantan cara a Sánchez ante a súa negativa a deixarlles empregar os remanentes orzamentarios: “Non temos a culpa dos desastres económicos doutras administracións”

Os concellos do Partido Popular de Galicia plantan cara a Pedro Sánchez ante a negativa do Goberno central a deixarlles dispoñer dos seus remanentes orzamentarios para poder destinalos a mellorar o financiamento dos servizos municipais: “Nós non temos a culpa dos desastres económicos que poidan existir noutras administracións nin da mala xestión doutros gobernos”.

Nestes termos se referiu esta mañá o vicepresidente primeiro da Fegamp e voceiro dos populares galegos no organismo, Ángel Moldes, á preocupación existente entre “os concellos que fixemos as cousas ben e temos un superávit que non nos permiten investir en cuestións que poden ser prioritarias para o nosa sostibilidade económica”.

Reclama neste sentido que se respecte a autonomía da Administración Local para “decidir onde gastar os cartos da veciñanza”, tanto no que se refire a incrementar os servizos públicos que se prestan desde os concellos como a sufragar os sobrecustos que poida xerar a prestación dos mesmos.

“Xa que o presidente da Fegamp fala tanto das dificultades de financiamento dos concellos, é a súa oportunidade para dar voz ao municipalismo e reclamar ao Goberno de Sánchez que nos dea autonomía para investir no que consideremos prioritario”, conclúe Moldes anunciando que o PPdeG levará aos plenos municipais esta reclamación en forma de moción.

O PPdeG insiste na súa reclamación ao Goberno central dun estudo sobre o custo económico que suporían o rescate e a gratuidade da AP-9

O Partido Popular de Galicia volve reclamar ao Goberno central a elaboración do estudo sobre o custo económico que suporían o rescate e a gratuidade da autoestrada AP-9 en cumprimento do mandato trasladado tanto polo Parlamento galego como polo Congreso dos Deputados.

Faino a través dunha pregunta que veñen de rexistrar os deputados galegos Celso Delgado, Tristana Moraleja e Pedro Puy; representantes do Grupo Popular na ponencia encargada de debater a Proposición de Lei Orgánica de transferencia da titularidade e competencias da autoestrada do Atlántico a Galicia na Cámara Baixa

No seu escrito demandan saber se o Ministerio de Transportes elaborou xa dito estudo do mesmo xeito que o ten feito o Goberno galego, o cal en xuño de 2024 encargou a unha empresa experta e independente un estudo pormenorizado do custe económico dos diferentes escenarios en torno ao futuro da autoestrada.

Os populares galegos recordan que o 25 de setembro de 2024 o Parlamento de Galicia aprobou por unanimidade unha Proposición non de lei do Grupo Popular na que se solicitaba ao Goberno de España a elaboración dun estudo serio e minucioso sobre o custo que suporía o rescate e a gratuidade da AP-9.

Anteriormente, no Pleno do Congreso celebrado o 13 de xuño de 2024 e con ocasión do debate dunha moción sobre a autopista do Atlántico, xa fora aprobado un texto transaccionado polo Partido Popular no que, na mesma liña, instaba tamén ao Goberno a encargar un estudo no que se explorasen as vías xurídicas para a anulación da prórroga e a avaliación dos custos económicos que tería para o Estado a asunción da xestión directa da AP-9.

Ante a falta de avances neste sentido, o deputado Celso Delgado afeou ao propio ministro Óscar Puente na súa comparecencia no Congreso o 16 de outubro de 2024 que non cumprise o mandato do Congreso para realizar o citado estudo e contrapuxo a actitude do Goberno central coa do Goberno galego, quen por esas datas xa fixera publicas as conclusións do estudo que encargara.

UN NOVO ESCENARIO ECONÓMICO

Cómpre recordar que as bonificacións aprobadas polo Goberno central para os usuarios desta autoestrada implican un cambio substancial no escenario no que se enmarcaba o debate sobre os custos da súa transferencia e recate, que conlevaría tamén a gratuidade do viario.

Coas novas cifras, o custo da indemnización por rescate aplicando unha taxa de desconto (2.331 M€) e o custo das bonificacións ata final de concesión, aseméllanse de xeito considerable. De aí que desde o PPdeG inviten ao Ministerio a reflexionar acerca da oportunidade de levar a cabo o rescate da concesión.

