Categoría: PP de Galicia

O presidente do Partido Popular de Galicia, Alfonso Rueda, fixo hoxe balance do traballo feito ao longo deste último curso político “sen caer no inconformismo e co obxectivo de seguir mellorando” e marcoulles un obxectivo claro aos seus de cara á volta do verán: “Se queremos a mellor Galicia da nosa historia, temos que acadar os mellores resultados da nosa historia”.

“Traballaremos polo mellor resultado da historia nas próximas eleccións municipais, autonómicas e xerais”, asegurou coa mirada posta no próximo curso político e incidindo en que as tarefas que o partido ten por diante nestes momentos son “defender o feito, mellorar o que se está facendo e preparar o que queda por facer”.

Aproveitando a presenza do secretario xeral do Partido Popular, Miguel Tellado, na Xunta Directiva celebrada hoxe en Santiago, o presidente asegurou que cada día queda máis constatado que o PPdeG segue inspirando a Alberto Núñez Feijóo e que “mellor irá canto máis xente saiba como se fan a cousas en Galicia”.

O líder dos populares galegos amosouse especialmente orgulloso ante o feito de que “Galicia funciona” grazas a contar con “un Goberno que cumpre, un partido que traballa e un proxecto que serve”. Aí radica, na súa opinión, gran parte do éxito electoral do seu partido e aí se atopan tamén as razóns de que, despois de tanto tempo, o PPdeG siga contando coa confianza dos galegos e galegas.

“Facemos exactamente o que a xente votou”, resumiu o presidente incidindo na importancia de pedir a confianza da xente con propostas “realizables” e logo “cumprir a palabra dada”. Trátase de algo que “debería ser o normal pero na España de hoxe resulta extraordinario” e que resulta especialmente “marciano” se se compara co Goberno de Sánchez.

Nesta liña reivindicou que “fronte ás chantaxes, a crispación e os egos, en Galicia prevalecen o interese xeral, o sentidiño e a tarefa colectiva de seguir dando motivos á cidadanía para que confíe nos seus gobernantes”. Confianza que se gaña, engadiu, cando un gobernante pode facer balance de promesas cumpridas “sen ruído, sen postureo con eficacia”.

Fixo así un breve balance no que mencionou medidas como a gratuidade da primeira matrícula universitaria, a axilización do proceso de recoñecemento da dependencia, o incremento de prestacións na sanidade pública ou os avances no obxectivo de duplicar o parque público de vivenda.

“Somos a Galicia do ‘si’ a intentar poñer remedio aos problemas sen escusas, do ‘si’ a crer en nós mesmos e nas nosas posibilidades e do ‘si’ ao aproveitamento de todas as oportunidades”, concluíu facendo unha contraposición coa oposición do ‘non’ e nomeadamente un BNG e un PSOE que “queren unha Galicia pechada en si mesma e aos que lles sobra todo menos a súa soberbia”.

Por iso quixo rematar a súa intervención facendo un chamamento ao traballo: “Se hai que competir con alguén non é cunha oposición que non está á altura, senón con nós mesmos e co obxectivo de seguir mellorando”.

A ACTUALIDADE QUE DEMOSTRA QUE GALICIA FUNCIONA

A Xunta Directiva celebrada hoxe coincidiu con dúas noticias que confirman que Galicia funciona e que son por unha banda o respaldo da xustiza europea á tramitación eólica levada a cabo polo Goberno galego e, por outra, a aprobación esta mesma mañá do teito de gasto dos Orzamentos autonómicos de 2026.

“Hoxe e todos os días temos que demostrar con orgullo que Galicia funciona, que Galicia goberna e que o goberno de Galicia funciona”, asegurou ao respecto do avance na tramitación da contas públicas do próximo ano.

No que se refire ao fallo do Tribunal de Xustiza da Unión Europea, o presidente do PPdeG asegurou que é “a demostración do que xa se sabía e do que todos deben saber” e que non é outra cousa que o feito de que “os técnicos da Xunta son uns profesionais que traballan con rigor, obxectividade e sen outra motivación que o imperio da lei”. Un fallo, que, en definitiva, supón “un recoñecemento para aqueles que son inxustamente difamados e nunca xustamente recoñecidos polo seu labor”.

