Jesús Vázquez presidirá o XVI Congreso autonómico do PPdeG

Santiago de Compostela, 6 de maio de 2016.- O presidente do PP de Ourense e alcalde da cidade, Jesús Vázquez, será o presidente do XVI Congreso autonómico do partido. A decisión, proposta pola Comisión Organizadora do evento, foi comunicada hoxe polo seu presidente, Miguel Tellado, quen destacou a idoneidade da persoa escollida.

O tamén voceiro do partido avanzou que será un Congreso participativo no que está volcado o partido a nivel nacional. De feito, a secretaria xeral, María Dolores de Cospedal, participará na clausura do mesmo na mañá do domingo. Pola súa parte, os vicesecretarios de Organización, Fernando Martínez Maíllo, e de Estudos e Programas, Andrea Levy,  farano mañá xunto ao secretario xeral, Alfonso Rueda, nunha visita ás instalacións que terá lugar antes da propia inauguración do Congreso.

Máis alá da estrutura nacional do partido, tamén dende outras autonomías queren arroupar a Alberto Núñez Feijóo neste evento. Así, Juan Vicente Herrera, presidente da Junta de Castilla y León, precederá na tarde de mañá ao propio Feijóo no uso da palabra. Ademais, Juanma Moreno, presidente do PP andaluz, intervirá o domingo, antes das votacións.

Así mesmo, Tellado informou que tamén asitirá ao conclave dos populares o presidente do distrito de Oporto, Virgílio Macedo, en representación do PSD portugués. 

Á asistencia de todos estes dirixentes súmase, por suposto, á do presidente do PP, Mariano Rajoy, que tamén quixo acompañar a Feijóo no marco do Congreso e así o fará hoxe no propio recinto no que se celebrará o mesmo. E é que precisamente esta tarde Rajoy participa xunto ao presidente do PPdeG nun coloquio coas NNXX do partido. Ademais, terá a oportunidade de avalar a Feijóo de forma expresa de cara ao Congreso de mañá, no que tamén terán protagonismo os presidentes provinciais e o presidente de NNXX, Diego Gago.

O portavoz dos populares galegos tamén informou de que na tarde de mañá presentaranse os manifestos coordinados por Ánxeles Vázquez e María Ramallo:  “A Galicia de hoxe: o camiño percorrido”, un balance do traballo realizado polos populares dende que chegaron á Xunta en 2009; e “A Galicia do futuro: o camiño por percorrer”, un documento que establece as propostas e liñas de actuación do partido de cara ao 2020.  

Xa o domingo, tralas votacións e uns intres antes da proclamación de resultados, Alfonso Rueda presentará o informe de xestión da candidatura saínte, na que será a súa última intervención como secretario xeral. Así mesmo, Tellado valorou a traxectoria de Rueda e dixo que deixa un listón moi alto para a persoa que ocupe a secretaría xeral despois do domingo.

Na súa comparecencia en rolda de prensa, o voceiro aproveitou para anunciar que poñerán en marcha dúas aplicacións móbiles como mecanismo para que o PPdeG se poida comunicar cos seus afiliados e simpatizantes e para que estes saiban todo o que acontece durante o conclave. Para isto tamén contan cun equipo de voluntarios para redes sociais co obxectivo de que o Congreso non só o vivan os 2.000 compromisarios que estean presentes senón que sexa un acto participativo que todos os afiliados poidan seguir en directo.

Tamén no marco do conclave dos populares galegos, Tellado avanzou que haberá unha exposición fotográfica dos últimos dez anos de historia do PPdeG, un periodo marcado polo liderado de Alberto Núñez Feijóo. 

CONTRATO PARA NAVANTIA

O portavoz do PPdeG celebrou a noticia publicada esta mañá sobre o peche do contrato entre Navantia coa Armada de Australia para a construción de dous buques de aprovisionamento e combate nos estaleiros de Ferrol. Trátase do maior contrato deste estaleiro nos últimos nove anos. 
“É unha magnifica noticia para Navantia, para o sector naval, para Galicia e para a comarca de Ferrolterra”, aseguraba o voceiro.
Nesta liña, tamén recordou que dende o ano 2009 os populares trasladaron a súa profunda preocupación por este sector e, proba disto, é o empeño manifestado dende a Xunta para conseguir pedidos e contratos. Como exemplo, Tellado falou do flotel de Pemex que este verán se entregará á petroleira mexicana -tanto o fabricado no estaleiro de Vigo como o construído no estaleiro de Ferrol-. “Este é o resultado de moitos anos de traballo, felicitamos a todo o equipo de Navantia”, concluíu o voceiro.

