Categoría: PP de Galicia

O GRUPO POPULAR LAMENTA QUE BNG, AGE E GRUPO MIXTO REXEITARAN UNHA DECLARACIÓN INSTITUCIONAL SOLICITANDO UNHA NOVA INVESTIGACIÓN INDEPENDENTE SOBRE O ACCIDENTE DE ANGROIS

·    A proposta considera imprescindible que se coñeza a verdade do que pasou a través dun informe técnico incontrovertido

·    O Grupo Popular reitera o seu compromiso de apoiar todas as investigacións técnicas que contribúan a esclarecer as causas deste accidente

Santiago, 12 de xullo de 2016.- O Grupo Popular lamenta que os grupos parlamentarios do BNG, AGE e Mixto priorizaran os seus intereses políticos sobre a investigación das causas do accidente de Angrois, ao rexeitar a proposta de declaración institucional que lles propuxo para que o Parlamento de Galicia solicitara a apertura dunha investigación independente tal e como demanda o informe da Axencia Europea do Ferrocarril. O Grupo Socialista amosou o seu acordo coa lectura desta proposta de declaración institucional.

A proposta de declaración considera imprescindible, como acto de xustiza coas vítimas, os seus familiares e os seus achegados, e como garantía da seguridade do funcionamento dos servizos públicos, que se coñeza a verdade do que pasou a través dun informe técnico incontrovertido.

O Grupo Popular reitera o seu compromiso de apoiar todas as investigacións técnicas que contribúan a esclarecer as causas deste accidente co fin de garantir que non se volva a repetir.

Neste sentido, lembrar que esta negativa da oposición a solicitar unha nova investigación sobre o accidente súmase ao rexeitamento da solicitude do Grupo Popular no Pleno do pasada sesión plenaria para que o Parlamento galego solicitara á Comisión Europea que fixera público o informe sobre este sinistro ferroviario.

O texto íntegro da proposta de declaración facilitada polo Grupo Popular aos demais grupos parlamentarios da oposición é o seguinte:

PROPOSTA DE DECLARACIÓN INSTITUCIONAL
SOBRE O ACCIDENTE FERROVIARIO DE ANGROIS
DO 24 DE XULLO DE 2013

    O 24 de xullo de 2013 produciuse no lugar de Angrois, nas proximidades de Santiago de Compostela, o accidente de ferrocarril máis grave da nosa historia, no que faleceron 81 persoas e máis de 150, practicamente ata completar a pasaxe, sufriron feridas de distinta gravidade.

    Por ilo, e á luz da publicación do informe elaborado pola Axencia Europea Ferroviaria (European Railway Agency) para a Comisión Europea “en relación coas fortalezas e debilidades do Informe de investigación do accidente de Santiago de Compostela do 23 de xullo de 2013” (ERA/ADV/2015-6), o Parlamento de Galicia solicita, tal e como demanda o mencionado informe, que “se abra unha investigación que reúna os requisitos de independencia e analice como mínimo as debilidades ás que fai referencia este documento” respecto das investigacións ata o de agora realizadas.

Esta situación “demostra que o PP ofrece estabilidade institucional, ao tempo que diálogo coa oposición”, asegura o portavoz popular

PEDRO PUY DESTACA QUE NINGUNHA DAS LEIS QUE MAÑÁ SE APROBARÁN NO PLENO TIVO VOTO EN CONTRA NO SEU DEBATE EN COMISIÓN

Santiago, 11 de xullo de 2016.- O portavoz do Grupo Popular, Pedro Puy, salientou hoxe que todos os textos lexislativos que mañá se debaterán para a súa aprobación en Pleno “chegan sen ningún voto en contra en Comisión, o que demostra que o PP ofrece estabilidade institucional, ao tempo que diálogo coa oposición”.

Pedro Puy informou que o Pleno elixirá mañá aos tres senadores en representación da Comunidade galega, dos que dous corresponden ao Partido Popular: Juan Manuel Jiménez Morán e Fernando Carlos Rodríguez Pérez. Así mesmo, designarase aos novos membros do Consello Social da Universidade de A Coruña, que por parte do Grupo Popular proponse a Luis Ramiro Díaz López, presidente da empresa de enerxías renovables Vectia, S.L.; Luis Felipe Llamas Gómez, director da refinería de Repsol en A Coruña; e o letrado e asesor concursal Jaime Fernández-Obanza Carro.