O PPdeG traslada ao colectivo de galegos en Panamá as políticas de retorno que contribúen a que “Galicia funcione máis alá das súas fronteiras”

O PPdeG traslada ao colectivo de galegos e galegas residentes en Panamá, así como a toda a diáspora distribuída por Centroamérica e outras rexións, as políticas de retorno que a Xunta pon á súa disposición e que contribúen a que “Galicia funcione máis alá das súas fronteiras”.

Así o fixeron esta semana a secretaria xeral do PPdeG, Paula Prado, e o secretario executivo do PP no Exterior, Antonio Rodríguez Miranda, na reunión que mantiveron coa representante do Partido Popular en Panamá, Mariela Estévez, e na que abordaron a situación actual e os desafíos que afrontan os máis de 4.000 galegos e galegas residentes neste país.

Entre as cuestións que se trataron destacou o compromiso de seguir mantendo o contacto coa colectividade galega residente neste país, co obxectivo de reforzar os vínculos das novas xeracións e seguir traballando, tanto coas persoas como coas entidades, para ofrecer respostas axeitadas ás súas necesidades e inquedanzas.

Tamén falaron da necesidade de continuar afondando en políticas de retorno que, como as que o Goberno galego leva anos aplicando, faciliten a empregabilidade e ofrezan mellores oportunidades de vida a todos aqueles que decidan regresar a Galicia.

Así mesmo, apuntaron á necesidade dunha maior implicación do Goberno central nesta tarefa. Por exemplo, axilizando os trámites de homologación dos títulos académicos ou reducindo a burocracia para así remover obstáculos e facilitar a integración dos retornados.

O PPdeG reitera o seu apoio á creación de riqueza e emprego fronte a un independentismo galego “enrocado no ‘non’ a calquera proxecto industrial”

O PPdeG asegura que o emprego ben pagado é necesario en Galicia e por iso, fronte a un independentismo galego “enrocado no ‘non’ a calquera proxecto industrial”, reitera o seu apoio a todas aquelas iniciativas que cumprindo a normativa poidan achegar riqueza e crear oportunidades no territorio.

Así o manifestou esta maña a secretaria xeral do partido, Paula Prado, nunha rolda de prensa na que apuntou a que o próximo 18 de febreiro “vaise cumprir un ano do cambio de opinión do BNG respecto ao proxecto de Altri e, polo tanto, un ano do inicio da súa vinganza política”.

Só desde a “vinganza” e o “resentimento” pola súa derrota electoral, segundo a número dous dos populares galegos, se pode entender o rexeitamento dos independentistas galegos e os seus satélites a un proxecto que “está sendo analizado minuciosamente polos técnicos da Xunta e en ningún momento sairá adiante se non cumpre coa normativa medioambiental”.

“Non lles preocupan nin os galegos nin o emprego, só as súas ideoloxías”, concluíu citando a carta de tres alcaldes –os de Melide, Arzúa e Santiso– que “non queren un futuro mellor para os seus veciños” e “incitan á prevaricación” ao pedir que os trámites para a instalación “non sigan adiante e nin sequera se analicen”.

Unha actitude que Prado afeou asegurando que ela “nunca lle pediría a un alcalde do PP que prevaricase nin solicitaría unha reunión co presidente da Xunta para falar unicamente de conxecturas”. En cambio, si lle pediría aos seus alcaldes “que sexan sensatos, acheguen riqueza aos seus municipios e non perdan oportunidades”.

A POLÍTICA QUE SERVE FRONTE Á QUE OBSTACULIZA

A secretaria xeral do PPdeG afirmou que “España debería parecerse máis a Galicia e ao seu modelo de política útil e centrada nos problemas reais da xente”. Unha “política que serve”, explicou e que se reflexa na Declaración de Asturias asinada polos presidentes autonómicos do PP a pasada fin de semana.

“Mentres o Goberno central segue impulsando un recorte democrático e pensando unicamente en salvarse da súa maraña de corrupción, no PP falamos do que lle importa á xente: de vivenda, de menos burocracia, de financiamento autonómico e de gañar competitividade para gañar en crecemento e en salarios”.

