O Parlamento aproba reforzar presenza empresas pesqueiras en feiras internacionais


O PARLAMENTO GALEGO APROBA A INICIATIVA DO GRUPO POPULAR PARA REFORZAR A PRESENZA DAS EMPRESAS PESQUEIRAS EN FEIRAS INTERNACIONAIS

·    O acordo insta á Xunta a potenciar e ampliar as distintas liñas de apoio tanto desde o punto de vista técnico e económico

 

Santiago, 22 de marzo de 2016.- O Parlamento de Galicia vén de aprobar, co voto en contra dos grupos da oposición, a iniciativa do Grupo Popular dirixida a reforzar a presenza das empresas pesqueiras galegas nas feiras e mercados internacionais de maior prestixio.

O acordo insta á Xunta de Galicia a potenciar as distintas liñas de apoio que xa existen, ampliando os recursos económicos e técnicos dos que poden beneficiarse os distintos axentes profesionais do noso sector pesqueiro

O voceiro do Mar do Grupo Popular, Jose Manuel Balseiro, destacou que “unha medida destas características contribuirá a mellorar a eficiencia do sector, reforzar a súa visibilidade e presenza no exterior e aumentar a súa capacidade para ampliar mercados”.

UN SECTOR EXTERIOR EN ALZA

O portavoz popular salientou que “este é un momento especialmente acaído para este tipo de iniciativas posto que, segundo acreditan os datos, está en alza”. Neste sentido, subliñou que “as exportacións galegas de pescados e mariscos veñen de incrementarse un 9,2 por cento en 2014, superando as 210.000 toneladas e cun valor económico que supera tamén os 363 millóns de euros”.

Balseiro explicou tamén que as empresas galegas representan aproximadamente o 50 por cento do total do volume de exportacións de España de preparados, conservas e semiconservas e supón case o 60 por cento do valor económico das exportacións nestes sectores.

GPP defenderá no pleno cambios na cotización das persoas traballadoras do mar


O GRUPO POPULAR DEFENDERÁ NO PLENO FACILITAR AOS TRABALLADORES DO MAR QUE POIDAN AUMENTAR VOLUNTARIAMENTE AS SÚAS BASES DE COTIZACIÓN

·    A sesión plenaria procederá ao debate para a aprobación do proxecto de Lei de asistencia xurídica da administración xeral da comunidade autónoma e o debate de toma en consideración do proxecto de Lei de coordinación de policías locais

Santiago, 21 de marzo de 2016.- O Grupo Popular defenderá na sesión plenaria da vindeira semana dúas proposicións non de lei dirixidas a facilitar que os traballadores do mar poidan aumentar voluntariamente as súas bases de cotización e para solicitar ao Concello de A Coruña a apertura do túnel do Parrote, xa que pasaron máis de 100 días desde a recepción das obras.

A viceportavoz do Grupo Popular, Cristina Romero, explicou que “os traballadores do mar carecen na actualidade da posibilidade, do mesmo xeito que os traballadores autónomos e do sector agrario, de incrementar voluntariamente as cotizacións para que as pensións que cobren no futuro sexan maiores”.

CAMBIOS NORMATIVOS

Deste xeito, a través dunha proposición non de lei, o Grupo Popular solicita que o Goberno central impulse os cambios normativos necesarios para mellorar o sistema de cotización e protección sociolaboral das persoas traballadoras do mar, estudando co sector a posibilidade de establecer un sistema que permita aumentar voluntariamente as súas bases de cotización.

A segunda das proposicións non de lei que defenderá o Grupo Popular ten como obxectivo a apertura do túnel do Parrote en A Coruña, “unha obra que foi informada favorablemente polos técnicos do Ministerio de Fomento asegurando que o tráfico podía circular polo mesmo, pero que a día de hoxe o Concello de A Coruña aínda non puxo data para a súa apertura”.

“Van máis de cen días desde a data da recepción das obras e o túnel do Parrote segue pechado á circulación, provocando prexuízos e molestias de tráfico a máis de 40.000 veciños e propietarios de comercios e locais de hostalería”, apuntou.

