O portavoz do Grupo Popular, Alberto Pazos, criticou hoxe no Parlamento de Galicia a “manipulación e a mentira feita sigla” de BNG e PSdeG cando falan de orzamentos en materia sanitaria. Neste sentido, cuestiounou “como é posible que acusen de recortar en persoal a quen dedica 134 millóns de euros máis cada ano a contratar persoal? Ou como é posible que acusen de conivencia coa industria farmacéutica a quen reduciu en 54 millóns de euros ao ano o gasto farmacéutico”.
Alberto Pazos explicou que “a planificación sensata deste Goberno galego permite que hoxe invistamos máis en persoal de atención primaria, en mellores instalacións, en recursos tecnolóxicos e moito menos en gasto farmacéutico, gracias á promoción do uso de xenéricos, boicoteada no seu momento polo PSdeG”.
31,4 POR CENTO DO ORZAMENTO PARA ATENCIÓN PRIMARIA
“Acúsannos de dedicar menos do 25 por cento do orzamento de sanidade á atención primaria, cando a realidade é que estamos destinando o 31,4 por cento, incluíndo a farmacia, como facían BNG e PSdeG cando gobernaban e como recoñece a propia Organización Mundial de Saúde na declaración Alma-ATA”, sinalou o portavoz popular.
Así mesmo, apuntou que “solicitan un informe sobre prazas, características e coberturas, no mesmo momento en que se está a negociar a regulación do cadro de persoal cos sindicatos”. “Descoñezo se o BNG non se fía da CIG ou da súa capacidade negociadora, ou se simplemente pretenden presionar para impoñer as súas propostas sobre as doutros sindicatos”, dixo.
Para rematar, e sobre “o seu mantra da privatización, os dous partidos que en catro anos aumentaron un 50 por cento o orzamento dedicado a concertos e asinaron un acordo para blindar Povisa, condicionando o deseño dun hospital público, se atreven a dar leccións sobre a defensa da sanidade pública”. Así, concluíu que “nunca a sanidade privada recibiu máis cartos que con vostedes, nunca os seguros privados estiveron máis fortes e nunca Povisa tivo mellor trato que cando PSdeG e BNG gobernaron”.
