Iniciativa en relación coa rebaixa dos nivel e dos requisitos para que un alumno aprobe, promocione ou titule no curso 2020-2021 con independencia dos suspensos
A través dos medios de comunicación, a comunidade educativa de Galicia e do resto do Estado enterouse do contido do Real Decreto-Lei 31/2020, de medidas urxentes no ámbito da educación non universitaria, que foi aprobado no Consello de Ministros do día 29 de setembro de 2020.
Unha parte do contido deste decreto, en concreto, a pretensión do Ministerio de Educación de permitir que o alumnado pase de curso e titule sen límite de materias suspensas non foi abordada na última Conferencia Sectorial de Educación, onde si se trataron e acordaron outras cuestións recollidas no devandito Real Decreto-Lei.
Esta medida, que afectará ao curso 2020-21, debe verse como unha imposición do ministerio que dirixe Isabel Celaá, xa que non foi tratada previamente coas CCAA nin cos sindicatos.
Ademais das críticas realizadas por diferentes CCAA, profesores e sindicatos están molestos con esta medida por entender que dana a calidade da educación en todo o Estado, busca maquillar as estatísticas educativas e afectará ao alumando porque xerará desigualdade.
O Grupo Parlamentario Popular de Galicia oponse a unha medida, habilitada a través do devandito Real Decreto-Lei, porque converte unha solución puntual acordada de xeito excepcional para o curso 2019-20 ante a aparición da covid -cando xa estaba iniciado e houbo que suspender a actividade presencial- nunha decisión unilateral para o curso 2020-21 que está iniciado e conta con protocolos de actuación.
Lonxe de facilitar o traballo no curso 2020-21, a decisión do Ministerio de Educación de rebaixar o nivel e os requisitos para aprobar, promocionar en nada axuda a mellorar a educación; ao contrario, significa unha merma da calidade educativa e racha coa función do sistema educativo como xerador de igualdade de oportunidades.
Este xeito de proceder por parte do Goberno do Estado, ignorando a normativa orgánica e ocultando a información nunha decisión tan importante para toda a comunidade educativa, desprestixia a educación e o traballo dos docentes e as súas familias, vai en contra da cultura do esforzo e ataca a equidade na medida en que establece cuestións como:
– A rebaixa dos criterios de avaliación, promoción e titulación, permitindo que calquera alumno ou alumna pase de curso sen importar o número de suspensos
– A supresión da avaliación final de etapa de Primaria e de ESO
– Ou a redución da duración dos módulos de formación en centros de traballo ( FCT) nos ciclos formativos.
Ademais estas medidas, tal e como xa denunciou a Xunta de Galicia e como apuntan tamén outras CC.AA., poden xerar desigualdades entre o alumnado en función do seu lugar de residencia e crea inseguridade xurídica e confusión normativa.
Galicia leva anos poñendo en marcha medidas e plans que favorecen a motivación pola aprendizaxe e que proporcionan un reforzo ao alumnado máis vulnerable, medidas que facilitaron a baixada de máis de 10 puntos da taxa de abandono escolar, pasando no ano 2009 dun 25,8% a un 21,6% no ano 2019.
Por iso, desde o Grupo Parlamentario Popular, presentamos a seguinte proposición non de lei en Pleno:
“O Parlamento de Galicia declara a súa posición contraria a que, a través dun Real Decreto-Lei que ignora o previsto na normativa orgánica de educación e que non foi pactado coas CC.AA., o Ministerio de Educación decida rebaixar o nivel e os requisitos para que un alumno aprobe, promocione ou titule no curso 2020-21 con independencia do número de materias suspensas; ao entenderse que esta medida non é acorde coa situación actual dos sistema educativo, suprime a función da educación como xeradora de igualdade de oportunidades no alumnado”.
Rexistro Iniciativa: http://www.es.parlamentodegalicia.es/Expedientes/11/PNP-000412