Unha política que contrasta coa “política que obstaculiza” dun Goberno central “centrado unicamente en salvarse da súa maraña de corrupción” e dun socialismo galego “enfrontado en combates e en debates sobre o liderado dun Gómez Besteiro que segue sen estar moi cómodo en Galicia e marcou todos os récord negativos no que se refire a resultados electorais”.

Segundo a número dous dos populares galegos, esta confrontación faise extensiva tamén aos alcaldes das cidades máis poboadas no que se refire á AP-9: “Se Abel Caballero fai unha fronte con Pontevedra para pedir a gratuidade que el mesmo sabe que é ficticia no que se refire á vontade de Pedro Sánchez, a súa homóloga Inés Rey directamente di que non quere saber nada de frontes comúns”.

Mentres tanto, concluíu, os únicos prexudicados son os galegos e as galegas, que “seguen pagando as peaxes máis caras do Estado e agardando pola gratuidade que o PSOE prometeu durante a campaña electoral”. Por iso o PPdeG seguirá insistindo tanto na transferencia como na gratuidade dunha autoestrada vital para Galicia.

FALECEMENTO DE XESÚS PÉREZ VARELA

Paula Prado tamén quixo trasladar o pésame en nome do seu partido á familia e seres queridos de Xesús Pérez Varela, quen fora conselleiro de Cultura durante unha década do mandato de Manuel Fraga e que faleceu esta mañá.

“Lembrámolo como unha persoa clave para Galicia nun momento clave de apertura ao mundo da nosa Comunidade a través do Xacobeo, a Cidade da Cultura ou a Corporación Radio e Televisión de Galicia”, explicou ao tempo que poñía en valor o legado do finado.

O PPdeG pregunta ao Goberno central sobre as súas intencións de substituír os trens do Eixo Atlántico por uns con menos prazas e máis lentos

 

O Partido Popular de Galicia pregunta ao Goberno central sobre as súas intencións de substituír os trens do Eixo Atlántico por outros de menor número de prazas e cunha velocidade máis limitada e demanda que, no seu lugar, mellore as condicións de prestación dos servizos nesta liña ferroviaria.

A través dunha pregunta parlamentaria que os deputados do partido no Congreso veñen de rexistrar e da que desexan obter resposta por escrito, os populares galegos fanse eco así das consecuencias que tería un acordo entre Renfe e a Generalitat de Cataluña e que se traduciría no futuro traslado a Cataluña de seis trens que actualmente operan no Eixo Atlántico e a súa substitución por “un número indeterminado de trens máis antigos e de menor capacidade”.

No escrito explícase que o modelo de trens que serían trasladados conta con 282 prazas, fronte ás 256 e as 185 dos convois cos que o Goberno pretende cubrilos. Unha redución significativa da capacidade total á que se une o feito de que a velocidade máxima destes novos trens tamén será inferior, xa que en lugar dos 250 km/h que chegan a alcanzar os actuais, os novos estarán limitados a 200 km/h.

“Nada temos que obxectar a que se mellore o material móbil que opera en toda España e por suposto en Cataluña, pero desde logo parécenos inaceptable que para iso se vexa prexudicada unha das liñas ferroviarias con maior demanda como é a do Eixo Atlántico”, argumenta o deputado galego e vicepresidente segundo da Comisión de Transportes e Mobilidade Sostible do Congreso, Celso Delgado.

Neste sentido recordan que os servizos de media distancia A Coruña-Santiago-Vigo están entre os cinco máis importantes de España en termos de viaxeiros e prazas ofertadas e que “o que necesita este corredor ferroviario son máis prazas, máis frecuencias, mellor puntualidade e menos incidencias, non peores condiciones do material móbil”.

Así, os populares piden información sobre “a verdadeira situación e os plans de futuro” do Goberno central, ao tempo que lembran que a Xunta leva meses demandando un interlocutor con Renfe para tratar os asuntos ferroviarios que afectan á Comunidade, sen pronunciamento polo momento desde a outra parte.

