Categoría: PP de Galicia

O presidente do PPdeG, Alfonso Rueda, enxalzou hoxe o labor das 700 concelleiras e 28 alcaldesas do partido en Galicia asegurando que, co seu traballo diario, representan “o feminismo transformador que constrúe unha sociedade cada vez máis xusta, equitativa, solidaria e diversa”.

Nun acto celebrado hoxe en Santiago de Compostela e que reuniu a alcaldesas e concelleiras do partido, o líder dos populares galegos quixo poñer en valor que unha de cada dúas concelleiras galegas son do PPdeG, que é ademais o partido con máis alcaldesas de Galicia. “Sodes mulleres, pero sobre todo sodes persoas con vocación de servizo público que, desde o goberno ou desde a oposición, dedicades a vosa vida a mellorar a vida dos galegos”, asegurou dirixíndose ás presentes.

Esta é, para Rueda, a clave do “feminismo transformador” que impulsa o seu partido e que “serve de verdade” para “cambiar a sociedade desde dentro”, demostrando que é posible facer as cousas ben se se fan con convicción e valentía. Por iso pediu a todas as concelleiras e alcaldesas que sigan sendo “un referente” e que practiquen o feminismo “sen etiquetas e sen clichés, con convencemento e con eficacia”.

“Demostremos que cremos na igualdade de verdade. Non nun concepto baleiro que algúns intentan manosear sen levalo a ningunha parte. A igualdade ten que ser un obxectivo que se acade con esforzo, con traballo diario e con políticas reais, concretas e útiles”, subliñou ao tempo que manifestaba que nin el nin o seu partido van recibir leccións sobre igualdade de ninguén.

Citou así algúns dos moitos avances conseguidos ao longo destes anos, como o feito de que hoxe en Galicia haxa máis de 540.000 mulleres traballando (case 60.000 máis que en 2009), que a nosa Comunidade fose pioneira na aprobación da Lei de Igualdade de Galicia que “blinda os dereitos das mulleres en todos os ámbitos da sociedade” ou que nunca antes como este ano se destinase tanto orzamento –935 millóns de euros– ao Plan Estratéxico de Igualdade de Oportunidades 2022-2027 .

“O orzamento do Goberno galego na área de Igualdade non serviría de nada se detrás non houbese convencemento, ganas de facer as cousas ben e eficacia na implantación de medidas. Pero, aínda así, debemos reivindicar que destinamos 180,5 millóns de euros á igualdade, a loita contra violencia de xénero e a conciliación”, remarcou insistindo en que “estas son as realidades fronte aos que falan pero fan moi pouco”.

Lonxe do conformismo, o presidente Rueda afirmou ter claro que “aínda queda camiño por percorrer” e por iso anunciou que nesta nova lexislatura se aprobará unha estratexia para o impulso do emprego feminino de alto valor engadido, fomentarase a flexibilidade laboral con medidas que afonden na conciliación familiar e continuarase apoiando ás vítimas de violencia de xénero con políticas de educación e concienciación.

“Imos seguir traballando como fixemos ata o de agora, crendo na política útil e real e demostrando que Galicia é feminista porque ten mulleres, como as concelleiras e alcaldesas do PPdeG, que nos fan todos os días sentir orgullosos”, concluíu.

CONSEGUÍMOLO XUNTAS

Logo da inauguración do acto por parte do presidente Alfonso Rueda, as asistentes recibiron unha formación en oratoria e puxeron experiencias en común nunha mesa redonda que estivo moderada pola portavoz do PP de Lugo, Elena Candia.

Co título ‘Conseguímolo Xuntas’, nela participaron María del Carmen Pieltain (concelleira en Ferrol), María Ángeles Rodríguez Rico (concelleira en Mondoñedo), Elvira Torres González (concelleira no Carballiño), e Teresa Veloso Castaño (concelleira no Porriño).

A secretaria xeral do PPdeG, Paula Prado, foi a encargada de clausurar este acto co que os populares galegos quixeron celebrar os seus éxitos electorais reivindicando a contribución das agrupacións locais da man das súas alcaldesas e concelleiras en toda Galicia.

