Santiago, 05 de xuño de 2018. O Grupo Popular apoiou esta tarde no Pleno do Parlamento a aprobación dunha moción dirixida a buscar solucións para os emigrantes galegos retornados procedentes de Venezuela que levan dous anos e medio sen percibir as súas pensións, e que lle corresponde aboar ao Goberno venezolano.
A portavoz de Emigración, Raquel Arias, manifestou a súa preocupación polos galegos de Venezuela, “tantos os que volveron a Galicia como os que aínda residen alí, destinando a este colectivo neste 2018 un total de 2,2 millóns de euros”.
Neste sentido, salientou que “o Goberno da Xunta está centrando os seus esforzos no país venezolano e, de feito, o 80 por cento dos beneficiarios das axudas extraordinarias ao emigrante retornado concedidas no 2017 foron para galegos da diáspora chegados de Venezuela”.
INGRESOS PERCIBIDOS, NON RECOÑECIDOS
Co voto a favor do Grupo Popular, o Parlamento galego aprobou solicitar ao Goberno de España que interveña contra o bloqueo das pensións aos emigrantes galegos retornados que cotizaron en Venezuela.
Así mesmo, engadiuse unha transacción entre o Grupo Popular e o Socialista para que, mentres se manteña a falta de pagamentos das pensións, o Imserso modifique os criterios para a concesión das pensións non contributivas, tendo en conta os ingresos reais que percibe o solicitante, e non os dereitos recoñecidos, que son os que se avalían na actualidade independentemente de que se fagan ou non efectivos. Unha fórmula que prexudica aos galegos de Venezuela.
TRASLADO AO IMSERSO
A Xunta xa ten dado traslado ao Imserso da situación que atravesa este colectivo a través de comunicacións oficiais e reunións de traballo, incidindo na necesidade de cambiar eses criterios.
O Goberno galego modificara no 2016 os criterios para acceder ás axudas de inclusión social, coas que atende as necesidades primarias, de xeito que se axustan á falta de pagos que sofren os retornados de Venezuela ao ter en conta os cartos que ingresan e non os que deberían ingresar.
Arias lembrou tamén que xa na sesión plenaria do pasado 24 de maio o Grupo Popular manifestouse a favor de facerlle requirimentos ao Goberno central en favor dos pensionados venezolanos. “Nós seguimos pensando igual que antes”, explicaba Arias, e preguntábase se a día de hoxe o presidente do Goberno, Pedro Sánchez, “mantería aquela afirmación na que aseguraba que o vínculo de Podemos con Venezuela era unha das súas razóns para non pactar co partido de Pablo Iglesias”.
A deputada popular lamentou que os grupos de En Marea e BNG non aprobasen a moción ao completo ao realizarse unha votación por puntos. “Seguen preferindo apoiar as políticas de Maduro na contra de preocuparse polos galegos e galegas que pasan necesidades”.
