O pleno insta á Xunta a presentar os datos do rexistro galego de infarto de miocardio

O PLENO APROBA INSTAR Á XUNTA A PRESENTAR NO PARLAMENTO OS DATOS DO REXISTRO ÚNICO DE INFARTO AGUDO DE MIOCARDIO E AS CONCLUSIÓNS EN BASE AOS MESMOS

·    Núñez Centeno subliñou que Galicia “conta cunha atención cardiolóxica das máis avanzadas de España, destacando a excelente capacitación profesional, a dotación tecnolóxica axeitada e completa, cunha boa distribución xeográfica, e cunha organización rexionalizada e en rede”

Santiago, 16 de marzo de 2016.- O Parlamento de Galicia aprobou hoxe, logo dunha transacción entre o Grupo Popular e o Grupo Mixto, unha proposición non de lei a través da que se insta á Xunta de Galicia a presentar, antes do remate do próximo mes de abril, os datos correspondentes ao rexistro galego de infarto agudo de miocardio (Regaliam), as conclusións da Consellería de Sanidade en base aos mesmos e as medidas oportunas que se precisen en función dos resultados para a mellora da atención das persoas enfermas.

O portavoz de Sanidade do Grupo Popular, Aurelio Núñez Centeno, lembrou que esta mesma mañá se presentaron os datos técnicos deste rexistro galego, pero “seguimos a manter a nosa proposta para que a Consellería presente neste parlamento os datos recollidos, a interpretación dos mesmos e a valoración dos posibles novos recursos necesarios para a atención deste grupo de enfermos en función dos resultados”.


NACEU DUNHA INICIATIVA PARLAMENTARIA

Núñez Centeno recordou que o Regaliam nace logo da aprobación no Parlamento o 3 de decembro de 2014 dunha iniciativa do Grupo Popular na que se instaba á Xunta a elaborar un rexistro único de ámbito galego que recollera toda a información sobre morbi-mortalidade en relación co infarto agudo de miocardio. “O principal obxectivo era trasladar á cidadanía unha mensaxe clara e inequívoca de que a atención en toda Galicia é moi boa en caso de infarto agudo de miocadio”, apuntou.

Neste sentido, o portavoz popular subliñou que Galicia “conta cunha atención cardiolóxica no ámbito da cardiopatía isquémica das máis avanzadas de España, destacando a excelente capacitación profesional, unha dotación tecnolóxica axeitada e completa, cunha boa distribución xeográfica, e cunha organización rexionalizada e en rede, coincidindo coas recomendacións das sociedades científicas, entre elas a Sociedade Española de Cardioloxía”.

DATOS OBXECTIVOS E COMPARABLES

Aurelio Núñez manifestou que “será moi importante valorar e comparar no Regaliam as cifras de falecemento en aqueles enfermos de infarto agudo de miocardio que superaron os 120 minutos entre o inicio da clínica e a revascularización, así como valorar as decisións adecuadas para o control da evolución posterior dos enfermos tratados despois deses 120 minutos”.

“A súa supervivencia en anos, a súa calidade de vida ou a presenza de complicacións derivadas do seu proceso inicial de infarto agudo de miocardio son datos importantes a avaliar”, sinalou o portavoz popular.

Núñez Centeno afirmou que “ter un rexistro único e cos mesmos parámetros permitirá dispoñer de datos obxectivos e comparables de todas as áreas de saúde de Galicia para tomar decisións sobre as necesidades reais de recursos humanos e materiais, así como sobre a distribución xeográfica dos mesmos, para unha atención de calidade aos enfermos que sufran un infarto agudo de miocardio en Galicia”. 

O Parlamento aproba demandar á Alcadía de Madrid manter a rúa Álvaro Cunqueiro

O PARLAMENTO APROBA, A PROPOSTA DO GRUPO POPULAR, DEMANDAR Á ALCALDÍA DE MADRID O MANTEMENTO DA RÚA ÁLVARO CUNQUEIRO

·    Tamén se insta ás institucións e entidades culturais de  Galicia a honrar publicamente o traballo desenvolvido por Cunqueiro, ao tempo que se solicita ao Consello da Cultura elaborar un informe sobre a relevancia literaria deste escritor e a súa contribución á defensa e difusión da lingua e cultura galegas