DOUS PROXECTOS DE LEI

Previamente a estas proposicións non de lei, a sesión plenaria dará comezo co debate para a súa aprobación do proxecto de Lei de asistencia xurídica da administración xeral da comunidade autónoma e do seu sector público. “Esperamos que a aceptación que esta norma tivo en Comisión, onde saíu adiante sen ningún voto en contra, se manteña en Pleno para reforzar  os servizos xurídicos da Xunta na busca dun maior control da legalidade, da transparencia, da loita contra a corrupción e, en definitiva, dunha maior defensa dos dereitos dos cidadáns”, manifestou a viceportavoz popular.

Cristina Romero apuntou que “o obxectivo da Xunta e do Grupo Popular é que esta lei saia adiante co maior consenso posible para garantir a súa permanencia, ao tempo que sexa capaz de dar resposta ás necesidades de asesoramento, control e defensa que precise a administración autonómica, os seus entes e os seus empregados públicos”.

A continuación, procederase ao debate de toma en consideración do proxecto de Lei de coordinación de policías locais de Galicia, que actualiza e adapta a normativa existente ás novas normativas vixentes, establecendo unha serie de cambios e axustes que permitan acadar un maior índice de eficacia na organización e estrutura dos cadros de persoal das policías locais.

Entre as medidas que incorpora este proxecto de Lei, Romero subliñou a eliminación do tope de idade dos 36 anos para acceder ao corpo de policía local galego, así como unha mellora nos procesos de cobertura de prazas de mandos, que facilita tanto a promoción interna, como a mobilidade con ascenso desde outros corpos.

Por último, o Grupo Popular cuestionará ao Goberno sobre as consecuencias da sentenza do Tribunal Supremo que anula a prórroga das concesións de transporte público interurbano en Galicia, así como pola viabilidade dun cambio de modelo de xestión dos consorcios provinciais de bombeiros.


DEMAGOXIA COA BANDEIRA EUROPEA

Cuestionada sobre a decisión dalgúns concellos de arriar a bandeira europea en repulsa polo política europea sobre refuxiados, Cristina Romero manifestou que “estamos en contra” desta decisión e lembrou que existe un acordo unánime no Congreso dos Deputados que defende que calquera actuación debe respectar os dereitos dos solicitantes de asilo, a legalidade internacional e a europea. “A isto sumouse o acordo razoable e sensato asinado a nivel europeo o pasado venres que garante o respecto rigoroso á legalidade europea e internacional e a exclusión expresa de calquera tipo de expulsión colectiva”, indicou.

Así mesmo, a viceportavoz criticou “a demagoxia coa que actúan determinados grupos nacionalistas respecto desta situación, xa que por un lado están a arriar a bandeira de Europa, pero por outra poñen as dúas mans para recibir investimentos de Europa para as cidades onde gobernan”.

A Xunta Directiva do PPdeG reunirase o 2 de abril para convocar o Congreso autonómico

Santiago de Compostela, 18 de marzo de 2016.- O Comité de Dirección do PPdeG acordou hoxe a celebración dunha Xunta Directiva para o vindeiro sábado, 2 de abril. Nesa reunión está previsto a convocatoria do Congreso autonómico do partido, do que sairá unha nova estrutura orgánica e, por suposto, a persoa que encabezará a lista dos populares de cara as próximas eleccións autonómicas.
Desa reunión sairá a data concreta do conclave, que en todo caso celebrarase na cidade de Ourense. 
Na Xunta Directiva aprobarase, ademais, o Regulamento do Congreso, o cronograma e os prazos que regularán o mesmo, e os dez integrantes da  Comisión organizadora. 

Feijóo avanza que A Xunta valida o acordo para a Lei da Área Metropolitana de Vigo