Ademais da comparecencia da Valedora do Pobo para dar conta do seu informe anual correspondente a 2015, a sesión plenaria terá un marcado carácter lexislativo, co debate e votación definitiva de seis proxectos lexislativos: o proxecto de Lei polo que se modifica a Lei da área metropolitana de Vigo; o proxecto de lei de creación do Colexio Oficial de Terapeutas Ocupacionais de Galicia; o proxecto de Lei de creación dos colexios provinciais de economistas por fusión dos colexios de titulares mercantís e de economistas existentes na Comunidade galega; o proxecto de Lei do Plan galego de estatística 2017-2021; a proposición de lei (impulsada polo Grupo Popular) de medidas urxentes para a actualización do sistema de transporte público de Galicia; e a proposición de modificación da Lei galega para a prevención e o tratamento integral da violencia de xénero.

Ademais, o Grupo Popular defenderá dúas proposicións non de lei. Unha primeira, a través da que se demanda a adhesión do Concello de Vigo ao Programa de vivendas baleiras da Xunta, de xeito que aquelas vivendas desocupadas se destinen a alugueiro social; e unha segunda para que a Xunta estenda progresivamente a plataforma E-Saúde a toda a cidadanía galega, a través da que calquera galego poderá acceder por procedementos informáticos a servizos e contidos sanitarios personalizados.

INFORME INCONTROVERTIDO SOBRE O ACCIDENTE

Cuestionado sobre o informe da Comisión Europea respecto da investigación do accidente de Angrois, Pedro Puy reiterou que “tanto as familias das vítimas, como os seus achegados e o conxunto da sociedade teñen dereito a un informe incontrovertido sobre as causas do accidente”, polo que amosou a disposición do PPdeG “a falar e acordar” no Parlamento galego neste sentido.

“O sentir xeral do Grupo Popular é que tanto as vítimas como o conxunto da sociedade teñen dereito a saber a verdade e que exista un informe técnico incontrovertido, polo que todo o que sexa camiñar cara a ese informe estamos dispostos a apoialo”, manifestou.

Respecto da solicitude de creación dunha comisión de investigación sobre o accidente de Angrois no Parlamento galego, o portavoz popular lembrou que ningunha das Cámaras autonómicas ten competencia para controlar a altos cargos ou membros da Administración do Estado, polo que “non é o lugar adecuado nin operativo para facer unha comisión de investigación na que non comparecerían ningún dos responsables da infraestrutura, da liña ou do servizo”. “Cremos que con estes temas non se debe xogar, polo que debe facerse alí onde reside a capacidade e a competencia de controlar aos altos cargos do Estado”, apuntou.

Feijóo sairá á rúa no verán para consultar a cada galego sobre “A Galicia que ti queres”

·    O candidato do PPdeG visitará concellos e parroquias de toda Galicia acompañado dun banco no que conversar coa cidadanía e dunha urna para recibir propostas

·    A xira será complementada con instrumentos tecnolóxicos de escoita: ademais do whatsapp xa existente, Feijóo contará cunha conta de twitter e cunha web propias

Santiago de Compostela, 8 de xullo de 2016.- O secretario xeral dos populares galegos, Miguel Tellado, presentou hoxe na sede autonómica de partido a ruta “A Galicia que ti queres”, coa que o PPdeG busca estar “de volta na rúa” e “en primeira persoa”.

Para isto, o presidente e candidato do PPdeG ás eleccións autonómicas, Alberto Núñez Feijóo, percorrerá Galicia este verán para, segundo Tellado, “poder falar en persoa cos galegos e coas galegas”.

Farao acompañado dun banco que actuará como faladoiro, “un espazo de conversa de ti a ti entre Feijóo e os galegos”, e dunha urna na que as persoas poderán depositar propostas que definan “o que esperan de nós como partido e como goberno”.

