Iniciativa sobre o estudo e a habilitación polo Goberno galego dunha fórmula para compatibilizar a autorización da práctica da pesca deportiva desde as dársenas portuarias coas condicións propias da actividade dos portos
O Grupo Parlamentario Popular entende que debera estudarse unha fórmula para facer compatible a práctica recreativa, coas condicións propias da actividade dos portos, procurando unha solución para que se poda pescar desde as dársenas dunha forma segura, normalizada e regulamentada.
Estamos a falar polo tanto, de estudar a posibilidade de habilitar espazos nos que os pescadores deportivos provistos da súa licenza e, cos límites e condicións que a pesca recreativa incorpora en canto ao número de capturas, especies e tamaños, poidan seguir con esta tradición.
No dereito comparado hai comunidades autónomas, como é o caso das Illas Baleares, que delimitaron as zonas portuarias concretas nas que se permite a pesca recreativa para os afeccionados con licenza, unha autorización condicionada ao cumprimento doutros requisitos, como pode ser a prohibición do lanzamento do aparello cando poidan causar danos a terceiros, ou que os pescadores non poderán deixar restos da súa actividade sobre o peirao nin realizar accións molestas para os ocupantes das embarcacións próximas, entre outras.
Ademais é posible manter esta práctica, considerada actividade de lecer, deporte e turismo, en condicións de seguridade. Non debemos esquecer que a pesca recreativa no litoral galego desenvólvese en contornas naturais ao aire libre onde se pode realizar con todas as medidas que a pandemia por coronavirus esixe en relación co distanciamento.
Tendo en conta esta situación, o Grupo Parlamentario Popular, presenta a seguinte proposición non de lei en Comisión:
“O Parlamento de Galicia insta á Xunta de Galicia a estudar e habilitar unha fórmula para facer compatible a autorización da práctica de pesca deportiva desde as dársenas portuarias, en condicións de seguridade, normalidade e sustentabilidade, e sempre que non se entorpezan os labores dos profesionais do mar e outras actividades propias dos portos”.
Rexistro: https://www.parlamentodegalicia.es/Expedientes/11/PNC-000454