·    O portavoz de Cultura afirmou que retirar a rúa “sería un acto de intolerancia, revanchismo e cinismo intolerable, propio de listas negras e censura ideolóxica impropia da sociedade actual”

Santiago, 16 de marzo de 2016.- O Parlamento de Galicia aprobou hoxe a proposición non de lei do Grupo Popular, á que se sumaron emendas do PSOE e do BNG, a través da que se demanda á Alcaldía de Madrid o mantemento da rúa en memoria de Álvaro Cunqueiro no rueiro desta cidade. Así mesmo, insta ás institucións e entidades culturais de Galicia a honrar publicamente o traballo desenvolvido por Álvaro Cunqueiro, ao tempo que solicita ao Consello da Cultura Galega elaborar un informe sobre a relevancia literaria deste escritor e a súa contribución á defensa e difusión da lingua e cultura galegas.

O portavoz de Cultura do Grupo Popular, Agustín Baamonde, considerou a Álvaro Cunqueiro como “un grande da cultura de Galicia e de España, un home dunha obra tan grande, complexa e extraordinaria que sería mellor pintalo que explicalo, porque faría falta un dicionario enteiro e aínda non chegaría”.

Baamonde lembrou que o feito de retirar a rúa Álvaro Cunqueiro de Madrid “aínda non está consumado, porque o propio Concello xa rompeu a súa relación coa cátedra da Universidade Complutense que elaborou o informe” que relaciona ao escrito co franquismo.

“Sería un acto de intolerancia, revanchismo e cinismo intolerable, propio de listas negras e censura ideolóxica impropia da sociedade actual”, sinalou o portavoz popular. Por este motivo, reclamou “respecto para Cunqueiro e para Galicia”, para o que “invoco a propia Lei de Memoria Histórica que defende o espírito de respecto e non confrontación”.


DECISIÓN SEN FUNDAMENTO

Baamonde sinalou que a decisión de retirar a rúa a Álvaro Cunqueiro “carece de fundamento porque basta con revisar a súa biografía para ver que non tivo participación activa na represión franquista e tamén porque o recoñecemento outorgado a Cunqueiro e outras persoas incluídas nese listado non foi pola súa afiliación franquista, senón polo valor inmenso da súa obra”.

“A opinión pública outorgoulle o seu recoñecemento e o levou a categoría de referente da cultura de Galicia e España e colocouno na historia”, lembrou o portavoz popular, quen fixo referencia á “gran cantidade de rueiros e prazas que levan o seu nome, entre eles o novo hospital público de Vigo”.

Deste xeito, apuntou que “quen é capaz de concitar tal unanimidade e impacto na conciencia colectiva desta terra non pode ser denostado como franquista”, ao tempo que salientou o seu papel galeguista e o dominio extraordinario tanto da lingua galega como da castelá”.

A modificación da Lei de Servizos Sociais recoñece novos dereitos ás persoas usuarias

MARTA RODRÍGUEZ AFIRMA QUE A REFORMA DA LEI DE SERVIZOS SOCIAIS “RECOÑÉCE OS DEREITOS DE LIBRE ELECCIÓN, AO ARRAIGO Á CONTORNA SOCIAL E Á ATENCIÓN PERSONALIZADA E INTEGRAL”

·    “Trátase dun documento aberto ás propostas dos grupos parlamentarios que melloren o texto orixinal e que permitan que saia adiante co maior respaldo”, apuntou

Santiago, 15 de marzo de 2016.- A portavoz de Asuntos Sociais do Grupo Popular, Marta Rodríguez Arias, afirmou hoxe que a través da modificación parcial da Lei de servizos sociais “recoñécense por primeira vez unha serie de dereitos ás persoas usuarias, como o dereito da libre elección, o dereito ao arraigo da persoa á súa contorna social e o dereito á atención personalizada e integral”. Esta modificación proposta polo Grupo Popular, que hoxe iniciou a súa tramitación parlamentaria coa aprobación da súa toma en consideración polo Pleno, introduce novos modelos de xestión: o concerto social, como sistema diferenciado da modalidade de concerto xeral; e os acordos marco coas entidades, promovendo a libre elección das persoas usuarias.

