20 de xuño de 2023. O Grupo Popular demandará ao Goberno de España no Pleno da vindeira semana a convocatoria urxente dunha xuntanza do Comisionado do Corredor Atlántico con representantes das comunidades autónomas de Galicia, Asturias e Castela e León, co fin de avanzar nas actuacións e compromisos que se consideraron prioritarios; e unha rectificación na falta de planificación na xestión dos fondos europeos de recuperación, ofrecendo certezas para poder levar a cabo proxectos tractores para Galicia pendentes de financiamento.

Ao remate da Xunta de Portavoces, o portavoz popular, Pedro Puy, informou que a sesión plenaria dará comezo coa toma de posesión dos deputados que se incorporan ao Parlamento galego en substitución dos novos alcaldes que tomaron posesión o pasado sábado, ao que seguirá o debate, para a súa aprobación, do proxecto de Lei reguladora dos xogos de Galicia, que adapta a lexislación existente do ano 1985 á realidade actual para protexer ás persoas máis vulnerables fronte a unha posible adición.

CULTURA EN AUXE

A continuación terá lugar a comparecencia, a petición propia, do conselleiro de Cultura, Educación, FP e Universidades para dar conta da situación do sector cultural galego, un dos ámbitos que se viu máis afectado polas medidas de prevención que obrigou a adoptar a pandemia da Covid-19. Esta situación motivou que a Xunta fora a primeira comunidade autónoma en aprobar un plan específico para a recuperación do sector cultural, ao tempo que solicitou ao Goberno central a convocatoria dun PERTE Cultural, medida que foi rexeitada.

Pedro Puy salientou que a cultura galega “soubo recuperarse e hoxe moitos dos indicadores xa son mellores aos de antes da pandemia”.

Dentro do apartado de proposicións non de lei, o Grupo Popular solicitará a urxente convocatoria dunha xuntanza do Comisionado do Corredor Atlántico coas comunidades de Galicia, Asturias e Castela e León para avanzar nas actuacións e compromisos que se identificaron como prioritarios no desenvolvemento desta infraestrutura estratéxica.

O portavoz popular lembrou que a Xunta ten solicitado en varias ocasións unha reunión co Comisionado do Corredor Atlántico, respaldada incluso por un mandato unánime do Parlamento galego e pola incorporación a través da Comisión de Transportes da Unión Europea como proxecto prioritario da rede transeuropea, “pero seguimos sen saber nada a piques de rematar a lexislatura, polo que consideramos necesario que esta cuestión estea enriba da mesa do actual Goberno de España e do que saia das elecccións do vindeiro 23 de xullo”.

BAIXO NIVEL DE EXECUCIÓN DOS FONDOS EUROPEOS

En segundo lugar, o Grupo Popular solicitará ao Goberno de Pedro Sánchez que rectifique a falta de planificación que lle caracteriza na xestión dos fondos europeos de recuperación o ofreza certezas para poder levar a cabo e financiar proxectos tractores como os de Stellantis, Resonac, Sentury Tire, Altri ou Forestal del Atlántico.

Pedro Puy incidiu que “a centralización dos fondos Next Generation está a provocar un baixo nivel de execución dos mesmos, co que Galicia está perdendo unha oportunidade única para impulsar proxectos tractores de grande importancia e impacto no seu ámbito laboral e económico”. Ao mesmo tempo, o Goberno central está a conceder axudas directas a Cataluña e Valencia para o vehículo eléctrico e comprometendo a Asturas fondos do PERTE de descarbonización antes incluso de convocalo.

A orde do día do Pleno da vindeira semana tamén inclúe unha proposición non de lei conxunta dos tres grupos parlamentarios a través da que se insta á Xunta a promover campañas de información e sensibilización sobre a vinculación entre as complicacións médicas asociadas á enfermidade renal crónica e a diabetes mellitus tipo 2, para lograr unha maior prevención primaria desta enfermidade. Así mesmo, pídese desenvolver unha abordaxe temperá e multidisciplinar do paciente con estas patoloxías, impulsando plans específicos con dotación económica.

Para rematar, e dentro do apartado de preguntas ao Goberno galego, o Grupo Popular solicitará unha valoración do compromiso de manter a gratuidade para a totalidade do alumnado nas escolas infantís de Galicia e sobre as infraestruturas viarias de competencia estatal na Comunidade galega. Tamén se pedirá un balance das políticas impulsadas pola Xunta en materia de prevención e loita contra a violencia de xénero nos últimos anos