Tellado salienta que Galicia acumula 30 meses consecutivos de baixadas do desemprego

Santiago, 4 de maio de 2016.- O portavoz do Partido Popular de Galicia, Miguel Tellado, salientou hoxe que, coa baixada de 3.644 parados rexistrada no mes de abril en Galicia, “a nosa Comunidade acumula 30 meses consecutivos de descenso interanual do desemprego, o que nos permite situarnos na actualidade con menor número de parados que hai seis anos”. 
Tellado afirmou que “a senda de recuperación da nosa economía e a estabilidade política que vivimos en Galicia permiten que mes a mes se acumulen as baixadas de desempregados na nosa Comunidade, chegando xa aos 16.608 parados menos que hai un ano, o que representa un descenso do 6,79 por cento”.
“Todo o que supoña reducir o número de persoas inscritas nas oficinas de emprego supón unha satisfacción para o Partido Popular, pero somos conscientes de que aínda quedan moitas persoas que desexan traballar e para os que seguiremos adoptando medidas e incrementando os esforzos para que poidan cumprir o seu obxectivo de acceder ao mercado laboral”, manifestou.
Emprego estable e de calidade
O portavoz popular subliñou que “o Partido Popular quere converter a Galicia nunha comunidade que xere emprego estable e de calidade, poñendo enriba da mesa oportunidades para todos os galegos que desexen traballar nas mellores condicións e no menor prazo de tempo posible”.
Miguel Tellado referiuse, ademais, ao incremento de 13.898 novos afiliados á Seguridade Social en Galicia rexistrado no último ano, “o que supón que Galicia leve 25 meses consecutivos incrementando o número de afiliacións”. 
“Trátase dun dato importante porque cada novo traballador que se sume á Seguridade Social é un paso máis para garantir a supervivencia das nosas pensións e a sostenibilidade do sistema”, indicou.

O pleno do Parlamento debaterá o Plan estratéxico da economía de Galicia 2015-2020


O PLENO DO PARLAMENTO DEBATERÁ A VINDEIRA SEMANA A APROBACIÓN DO PLAN ESTRATÉXICO DA ECONOMÍA DE GALICIA 2015-2020

·    Este  plan incorpora medidas de dinamización económica, blinda o gasto social e mantén a solvencia e sustentabilidade do gasto público

·    O Grupo Popular defenderá a revisión do actual sistema de reparto das cotas pesqueiras e o impulso á construción da A-76 entre Ourense e León

Santiago, 3 de maio de 2016.- O Pleno do Parlamento de Galicia da vindeira semana procedera ao debate do Plan estratéxico da economía de Galicia 2015-2020, que “se aproba nun momento no que podemos ter un optimismo moderado pola situación económica de Galicia e que incorpora medidas de dinamización económica, blinda o gasto social e mantén a solvencia e sustentabilidade do gasto público”. Ademais, Puy apuntou que se trata dun “documento aberto que se vai adaptando ás novas circunstancias e obxectivos que vaian xurdindo no tempo”.

Pedro Puy explicou que o Plan estratéxico naceu dun “proceso moi participativo”, salientando que “non hai ningún antecedente semellante na historia desde que se comezaron a facer os plans de desenvolvemento rexional”.


OPTIMISMO MODERADO

Na súa intervención, o portavoz popular afirmou que este Plan estratéxico “apróbase nun momento no que podemos ter un optimismo moderado pola situación económica de Galicia” e fixo referencia aos datos de crecemento en taxas interanuais arredor do 3 por cento, ao tempo que diminúe o desemprego e a taxa de paro.

“O Plan Estratéxico presenta obxectivos importantes, como consolidar o crecemento económico en taxas anuais do 2,5 por cento; crear 100.000 empregos ata 2020; converxer coa Unión Europea; duplicar o gasto en innovación e desenvolvemento; seguir reducindo a taxa de abandono escolar; ou rebaixar a poboación en risco de pobreza en máis de 100.000 persoas”, concretou.