O Partido Popular de Galicia celebra o remate dun ciclo electoral con catro eleccións e catro grandes triunfos, que se materializou nunhas cifras que ratifican o bo momento do partido: case 2 millóns e medio de votos, 151 alcaldes e alcaldesas, 1.775 concelleiros e concelleiras, 13 deputados nacionais, 14 senadores, 40 deputados autonómicos, o Goberno de Galicia e, desde o pasado domingo, dous eurodeputados en Bruxelas.

Nunha rolda de prensa ofrecida na sede autonómica do partido, a secretaria xeral Paula Prado contrapuxo así a estabilidade e o sentidiño polos que optaron os galegas e galegas ao longo deste ano fronte ao balance que presenta a oposición: “Un BNG que non deixou de enganar, unha Ana Pontón que segue perdendo eleccións, un PSOE que non cesou nas súas liortas internas e unha Yolanda Díaz que segue destruíndo partidos”.

“Elección tras elección demostramos que, cando se lle pregunta aos galegos e galegas nas urnas, somos a súa resposta”, engadiu facendo referencia ao lema de campaña dos recentes comicios europeos nos que “Galicia volveu pedirlle a España e a toda Europa responsabilidade, bo goberno e progreso”.

Todo o contrario, asegurou, do que exemplifica o PSOE e o que significa o Goberno de Sánchez, que “volveu tirar de trilerismo lexislativo para presentar a Lei de Amnistía xusto despois das eleccións”. De aí que Paula Prado non dubidase en afirmar que “Sánchez debe rematar máis pronto que tarde unha lexislatura que nunca debeu empezar”.

Centrándose no PSdeG, a secretaria xeral dos populares galegos afeoulles o “papelón” de ter que escoller entre “seguir apoiando a estafa a Galicia ou apostar polo futuro da nosa Comunidade”. Dúas cousas que “xa se demostrou que son incompatibles”.

O ESCANO GALEGO DO BNG CONVERTEUSE NUN ENGANO GALEGO

“As opcións nacionalistas e identitarias que triunfan noutros lugares non o fan aquí porque somos galegos, españois e europeos. Sen tensións nin disxuntivas”, manifestou Prado referíndose a un BNG que, na súa opinión, “adiantou as rebaixas de verán cun desconto dos seus votos á metade respecto ás autonómicas e un desconto no tempo de uso dun escano medio galego, medio catalán”.

Acusou neste sentido ao Bloque de “estafar” reiteradamente aos galegos logo de “mentir sobre o seu programa nas eleccións autonómicas, ocultar aos seus socios de papeleta durante a campaña das europeas e esconder o seu reparto de tempos co independentismo catalán”. Por todo isto, concluíu, Ana Miranda “non merece” representar a Galicia no Parlamento Europeo: “O seu escano galego converteuse nun engano galego”.

O PARTIDO CON MÁIS CONCELLEIRAS E MÁIS ALCALDESAS

A secretaria xeral do PPdeG anunciou tamén que esta fin de semana celebrarase na Cidade da Cultura un acto no que se reunirá a concelleiras do partido en toda Galicia para reivindicar que “somos o patido con máis concelleiras (700) e máis alcaldesas (29) de Galicia”.

O acto será inaugurado polo presidente Alfonso Rueda e as concelleiras protagonizarán unha mesa redonda sobre o traballo que “as fixo protagonistas da vitoria do PPdeG nas municipais”. “Xuntas celebraremos os catro triunfos electorais e seguiremos escribindo, tamén en feminino, a historia de Galicia”, concluíu.

O presidente do PPdeG, Alfonso Rueda, reivindicou hoxe que a victoria do partido nas eleccións ao Parlamento Europeo non só serve para que Europa “escoite, teña en conta e coñeza a Galicia”, senón que tamén reflexa a vinculación dos populares galegos co sentir da nosa Comunidade: “Somos orgullosamente galegos, españois e europeos porque somos como Galicia”.

Ante o Comité Executivo do PPdeG, reunido hoxe en Santiago de Compostela, o líder dos populares galegos puxo en valor que Galicia se sitúa como unha das terceiras comunidades autónomas nas que o Partido Popular acadou mellor resultados. Ademais, Lugo e Ourense foron as provincias españolas con maior número de apoio ao partido.

