Santiago, 3 de abril de 2018.- O Grupo Popular defenderá no Pleno da vindeira semana unha proposición non de lei a través da que se demanda á Xunta que promova as reformas legais oportunas para que poida exercer a acción penal nos xuízos por delitos de discriminación derivada ou por razón de maternidade.

Así mesmo, solicitará que se fortaleza o Comité Internacional de Expertos do Camiño de Santiago e se elabore un programa de colaboración cos centros de estudos xacobeos de cara ao vindeiro Ano Santo de 2021.

O portavoz popular, Pedro Puy, informou ao remate da Xunta de Portavoces que a sesión plenaria da vindeira semana inclúe a comparecencia do conselleiro de Sanidade para informar sobre a implantación da categoría estatutaria de enfermeiro especialista. A esta comparecencia acumularase a solicitude dos grupos de En Marea e BNG para que o conselleiro dea conta da suposta privatización de servizos sanitarios na EOXI de A Coruña.

Dentro do apartado de proposicións non de lei, a orde do día da sesión plenaria incorpora unha iniciativa conxunta de todos os grupos parlamentarios a través da que o Parlamento expresa o seu apoio ao manifesto para a flexibilización da obriga de desembarque das capturas realizadas pola flota da Unión Europea, elaborado pola Fundación Rendemento Económico Mínimo Sostible e Social (FREMSS).

CONTRA A DISCRIMINACIÓN

Por parte do Grupo Popular, defenderase unha proposición non de lei a través da que se insta á Xunta para que promova as reformas legais oportunas para defender os dereitos das vítimas e poder exercer a acción penal nos xuízos por delitos de discriminación derivada ou por razón de maternidade.

Así mesmo, e de cara ao vindeiro Xacobeo 2021, o Grupo Popular demandará que a Xunta estableza unha serie de medidas e accións para fortalecer o Comité Internacional de Expertos do Camiño de Santiago, así como un programa de colaboracións cos centros de estudos xacobeos.

Finalmente, dentro das preguntas ao Goberno galego, o Grupo Popular interesarase polas melloras que ten experimentado o Hospital do Barbanza desde a entrada en funcionamento do sistema de estruturas de xestión integrada; sobre a previsión da Xunta en relación ao número de persoas en situación de dependencia atendidas; ou sobre o balance da utilización da plataforma tecnolóxica da pesca na mellora da trazabilidade dos produtos pesqueiros.

O portavoz popular tamén informou que, logo dun acordo adoptado na Xunta de Portavoces, elevarase unha solicitude ao Presidente do Parlamento para que se dirixa ao delegado do Goberno e aos responsables da Unidade Militar de Emerxencias, así como á empresa ENCE, lembrándolles que “todas as administracións teñen un deber xenérico de colaboración” para que acepten a súa comparecencia na Comisión de Estudo sobre a política forestal e a prevención de incendios.

“O lóxico é que comparezan nesta comisión de estudo, que non trata de controlar á Administración xeral do Estado”, indicou Puy.

PRESUPOSTOS SATISFACTORIOS EN LIÑAS XERAIS

A preguntas dos xornalistas, Pedro Puy tamén indicou que “estamos satisfeitos en liñas xerais” co proxecto de orzamentos do Estado para 2018, “fundamentalmente polo importante compoñente social que incorporan, ao que se engade o desenvolvemento de determinadas obras en Galicia”.

O portavoz popular concretou que Galicia figura como a quinta comunidade autónoma con maior investimento, que neste exercicio superará o 9 por cento do total da Administración do Estado e achégase aos 1.000 millóns de euros.