10 de febreiro de 2023. A deputada do Grupo Popular Ana Belén García Vidal destacou hoxe no Parlamento galego que a Xunta rexenerou máis de 16 millóns de metros cadrados de bancos marisqueiros desde o ano 2010 e sementou máis de 277 millóns de unidades de semente de ameixa.
“Estas medidas contribuíron a que a produción marisqueira de Galicia roldase nos últimos anos as 8.000 toneladas comercializadas”, apuntou.
Ana Belén García explicou que a Consellería do Mar ten establecidas dúas ordes de axudas ás que poden acceder ás confrarías de pescadores para a recuperación dos bancos marisqueiros: axudas para a conservación e restauración da biodiversidade e dos ecosistemas mariños; e axudas que contribúan á protección e recuperación da biodiversidade mariña a través dunha mellor xestión e conservación dos recursos mariños e dos seus ecosistemas.
REDE ENTRE SECTOR PESQUEIRO E ORGANISMOS CIENTÍFICOS
“Así, entre os anos 2010 e 2022, puxéronse a disposición deste sector máis de 20 millóns de euros, aprobándose 348 proxectos e financiándose outras 44 accións impulsadas directamente pola Consellería”, concretou. Só na convocatoria de axudas para a conservación e restauración da biodiversidade do ano 2022 se aprobaron 30 proxectos para a rexeneración de bancos marisqueiros, por importe de 1,2 millóns de euros.
No que se refire á situación microbiolóxica, houbo unha melloría en 37 zonas de produción de mariscos bivalvos: 13 correspondentes con polígonos de bateas e 24 son zonas de moluscos infaunais. Ademais, as zonas C pasaron de ser o 15,3 por cento do total en 2009 a quedar no 9,2 por cento na actualidade, ao tempo que as zonas A pasaron do 3,1 por cento ao 18,3 por cento neste mesmo período.
Así mesmo, Ana Belén García lembrou que a Xunta creou o pasado mes de xullo unha rede entre o sector pesqueiro e organismos científicos cos obxectivos de avanzar no coñecemento do estado dos recursos e dos factores que inflúen na súa situación para mellorar a súa xestión e impulsar a produción; e que os profesionais do mar poidan plantexar estudos ou colaboracións cos organismos científicos de Galicia na busca de dar solucións ás distintas situacións.