Rodríguez Arias lembrou que a Lei 13/2008 de servizos sociais de Galicia regula no seu artigo 29 as formas de prestación dos servizos sociais na Comunidade galega, establecendo que serán prestados polas administracións públicas directamente, ou de maneira indirecta a través das diversas modalidades de contratación da xestión de servizos públicos establecidas na normativa reguladora dos contratos do sector público.

“Porén, a Directiva europea 2014/24 sobre contratación pública establece que os estados membros e os poderes públicos teñen liberdade para organizar os servizos sociais, de maneira que non sexa necesario celebrar contratos públicos sempre que dito sistema garanta a publicidade suficiente e se axuste aos principios de transparencia e non discriminación”, indicou a portavoz popular.

ADIANTARSE Á LEXISLACIÓN ESTATAL

Deste xeito, esta directiva abre a posibilidade de que as administracións públicas adopten fórmulas de organización da xestión dos servizos públicos no ámbito dos servizos sociais distintos dos contidos na lexislación contractual. “Á espera de que o Estado traslade ao dereito español esta directiva, que deberá traducirse nunha nova Lei de contratos do sector público, é necesario establecer o concerto social mediante a modificación da Lei de servizos sociais de Galicia”, sinalou Rodríguez Arias.

Esta modificación xa foi levada a cabo noutras comunidades autónomas como País Vasco, Baleares, Asturias e Murcia, que estableceron legalmente o concerto social como nova modalidade para a mellora da xestión dos servizos sociais de proximidade por parte das entidades non lucrativas de acción social.

PRIORIDADE ÁS ENTIDADES SEN ÁNIMO DE LUCRO

Marta Rodríguez explicou que esta reforma da Lei de servizos sociais establece o concerto social como modalidade contractual diferenciada do concerto xeral recollido na norma xeral de contratos do sector público. Neste sentido, apuntou que “no establecemento destes concertos sociais atenderanse aos principios de atención personalizada e integral, arraigo da persoa na contorna de atención social e libre elección da persoa usuaria”.

Así mesmo, engadiu que con estes concertos sociais as administracións públicas “darán prioridade ás entidades sen ánimo de lucro, sempre que se garanta a libre concorrencia e os principios de igualdade de trato, de non discriminación e de transparencia”, ao tempo que establecerán fórmulas para garantir o mantemento da prestación por parte das entidades que xa os viñan prestando, “cuestión que favorece a continuidade dos colectivos que traballan neste sector e contan con acreditada experiencia”.

ACORDOS MARCO PARA ATENDER A LIBRE ELECCIÓN

A reforma da Lei de servizos sociais tamén incorpora a posibilidade de que as administracións públicas poidan asinar acordos marco con entidades sociais para a prestación de determinados servizos sociais durante un período concreto de tempo. “Trátase dunha figura contractual prevista na normativa de contratos do sector público co obxectivo de atender, de forma prioritaria, a libre elección da persoa destinataria do servizo de que se trate”, explicou Marta Rodríguez.

A portavoz popular subliñou que esta proposición de Lei presentada polo Grupo Popular “nace das aportacións realizadas polo CERMI-Galicia” e se trata dun “documento aberto ás propostas dos grupos parlamentarios que melloren este texto orixinal e que permitan que saia adiante co maior respaldo posible”. 

Feijóo di que a renovación do PPdeG pon ao partido en mellor situación que en 2009