O PPdeG acusa a BNG e PSOE de “estar no lado incorrecto da Historia” e de “dar as costas aos que queren un futuro mellor para Venezuela”

 

O Partido Popular de Galicia reivindica a súa posición “no lado correcto da Historia” ao defender a liberdade e a democracia fronte á ditadura de Nicolás Maduro e ao situarse ao carón dos que queren un futuro mellor para Venezuela mentres os partidos da oposición, BNG e PSOE, “fixeron todo o contrario e seguen sen rectificar”.

Así o manifestou a secretaria xeral dos populares galegos, Paula Prado, na reunión da Comisión de Acción Exterior do partido que, baixo a coordinación de Rubén del Río, tivo lugar esta tarde na sede autonómica e na que lamentou que o BNG e Ana Pontón “xa gardaron no caixón a careta de moderados ata o próximo ciclo electoral”.

“Os galegos e as galegas deixaron de ser os seus aliados, e volveron as súas amizades naturais, como Maduro ou Putin”, afirmou apuntando con ironía á ausencia de Pontón na investidura do ditador venezolano que tivo lugar o pasado venres e que desde o PPdeG consideran “un paripé”.

Nesta mesma liña, Prado recordou a “alianza natural” do BNG con Bildu e a presenza de representantes do nacionalismo galego na manifestación de apoio aos presos de ETA celebrada esta fin de semana no País Vasco.

“Vendo o que fan os seus aliados cando chegan ao poder, dentro e fóra de España, agardamos que aquí os galegos sigan manténdoos durante moito tempo na oposición”, concluíu facendo extensiva esta mensaxe a un socialismo que “non sabe nin o que di”.

AS POLÍTICAS DE RETORNO DO GOBERNO GALEGO FUNCIONAN

Na súa intervención, o responsable de Emprego, Comercio e Emigración do Goberno autonómico, José González, puxo en valor que Galicia é unha terra de oportunidades que aposta pola integración das persoas migrantes e especialmente dos galegos da diáspora. E faino facilitando a súa inserción laboral dun modo regular e ordenado, da man das empresas e en base á súa capacitación para un emprego de calidade que, ao mesmo tempo, permita cubrir as vacantes existentes no mercado laboral.

Neste marco, puxo en valor a Estratexia Galicia Retorna, un paquete de medidas que converten a Galicia nunha comunidade pioneira en España nas políticas de retorno e cuxo obxectivo é ofrecer oportunidades reais de retorno aos galegos do exterior a través do traballo por conta allea ou do emprendemento.

José González engadiu que unha das ferramentas clave é o programa Retorna Cualifica Emprego, do que está en marcha a segunda edición, dotada cun orzamento de 2,3 millóns de euros co obxectivo de beneficiar uns 200 residentes no exterior deica finais de 2025 e que nesta convocatoria incorpora novos apoios para que poidan acceder de xeito máis doado a unha vivenda. Así mesmo, anunciou que están previstas accións en orixe, como as feiras de emprego que comezarán este ano na Arxentina e no Uruguai.

González enmarcou estas medidas no plan de captación de talento que está a desenvolver a Xunta cunha dotación para este ano superior aos 11 M€ para atender as necesidades do tecido produtivo, complementando a potenciación da forza laboral interna coa necesaria atracción de traballadores do exterior, seguindo así a liña trazada pola Unión Europea para afrontar a escaseza de man de obra.

O titular de Emprego fixo fincapé, asemade, no recoñecemento e compromiso da Xunta coa diáspora e na aposta decidida por seguir fortalecendo os lazos cos galegos e galegas que están lonxe da súa terra, apoiando o labor das entidades e asociacións do exterior e garantindo a atención e o mantemento das ligazóns que nos unen.

COLABORACIÓN INTERADMINISTRATIVA COMO CLAVE DO ÉXITO

Pola súa banda, o secretario executivo do PP no Exterior, Antonio Rodríguez Miranda reclamou un maior compromiso por parte do Goberno central para garantir a continuidade e o reforzo das políticas de retorno que están a demostrar a súa eficacia en Galicia.

“As políticas de retorno impulsadas pola Xunta están a funcionar, con miles de galegos que atopan novas oportunidades na súa terra. Pero para que estas iniciativas sexan sostibles no tempo, é imprescindible que o Estado asuma a súa parte de responsabilidade, ofrecendo o apoio financeiro necesario para quen leva anos traballando no desenvolvemento destas medidas”, afirmou.