Así mesmo, engadiu que o Plan estratéxico incorpora medidas de dinamización demográfica; blinda o gasto social, con reforzo dos investimentos educación e sanidade; reconduce a senda de endebedamento; e mantén a solvencia e sustentabilidade do gasto público.

COMPARENCENCIA SOBRE O PLAN REHAVITA

A sesión plenaria da vindeira semana inclúe, ademais, a comparecencia da conselleira de Infraestruturas e Vivenda, por petición propia, para dar conta das actuacións e medidas que a Xunta ten posto en marcha no marco do Plan RehaVita, de rehabilitación, alugamento e mellora de acceso á vivenda 2015-2020.

O Grupo Popular defenderá no Pleno dúas proposicións non de lei. A primeira ten como obxectivo a defensa diante da autoridades comunitarias e estatais da revisión do actual sistema de reparto de cotas pesqueiras e xestión dos recursos no marco da Política Pesqueira Común. En concreto, a iniciativa busca impulsar un novo mecanismo de xestión que resolva a contradición provocada polo Principio de Estabilidade Relativa, de xeito que as cotas sobrantes se poidan ceder ou traspasar ás flotas que as precisan.

En segundo lugar, o Grupo Popular instará ao Ministerio de Fomento para que continúe impulsando a construción da autovía A-76 entre Ourense e León, mantendo o esforzo investidor e traballando para facer realidade esta infraestrutura de modo compatible coa protección do medio ambiente e coa declaración da Ribeira Sacra como Patrimonio da Humanidade.


VIAXE DO PRESIDENTE E MELLORA DAS ESTRADAS

Para rematar, o Grupo Popular cuestionará ao Goberno galego sobre a valoración da recente viaxe que o Presidente da Xunta realizou a Arxentina e Uruguai, na que se reuniu cos presidentes de ambas repúblicas e asistiu á Feira do Libro de Bos Aires, ademais de realizar encontros coa colectividade galega en ambos países; así como sobre a execución do plan de reforzo de firmes nas estradas de titularidade autonómica, para o que está previsto un investimento de 23,5 millóns de euros.

A modo de resumo, o portavoz popular sinalou que a orde do día do Pleno inclúe 27 puntos, dos que o Goberno propuxo dous e o Grupo Popular outros catro, “é dicir, un quinto das iniciativas que se van debater porque a oposición ten neste Parlamento todas as oportunidades de controlar e impulsar ao Goberno da Xunta”.

Feijóo anuncia unha achega de 66M€ para seguir incrementando medidas de conciliación

Santiago, 7 de abril de 2016.- O presidente do PPdeG, Alberto Núñez Feijóo, avanzou hoxe unha achega de 66 millóns de euros para incrementar as medidas de conciliación da vida familiar e laboral, que dean resposta a tres grandes retos: máis e máis diversos recursos de atención aos nenos para que os seus pais poidan traballar; promover a conciliación en determinados ámbitos, especialmente no ámbito empresarial; e que cada vez haxa unha maior concienciación social que garanta a maior calidade de vida das familias.
Nun primeiro termo, e no ámbito dos recursos, Feijóo afirmou que “se chegará a un total de 22.316 prazas de garderías sostidas con fondos públicos para o próximo curso 2016-2017. “Isto supón 1.871 novas prazas financiadas con fondos públicos, é dicir, un 9% máis de prazas o próximo curso que o curso actual. E, supón tamén que Galicia supere a ratio recomendada pola UE que estaba no 33%, situándonos no 37,3%”, aseverou.
Estas prazas estarán á disposición da poboación a través das escolas infantís de 0 a 3 anos, nas que se inclúen a rede de escolas infantís dependente da Administración autonómica, que oferta 9.700 prazas en 166 centros; as 119 escolas infantís e puntos de atención á infancia de titularidade dos concellos nos que a Xunta contribúe ao seu financiamento; as 424 prazas concertadas en 23 centros privados; e as preto de 2.700 prazas nos 47 centros educativos dependentes de entidades de iniciativa social.
Así mesmo, o mandatario afirmou que se porá tamén en funcionamento o Bono concilia, un programa de axudas económicas directas ás familias para colaborar no pago dunha praza de escola infantil naqueles casos que non a consigan nunha escola ou nun centro financiado con fondos públicos, ou que residan nunha localidade na que non existen prazas públicas. E do que se poderán beneficiar arredor de 2.400 familias.
Feijóo destacou ademais a posta en marcha de novos recursos e liñas de financiamento como o servizo de axuda no fogar infantil e o Bono coidado, as casas niño na contorna rural e escolas infantís en contornos empresariais.
Escolas infantís en contornos empresariais
Sobre este último punto, o dirixente popular afirmou que a Xunta convocará subvencións para financiar a construción de escolas infantís en polígonos industriais, que serán xestionadas pola asociación empresarial do polígono. “Financiaremos unha escola infantil de tres unidades -41 prazas- en cada polígono industrial que obteña a subvención”, dixo, ao que engadiu que nos vindeiros anos 2016-2017 se espera financiar a posta en marcha de 7 escolas infantís destas características.
Neste obxectivo de implicar ás empresas na aposta pola conciliación, Feijóo destacou a incorporación de cláusulas sociais en todas as licitacións de contratos da Administración autonómica; “de tal xeito que no caso de empate entre dúas ofertas económicas de empresas que queiran prestar algún tipo de contratación na Xunta, será motivo de desempate se esa empresa ten un plan de fomento de conciliación dentro do seu cadro de persoal”, precisou.
O presidente afirmou que con todas estas medidas o obxectivo é que Galicia sexa un lugar mellor para vivir, ter fillos e formar unha familia. E, nesta liña explicou que todas elas forman parte do Programa de apoio á natalidade e máis concretamente á iniciativa PAN Concilia.