A secretaria xeral do PPdeG, Paula Prado, celebra que, coa investidura de Belén Cachafeiro como nova alcaldesa de Forcarei, o número de concellos nos que goberna o partido xa supera a metade dos de toda Galicia e que isto supoña ademais a súa consolidación como a formación política con máis mulleres alcaldesas en Galicia, cunha cifra que ascende desde hoxe ás 31.

Esta mañá número dous dos populares galegos estivo presente na sesión plenaria celebrada no Concello de Forcarei para investir a quen xa fora rexedora deste municipio entre 2012 e 2019. Aproveitou para desexarlle moitos éxitos e acertos nesta nova etapa e reivindicou o acto de hoxe como “de xustiza”.

“O PP gañou as eleccións municipais en Forcarei con máis dun 48% de apoio, pero, a pesar de perder e coma sempre, PSOE e BNG decidiron unirse para que nós non gobernaramos”, sinalou incidindo en que “agora chegou o momento de comezar a atender aos veciños logo de seis anos de parálise”.

O PPdeG pon en valor o esforzo económico realizado tanto polos seus alcaldes como pola Xunta de Galicia á hora de poñer a disposición das familias galegas medidas que favorezan a conciliación e especialmente logo de que o Goberno central recortase o financiamento estatal neste eido.

Así o explicou esta mañá a secretaria xeral dos populares galegos, Paula Prado, nunha visita ao campamento de verán impulsado polo Concello de Coristanco grazas a unha axuda de 50.000 euros do Goberno galego. Unha visita na que estivo acompañada polo alcalde Juan Carlos García Pose ademais do vicesecretario de Organización do Partido Popular da provincia da Coruña, Gonzalo Trenor, e o deputado autonómico Rubén Lorenzo.

“Se este campamento e tantas outras actividades que se realizan ao abeiro do Plan Corresponsables son posibles, é grazas ao esforzo económico unicamente dos concellos e do Goberno galego”, sinalou denunciando que o Goberno de Sánchez decidiu este ano recortar nun 25% a súa aportación a este plan. Un recorte que, no caso de Galicia, implicou deixar de percibir 2,3 millóns de euros que tiveron que ser asumidos pola Administración autonómica con fondos propios.

Por sorte, engadiu, as familias galegas “poderán seguir contando co apoio da Xunta á hora de conciliar, xa sexa a través dos campamentos de verán ou doutras medidas que fan de Galicia unha Comunidade pioneira neste eido”.

“Lamentablemente, o Goberno de Sánchez segue máis ocupado nos seus propios problemas que en cuestións como a conciliación”, concluíu ao respecto asegurando acto seguido que “Pedro Sánchez só concilia con Ábalos, Santos Cerdán ou o Fiscal Xeral do Estado, ao que un día máis segue sen cesar”. Neste sentido, cualificou de “inaudita” a situación actual de García Ortiz e insistiu en que “ten que marchar xa”.

O CONCELLO QUE MÁIS INVISTE POR HABITANTE DA COMARCA

Paula Prado enmarcou a realización deste campamento de verán no obxectivo que perseguen tanto o alcalde de Coristanco como o resto de rexedores do PPdeG: “Apostar polas persoas, polo seu benestar e pola mellora da súa calidade de vida”.

Non en balde, reivindicou que Coristanco destaca por ser o concello que máis inviste por habitante de toda a comarca de Bergantiños: “Un nivel de investimento que, a pesar de tratarse dun concello rural, o sitúa á altura de grandes cidades”.

O propio alcalde quixo poñer en valor o “intenso” traballo que se leva feito desde o Concello ao longo dos últimos anos e por iso quixo aproveitar esta visita para “dar conta de todo o traballo feito, acreditar os resultados e compartir os desafíos que quedan por diante de cara ao futuro”.

O Grupo do Partido Popular de Galicia na Federación Galega de Municipios e Provincias (Fegamp), a través do seu portavoz e vicepresidente primeiro, Ángel Moldes, trasladará na próxima reunión da Comisión Executiva da entidade a proposta de elaborar un protocolo de protección para as traballadoras do Servizo de Axuda no Fogar (SAF).

Esta iniciativa ten como finalidade establecer criterios comúns e estratexias de actuación ante situacións que poidan xurdir no exercicio da súa actividade laboral, garantindo así unhas condicións de traballo dignas e seguras para un colectivo esencial.