Tamén insistiu na urxencia de que o Goberno central axilice os trámites de homologación de títulos, un dos maiores obstáculos para a integración dos retornados: “Os galegos que regresan traen consigo talento e coñecemento que non podemos permitirnos desaproveitar. Por iso, esiximos que se poñan en marcha medidas concretas para simplificar este proceso e reducir os prazos. O éxito das políticas de retorno depende, en gran medida, de que as administracións sexan áxiles e efectivas na resolución destes retos”.

Miranda ademais amosouse crítico cos recentes anuncios estatais sobre o retorno, agardando que “non queden nun brinde ao sol e se convertan nunha realidade” e reclamando que se faga da man das comunidades autónomas para evitar que ocorra como co anterior Plan de Retorno do Estado, que nunca se converteu en realidade e quedou en papel mollado.

O secretario executivo do PP no Exterior concluíu facendo un chamamento á colaboración interadministrativa, sinalando que Galicia “xa amosou a súa colaboración e púxose a traballar no retorno, agora necesitamos que o faga o Estado porque son as súas competencias.”

O PPdeG traslada ao Congreso dos Deputados a solicitude de transferencia das competencias de meteoroloxía a Galicia

 

O PPdeG traslada ao Congreso dos Deputados a solicitude de transferencia das competencias en materia de meteoroloxía concretas para unha máis precisa xestión das alertas derivadas dos avisos meteorolóxicos en Galicia co fin de contar cun sistema meteorolóxico “con capacidades de alta precisión e adaptado ás características particulares da Comunidade”.

Logo de que o pasado mes de decembro o Parlamento de Galicia aprobase esta demanda e á espera de que o Goberno central faga efectivo o traspaso desta competencia, os deputados galegos na Cámara Baixa veñen de rexistrar unha proposición non de lei coa que afondan na importancia desta demanda “para garantir a seguridade e a resiliencia da poboación galega e os seus sectores produtivos”.

No texto da iniciativa explican que, aparte de existir precedentes de comunidades autónomas que xa teñen avanzado no seu autogoberno no relativo ás competencias sobre meteoroloxía e emerxencias, como é o caso do País Vasco e Cataluña, Galicia conta ademais con “rasgos xeográficos e climáticos particulares” polo que é preciso contar cunha rede de medición de parámetros meteorolóxicos máis completa e precisa no territorio.

Fan referencia así á súa extensión costeira, ao seu clima proclive a precipitacións intensas e ventos de alta velocidade, á influencia das mareas en núcleos poboacionais e industriais, e a como a combinación de todos estes factores afecta de xeito particular ás numerosas áreas rurais espalladas por todo o territorio.

“A especificidade climática de Galicia demanda un sistema meteorolóxico con capacidades de alta precisión e adaptado ás súas características particulares”, argumentan sinalando que a creación do organismo autonómico Meteogalicia derivou precisamente da “insuficiencia” da Axencia Estatal de Meteoroloxía (Aemet) para responder a estas necesidades específicas.

Desde a súa posta en funcionamento, destacan, MeteoGalicia consolidouse como “un referente na observación e predición climática” que conta cunha rede de radares avanzados e precisos cubrindo todo o territorio –en total, 160 estacións meteorolóxicas fronte ás 52 da Aemet– e que, grazas á súa proximidade e ao seu coñecemento do terreo, proporciona avisos máis axustados ás realidades locais e que melloran así as alertas temperás para a prevención dos riscos.

“A pesar da súa demostrada eficacia, Meteogalicia desprega de maneira limitada a súa capacidade por unha supeditación ao sistema estatal. Algo que restrinxe a súa capacidade para desenvolver todo o seu potencial”, conclúe a iniciativa dos populares e polo cal instan ao Goberno central a adoptar as seguintes medidas:

Reforzar e mellorar a colaboración xa existente coa Xunta de Galicia para que MeteoGalicia ostente competencias suficientes que permitan equiparar os efectos xurídicos dos avisos meteorolóxicos propios cos da Aemet, respectando e compartindo as competencias do Goberno central nesta materia en todo o territorio do Estado.
Garantir un incremento do investimento na rede de observación e predición meteorolóxica autonómica, con especial énfase na mellora de infraestruturas como radares, estacións meteorolóxicas e sistemas de modelización climática.
Transferir á Comunidade Autónoma de Galicia os recursos persoais e materiais precisos, en virtude da delimitación das competencias estatais e autonómicas, no marco dunha política de xestión de riscos climáticos adaptada á realidade territorial e climatolóxica galega.