Santiago, 17 de marzo de 2016.- O líder dos populares galegos, Alberto Núñez Feijóo, sinalou hoxe que o Consello da Xunta validou o acordo definitivo para a posta en marcha da Lei da Área Metropolitana de Vigo, que dotará aos 14 concellos que a compoñen dun instrumento útil e eficaz ao servizo dos cidadáns.
Logo de lembrar que o pasado mes de xullo acordou co alcalde de Vigo comezar as negociacións para modificar a lei da área de 2012, Feijóo puxo en valor que apenas oito meses despois haxa un texto consensuado entre o Goberno galego e os 14 concellos. Do mesmo xeito, engadiu que este será aprobado definitivamente polo Goberno galego en canto se cumpran os dous requisitos previamente pactados: a validación por parte dos órganos de goberno dos concellos do dito texto e a integración do Concello de Vigo no plan de transporte metropolitano da Xunta.
Con respecto a isto, Feijóo asegurou que a Xunta, pola súa banda, vai axilizar ao máximo os trámites administrativos e seguirá mantendo o seu obxectivo de que, se os concellos cumpren, se poida remitir o texto inmediatamente ao Parlamento de xeito que sexa aprobado neste período de sesións.
As principais cuestións do borrador da lei
Entre as principais cuestións que se inclúen no borrador da lei, o presidente destacou a incorporación dun sistema de voto ponderado á xunta de goberno metropolitana, en función do número de representantes dos distintos concellos e cun mecanismo de corrección para facelo máis equilibrado.
Así mesmo, fixo fincapé tamén na creación dun comité de coordinación en materia de transporte metropolitano, no que terán voz os 14 concellos e no que contarán con voto a Xunta, o Concello de Vigo e un representante do resto dos municipios.
Por outra banda, Feijóo sinalou que o borrador inclúe un sistema de asunción de competencias e financiamento áxil e dinámico, ademais dun mecanismo tamén sinxelo para os novos concellos que se incorporen a área, así como para que algún dos que está poida abandonala se voluntariamente así o decide.
En definitiva, segundo o mandatario, trátase dun texto que é froito dun traballo que rematou en consenso e que recoñece a posición de preeminencia do Concello de Vigo ao tempo que garante un exercicio dialogado dese liderado. Ademais, sitúa a estes 14 concellos como un exemplo en materia de cooperación e ofrece unha ferramenta útil para poder prestar mellores servizos aos seus veciños.

Feijóo anuncia que os empregados públicos recibirán a metade da paga extra de 2012

Santiago, 17 de marzo de 2016.- O presidente do PPdeG, Alberto Núñez Feijóo, avanzou hoxe que os empregados públicos van recibir este ano o 50% restante da paga extra de 2012 aprazada polo Goberno central. Cobrarán esta cantidade repartida entre as nóminas de abril e setembro.
A primeira metade desta paga foi aboada xa ao longo de 2015, en dous pagamentos repartidos nos meses de maio e outubro. “Non nos esquecemos dos que máis se comprometeron co déficit público —indicou o presidente—, dos que fixeron posible que Galicia fose a única comunidade que non acudiu ao FLA, a que menos incrementou a súa débeda pública desde o ano 2015 e a segunda que menos o fixo desde 2009”
“Máis de 100.000 empregados públicos recuperarán poder adquisitivo e recibirán este ano, de media, 900 euros”, dixo Feijóo, 450 en abril e 450 en setembro. Isto suporá para as arcas públicas un desembolso total de máis de 100 millóns de euros.
Complemento específico
A mellora da situación económica tamén fai posible, segundo adiantou o presidente, que se volva aboar o complemento específico das pagas extra. Era unha medida que, inicialmente, ía facerse efectiva en 2018. Porén, ter as arcas autonómicas saneadas fai posible que se adiante un ano e que este complemento volva pagarse a partir de xaneiro 2017.
O mandatario recordou todas as medidas que se impulsaron nos últimos meses para devolverlles “ás 90.000 familias que conforman os empregados públicos da Comunidade” os esforzos que fixeran durante a recesión: a oferta de emprego público máis grande da última década, concursos de traslados, unha flexibilidade laboral á que se acolleron xa máis de 7.700 persoas e novas medidas para favorecer a conciliación.