Tendo en conta que o SAF é un dos servizos máis demandados no ámbito da atención á dependencia en Galicia e que se presta en toda a comunidade a través dos concellos, Moldes defenderá a necesidade de impulsar un documento que funcione como guía e modelo para todos os municipios galegos.

“O noso obxectivo é dobre: asegurar unha atención de calidade ás persoas en situación de dependencia e, ao mesmo tempo, protexer e mellorar as condicións das traballadoras que desenvolven unha labor fundamental na nosa sociedade”, subliñou Moldes.

A secretaria xeral do Partido Popular de Galicia, Paula Prado, deixou hoxe en evidencia a incapacidade de Pedro Sánchez á hora de conseguir sacar adiante os Presupostos Xerais do Estado contrapoñéndoa coa eficacia e a xestión de gobernos do PP que, tanto na Xunta como en moitos concellos, si son quen de aprobar e executar ano a ano as súas contas.

“Viveiro aprobou a semana pasada os seus Orzamentos, sen ningún voto en contra, e Galicia xa ten en marcha os Orzamentos de 2026, que se todo vai ben entrarán en vigor por décimo sétimo ano consecutivo en tempo e forma”, explicou incidindo en que “algo que debería ser o normal estase convertendo en excepcional nun bo número de administracións encabezadas por PSOE e BNG”.

Paula Prado fixo estas declaracións esta mañá durante a visita que realizou a Viveiro xunto á presidenta provincial do PP de Lugo, Elena Candia, a deputada nacional Cristina Abades, o senador José Manuel Balseiro, deputados autonómicos e concelleiros populares, que foron recibidos pola alcaldesa Mariña Gueimunde. Sobre esta última precisamente destacou que é unha das 30 alcaldesas que fan do PPdeG o partido con máis mulleres rexedoras de Galicia.

“Nos cinco meses que vai cumprir sendo alcaldesa xa se converteu nunha referente da Mariña lucense”, engadiu ao tempo que enxalzaba a Gueimunde como “unha muller valente, con ganas de cambiar as cousas, que defende aos seus veciños e que é un gran exemplo para todas as mulleres que traballan en política”.

Para a número dous dos populares galegos, tanto a rexedora viveirense como o resto de alcaldes e alcaldesas que “tinguen de azul máis da metade dos concellos de Galicia” son a constatación de que “fronte aos pactos de perdedores de PSOE e BNG, a gran maioría dos concellos con estabilidade e xestión, sen sobresaltos nin liortas, son os liderados polo PPdeG”.

ELENA CANDIA: “NON TODOS SOMOS IGUAIS”

A presidenta provincial do PP de Lugo quixo afondar tamén nesta idea, asegurando pola súa banda que o proxecto dos populares márcase como obxectivo “liderar as institucións para traballar por todos coa templanza e a serenidade que precisan os grandes cambios co compromiso e coas ganas que representan alcaldes e alcaldesas como Mariña Gueimunde”.

Elena Candia amosouse convencida de que “a forza, a responsabilidade e o acerto constituirán a liña de traballo” da alcaldesa de Viveiro e, á súa vez, reflexan que “non todos somos iguais”. Algo que os veciños deste concello, ao igual que os do resto de concellos da provincia, saben ben da man do PSOE e do BNG.

“Hoxe reivindicamos a política de compromiso e de feitos do PPdeG fronte aos pactos en despachos e as promesas incumpridas do PSOE e fronte a un BNG centrado en todo menos en traballar para todos”, concluíu.

O CAMIÑO DO QUE VIVEIRO “NUNCA DEBEU PERDERSE”

A alcaldesa aproveitou a visita para facer un chamamento á unidade e ao traballo colectivo para “volver ao camiño do que Viveiro nunca debeu perderse” e “deixar de lado o partidismo e pensar en que neste concello hai veciños e veciñas que precisan de apoio e de investimentos”.

Referiuse así tanto á Deputación de Lugo como ao Goberno central, que, en contraposición á aposta do Goberno de Alfonso Rueda, acumulan anos de desleixo con este concello. “Necesitamos que, ao igual que temos o apoio do PPdeG e do PP de Lugo, poidamos contar co respaldo de todas as administracións para que Viveiro volva ter o que lle corresponde e merece”, concluíu neste sentido.