 

O PPdeG pon en valor as políticas que permiten que Galicia siga medrando e trazando un futuro próspero, innovador e con máis emprego

 

O Partido Popular de Galicia pon en valor a estabilidade e a boa xestión do Goberno galego no que se refire ás súas políticas de emprego, permitindo que a nosa Comunidade siga medrando e trazando un futuro próspero, innovador e con cada vez máis postos de traballo.

En declaracións aos medios esta mañá, a secretaria xeral dos populares galegos asegurou que “a Galicia que funciona exemplifícase con datos” e, neste sentido, apuntou que a nosa Comunidade foi a que rexistrou un maior crecemento do PIB per cápita nos últimos 15 anos e que o pasado ano se pechou coa cifra de paro máis baixa nun mes de decembro de toda a serie histórica.

“Así é como facemos país, creando emprego e sendo un polo de atracción para novos inversores”, concluíu Paula Prado no marco da reunión da Comisión de Emprego do PPdeG celebrada na Bodega Viña Costeira de Ribadavia e que encabezou acompañada polo responsable de Emprego no Goberno galego, José González, e o coordinador desta área no partido, Pablo Fernández.

A número dous do PPdeG salientou así mesmo que a provincia de Ourense é tamén un exemplo neste sentido, xa que o descenso do paro mensual na provincia foi o segundo máis pronunciado de todas as provincias españolas e, na última década, o paro descendeu en Ourense case nun 50%.

Algo que, na súa opinión, non é casualidade, senón que é froito da estabilidade que aportan os gobernos do Partido Popular – tanto na Xunta, como na Deputación ou en concellos como Ribadavia – e que contrasta coa inestabilidade dos “pactos de pelexas” entre PSOE e BNG.

AVANCE NA TRAMITACIÓN DA NOVA LEI DE COOPERATIVAS

Pola súa banda, o responsable de Emprego do Goberno galego, José González, avanzou que este ano se cumprirá o compromiso electoral de rematar a tramitación da nova Lei de cooperativas de Galicia. Unha norma adaptada á realidade actual e futura da nosa Comunidade e que ten como obxectivo a axilización da creación de novas entidades e a consolidación das xa existentes dándolle pulo ao Rexistro autonómico de cooperativas.

Engadiu que o compromiso da Xunta coa economía social se plasma no orzamento destinado a este eido en 2025, que ascende a 44,8 millóns de euros (case un 2,8% máis que o ano pasado).

O titular de Emprego enmarcou as accións a prol da consolidación deste ecosistema na segunda Estratexia da economía social, unha planificación con horizonte 2027 coa que se aspira a xerar 4.000 empregos e a crear 400 entidades, posicionándose nos sectores tecnolóxico, verde e industrial.

No campo específico do cooperativismo, recordou que o último Consello da Xunta de 2024 avaliou tanto o programa Aprol Economía Social —para fomentar o emprego e a mellora da competitividade nas cooperativas e sociedades laborais— como a convocatoria única do certame Cooperativismo no ensino e dos Premios á cooperación, neste último caso co fin de avanzar na difusión dos valores deste modelo empresarial solidario e pegado ao territorio.

As cifras, salientou, avalan o apoio autonómico ao cooperativismo, cun aumento dunhas 500 entidades desde 2020 ata chegar agora a preto de 2.000 cooperativas activas en toda Galicia (case 250 na provincia en Ourense) entre as que o sector agrario —dixo— é un claro referente. No marco da súa contribución á creación de actividade económica e emprego, destacou que a provincia ourensá pechou decembro con cifras históricas de paro, con bos datos tanto de emprendemento como de recorte nas listas de desemprego.

AS COOPERATIVAS CONSTRÚEN UN MUNDO MELLOR

O alcalde de Ribadavia, César González, quixo agradecer ao partido que escollera o seu concello para celebrar esta reunión que tivo por obxectivo analizar e realizar propostas no marco do Ano Internacional das Cooperativas declarado este 2025 pola ONU baixo o lema “As cooperativas constrúen un mundo mellor”.