Feijóo di que o orzamento de Galicia 1000 permitirá apoiar case 1.500 proxectos

Santiago, 17 de marzo de 2016.- O presidente do PPdeG, Alberto Núñez Feijóo, avanza que a terceira edición do programa de financiamento Galicia 1000 reforza o orzamento un 10% ata chegar aos 100 millóns de euros, o que permitirá mobilizar 330 millóns e apoiar case 1.500 proxectos de pemes galegas.
“O que buscamos é que ningún proxecto solvente se quede sen apoio”, aseverou, incidindo en que o programa enmárcase na prioridade da política económica da Xunta de fortalecer o tecido empresarial e industrial de Galicia, reforzando o investimento que permita crecer ás compañías, impulsando a súa capacidade innovadora, a súa internacionalización e a súa adaptación á Industria 4.0.
Neste senso, Feijóo precisou que o programa Galicia 1000 encaixa en todas esas liñas, e tamén na Axenda da Competitividade Galicia-Industria 4.0, que ten como obxectivos crear 50.000 empregos industriais ata 2020 e elevar o peso da industria no PIB ata o 20%.
O mandatario lembrou que esta iniciativa permitiu nos dous anos que leva vixente poñer en marcha máis de 2.000 proxectos na comunidade, mobilizando 400 millóns de euros. E, destacou que a nova edición ten como unha das súas principais novidades a inclusión de instrumentos financeiros innovadores entre as distintas ferramentas das que disporán as empresas, sumándose a liñas como as de capital risco, os préstamos Jeremie e BEI, ou as liñas de avais.
Feijóo concluíu facendo fincapé en que o novo Programa Galicia 1000 conta con maior dotación orzamentaria e con ferramentas renovadas, “co obxectivo de garantir que un proxecto viable en Galicia poda contar cun financiamento público no caso de que cumpra os requisitos de viabilidade e solvencia desde o punto de vista empresarial”.

O pleno insta á Xunta a presentar os datos do rexistro galego de infarto de miocardio

O PLENO APROBA INSTAR Á XUNTA A PRESENTAR NO PARLAMENTO OS DATOS DO REXISTRO ÚNICO DE INFARTO AGUDO DE MIOCARDIO E AS CONCLUSIÓNS EN BASE AOS MESMOS

·    Núñez Centeno subliñou que Galicia “conta cunha atención cardiolóxica das máis avanzadas de España, destacando a excelente capacitación profesional, a dotación tecnolóxica axeitada e completa, cunha boa distribución xeográfica, e cunha organización rexionalizada e en rede”

Santiago, 16 de marzo de 2016.- O Parlamento de Galicia aprobou hoxe, logo dunha transacción entre o Grupo Popular e o Grupo Mixto, unha proposición non de lei a través da que se insta á Xunta de Galicia a presentar, antes do remate do próximo mes de abril, os datos correspondentes ao rexistro galego de infarto agudo de miocardio (Regaliam), as conclusións da Consellería de Sanidade en base aos mesmos e as medidas oportunas que se precisen en función dos resultados para a mellora da atención das persoas enfermas.

O portavoz de Sanidade do Grupo Popular, Aurelio Núñez Centeno, lembrou que esta mesma mañá se presentaron os datos técnicos deste rexistro galego, pero “seguimos a manter a nosa proposta para que a Consellería presente neste parlamento os datos recollidos, a interpretación dos mesmos e a valoración dos posibles novos recursos necesarios para a atención deste grupo de enfermos en función dos resultados”.


NACEU DUNHA INICIATIVA PARLAMENTARIA

Núñez Centeno recordou que o Regaliam nace logo da aprobación no Parlamento o 3 de decembro de 2014 dunha iniciativa do Grupo Popular na que se instaba á Xunta a elaborar un rexistro único de ámbito galego que recollera toda a información sobre morbi-mortalidade en relación co infarto agudo de miocardio. “O principal obxectivo era trasladar á cidadanía unha mensaxe clara e inequívoca de que a atención en toda Galicia é moi boa en caso de infarto agudo de miocadio”, apuntou.

Neste sentido, o portavoz popular subliñou que Galicia “conta cunha atención cardiolóxica no ámbito da cardiopatía isquémica das máis avanzadas de España, destacando a excelente capacitación profesional, unha dotación tecnolóxica axeitada e completa, cunha boa distribución xeográfica, e cunha organización rexionalizada e en rede, coincidindo coas recomendacións das sociedades científicas, entre elas a Sociedade Española de Cardioloxía”.

DATOS OBXECTIVOS E COMPARABLES

Aurelio Núñez manifestou que “será moi importante valorar e comparar no Regaliam as cifras de falecemento en aqueles enfermos de infarto agudo de miocardio que superaron os 120 minutos entre o inicio da clínica e a revascularización, así como valorar as decisións adecuadas para o control da evolución posterior dos enfermos tratados despois deses 120 minutos”.

“A súa supervivencia en anos, a súa calidade de vida ou a presenza de complicacións derivadas do seu proceso inicial de infarto agudo de miocardio son datos importantes a avaliar”, sinalou o portavoz popular.