Tellado considera que será un xeito de “facer partícipes aos galegos e as galegas do programa electoral que queremos desenvolver se Galicia mantén a súa confianza en Feijóo”.

Será un mecanismo complementario ás reunións con colectivos que comezarán a efectuar os membros do equipo redactor do programa coordinado por Pedro Puy.

Os encontros de Feijóo coa cidadanía comezaron onte mesmo en Carral e continuarán hoxe no Saviñao e mañá en Combarro e Sanxenxo e se efectuarán sen convocatoria á prensa. “Regresamos á rúa sen intermediarios”, explicou Tellado, destacando que “A idea non é saír nos medios senón recuperar o contacto informal e natural coa cidadanía”.

#FEIJOOENCAMIÑO

O número dous do PPdeG inseriu estes encontros na política de recuperación do contacto directo coa xente que se marcou dende a aprobación no pasado outubro da Ponencia Política coordinada por José Manuel Rey.

Tellado destacou esta “renovación de actitudes” emprendida tras os insatisfactorios resultados das municipais como unha das claves da recuperación de apoios experimentada nos últimos meses: “Melloramos en decembro a porcentaxe de votos de maio e melloramos en xuño a porcentaxe de votos de decembro”, salientou Tellado.

Así, a partir de agora dous novos elementos de escoita cidadá se unirán á conta de whatsapp creada trala aprobación da ponencia política.

Un será a conta de twitter @feijoogalicia que será unha forma de interlocución directa do candidato coa cidadanía. “Un nome sinxelo”, apuntou Tellado, que une a Feijóo e a Galicia como dous elementos indisolubles.

O outro elemento será a web do candidato www.feijoo.gal en marcha dende hoxe mesmo e que, tal e como explicou Tellado, “será unha fiestra máis coa que mostrar a Galicia o que pensamos pero tamén coa que recoller achegas, ideas e suxestións”.

O eslogan ou hashtag que terán en común todas estas iniciativas será #FeijooEnCamiño. Simboliza, segundo o secretario xeral do PPdeG “que estamos no proceso de conseguir algo: que Galicia volva a confiar en nós como partido máis representativo e nun líder indiscutido e indiscutible como é Alberto Núñez Feijóo”. “Feijóo elixiu Galicia porque Galicia o elixiu a el ata en dúas ocasións”, pechou Tellado.

O GRUPO POPULAR AFIRMA QUE A RECUPERACIÓN DO SECTOR NAVAL GALEGO SUSTÉNTASE NA INNOVACIÓN E NA DIVERSIFICACIÓN

·    “O traballo conxunto das empresas e da Xunta serviu para asentar un cambio de dinámica na actividade do sector e que hoxe haxa actividade nas gradas dos estaleiros e nas empresas auxiliares”, asegurou Dorado

Santiago, 7 de xullo de 2016.- O deputado do Grupo Popular Javier Dorado afirmou hoxe no Parlamento que “a recuperación do sector naval galego susténtase en dous piares fundamentais: a innovación como vantaxe competitiva e a diversificación, que está a potenciar a súa capacidade e o know-how  para impulsar proxectos en novos sectores como a eólica offshore ou o mercado de buques de gas natural licuado”.

Dorado subliñou que a Xunta de Galicia “mantén un apoio continuado para o sector no seu conxunto para procurar que os estaleiros galegos se sumen, canto antes, á industria 4.0 e estean na mellor disposición para competir a nivel global, recuperando a actividade e o emprego e asegurando o seu futuro”.

TRABALLO INTENSO

Na súa intervención, o deputado popular lembrou que o actual Goberno galego “ten traballado intensamente na defensa e consolidación dun novo marco de financiamento e fiscalidade para o sector naval, como por exemplo o novo tax lease que xa reportou a nivel nacional 28 operacións por un importe próximo aos 1.000 millóns de euros; ademais de apoiar o labor comercial tanto dos estaleiros públicos como privados”.

“O traballo conxunto das empresas do sector naval e da Xunta serviu para asentar un cambio de dinámica na actividade do sector e que hoxe haxa actividade nas gradas dos estaleiros galegos e nas empresas auxiliares”, asegurou Dorado, quen afirmou que “grazas ao esforzo continuado desde o  Goberno galego, en colaboración co Goberno central, podemos afirmar que o naval galego afronta o futuro con mellores expectativas e co horizonte despexado”.