Feijóo di que xa se poden realizar 3 de cada 4 trámites da Xunta de xeito electrónico

Santiago, 7 de abril de 2016.- O presidente do PPdeG, Alberto Núñez Feijóo, destacou hoxe que os cidadáns e as empresas galegas xa poden realizar tres de cada catro trámites da Xunta de xeito electrónico.
Como sinalou, o Consello da Xunta autorizou hoxe unha orde do vicepresidente e conselleiro de Presidencia, Administracións Públicas e Xustiza para incorporar novos procedementos da Consellería de Infraestruturas e Vivenda. En concreto, véñense de revisar case un cento de procedementos da consellería, dándose de baixa 47 por estar obsoletos e incorporándose 48 á sede electrónica.
Así, a partir de agora pasarán a estar preparados para admitir a súa presentación electrónica procedementos tan relevantes como o Rexistro público de demandantes de vivendas; o depósito de fianzas; a autorización de transportes de uso especial; a xestión da renda básica de emancipación; ou os movementos de terras.
Nesta liña, o presidente destacou que, con estas novas incorporacións, a sede electrónica da Xunta xa dispón de 1.140 procedementos accesibles a través da web.
Como lembrou, esta iniciativa enmárcase no Plan Achega, en marcha desde 2014, co que se simplifican e melloran todos os procedementos administrativos da Xunta, aforrando diñeiro e reducindo tempos de tramitación a cidadáns e empresas. Segundo sinalou o mandatario, os eixos centrais deste plan pasan por eliminar as esixencias aos cidadáns dos documentos que se vaian incorporando na plataforma, simplificar os procedementos e potenciar a sede electrónica da Xunta.
Segundo Feijóo, só faltan dúas consellerías por incorporarse á sede electrónica da Xunta e confía en que, aproximadamente no verán, o Goberno galego finalice o Plan Achega, de xeito que a Xunta sexa unha oficina que funciona as 24 horas do día.

Feijóo avanza a aprobación de axudas para redes de 100 megas en polígonos industriais