Núñez Centeno afirmou que “ter un rexistro único e cos mesmos parámetros permitirá dispoñer de datos obxectivos e comparables de todas as áreas de saúde de Galicia para tomar decisións sobre as necesidades reais de recursos humanos e materiais, así como sobre a distribución xeográfica dos mesmos, para unha atención de calidade aos enfermos que sufran un infarto agudo de miocardio en Galicia”. 

O Parlamento aproba demandar á Alcadía de Madrid manter a rúa Álvaro Cunqueiro

O PARLAMENTO APROBA, A PROPOSTA DO GRUPO POPULAR, DEMANDAR Á ALCALDÍA DE MADRID O MANTEMENTO DA RÚA ÁLVARO CUNQUEIRO

·    Tamén se insta ás institucións e entidades culturais de  Galicia a honrar publicamente o traballo desenvolvido por Cunqueiro, ao tempo que se solicita ao Consello da Cultura elaborar un informe sobre a relevancia literaria deste escritor e a súa contribución á defensa e difusión da lingua e cultura galegas

·    O portavoz de Cultura afirmou que retirar a rúa “sería un acto de intolerancia, revanchismo e cinismo intolerable, propio de listas negras e censura ideolóxica impropia da sociedade actual”

Santiago, 16 de marzo de 2016.- O Parlamento de Galicia aprobou hoxe a proposición non de lei do Grupo Popular, á que se sumaron emendas do PSOE e do BNG, a través da que se demanda á Alcaldía de Madrid o mantemento da rúa en memoria de Álvaro Cunqueiro no rueiro desta cidade. Así mesmo, insta ás institucións e entidades culturais de Galicia a honrar publicamente o traballo desenvolvido por Álvaro Cunqueiro, ao tempo que solicita ao Consello da Cultura Galega elaborar un informe sobre a relevancia literaria deste escritor e a súa contribución á defensa e difusión da lingua e cultura galegas.

O portavoz de Cultura do Grupo Popular, Agustín Baamonde, considerou a Álvaro Cunqueiro como “un grande da cultura de Galicia e de España, un home dunha obra tan grande, complexa e extraordinaria que sería mellor pintalo que explicalo, porque faría falta un dicionario enteiro e aínda non chegaría”.

Baamonde lembrou que o feito de retirar a rúa Álvaro Cunqueiro de Madrid “aínda non está consumado, porque o propio Concello xa rompeu a súa relación coa cátedra da Universidade Complutense que elaborou o informe” que relaciona ao escrito co franquismo.

“Sería un acto de intolerancia, revanchismo e cinismo intolerable, propio de listas negras e censura ideolóxica impropia da sociedade actual”, sinalou o portavoz popular. Por este motivo, reclamou “respecto para Cunqueiro e para Galicia”, para o que “invoco a propia Lei de Memoria Histórica que defende o espírito de respecto e non confrontación”.


DECISIÓN SEN FUNDAMENTO

Baamonde sinalou que a decisión de retirar a rúa a Álvaro Cunqueiro “carece de fundamento porque basta con revisar a súa biografía para ver que non tivo participación activa na represión franquista e tamén porque o recoñecemento outorgado a Cunqueiro e outras persoas incluídas nese listado non foi pola súa afiliación franquista, senón polo valor inmenso da súa obra”.

“A opinión pública outorgoulle o seu recoñecemento e o levou a categoría de referente da cultura de Galicia e España e colocouno na historia”, lembrou o portavoz popular, quen fixo referencia á “gran cantidade de rueiros e prazas que levan o seu nome, entre eles o novo hospital público de Vigo”.

Deste xeito, apuntou que “quen é capaz de concitar tal unanimidade e impacto na conciencia colectiva desta terra non pode ser denostado como franquista”, ao tempo que salientou o seu papel galeguista e o dominio extraordinario tanto da lingua galega como da castelá”.