Un apoio que en toda Galicia ascendeu a case o 44% e que se materializou nunha vitoria en 303 concellos galegos. “Este domingo triunfou o sentidiño e os galegos votaron pola estabilidade. Agora temos o deber de trasladar ese sentidiño e esa estabilidade tamén a Europa”, engadiu Rueda neste sentido.

Fronte a un BNG que ofrece aos galegos “unha eurodeputada fixa discontinua a tempo parcial”, o presidente celebrou que Francisco Millán Mon e Adrián Vázquez vaian ser “dous eurodeputados galegos que dedicarán as 24 horas dos próximos cinco anos a traballar por Galicia”.

“Nós seguiremos traballando e reivindicando o que Galicia merece e necesita, nin máis nin menos que ninguén, senón o que nos corresponde”, concluíu en referencia á transferencia da AP-9 que se comezou a tramitar no Congreso e facendo unha contraposición cunha Yolanda Díaz que “nin ela sabe si se vai ou non” e un Pedro Sánchez que “vai empezar a pasar todas as receitas que tiña pendentes de pago”.

CONGRESO PROVINCIAL DO PP DE OURENSE

O Comité Executivo do PPdeG aprobou hoxe por unanimidade a convocatoria do 19º Congreso Provincial extraordinario do Partido Popular de Ourense, que se celebrará o próximo 13 de xullo.

Un congreso que, segundo asegurou o presidente Rueda, se enmarca dentro da estabilidade e a orde coas que se fan as cousas no partido: “Somos o partido que máis se parece a Galicia e Galicia é unha terra ordenada á que lle gustan o sentidiño e a organización”.

Poñendo en valor o apoio de máis dun 50% acadado polo partido na provincia nestas eleccións europeas, Rueda apostou por “seguir ofrecéndolle a Ourense un partido que acolle a cada vez máis persoas” e “continuar progresando dun xeito uniforme,  unido e coherente”.

O Comité Executivo do PPdeG aprobou hoxe a convocatoria do 19º Congreso provincial extraordinario do Partido Popular de Ourense, que se celebrará o próximo 13 de xullo no Pazo dos Deportes Paco Paz.

A convocatoria inclúe o nomeamento da Comisión Organizadora, que estará presidida pola deputada nacional Rosa Quintana, acompañada na vicepresidencia por Eugenia Díaz Abella. A relación de membros da comisión complétase coa secretaría, que ocupará Pablo Pérez, e con Manuel Alexandre Nóvoa e Adriana Álvarez como vogais.

O Comité Executivo tamén aprobou o regulamento do congreso, que establece os pasos a dar ata a celebración do conclave ourensán, así como os correspondentes prazos. Os militantes que desexen participar no proceso, e que terán que estar ao corrente do pagamento de cotas, terán 15 días para inscribirse.

Ata o 20 de xuño estará aberto o prazo para a presentación ante a Comisión Organizadora de precandidaturas, ás que deberán acompañar un mínimo de 75 avais. Trala proclamación de candidaturas, comezará a campaña electoral interna.

O Congreso provincial terá carácter extraordinario e porá fin ao traballo desenvolvido pola xestora. Neste tempo, o PP de Ourense obtivo o mellor resultado nacional nunha provincia da formación, co 51,11% de apoio nas Eleccións Europeas deste domingo, e o segundo mellor resultado entre as provincias galegas nas autonómicas de febreiro.

O presidente do PPdeG, Alfonso Rueda, celebrou hoxe a “abrumadora” vitoria do seu partido nas eleccións ao Parlamento Europeo asegurando que “os galegos volveron responder” co seu voto e que os resultados obtidos son a garantía de que “a voz de Galicia será escoitada en Europa”.

Nunha comparecencia na sede autonómica do partido en Santiago de Compostela ao remate do escrutinio e acompañado polos desde este momento eurodeputados Francisco Millán Mon e Adrián Vázquez, o líder dos populares galegos fixo balance duns resultados cos que Galicia se sitúa como unha das terceiras comunidades autónomas nas que o Partido Popular acadou mellor resultados.