Santiago, 7 de abril de 2016.- O presidente do PPdeG, Alberto Núñez Feijóo, avanzou hoxe a aprobación, por parte do Consello da Xunta, da convocatoria de axudas para despregar redes de 100 megas en polígonos industriais.
Como sinalou Feijóo, contar cunha conexión a Internet da máxima calidade é clave para acceder a moitos dos recursos que ofrece a rede de redes e precisou que esta é a primeira actuación do Plan de Banda Larga 2020, que prevé estender redes ultrarrápidas en zonas con alta demanda e que non teñen aínda cobertura.
O mandatario destacou que esta actuación ten como obxectivo que o 90% da superficie empresarial ocupada en Galicia poida ter acceso a redes de 100 megas en ano e medio. Para isto, a Xunta conta cun orzamento de máis de 3,4 millóns de euros ata 2018, cofinanciados nun 75% por fondos Feader. En todo caso, estímase que se mobilicen en total máis de 5,2 millóns de euros.
Con respecto a isto, Feijóo lembrou que hoxe, dos 164 polígonos industriais de Galicia, só 46 teñen xa acceso a redes de 100 megas e outros tres teñen previsto telos. Neste senso, indicou a medida aprobada hoxe oriéntase cara aos 115 restantes.
Con todo, apuntou tamén que, como mínimo, a Xunta busca que as redes ultrarrápidas cheguen a 50 polígonos máis que, sumados cos anteriores 49, suporían case o 90% da superficie empresarial ocupada.
Con respecto aos prazos, neste mesmo ano esperamos que as redes de 100 megas cheguen a 13 novos polígonos, a outros 22 en 2017 e, finalmente, a 15 máis en 2018, chegando así aos 50 que nos marcamos como mínimo.
Por outra banda, Feijóo lembrou que os beneficios deste Plan de Banda Larga 2020 non se limitarán só aos polígonos. De feito, o Goberno galego aspira a que, a finais da década, toda a poboación teña acceso a redes de 30 megas; e que seis de cada dez galegos dispoña de redes de 100 megas.
Segundo destacou o presidente, para todas estas actuacións, o Goberno galego dispón de máis de 100 millóns de euros. 

O PPdeG da comezo á organización do XVI Congreso autonómico

Santiago de Compostela, 6 de abril de 2016.- O portavoz do populares galegos, Miguel Tellado, avanzou que o PPdeG deu comezo á organización do XVI Congreso autonómico co que o partido culminará o proceso de renovación iniciado hai sete meses coa súa ponencia política e que tivo continuidade en marzo coa celebración dos congresos provinciais.
Así, o voceiro compareceu en rolda de prensa trala constitución oficial da Comisión Organizadora do conclave que tivo esta mañá unha xuntanza para comezar a tomar as primeiras decisións que dan inicio ao proceso congresual.
Tellado anunciou que unha das determinacións acordadas é que os candidatos a presidir o partido poderán iniciar a súa campaña electoral no momento en que formalicen a súa candidatura. “Do que se trata é de fomentar a participación, que poidan recorrer Galicia para presentar o seu proxecto e facelo o máis dinámico posible”, dixo o portavoz.
Así mesmo, o voceiro asegurou que xa teñen repasado o cronograma do congreso convocado o pasado sábado pola Xunta directiva do PPdeG e que agora están no prazo aberto -ata o próximo 18 de abril- para que calquera afiliado poida presentar a súa candidatura, sendo preciso acompañala tan só de 90 firmas dos 100.000 afiliados que ten o partido. Ademais, Tellado avanzou que está xa aprobado o modelo para a recollida de sinaturas e que está dispoñible na web do partido. 
O portavoz tamén apuntou que ían participar neste proceso 2.000 compromisarios, dos que 213 son membros natos -membros da Xunta directiva e da Comisión Organizadora do congreso-. No tocante á representación da emigración, o portavoz sinalou que será de 10 compromisarios e que os compromisarios electos serán un total de 1.777 distribuídos polas catro provincias -A Coruña terá 495, Lugo 278, Ourense 466, e Pontevedra 538-.
Tellado anunciou tamén que a vindeira semana reuniranse os equipos redactores dos dous manifestos que se lerán no conclave para comezar a traballar no balance do camiño percorrido en Galicia nos últimos anos e no que presentará un proxecto de futuro do que queda por percorrer.
Dese xeito, para o voceiro popular, “agora trátase de renovar a  estrutura do PPdeG respondendo á demanda da cidadanía que pide partidos dinámicos, renovados e cos pes na rúa”.
Do mesmo modo, Tellado manifestaba que a renovación foi a clave do éxito do partido xa que no 2006, coa marcha de Manuel Fraga, moitos creron que remataba unha etapa e que o partido non volvería a ser o que era. “Afortunadamente soubemos demostrar que, coa renovación, o PPdeG podía seguir sendo o partido referente para a maioría dos galegos. Esa renovación do 2006 permitiunos recuperar a  Xunta tan só tres anos despois e a de 2012 permitiunos seguir sendo o primeiro partido de Galicia”, engadiu.
Tal e como recoñeceu, agora xa non só pretenden seguir sendo a primeira forza da nosa comunidade senón seguir sustentando o Goberno galego “porque cremos que o PPdeG é a garantía da estabilidade política e institucional que supón que Galicia siga na senda do crecemento”, concluiu. 

