Santiago, 23 de marzo de 2021.- O deputado do Grupo Popular Borja Verea demandou hoxe no Pleno do Parlamento ao Goberno de España que transfira a Galicia canto antes os fondos extraordinarios de apoio á solvencia empresarial na pandemia da Covid-19, que non penalice á Comunidade galega na distribución destes fondos e que revise o Real-Decreto para incorporar como beneficiarios a sectores afectados pola pandemia que non aparecen actualmente.
Borja Verea lembrou que desde o PPdeG “levamos pedindo insistentemente ao Goberno central que puxese en marcha axudas directas para os autónomos e empresarios afectados pola pandemia da Covid-19, do mesmo xeito que o estaban facendo outros gobernos europeos”. “O Goberno de España optou pola combinación de axudas ao emprego e axudas aos préstamos que, aínda que necesarias, xa advertimos que eran insuficientes e que faltaba un terceiro piar de axudas directas”.
AXUDAS TARDE E MAL
“Agora chega un paquete de axudas estatais tarde e mal para Galicia, ademais de aprobarse nun momento no que os datos estatísticos din que endebedamento empresarial xa é moi alto e con moito risco de insolvencia para autónomos e empresarios”, indicou. Así, engadiu que “chegan mal porque non inclúen a todos os sectores afectados e porque son un 30 por cento menos do que lle correspondería a Galicia: 340 millóns de euros”.
Na súa intervención, o deputado popular salientou os plans de rescate dispostos polo Goberno galego. “Nunca antes se convocou un plan de axudas con tanta celeridade tras chegar a un acordo co sector, nin se mobilizaron tantos recursos orzamentarios en tanto pouco tempo, nin antes se pagaron tan rápido unhas axudas”, indicou.
“Non hai ningunha comunidade autónoma nin administración que activara plans de rescate máis áxiles, máis eficaces e con menos papeleos e burocracia que os da Xunta de Galicia”, asegurou Verea.