Javier Dorado referiuse ao “aumento progresivo da carga de traballo, que entre o primeiro trimestre de 2015 e o primeiro trimestre deste ano pasou de 9 a 19 buques, que representan o 32 por cento do total de contratos de toda España; unha carga de traballo que aumentou un 50 por cento e supón máis de 2.300 millóns de euros en contratos”.

Neste sentido, o deputado popular felicitouse porque “hoxe mesmo coñecemos que a armadora Armón adxudicouse a construción dun novo buque de investigación costeira.

PUY SALIENTA QUE O PARLAMENTO CUMPRIU O OBXECTIVO DE SER O CENTRO DA PARTICIPACIÓN CIDADÁ, DE DEBATE E DE ACTIVIDADE POLÍTICA

·    Destacou que cinco das seis leis que se debaterán no Pleno chegan sen voto en contra

·    O Grupo Popular defenderá na sesión plenaria solicitar que o Concello de Vigo se adhiera ao programa de vivendas baleiras da Xunta e que o Goberno galego estenda a plataforma É-Saúde ao conxunto da cidadanía galega

Santiago, 5 de xullo de 2016.- O portavoz do Grupo Popular, Pedro Puy, salientou hoxe que o Parlamento galego cumpriu nesta lexislatura “o obxectivo de ser o centro da participación cidadá, de debate e da actividade política, ata o punto de que é un perfecto espello da situación política: un partido que ofrece estabilidade e diálogo mentres que en fronte hai unha alternativa de goberno moito máis dividida do que estaba cando comezou a lexislatura e sen moita capacidade de ofrecer alternativas, salvo algunhas políticas de xestos”.

Na comparecencia posterior á reunión da Xunta de Portavoces, Pedro Puy agradeceu aos portavoces dos grupos da oposición “a súa predisposición a permitir que os horarios do Pleno da vindeira semana sexan razoables, dada a alta concentración de normas habitual no final do período de sesións, que provocan que a sesión sexa complicada en termos de xestión horaria”. Neste sentido, concretou que todos os grupos acordaron renunciar a unha parte do tempo que lles correspondería no debate dalgunha destas normas en Pleno.

Respecto do debate das seis iniciativas lexislativas incluídas na orde do día, das que seis son proxectos de Lei remitidos polo Goberno e as outras dúas son proposicións de lei promovidas desde o Grupo Popular e o BNG, o portavoz popular tamén subliñou que ningún texto lexislativo (dos cinco que se debateron, xa que un deles tramítase polo procedemento de lectura única) tivo voto en contra. “O consenso é mérito das dúas partes”, sinalou Pedro Puy, quen considerou demostrado que “ás veces é posible o acordo en cuestións que afectan á cidadanía sen que haxa votos en contra significativos”, en referencia as leis da área metropolitana de Vigo, a lei de transporte público ou a modificación da Lei de violencia de xénero.

SENADORES, UNIVERSIDADE DE A CORUÑA E VALEDORA

A orde do día do Pleno incorpora a elección dos tres senadores en representación da Comunidade galega (dos que dous corresponden ao Partido Popular e un ao Partido Socialista) e seis membros do Consello Social da Universidade de A Coruña, así como a comparecencia da Valedora do Pobo para dar conta do seu informe de xestión correspondente a 2015.

Pedro Puy referiuse á solicitude do Grupo Socialista para que o Presidente da Xunta comparecera sobre a política laboral e o emprego, “xusto cando acabamos de ter un dos mellores datos de crecemento do emprego no mes de xuño”. Neste sentido, recoñeceu que estacionalmente o paro baixa no mes de xuño como consecuencia do período veraniego, como  demostra o feito que en termos mensuais a creación de emprego crecera este ano un 6 por cento, fronte ao 2,5 do 2008, o 3,5 do 2009 e do 3,8 no 2010.