Ademais deste dato, sinalou, Lugo e Ourense foron as provincias españolas con maior número de apoio ao partido. Un apoio que en toda Galicia ascende a case o 44% e que se materializa na vitoria en 303 concellos galegos: “Despois de gañar as eleccións municipais, as xerais e as autonómicas, volvemos gañar abrumadoramente as eleccións nas europeas co respaldo maioritario dos galegos e galegas”.

“Gañamos con case 500.000 votos, que supoñen case 200.000 máis que o PSOE e unha cifra total superior á suma dos votos obtidos por socialistas e nacionalistas”, explicou o presidente ao tempo que subliñaba que estes resultados son “os mellores” desde 2009 e que se sitúan preto de 14 puntas por riba das últimas eleccións europeas.

Aproveitou tamén a súa intervención para felicitar a Francisco Millán Mon e Adrián Vázquez por facer unha campaña ao estilo do PPdeG: “Estiveron en todos os concellos onde foi posible, falaron con todos os colectivos que puideron e sempre recollendo inquedanzas e comprometéndose a levalas ao Parlamento Europeo”.

O presidente do PPdeG, Alfonso Rueda, pechou hoxe a campaña electoral facendo un chamamento ao voto para que Galicia sexa oída en Europa e para que a nosa pesca, o noso agro e as nosas infraestruturas sexan defendidas por eurodeputados que representen o traballo, a moderación e o rigor que os galegos merecen e necesitan.

No multitudinario mitin celebrado esta tarde na cidade da Coruña, o líder dos populares galegos apelou á maioría absoluta acadada nas autonómicas asegurando que as vitorias do partido radican na súa xente, nos votantes e na militancia. Un gran equipo que nunca falla e ao que animou a ser partícipe dunha nova vitoria nas eleccións ao Parlamento Europeo deste domingo.

Consciente dos esforzos realizados nas sucesivas convocatorias electorais, Rueda pediu un novo reiterando que pagará a pena porque o Partido Popular é sempre a mellor resposta fronte aos incumprimentos, os partidismos e as desigualdades que promoven outros partidos.

Este domingo, concluíu, a resposta dos galegos é o seu voto. De aí a importancia de que todos vaian votar. Xa que, do contrario, despois haberá moitas preguntas probablemente tamén moitos arrepentimento. “Temos que responder nas urnas, con contundencia e con democracia”, remarcou o presidente.

MILLÁN MON: “A CORUÑA TEN MOITO QUE DICIR EN EUROPA”

Pola súa banda, o candidato Francisco Millán Mon quixo agradecer ao Partido Popular de Coruña o traballo realizado durante esta campaña: “Grazas, Miguel. Grazas, Diego. Sei que Coruña, tanto cidade como provincia, deron o 100% durante estes quince días de campaña”.

Reiterou que estas eleccións son moi importantes para a Unión Europea, pero tamén para Galicia e para España subliñando aspectos cruciais para o seu benestar como a pesca, a industria, os fondos europeos, as infraestruturas, a agricultura e gandería, o transporte, a enerxía ou o comercio exterior.

Sinalou que a provincia de Coruña é a quinta exportadora en España. Unha provincia que ten moito que dicir en España e en Europa: “Esta fermosa cidade, na que ninguén é forasteiro, e toda a provincia poden estar tranquilas, xa que seguirei defendendo os seus intereses en Bruxelas o próximos cinco anos, como levo facendo todos estes anos”.

Por último, Millán Mon pediu unha alta participación o próximo 9 de xuño, “que ninguén quede en casa” e sinalou que espera que o Partido Popular volva ser a opción preferida polos galegos nas urnas como nas autonómicas deste ano con Alfonso Rueda, as xerais de xullo do ano pasado con Alberto Núñez Feijóo e tamén nas municipais de maio de 2023 con Miguel Lorenzo.

“É unha oportunidade para todos os coruñeses e galegos e tamén para todos os españois de responder as políticas populistas e profundamente prexudiciais de Sánchez, así como de facer oír as súas voces en Europa”, concluíu.

