Santiago, 29 de abril de 2021.- O portavoz de Asuntos Sociais do Grupo Popular, Alberto Pazos, subliñou hoxe no Parlamento que “a vontade de transparencia do Goberno galego respecto do impacto da Covid-19 nas residencias de maiores galegas é total, e non ten máis límite que a normativa legal”.

Alberto Pazos lembrou que “a Xunta facilitou desde o comezo da pandemia información detallada sobre a evolución da Covid-19 nas residencias galegas, incluíndo os datos individualizados de falecemento en cada un dos centros residenciais, contaxios, curacións ou traslados a residencias integradas, entre outros”.

INFORMACIÓN ÚTIL

“Se trasladaba así ao conxunto da sociedade unha información útil que pretendía trasladar certezas sobre a realidade nas residencias, nun momento en que, debido á natureza da propia pandemia, os familiares dos residentes non podía visitar os centros”, apuntou.

O portavoz popular manifestou que “ninguén cuestiona o seu dereito á información, pero ese dereito non é universal ou ilimitado, senón que está condicionado por un ordenamento xurídico que establece obrigas respecto á protección de datos e o uso dos mesmos, e que a Xunta tamén está obrigada a cumprir”.

INCOHERENCIA DE BNG E PSDEG

“A actuación transparente do Goberno galego contrasta moi positivamente coa que mantivo o Goberno de Pedro Sánchez”, sinalou Pazos, quen se referiu en concreto á suspensión do portal público de transparencia, ao intento de amordazar aos medios de comunicación, a opacidade total sobre os datos das residencias de maiores ou aos datos irreais sobre o número de falecidos por Covid-19.

Pero, ademais, Alberto Pazos contrapuxo “a actitude que manteñen o BNG e o PSdeG con un e outro Goberno: en Santiago, máxima esixencia; e en Madrid, absoluto silencio”. “A incoherencia chega ata tal punto que esixen no Parlamento galego a creación dunha comisión de investigación que ao mesmo tempo vetan no Congreso”, apuntou.