Porén, indicou que, na comparativa interanual, fronte ao descenso do desemprego do 9,5 por cento rexistrado este ano, en 2009 o paro incrementouse o 31,12 por cento e no 2010 o 9,7 por cento.  “A comparación dos datos estacionais dan un resultado que nos fai ser optimistas no sentido de que, aínda que agora o paro rexistrado en Galicia é menor que no 2009, hai que seguir perseverando para mellorar estas cifras”, sinalou.

REFORMA ELECTORAL EXTEMPORÁNEA

O portavoz popular tamén cuestionou a intención do BNG de incorporar na sesión plenaria o debate dunha proposición de lei de reforma da lei electoral. “Despois de traer unha proposta de reforma da lei electoral galega, outra sobre a reforma da lei electoral xeral e mesmo outras cuestións afíns a procedementos electorais, sorprende que se solicite un debate sobre  normas electorais a escasas semanas dun proceso electoral”, indicou.

Puy lembrou que “cando nós formulamos ao inicio da lexislatura unha reforma electoral, se nos acusou de ventaxismo e de facer actuacións pouco democráticas” e recordou que o Código de boas prácticas en materia electoral do Consello de Europa recolle que non se debe tocar unha norma electoral un ano antes dunha convocatoria electoral. “A lei electoral vai ser a mesma coa que os galegos levan votando moitos anos, porque daría unha mala imaxe de saúde democrática que a escasos meses das eleccións formuláramos calquera reforma da lei electoral”, sinalou.

O Grupo Popular defenderá na sesión plenaria da vindeira semana dúas proposicións non de lei. A través da primeira delas, demándase ao Concello de Vigo a adherirse ao programa de vivendas baleiras da Xunta; mentres que a segunda ten como obxectivo que o Goberno galego estenda progresivamente a plataforma É-Saúde ao conxunto da cidadanía galega.

Así mesmo, o Grupo Popular cuestionará ao Goberno galego sobre a situación da doazón e o transplante de órganos e tecidos en Galicia e as conclusións do informe sobre a evolución da clasificación microbiolóxica das zonas de produción marisqueira en Galicia.

PEDRO PUY AVANZA QUE SEIS INICIATIVAS LEXISLATIVAS ESTÁN EN DISPOSICIÓN DE APROBARSE NO PLENO DA VINDEIRA SEMANA

·    A modificación das leis da área metropolitana de Vigo e de violencia de xénero; o Plan galego de estatística 2017-2021; a creación dos colexios provinciais de economistas e do Colexio Oficial de terapeutas ocupacionais; e a actualización do transporte público son as normas listas para o seu debate definitivo

Santiago, 4 de xullo de 2016.- O portavoz do Grupo Popular, Pedro Puy, avanzou hoxe que “seis iniciativas lexislativas están en disposición para o seu debate e aprobación no vindeiro Pleno”. Ademais deste alto contido lexislativo, a sesión plenaria tamén incorporará a presentación do informe ordinario da Valedora do Pobo e a elección dos senadores en representación da Comunidade galega e de seis membros do Consello Social da Universidade de A Coruña.

Pedro Puy apuntou que o Grupo Popular proporá mañá na Xunta de Portavoces a inclusión na orde do día da sesión plenaria da vindeira semana da designación dos tres senadores en representación da Comunidade galega, dos que dous corresponden ao PP e o outro ao PSOE. “O obxectivo é que estes representantes poidan estar presentes o día de constitución do novo Senado logo das pasadas eleccións xerais”, indicou.

Entre as iniciativas lexislativas que están en disposición de debaterse e aprobarse no vindeiro Pleno, Puy enumerou os proxectos de lei de modificación da Lei da área metropolitana de Vigo; do Plan galego de estatística 2017-2021; de creación dos colexios provinciais de economistas, por fusión dos colexios de titulares mercantís e de economías existentes en Galicia; e de creación do Colexio Oficial de terapeutas ocupacionais de Galicia.

A estas iniciativas lexislativas súmanse as aprobadas esta mañá en Comisión: a proposición de lei para a actualización do sistema de transporte público de Galicia; e a proposición de lei de modificación da Lei galega para a prevención e o tratamento integral da violencia de xénero.

