Santiago, 22 de maio de 2017.- O Grupo Popular defenderá no Pleno de mañá á promoción das axudas para a rehabilitación de vivendas nos arredores de todos os Camiños de Santiago como mínimo ata o vindeiro ano 2020.
O portavoz popular, Pedro Puy, indicou esta mañá que na sesión plenaria debaterase a primeira iniciativa lexislativa popular da presente lexislatura, aínda que se trata dun texto que vén da lexislatura pasada, que demanda a creación do hospital público e único de Pontevedra mediante a ampliación do Hospital Montecelo.
PLAN FUNCIONAL
Puy salientou os avances realizados na tramitación deste novo hospital público en Pontevedra e concretou que na actualidade estase elaborando o plan funcional que definirá esta infraestrutura sanitaria para as vindeiras décadas. Neste sentido, salientou “a implicación que está a ter tanto o concello, como os profesionais e a cidadanía”, apuntando que máis de 300 profesionais da área fixeron suxestións sobre a elaboración do plan funcional, así como máis de 2.300 cidadáns fixeron aportacións a través dunha enquisa pública realizada pola Xunta sobre o plan funcional
Tamén no ámbito sanitario, o portavoz popular indicou que está prevista a comparecencia no Pleno do conselleiro de Sanidade para dar conta das melloras que se van introducir no ámbito da atención primaria en Galicia. “Hoxe en día existen novas demandas como consecuencia do envellecemento e da cronicidade das enfermidades, pero tamén se abren novas posibilidades a través das novas tecnoloxías”, manifestou.
AXUDAS VIVENDAS DO CAMIÑO
Por parte do Grupo Popular, Pedro Puy subliñou a defensa dunha proposición non de lei a través da que se demanda ao Goberno galego un plan de axudas dirixido á rehabilitación das vivendas do Camiño de Santiago. “O obxectivo é preparar a ruta xacobea de cara ao vindeiro Ano Santo de 2021, ao tempo que se revitaliza e se dan maiores oportunidades ao mundo rural”, indicou.
Puy lembrou que esta proposición non de lei súmase á iniciativa xa presentada polo Grupo Popular no Parlamento de comezar a xestionar a aprobación de beneficios fiscais para o Ano Santo, “que permitirá impulsar importantes investimentos nos municipios polos que discorre o Camiño”.
En segundo lugar, o Grupo Popular demandará ao Goberno central que mellore e clarifique a regulación da publicidade sanitaria para evitar anuncios enganosos, limitando todo aquilo que poda constituír un risco para a saúde. Neste sentido, fixo referencia á produtos presentados “como útiles para o diagnóstico, prevención e tratamento de determinadas enfermidades sen que esa publicidade se axuste ás normas que regulan o requisito de veracidade que se esixen no ámbito sanitario”.