A modificación da Lei de Servizos Sociais recoñece novos dereitos ás persoas usuarias

MARTA RODRÍGUEZ AFIRMA QUE A REFORMA DA LEI DE SERVIZOS SOCIAIS “RECOÑÉCE OS DEREITOS DE LIBRE ELECCIÓN, AO ARRAIGO Á CONTORNA SOCIAL E Á ATENCIÓN PERSONALIZADA E INTEGRAL”

·    “Trátase dun documento aberto ás propostas dos grupos parlamentarios que melloren o texto orixinal e que permitan que saia adiante co maior respaldo”, apuntou

Santiago, 15 de marzo de 2016.- A portavoz de Asuntos Sociais do Grupo Popular, Marta Rodríguez Arias, afirmou hoxe que a través da modificación parcial da Lei de servizos sociais “recoñécense por primeira vez unha serie de dereitos ás persoas usuarias, como o dereito da libre elección, o dereito ao arraigo da persoa á súa contorna social e o dereito á atención personalizada e integral”. Esta modificación proposta polo Grupo Popular, que hoxe iniciou a súa tramitación parlamentaria coa aprobación da súa toma en consideración polo Pleno, introduce novos modelos de xestión: o concerto social, como sistema diferenciado da modalidade de concerto xeral; e os acordos marco coas entidades, promovendo a libre elección das persoas usuarias.

Rodríguez Arias lembrou que a Lei 13/2008 de servizos sociais de Galicia regula no seu artigo 29 as formas de prestación dos servizos sociais na Comunidade galega, establecendo que serán prestados polas administracións públicas directamente, ou de maneira indirecta a través das diversas modalidades de contratación da xestión de servizos públicos establecidas na normativa reguladora dos contratos do sector público.

“Porén, a Directiva europea 2014/24 sobre contratación pública establece que os estados membros e os poderes públicos teñen liberdade para organizar os servizos sociais, de maneira que non sexa necesario celebrar contratos públicos sempre que dito sistema garanta a publicidade suficiente e se axuste aos principios de transparencia e non discriminación”, indicou a portavoz popular.

ADIANTARSE Á LEXISLACIÓN ESTATAL

Deste xeito, esta directiva abre a posibilidade de que as administracións públicas adopten fórmulas de organización da xestión dos servizos públicos no ámbito dos servizos sociais distintos dos contidos na lexislación contractual. “Á espera de que o Estado traslade ao dereito español esta directiva, que deberá traducirse nunha nova Lei de contratos do sector público, é necesario establecer o concerto social mediante a modificación da Lei de servizos sociais de Galicia”, sinalou Rodríguez Arias.

Esta modificación xa foi levada a cabo noutras comunidades autónomas como País Vasco, Baleares, Asturias e Murcia, que estableceron legalmente o concerto social como nova modalidade para a mellora da xestión dos servizos sociais de proximidade por parte das entidades non lucrativas de acción social.

PRIORIDADE ÁS ENTIDADES SEN ÁNIMO DE LUCRO

Marta Rodríguez explicou que esta reforma da Lei de servizos sociais establece o concerto social como modalidade contractual diferenciada do concerto xeral recollido na norma xeral de contratos do sector público. Neste sentido, apuntou que “no establecemento destes concertos sociais atenderanse aos principios de atención personalizada e integral, arraigo da persoa na contorna de atención social e libre elección da persoa usuaria”.

Así mesmo, engadiu que con estes concertos sociais as administracións públicas “darán prioridade ás entidades sen ánimo de lucro, sempre que se garanta a libre concorrencia e os principios de igualdade de trato, de non discriminación e de transparencia”, ao tempo que establecerán fórmulas para garantir o mantemento da prestación por parte das entidades que xa os viñan prestando, “cuestión que favorece a continuidade dos colectivos que traballan neste sector e contan con acreditada experiencia”.

ACORDOS MARCO PARA ATENDER A LIBRE ELECCIÓN

A reforma da Lei de servizos sociais tamén incorpora a posibilidade de que as administracións públicas poidan asinar acordos marco con entidades sociais para a prestación de determinados servizos sociais durante un período concreto de tempo. “Trátase dunha figura contractual prevista na normativa de contratos do sector público co obxectivo de atender, de forma prioritaria, a libre elección da persoa destinataria do servizo de que se trate”, explicou Marta Rodríguez.

A portavoz popular subliñou que esta proposición de Lei presentada polo Grupo Popular “nace das aportacións realizadas polo CERMI-Galicia” e se trata dun “documento aberto ás propostas dos grupos parlamentarios que melloren este texto orixinal e que permitan que saia adiante co maior respaldo posible”. 