ADRIÁN VÁZQUEZ: “SE QUERES QUE EUROPA AVANCE, VOTA PP”

O candidato Adrián Vázquez incidiu tamén no moito que Galicia se xoga en Europa e en España e pediu o voto dirixíndose a cada galego: “Se queres que Europa avance, vota PP. Se estás canso das mentiras, das frivolidades e da corrupción de Sánchez, vota PP. Se queres que Galicia siga rodando e exportar o noso modelo de éxito a Europa, vota PP”.

Fixo balance dunha campaña na que recorreu Galicia “de punta a punta” e “alá onde fixo falta poñer a orella e atender os problemas dos galegos que imos levar a Europa”. Un contacto directo con alcaldes, concelleiros, gandeiros, agricultores e empresarios da que se mostrou orgulloso: “A política que funciona é a de responder cando te precisan e pelexar por aportar solucións aos problemas”.

O candidato do Partido Popular ao Parlamento Europeo Adrián Vázquez realizou hoxe na súa terra, Lalín, no último día de campaña, unha visita á Gandería Xoco SC de Lalín acompañado polo coordinador de Medio Rural do PPdeG, Avelino Souto.

Unha visita na que ambos tiveron a oportunidade de coñecer de primeira man como é o dia a día desta granxa familiar de vacún de leite que comezou a súa produción na década dos 80 e que actualmente conta cun rabaño de 80 vacas frisonas e produce unha media de 81.000 litros ao mes.

Adrián Vázquez trasladou a Eva e José Manuel, os seus propietarios, a aposta do Partido Popular por unha política agrícola competitiva e con sentidiño en Europa. Unha política que fixe prazos realistas para a posta en marcha das reformas, que utilice a evidencia científica na toma de decisións e que vele porque todos dentro de Europa cumpran os mesmos requirimentos (cláusulas espello para produtos de terceiros).

Así mesmo, os populares comprométense a rebaixar a carga administrativa para agricultores e gandeiros e a flexibilizar esixencias como os barbeitos, a rotación de cultivos ou o caderno dixital. Medidas todas elas que se garantirá coa presidencia da Comisaría europea de Agricultura, que ostentará o Partido Popular.

O Partido Popular de Galicia fixo hoxe un balance destes quince días de campaña e, a dous días da xornada electoral, destacou o logro de ter acadado un fito tan importante como o compromiso da presidenta da Comisión Europea, Ursula von der Leyen, de crear un comisario específico de Pesca e que este sexa do Partido Popular.

Así o destacaron esta mañá a secretaria xeral do PPdeG, Paula Prado, e o candidato Francisco Millán Mon nun encontro con representantes do sector pesqueiro na lonxa da Coruña. Una xuntanza como as moitas que se produciron ao longo da campaña e coas que os populares galegos quixeron expoñer as súas propostas ao sector e recoller as súas necesidades.

“O PP é o Partido da Pesca, tamén en Europa, fronte a outros que agora intentan disfrazarse de defensores da pesca cando durante toda durante toda a lexislatura estiveron aliados co Grupo dos Verdes, apoiando o veto á pesca de arrastre”, sinalou a número dous dos populares galegos ao tempo que comprometía a continuación a defensa do sector primario por parte de Francisco Millán Mon e Adrián Vázquez cando a partir do luns continúen como eurodeputados.

Prado insistiu, neste último día de campaña, na importancia de acudir masivamente ás urnas explicando que quedar na casa o domingo supón “avalar a amnistía, a corrupción de Pedro Sánchez, os pactos cos independentistas, a Lei do só si é si, a discriminación a Galicia”. En definitiva, quedar na casa é “permitir que Sánchez poida dicir que todo o que está facendo está ben”.

“Fronte aos que están convertendo estas eleccións nun plebiscito sobre Sánchez, nós aspiramos a que o Partido Popular teña forza en Europa para poder defender os intereses de Galicia, da nosa pesca, do noso rural e das nosas cidades”, concluíu.

GALICIA NON SE ENTENDE SEN O MAR E A PESCA

Pola súa banda, o candidato Millán Mon quixo incidir na importancia do sector pesqueiro e da cadea mar-industria de Galicia para a nosa Comunidade na medida en que supoñen o 5% do PIB galego e que somos a primeira zona pesqueira de Europa.