Pontevedra, 13 de marzo de 2016.- O presidente do PPdeG, Alberto Núñez Feijóo, asegurou hoxe que a renovación efectuada no partido tras os últimos congresos provinciais sitúa a esta formación en mellores condicións que en 2009 para obter unha vitoria electoral.
Así se pronunciou durante a clausura do Congreso do PP de Pontevedra, no que Alfonso Rueda foi elixido novo presidente provincial e que culmina a renovación do partido en todas as provincias galegas. Feijóo equiparou a situación actual coa que había en 2009, na que “se reparten sillóns sen ter nin acordo nin votos”. 
“Recordo como en 2009 PSOE e nacionalistas xa se estaban a repartir os cargos sen que se produciran aínda as eleccións”, asegurou, e subliñou que non se deron conta de que esas eleccións as tiñan perdidas porque o PP comezou a gañalas previamente, cando decidiu renovarse e unir as súas forzas no Congreso de renovación de Manuel Fraga, en 2006. 
Como daquela, o presidente dos populares galegos asegurou que ao longo destas semanas viu un partido vivo e activo, e que por máis que outros tapen os oídos e non queiran ver, o PP ten a voz dos 7,3 millóns de españois que o votaron. 
Precisamente con motivo desta nova etapa que o PPdeG comeza con ilusión, o presidente dos populares galegos reivindicou unha política para as persoas e con persoas con vocación de servizo, fronte a aqueles que cren que “é máis importante un tuit enxeñoso que un orzamento rigoroso”.  
Nesta liña, defendeu a política na que a experiencia é un valor, así como unha política responsable e que se poida tomar en serio, na que gañar non é o mesmo que perder porque importa o que opina a xente, na que se exerce con humildade. “E reivindico que quen mellor representa esa política é Mariano Rajoy”, concluíu. 
QUEN MELLOR REPRESENTA A PONTEVEDRA
Feijóo trasladou o seu apoio ao presidente do PP porque, segundo enfatizou, é o único candidato que actuou con responsabilidade desde as eleccións xerais. Ademais dixo que Rajoy é quen mellor podería representar a marca de Pontevedra no mundo.
No comportamento contrario, situou ás forzas políticas que teñen o país parado porque non asumen o resultado das urnas e considerou que isto “o único que ten de nova política é que nunca antes se dera tal nivel de irresponsabilidade”. 
“Pasamos do fracaso sen precedentes de Pedro Sánchez nas urnas ao fracase sen precedentes de Pedro Sánchez na investidura”, manifestou, e lamentou que parece que o terceiro fracaso que quere o candidato socialista sexa o de España. “Parece que queren que o seu fracaso sexa o de todo o país para ver se así sacan proveito”, resumiu, e solicitou que non se enroquen e permitan a España seguir adiante. 
Sobre o pacto entre PSOE e Ciudadanos, considerou que non é un pacto de investidura nin de goberno, senón de non agresión, de bloqueo e de interese electoralista. “Demostran que o país é o de menos, e prepáranse para as urnas”, dixo, e a continuación preguntouse para que, se estes partidos demostraron que o resultado das urnas lles dá igual. “Do PSOE poderíamos esperalo, pero desde logo que Ciudadanos decepciona”, trasladou.

RUEDA E LOUZÁN
Feijóo tamén felicitou ao PP de Pontevedra por ter escollido a Alfonso Rueda como novo presidente da formación. Despois de recordar que tanto a vitoria electoral de 2009 como moitas outras non serían posibles sen as súas achegas, considerou que o novo papel de Rueda é un acerto, como o foron todas as responsabilidades anteriores que el lle encomendou, tanto como secretario xeral do PPdeG como conselleiro e vicepresidente da Xunta de Galicia. 
“Cumpriu coas expectativas e coas súas funcións”, dixo e, tras recordar que Rueda foi o secretario xeral que máis tempo estivo no seu cargo na nosa historia, asegurou que o PPdeG tamén tivo nel a un “bo tipo”. 
Igualmente, tamén recoñeceu o papel de Rafael Louzán á fronte do PP pontevedrés ao longo dos últimos anos. Así, recordou que o azul do PPdeG estivo sempre nos mapas de Pontevedra en todas as eleccións, en ocasións de xeito abrumador, e apuntou que tantas vitorias electorais se acadan con dedicación e esforzo. Por iso, agradeceulle a Louzán o seu traballo e a súa disposición permanente. “Foi quen me abriu a porta dunhas listas electorais; sei onde estou e grazas a quen estou”, engadiu.

Feijóo pide dar o máximo ante os que queren para aquí o que non lles vale para España