O Partido Popular de Galicia conmemora hoxe o Día de Galicia tras un curso político no que se despregou por completo o ‘Estilo Rueda’ de facer política na nosa Comunidade, e faino a través dun vídeo no que subliña que “a Galicia do si” é tamén a da gran maioría dos galegos e galegas.

Cun toque de humor, empregando diversos termos coa sílaba “si”, os populares galegos reivindican a Galicia en positivo como “a Galicia do futuro”, fronte a aqueles que din ‘non’ e que se opoñen calquera cousa por sistema, e explican así a idea que intentan transmitir a través desta pequena peza audiovisual: “Nós miramos cara a adiante, con orgullo, forza e identidade”.

No vídeo participa como principal protagonista o presidente Alfonso Rueda, que na contorna da Fervenza do Toxa, onde tivo lugar a conmemoración do Día de Galicia do PPdeG o pasado martes, deixa claro ante a secretaria xeral, Paula Prado, que esa fermosa paisaxe se atopa en “Si-lleda”.

Trátase, ademais, dun lugar moi especial para o líder dos populares galegos, pois moi preto de alí no mesmo concello, na Bandeira, están as súas raíces. Aproveitando un xogo de palabras, colle un estandarte galego de mans de Luis López, presidente provincial de Pontevedra, que se achegou ata a zona en bicicleta e, de paso, tamén fixo fincapé así na importancia da actividade física.

Esta é a parte final do vídeo, que dá comezo coa conversa entre dous turistas estranxeiros e o presidente provincial de Ourense, Luis Menor, que lles aclara que están ante o maxestoso río “Si-l”, nunha escena gravada no miradoiro de Moura, no municipio de Nogueira de Ramuín, na Ribeira Sacra, que segue no camiño a ser declarada Patrimonio Mundial da Unesco.

A escena serve, ademais, para deixar claro que “Galicia di ‘si’ tamén a “abrir os brazos a todo o mundo que nos queira visitar”.

O QUEIXO SAN SIMÓN E O ‘VINTESINCO’

Pola súa banda, a presidenta provincial de Lugo, Elena Candia, responde orgullosa que o produto típico de Vilalba e un dos máis coñecidos de Galicia é o queixo “San Si-món”. Faino, ademais, no interior da queixería Don Crisanto, que vén de ser galardoada hai uns días co premio ao mellor queixo de España, o que pon tamén en valor a variedade e calidade da nosa gastronomía en toda a Comunidade.

Por último, no porto de Malpica de Bergantiños, o presidente provincial da Coruña, Diego Calvo, e a deputada autonómica e percebeira Paula Mouzo Mas teñen unha curiosa conversación, na que esta non se daba conta de que é 25 de xullo, día festivo. “É verdade! Que é… vinteSinco”, dille a camariñana, con esa característica fonética tan habitual na fala da Costa da Morte dunha lingua galega que tamén é protagonista neste Día de Galicia e coa que o PPdeG está comprometido.

Así, Rueda remata recalcando que “somos a Galicia da gran maioría dos galegos e galegas; a Galicia do futuro; a Galicia do si” e, en definitiva, a Galicia do PPdeG, desexándolle un feliz día a todos os galegos e galegas.

A sede do Partido Popular de Gipuzkoa recibiu recentemente a visita da responsable de Medio Ambiente e Cambio Climático do Goberno galego e membro do Comité Executivo do PP de Galicia, Ángeles Vázquez, nun encontro que serviu para estreitar lazos entre territorios con identidades propias pero unidos por un “proxecto político común”.

A presidenta do Partido Popular de Gipuzkoa, Muriel Larrea, recibiu á responsable galega nun ambiente de proximidade e cordialidade, reivindicando a riqueza dunha España plural na que cada terra achega a súa cultura, o seu idioma e a súa maneira de entender a vida, pero onde todos comparten un mesmo compromiso: o de traballar polo ben común desde os valores do PP.

“Galicia e Euskadi teñen linguas propias, costumes diferentes e paisaxes moi distintas, pero con este encontro demostramos que cando compartes principios, visión de país e ganas de mellorar a vida das persoas, todo iso suma”, sinalou Muriel Larrea tras o encontro.

A visita valeu para subliñar o valor da política con raíces, pegada ao terreo, que respecta a diversidade e defende unha España de cidadáns libres e iguais. Ambas dirixentes coincidiron na importancia de manter vivos os lazos entre territorios que, desde a súa singularidade, constrúen xuntos un proxecto nacional forte e cohesionado.