“O que pase na pesca en Europa ten unha gran repercusión e un impacto directo na nosa frota”, explicou neste sentido e poñendo en valor a boa nova que supón para o sector a creación dun comisario europeo específico de Pesca que “teña en conta non só a cuestión da sustentabilidade ambiental, senón tamén a sustentabilidade económica e social”.

A IMPORTANCIA DO SECTOR PESQUEIRO NA CORUÑA

O presidente local do PP da Coruña, Miguel Lorenzo, quixo poñer o foco tamén na riqueza que crea o sector pesqueiro na cidade, do cal dependen máis de 7.000 empregos. Por iso considera fundamental que “haxa representación galega no lugar onde se toman as decisións que afectan ao noso sector”.

“Fronte á falta de compromiso coa xente do mar doutros partidos, no Partido Popular levamos no ADN a defensa do sector”, remarcou a este respecto.

O presidente do PPdeG, Alfonso Rueda, amosouse hoxe convencido, na recta final da campaña das europeas, de que Galicia será parte da resposta que a cidadanía dará ante Europa este domingo e ademais unha peza importante da vitoria do Partido Popular.

Nun mitin celebrado en Pontevedra, o líder dos populares galegos afirmou que o vindeiro domingo o partido volverá a examinarse e que, ou o resultado é moi contundente. De aí a importancia de que este domingo todos vaian votar e animen aos seus a facelo tamén.

Fronte aos que intentarán utilizar estas eleccións para validar todo o que levan feito este tempo, a cidadanía atopará sempre a resposta no Partido Popular: un partido que mantén vixentes os seus compromisos, que sempre dá a cara, que antepón sempre os intereses xerais e que defende a igualdade de todos os españois.

Do lado contrario, explicou, a alternativa sería unha esquerda que fai todo o contrario do que promete, usa as institucións no seu beneficio, foxe das explicacións, só pensa na súa supervivencia e beneficia a uns a conta de outros con amnistías e regalos fiscais.

Ante todo isto, continuou, Galicia é e será sempre a resposta. Porque, fronte aos que teñen o país paralizado, os galegos contan cun Goberno traballando a pleno rendemento dese o primeiro día.

Do mesmo xeito que, fronte aos que queren unha España débil, os galegos séntense orgullosos de ser ao tempo galegos e españois. Galicia é, en definitiva, a resposta do sentidiño e a concordia contra quen só pretende levantar muros.

MILLÁN MON: “É A OPORTUNIDADE DE RESPONDER”

O candidato Francisco Millán Mon quixo agradecer ao Partido Popular de Pontevedra o traballo realizado durante esta campaña. Sinalou que a provincia de Pontevedra é a terceira exportadora en España e, polo tanto, unha provincia que ten moito que dicir en España e en Europa. “A miña cidade e a miña provincia poden estar tranquilas, xa que seguirei defendendo os seus intereses en Bruxelas o próximos cinco anos, como levo facendo todos estes anos”, subliñou.

Reiterou que estas eleccións son moi importantes para a Unión Europea, pero tamén para Galicia e para España. Subliñando aspectos cruciais para o seu benestar como a pesca, a industria, a agricultura e gandería, infraestruturas, transporte, enerxía, financiamento ou comercio exterior.

Por último, Millán Mon pediu unha alta participación o próximo 9 de xuño para que o Partido Popular volva ser a opción preferida polos galegos nas urnas: “É unha oportunidade para todos os pontevedreses e galegos -e tamén para todos os españois- de responder ás políticas populistas e profundamente prexudiciais de Sánchez, así como de facer oír as súas voces en Europa”.

LUIS LÓPEZ: “SIGAMOS POLO BO CAMIÑO”

Pola súa banda, o presidente provincial de Pontevedra, Luis López, deu comezo á súa intervención agradecendo ao PPdeG a elección de Pontevedra para comezar e tamén para case rematar esta importante campaña electoral.

“Celebramos que hai un ano aquí gañamos –da man de Rafa Domínguez— con rotundidade unhas eleccións, fronte a unha alianza de partidos perdedores que racharon nada máis comezar o mandato. Celebramos que o sectarismo do PSOE e dese BNG pasoulle factura nesa mesma noite, cando recuperamos a Deputación de Pontevedra para toda a provincia, e celebramos que en febreiro Alfonso Rueda conquistou a súa primeira maioría absoluta, que consolida a Galicia como unha referencia política en España”, destacou o dirixente provincial.