A Coruña, 12 de marzo de 2016.- O presidente do PPdeG, Alberto Núñez Feijóo, pediu ao seu partido dar o máximo polos galegos ante aqueles que, incapaces de chegar a un acordo no país, din que non habería problemas para xuntarse en Galicia. "Polo tanto quere para nós o que non lles vale para España", di. Así, preguntabase por que queren para aquí o que non aceptan para o resto do Estado.
Deste xeito se expresaba o líder popular na clausura do XV Congreso Provincial do PP de A Coruña, onde acompañou ao novo presidente da provincia, Diego Calvo, do que salientou o traballo e esforzo que realizou durante a súa candidatura, así como a súa xuventude e experiencia. 
O presidente tamén recordou ao seu antecesor no cargo, a Carlos Negreira, do que puxo en valor o seu carácter gañador “que soubo contaxiar a toda a militancia”, a súa cercanía e a súa capacidade de traballo. Por último, apuntou que "o PP da Coruña pode poñerse retos difíciles porque está acostumado a acadalos", lembra.
FUTURO DESPEXADO FRONTE INOPERANCIA
Na súa intervención, o máximo mandatario do PPdeG subliñou que hoxe Galicia volve crecer, posúe unhas contas públicas rigorosas e útiles, crea emprego, innova e exporta máis que nunca, e ten menos impostos, chegando incluso a non pagar polo de Sucesións. 
Aínda que tamén asumiu que queda camiño por diante, Feijóo apuntou que a nosa comunidade está superando as dificultades e ten hoxe moito máis futuro.
Nese sentido, manifestaba que, cando xa por fin estamos saíndo da irresponsabilidade socialista, hai que seguir avanzando e non caer no disparate chavista que propón Podemos. Para o presidente, fomos coñecendo a súa admiración por ideoloxías pasadas e rexímenes fracasados.
O dirixente popular dixo que, se ben Podemos fai cousas moi ben como buscar o protagonismo, protestar ou presumir, “gobernar gobernan moi mal”. Como mostra disto, Feijóo lembrou que non son quen nin de tapar os baches que son cada vez máis difíciles de sortear nas cidades galegas onde gobernan. Ademais, apuntou que neses baches poderá caer o PSOE e mesmo enterrar nelas o seu futuro, pero Galicia non. 
Feijóo incidiu en que, pese a ser o partido máis votado, os populares non se conforman e deben dar sempre máis, engadindo que iniciaron unha renovación de actitudes, de ideas e de equipos que ten ás persoas no centro, sendo esta a senda pola que continuarán.
“Nada do que conseguimos estes anos foi sinxelo pero fomos quen de acadalo”, dicía Feijóo ao tempo que aseveraba que, do mesmo xeito, conseguirán o que aínda teñen por diante. “Este partido precisa de cada un dos seus afiliados e Galicia precisa deste partido”, sentenciou. 

Feijóo avanza a elaboración do Plan de Dinamización dos Pequenos Cascos Históricos

Santiago, 10 de marzo de 2016.- O presidente do PPdeG, Alberto Núñez Feijóo, avanzou hoxe a elaboración dun Plan Estratéxico de Dinamización dos Pequenos Cascos Históricos para favorecer a conservación nestes núcleos e promover a fixación de poboación neles.
Como sinalou, na nosa comunidade hai, actualmente, 31 conxuntos históricos declarados Ben de Interese Cultural, dos cales 18 contan cun plan especial de protección, 6 non contan con este documento e outros 7 son conxuntos declarados BIC que non se corresponden con centros urbanos ou cascos vellos de cidades ou vilas.

Favorecer a conservación e fixar a poboación nos cascos históricos
Feijóo explicou que para lograr o primeiro obxectivo, o de favorecer a conservación dos cascos históricos, a redacción do plan partirá dun estudo pormenorizado e completo da situación dos centros e barrios históricos, que será elaborado por un equipo universitario multidisciplinar. Sobre esa base, como engadiu o mandatario, proporase unha estratexia xeral para a promoción, o uso e a conservación destes conxuntos históricos, sempre dende o concepto de sustentabilidade e plena protección do patrimonio.
En canto ao segundo gran obxectivo, o de fixar poboación, está previsto que o plan estableza diferentes liñas de actuación, tales como axudas de apoio á rehabilitación das vivendas; a mellora dos documentos de ordenación e planificación urbana; a mellora dos servizos de comunicación e subministros de enerxía; e tamén medidas de promoción da actividade económica.
En definitiva, segundo sinalou o líder dos populares galegos, trátase de crear unha rede de conxuntos históricos de vilas e pequenas cidades e de elaborar un plan que promova un modelo urbano sustentable nesas vilas.