“Somos un partido que se constrúe desde abaixo, desde cada recuncho de España, con respecto ás nosas raíces e orgullo de formar parte dunha mesma casa común”, afirmou a presidenta do PP de Gipuzkoa.

Pola súa banda, Ángeles Vázquez aproveitou para trasladar a Muriel Larrea información sobre os últimos avances en materia de costas, tendo en conta que o Goberno de España traspasou este mes a Galicia as competencias en materia de ordenación e xestión do litoral, e o País Vasco recibiunas tamén este mesmo ano, en abril.

A secretaria xeral do Partido Popular de Galicia, Paula Prado, participou hoxe nun acto organizado por Novas Xeracións en Ourense, centrado nas dificultades que a mocidade atopa á hora de obter o carné de conducir en Galicia, no que puxo en valor o traballo do Goberno galego para solucionar este problema.

Durante a súa intervención, Prado destacou “as políticas activas da Xunta de Galicia para mellorar a mobilidade e a inserción laboral da xuventude”, como as axudas económicas para obter o carné, que xa beneficiaron a 4.000 persoas novas.

“A realidade é que o carné de conducir segue a ser unha ferramenta esencial para a independencia e o acceso ao emprego”, afirmou Prado. Porén, denunciou que “o amplo número de prazas vacantes de examinadores na Dirección Xeral de Tráfico está a xerar un colapso sen precedentes: segundo as últimas informacións, hai arredor de 3.000 persoas en lista de espera na nosa Comunidade e un prazo de ata cinco meses para poder examinarse”.

Neste sentido, lembrou que é o Goberno de Sánchez o que ten as competencias de Tráfico e esixiulle que adopte todas aquelas medidas que permitan, de maneira urxente, a cobertura de prazas de examinadores de tráfico vacantes en Galicia. “Non se pode seguir permitindo que o Goberno central mire para outro lado mentres os galegos ven paralizados os seus proxectos de vida e traballo”, insistiu Prado.

De feito, o propio director xeral de Tráfico, Pere Navarro, recoñeceu onte publicamente que “non hai suficientes examinadores para asumir todas as solicitudes de persoas que queren sacarse o carné”.

“A consecuencia disto”, indicou Prado, “é que moitos mozos e mozas perden oportunidades de traballo ou de acceder a oposicións por non dispoñer do permiso nun prazo razoable”.

O CIFP PORTOVELLO DE OURENSE, PIONEIRO NA FORMACIÓN

Con todo, Paula Prado quixo destacar unha boa nova que amosa a capacidade de Galicia, e neste caso a provincia de Ourense, para ofrecer solucións: “Hai pouco saíu do CIFP Portovello de Ourense a primeira promoción de profesores de autoescola formados nun ciclo superior de Formación Profesional. Son 14 alumnos que simbolizan o compromiso de Galicia coa formación útil e de calidade”.

“Galicia, unha vez máis, vai un paso por diante na solución dun problema que afecta a toda España, cun modelo que marca o camiño a seguir”, asegurou, e apuntou que a Deputación de Ourense prestou un apoio importante a esta iniciativa de FP ao financiar as prácticas e os materiais.

Pola súa banda, a presidenta de Novas Xeracións de Galicia, Nicole Grueira, puxo en valor a “aposta decidida” do Goberno galego pola FP dual e, en particular, por un ciclo pioneiro que só existe en Galicia e que se imparte na provincia de Ourense. “Un ciclo que permite formar a mozos e mozas que queiran ser profesores de autoescola, garantindo así o relevo xeracional nun sector clave”, engadiu.

Segundo Grueira, esta iniciativa “amosa que a Xunta e o PPdeG están ao carón da xuventude, investindo en formación e no futuro de Galicia. E se se inviste en quen vai formar os futuros condutores, estase a construír unha sociedade máis sostible, máis segura e máis responsable”.

A presidente de Novas Xeracións, acompañada do deputado autonómico José Luis Ferro e do responsable da organización xuvenil na provincia, Nacho Campo, tamén anunciou que o PPdeG rexistrou no Parlamento galego unha iniciativa.

Mentres, a responsable local do PP en Ourense, Ana Méndez, subliñou a importancia estratéxica que ten a provincia no ámbito da formación viaria: “Xogou un papel clave para que esta iniciativa fose unha realidade, grazas tamén ao impulso e á aposta da Asociación de Autoescolas de Ourense”.