ESTABILIDADE E NORMALIDADE

Cuestionado sobre a convocatoria das eleccións autonómicas, Pedro Puy sinalou que o Presidente da Xunta “vén de reiterar esta mañá que serán en outono, cando corresponde e de acordo coa situación política actual, caracterizada pola estabilidade do Goberno e unha acción política que está a conseguir resultados bos, como se viu hoxe na creación de emprego, aínda que hai que perseverar neste camiño”.

“Un dos valores que a cidadanía comeza a apreciar é a estabilidade e normalidade no funcionamento das institucións, polo que, non habendo un motivo que implicaría un adianto, creo que o Presidente está dando un sinal de seriedade e de responsabilidade de acordo co que marca a normativa”, asegurou.

A Comisión 2ª aprobou esta mañá o ditame deste texto normativo promovido polo Grupo Popular

A PROPOSICIÓN DE LEI PARA A ACTUALIZACIÓN DO SISTEMA DE TRANSPORTE PÚBLICO DE GALICIA, PENDENTE DA SÚA APROBACIÓN DEFINITIVA EN SESIÓN PLENARIA

Santiago, 4 de xullo de 2016.- O ditame da proposición de Lei para a actualización do sistema de transporte público de Galicia, promovida polo Grupo Popular, recibiu hoxe a súa aprobación na Comisión 2ª do Parlamento, co que queda pendente do seu debate definitivo en sesión plenaria. O portavoz de Infraestruturas do Grupo Popular, Jesús Goldar, asegurou que esta norma “establece mecanismos para afrontar unha intensa modernización do servizos público e a súa plena adaptación ás demandas da sociedade para as próximas décadas”.

Jesús Goldar lembrou que a sentenza 1067/2016 do Tribunal Supremo anulaba a resolución da Dirección Xeral de Mobilidade de febreiro de 2010 que aprobaba o Plan de modernización das concesións do transporte público regular. “Esta sentenza provocaba que dos 145 contratos de transporte interurbano existentes en 2009, só 14 manterían a súa vixencia”, apuntou.

ACTUACIÓN URXENTE

Deste xeito, o portavoz popular sinalou que esta situación “requiría unha actuación urxente que garanta a prestación do servizo público de transporte en Galicia coas máximas garantías e a máxima seguridade xurídica”.

Goldar salientou que a proposición de lei incorpora a figura do Plan de transporte público de Galicia como instrumento de planificación necesario para establecer un sistema de transporte público multimodal e integrado. Este plan “tratará de determinar, ordenar e establecer a oferta de servizos de transporte público competencia da Xunta, ao tempo que implementará a coordinación da totalidade de servizos de transporte público que se desenvolvan en territorio galego”, indicou.

Así mesmo, a proposición de lei derroga a prórroga por dez anos dos servizos de transporte público por estrada, ao tempo que consagra o principio de continuidade deste servizo público “que, en todo caso, será voluntaria para os contratistas, que deberán comunicar a súa renuncia no prazo de quince días desde a entrada en vigor desta lei”, apuntou Jesús Goldar.

CONTINUIDADE

O portavoz popular explicou que o novo texto lexislativo “establece a obriga contractual durante 12 meses a contar desde a data da renuncia e tamén se prevé que, ante eventuais renuncias dos contratistas, a Administración procederá á adxudicación directa destes servizos”.

“Esta proposición de lei considera esta continuidade como unha oportunidade para manter as liñas de modernización impulsadas na Lei 5/2009, a través da súa integración nos plans de transporte metropolitano e no modelo de tarifas zonais; a implantación do sistema de axuda á explotación, en liña cos traballos que leva acometido a Xunta de Galicia nos últimos anos; e mantendo o compromiso de integrar progresivamente vehículos accesibles a persoas con mobilidade reducida nos contratos”, sinalou.

APROBADO O DITAME DA MODIFICACIÓN DA LEI DE VIOLENCIA DE XÉNERO QUE ESTENDE O PRAZO DE SOLICITUDE DE AXUDAS A TODO O ANO E INCORPORA ÁS MULLERES VÍTIMAS DE TRATA

Santiago, 4 de xullo de 2016.- A Comisión 5ª do Parlamento galego aprobou esta mañá o ditame do proxecto de lei de modificación da Lei 11/2007 galega para a prevención e o tratamento integral da violencia de xénero, de xeito que o prazo para a solicitude de axudas se estenda a todo o ano e se permita o acceso das mulleres vítimas de trata con fins de explotación sexual a estas percepcións. O texto lexislativo queda en disposición da súa aprobación definitiva en sesión plenaria.