Feijóo anuncia a aprobación o Plan de sendas de Galicia, con 170 Km de itinerarios

Santiago, 10 de marzo de 2016.- O líder do PPdeG, Alberto Núñez Feijóo, avanzou hoxe que o Consello aprobou o Plan de sendas de Galicia, que concreta a construción de 170 quilómetros de itinerarios seguros e integrados, desde o punto de vista dos materiais a utilizar, na paisaxe.
Como sinalou o mandatario, estas vanse construír na marxe das estradas de titularidade autonómica. Para decidir a prioridade de cada actuación, a Xunta seguirá criterios de poboación, tráfico, sinistralidade, orografía e clima.
Deste xeito, Feijóo engadiu que, nunha primeira fase, executaranse 55 sendas que discorren por máis de 75 quilómetros en sete comarcas: Bergantiños, Santiago, Salnés, A Coruña, Ferrol, A Terra Cha e Vigo.
Ademais, o Goberno galego xa está a traballar nunha segunda fase, que se estenderá ás comarcas de Lugo, Ourense, Pontevedra e O Morrazo.
Segundo explicou o presidente, en cada unha destas comarcas identificáronse aqueles treitos da Rede Autonómica de Estradas que teñen un maior potencial para que os peóns e ciclistas se despracen por eles de xeito cotián.
Do mesmo xeito, Feijóo subliñou que as sendas estarán deseñadas de xeito que perduren, se integren na paisaxe e sexan seguras. Así, contarán co pavimento integrado, bordo con sinalización, separador verde e a gabia de seguridade.
Por outra banda, destacou que se contemplan catro tipos de sendas: a completa, onde se dispón de maior espazo e a zona de peóns e o carril para bicicletas será segregado; a mixta, compartida para peóns e ciclistas; a mixta con bordo, na que a gabia de seguridade se substitúe por bordo e canalización de pluviais; e a senda mínima, onde se manteñen como elementos de identidade o pavimento integrado e o bordo con sinalización.
Logo de asegurar que a Xunta vai investir na construción destas 55 sendas da primeira fase do Plan 26,3 millóns de euros, Feijóo destacou que se trata dunha iniciativa que se enmarca no Plan de Seguridade Viaria 2016-2020 aprobado o pasado mes de febreiro e que se aliña no Plan Estratéxico 2015-2020 de Galicia no eido da promoción dunha economía baixa en carbono e fomento da mobilidade sustentable.
Segundo subliñou, o Plan de sendas é outra medida para facer de Galicia un mellor lugar para vivir, e para mellorar a calidade de vida dos galegos e que, neste caso, tamén reforza o compromiso do Goberno galego coa mobilidade sustentable.

Tellado sinala o alto aforro pola redución de altos cargos, liberados e asesores

Santiago de Compostela, 9 de marzo de 2016.- O voceiro do PPdeG, Miguel Tellado, salientou que a día de hoxe hai case a metade de altos cargos dos que había cando gobernaba o bipartito, e que, ademais, o aforro derivado da ampla redución de liberados sindicais e asesores feita polo Goberno galego supón un 40 por cento de aforro á autonomía.

E é que con motivo da apertura esta semana do ‘Portal de Transparencia e Goberno Aberto’ –que coincidía coa entrada en vigor da Lei de Transparencia- fíxose público numeroso contido inédito, que é a primeira vez que se fai de acceso público na historia da comunidade ademais de facilitarase un acceso sinxelo e directo a contido que antes se publicaba pero estaba disperso.

Nese sentido, Tellado sinalou que é preciso recordar que a Xunta conta con 103 altos cargos, aos que se suman os xefes de gabinete e de prensa, ata facer un total de 123, sendo este número practicamente un 40 por cento menos do que había co Goberno bipartito, cando se superaban os 200 cargos.

Así mesmo, matizou que os contratos de alta dirección non son altos cargos, senón persoal que  en ocasións nin sequera forma parte da Xunta, como traballadores da CRTVG ou a presidenta do Consello Económico e Social e que, aínda así, a Xunta os inclúe no seu Portal. Deste xeito, tamén aproveitou para destacar que por primeira vez se leva a cabo un exercicio de transparencia e se coñecen estes contratos e o seu custe pois, antes había moitos máis e nin tan sequera os podíamos coñecer.

O portavoz tamén salientou que os asesores supoñen hoxe a metade do gasto dos liberados sindicais polo que invita a evitar a demagoxia á hora de abordar este tipo de cuestións. Segundo o voceiro, mostra desa redución levada a cabo polo Goberno da Xunta é que, na actualidade, o custe do persoal de libre designación é de 4,73 millóns de euros mentres o dos liberados ascende aos 10,7 millóns.