GPP defenderá a posta en marcha dun programa de inserción para mulleres maltratadas

A sesión plenaria da vindeira semana incorpora a comparecencia dos concelleiros de Economía e Industria, e de Facenda

O PPDEG DEFENDERÁ NO PLENO ESTENDER O PROGRAMA DE DETECCIÓN PRECOZ DO CANCRO DE COLON A TODA GALICIA E FAVORECER A INSERCIÓN LABORAL DAS MULLERES VÍTIMAS DE VIOLENCIA

·    O Grupo Popular cuestionará ao Goberno galego sobre a pretensión da UE de prohibir a actividade da flota do arrastre en augas profundas en fondos superiores aos 800 metros e sobre a programación que a Xunta desenvolverá no marco da Feira do Libro de Bos Aires

Santiago, 5 de abril de 2016.- O Grupo Popular defenderá no Pleno da vindeira semana estender o programa galego de detección precoz do carcinoma colorrectal a todo o servizo galego de saúde e a posta en marcha dun programa de inserción laboral para mulleres vítimas de violencia de xénero. A sesión plenaria inclúe, ademais, a comparecencia dos conselleiros de Economía e Industria, para dar conta do desenvolvemento do polo tecnolóxico e industrial galego de avións non tripulados no aeródromo de Rozas en Lugo; e do conselleiro de Facenda, sobre o peche do exercicio orzamentario de 2015 e o cumprimento do obxectivo de estabilidade orzamentaria.

Pedro Puy informou que o Grupo Popular aceptou a solicitude dos grupos do BNG, AGE e Mixto para o debate da creación dunha comisión de investigación sobre a Fundación FESÁN.

A continuación, terá lugar a comparecencia do conselleiro de Economía e Industria sobre o desenvolvemento do polo tecnolóxico e industrial galego de avións non tripulados no aeródromo de Rozas de Lugo. Puy considerou esta comparecencia “moi acaída para comprobar como algún grupo parlamentario que continuamente demanda un maior peso da industria na nosa economía se opón a este proxecto, da mesma forma que se opuxeron a facilitar a continuidade da factoría de Citroën en Vigo, a de Reganosa en Ferrol e que esquecen agora, logo de que fora a principal cuestión que formulaban no último pleno, que o Tribunal Supremo blindou a decisión do actual Goberno galego sobre o concurso eólico do bipartito”.

A segunda comparecencia será do conselleiro de Facenda para informar sobre o peche do exercicio de 2015 e o cumprimento do obxectivo de estabilidade orzamentaria. Neste sentido, o portavoz popular subliñou que “Galicia foi unha das tres comunidades autónomas que cumpriu o obxectivo de déficit, polo que supoño que os eloxios que recibirá o conselleiro de Facenda serán do mesmo nivel e proporcionados ás críticas que se lle fan ao Goberno central por non ter cumprido o déficit”.


CANCRO DE COLON E INSERCIÓN MULLERES MALTRATADAS

O Grupo Popular defenderá na sesión plenaria dúas proposicións non de lei.  A primeira delas solicita a elaboración dun programa de inserción laboral para mulleres vítimas de violencia de xénero que incorpore un itinerario de inserción, formación para o emprego e actuación de apoio á conciliación. O portavoz popular considerou que “o emprego é a mellor forma de conseguir a integración social das mulleres que sofren maltrato, xa que facilita tanto a súa independencia económica como a mellora da súa autoestima”.

Unha segunda proposición non de lei ten como obxectivo a extensión do programa galego de detección precoz do carcinoma colorrectal a todas as estruturas de xestión integrada do Servizo Galego de Saúde. Puy explicou que este tipo de cancro está entre os tres máis frecuentes entre os homes e o segundo entre as mulleres da Unión Europea, polo que a Xunta xa puxo en marcha este programa de detección precoz de xeito piloto en Ferrol, ao que na actualidade sumáronse as zonas de Ourense, Verín e O Barco de Valdeorras.

Así mesmo, o Grupo Popular cuestionará ao Goberno galego sobre a pretensión da Unión Europea de prohibir a actividade da flota do arrastre en augas profundas en fondos superiores aos 800 metros e sobre a programación literaria e cultural que a Xunta desenvolverá no marco da Feira Internacional do Libro de Bos Aires.