Luís López indicou que despois de despois de lograr a vitoria en Pontevedra, en Galicia e tamén en España, agora dende o PP imos a polo triunfo en Europa: “O progreso da nosa provincia e de toda Galicia pasa, si ou si, polo que se decide en Europa e iso é o que está en xogo o vindeiro 9 de xuño”.

“Para axudar a seguir polo bo camiño no que vai a provincia contamos con dous grandes guías, os dous pontevedreses, que son os nosos candidatos. Contamos con Francisco Millán Mon, que ten a experiencia imprescindible para defender os nosos intereses en Bruxelas e con Adrián Vázquez, outro baluarte da política con maiúsculas que sabe ben o que precisa esta provincia”, rematou Luís López.

RAFA DOMÍNGUEZ: “VOTEMOS POR UN FUTURO DE OPORTUNIDADES”

O presidente do Partido Popular local de Pontevedra, Rafa Domínguez, fixo un chamamento aos veciños da súa cidade para que vaian votar este domingo “por un futuro de oportunidades e prosperidade”.

O ciclo electoral dos últimos meses, con vitorias contundentes na capital da provincia, pon de manifesto na súa opinión que “somos a opción favorita dos pontevedreses que queren un incremento das oportunidades laborais, unha mellora dos servizos sociais e unha Pontevedra en constante crecemento, que se aproveite dos fondos económicos que Europa pon a disposición dos diferentes países para executar proxectos de relevancia nas súas cidades”.

Domínguez puxo nunha balanza as políticas moderadas e afianzadas en Europa polo candidato á reelección Francisco Millán Mon, en materias tan importantes para Galicia como é o sector da pesca, coa “sombra de corrupción que rodea ao goberno de Pedro Sánchez, que sae na prensa internacional pola investigación xudicial de Begoña Gómez en vez de por defender os intereses de España no estranxeiro”.

O Partido Popular de Galicia remarca a súa aposta por afondar na internacionalización dos viños galegos coa axuda de Europa a partir do 9 de xuño na medida en que o sector viticultor e os seus produtos contribúen a crear “marca Galicia” en todo o mundo.

Así o manifestaron os populares esta mañá nunha visita á Adega Cachín na Teixeira, na que a secretaria xeral do PPdeG, Paula Prado, o candidato Adrián Vázquez e a secretaria da xestora do PP da provincia de Ourense, Sandra Quintas, contaron co propietario das instalacións, César Enríquez Diéguez, como anfitrión e guía dunha mostra do proceso de produción.

Unha adega que exemplifica moi ben o éxito do proceso de internacionalización dos viños galegos ao longo dos últimos anos. De feito, o seu tinto Peza do Rei foi elixido polo expresidente estadounidense Barack Obama para servilo os asistentes á Gala da Hispanidade ata en tres ocasións.

Adrián Vázquez quixo resaltar a “heroicidade” do traballo dos viticultores da Ribeira Sacra e a súa contribución a facer non só que Galicia conte cos mellores viños de España, senón tamén a que a nosa terra sexa coñecida en toda Europa e no mundo pola calidade dos seus produtos.

“Cada vez é máis difícil competir nun mercado globalizado debido aos altos custos e por iso nos comprometemos cos viticultores galegos a facer nosas as súas demandas e trasladalas a Bruxelas”, explicou incidindo na importancia das axudas europeas para o sector.

En clave electoral e a dous días do 9 de xuño, Adrián Vázquez remarcou que “estas non son unhas eleccións europeas”, xa que está en xogo “poder seguir axudando ao noso sector primario”. Por iso fixo un chamamento a que os galegos expresen nas urnas unha resposta coa que “a nosa mensaxe se escoite alto e claro”.

“Non queremos máis sanchismo, non queremos máis muros entre españois e europeos. O que queremos é seguir traballando por unha Unión Europea libre e aberta onde calquera que queira, poida desenvolver o seu proxecto de vida en liberdade”, concluíu.