E é que no tocante ao persoal eventual, nos que se inclúen os que popularmente se coñecen como asesores, compróbase unha redución do 35 por cento no seu custe.  Así mesmo, Tellado recorda que a partida para este persoal en 2008 elevábase ata os 7,62 millóns.

No caso dos liberados sindicais -con 832 traballadores recoñecidos a día de hoxe- Tellado lembrou que, se ben no 2011 se levou a cabo unha redución de 120 representantes que supuxeron un aforro de catro millóns de euros, dous anos máis tarde sumóuselle outro recorte de 200 liberados máis. Nesa ocasión, o aforro foi de cinco millóns de euros. En total, neste capítulo na administración xeral houbo unha redución do 40 por cento nos últimos sete anos.
Deste xeito, o portavoz non só pon de manifesto o aforro acometido nestes eidos desde a entrada do PPdeG na Xunta senón que celebra que este tipo de medidas permitan aos cidadáns contar cun Goberno máis aberto, accesible e controlado por todos os galegos e galegas.

Tellado pon en valor que o Goberno galego reforce a súa aposta pola transparencia

Santiago de Compostela, 8 de marzo de 2016.- O portavoz dos populares de Galicia, Miguel Tellado, puxo en valor que o Goberno galego reforce a súa aposta pola transparencia.
Así se expresou o voceiro trala apertura do Portal de Transparencia e Goberno aberto que, coincidindo coa entrada en vigor da Lei de Transparencia e Bo Goberno, abriu a Xunta co obxectivo de que os cidadáns teñan unha lei plenamente efectiva e unha Administración á que poder acceder facilmente.
Tellado celebrou que a nosa comunidade conte agora cun Goberno aínda máis aberto, máis accesible e que está máis controlado por aqueles para os que está ao servizo: todos os galegos.
E é que, grazas a esta iniciativa facilitarase un acceso sinxelo e directo a contido que antes tamén se publicaba pero que estaba disperso, como pode ser a normativa en tramitación, os efectivos de persoal público e as retribucións ou os perfís e declaracións de actividades dos altos cargos. 
Así mesmo, o Portal incorpora numerosa información inédita, da que é a primeira vez que se fai de acceso público na historia da autonomía. É o caso da relación dos bens inmobles propiedade da Xunta, a conta xeral da Comunidade, a información das viaxes dos altos cargos ou a información relativa aos liberados sindicais na Administración autonómica.  
O portavoz quixo salientar que esta medida é unha mostra máis do compromiso da Xunta por achegarse á cidadanía e por facilitar, mediante este tipo de iniciativas, que a xente tamén se acerque máis ao Goberno cunha maior información e control sobre el. 
Cómpre lembrar que, ademais, a Plataforma de Contratos publicará diariamente aqueles considerados menores que se asinen no día anterior. 
Xa nos vindeiros días, cando comecen a asinarse convenios que estean baixo a vixencia desta lei, incorporaranse ao Portal facilitando por primeira vez o acceso ao texto completo do convenio. 

GPP defenderá no pleno rexistro galego de infarto e manter rúa Álvaro Cunqueiro


O GRUPO POPULAR DEFENDERÁ NO PLENO A PRESENTACIÓN DOS DATOS DO REXISTRO GALEGO DE INFARTO DE MIOCARDIO E QUE O CONCELLO DE MADRID MANTEÑA A RÚA ÁLVARO CUNQUEIRO


·    A orde do día incorpora tres proposicións de Lei: unha sobre responsabilidade civil ambiental e Ministerio Fiscal; outra para a transferencia da AP-9 a Galicia; e a última para a reforma da Lei de servizos sociais

Santiago, 8 de marzo de 2016.- O Grupo Popular defenderá no Pleno da vindeira semana dúas proposicións non de lei a través das que se insta á Xunta a presentar os datos correspondentes ao rexistro galego de infarto agudo de miocardio e para que o Concello de Madrid manteña no rueiro municipal a rúa Álvaro Cunqueiro, xa que a acusación de “escritor franquista” carece de rigor e tal acusación falsifica e deosta a súa biografía persoal e traxectoria intelectual. A sesión plenaria incorpora a comparecencia da conselleira do Medio Rural para dar conta do plan de fortalecemento do sector lácteo.