Méndez destacou que “Ourense será a única provincia de Galicia —e unha das poucas en todo o Estado— onde durante o mes de agosto non haberá listas de agarda para os exames de conducir. Todos os alumnos que queiran examinarse poderán facelo sen atrasos nin limitacións”.

“ESPAÑA PRECISA QUE FEIJÓO COLLA O VOLANTE”

Finalmente, en clave nacional, a secretaria xeral do PP de Galicia lembrou que hoxe se cumpren dous anos desde que o Partido Popular, con Alberto Núñez Feijóo á fronte, gañou as eleccións xerais de 2023. “Por desgraza, continuamos cun Goberno de España liderado por Pedro Sánchez, que segue instalado na mentira, sometido ás chantaxes constantes dos seus socios independentistas e incapaz de gobernar para o conxunto dos españois”, asegurou.

Prado denunciou que estes dous anos foron “unha sucesión de cesións políticas, privilexios territoriais e escándalos de corrupción que deixan a España paralizada e sen rumbo”. E agregou: “Sánchez só pensa en aguantar un minuto máis na Moncloa, aínda que iso supoña vender a unidade e a igualdade dos cidadáns”.

Neste momento da lexislatura, a dirixente popular apelou á necesidade dun cambio de rumbo urxente: “España non pode seguir así. Hai que cambiar de condutor, e ese condutor non pode ser outro que Alberto Núñez Feijóo”.

O presidente do PPdeG, Alfonso Rueda, reivindicou hoxe “a Galicia do si”, representada polo Partido Popular, como unha terra de futuro que di “si” ao talento, ás oportunidades e á calidade e que aposta pola ilusión, o crecemento, a convivencia e a liberdade.

Rueda encabezou o acto ‘A Galicia do si’, co que o partido conmemorou esta tarde o Día de Galicia na Fervenza do Toxa e no que participaron tamén a secretaria xeral, Paula Prado, o presidente provincial do PP de Pontevedra, Luis López, deputados, senadores e outros representantes do partido, entre eles o portavoz do PP local, Ignacio Maril. Todos eles fixeron unha pequena andaina ata o miradoiro da fervenza, onde tivo lugar a foto de familia e soou o himno de Galicia.

A celebración tivo lugar en Silleda, un concello que precisamente leva no seu nome o “Si” como símbolo perfecto da Galicia que o PPdeG construír. De feito, dixo o presidente, a Galicia que defenden os populares galegos é a do traballo ben feito, o compromiso real co rural, o apoio aos emprendedores, a aposta decidida pola sanidade e a educación, e a da igualdade de oportunidades.

Rueda contrapuxo este modelo de portas abertas co da Galicia do “non” sistemático, do bloqueo permanente e da crítica sen proposta. E a inmensa maioría dos galegos, sinalou, cando toca escoller entre quen só sabe poñer paus nas rodas e quen traballa cada día para impulsar a nosa terra, prefire avanzar.

Deste xeito, o presidente do PPdeG subliñou que esa “Galicia do si” ten futuro porque conta cun proxecto claro, cun liderado estable, e cunha forza como o Partido Popular sempre a carón da xente, sempre escoitando e actuando con responsabilidade. É unha Galicia que se recoñece a si mesma con orgullo, que non se conforma nin se resigna, e que busca chegar o máis lonxe posible.

Por último, concluíu afirmando que o PPdeG seguirá sendo o motor deste camiño con humildade, con sentidiño e, sobre todo, con orgullo de ser galegos.

“A FERVENZA É UN PUNTO DE ENCONTRO, COMO O PARTIDO POPULAR”

Pola súa banda, o presidente do PP de Pontevedra, Luis López, agradeceu á dirección autonómica do partido seleccionar a provincia de Pontevedra para felicitar aquilo que nos une: Galicia, no seu día grande. Ademais, nun dos moitos tesouros que conta a provincia, nunha das postais máis fermosas e icónicas da nosa terra, que é a Fervenza do Toxa, precisou o presidente pontevedrés.

Luis López destacou que nestes meses de tempada alta turística, a esta fervenza acoden persoas e visitantes de todos os lugares de Galicia, de España e do mundo. “É un punto de encontro, como a política que practica o Partido Popular en Galicia”, precisou o dirixente popular.