A portavoz de Igualdade do Grupo Popular, Rosa Oubiña, lembrou que estas prestacións económicas para as mulleres vítimas de violencia machista “están establecidas desde a aprobación da Lei galega 11/2007, polo que se veñen convocando anualmente e o seu orzamento foise incrementando ano tras ano”.

MODIFICACIÓN DA NORMATIVA VIXENTE

En concreto, Oubiña lembrou que o Grupo Popular xa manifestou no debate de toma en consideración da proposición de lei presentada polo BNG e despois nas emendas rexistradas que o obxectivo “non era levar adiante este novo texto lexislativo, senón proceder á modificación da lei vixente en dúas cuestións: a incorporación das mulleres vítimas de trata con fins de explotación sexual para que poidan acceder ás prestacións económicas e que o prazo para a solicitude destas axudas se amplíe a todo o ano”.

A portavoz popular sinalou que estas axudas, “que levan dez anos creadas, teñen como finalidade posibilitar a independencia económica das vítimas respecto do seu agresor, rachando coa situación traumática que padecen as mulleres que sofren violencia de xénero”.

O ditame aprobado pola Comisión 5ª incorpora ademais que a Xunta establecerá estas prestacións a través dunhas bases reguladoras, ao tempo que remitirá ao Parlamento galego un informe anual sobre estas prestacións periódicas.

APROBADA EN COMISIÓN A MODIFICACIÓN DA LEI DA ÁREA METROPOLITANA DE VIGO, QUE QUEDA PENDENTE DO SEU DEBATE DEFINITIVO EN PLENO

·    Recoñécese a cidade de Vigo como capital da área, que terá un tratamento propio na dotación de servizos públicos; así como a necesidade de que os novos concellos que se incorporen ao ente sexan limítrofes e teñan vinculación económica

Santiago, 1 de xullo de 2016.- A Comisión 1ª do Parlamento galego aprobou hoxe, coa única abstención de AGE, o ditame da modificación da Lei da área metropolitana de Vigo, co que o texto queda en disposición da súa aprobación en sesión plenaria. O deputado do Grupo Popular Javier Dorado salientou que esta norma da “cobertura legal a unha realidade social existente, respectando os vínculos sociais, económicos e industriais que ten toda a área de Vigo”.

Dorado afirmou que esta modificación da Lei da área metropolitana de Vigo “respecta o espírito” da norma aprobada en 2012 no Parlamento e polos 14 concellos que integran este ente supramunicipal, “mantendo o autogoberno e autonomía tanto da área como dos propios municipios”.

MELLORAS TÉCNICAS

Respecto das emendas presentadas polo Grupo Popular e que hoxe foron aprobadas e incorporadas no ditame, Javier Dorado asegurou que “fan melloras técnicas e enriquecen o texto inicial”.

O deputado popular apuntou que estas emendas recoñecen á cidade de Vigo como capital da área metropolitana, que terá un tratamento propio na dotación de servizos públicos; así como a necesidade de que os novos concellos que se incorporen ao ente cumpran os requisitos de ser limítrofes e ter vinculación económica coa área.

Dorado tamén se referiu ao financiamento da área metropolitana de Vigo e a súa participación nos tributos do Estado e da comunidade autónoma. “O feito de que exista a área debe responder a unha maior eficiencia na xestión dos recursos públicos: o espírito non é xerar máis gasto, senón mancomunar servizos e ter menos gasto corrente”, apuntou.

Por último, o deputado popular referiuse á posibilidade de chegar a acordos con concellos que non pertenzan á área metropolitana pero que teñan interese económicos comúns. Neste sentido, puxo como exemplo o transporte público existente na área sanitaria de Vigo, logo da apertura do novo Hospital Público Álvaro Cunqueiro, que cualificou como “o máis completo que hai en toda Galicia e que mellorará coa área metropolitana”.