Feijóo di que a renovación do PPdeG pon ao partido en mellor situación que en 2009

Pontevedra, 13 de marzo de 2016.- O presidente do PPdeG, Alberto Núñez Feijóo, asegurou hoxe que a renovación efectuada no partido tras os últimos congresos provinciais sitúa a esta formación en mellores condicións que en 2009 para obter unha vitoria electoral.
Así se pronunciou durante a clausura do Congreso do PP de Pontevedra, no que Alfonso Rueda foi elixido novo presidente provincial e que culmina a renovación do partido en todas as provincias galegas. Feijóo equiparou a situación actual coa que había en 2009, na que “se reparten sillóns sen ter nin acordo nin votos”. 
“Recordo como en 2009 PSOE e nacionalistas xa se estaban a repartir os cargos sen que se produciran aínda as eleccións”, asegurou, e subliñou que non se deron conta de que esas eleccións as tiñan perdidas porque o PP comezou a gañalas previamente, cando decidiu renovarse e unir as súas forzas no Congreso de renovación de Manuel Fraga, en 2006. 
Como daquela, o presidente dos populares galegos asegurou que ao longo destas semanas viu un partido vivo e activo, e que por máis que outros tapen os oídos e non queiran ver, o PP ten a voz dos 7,3 millóns de españois que o votaron. 
Precisamente con motivo desta nova etapa que o PPdeG comeza con ilusión, o presidente dos populares galegos reivindicou unha política para as persoas e con persoas con vocación de servizo, fronte a aqueles que cren que “é máis importante un tuit enxeñoso que un orzamento rigoroso”.  
Nesta liña, defendeu a política na que a experiencia é un valor, así como unha política responsable e que se poida tomar en serio, na que gañar non é o mesmo que perder porque importa o que opina a xente, na que se exerce con humildade. “E reivindico que quen mellor representa esa política é Mariano Rajoy”, concluíu. 
QUEN MELLOR REPRESENTA A PONTEVEDRA
Feijóo trasladou o seu apoio ao presidente do PP porque, segundo enfatizou, é o único candidato que actuou con responsabilidade desde as eleccións xerais. Ademais dixo que Rajoy é quen mellor podería representar a marca de Pontevedra no mundo.
No comportamento contrario, situou ás forzas políticas que teñen o país parado porque non asumen o resultado das urnas e considerou que isto “o único que ten de nova política é que nunca antes se dera tal nivel de irresponsabilidade”. 
“Pasamos do fracaso sen precedentes de Pedro Sánchez nas urnas ao fracase sen precedentes de Pedro Sánchez na investidura”, manifestou, e lamentou que parece que o terceiro fracaso que quere o candidato socialista sexa o de España. “Parece que queren que o seu fracaso sexa o de todo o país para ver se así sacan proveito”, resumiu, e solicitou que non se enroquen e permitan a España seguir adiante. 
Sobre o pacto entre PSOE e Ciudadanos, considerou que non é un pacto de investidura nin de goberno, senón de non agresión, de bloqueo e de interese electoralista. “Demostran que o país é o de menos, e prepáranse para as urnas”, dixo, e a continuación preguntouse para que, se estes partidos demostraron que o resultado das urnas lles dá igual. “Do PSOE poderíamos esperalo, pero desde logo que Ciudadanos decepciona”, trasladou.

RUEDA E LOUZÁN
Feijóo tamén felicitou ao PP de Pontevedra por ter escollido a Alfonso Rueda como novo presidente da formación. Despois de recordar que tanto a vitoria electoral de 2009 como moitas outras non serían posibles sen as súas achegas, considerou que o novo papel de Rueda é un acerto, como o foron todas as responsabilidades anteriores que el lle encomendou, tanto como secretario xeral do PPdeG como conselleiro e vicepresidente da Xunta de Galicia. 
“Cumpriu coas expectativas e coas súas funcións”, dixo e, tras recordar que Rueda foi o secretario xeral que máis tempo estivo no seu cargo na nosa historia, asegurou que o PPdeG tamén tivo nel a un “bo tipo”. 
Igualmente, tamén recoñeceu o papel de Rafael Louzán á fronte do PP pontevedrés ao longo dos últimos anos. Así, recordou que o azul do PPdeG estivo sempre nos mapas de Pontevedra en todas as eleccións, en ocasións de xeito abrumador, e apuntou que tantas vitorias electorais se acadan con dedicación e esforzo. Por iso, agradeceulle a Louzán o seu traballo e a súa disposición permanente. “Foi quen me abriu a porta dunhas listas electorais; sei onde estou e grazas a quen estou”, engadiu.