“Ser o partido que máis se parece a Galicia ten moito máis de realidade que de lema. Os galegos, somos moderados, estamos unidos, valoramos o sentidiño e cremos nas maiorías. Traballamos nunha Galicia na que caben todos, forte e orgullosa”, indicou o presidente provincial.

Luis López rematou facendo fincapé en que, na medida en que dependa do PP de Pontevedra, as vésperas do 25 de Xullo son datas moi acaídas para renovar o noso compromiso con esa política que fai unha Galicia para todos, e unha Galicia mellor, tanto dende a Deputación de Pontevedra, como dende as agrupacións da comarca do Deza e das 61 da provincia, e como non, de todas e cada unha das 26 alcaldías que ostenta o Partido Popular na provincia.

Por último, o portavoz do PP local e anfitrión, Ignacio Maril, agradeceu igualmente que o PPdeG escollera a Fervenza do Toxa e sinalou que seguirá traballando para que Silleda sexa ‘popular’ a partir das eleccións municipais de 2027.

O Partido Popular de Galicia incidirá nos próximos meses no Parlamento galego no seu rexeitamento ao “cuponazo independentista” porque “non se pode tolerar que se deteriore o que é de todos” e porque “non pode haber españois de primeira e españois de segunda”.

Así o anunciou esta mañá a secretaria xeral do partido, Paula Prado, nunha rolda de prensa que ofreceu no propio Pazo do Hórreo e na que invitou ao PSOE e ao BNG a apoiar esta iniciativa parlamentaria “polo ben de Galicia” e, polo tanto, desistir no seu apoio a Pedro Sánchez e ao independentismo.

“O cuponazo independentista é o enésimo agasallo de Sánchez ao separatismo e o enésimo agravio de Sánchez a Galicia”, asegurou ao tempo que recordaba a entrevista radiofónica na que a vicepresidenta do Goberno e ministra de Hacienda, María Jesús Montero, “acusou ao presidente Rueda de inventar bulos cando este avanzou que se lle ía condonar a débeda a Cataluña e que isto suporía darlle a uns o que se lle nega a outros”.

Na súa opinión, “o tempo puxo a cada un no seu lugar” e así se constatou esta semana co acordo entre o Goberno de España e o independentismo catalán. Un acordo que Prado cualificou de “auténtico disparate” preguntándose “cales serán as próximas liñas vermellas que se superarán só para que Pedro Sánchez poida seguir un pouquiño máis no seu cargo”.

“O independentismo catalán non se vai saciar, pero Sánchez prefire seguir tendo unha prórroga tras outra e seguir alongando a súa agonía”, engadiu subliñando que este acordo “significa romper unha vez máis coa igualdade entre territorios” e que “non ten nada que ver coa convivencia, senón coa conveniencia”.

Por iso lamentou o apoio tanto dun PSdeG que “segue submiso ao presidente máis dañino da historia para os intereses de Galicia” como dun BNG que “só pensa nos seus socios independentistas e en manter no poder a Sánchez sen importarlle sequera ser cómplice da súa corrupción”.

A número dous dos populares galegos concluíu invitando a ambas formacións a explicar “por que non se poñen dunha vez a favor de Galicia e non a favor de Sánchez e do independentismo, por que prefiren poñer en risco os servizos públicos e que Galicia teña que pagar millóns de euros máis cada ano e por que queren desaparecer o sistema de financiamento autonómico”.

MEDALLA DE OURO Á PRINCESA LEONOR

Paula Prado tamén fixo mención na súa intervención á concesión da Medalla de Ouro de Galicia á Princesa Leonor apuntando que foi “un recoñecemento merecido e co que a gran maioría dos galegos e galegas se identifican”, tal e como “quedou patente co cariño que recibiu a Princesa nos últimos días e tamén co agradecemento que xurdiu das súas palabras durante o acto”.

“Desde o Partido Popular salientamos os valores que representa a Coroa de España, máis necesarias que nunca”, remarcou afeando a actitude amosada ao respecto por PSOE e BNG. “Quedaron retratados co seu desprezo a unha institución e ao máximo recoñecemento de Galicia”, afeoulles antes de recomendarlles que elixan “se queren seguir guiándose polo radicalismo ou se prefiren seguir camiñando en dirección contraria aos galegos e galegas”.