A modo de resumo, Pedro Puy indicou que a sesión plenaria inclúe 28 iniciativas, das que dúas son comparecencias a proposta do Goberno, outras catro do Grupo Popular “e as 22 restantes corresponden aos grupos da oposición, é dicir, practicamente o 80 por cento do temas do Pleno”. Deste xeito, reiterou que “volve quedar patente que neste parlamento a oposición ten todas as oportunidades de traer a debate todas as cuestións que considera interesantes para a cidadanía”.

Feijóo destaca a creación de 25 prazas en centros de atención a persoas con autismo

Alberto Núñez Feijóo subliñou hoxe, durante unha visita ao centro de educación especial Coral Seoane en Ferrol, a creación neste 2016 de 25 novas prazas en centros de atención a persoas con Trastorno do Espectro Autista (TEA), a través dun investimento que ascende a 5 millóns de euros e que suma xa un total de 270 prazas públicas. “Queremos seguir acompañando o traballo que realizan asociacións como ASPANAES e centros coma este de Ferrol, para que os seus beneficios cheguen ao maior número de persoas posible”, aseverou.
Máis polo miúdo, Feijóo concretou que destas 25 novas prazas: 9 serán para o centro que ASPANAES ten no Concello das Pontes; 12 prazas concertadas no centro Castro Navás da Fundación Menela en Nigrán; e 4 máis para o centro de día da Asociación BATA en Vilagarcía de Arousa. E resaltou que con estas novas prazas, os centros de ASPANAES en Galicia disporán este ano: no Centro de Día Coral Seoane, de 46 prazas concertadas en 2016; o seu centro de día das Pontes pasará de 25 a 34 prazas públicas; no centro de día de Culleredo, de 23 prazas públicas; e no de Villestro, en Santiago, de 16 prazas en 2016.
Así mesmo, afirmou que a axuda que este ano a Xunta destina á Federación de Autismo de Galicia aumentou un 26% máis que en 2015, que era de 123.000 euros. “E aumentamos tamén a partida orzamentaria que destinamos aos convenios coas federacións integrantes do CERMI: de 3 millóns de euros en 2015 a 3,6 millóns de euros en 2016”, engadiu.
Durante a súa intervención, Feijóo referiuse tamén á posta en marcha do primeiro Protocolo para o Alumnado con Trastorno do Espectro Autista, que persegue facilitar a detección do TEA no ámbito escolar e proporcionar a esta alumnado unha atención educativa na que se implique o propio centro e as familias.
“Estamos a falar dunha ferramenta para os profesionais do ensino e para os pais, que pretende establecer o camiño que se debe seguir desde a aparición dos primeiros indicios, e orientar a intervención educativa dun xeito máis personalizado”, dixo, ao que engadiu que este protocolo propón un seguimento diario e trimestral para verificar se a atención foi a adecuada ou se é necesario artellar novas medidas.
Un compromiso coa discapacidade
O responsable do Goberno galego fixo extensivo tamén o compromiso da Xunta a todas aquelas persoas que padecen algún tipo de discapacidade. E, nesta liña subliñou que desde 2009 o orzamento dedicado a esta materia aumentou nun 45%, pasando dos 65 millóns de euros investidos en 2009 aos case 95 millóns de euros “que estamos a destinar á discapacidade este ano, 30 millóns de euros máis”.
Xunto con esta partida, Feijóo referiuse tamén a diversas iniciativas, entre as que destacou: a aprobación da Estratexia galega sobre discapacidade 2015-2020; e ao incremento de novos servizos de atención residencial e diúrna para os diferentes colectivos da discapacidade.
Nesta liña, destacou ademais axudas para implantar a Rede galega de Atención Temperá; para os servizos de promoción da autonomía persoal; para a formación do persoal das entidades do terceiro sector; para o asesoramento e formación de persoas con discapacidade; e axudas para a supresión de barreiras e a promoción da accesibilidade.
Feijóo concluíu destacando o traballo que ASPANAES está a facer coas preto de 400 persoas con trastorno autista que atende en toda a provincia da Coruña; unha labor que ten como obxectivo facilitar o apoio preciso desde o punto de vista terapéutico e educacional para que cada unha destas persoas poida desenvolver o seu proxecto de vida e favorecer a súa integración social. “Trátase de mellorar a súa calidade de vida e a das súas familias”, aseverou, lembrando que o Trastorno do Espectro Autista afecta a un de cada 100 nenos que nacen en España.