Pedro Puy informou que o Pleno dará comezo co debate de tres proposicións de lei. A primeira, de toma en consideración dunha iniciativa lexislativa sobre responsabilidade civil ambiental e Ministerio Fiscal, á que seguirá o debate de aprobación da proposición de lei para a transferencia da titularidade e competencia da AP-9 a Galicia e o debate de toma en consideración da proposición de lei do Grupo Popular de reforma da Lei de servizos sociais, que pretende reforzar e blindar o papel das entidades de iniciativa social na prestación de servizos.

A sesión plenaria continuará coa comparecencia da conselleira do Medio Rural para informar do Plan de fortalecemento do sector lácteo. Puy explicou que nesta intervención darase conta do labor que está levando a cabo a consellería a través do Plan de Fortalecemento do sector lácteo, no que están presentes representantes da administración, a industria, a distribución, cooperativas, organizacións profesionais agrarias, o Ligal, o Centro galego de control leiteiro, as universidades e a comunidade científica.

Este grupo de traballo xa acordou o pasado 2 de marzo unha batería de propostas urxentes que o Goberno central trasladará ao Consello de Ministros de Agricultura da Unión Europea para garantir a estabilidade do sector de xeito inmediato.

INFARTO DE MIOCARDIO E RÚA ÁLVARO CUNQUEIRO

A orde do día da sesión plenaria incorpora dúas proposicións non de lei do Grupo Popular. A primeira delas, insta á Xunta de Galicia a presentar no Parlamento os datos correspondentes ao rexistro galego de infarto de miocardio, co obxectivo de adoptar as decisións oportunas para a atención destes enfermos.

Pedro Puy lembrou que o Pleno do Parlamento aprobou o 3 de decembro de 2014 unha iniciativa do Grupo Popular a través da que se demandaba á Xunta a creación dun rexistro único galego que recollera toda a información sobre morbi-mortalidade en relación co infarto agudo de miocardio, de xeito que con eses datos se adaptaran os recursos humanos e materiais ás necesidades asistenciais das distintas estruturas de xestión sanitaria.

“Desde aquela data, o Servizo Galego de Saúde deu unha serie de pasos para a creación deste rexistro, cos indicadores de calidade, datos epidemiolóxicos e asistenciais precisos para  unha planificación eficaz, eficiente e equitativa dos recursos destinados ao tratamento do infarto agudo”, dixo Pedro Puy.

A segunda proposición non de lei que defenderá o Grupo Popular ten que ver co coñecemento público da incorporación por parte do Concello de Madrid do escritor e xornalista Álvaro Cunqueiro nunha relación de persoas relacionadas co franquismo que poderían perder a honra de poñer o seu nome a unha rúa madrileña. Neste sentido, Puy salientou que “a cultura e a sociedade galega entenden que Álvaro Cunqueiro, ademais de ser un dos principais persoeiros da nosa cultura no século XX, fíxoo nunha etapa na que non era doado manter vivo o facho da nosa cultura”, polo que “todos os deputados do Grupo Popular asinamos unha proposición non de lei na que demandamos que se poña en coñecemento do Concello de Madrid a importancia que ten para a cultura galega Álvaro Cunqueiro e, polo tanto, non se lle retire esa rúa coa que se lle lembra”.

FUSIÓN DE CONCELLOS E TARXETA BENVIDA

Na sesión plenaria, o Grupo Popular tamén cuestionará ao Goberno galego sobre o proceso de fusión iniciado polos concellos de Cotobade e Cerdedo, así como pola posta en marcha da Tarxeta Benvida, que achegará 100 euros ao mes para os nenos que nazan en Galicia a partir do 1 de xaneiro de 2016.

A modo de resumo, Pedro Puy indicou que a sesión plenaria inclúe 29 iniciativas, “das que o Goberno galego  propuxo unha e o Grupo Popular outras cinco, polo que as restantes 23 cuestións son a iniciativa dos grupos da oposición”.  “Confírmase, unha vez máis, que a oposición nesta Cámara pode facer a súa labor, dado que calquera grupo que estea na oposición noutro Parlamento asinaría un reparto de materias na orde do día dun pleno semellante a esta”, sinalou.