Neste sentido quixo poñer en valor á Bodega Viña Costeira como “unha institución senlleira do cooperativismo galego” que, grazas ao seu vínculo co territorio e a súa aposta pola comarca do Ribeiro, exemplifica “os bos resultados que se acadan coa combinación da nosa xente e a nosa terra”.

O PPdeG márcase como propósito do novo ano “seguir traballando pola Galicia que funciona e facer realidade os compromisos adquiridos”

 

O PPdeG márcase como propósito para este novo ano e logo do apoio maioritario recibido polos galegos e galegas no 2024 “seguir traballando por cumprir a palabra dada, facendo realidade os compromisos adquiridos e blindando a Galicia que funciona co presidente Alfonso Rueda á fronte”.

Así o manifestou esta mañá a secretaria xeral do partido, Paula Prado, nunha rolda de prensa na que reivindicou que “grazas á normalidade excepcional da que desfruta Galicia, o ano iníciase cuns Orzamentos aprobados e en vigor desde o 1 de xaneiro”.

“Iso é o que permite seguir ofrecendo solucións aos problemas reais dos galegos e galegas en cuestións fundamentais como a conciliación, a igualdade, a educación, a vivenda, a sanidade ou a loita contra a violencia de xénero”, explicou ao tempo que contrapoñía esta situación coa prórroga –por segundo ano consecutivo– dos Presupostos Xerais do Estado do 2023.

Tildando de “parálise” o balance da xestión de Pedro Sánchez, ao que afeou o cerco de corrupción ao seu redor, a número dous dos populares galegos prognosticou un 2025 no que todo apunta que continuarán os agravios constantes do Goberno central coa nosa Comunidade.

“Este debería ser o ano no que, por exemplo, se puxera fin aos problemas ferroviarios ou se fixeran afectivos os traspasos de diferentes competencias. En cambio, empezamos o 2025 con máis problemas ferroviarios, cunha nova subida nas peaxes da AP-9 e a AP-53 e novamente cun bloqueo por parte do PSOE –coa complicidade do BNG– ao traspaso da principal autoestrada de Galicia”, apuntou.

Este agravio é o que levará ao PPdeG a, neste novo ano, continuar “reivindicando a dignidade de Galicia fronte a un socialismo galego que antepón sempre a Sánchez fronte aos intereses dos galegos e fronte a un partido independentista como o BNG, que, como xa fixera cos seus bulos sobre os pélets, segue dedicándose a asustar á xente e prexudicando aos sectores que din defender”.

“Se fixeramos caso ao falso alarmismo dos nacionalistas galegos, hoxe non circularíamos por unha AP-9 que anos atrás definían como ‘navallada a Galicia’, nin contaríamos con empresas tan importantes como Alcoa ou Ence”, concluíu subliñando a compatibilidade entre industria e respecto ao medio ambiente.

A ESQUERDA E VENEZUELA

Paula Prado anunciou que esta tarde tanto ela mesma como unha ampla representación do partido participarán nas mobilizacións que terán lugar nas cidades galegas en defensa da liberdade e da democracia en Venezuela: “O pobo venezolano encherá de esperanza as rúas do mesmo xeito que encheu as urnas de votos pola liberdade e contra a tiranía”.

“Os demócratas temos que seguir ao seu carón e facelo con convicción”, remarcou lamentando que o PSOE galego siga sen esixir a Sánchez que dea a voz de alarma e apelando á necesidade de que “España defenda desde o Goberno do Estado a democracia e a liberdade”.

Do mesmo xeito, criticou con dureza o comunicado asinado esta semana polo BNG e no que non só se fala da ditadura de Maduro como “un modelo político e social”, senón que se fai un chamamento a “solidarizarse coa Revolución Bolivariana”.

Tanto a socialistas como aos nacionalistas invitounos a sumarse ao apoio e a solidariedade amosadas hoxe polo PPdeG coa familia de Carlos Correa, o activista de orixe galego detido en Venezuela nos últimos días. Neste sentido, Paula Prado, pediu abertamente ao Goberno de España que traballe pola súa liberación.