Puy traslada a satisfacción do GPP pola candidatura de Feijóo á presidencia do PPdeG

PEDRO PUY TRASLADA A “SATISFACCIÓN” DO GRUPO POPULAR POLA DECISIÓN DE FEIJÓO DE PRESENTAR A SÚA CANDIDATURA Á PRESIDENCIA DO PPDEG

·    Fixo referencia ao calendario previsto do Congreso do PPdeG e ao traballo no Parlamento para afirmar que “estamos traballando coa perspectiva de que as eleccións galegas sexan despois do verán, tendo sempre presente que a súa convocatoria é unha competencia específica do Presidente”

Santiago, 4 de abril de 2016.- O portavoz do Grupo Popular, Pedro Puy, trasladou hoxe a “satisfacción” de todos os deputados deste grupo parlamentario pola decisión de Alberto Núñez Feijóo de presentar a súa candidatura á Presidencia do Partido Popular de Galicia é, por conseguinte, á Xunta de Galicia. “Existe un amplo consenso neste grupo de que se adoptou a mellor decisión para o conxunto do PPdeG”, asegurou Puy, quen apuntou que servira para “incentivar e seguir traballando porque queda moito por facer nun país con máis de 230.000 desempregados pero que camiña na senda correcta dun traballo que Feijóo ten encabezado nos últimos anos e que o PPdeG vai seguir impulsando”.

Pedro Puy manifestou que a convocatoria do Congreso extraordinario do Partido Popular de Galicia e a confirmación da candidatura do Feijóo para a Presidencia do PPdeG é a continuación do  “profundo proceso de reflexión e renovación que se abriu no partido a raíz fundamentalmente do resultado das eleccións municipais”.

Neste sentido, indicou que este proceso deu comezo coa modificación do Goberno galego e da prioridade das súas políticas, centrándose e incrementando as dirixidas á política social; seguiu co debate das ideas no PPdeG a través dunha ponencia política; a renovación das estruturas provinciais do PP en Galicia, coa substitución de tres dos catros presidentes; e rematará coa celebración dun congreso extraordinario.

“A todo isto, súmanse determinadas novas no ámbito económico que tamén son positivas para as políticas desenvolvidas polo Partido Popular, como a concatenación de cifras de crecemento, así como que Galicia sexa unha das tres comunidades autónomas que cumpre os obxectivos de déficit; e o coñecemento hoxe do descenso do número de desempregados, nunha porcentaxe semellante á media nacional”, sinalou.

COA PERSPECTIVA DE DESPOIS DO VERÁN

Cuestionado sobre a data de celebración das eleccións autonómicas, Pedro Puy referiuse ao calendario previsto para a celebración do Congreso do PPdeG e ao traballo que se está a levar adiante no Parlamento galego para apuntar que “con todas estas cuestións estamos traballando na perspectiva de que as eleccións sexan despois do verán, pero tendo sempre presente que é unha competencia moi especificamente atribuída ao Presidente da Xunta”.

En concreto, o portavoz popular dixo que nestes momentos no Parlamento estase tramitando o Plan Estratéxico da Economía de Galicia, un documento complexo que ten que ir ao Pleno; e están e trámite os proxectos de lei do patrimonio cultural, de economía social, de coordinación das policías locais e a modificación da Lei de servizos sociais. Ademais, estase tramitando a iniciativa lexislativa popular sobre a pobreza enerxética e o custo da enerxía en Galicia, ao tempo que o Goberno galego anunciou recentemente a tramitación da Lei de espectáculos públicos, a lei de protección de animais domésticos e a lei de transporte por estrada de Galicia, á que se sumará a aprobación da Lei da Área metropolitana de Vigo.

“Queda moito por facer e o proxecto do Partido Popular ten moito que aportar, aproveitando unha situación inédita en España como é unha maioría sólida e estable que, se ben trata de chegar a acordos coa oposición, ten capacidade para aprobar normas importantes para o futuro de Galicia”, indicou.

Pedro Puy tamén valorou que Galicia teña “un calendario electoral diferenciado” das eleccións nacionais, polo que “salvo que haxa unha causa de extrema importancia, en principio estamos a traballar na perspectiva de que no caso de que haxa xerais non coincidan coas autonómicas”.